राैतहट,१० गते असार । रौतहटको बौधिमाई नगरपालिकाको नगरसभा बिथोलिएको छ । नगर प्रमुख प्रदीप यादवले एकलौटी गर्न खोजेको भन्दै बहुमत सदस्यले नगरसभा बहिस्कार गरेका छन् । नगरसभा हुन नदिन कार्यालय प्रमुख सन्देश यादवको ठुलो भूमिका रहेको बताइएको छ । 
जुन नगरपालिकामा भए पनि कार्यपालिकामा भाँडभैलो मच्चाउने गरेका कार्यालय प्रमुख यादवले नगरसभा सदस्यलाई मिलाउन नसकेको कारण नगर प्रमुख यादव नगरसभामै एक्लिएका हुन् । नगरसभाका ४९ सदस्यहरुमध्ये ३३ जनाले बहिस्कार गरेका छन् । वडा नम्बर ३ का वडाध्यक्ष मणिभूषण साहले नगर प्रमुख यादवले नगरसभा गर्नुृपुर्वका कुनै काम नगरेको र सबै काम एकलौटी गर्न खोजेको आरोप लगाएका छन् । आफूहरुले नगरसभा वैधानिक किसिमले सम्पन्न गर्नका लागि ३२ जना नगरसभा सदस्यको हस्ताक्षर गरी बुझाएको भए पनि कुनै वास्ता नगरेको कारण बाध्य भएर बहिस्कार गर्नुपरेको बताएका छन् । 
बौधिमाई नगरपालिकाका नगर उपप्रमुख प्रमिलादेवी जयसवालले नगरसभा पूर्ण रुपमा अबैधानिक किसिमले सम्पन्न गराउन खोजेको भन्दै आक्रोशित हुँदै ब्यानरसमेत च्यातेकी छन् । नगरसभामा बहुमत सदस्य नरहेको अवस्थामा बलजफ्ती नगरसभा गरेको आरोप लगाउँदै बाध्य भएर हस्तक्षेप गर्नु परेको बताएकी छन् । बोधिमाई नगरपालिकाका ९ वडाध्यक्षमध्ये ५ वडाध्यक्षले बहिस्कार गरेका छन् । विधि र प्रक्रियापूर्वक नगरसभा नगरिए आफूहरुले निरन्तर प्रतिकार गर्ने वडा नम्बर ९ का अध्यक्ष मुक्तिनारायण मिश्रले बताएका छन् । कडा सुरक्षा व्यवस्था गरिएको नगरसभा स्थलमा पत्रकारहरुलाई पनि प्रवेशमा निषेध गरिएको थियो ।
नगरसभा बिथोलिएको विषयमा नगरप्रमुख यादवसित सम्पर्क गर्न खोज्दा नगर प्रहरीले आदेश नभएको भन्दै नगरप्रमुखसित भेट गर्न दिएन । नगरप्रमुख यादवको मोबाइल भने स्वीच अफ थियो । नगरसभाबाट बाहिरिएपछि उपप्रमुख जयसवाल, वडाध्यक्ष र नगरसभा सदस्यहरुले नगरप्रमुखविरुद्ध नाराबाजीसमेत गरेका थिए
