काठमाडौं, भदौ २७ – हालै देशव्यापी रूपमा भएको जेन्जी आन्दोलनमा अन्धाधुन्ध गोली चलाइँदा दर्जनौँ युवाहरुको ज्यान गएको घटनाले लोकतान्त्रिक समाजवादी पार्टी नेपाल (लोसपा) गहिरो दुःख व्यक्त गरेको छ । पार्टीका उपाध्यक्ष तथा प्रवक्ता डा. आभाष लाभद्वारा हस्ताक्षरित प्रेस विज्ञप्तिमा मृतकप्रति श्रद्धाञ्जली अर्पण गर्दै घाइतेहरूको शीघ्र स्वास्थ्यलाभको कामना गरिएको छ ।
विज्ञप्तिमा भनिएको छ, “ऐतिहासिक, सार्वजनिक तथा व्यक्तिगत सम्पत्ति जलेर नष्ट भएको घटनाप्रति पनि पार्टी संवेदनशील छ।” साथै, संविधानलाई आधार मानी संघीयताको मर्म विपरीत नजाने गरी, मुलुकमा शान्ति र स्थायित्व शीघ्र स्थापित गर्नुपर्नेमा जोड दिइएको छ ।
लोकतान्त्रिक समाजवादी पार्टीले समाधानको खोजीमा संघीय लोकतान्त्रिक मोर्चाको अभिमतलाई सम्मान गर्दै अघि बढ्न सरकार र सबै सरोकारवालाहरुलाई आग्रह गरेको छ ।
जेन्जी आन्दोलन पछिल्लो समय युवा पुस्ताले पुराना राजनीतिक प्रणालीप्रति व्यक्त गरेको असन्तोषका रूपमा देखिएको छ । तर, यस आन्दोलनको क्रममा भएको हिंसा र राज्यद्वारा गरिएको बल प्रयोगको चौतर्फी आलोचना भइरहेको छ ।
