राैतहट-पेट्रोल पम्पहरु बन्द भएपछि बोतलमा कारोबार फस्टाएको छ । घुम्ती तथा किराना पसलमा बोतलमा राखेर पेट्रोलको कारोबारमा व्यापक बृद्धि भएको छ । पेट्रोलियम ढुवानी मजदुरले श्रम ऐनअनुसार तलब र अन्य सुविधाका साथै विभिन्न मागहरु राखेर आइतवारदेखि आन्दोनलमा उत्रिँदा त्यसको सोझो असर पेट्रोल पम्पमाथि परेको छ ।
सोमवार बिहानदेखि पेट्रोलियम पदार्थको मूल्य घटेको र सोमवारदेखि नै पेट्रोलियम ढुवानी मजदुरहरुको आन्दोलन सुरु भएकोले पेट्रोल पम्पका मालिकलाई मौकामा चौका भएको छ । सर्लाही र रौतहटका करिब सबै पेट्रोल पम्ले पेट्रोल छैन भनिरहेका छन् । करिब करिब पेट्रोलको कारोबार ठप्प भएको छ । 
सर्वसाधारण ग्राहकले पेट्रोल नपाएपछि बोतलको पेट्रोल किन्न बाध्य भएका छन् । पेट्रोल पम्पमा पेट्रोल नपाए पनि घुम्ती तथा किराना पसल र अन्यत्र बोतलका कुनै कमी छैन । सरकारले बोतलमा पेट्रोल बेच्न पूर्ण रुपमा रोक लगाएको भए पनि बोतलमा पेट्रोल बेच्न रोकिएको छैन । 
पेट्रोल पम्पका मालिकहरुले पेट्रोल लुकाएर सर्वसाधारणलाई बेचिरहेका छैनन् । रौतहटको माधव नारायण नगरपािलका ५ का उपभोक्ता ओमप्रकाश यादवले पेट्रोल पम्पवालाहरुले भाउ घटेको समया जहिले पनि नाटक देखाउने गरेको आरोप लगाउँछन् ।
जहिले पेट्रोलको भाउ घट्छ तहिले अभाव देखाएर सर्वसाधारणबाट ठुलो रकम बोतल बिक्रेताको हातमा जाने गरेको छ । रौतहट र सर्लाही लगायत सबै ठाउँको पेट्रोल पम्प बन्द भएपछि घुम्ती तथा पानको दोकानबाट सर्वसाधारण प्रति बोतल २०० रुपैयामा किन्न बाध्य भएका छन् ।
कतिपय पेट्रोल पम्पको छेउमै रहेको किराना, घुम्ती तथा पान दोकानमा बोतलमा पर्याप्त पेट्रोल पाइरहेको छ तर पेट्रोल पम्पमा भने लेखिएको छ – पेट्रोल छैन । रौतहटको कटहरिया नगरपालिका ३ का चन्दन यादवले पेट्रोल पम्पहरुले सर्वसाधारणलाई नदिने तर बोतलमा राखेर बेच्नेलाई पेट्रोल उपलब्ध गराउने गरेको आरोप लगाउँछन् ।
एक लिटरको बोतल भनिए पनि साढे आठ सय मिलिलिटरदेखि साढे नौ सय मिलिलिटरसम्मको बोतल हुन्छ । एक लिटर भनेर उपभोक्ताले किनेको पेट्रोलको नापमा कम हुने र निकै महँगोमा किन्नु पर्ने भएकोले उपभोक्ताहरु दोहोरो मारमा परिरहेका छन् ।
स्थानीय प्रशासनले बोतलमा पेट्रोल बेच्नेमाथि कारबाही गर्नुपर्ने माग उपभोक्ताहरुले गरेका छन् ।
