महोत्तरी, माघ १ गते
महोत्तरी — विभिन्न नाकाबाट भन्सार छली गरी चोरी पैठारीबाट नेपाल ल्याइएको २१ लाख मुल्य बढीको कपडा प्रहरीले बरामद गरेको छ ।
गौशाला नगरपालिका-२, निगौल हुँदै ३ वटा टेम्पु र २ वटा मोटरसाइकलमा ल्याइएको कपडा भन्सार छलेर ल्याएको भन्ने सुचनाको आधारमा सोमबार विहान ४ बजे प्रहरीले नियन्त्रणमा लिएको थियो ।
५वटा सवारीबाट भन्सार छली गरी ल्याइएको २१ लाख २८ हजार ३ सय मूल्य बराबरको विभिन्न कपडाहरु नियन्त्रणमा लिइएको जिल्ला प्रहरी कार्यालय महोत्तरीका प्रहरी नायव उपरिक्षक दिलिप कुमार गिरीले जानकारी दिए ।
प्रहरीका अनुसार दुई भारतीय नम्बरको मोटरसाइकल र ०२–००१ ह १७२३ नम्बरको हरियो रंगको टेम्पो, स १ ह ५२८० नम्बरको निलो टेम्पो र प्र ०४–००१ ह ०१५२ नम्बरको निलो रंगको टेम्पोसहित भन्सार छलेर ल्याएको सामान प्रहरीले नियन्त्रणमा लिएको छ ।
बरामद भएका सामान सहित नियन्त्रणमा लिएको सवारी र चालकलाई पनि आवश्यक कारबाहीका लागि जलेश्वर भन्सार कार्यालय पठाइने प्रहरीले जनाएको छ । स्रोत आनलाइन
