काठमाडौं पुष ६,
: काठमाडौंको नयाँ बसपार्क क्षेत्रमा किशोरीहरूलाई गेष्ट हाउसमा राखी वेश्यावृत्तिमा लगाउने सुमन तामाङ पक्राउ परेका छन्।
नेपाल प्रहरीको मानव बेचबिखन ब्युरोका प्रवक्ता कृष्णप्रसाद पंगेनीका अनुसार नुवाकोट तादीका सुमनले ग्राहकको रोजाइअनुसार १८ वर्षभन्दा कम उमेरका बालिकाहरूलाई गेष्ट हाउसमा बन्धक बनाएर यौनधन्दामा लगाउँदै आएका थिए। उनले एजेन्ट राखेरै ग्राहक खोज्ने गरेको थिए। ग्राहक खोजेवापत एजेन्टलाई एक हजारसम्म दिने गरेका थिए। प्रहरीका अनुसार गेष्ट हाउसमा बालिकाहरूलाई लहरै राखी ग्राहकलाई रोज्न लगाउने गरेका थिए।
काठमाडौं जिल्ला टोखा नगरपालिका–९ नयाँबसपार्कमा रहेका विभिन्न होटल-गेष्ट हाउसहरूमा नाबालिकाहरूलाई ललाइफकाइ विभिन्न किसिमको प्रलोभनमा पारी वेश्यावृत्ति तथा यौनजन्य कार्यमा लगाउने गरेको सूचना प्रहरीले पाएको थियो।
प्रहरीले यौनजन्य कार्यमा लगाइएका ४ जना नाबालिकाहरूलाई उद्धार गरेको छ। प्रहरीका अनुसार अभियुक्तले विपन्न तथा आर्थिक अवस्था कमजोर भएका बालिकाहरूलाई ललाइफकाइ होटल÷गेष्ट हाउसहरूमा वेटर तथा सरसफाइको काममा लगाइ दिने भनी वेश्यावृत्ति तथा यौनजन्य कार्यमा लगाउने गरेका थिए।
बालिकाहरूलाई वेश्यावृत्ति तथा यौनजन्य कार्यमा लगाएबापत ग्राहकहरूबाट प्रतिव्यक्ति ५ हजारदेखि ७ हजार रुपैयाँसम्म लिने गरेका थिए। बालिकाहरूलाई एकै लहरमा राखी ग्राहकलाई रोज्न लगाइ रेट निर्धारण गरी यौनजन्य कार्यको लागि बाध्य पार्ने गर्थे। होटल÷गेष्ट हाउसहरूमा ग्राहकहरू ल्याउनका लागि एजेन्टसमेत नियुक्त गरेका थिए।
अनुसन्धानका क्रममा पीडित बालिकाहरूलाई विगत ५ महिनादेखि होटल÷गेष्ट हाउसहरूबाट बाहिरसमेत निस्कन नदिइ जबरजस्ती शारीरिक सम्पर्क राख्न बाध्य पार्ने गरेको खुलेको छ। पीडित बालिकाहरूको वास्तविक नाम परिवर्तन गरी नयाँ उपनाम दिइ वेश्यावृत्ति तथा यौनजन्य कार्यमा लगाउने गरेका थिए।
