कात्तिक ८ गते मन्दु गाउँकी २८ वर्षीय श्रीदेवी बोहरा, उनका छोरा ११ वर्षीय मनोज बोहरा, ८ महिनाका अर्का छोरा रहर बोहरा र ८ वर्षीय छोरी अप्सरा बोहराको हत्या भएको थियो ।
कात्तिक १० गते बिहानमात्रै चार जनाकै शव घरभित्रै भेटिएको थियो । प्रहरीले घटनामा संलग्न सोही नगरपालिकाको–७, पिना घर भई हाल बाँकेको बैजनाथ गाउँपालिका–१, चिसापानी बस्ने ३१ वर्षीय गोर्खराज शाही ‘काले’ र मन्दु गाउँकै ३१ वर्षीय गोपालबहादुर बोहोरालाई पक्राउ गरेको थियो ।
प्रहरीले शाहीलाई कार्तिक २० गते सुर्खेत, वीरेन्द्रनगरको पञ्चकोशी टोलबाट पक्राउ गरेको थियो भने बोहोरालाई उनकै घरबाट पक्राउ गरिएको जिल्ला प्रहरी कार्यालय मुगुले जनाएको छ ।
धारिलो हतियारबाट टाउको र घाँटीमा प्रहार गरी हत्या गरिएको अवस्थामा श्रीदेवीसहित छोराछोरीको शव भेटिएको थियो ।
हत्या भएको साँझ कतारमा रहेका श्रीमान् दीपक बोहोरासँग श्रीदेवीले भिडिओ कल गरिरहेकी थिइन् । तर, हत्याराले उक्त मोबाइलसमेत लगेका थिए भने त्यसपछि श्रीदेवीसहित छोराको तस्बिर दीपकलाई पठाएको पनि अनुसन्धानबाट खुलेको थियो । तर, मोबाइल भने पत्ता लागेको थिएन ।
मोबाइल पत्ता लागेसँगै घटनाको अनुसन्धान अगाडि बढाउन थप सहज हुने प्रहरीको भनाइ छ । आफन्त पर्ने गोपालबहादुर बोहोराको डिजाइनमा उक्त हत्या भएको बताइएको छ । श्रीदेवीका श्रीमान् दीपकले कतारको भिसा नपठाइदिएको रिसमा सामूहिक हत्या भएको निष्कर्ष प्रहरीको छ ।
यद्यपि उक्त घटना गोपालकी आमासँग पनि आएर जोडिएको ती अनुसन्धान अधिकृतको भनाइ छ । गोपालकी आमा र मृतक श्रीदेवीबिचको आपसी मनमुटावको कुराहरु भएको पनि अनुसन्धानबाट खुलेको छ ।
गोपाल र गोर्खबिच श्रीदेवी बोहोरासँग भएको १०÷१२ तोला सुन र नगद रुपैयाँ लुटपाट गर्ने सल्लाह भएको थियो । सोही अनुसार लुटिएको सुन गोर्खबहादुरले बिक्री गरेको पसल पनि प्रहरीले पत्ता लगाएको छ ।
ती अनुसन्धान अधिकृतका अनुसार नेपालगन्जको कुनै एक पसलमा सुन बिक्री गरिएको रहेछ । उक्त विषयमा पनि अहिले अनुसन्धान भइरहेको उनले बताए ।
घटनाको अनुसन्धानमा प्रहरी वरिष्ठ नायव निरीक्षक नारायण प्रसाद शर्मा लगायतको टोली सक्रिय छ ।
