काठमाडाैं ,मंसिर ६, २०८०
५८ सह-सचिव सरुवाको सूची भित्रभित्रै गायब भएको छ ।
संघीय मामिला तथा सामान्य प्रशासन मन्त्रालयको प्रस्तावमा मन्त्रिपरिषद्ले गरेको निर्णय कार्यान्वयनमा नआई गायब भएको हो ।
मन्त्रालयले कात्तिक १६ गते ५८ जना सहसचिव सरुवा गर्नेगरी सूची मन्त्रिपरिषदमा पेश गरेको थियो र त्यसम्बन्धमा निर्णय पनि भएको थियो ।
संघीय मामिला तथा सामान्य प्रशासन मन्त्री अनिता देवी साहले सह-सचिवहरूको सरुवा भएको त्यतिबेलै लोकान्तरसँग बताएकी थिइन् ।
तर, निर्णय भएको २० दिन बितिसक्दा पनि सरुवाको सूची सार्वजनिक भएको छैन । सरुवाको निर्णय कार्यान्वयनमा पनि आएको छैन ।
केही दिनअघि मात्र मन्त्री साहले प्रधानमन्त्री तथा मन्त्रिपरिषद कार्यालयबाट सूची नआएको लोकान्तरलाई बताइन् ।
संघीय मामिला तथा सामान्य प्रशासन मन्त्रालयका प्रवक्ता कमलप्रसाद भट्टराई पनि सरुवाको सूची मन्त्रिपरिषदमा गएपनि निर्णय भए/नभएको आफूलाई जानकारी नरहेको बताउँछन् ।
‘सरुवाको सूची मन्त्रिपरिषदमा गए पनि निर्णय भएको हो वा होइन, त्यस विषयमा मलाई जानकारी भएन,’ भट्टराईले लोकान्तरसँग भने ।
तर, मन्त्री साहनिकट स्रोतका अनुसार प्रदेशमा सरुवा गरिएका सह-सचिवहरू जान नमानेकाले सरुवाको निर्णय कार्यान्वयन हुन नसकेको हो ।
‘एकपटक प्रदेशमा बसेर आइसकेको भन्दै अब प्रदेशमा जाँदिनँ, संघमै बस्छु भन्ने अडान राखिरहेका कारण सरुवाको निर्णय कार्यान्वयन हुन सकेको छैन,’ स्रोतले लोकान्तरसँग भन्यो ।
एकपटक प्रदेशमा खटिसकेपछि बाँकी कार्यकाल संघमै बिताउन खोज्ने प्रवृत्तिका कारण समस्या भएको हो । मन्त्री साह पनि सरुवाको निर्णयमा केही प्राविधिक समस्या आएकाले कार्यान्वयन हुन नसकेको बताउँछिन् ।
‘केही प्राविधिक समस्या आएका कारण सरुवा होल्ड मात्र भएको हो । अब केही दिनमै समस्या समाधान भएपछि निर्णय कार्यान्वयनमा जान्छ,’ मन्त्री साहले लोकान्तरसँग भनिन् ।
संघीय मामिला तथा सामान्य प्रशासन मन्त्रालयका अर्का एक कर्मचारी भने सहसचिव सरुवाको निर्णय भए पनि भूकम्प र चाडबाडका कारण होल्ड भएको बताउँछन् ।
‘१३ गते मन्त्रिपरिषद बैठकमा ५८ सह-सचिवको सरुवा गर्ने निर्णय भएकै हो,’ उनले लोकान्तरसँग भने, ‘तर, १४ गते राति डडेल्धुरामा भूकम्प आयो । भूकम्पका बेला विभिन्न निकायले सेवा प्रदान गर्नुपर्ने भएकाले तत्काललाई सरुवा होल्ड गरिएको हो ।’
भूकम्पपछि तिहार र छठ पर्वमा पनि जनतालाई सेवा प्रदान गर्नुपर्ने भएकाले सरुवा होल्ड गरिएको उनले बताए ।
‘अब तिहार र छठ पर्व सकिएको छ । होल्ड भएको सरुवा केही दिनभित्रै कार्यान्वयनमा जान्छ होला,’ ती कर्मचारीले लोकान्तरसँग भने । लोकान्तर
