बज्जिकाञ्चल संवाददाता,राैतहट,असाेज ०९ गते ।
रौतहटकाे गौर नगरपालिकामा संरक्षण विषयगत क्षेत्रको स्थानियकरण तथा विपद् व्यवस्थापनसम्बन्धी १ दिने अभिमुखिकरण तालिम आज सम्पन्न भएको छ । तालिममा गौर नगरपालिकाका नगर प्रमुख शम्भु साह, उपप्रमुख, विभिन्न वडाका अध्यक्षहरू तथा नगरपालिका अन्तर्गतका शाखा प्रमुखहरूको उल्लेखनीय उपस्थिति रहेको थियो ।
कार्यशाला गोष्ठीको आयोजनामा नेपाल रेडक्रस सोसाइटी, रौतहट शाखा रहेको थियो । नेपाल रेडक्रस सोसाइटी रौतहटका सभापति राजकिशोर प्रसाद यादवले उक्त जानकारी दिनु भएको हो ।
कार्यक्रमको उद्देश्य विपद् जोखिम न्यूनीकरण तथा व्यवस्थापनमा स्थानीय तहको भूमिका सुदृढ बनाउने, संरक्षण क्षेत्रको स्थानियकरणलाई प्रभावकारी बनाउने तथा विपद् पूर्वतयारीलाई व्यवस्थित बनाउने रहेको आयोजक संस्थाले जनाएको छ ।
गोष्ठीमा सहभागिहरूले विपद् व्यवस्थापनका विविध आयामहरू, स्थानीय तहमा हुन सक्ने सम्भावित जोखिमहरू तथा तिनको न्यूनीकरणका उपायहरूमाथि व्यापक छलफल गरेका थिए ।
