काठमाडौँ । आज राष्ट्रिय सभाको बैठक बस्दैछ । संघीय संसद सचिवालयका अनुसार आज राष्ट्रिय सभाको बैठक अपराहन्न १२: १५ बजेदेखि शुरु हुदैछ ।
आज राष्ट्रिय सभामा विनियोजन विधेयक, २०८३ का विभिन्न शीर्षकहरूमध्ये विभिन्न मन्त्रालयको विनियोजन शीर्षकहरू मध्ये छलफल उठेका प्रश्नको विभिन्न मन्त्रालयका मन्त्रीले जवाफ दिने कार्यसूची रहेको संसद सचिवालयले जानकारी दिएको छ ।
आज युवा, श्रम तथा रोजगार मन्त्रालय, सूचना तथा सञ्चार मन्त्रालय, संस्कृति, पर्यटन तथा नागरिक उड्डयन मन्त्रालय, शिक्षा तथा खेलकुद मन्त्रालय, स्वास्थ्य तथा खाद्य स्वच्छता मन्त्रालय, भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालय, महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्रालय, विज्ञान, प्रविधि तथा नवप्रवर्तन मन्त्रालय र कानून, न्याय तथा संसदीय मामिला मन्त्रीले जवाफ दिने कार्यसूची रहेको छ ।एभरेष्ट न्यूज एजेन्सी
काठमाडौँ । अस्ट्रेलियाले इङ्ल्यान्डलाई सात विकेटले पराजित गर्दै महिला टी- २० विश्वकप क्रिकेटको उपाधि सातौँ पटक जितेको छ । उत्कृष्ट बलिङ प्रदर्शनपछि बेथ मुनीको अर्धशतकीय इनिङ्सको मद्दतमा अस्ट्रेलियाले सहज जित दर्ता गरेको हो ।
टस जितेर पहिले बलिङ रोजेको अस्ट्रेलियाले इङ्ल्यान्डलाई निर्धारित २० ओभरमा चार विकेट गुमाएर १५० रनमा सीमित गरेको थियो । १५१ रनको लक्ष्य पछ्याएको अस्ट्रेलियाले १७.१ ओभरमा तीन विकेट मात्र गुमाएर १५३ रन बनाउँदै उपाधि आफ्नो नाममा लेखायो ।
महिला टी-२० विश्वकपको फाइनलमा अस्ट्रेलिया र इङ्ल्यान्डबीच भएको यो चौथो भेट थियो । यसअघिका सबै फाइनलमा जस्तै यसपटक पनि अस्ट्रेलियाले इङ्ल्यान्डलाई पराजित गर्दै आफ्नो वर्चस्व कायम राख्यो ।
यसअघि अस्ट्रेलियाले सन् २०१२, २०१४ र २०१८ को फाइनलमा पनि इङ्ल्यान्डलाई हराएर उपाधि जितेको थियो । सन् २०२६ को फाइनलमा समेत विजय हासिल गर्दै अस्ट्रेलियाले विश्वकप फाइनलमा इङ्ल्यान्डविरुद्ध आफ्नो शतप्रतिशत जितको कीर्तिमान कायम राखेको छ ।
योसँगै अस्ट्रेलियाले महिला टी-२० विश्वकपको इतिहासमा कीर्तिमानी सातौँ पटक उपाधि जित्दै आफ्नो प्रभुत्वलाई थप मजबुत बनाएको छ ।एभरेष्ट न्यूज एजेन्सी
काठमाडौँ । नेपाल प्रिमियर लिग (एनपीएल) को तेस्रो सिजनको खेलाडी अक्सन आज हुदैछ ।
खेलाडी अक्सन आज अपराहन्न ३: ४५ बजेदेखि हुने छ भने यसको प्रत्यक्ष प्रशारण एनपीएलको युट्युब च्यानलमा हुने क्यानले जानकारी दिएको छ ।
आज हुने अक्सनमा तीन क्याटोगरीमा १५५ खेलाडी रहेको नेपाल क्रिकेट संघ (क्यान) ले जानकारी दिएको हो ।
जस अनुसार क्याटोगरी ए मा अर्जुन घर्ति, बिबेक यादव, आसिफ सेख, रुपेश सिंह र तृतराज दास रहेका छन् । त्यस्तै क्याटोगरी बी मा २७ जना रहेका छन् भने १२३ जना क्याटोगरी सी मा रहेका छन् ।
त्यस्तै क्यानले यस अक्सनमा हरेक टिमले २-२ जना नेपाली खेलाडी थप भइ मार्की, ट्यालेन्ट हन्टसमेत गरि १४ जना खेलाडी समावेश रहने जानकारी दिएको छ । फ्रेंचाईजीहरुले अक्सनबाट यी मध्ये ५२ खेलाडी खरिद गर्ने छन् ।
अक्सनका लागि लुम्बिनी लायन्ससँग ४९ लाख २५ हजार, सुदूरपश्चिम रोयल्ससँग ४२ लाख ५० हजार, विराटनगर किंग्ससँग ५१ लाख ५० हजार, काठमाडौँ गोर्खाजसँग ३४ लाख, पोखरा एभेन्जर्ससँग ४५ लाख ५० हजार, कर्णाली याक्ससँग ४२ लाख, चितवन राइनोजसँग ४२ लाख र जनकपुर बोल्ट्ससँग ६६ लाख २५ हजार रकम रहेको छ । एभरेष्ट न्यूज एजेन्सी
काठमाडौँ । आज प्रतिनिधि सभाको बैठक बस्दैछ । सङ्घीय संसद सचिवालयका अनुसार आज विहान ११ बजेदेखि प्रतिनिधि सभाको बैठक बस्दैछ ।
आजको बैठकमा प्रधानमन्त्री वालेन्द्र शाहको तर्फबाट माननीय कानुन, न्याय तथा संसदीय मामिला मन्त्री सोबिता गौतमले ‘नेपाल विशेष सेवा ऐन, २०४२ को साविकको व्यवस्था जगाउने सम्बन्धी विधेयक, २०८३’ लाई प्रस्तुत गर्न अनुमति माग्ने प्रस्ताव र विधेयक प्रस्तुत गर्ने कार्यसूची रहेको छ ।
त्यस्तै अर्थमन्त्री डा. स्वर्णिम वाग्लेले “नेपाल राष्ट्र बैङ्क (तेस्रो संशोधन) विधेयक, २०८३ लाई दफावार छलफलको लागि सम्बन्धित समितिमा पठाइयोस्” भन्ने प्रस्ताव प्रस्तुत गर्ने कार्यसूची छ भने संस्कृति, पर्यटन तथा नागरिक उड्डयन मन्त्री खडग राज पौडेलले राष्ट्रिय सभामा उत्पत्ति भएको ‘अभौतिक सांस्कृतिक सम्पदा (संरक्षण) विधेयक, २०८३ लाई दफावार छलफलको लागि सम्बन्धित समितिमा पठाईयोस्’ भन्ने प्रस्ताव प्रस्तुत गर्ने कार्यसूची रहेको छ ।
त्यस्तै युवा, श्रम तथा रोजगार मन्त्री रामजी यादवले अन्तर्राष्ट्रिय श्रम संगठनको बाध्यकारी श्रम महासन्धी, १९३० सम्बन्धी सन् २०१४ को प्रोटोकल नं. २९ माथि विचार गरियोस्’ भन्ने प्रस्ताव प्रस्तुत गर्ने र अन्तर्राष्ट्रिय श्रम संगठनको श्रम निरीक्षण सम्बन्धी महासन्धी, १९४७ (नं. ८१) माथि विचार गरियोस’ भन्ने प्रस्ताव प्रस्तुत गर्ने कार्यसूची रहेको संसद सचिवालयले जनाएको छ ।एभरेष्ट न्यूज एजेन्सी
काठमाडौँ । हरेक वर्ष जुलाई ६ मा विश्व ग्रामीण विकास दिवस मनाइन्छ । ग्रामीण समुदायले खाद्य सुरक्षा, गरिबी न्यूनीकरण, कृषि उत्पादन र दिगो विकासमा पुर्याएको योगदानको सम्मान गर्दै यो दिवस मनाउने गरिन्छ ।
संयुक्त राष्ट्रसंघको महासभाले सन् २०२४ सेप्टेम्बर ६ मा जुलाई ६ लाई विश्व ग्रामीण विकास दिवसका रूपमा औपचारिक मान्यता दिएको हो । यसको उद्देश्य ग्रामीण क्षेत्रमा रहेका गरिबी, असमानता र विकासका चुनौतीप्रति विश्व समुदायको ध्यानाकर्षण गराउनुका साथै कृषि, पूर्वाधार, शिक्षा, स्वास्थ्य, जलवायु अनुकूलन र रोजगारीमा लगानी बढाउन प्रोत्साहन गर्नु हो ।
संयुक्त राष्ट्रसंघका अनुसार विश्वका करिब ८० प्रतिशत अति गरिब मानिस ग्रामीण क्षेत्रमा बसोबास गर्छन्, जहाँ दैनिक आम्दानी अत्यन्त न्यून छ । यस्तै, एक अर्बभन्दा बढी मानिस बहुआयामिक गरिबीमा बाँचिरहेका छन्, जसमा आधाभन्दा बढी बालबालिका छन्। ग्रामीण क्षेत्रका करिब ५० प्रतिशत नागरिक अझै पनि आधारभूत स्वास्थ्य सेवाको पहुँचबाट वञ्चित छन्, जबकि सहरी क्षेत्रमा यस्तो अवस्था करिब २२ प्रतिशत मात्र रहेको तथ्यांकले देखाएको छ ।
विश्वभर उत्पादन हुने करिब ८० प्रतिशत खाद्यान्न पारिवारिक खेतीबाट उत्पादन हुन्छ । कृषि क्षेत्रमा महिलाको उल्लेखनीय योगदान रहे पनि उनीहरू भूमि, ऋण, आधुनिक प्रविधि र अन्य स्रोतमा समान पहुँचबाट अझै वञ्चित छन् ।
विशेषज्ञहरूका अनुसार ग्रामीण क्षेत्रमा गरिने लगानीले गरिबी घटाउने, कृषि उत्पादन बढाउने, रोजगारी सिर्जना गर्ने, खाद्य सुरक्षा मजबुत बनाउने र जलवायु परिवर्तनका असर सामना गर्ने क्षमता अभिवृद्धि गर्ने भएकाले यसलाई दिगो विकासको प्रमुख आधार मानिन्छ । यही सन्देशका साथ विश्वभर विभिन्न कार्यक्रम आयोजना गरी ग्रामीण समुदायको सशक्तीकरण र समावेशी विकासमा जोड दिइएको छ ।एभरेष्ट न्यूज एजेन्सी
काठमाडौँ । जल तथा मौसम विज्ञान विभागले हाल देशभर मनसुनी वायूको प्रभाव रहेको र मनसुनको न्यून चापीय रेखा नेपालको पूर्वी भू-भागतर्फ सरदर भन्दा दक्षिणमा र पश्चिमी भू-भागतर्फ सरदर स्थानको आसपास अवस्थित रहेको जानकारी दिएको छ ।
हाल कोशी, बागमती, गण्डकी, लुम्बिनी, कर्णाली र सुदुरपश्चिम प्रदेशमा साधारणतया बादल लागेको छ र मधेश प्रदेशमा आंशिक बादल लागेको छ । कोशी, बागमती, गण्डकी र लुम्बिनी प्रदेशको थोरै स्थानमा मेघगर्जन/चट्याङ्ग सहित मध्यमसम्मको वर्षा भईरहेको छ।
आज दिउँसो देशका हिमाली र पहाडी भू-भागमा साधारणतया बादल लाग्नेछ । गण्डकी, लुम्बिनी र सुदुरपश्चिम प्रदेशका तराई भू-भागमा पनि साधारणतया बादल लाग्नेछ । कोशी, मधेश र बागमती प्रदेशका तराई भू-भागमा आंशिक बादल लाग्नेछ । देशका हिमाली र पहाडी भू-भागका केही स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ । बागमती, गण्डकी, लुम्बिनी र सुदुरपश्चिम प्रदेशका तराई भू-भागका थोरै स्थानमा, कोशी प्रदेशको तराई तथा मधेश प्रदेशका एक-दुई स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ । मधेश प्रदेश साथै कोशी र बागमती प्रदेशको तराई भू-भागका केहि स्थानमा हावाहुरीको सम्भावना छ ।
त्यस्तै आज राति देशभर साधारणतया बादल लाग्नेछ । देशका हिमाली भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ । कोशी, गण्डकी, लुम्बिनी र सुदूरपश्चिम प्रदेशका पहाडी र तराई भू-भागका केही स्थानमा, मधेश प्रदेशका साथै कर्णाली प्रदेशका पहाडी भू-भाग तथा बागमती प्रदेशका पहाडी र तराई भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ । कोशी, गण्डकी र लुम्बिनी प्रदेशका पहाडी र तराई भू-भागका एक-दुई स्थानमा भारी वर्षाको सम्भावना रहेको छ ।एभरेष्ट न्यूज एजेन्सी
आजको राशिफल बिस २०८३ असार २२ गते सोमबार ईस २०२६ जुलाई ६ नेपाल सम्बत ११४६ तछलागा षष्ठी, रौद्र नाम संवत्सर सूर्य उत्तरायण, गृष्म ऋतु, असार कृष्ण षष्ठी, चन्द्रमा कुम्भ राशिमा, पूर्वभाद्रपदा नक्षत्र, सौभाग्य योग, वणिज करण । आज नेपालमा सुर्योदय बिहान ५ बजेर १४ मिनेटमा र सूर्यास्त साँझ ७ बजेर ४ मिनेटमा हुनेछ । आज जन्म लिने बच्चा कुम्भ राशीको हुनेछ ।
मेष (चु, चे, चो, ला, लि, लु, ले, लो, अ) –
आजको दिन उत्साह, आत्मविश्वास र नयाँ सम्भावनाले भरिएको रहनेछ। बिहानदेखि नै कामप्रति जोश बढ्नेछ र लामो समयदेखि अधुरा रहेका योजनालाई अघि बढाउने अवसर प्राप्त हुन सक्छ। कार्यक्षेत्रमा तपाईंको मेहनत, नेतृत्व क्षमता र समय व्यवस्थापनको प्रशंसा हुनेछ। नयाँ जिम्मेवारी आउन सक्छ, जसले भविष्यमा राम्रो प्रगतिको आधार तयार गर्नेछ। आर्थिक पक्षमा आम्दानी बढ्ने संकेत देखिए पनि खर्चलाई व्यवस्थित राख्न आवश्यक हुनेछ। परिवारका सदस्यहरूसँगको सम्बन्ध थप आत्मीय बन्नेछ। प्रियजनसँगको कुराकानीले मन प्रसन्न रहनेछ। स्वास्थ्य राम्रो रहनेछ, तर अत्यधिक व्यस्तताका कारण थकान महसुस हुन सक्ने भएकाले पर्याप्त आराम गर्न नबिर्सनुहोस्।
वृष (इ, उ, ए, ओ, वा, वि, वु, वे, वो) –
आज धैर्य, संयम र विवेकपूर्ण निर्णयले तपाईंलाई धेरै क्षेत्रमा सफलता दिलाउनेछ। कार्यक्षेत्रमा पुराना प्रयासको सकारात्मक प्रतिफल प्राप्त हुन सक्छ। नयाँ काम सुरु गर्नुभन्दा पहिले अधुरा जिम्मेवारी पूरा गर्नु लाभदायक हुनेछ। आर्थिक अवस्था सन्तुलित रहनेछ र बचत गर्ने अवसर पनि मिल्नेछ। परिवारमा खुसी र समझदारीको वातावरण रहनेछ। आफन्त वा पुराना साथीसँगको भेटले मनलाई हल्का बनाउनेछ। स्वास्थ्य सामान्य रहनेछ र मानसिक रूपमा पनि शान्ति तथा सन्तुष्टिको अनुभूति हुनेछ।
मिथुन (का, कि, कु, घ, ङ, छ, के, को, ह) –
आज व्यस्तता बढे पनि त्यसको परिणाम उत्साहजनक रहनेछ। कार्यक्षेत्रमा नयाँ जिम्मेवारी वा अवसर प्राप्त हुन सक्छ। तपाईंको बोल्ने शैली, सिर्जनात्मक सोच र व्यवहारले अरूको मन जित्नेछ। सहकर्मी तथा साथीभाइको सहयोगले कठिन काम पनि सहज रूपमा सम्पन्न हुनेछ। आर्थिक पक्षमा साना–साना लाभका अवसर प्राप्त हुन सक्छन्। अध्ययन, लेखन, सञ्चार तथा सिर्जनात्मक क्षेत्रमा विशेष सफलता मिल्ने सम्भावना छ। परिवारसँग बिताएको समयले मनमा नयाँ ऊर्जा थप्नेछ। स्वास्थ्य पनि सन्तोषजनक रहनेछ।
कर्कट (हि, हु, हे, हो, डा, डि, डु, डे, डो) –
आज पारिवारिक सम्बन्धलाई अझ मजबुत बनाउने दिन रहनेछ। घरमा खुसी, मेलमिलाप र सहयोगको वातावरण कायम रहनेछ। कार्यक्षेत्रमा तपाईंको इमानदारी, लगनशीलता र जिम्मेवारीको उचित मूल्यांकन हुनेछ। रोकिएका काम पूरा हुने सम्भावना बलियो छ। आर्थिक पक्षमा सामान्य सुधार आउने संकेत देखिन्छ। कुनै शुभ समाचारले मनमा नयाँ उत्साह थप्न सक्छ। स्वास्थ्य राम्रो रहनेछ र मानसिक रूपमा पनि सन्तुलित तथा प्रसन्न महसुस हुनेछ।
सिंह (मा, मि, मु, मे, मो, टा, टि, टु, टे) –
आज आफ्नो प्रतिभा र नेतृत्व क्षमता प्रदर्शन गर्ने राम्रो अवसर प्राप्त हुनेछ। कार्यक्षेत्रमा वरिष्ठ व्यक्तिहरूको विश्वास जित्न सफल हुनुहुनेछ। नयाँ जिम्मेवारी वा पदसँग सम्बन्धित विषयमा सकारात्मक संकेत देखिन सक्छ। आर्थिक रूपमा लाभका अवसर देखिए पनि ठूलो लगानी गर्दा सोचविचार गरेर मात्र निर्णय गर्नु उचित हुनेछ। सामाजिक क्षेत्रमा सम्मान र प्रतिष्ठा बढ्ने सम्भावना छ। परिवारको साथ र प्रोत्साहनले मनोबल थप बलियो बनाउनेछ। स्वास्थ्य सामान्यभन्दा राम्रो रहनेछ।
कन्या (टो, प, पि, पु, ष, ण, ठ, पे, पो) –
आज अध्ययन, अनुसन्धान, तालिम वा नयाँ ज्ञान प्राप्त गर्ने काममा राम्रो सफलता मिल्नेछ। आफ्नो सीप र अनुभवलाई व्यवहारमा उतार्ने अवसर प्राप्त हुन सक्छ। कार्यक्षेत्रमा निरन्तर मेहनतले अपेक्षाभन्दा राम्रो परिणाम दिनेछ। आर्थिक अवस्था सामान्य रहनेछ, तर अनावश्यक खर्च नियन्त्रण गर्नु आवश्यक हुनेछ। परिवारमा सुखद वातावरण कायम रहनेछ। छोटो यात्रा वा बाहिरी भेटघाट लाभदायक बन्न सक्छ। स्वास्थ्य सामान्य रहनेछ, नियमित दिनचर्या अपनाउनु लाभदायक हुनेछ।
तुला (रा, रि, रु, रे, रो, ता, ति, तु, ते) –
आज आर्थिक क्षेत्रमा उल्लेखनीय सुधार आउने सम्भावना छ। रोकिएको रकम प्राप्त हुने, व्यापारमा लाभ बढ्ने वा नयाँ आम्दानीको स्रोत खुल्ने संकेत देखिन्छ। कार्यक्षेत्रमा सहकार्य र समन्वय उत्कृष्ट रहनेछ। व्यवसाय विस्तार गर्ने सोच सफल हुन सक्छ। परिवारसँग रमाइलो समय बित्नेछ र घरमा खुसीको वातावरण रहनेछ। सामाजिक क्षेत्रमा नयाँ सम्बन्ध स्थापित हुन सक्छ, जसले भविष्यमा राम्रो अवसर दिलाउन सक्छ। आत्मविश्वास बढ्नेछ र नयाँ निर्णय लिन सहज हुनेछ।
वृश्चिक (तो, ना, नि, नु, ने, नो, या, यि, यु) –
आज मेहनत, धैर्य र अनुभवले राम्रो प्रतिफल दिलाउने दिन छ। प्रतिस्पर्धात्मक क्षेत्रमा सफलता प्राप्त हुने सम्भावना बलियो देखिन्छ। कार्यक्षेत्रमा तपाईंको कामको प्रशंसा हुनेछ र नयाँ अवसर पनि प्राप्त हुन सक्छ। आर्थिक रूपमा लाभका संकेत देखिए पनि ठूलो निर्णय गर्दा राम्रोसँग विचार गर्नु उचित हुनेछ। परिवारमा खुसीको वातावरण रहनेछ। सम्बन्धमा विश्वास र आत्मीयता अझ मजबुत बन्नेछ। स्वास्थ्य राम्रो रहनेछ र मानसिक रूपमा पनि उत्साह कायम रहनेछ।
धनु (ये, यो, भ, भि, भु, ध, फा, ढ, भे) –
आज सकारात्मक सोच, ऊर्जा र आत्मविश्वासले तपाईंलाई अगाडि बढाउनेछ। व्यापार, अध्ययन, यात्रा वा वैदेशिक क्षेत्रसँग सम्बन्धित काममा शुभ संकेत देखिन्छ। कार्यक्षेत्रमा तपाईंको मेहनतको उचित मूल्यांकन हुनेछ। आर्थिक अवस्थामा सुधार आउने सम्भावना छ। परिवारका सदस्यहरूसँगको सम्बन्ध अझ सुमधुर बन्नेछ। सामाजिक क्षेत्रमा मान–सम्मान बढ्नेछ। नयाँ योजना सुरु गर्न वा दीर्घकालीन लक्ष्य तय गर्न दिन उपयुक्त रहनेछ। स्वास्थ्य पनि राम्रो रहनेछ।
मकर (भो, ज, जि, खि, खु, खे, खो, गा, गि) –
आज जिम्मेवारी बढे पनि अनुशासन र धैर्यका साथ अघि बढ्दा सबै काम सफलतापूर्वक सम्पन्न हुनेछन्। कार्यक्षेत्रमा वरिष्ठ व्यक्तिको सहयोग र विश्वास प्राप्त हुनेछ। आर्थिक रूपमा खर्च नियन्त्रण गर्नु आवश्यक हुनेछ र बचत गर्ने योजना पनि सफल बन्न सक्छ। परिवारका सदस्यहरूको सुझावले महत्त्वपूर्ण निर्णय लिन सहयोग पुग्नेछ। स्वास्थ्यमा सामान्य थकान महसुस हुन सक्ने भएकाले आरामका लागि समय छुट्याउनु आवश्यक हुनेछ। दिनको अन्त्यमा सन्तोषजनक उपलब्धिले मन प्रसन्न बनाउनेछ।
कुम्भ (गु, गे, गो, सा, सि, सु, से, सो, द) –
आज सिर्जनशील सोच, नवीन योजना र सकारात्मक दृष्टिकोणले तपाईंलाई विशेष सफलता दिलाउन सक्छ। कार्यक्षेत्रमा रोकिएका काम अघि बढ्नेछन् र नयाँ अवसर पनि प्राप्त हुन सक्छ। साथीभाइ तथा सहकर्मीको सहयोगले कठिन काम सहज बन्नेछ। आर्थिक पक्षमा सुधार आउने सम्भावना बलियो छ। परिवारमा खुसी, मेलमिलाप र आपसी विश्वास कायम रहनेछ। सामाजिक सम्बन्ध विस्तार हुनेछ र नयाँ व्यक्तिसँगको परिचय भविष्यमा लाभदायक बन्न सक्छ। स्वास्थ्य सामान्य रहनेछ र मानसिक रूपमा सकारात्मक ऊर्जा महसुस हुनेछ।
मीन (दि, दु, थ, झ, ञ, दे, दो, च, ची) –
आज धैर्य, संयम र सकारात्मक सोचलाई कायम राख्न सके दिन निकै फलदायी बन्न सक्छ। केही काममा ढिलाइ भए पनि अन्ततः सफलता प्राप्त हुनेछ। कार्यक्षेत्रमा अनुभव र सीपको राम्रो उपयोग गर्न सक्नुहुनेछ। आर्थिक रूपमा सोचविचार गरेर खर्च गर्नु आवश्यक हुनेछ, साथै बचत गर्ने अवसर पनि प्राप्त हुन सक्छ। परिवारको साथ र सहयोगले मानसिक शान्ति र आत्मबल बढाउनेछ। पुराना अधुरा काम पूरा हुने सम्भावना छ। दिनको उत्तरार्धमा सुखद समाचार प्राप्त हुन सक्छ वा मन खुसी बनाउने कुनै घटना घट्न सक्छ। स्वास्थ्य राम्रो रहनेछ र आत्मविश्वास निरन्तर बढ्दै जानेछ ।एभरेष्ट न्यूज एजेन्सी
काठमाडौँ । इंग्ल्यान्डले पाँच खेलको टी- २० अन्तर्राष्ट्रिय सिरिजको दोस्रो खेलमा भारतलाई चार विकेटले पराजित गर्दै सिरिजमा १-० को अग्रता बनाएको छ । वर्षाका कारण पहिलो खेल रद्द भएकाले यो सिरिजको पहिलो निर्णय भएको खेल थियो।
१९१ रनको लक्ष्य पछ्याएको इंग्ल्यान्डले १९ ओभरमै ६ विकेट गुमाएर जित हात पारेको थियो । भारत पराजित भए पनि खेलमा दुई ऐतिहासिक उपलब्धि बने । अक्षर पटेल टी-२० अन्तर्राष्ट्रियमा १०० विकेट पूरा गर्ने पहिलो भारतीय स्पिनर बने भने १५ वर्षीय वैभव सूर्यवंशी भारतका लागि सबैभन्दा कम उमेरमा अन्तर्राष्ट्रिय क्रिकेट खेल्ने खेलाडी बने ।
टस जितेर पहिले ब्याटिङ गरेको भारतले २० ओभरमा ७ विकेट गुमाउँदै १९० रन बनाएको थियो । अन्तर्राष्ट्रिय क्रिकेटमा डेब्यु गरेका वैभव सूर्यवंशीले सुरुमै दुई छक्का प्रहार गर्दै आक्रामक सुरुआत गरे पनि १४ रनमा स्टम्प आउट भएका थिए ।
त्यसपछि अभिषेक शर्माले २४ बलमा ४३ रनको तीव्र इनिङ्स खेले । मध्यक्रममा श्रेयस अय्यरले ३७ तथा ईशान किशनले ४९ रन बनाउँदै तेस्रो विकेटका लागि महत्वपूर्ण साझेदारी गरे । अन्तिम ओभरहरूमा तिलक वर्माले ११ बलमा अविजित २४ रन जोड्दै भारतलाई प्रतिस्पर्धात्मक योगफलसम्म पुर्याएका थिए ।
१९१ रनको लक्ष्य पछ्याएको इंग्ल्यान्डको सुरुआत भने निकै खराब रह्यो । अर्शदीप सिंहले पहिलो ओभरमै फिल साल्ट र जोस बटलरलाई आउट गर्दै घरेलु टोलीलाई दबाबमा पारेका थिए । तर कप्तान ह्यारी ब्रुकले केवल १५ बलमा ३९ रनको विस्फोटक इनिङ्स खेल्दै खेलको लय परिवर्तन गरे । त्यस्तै जेकब बेथेलले एक छेउ सम्हाल्दै अविजित ७६ रन बनाए भने टम ब्यान्टनले ३९ रनको योगदान दिए । भारतले बीचका ओभरमा पुनरागमन गरे पनि १७औं ओभर निर्णायक बन्यो । रवि विश्नोईले दुई नो-बलसहित २९ रन खर्चिएपछि इंग्ल्यान्डले खेल आफ्नो पक्षमा मोड्यो । बेथेलले फ्रिहिटको भरपुर फाइदा उठाउँदै टोलीलाई जित दिलाए ।
यो खेलको सबैभन्दा ठूलो आकर्षण १५ वर्षीय वैभव सूर्यवंशीको अन्तर्राष्ट्रिय डेब्यु रह्यो । १५ वर्ष ९९ दिनको उमेरमा उनले भारतका लागि अन्तर्राष्ट्रिय क्रिकेट खेल्दै नयाँ इतिहास रचेका छन् । यससँगै उनले १६ वर्ष २०५ दिनको उमेरमा डेब्यु गरेका सचिन तेन्दुलकरको ३७ वर्ष पुरानो कीर्तिमान तोडेका छन् ।
अब सिरिजको तेस्रो खेल मंगलबार हुदैछ । एभरेष्ट न्यूज एजेन्सी
काठमाडौँ । सहआयोजक क्यानडा फिफा विश्वकप फुटबलबाट बाहिरिने पहिलो आयोजक टोली बनेको छ । अन्तिम १६ को खेलमा मोरक्कोसँग ३-० गोल अन्तरले पराजित भएपछि क्यानडाको ऐतिहासिक यात्रा टुंगिएको हो ।
पहिलो हाफमा अपेक्षाअनुसार प्रदर्शन गर्न नसकेको मोरक्कोले दोस्रो हाफ सुरु भएको पाँच मिनेटमै अग्रता लिएको थियो । अचराफ हाकिमीको फ्रिकिकबाट आएको कटब्याक पासलाई अजेदिन उनाहीले पेनाल्टी क्षेत्रको किनारबाट उत्कृष्ट प्रहार गर्दै गोलमा परिणत गरेका थिए । क्यानडाका रक्षकले उनलाई रोक्न नसक्दा मोरक्कोले खेलमा नियन्त्रण जमायो ।
खेल सकिन आठ मिनेट बाँकी रहँदा उनाहीले व्यक्तिगत अवसरलाई सदुपयोग गर्दै दोस्रो गोल गरे र मोरक्कोको जित लगभग सुनिश्चित बनाए । इन्जुरी समयमा सौफियान रहिमीले गोलरक्षक म्याक्सिम क्रेपोको मुनिबाट बल छिराउँदै तेस्रो गोल गरेपछि मोरक्कोले सहज जित दर्ता गरेको थियो ।
यद्यपि खेलको सुरुआत भने क्यानडाको पक्षमा थियो । टेक्सासमा भएको खेलमा क्यानडाले सुरुदेखि नै आक्रामक दबाब सिर्जना गरेको थियो । जोनाथन डेभिड र टानी ओलुवासेयीले पहिलो ११ मिनेटमै उत्कृष्ट अवसर पाए पनि मोरक्कोका गोलरक्षक बोनोले दुवै प्रहार बचाएका थिए ।
क्यानडाका मुख्य प्रशिक्षक जेसी मार्सले आफ्ना खेलाडीको सुरुआती प्रदर्शनको प्रशंसा गर्दै टोली नै खेलमा हावी भएको बताए । उनले विश्व वरीयताको सातौं स्थानमा रहेको मोरक्कोविरुद्ध आफ्नो टोली उत्कृष्ट देखिएको प्रतिक्रिया दिए ।
खेलभर दुवै टोलीबीच चर्को प्रतिस्पर्धा देखिएको थियो। अंग्रेज रेफ्री माइकल ओलिभरले खेलमा कुल आठ पहेंलो कार्ड देखाएका थिए । पहिलो हाफमा संघर्ष गरिरहेको मोरक्कोले भने दोस्रो हाफमा उत्कृष्ट पुनरागमन गर्दै नतिजा आफ्नो पक्षमा पार्न सफल भयो ।
यस जितसँगै मोरक्को लगातार दोस्रो विश्वकपमा क्वार्टरफाइनलमा पुगेको छ । अब मोरक्कोले क्वाटरफाइनलमा फ्रान्सको सामना गर्ने छ ।
पराजयसँगै क्यानडाको पुरुष विश्वकप इतिहासकै सबैभन्दा सफल अभियान समाप्त भएको छ। यस संस्करणमा क्यानडाले पहिलो पटक विश्वकपमा अंक, जित, समूह चरण पार गर्ने उपलब्धि र नकआउट चरणको जित हासिल गर्दै नयाँ इतिहास रचेको थियो ।एभरेष्ट न्यूज एजेन्सी
काठमाडौँ । विश्वकपको उपाधि दाबेदार फ्रान्सले कडा प्रतिस्पर्धापछि पाराग्वेलाई -० गोल अन्तरले हराउँदै फिफा विश्वकप फुटबलको क्वार्टरफाइनलमा स्थान बनाएको छ ।
दोस्रो हाफमा प्राप्त पेनाल्टी अवसरलाई कप्तान किलियन एम्बाप्पेले गोलमा परिणत गर्दै फ्रान्सलाई अन्तिम आठमा पुर्याएका हुन् । यससँगै उनले प्रतियोगितामा आफ्नो सातौं गोल गर्दै अर्जेन्टिनाका लियोनेल मेसीसँग सर्वाधिक गोलकर्ताको दौडमा बराबरी गरेका छन् ।
खेल ३८ डिग्री सेल्सियससम्म पुगेको अत्यधिक गर्मीमा सुरु भए पनि फ्रान्सले सुरुदेखि नै बलमा नियन्त्रण कायम राखेको थियो । तर अनुशासित पाराग्वे रक्षापंक्तिका कारण फ्रान्सले स्पष्ट अवसर सिर्जना गर्न सकेन ।
पहिलो हाफ गोलरहित बराबरीमा सकिएको थियो। दुवै टोलीले पहिलो ४५ मिनेटमा लक्ष्यतर्फ एक पनि प्रहार गर्न सकेनन् । दोस्रो हाफमा फ्रान्सले आक्रामक खेल प्रस्तुत गर्यो । ५४औं मिनेटमा मानु कोनेको टाढाबाट गरिएको प्रहारलाई गोलरक्षक ओर्लान्डो गिलले बचाएका थिए, जुन फ्रान्सको लक्ष्यतर्फको पहिलो प्रहार थियो।
खेलको निर्णायक क्षण भने प्रशिक्षकले परिवर्तनका रूपमा मैदानमा उतारेका डिजिरे डुय आएपछि सिर्जना भयो । मैदान प्रवेश गरेको चार मिनेटमै उनले बायाँतर्फबाट उत्कृष्ट व्यक्तिगत प्रयास गर्दै पेनाल्टी क्षेत्रमा प्रवेश गरेका थिए । त्यसक्रममा डिएगो गोमेजले उनलाई लडाएपछि सुरुमा खेल जारी राखिए पनि भिडियो सहायक रेफ्रीको सुझावपछि रेफ्री इलगिज टान्टाशेभले पेनाल्टी दिएका थिए ।
एम्बाप्पेले पेनाल्टीलाई सहज रूपमा गोलमा परिणत गर्दै गोलरक्षक गिललाई गलत दिशामा पठाए र फ्रान्सको जित सुनिश्चित गरेका थिए ।
यसअघि अन्तिम ३२ चरणमा जर्मनीलाई पेनाल्टी सुटआउटमा हराएर सनसनीपूर्ण जित निकालेको पाराग्वेले यस खेलमा पनि उत्कृष्ट रक्षात्मक प्रदर्शन गरे पनि अन्ततः फ्रान्सको चुनौती रोक्न सकेन । अब फ्रान्सले क्वार्टरफाइनलमा मोरक्कोको सामना गर्ने छ ।एभरेष्ट न्यूज एजेन्सी
