रबि साह ,साउन २० गते
रौतहटको कटहरिया नगरपालिकाको छोटका बडेडवा र हर्षाहा गाउँका करिब १५ सय घरधुरी विगत तीन महिनादेखि शुद्ध खानेपानी सेवाबाट वञ्चित भएका छन् ।
स्थानीयका अनुसार पुल निर्माणका क्रममा मुन्ना कन्स्ट्रक्सनले खानेपानीको मुख्य पाइप काटेपछि नियमित पानी आपूर्ति अवरुद्ध भएको हो । समस्या समाधानका लागि पटक–पटक सम्बन्धित निकाय, निर्माण कम्पनी तथा खानेपानी उपभोक्ता समितिलाई जानकारी गराउँदा पनि कुनै सुनुवाइ नभएको उनीहरूको गुनासो छ ।
खानेपानी अभावका कारण स्थानीयहरू वैकल्पिक तथा असुरक्षित स्रोतको पानी प्रयोग गर्न बाध्य भएका छन्, जसले स्वास्थ्य जोखिमसमेत बढाएको उनीहरूको भनाइ छ ।
खानेपानी उपभोक्ता समितिका अध्यक्ष योगेन्द्र साहले पनि निर्माण कम्पनीलाई बारम्बार पाइप मर्मत गर्न आग्रह गरे पनि सुनुवाइ नभएको बताए । उनका अनुसार पाइप काटिएपछि नै समस्या उत्पन्न भएको हो र स्थानीयले समेत आवाज उठाउन आवश्यक रहेको उनले बताए ।
यता, मुन्ना कन्स्ट्रक्सनका सञ्चालक प्रमोद यादवसँग प्रतिक्रिया लिन फोन सम्पर्कको प्रयास गरिए पनि उनको सम्पर्क हुन सकेन ।
स्थानीयवासीले कटहरिया नगरपालिका, सम्बन्धित सरकारी निकाय र निर्माण कम्पनीलाई तत्काल खानेपानी सेवा पुनः सञ्चालन गर्न माग गरेका छन्। माग पूरा नभए चरणबद्ध आन्दोलनमा उत्रिने चेतावनीसमेत दिएका छन् ।
