चन्दन यादव, रौतहट २९ गते भदौ ।

गरुडामा भीषण तोडफोड र आगजनी ः मेयर र प्रमुख प्रशासकीय अधिकृतको कार्यकक्ष पूर्णरूपमा ध्वस्त भएको हो । रौतहटको गरुडा नगरपालिकाको कार्यालयमा व्यापक तोडफोड, लुटपाट र आगजनी भएको छ । जेनजीहरुले आक्रमण गर्दै नगर प्रमुख कन्थमनी प्रसाद जयसवाल र प्रमुख प्रशासकीय अधिकृतको कार्यकक्षमा आगो लगाएका हुन् । भीषण आगलागीका कारण दुवै कोठा जलेर पूर्णरूपमा ध्वस्त भएका छन् ।

यता उपमेयरको कार्यकक्षमा भने सामान्य तोडफोड मात्र भएको देखिएको छ । आगलागीका कारण तीनै कोठाको पर्खालमा ठूलो क्षति पुगेको छ । अन्य शाखाहरूमा समेत तोडफोड र आगजनी हुँदा कार्यालयभित्रका कागजात, सामग्री र फर्निचर जलेर नष्ट भएको छ । प्रारम्भिक अनुमान अनुसार करोडौं रुपैयाँ बराबरको क्षति भएको बताइएको छ ।

स्थानीयको भनाइ अनुसार, आकस्मिक रूपमा सुरु भएको घटनाले करिब सबै शाखा प्रभावित पारेको छ । आगलागी नियन्त्रणमा ल्याउन प्रयत्न भए पनि क्षतिको परिमाण निकै ठूलो भएको देखिएको छ ।

हाल गरुडा नगरपालिकाको कार्यालय पूर्ण रूपमा अवरुद्ध बनेको छ र सेवाग्राहीलाई कुनै सेवा दिन नसक्ने अवस्था उत्पन्न भएको छ ।

नगर प्रमुख र प्रशासनिक अधिकृतको कोठा जलेर नष्ट भएको भिडियो सार्वजनिक भएको छ । यस घटनापछि स्थानीय निकायमा सुरक्षाको सवाल फेरि उठेको छ । अनुसन्धान र दोषी पहिचानको प्रक्रिया सुरु भएको प्रहरीले जनाएको छ ।

काठमाडौँ, २९ भदौः

सरकारले वर्तमान परिस्थिति एवं चाडपर्वको समयमा यात्रुको यात्रा सुरक्षित र सहज बनाउन एवं प्राप्त गुनासोको तत्काल सम्बोधन गरी यातायात व्यवस्थापनमा सहजीकरण गर्न उच्चस्तरीय यातायात व्यवस्थापन समिति गठन गर्ने निर्णय गरेको छ ।

आज बसेको बैठकले यातायात व्यवस्था विभागका महानिर्देशकको संयोजकत्वमा समिति गठन गर्नेसहित छबुँदे निर्णय गरिएको भौतिक पूर्वाधार तथा यातायात मन्त्रालयका सचिव केशवकुमार शर्माले जानकारी दिनुभयो ।

आज उहाँको अध्यक्षतामा बसेको बैठक बसेको थियो । उक्त समितिमा नेपाल प्रहरी प्रधान कार्यालय, राजमार्ग सुरक्षा महाशाखा प्रमुख, काठमाडौँ उपत्यका ट्राफिक प्रहरी कार्यालय प्रमुख तथा यातायात व्यवसायी राष्ट्रिय महासङ्घ अध्यक्षलगायत सरोकारवाला सहभागी हुनेछन् ।

यस्तै बैठकले चाडपर्वको समयमा उपत्यकाबाट बाहिर जाने सवारीसाधनको प्राविधिक जाँच एवं आवश्यकताअनुसार यात्रु सहायता कक्ष निर्माण गर्ने निर्णय पनि भएको यातायात व्यवसायी राष्ट्रिय महासङ्घका वरिष्ठ उपाध्यक्ष सरोज सिटौलाले राससलाई बताउनुभयो ।

उहाँका अनुसार बैठकले वर्तमान परिस्थिति एवं चाडपर्वका समयमा काठमाडौँ उपत्यकाबाट बाहिर जाने यात्रुलाई सहजै गन्तव्यस्थलसम्म जानसक्ने गरी यातायातको व्यवस्थापन गर्न नेपाल यातायात व्यवसायी राष्ट्रिय महासङ्घलगायत सरोकारवाला सबैलाई अनुरोध गर्ने निर्णय पनि गरेको छ ।

यस्तै, आन्दोलनका क्रममा क्षति भएका सार्वजनिक सवारीसाधन एवं कार्यालयको यकीन गरी उचित क्षतिपूर्तिका लागि आवश्यक प्रक्रिया अगाडि बढाउने, ट्राफिक प्रहरीका लागि अत्यावश्यक पर्ने सामग्री भौतिक पूर्वाधार तथा यातायात मन्त्रालय र सडक सुरक्षा परिषद्लगायतबाट उपलब्ध गराउने निर्णय भएको छ ।

बैठकले आन्दोलनका क्रममा लुटपाट गरिएका हतियारलगायत सामग्री सवारीसाधनबाट ओसारपसार हुन नपाउनेगरी तत्काल सूचना जारी गर्ने निर्णय पनि गरेको सिटौलाले बताउनुभयो ।

• वर्णन

सुनसरी :

सुनसरीको इटहरी उपमहानगरपालिका–५ स्थित  पूर्व–पश्चिम लोकमार्गबाट ५ हजार केजी प्रतिबन्धित लागू औषध गाँजा बरामद गरिएको छ। सशस्त्र प्रहरी बल,नेपाल नं। १ बराह बाहिनी पकलीबाट सशस्त्र प्रहरी निरीक्षक अशोक न्यौपानेको कमाण्डमा खटिएको २१ जनाको टोलीले विशेष सूचनाका आधारमा शनिबार राति उक्त गाँजा बरामद गरेको हो ।

सशस्त्र प्रहरीले गस्ती गर्दै जाने क्रममा ना ४ ख २७११ नं। को ट्रक र बा ५ ख १९६९ नं। को मिनी ट्रक नियन्त्रणमा लिएर चेकजाँच ५ हजार केजी गाँजा बरामद गरिएको कोशी प्रदेशका सशस्त्र प्रहरी प्रमुख डीआईजी कुमार न्यौपानेले जानकारी दिएका छन् ।

चेकजाँच गर्दा ठूलो ट्रकमा लोड गरिएको १३४ बोरा र मिनि  ट्रकमा २४ बोरा   भित्र गरी जम्मा ५ हजार  केजी गाँजा बरामद भएको डीआईजी न्यौपानेले बताए । प्रहरीका अनुसार हाल देशभर जेनजी आन्दोलनका कारण कर्फ्यु र निषेधाज्ञा जारी भएको मौका छोपी धनकुटाबाट तस्करहरूले ठूलो परिमाणमा गाँजा भारततर्फ लैजान खोजेका थिए। तर सशस्त्र प्रहरीको गस्ती टोलीले समयमा नै नियन्त्रणमा लिएर ठूलो मात्रामा गाँजा भारततर्फ जानबाट रोकिएको हो।

घटनाका बेला दुवै गाडीका चालक र संलग्न व्यक्ति फरार रहेको र उनीहरूको खोजी जारी रहेको प्रहरीले जनाएको छ। डीआईजी न्यौपानेले बरामद भएको ट्रक सहितको  गाँजा आवश्यक कारवाहीका लागि जिल्ला प्रहरी कार्यालय सुनसरीमा बुझाउने बताए ।

आइतबार, भदौ २९, २०८२

यातायात व्यवस्था विभागले सवारीचालक अनुमतिपत्र (लाइसेन्स) छपाइ तथा वितरण अनिश्चितकालका लागि बन्द गरेको छ । विभागले एक सूचना जारी गर्दै, हालको परिस्थितिमा सूचना प्रविधिसम्बन्धी सम्पूर्ण प्रणाली बन्द रहने जानकारी दिएको हो ।

विभागका अनुसार हालैको जेनजी आन्दोलनका क्रममा भएको तोडफोड, आगजनी र लुटपाटका कारण विभागको संरचनामा गम्भीर क्षति पुगेको छ । विशेष गरी इलेक्ट्रोनिक उपकरण, छपाइ मेसिन र सर्भर नष्ट हुँदा सवारीचालक अनुमतिपत्र तथा विद्युतीय सवारीसाधन दर्ता (EDLVRS) सम्बन्धी सेवा पूर्ण रूपमा अवरुद्ध भएको जनाइएको छ ।

‘विभागको सूचना प्रविधि प्रणाली पुनःसञ्चालनमा ल्याउन समय लाग्ने भएकाले अर्को सूचना प्रकाशित नभएसम्मका लागि सवारीचालक अनुमतिपत्र छपाइ, वितरण तथा सम्बन्धित अन्य सेवा बन्द रहनेछ,’ विभागद्वारा जारी सूचनामा उल्लेख छ ।

सार्वजनिक सेवामा आएको यो अवरोधले लाइसेन्स प्राप्त गर्ने प्रक्रिया अगाडि बढाइरहेका हजारौँ सेवाग्राही प्रभावित भएका छन् । विभागले सेवा पुनः सुचारु गर्नका लागि आवश्यक प्राविधिक मर्मत र पुनर्संरचनाको काम अगाडि बढाइने जनाएको छ ।

शिलापत्र

आरके श्रीवास्तव,राैतहट,भदौ २८ गते । 

पछिल्लो सुरक्षा विश्लेषणका आधारमा रौतहट जिल्लामा जारी निषेधाज्ञा क्रमशः हटाउन थालिएको छ । जिल्ला सुरक्षा समिति रौतहटको निर्णयअनुसार आज मिति २०८२/०५/२८ गतेदेखि जिल्लाका केही क्षेत्रहरूमा निषेधाज्ञा हटाइएको छ भने, जिल्लाको मुख्य क्षेत्र गौरमा भने निषेधाज्ञा यथावत् राखिएको छ ।

जिल्ला प्रशासन कार्यालय, गौरबाट जारी अत्यन्त जरुरी सूचनामा उल्लेख भएअनुसार, नेपाल लज (पूर्व), कृषि ज्ञान केन्द्र (उत्तर), गौर घण्टाघर (पश्चिम) र श्री जुद्ध उच्च मावि (दक्षिण) ले घेरिएको क्षेत्रभित्र निषेधाज्ञा यथावत् जारी रहनेछ । सो क्षेत्रभित्र मिति २०८२/०५/२८ गते बेलुका ५:०० बजेदेखि अर्को आदेश नभएसम्म निषेधाज्ञा लागू हुने जनाइएको छ ।

जिल्लाका अन्य क्षेत्रहरूमा भने आजैदेखि निषेधाज्ञा र कर्फ्यू हटाइएको जिल्ला प्रशासन कार्यालयले जनाएको छ । प्रमुख जिल्ला अधिकारी विनोद कुमार खड्काद्वारा हस्ताक्षरित सूचनामा स्थानीय प्रशासन ऐन, २०२८ को दफा ६(ख) बमोजिम उक्त आदेश जारी गरिएको उल्लेख गरिएको छ ।

जनजीवन सामान्य बन्दै गएको अवस्थामा सुरक्षालाई ध्यानमा राख्दै प्रशासनले यस्तो निर्णय लिएको हो । स्थानीय बासिन्दाहरूलाई निषेधाज्ञा लागू रहेको क्षेत्रको जानकारी लिएर मात्र आवतजावत गर्न तथा प्रशासनको निर्देशन पालना गर्न आग्रह गरिएको छ ।

आरके श्रीवास्तव,राैतहट,भदौ २८ गते ।

रौतहट क्षेत्र नं. ३ अन्तर्गत कटहरिया बजारमा आज नेपाली कांग्रेस र नेकपा एमालेबीच संयुक्त बैठक सम्पन्न भएको छ । बैठकमा हालैका दिनमा जेनजी आन्दोलनका क्रममा सहादत प्राप्त गरेका युवाहरुप्रति गहिरो श्रद्धाञ्जली अर्पण गरिएको छ ।

बैठकमा सहभागी नेताहरुले देशको पछिल्लो राजनीतिक, सामाजिक तथा आर्थिक अवस्था बारेमा गम्भीर छलफल गरेका थिए । सहभागीहरुले युवाहरुको बलिदानले देशलाई नयाँ दिशा दिने विश्वास व्यक्त गर्दै उनीहरुको योगदानलाई स्मरणीय बनाउने प्रतिबद्धता जनाए ।

बैठकपछि नेकपा एमालेका केन्द्रीय सदस्य कुन्दन कुशवाहाले सामाजिक संजालमा लेखेका छन्, “देशमा शान्ति व्यवस्था कायम गर्न हामी सबैले आ–आफ्नो स्थानबाट योगदान दिनु आवश्यक छ ।

देश जति खरानी हुने थियो भइसक्यो, अब सम्पूर्ण नागरिकको दायित्व हो– देशलाई पुनः हाँसिलो, उज्यालो बनाउने।”

राजनीतिक रुपमा प्रतिस्पर्धी ठानिएका दुई ठूला दलहरूको यो सहकार्य र सहमति जनस्तरमा सकारात्मक सन्देश दिने अपेक्षा गरिएको छ । बैठकमा दुबै दलका स्थानीय नेता, कार्यकर्ता तथा सर्वसाधारणको उल्लेखनीय उपस्थिति रहेको थियो ।

आरके श्रीवास्तव,राैतहट,भदौ २८ गते ।

रौतहट जिल्लाको गौर नगरपालिका–६ स्थित लालबकैया खोलामा डुबेर वेपत्ता भएकी एक बालिका मृत अवस्थामा फेला परेकी छन् । बैजु साहकी छाेरी अन्दाजी १० वर्षीया करिश्मा साह आफ्नै आमासँग खोलामा नुहाउने क्रममा अचानक पानीमा डुबेर बेपत्ता भएकी थिइन् ।

जितिया पर्वको (नहायखाय) काे लागि नदीमा नुहाउन गएकी नदीमा डुबेर वेपत्ता थिईन् ।

घटनाको जानकारी प्राप्त भएपश्चात् रौतहट पुरेनवास्थित नारायणदल गणबाट खटिएको नेपाली सेनाको उद्धार टोली अन्य सुरक्षा निकायहरूको सहयोगमा तत्काल घटनास्थल पुगेर खोजी कार्यमा जुटेको थियो ।

खोजी कार्यको क्रममा बालिकाको शव फेला पारिएको र सो शव नेपाल प्रहरीलाई बुझाइएको सेनाले जनाएको छ ।

स्थानीय सुरक्षा निकाय, नेपाली सेना, नेपाल प्रहरी र सशस्त्र प्रहरीको सक्रिय समन्वयमा उद्धार कार्य सम्पन्न भएको हो ।

सैन्य स्रोतका अनुसार वर्षा याममा खोलानाला र नदीहरूमा सावधानी अपनाउन आम जनतालाई सतर्क रहन आग्रह गरिएको छ ।

काठमाडौं- पूर्व प्रधानन्यायाधीश सुशीला कार्की पहिलो महिला प्रधानमन्त्रीमा नियुक्त भएलगत्तै कार्की नेतृत्वको सरकारले ६ महिनाभित्र निर्वाचन गराउने जिम्मा पाएको छ । राष्ट्रपति रामचन्द्र पौडेलले नवनियुक्त प्रधानमन्त्री सुशीला कार्कीको सिफारिसका आधारमा प्रतिनिधिसभा विघटनको निर्णय गरेका हुन् ।

शुक्रवार राति प्रधानमन्त्री नियुक्त भएकी कार्कीले आफ्नो पहिलो निर्णयमै प्रतिनिधिसभा विघटन गर्न सिफारिस गरेकी थिइन् । कार्कीले गरेको विघटनको सिफारिस राष्ट्रपति रामचन्द्र पौडेलले सदर गरेका थिए ।

त्यस्तै, फागुन २१ गतेका लागि चुनावको मिति समेत तोकिएको छ । प्रधानमन्त्री कार्कीको सिफारिसमा राष्ट्रपतिले चुनावको मिति घोषणा गरेका हुन् ।

प्रारम्भमा प्रधानमन्त्रीको शपथ गर्ने र त्यसपछि प्रतिनिधिसभा विघटन गर्ने सहमति भएपछि कार्की सहमत भएकी थिइन् । नवगठित सरकारले पहिलो मन्त्रिपरिषद् बैठकबाट जननिर्वाचित संसद भंग गरेको मुलुकको इतिहासमा यो दुर्लभ घटना हो । सभार कलाकर्मी

आरके श्रीवास्तव,राैतहट,भदौ २७ गते । 

देशको नयाँ प्रधानमन्त्रीको रूपमा सुशीला कार्कीको नियुक्ति भएपछि रौतहटको कटहरिया नगरपालिका–५ स्थित विवाह भवनको अगाडि चौकमा स्थानीय युवाहरूले मैनबत्ती बालेर खुशीयाली व्यक्त गरेका छन् ।

शुक्रबार राति दर्जनौँ युवाहरू “जय युवा” नारासहित चौकमा भेला भएर दीप प्रज्वलन गर्दै सुशीला कार्कीप्रति समर्थन र सम्मान प्रकट गरेका हुन् । उनीहरूले कार्कीलाई इमानदार, निडर र न्यायप्रेमी नेतृको रूपमा चित्रण गर्दै आगामी दिनमा देशले सही दिशा पाउने विश्वास व्यक्त गरेका छन् ।

कार्यक्रममा सहभागी स्थानीय युवा बैजु दास बानियाले भने, “सुशीला कार्कीजस्तो साहसी नेतृत्व अहिलेको आवश्यकता हो । हामी युवाहरू परिवर्तन चाहन्छौं, र कार्कीज्यू त्यस परिवर्तनको प्रतिक बन्न सक्नुहुन्छ।”

सांकेतिक दीप प्रज्वलनपछि युवाहरूले शान्तिपूर्ण तरिकाले जातीय, क्षेत्रीय तथा पार्टीगत भेदभावभन्दा माथि उठेर सुशासनको पक्षमा आवाज उठाउँदै एकताको सन्देश पनि दिएका थिए ।

साे कार्यक्रममा स्थानिय बासिन्दा समेत सहभागीता रहेको थियो ।