आरके श्रीवास्तव,राैतहट,असाेज ०१ गते । 

विश्वकर्मा पूजाको अवसरमा रौतहटको प्रसिद्ध धार्मिक स्थल शिवनगर महादेव मन्दिर नजिक रहेको विश्वकर्मा मन्दिरमा श्री विश्वकर्मा लोहार संघ नेपालद्वारा एक भव्य कार्यक्रम सम्पन्न गरिएको छ । संघका अध्यक्ष विवेक शर्माको अध्यक्षतामा सम्पन्न उक्त कार्यक्रममा प्रमुख अतिथि डा. बैधनाथ ठाकुर रहेका थिए ।

कार्यक्रममा गरूडा नगरपालिकाका नगरप्रमुख कन्थमनी जयसवाल, मौलापुर नगरपालिकाकी नगरप्रमुख रिना कुमारी साह, गरूडा नगरपालिका वडा नं. ५ का वडा अध्यक्ष रामबिनोद जयसवाल लगायत दर्जनौं विशिष्ट अतिथिहरूको उपस्थिति थियो । साथै रौतहट जिल्लाभरिका लोहार समुदायका अगुवा तथा समाजसेवीहरू सहभागी थिए ।

मुख्य अतिथि डा. बैधनाथ ठाकुरले लोहार समुदायको पहिचान र विकासका लागि संघले खेलेको भूमिकाको प्रशंसा गर्दै भने, “संघको निरन्तर प्रयास र नेतृत्वले समुदायमा सकारात्मक परिवर्तन आएको देखिन्छ। यस्ता कार्यक्रमले एकता र चेतनाको सन्देश दिन्छन्।”

त्यस्तै, गरूडा नगर प्रमुख कन्थमनी जयसवालले स्थानीय तहले यस्ता कार्यक्रमलाई सदैव सहयोग गर्ने प्रतिबद्धता जनाउँदै भने, “हामी सधैं सामाजिक विकास र समावेशिताका पक्षमा छौं, लोहार समुदायको सशक्तीकरणमा संघले देखाएको लगनशिलता प्रेरणादायी छ।”

त्यस्तै माैलापुर नगरपालिकाकी नगरप्रमुख रिना कुमारी साहले यस्ता कार्यक्रमले राम्रो संदेश दिएको भन्दै आफनाे तर्फबाट संघलाई आवश्यक सहयोग गर्ने प्रतिबद्धता जनाइन् ।

कार्यक्रममा अध्यक्ष विवेक शर्माले संघको तर्फबाट यो वर्ष १५ जना विद्यार्थीलाई छात्रवृत्ति उपलब्ध गराउने जानकारी गराउँदै भने, “हामी हरेक वर्ष समाजको हितमा केही नयाँ कार्य गर्ने प्रयास गर्छौं। यस वर्ष छात्रवृत्तिसँगै आँखा जाँच शिविर, रक्तदान तथा स्वास्थ्य शिविर सञ्चालन गरिएको छ।” उनले युवाको नेतृत्वमा संघले लिएको गति परिवर्तनशील भएको बताउँदै भावी दिनमा अझ प्रभावकारी कार्यक्रम ल्याउने प्रतिबद्धता जनाए ।

कार्यक्रममा संघकाे काम योगदान पुर्‍याउने व्यक्तित्वहरू र पत्रकारलाई सम्मान गरिएको थियो । समापनमा वक्ताहरूले संघको क्रियाशीलता, युवाको सक्रियता र समुदायप्रतिको समर्पणको प्रशंसा गरेका थिए ।

संघले हरेक वर्ष जस्तै यस वर्ष पनि भव्य रूपमा कार्यक्रम आयोजना गर्दै सामाजिक एकता र पहिचानको संरक्षणमा टेवा पुर्‍याउँदै आएको छ ।

काठमाडौं, असोज १ गते – लोकतान्त्रिक समाजवादी पार्टी (लोसपा) नेपालको केन्द्रीय अध्यक्ष महन्थ ठाकुरको अध्यक्षतामा आज पार्टीको पदाधिकारी, केन्द्रीय सदस्य, तथा भातृ/शुभेच्छुक संगठनका प्रमुखहरूको बैठक सम्पन्न भएको छ ।

पार्टी कार्यालय बबरमहल काठमाडौंमा भएको बैठकले आउँदो चैत्र ६ र ७ गते पार्टीको केन्द्रीय अधिवेशन गर्ने निर्णय गरेको छ । त्यससँगै बैठकले असोज ३ गतेलाई ‘कालो दिन’का रूपमा यथावत् राख्दै ‘शोक दिवस’का रूपमा मनाउने निर्णयसमेत गरेको छ । सो अवसरमा पार्टीका सम्पूर्ण नेता, कार्यकर्ता र शुभेच्छुकहरूले कालोपट्टी बाँधी कार्यक्रमहरूमा सहभागिता जनाउनेछन् ।

पार्टीका अनुसार असोज ३ गतेको दिन देशमा मानवअधिकार उल्लंघन र उत्पीडनको ऐतिहासिक सम्झनामा कालो दिनको रूपमा मनाउने परम्परा रहेको छ । विशेषगरी जेनजी आन्दोलनका क्रममा भएको मानवीय क्षति प्रति सम्मान प्रकट गर्नका लागि एक मिनेट मौनधारण गरिनेछ ।

बैठकले आन्दोलनका क्रममा सहादत प्राप्त गर्नेप्रति श्रद्धाञ्जली अर्पण गर्दै दिवंगत आत्माहरूको चिरशान्तिको कामना गरेको छ । साथै, शोक सन्तप्त परिवारजनप्रति समवेदना प्रकट गर्दै घाइतेहरूको शीघ्र स्वास्थ्य लाभको कामनासमेत गरिएको छ ।

पार्टी अध्यक्ष महन्थ ठाकुरले बैठकपछि प्रेस विज्ञप्ति मार्फत जनाएअनुसार, लोकतन्त्र, सामाजिक न्याय र समावेशी आन्दोलनप्रति पार्टीको प्रतिबद्धता यथावत् रहेको र आन्दोलनमा सहभागी सबैप्रति सम्मानजनक व्यवहार गरिनुपर्नेमा पनि बैठकले जोड दिएको छ ।

काठमाडौँ। जेन-जी प्रदर्शनका क्रममा ज्यान गुमाउनेहरूको सम्मानमा सरकारले आज (बुधबार) देशभर सार्वजनिक बिदा दिएको छ।

गृह मन्त्रालयका प्रवक्ता आनन्द काफ्लेका अनुसार, भदौ ३० गतेको मन्त्रिपरिषद्को निर्णयले राष्ट्रिय शोक मनाउने घोषणा गरेको हो।

मन्त्रालयले जारी गरेको विज्ञप्तिमा भनिएको छ, “भदौ २३ र २४ गते जेन-जी पुस्ताद्वारा भएको प्रदर्शनका क्रममा ज्यान गुमाउनेहरूको सम्मानस्वरूप राष्ट्रिय शोक मनाउन असोज १ गते बुधबार नेपालभरका सरकारी कार्यालय, विदेशस्थित नेपाली दूतावास र नियोगहरूमा सार्वजनिक बिदा दिने र राष्ट्रिय झण्डा आधा झुकाउने नेपाल सरकार (मन्त्रिपरिषद्) बाट निर्णय भएको छ।” सभार हाम्राकुरा

आरके श्रीवास्तव,राैतहट, असाेज ०१ गते ।

आज राैतहट सहित देशभर विश्वकर्मा पूजा श्रद्धा र भक्तिपूर्वक मनाइँदैछ । हिन्दू धर्मावलम्बीहरूले औजार, सवारीसाधन, मेसिन र निर्माणसँग सम्बन्धित उपकरणहरूको पूजा गर्दै विश्वकर्मा पूजाको उल्लासपूर्वक आयोजना गरेका छन् ।

विशेष गरी निर्माण व्यवसाय, मिस्त्री, कारखानामा काम गर्ने मजदुर, प्राविधिक र सवारीसाधनधारीहरूले आजको दिनलाई विशेष रूपमा मनाउने गर्छन् । राैतहटकाे कटहरिया,गौर, चन्द्रनिगाहपुर, गरुडा लगायतका बजार क्षेत्रहरूमा रहेका ग्यारेज, वर्कसप र कारखानाहरूमा बिहानैदेखि पूजा–पाठ, भजन–कीर्तन तथा प्रसाद वितरण कार्यक्रम भइरहेको छ ।

विश्वकर्मा भगवानलाई सृष्टिका पहिलो वास्तुकार मानिन्छ, जसले सम्पूर्ण ब्रह्माण्डको रचना गरेको विश्वास गरिन्छ । आजको दिन काममा प्रयोग गरिने औजार तथा सवारीसाधनहरूलाई सफा गरी पूजा गरिन्छ र दिनभर ती उपकरण प्रयोग नगरी विश्राम दिइन्छ ।

यस पर्वको अवसरमा कतिपय स्थानमा छुट्टी घोषणा गरिएको छ भने कतै स्थानिय तहको पहलमा सामूहिक पूजा कार्यक्रम समेत आयोजना गरिएको छ ।

आरके श्रीवास्तव,रौतहट,भदौ ३१ गते ।
मधेश प्रदेश अन्तर्गत रहेको जिल्ला प्रहरी कार्यालय, रौतहटका अनुसार, गौरस्थित कारागार कार्यालयबाट भागेका केही कैदीहरू प्रहरी सम्पर्कमा आएका छन् भने अन्य कैदीहरूको खोजी कार्य अझै जारी रहेको छ ।

कारागार कार्यालय, गौरबाट २०८० साल भदौ २४ गते भागी फरार भएका ती कैदीहरूमध्ये सम्पर्कमा आएकाहरूलाई कारवाही प्रक्रिया अगाडि बढाइएको जनाइएको छ । प्रहरीका अनुसार अझै सम्पर्कमा नआएका कैदीहरूलाई अविलम्ब नजिकको प्रहरी कार्यालय वा गौर कारागार कार्यालयमा सम्पर्क राख्न अनुरोध गरिएको छ ।

जिल्ला प्रहरी कार्यालयले जनाएअनुसार,

> “सम्पर्कविहीन कैदीहरूले स्वयं उपस्थित भएर जानकारी गराउनुपर्छ। अन्यथा, प्रहरी वा कारागारको सम्पर्कमा नआई फरार रहेमा कारागार ऐन २०७९ को दफा ४९ को (ग) बमोजिम, अझै थप ५ वर्षसम्म कैद सजाय तोकिएको छ।”

यस सन्दर्भमा जिल्लाको सूचना सम्प्रेषण शाखाले सार्वजनिक सूचना जारी गर्दै सम्बन्धित सबै पक्षलाई सहयोग गर्न र जानकारी भएमा फोन नम्बर ९८५५०४०९९९ मा सम्पर्क गर्न पनि अनुरोध गरेको छ ।

जिल्ला प्रहरी कार्यालय राैतहटका अनुसार, सुरक्षा व्यवस्था थप कडा पारिएको छ र घटनाको अनुसन्धान तीव्र गतिमा अगाडि बढिरहेको छ ।

काठमाडौं,३० गते भादो ।

अन्तरिम सरकारका तीन मन्त्रीले सोमबार (भदौ ३०) पद तथा गोपनीयताको शपथ लिएका छन् ।

नवनियुक्त अर्थमन्त्री रामेश्वरप्रसाद खनाल, ऊर्जा, जलस्रोत तथा सिँचाइ, भौतिक पूर्वाधार र सहरी विकासमन्त्री कुलमान घिसिङ र गृह तथा कानुनमन्त्री ओमप्रकाश अर्यालले प्रधानमन्त्री सुशीला कार्कीको उपस्थितिमा राष्ट्रपति रामचन्द्र पौडेलबाट शपथ लिएका हुन् ।

प्रधानमन्त्री कार्कीको सिफारिसमा आइतबार (भदौ २९) राष्ट्रपति पौडेलले उनीहरूलाई मन्त्रीमा नियुक्त गरेका हुन् ।

राष्ट्रपतिको कार्यालय शीतलनिवासमा आयोजित शपथ समारोहमा उपराष्ट्रपति रामसहायप्रसाद यादव, प्रधानन्यायाधीश प्रकाशमानसिंह राउत, राष्ट्रियसभाका अध्यक्ष नारायणप्रसाद दाहाललगायत अधिकारी सहभागी थिए ।

सभार १२ खरी

काठमाडौं ,३० गते भादो ।

गृहमन्त्री ओमप्रकाश अर्यालले जेनजी आन्दोलनका क्रममा भएका हिंसात्मक घटनाको छानविन गर्न समिति गठन हुने बताएका छन्। सोमबार सिंहदरबारमा पदभार ग्रहणपछि गृहमन्त्री अर्यालले जेनजी आन्दोलनका क्रममा देशभर घटेका हिंसात्मक घटनाको छानविनका लागि समिति गठन हुने बताएका हुन्।

उनले भने,’जेनजी आन्दोलनका नाममा देशभर हिंसात्मक घटना भएका छन्। उक्त घटनाको सत्यतथ्य बाहिर ल्याउन समिति गठन हुन्छ।’ गृहमन्त्री अर्यालले जेनजी आन्दोलनमा निधन भएकाको सम्मानमा राष्ट्रिय शोक मनाउने जानकारी दिए।

उनले शोकमा राष्ट्रिय झण्डा आधा झुकाउने निर्णय गएको बताए। आन्दोलन क्रममा ज्यान गुमाएका परिवारलाई काजकिरिया खर्चवापत प्रति परिवार एक लाख उपलब्ध गराउने तथा मृतकको शव घर ठेगानासम्म पुर्‍याउने निर्णय गरेको मन्त्री अर्यालले जानकारी दिए।

यही भदौ २३ र २४ गते काठमाडौंसहित देशभर भएको जेनजी समूहको आन्दोलनका क्रममा हालसम्म ७२ जनाको मृत्यु भएको छ भने सयौंजना घाइतेको विभिन्न अस्पतालमा उपचार भइरहेको छ। आन्दोलनका क्रममा देशभर ठूलो जनधनको क्षति भएको छ।

संसद भवन,सिंहदरबार,राष्ट्रपति भवन,सर्वोच्च अदालत,व्यापारी भवनलगायत आगजनीबाट ध्वस्त भएका छन्। सभार अन्नपुर्ण

काठमाडौं, भदौ ३० गते ।

नवनियुक्त अर्थमन्त्री रामेश्वर खनालले कार्यभार सम्हाल्नुभएको छ । राष्ट्रपति रामचन्द्र पौडेलसमक्ष राष्ट्रपति कार्यालय शीतल निवासमा शपथग्रहण गरेसँगै उहाँले पदबहाली गर्नुभएको हो । उहाँ पूर्व अर्थसचिव पनि हुनुहुन्छ ।

राष्ट्रपति पौडेलले अन्तरिम सरकारका प्रधानमन्त्री सुशीला कार्कीको सिफारिसमा उहाँलाई आइतबार साँझ अर्थमन्त्रीमा नियुक्त गर्नुभएको हो ।

प्रधानमन्त्री सुशीला कार्कीलाई लैङ्गिक तथा यौनिक अल्पसङ्ख्यक नागरिकहरूले विविधताको पहिचानसहित मर्यादा र आत्म–सम्मानपूर्वक जीवनयापन गर्ने अधिकार सुनिश्चित गर्न माग गरेका छन्।

नेपालको संविधानमा व्यवस्था गरिएका अधिकारहरूको उपभोग गर्ने अवसरबाट लैङ्गिक तथा यौनिक अल्पसङ्ख्यक समुदाय वञ्चित भइरहेका भन्दै अधिकारकर्मी कोनिका लामाले प्रधानमन्त्री कार्कीलाई पत्र बुझाएको जानकारी दिइन।

पत्रमा भनिएको छ,“समाजमा रहेका आर्थिक रूपले विपन्न, सामाजिक वा सांस्कृतिक दृष्टिले पछाडि पारिएका महिला, दलित, आदिवासी, जनजाति, खस–आर्य, मधेसी, थारु, किसान, मजदुर, उत्पीडित वर्ग, मुस्लिम, अल्पसङ्ख्यक, युवा, बालबालिका, ज्येष्ठ नागरिक, अपाङ्गता भएका व्यक्ति, अशक्त वा असहाय र पिछडिएको क्षेत्रका नागरिकको संरक्षण, सशक्तीकरण तथा विकासका लागि कानुनअनुसार राष्ट्रिय महिला आयोग, दलित आयोग र समावेशी आयोग गठन गरिएको छ। तर पीडित लैङ्गिक तथा यौनिक अल्पसङ्ख्यकका लागि कुनै आयोग छैन।”

त्यसैले, पत्रमार्फत समुदायका लागि छुट्टै राष्ट्रिय आयोग गठन गर्न नसकिने भए पनि कम्तीमा राष्ट्रिय समावेशी आयोगमा समावेश गर्न माग गरिएको छ।