काठमाडौँ पुस ३,
— सर्वोच्च अदालतले सेयर खरिद-बिक्रीबारे दूरसञ्चार सेवा प्रदायक कम्पनी एनसेल आजियटा लिमिटेडलगायतलाई लिखित जवाफ पेस गर्न आदेश दिएको छ । त्यस्तै, एनसेल आजियटा लिमिटेड र नेपाल दूरसञ्चार प्राधिकरणलाई छलफलका लागि पनि बोलाएको छ ।
सांसद अमरेशकुमार सिंहले पेस गरेको निवेदनमाथि सुनुवाइ गर्दै न्यायाधीश प्रकाशमानसिंह राउतको इजलासले अन्तरिम आदेशका लागि छलफलमा आउँदा एनसेलको सेयर खरिदबिक्रीसँग सम्बन्धित निर्णय तथा पत्रहरू इजलाससमक्ष पेस गर्न पनि आदेश गरेको छ ।
‘प्रस्तुत रिट निवेदनसँग सम्बन्धित सम्बद्ध निर्णय तथा पत्रहरू विपक्षी एनसेल आजियटा लिमिटेड र नेपाल दूरसञ्चार प्राधिकरण, जमलको हकमा आफै वा आफ्नो कानुन व्यवसायीमार्फत र अन्य विपक्षीहरूको हकमा महान्यायाधिवक्ताको कार्यालयमार्फत अन्तरिम आदेश जारी गर्ने वा नगर्ने सम्बन्धी छलफलको सुनुवाइको क्रममा इजलास समक्ष अवलोकनार्थ पेस गर्नुहोला ।’
त्यस्तै, सर्वोच्चले अन्तरिम आदेशका विषयमा छलफल गर्नका लागि एनसेल आजियटा र दूरसञ्चार प्राधिकरणलाई बोलाएको छ ।
न्यायाधीश राउतको एकल इजलासले सांसद सिंहले पेस गरेको निवेदनमाथि सुनुवाइ गरेपछि जारी आदेशमा अन्तरिम आदेशका विषयमा रिट निवेदक र विपक्षीलाई राखेर छलफल गराउनु उपयुक्त भएको देखिएको उल्लेख छ । अन्तरिम आदेशमाथि छलफल प्रयोजनका लागि निवेदक र विपक्षीहरू एनसेल आजियटा, नेपाल दूरसञ्चार प्राधिकरणलाई सर्वोच्चले बोलाएको हो ।
सर्वोच्चले १५ दिनभित्र रिट निवेदक सिंहको मागअनुसार परमादेश जारी किन नहुनुपर्ने हो भन्ने जवाफ लेखिपठाउन पनि विपक्षीहरूका नाममा आदेश जारी गरेको छ ।
