बज्जिकाञ्चल संवाददाता,राैतहट,भदौ १५ गते ।
रौतहट जिल्लाको गुजरा नगरपालिका–९ सिमराभवानीपुरबाट हराएका ३ वर्षीय बालक आर्यन राम मृत अवस्थामा भेटिएका छन् । उनी शनिबार दिउँसो घरबाट निस्किएपछि बेपत्ता भएका थिए । स्थानीय विजय रामका छोरा रहेका आर्यनको खोजीका लागि आमाले प्रहरीमा निवेदन दिएपछि इलाका प्रहरी कार्यालय चन्द्रनिगाहपुरको टोली तथा स्थानीयवासीको सहयोगमा खोजी कार्य तीव्र पारिएको थियो । खोजतलासको क्रममा आइतबार बिहान गुजरा–८ मा रहेको आर्यनको घरदेखि करिब ७ सय मिटर पश्चिमतर्फको इनारमा उनको शव फेला परेको प्रहरी नायब उपरीक्षक (डीएसपी) रूपा लाबुङ्गले जानकारी दिइन् । खबर प्राप्त हुनासाथ प्रहरी निरीक्षक रुपेश कुमार झाको नेतृत्वमा टोली घटनास्थलमा खटिएको थियो । हाल घटनाको प्रकृति र कारणबारे थप अनुसन्धान भइरहेको र बालकको शव चन्द्रनिगाहपुरस्थित सरकारी अस्पतालमा राखिएको प्रहरीले जनाएको छ ।
