राैतहट,कार्तिक २२ गते ।
नेपाली कांग्रेसका वरिष्ठ नेता तथा पूर्वमन्त्री मोहम्मद अफताव आलमको ६३ वर्षको उमेरमा शनिबार निधन भएको छ । उच्च रक्तचाप, सुगरलगायतका स्वास्थ्य समस्या देखिएपछि एक महिनादेखि सिनामंगलस्थित काठमाडौं मेडिकल कलेज (केएमसी) मा उपचाररत रहेका आलमको भेन्टिलेटरमा उपचारका क्रममा निधन भएको हो ।
पारिवारिक स्राेतले पुष्टि गरेकाे छ ।
आलमका छोरा राजपुर नगरपालिकाका नगरप्रमुख डा. राजिक आलमका अनुसार डेढ महिना अघि उनलाई भारतको गुरुग्रामस्थित मेदान्त अस्पतालमा उपचारका लागि लगिएको थियो । “त्यहाँ सुधार आएपछि घर ल्यायौं, तर केही समयपछि स्वास्थ्य झनै बिग्रियो,” राजिकले बताए। दशैंअघि उनलाई थप उपचारका लागि पुनः अस्पताल भर्ना गरिएको थियो ।
गएको जेठ १४ गते नख्खु कारागारबाट मुक्त भएका आलमलाई केही दिनमै मस्तिष्कघात भएपछि माइतीघरस्थित अन्नपूर्ण न्युरो अस्पतालमा भर्ना गरिएको थियो । उपचारपछि डिस्चार्ज गरिएका आलमलाई पुरानै समस्या बल्झिएपछि केएमसीमा भर्ना गरिएको थियो।
राैतहटका पत्रकार अभिमनु पटेलले आफ्नो सामाजिक संजालमा लेखेका छन् -२०६४ साल चैत २७ गते रौतहटको राजपुरमा भएको बम विस्फोट आरोपमा आलमलाई जिल्ला अदालत रौतहटले जन्मकैदको सजाय सुनाएको थियो । तर उच्च अदालत जनकपुर, अस्थायी इजलास वीरगन्जले उक्त फैसला उल्टाउँदै आलमसहित चार जनालाई सफाइ दिएको थियो । त्यसपछि उनी र उनका भाइ महताब गौर कारागारबाट मुक्त भएका थिए ।
रौतहट क्षेत्र नम्बर २ लाई नेपाली कांग्रेसको बलियो गढ मानिन्छ, जहाँ आलमले लगातार चार पटक प्रतिनिधित्व गरेका थिए । दोस्रो संविधानसभा निर्वाचनमा भने उनी आफ्नै भान्जा मुस्ताक राजासँग पराजित भएका थिए । २०७४ सालमा उनले पुनः सो क्षेत्रबाट जितेर प्रतिनिधि सभा सदस्य बनेका थिए ।
२०३६ सालमा नेपाल विद्यार्थी संघमार्फत राजनीतिमा प्रवेश गरेका आलमले २०३९ सालमा नेविसंघको रौतहट जिल्ला अध्यक्ष भएर राजनीतिक यात्रा अघि बढाएका थिए। त्यसपछि २०४५ सालमा कांग्रेसको जिल्ला सभापति बने र २०५१ सालको उपनिर्वाचनमा पहिलो पटक सांसद निर्वाचित भएका थिए।
राजनीतिक जीवनमा उनले श्रम, वन, स्थानीय विकास र भूमिसुधार मन्त्रालयको जिम्मेवारी सम्हालेका थिए।
आलमका परिवारमा श्रीमती, दुई छोरा—डा. फिरदोस र डा. राजिक (राजपुर नगरपालिकाका नगरप्रमुख)—र एक छोरी छन्। उनका बुवा मोहम्मद सिद्धिक बेदिल र आमाको निधन भइसकेको छ ।
नेपाली कांग्रेसले आलमको निधनलाई पार्टीका लागि ठूलो क्षति भनेको छ। पार्टीका नेता तथा कार्यकर्ताहरूले उनको योगदान र संघर्षको स्मरण गर्दै श्रद्धाञ्जलि अर्पण गरेका छन् ।
