आरके श्रीवास्तव,राैतहट,मंसिर ०५ गते ।
राैतहट— GENZ 2.0 का केन्द्रीय संयोजक हरि कार्की,केन्द्रीय सचिव कुन्दन कुशवाहा,पर्सा संयोजक रजनिश कुशवाहा र राैतहट जिल्ला संयोजक सोनु कुशवाहाको टोलीले आज सिंहदरबारमा अन्तरिम मन्त्रिपरिषद्का ऊर्जा, जलस्रोत तथा सिँचाइ तथा भौतिक पूर्वाधार तथा यातायात मन्त्री कुलमान घिसिङसँग विशेष भेटघाट गरेको छ ।
भेटघाटका क्रममा राैतहट जिल्ला संयोजक सोनु कुशवाहाले राैतहट क्षेत्र नं. २ का अत्यन्तै महत्वपूर्ण समस्या— लालबकैया नदी तटबन्ध संरक्षण, सिंचाइका बम नहरहरूको लामो समयदेखि बन्द रहेको अवस्था, र किसानले झेलिरहेको प्रत्यक्ष प्रभावबारे विस्तृत रूपमा मन्त्रीमाथि ध्यानाकर्षण गराएका थिए ।
राैतहटमा हरेक वर्ष बाढी र कटानले व्यापक क्षति पुर्याउँदै आएको, तर दिगो समाधानका पहल अपुग रहेको उल्लेख गर्दै कुशवाहाले स्थानीय बासिन्दाको सुरक्षा र कृषि उत्पादनको भविष्य यस समस्यासँग जोडिएको बताए ।
सो क्रममा मन्त्री कुलमान घिसिङले आफू छोटो समयका लागि मन्त्रिपदमा आएपनि जनताको चिन्ता तत्काल सुन्न र समाधानका दिशामा प्रारम्भिक कदम चाल्न प्रतिबद्ध रहेको बताए ।
उनले भने— “मुख्य उद्देश्य अबको चुनाव सुनिश्चित गर्नु भए पनि, राैतहट लगायतका ठाउँबाट उठाएका यी समस्या गम्भीर र दीर्घकालीन प्रभाव पार्ने खालका छन्। उपलब्ध समय र स्रोतभित्रै सम्भव हुने पहलहरूमा तपाईंहरूलाई निराश पार्नेछैन।”
GENZ 2.0 को टोलीले मन्त्रीबाट प्राप्त सकारात्मक संकेतलाई स्वागत गर्दै राैतहट क्षेत्रका समस्यालाई केन्द्रमा राखेर निरन्तर अनुगमन तथा पहल गर्ने जनाएको छ ।
