म्याग्दी । म्याग्दीमा १४ वर्षीया बालिकालाई जबरजस्ती करणी गरेको अभियोगमा मालिका गाउँपालिका-५ देविस्थान पन्थुक बस्ने २२ वर्षीय बिकल विकलाई प्रहरीले पक्राउ गरेको छ ।
बिकलले ती बालिकालाई जबरजस्ती करणी गरेको भन्ने उजुरीको आधारमा प्रहरी चौकी मुनाताकमबाट खटिएको प्रहरीले उनलाई पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको जनाएको छ । एभरेष्ट न्यूज एजेन्सी
काठमाडौँ । अविरल वर्षासँगै पहिरो, लेदो र सम्भावित बाढीका कारण देशका विभिन्न राजमार्ग तथा सडकखण्ड अवरुद्ध भएका छन् । प्रहरीका अनुसार आज बिहान ९ बजेसम्मको विवरणअनुसार धेरै स्थानमा सडक पूर्ण रूपमा बन्द भएका छन् भने केही क्षेत्रमा रातिको समयमा सवारी आवागमनमा रोक लगाइएको छ ।
सिन्धुपाल्चोकको भोटेकोशी गाउँपालिकास्थित जिरोकिलो र कोदारी क्षेत्रमा पहिरो तथा लेदो खसेपछि अरनिको राजमार्ग पूर्ण रूपमा अवरुद्ध भएको छ । यस्तै चितवनको इच्छाकामना गाउँपालिका–३ फिस्लिङस्थित पृथ्वी राजमार्गमा पनि पहिरो झरेपछि सवारी आवागमन ठप्प भएको छ ।
रसुवाको उत्तरगया गाउँपालिकास्थित त्रिशूली–मैलुङ–स्याफ्रुबेँसी सडकखण्ड, रोल्पाको माडी गाउँपालिकास्थित रुकुम–घोराही शहीद मार्ग, दार्चुलाको महाकाली राजमार्ग, बागलुङको जैमिनी नगरपालिकास्थित कालीगण्डकी करिडोर तथा खोटाङको मध्यपहाडी लोकमार्गअन्तर्गत दिक्तेल–भोजपुर सडकखण्ड पनि पहिरोका कारण पूर्ण रूपमा अवरुद्ध भएका छन् ।
यस्तै इलाम नगरपालिका–९ राजदुवालीस्थित मेची राजमार्ग हिलोका कारण बन्द भएको छ भने ताप्लेजुङको पाथीभरा याङवरक गाउँपालिकास्थित मेची राजमार्गमा पनि पहिरो खसेपछि यातायात सेवा प्रभावित बनेको छ। अर्घाखाँचीको पाणिनी गाउँपालिकास्थित सालझण्डी–ढोरपाटन सडकखण्डमा माथिबाट ढुङ्गा खसेपछि सडक पूर्ण रूपमा बन्द भएको छ ।
यसैबीच सम्भावित बाढीको जोखिमलाई ध्यानमा राख्दै काभ्रेपलाञ्चोक र सिन्धुली जोड्ने बिपी राजमार्गमा साँझ ६ बजेदेखि बिहान ४ बजेसम्म सबै प्रकारका सवारी साधन सञ्चालनमा रोक लगाइएको छ । बिहान ४ बजेदेखि साँझ ६ बजेसम्म भने सवारी सञ्चालन हुने व्यवस्था गरिएको छ ।
मकवानपुरको कान्ति लोकपथमा पनि वर्षायामभर साँझ ५ बजेदेखि बिहान ५ बजेसम्म सवारी सञ्चालनमा रोक लगाइएको छ ।
विपद् जोखिम न्यूनीकरणका लागि विभिन्न प्रदेशमा रातिको सवारी सञ्चालनमा विशेष प्रतिबन्ध लगाइएको छ। कोशी प्रदेशका इलाम, तेह्रथुम, सङ्खुवासभा, भोजपुर, धनकुटा, पाँचथर, खोटाङ र सोलुखुम्बुका विभिन्न सडकमा रातिको समयमा सवारी सञ्चालन रोकिएको छ ।
बागमती प्रदेशमा काभ्रे, सिन्धुली, नुवाकोट, धादिङ, सिन्धुपाल्चोक, मकवानपुर र चितवनका प्रमुख सडक तथा राजमार्गमा पनि रातिको समयमा सवारी सञ्चालनमा रोक लगाइएको छ। विशेषगरी नारायणगढ–मुग्लिन–काठमाडौँ सडकखण्डमा अर्को सूचना जारी नभएसम्म रातिको सवारी आवागमन बन्द रहने जनाइएको छ ।
गण्डकी प्रदेशमा कास्की, गोरखा, स्याङ्जा, लमजुङ, बागलुङ र म्याग्दीबाट छुट्ने लामो दूरीका रात्रिकालीन सार्वजनिक सवारी साधन सञ्चालनसमेत अस्थायी रूपमा रोकिएको छ ।
सुरक्षा निकायले वर्षाका कारण सडकको अवस्था जोखिमपूर्ण रहेकाले अत्यावश्यक बाहेक यात्रा नगर्न, यात्रा गर्नुपरे सम्बन्धित जिल्लाको सडक अवस्थाबारे जानकारी लिएर मात्र यात्रा गर्न तथा प्रहरी र स्थानीय प्रशासनको निर्देशन पालना गर्न सर्वसाधारणलाई आग्रह गरेको छ ।एभरेष्ट न्यूज एजेन्सी
बज्जिकाञ्चल संवाददाता,रौतहट,०४ गते साउन ।
रौतहटको कटहरिया नगरपालिका–५ निवासी स्वर्गीय युवा पत्रकार रविन्द्र प्रजापतिको प्रथम स्मृति दिवस आइतबार कटहरियास्थित विवाह भवनमा दीप प्रज्वलनसहित श्रद्धाञ्जली सभा आयोजना गरी भावपूर्ण रूपमा मनाइएको छ ।
भावपूर्ण हार्दिक श्रद्धाञ्जली,आत्महत्या गर्न दुरुत्साहन गर्नेलाई कारबाही गर, पीडितलाई न्याय देऊ भन्ने मूल नाराका साथ आयोजित कार्यक्रममा स्वर्गीय पत्रकार प्रजापतिको तस्वीरमा माल्यार्पण, दीप प्रज्वलन तथा मौनधारण गर्दै श्रद्धाञ्जली अर्पण गरिएको थियो ।
कार्यक्रममा वक्ताहरूले स्वर्गीय पत्रकार प्रजापतिले पत्रकारिता क्षेत्रमा पुर्याएको योगदानको स्मरण गर्दै उहाँको निधनको घटनालाई गम्भीर रूपमा अनुसन्धान गरी आत्महत्याका लागि दुरुत्साहन गर्ने व्यक्ति वा समूहलाई कानुनी दायरामा ल्याउन राज्यसँग माग गरेका थिए ।
कार्यक्रमलाई सम्बोधन गर्दै राष्ट्रिय दलित पत्रकार संघ, रौतहटका अध्यक्ष राजेश पासवानले पत्रकार प्रजापति एक इमानदार, मेहनती र निडर पत्रकार भएको उल्लेख गर्दै यस्ता दुःखद घटनाको निष्पक्ष छानबिन हुनुपर्ने बताए । उनले दोषीमाथि कानुनी कारबाही गरी पीडित परिवारलाई न्याय दिलाउन सम्बन्धित निकायसँग आग्रह गरे ।
त्यसैगरी पत्रकार सागर संगम ठाकुरले आफूले नजिकको सहकर्मी गुमाउनुपरेको पीडा व्यक्त गर्दै पत्रकार रविन्द्र प्रजापतिलाई आत्महत्याको अवस्थासम्म पुर्याउने जो–कोही भए पनि उनीहरूमाथि कानुनअनुसार कडा कारबाही हुनुपर्ने बताए । उनले पत्रकारको सुरक्षासँगै मानसिक तथा सामाजिक दबाबका विषयमा समेत राज्यले गम्भीर ध्यान दिनुपर्ने धारणा राखे ।
यस्तै आम जनता पार्टी आजपा रौतहटका जिल्ला अध्यक्ष नरेश तुरहा तथा आजपा नेता विवेक साहले पनि स्वर्गीय पत्रकार प्रजापतिप्रति श्रद्धाञ्जली व्यक्त गर्दै घटनाको सत्यतथ्य सार्वजनिक गरी दोषीलाई कानुनी कारबाही गर्न माग गरे ।
कार्यक्रममा कटहरिया नगरपालिकाका पूर्व नगरप्रमुख सियाराम कुशवाहा,कटहरिया–५ का वडा अध्यक्ष सर्फलाल गुप्ता, बज्जिकाञ्चल एफएमका सञ्चालक आर.के.श्रीवास्तव,स्थानिय मञ्जु गिरी लगायतले स्वर्गीय पत्रकार प्रजापतिको व्यक्तित्व, पत्रकारिताप्रतिको समर्पण र सामाजिक योगदानको स्मरण गरेका थिए ।
सो अवसरमा स्थानीय जनप्रतिनिधि, पत्रकार, समाजसेवी, विभिन्न राजनीतिक दलका प्रतिनिधि, शुभेच्छुक तथा स्थानीयवासीको उल्लेखनीय सहभागिता रहेको थियो ।
स्वर्गीय पत्रकार रविन्द्र प्रजापतिको जन्म मिति २०५३ साल भदौ १५ गते तथा स्वर्गारोहण मिति २०८२ साल साउन ३ गते रहेको स्मरण गर्दै उहाँको पवित्र स्मृतिमा भावपूर्ण श्रद्धाञ्जली अर्पण गरिएको थियो ।
वक्ताहरूले पत्रकार प्रजापतिको निधन केवल एक व्यक्तिको क्षति नभई सम्पूर्ण पत्रकारिता क्षेत्रकै अपूरणीय क्षति भएको उल्लेख गर्दै सत्य, न्याय र उत्तरदायित्व सुनिश्चित गर्न सम्बन्धित निकायले प्रभावकारी कदम चाल्नुपर्नेमा जोड दिएका थिए । साथै, उहाँको स्मृतिलाई सदैव सम्मानपूर्वक जीवित राख्ने प्रतिबद्धता पनि व्यक्त गरिएको थियो।
आरके श्रीवास्तव,राैतहट,०४ गते ।
रौतहटको गुजरा नगरपालिका–२ स्थित चोचामा रहेको शिवशक्ति सामुदायिक वन उपभोक्ता समूहको वन क्षेत्रमा अतिक्रमण गरी गरिएको खेती हटाएर पुनः वन क्षेत्र कायम गरिएको छ ।
डिभिजन वन कार्यालय रौतहटका डिभिजनल वन अधिकृत मनोज ठाकुरका अनुसार वन क्षेत्र अतिक्रमण गरी करिब एक महिनाअघि खनजोत गरेर धान रोपिएको थियो । सामुदायिक वन उपभोक्ता समूहले पटक–पटक त्यसो नगर्न आग्रह गर्दा पनि अतिक्रमणकारीहरूले अटेर गरेपछि कानुनी प्रक्रिया अगाडि बढाइएको उनले बताए ।
उनका अनुसार प्रमुख जिल्ला अधिकारी, जिल्ला प्रहरी कार्यालय र जिल्ला स्थित सशस्त्र प्रहरीको समन्वय तथा सहयोगमा मिति २०८३ साल साउन ३ गते संयुक्त टोली परिचालन गरिएको थियो । उक्त टोलीमा डिभिजन वन कार्यालयका कर्मचारी, रंगपुर प्रहरी चौकी, जङ्गलसहियास्थित सशस्त्र प्रहरी बेस, शिवशक्ति सामुदायिक वन उपभोक्ता समूहका पदाधिकारी तथा अन्य सरोकारवालाको सहभागिता रहेको थियो ।
संयुक्त टोलीले वन क्षेत्रमा अवैध रूपमा रोपिएको धान हटाई उक्त क्षेत्र पुनः वनको रूपमा व्यवस्थापन गरेको हो । सो क्रममा टिक, मसला, जामुनलगायतका विभिन्न प्रजातिका बिरुवा रोपेर वन क्षेत्रको पुनःस्थापना गरिएको डिभिजन वन कार्यालयले जनाएको छ ।
डिभिजनल वन अधिकृत मनोज ठाकुरले वन क्षेत्र सार्वजनिक सम्पत्ति भएकाले यसको अतिक्रमण कुनै पनि हालतमा स्वीकार्य नहुने बताए। उनले वन संरक्षण तथा जैविक विविधता जोगाउन डिभिजन वन कार्यालय प्रतिबद्ध रहेको उल्लेख गर्दै वन अतिक्रमणविरुद्ध आवश्यक कानुनी कारबाही र अनुगमनलाई आगामी दिनमा पनि निरन्तरता दिइने जानकारी दिए।
डिभिजन वन कार्यालयले सामुदायिक वनको संरक्षणमा स्थानीय समुदाय, उपभोक्ता समूह र सम्बन्धित सबै पक्षको सक्रिय सहभागिता आवश्यक रहेको उल्लेख गर्दै वन अतिक्रमण नगर्न तथा वन संरक्षण अभियानमा सहयोग गर्न सबैसँग आग्रह गरेको छ।
शिवनाथ कुशवाहा ,रौतहट, साउन ४ ।
जिल्ला प्रहरी कार्यालय रौतहटले आर्थिक वर्ष २०८३ को असार महिनामा जिल्लाभर सञ्चालन गरेका सुरक्षा, अपराध अनुसन्धान तथा सेवा प्रवाहसम्बन्धी गतिविधिको प्रगति विवरण सार्वजनिक गरेको छ । सार्वजनिक विवरणअनुसार असार महिनामा विभिन्न प्रकृतिका १२२ वटा अपराधका मुद्दा दर्ता भएका छन् भने ६३ जना फरार प्रतिवादी पक्राउ परेका छन् ।
प्रहरीका अनुसार असार महिनामा ज्यानसम्बन्धी २२, आत्महत्यासम्बन्धी १९, चोरीका ५, संगठित तथा आर्थिक अपराधका २२, सामाजिक अपराधका १७, महिला तथा बालबालिकासम्बन्धी ६, सवारी ज्यानका ८ र अन्य २३ गरी कुल १२२ वटा मुद्दा दर्ता भएका छन् । गम्भीर अपराधतर्फ ३ वटा कर्तव्य ज्यान, १ हातहतियार, १९ बैंकिङ कसुर र ३ ठगीसम्बन्धी मुद्दा दर्ता भएका छन् ।
फैसला कार्यान्वयन अभियानअन्तर्गत प्रहरीले ६३ जना फरार प्रतिवादीलाई पक्राउ गरेको छ । उनीहरूबाट ११ वर्ष ५ महिना २ दिन कैद सजाय कार्यान्वयन हुनुका साथै ७ लाख ६९ हजार २०० रुपैयाँ जरिवाना असुल गरिएको प्रहरीले जनाएको छ ।
महिला, बालबालिका तथा ज्येष्ठ नागरिकसँग सम्बन्धित ९३ वटा उजुरी दर्ता भएका छन् भने घरेलु हिंसाका ३० उजुरीमध्ये २६ वटा मिलापत्रमार्फत समाधान गरिएको छ। यस अवधिमा ४२ जना हराएकामध्ये २० जनालाई प्रहरीले फेला पारेको छ ।
लागूऔषध नियन्त्रण अभियानमा प्रहरीले ४ वटा मुद्दा दर्ता गर्दै ६ जनालाई पक्राउ गरेको छ । बरामद लागूऔषधमा १ किलो ६५० ग्राम गाँजा, ७ ग्राम ३१० मिलिग्राम ब्राउन सुगर, ४३ वटा ट्याब्लेट र २ वटा नाइट्रोभेट रहेका छन् ।
असार महिनामा जिल्लामा ९३ वटा सवारी दुर्घटना हुँदा ६ जनाको मृत्यु भएको छ भने १३३ जना घाइते भएका छन्। दुर्घटनाको प्रमुख कारण चालकको लापरबाही रहेको प्रहरीको विश्लेषण छ। ट्राफिक कारबाहीबाट ९ लाख ९ हजार ५०० रुपैयाँ जरिवाना संकलन गरिएको छ ।
अवैध हातहतियार नियन्त्रण अभियानमा गरुडाबाट एक कटुवा पेस्तोल, ६ राउण्ड गोली, नगद नेपाली तथा भारतीय रुपैयाँ बरामद गरिएको छ। त्यस्तै भन्सार छली नियन्त्रणका क्रममा करिब २३ लाख ९२ हजार ५४५ रुपैयाँ बराबरका सामान बरामद गरी एक जनालाई पक्राउ तथा ६ वटा सवारी साधन नियन्त्रणमा लिइएको प्रहरीले जनाएको छ ।
विपद् व्यवस्थापनतर्फ आगलागी, बाढी, करेन्ट, डुबान तथा सर्पदंश लगायत २५ वटा विपद्का घटना भएका छन्। ती घटनामा ८ जनाको मृत्यु, ९ जना घाइते र १ जनाको उद्धार गरिएको विवरणमा उल्लेख छ ।
समुदाय–प्रहरी साझेदारी कार्यक्रमअन्तर्गत लागूऔषध, आत्महत्या, महिला हिंसा, साइबर अपराध, ट्राफिक सचेतना लगायतका ९९ वटा जनचेतनामूलक कार्यक्रम सञ्चालन गरी २ हजार ९ सय ३२ जनालाई प्रत्यक्ष लाभान्वित गरिएको छ। विद्यालय केन्द्रित २६ वटा कार्यक्रममा थप १ हजार ६ सय १५ विद्यार्थी सहभागी भएका छन् ।
प्रहरीले असार महिनाभर ८१५ वटा सार्वजनिक उजुरीमध्ये ८०२ वटा फछ्र्योट गरेको, २३० वटा नागरिकता मुचुल्का तयार गरेको, १६ हजारभन्दा बढी टेलिफोन कलमा सेवा दिएको तथा ४ हजार २ सय ७४ जना सेवाग्राहीलाई प्रत्यक्ष सेवा प्रदान गरेको जनाएको छ। साथै हराएका तथा चोरी भएका ३१ वटा मोबाइल फेला पारेर सम्बन्धित धनीलाई बुझाइएको पनि प्रहरीको उपलब्धिमा उल्लेख गरिएको छ ।
जिल्ला प्रहरी कार्यालय रौतहटले आगामी दिनमा आधुनिक प्रविधिको प्रयोग, प्रभावकारी प्रहरी परिचालन तथा नागरिकमैत्री सेवामार्फत अपराध नियन्त्रण र शान्ति सुरक्षालाई अझ सुदृढ बनाउने प्रतिबद्धता व्यक्त गरेको छ ।
काठमाडौँ । स्पेनले दोस्रो पटक फिफा विश्वकप फुटबलको उपाधि जित्दै विश्व फुटबलमा फेरि आफ्नो प्रभुत्व स्थापित गरेको छ ।
रोमाञ्चक फाइनलमा स्पेनले १० खेलाडीमा सीमित अर्जेन्टिनालाई अतिरिक्त समयमा १-० गोल अन्तरले पराजित गर्दै विश्व च्याम्पियन बन्न सफल भएको हो । स्पेनका लागि फेरान टोरेसले अतिरिक्त समयको १०६औं मिनेटमा निर्णायक गोल गर्दै टोलीलाई ऐतिहासिक जित दिलाएका हुन् ।
खेलभर अधिकांश समय बलमा नियन्त्रण कायम राखेको स्पेनले अर्जेन्टिनामाथि लगातार दबाब सिर्जना गरेको थियो । अर्जेन्टिनाका कप्तान लियोनेल मेसीलाई प्रभावहीन बनाउँदै स्पेनले उत्कृष्ट सामूहिक प्रदर्शन गरेको थियो ।
निर्धारित ९० मिनेटमा गोलरहित बराबरी भएपछि खेल अतिरिक्त समयमा पुगेको थियो । त्यसपछि फेरान टोरेसले गरेको एकमात्र गोल नै स्पेनलाई विश्वकपको उपाधि दिलाउन पर्याप्त बन्यो । स्पेनले यससँगै इतिहासमा दोस्रो पटक विश्व फुटबलको सर्वोच्च उपाधि आफ्नो नाममा लेखाएको छ । स्पेनले यसअघि २०१० मा विश्वकपको उपाधि जितेको थियो ।एभरेष्ट न्यूज एजेन्सी
काठमाडौँ । आज राष्ट्रिय सभा अन्तर्गतका तीन समितिको बैठक बस्दैछ । आज विधायन व्यवस्थापन समिति, सार्वजनिक नीति तथा प्रत्यायोजित विधायन समिति र संघीयता सबलीकरण तथा राष्ट्रिय सरोकार समितिको बैठक बस्दैछ ।
दिउसो २: १५ बजेका लागि बोलाइएको विधायन व्यवस्थापन समितिको बैठकमा ऐन कार्यान्वयन मापन र विधायिकी अन्तरसम्बन्ध सम्बन्धमा छलफलको कार्यसूची रहेको छ ।
त्यसैगरी दिउसो १ बजेका लागि बोलाइएको सार्वजनिक नीति तथा प्रत्यायोजित विधायन समितिको बैठकमा मधेश र बागमती प्रदेश अन्तर्गतका जिल्लाहरुमा गरिएको अनुगमनको समीक्षा हुने कार्यसूची रहेको समितिले जानकारी दिएको छ ।
त्यस्तै आज बिहान साढे ११ बजेका लागि बोलाइएको संघीयता सबलीकरण तथा राष्ट्रिय सरोकार समितिको बैठकमा संसदीय अध्ययन तथा अनुसन्धान महाशाखाद्वारा तयार पारिएको ‘राष्ट्रिय महिला आयोगको कार्य प्रभावकारिता सम्बन्धी अध्ययन’ प्रतिवेदनबारे छलफलको कार्यसूची रहेको छ ।एभरेष्ट न्यूज एजेन्सी
काठमाडौँ । आज (जुलाई २०) विश्वभर विभिन्न कार्यक्रम आयोजना गरी अन्तर्राष्ट्रिय चन्द्रमा दिवस मनाइँदै छ । संयुक्त राष्ट्रसंघको महासभाले सन् २०२१ मा पारित गरेको प्रस्तावअनुसार प्रत्येक वर्ष जुलाई २० मा यो दिवस मनाउने गरिएको हो ।
यो दिवस सन् १९६९ मा अपोलो- ११ अभियानमार्फत पहिलो पटक मानवले चन्द्रमामा सफलतापूर्वक पाइला टेकेको ऐतिहासिक उपलब्धिको सम्झनामा मनाइन्छ । उक्त अभियानले अन्तरिक्ष अनुसन्धानमा नयाँ युगको सुरुवात गरेको मानिन्छ ।
यस दिवसको उद्देश्य चन्द्रमाको अन्वेषणमा विभिन्न मुलुकले हासिल गरेका उपलब्धिको सम्मान गर्नुका साथै चन्द्रमाको दिगो, सुरक्षित र शान्तिपूर्ण उपयोगबारे विश्वव्यापी जनचेतना अभिवृद्धि गर्नु हो । पछिल्ला वर्षहरूमा चन्द्रमासम्बन्धी अनुसन्धान र भावी अभियानहरू तीव्र रूपमा अघि बढिरहेका बेला यो दिवसले भविष्यका अन्तरिक्ष अभियानप्रति पनि ध्यानाकर्षण गराउने विश्वास गरिएको छ ।
संयुक्त राष्ट्रसंघले अन्तरिक्ष सम्पूर्ण मानव जातिको साझा सम्पत्ति भएकाले यसको उपयोग शान्तिपूर्ण र मानव कल्याणका लागि हुनुपर्नेमा जोड दिँदै आएको छ। अन्तरिक्षसम्बन्धी अन्तर्राष्ट्रिय सहकार्यलाई प्रवर्द्धन गर्न तथा अन्तरिक्षको जिम्मेवार प्रयोग सुनिश्चित गर्न संयुक्त राष्ट्रसंघका निकायहरूले निरन्तर काम गरिरहेका छन् ।
हजारौँ वर्षदेखि चन्द्रमाले मानव सभ्यताको जिज्ञासा, अध्ययन र वैज्ञानिक अनुसन्धानको केन्द्रका रूपमा स्थान ओगट्दै आएको छ। आधुनिक अन्तरिक्ष प्रविधिको विकाससँगै चन्द्रमाको थप अध्ययन, स्रोतको सम्भावित उपयोग र भविष्यमा मानव बसोबासको सम्भावनासमेत खोजी भइरहेको छ ।एभरेष्ट न्यूज एजेन्सी
काठमाडौँ । जल तथा मौसम विज्ञान विभाग अन्तर्गत मौसम पूर्वानुमान महाशाखाले हाल देशभर मनसुनी वायूको प्रभाव रहेको र हाल मनसुनको न्यून चापीय रेखा सरदर स्थानभन्दा उत्तरतर्फ रहेको जानकारी दिएको छ ।
हाल देशभर अधिकांश बादल लागेको छ । कोशी बागमती, गण्डकी, लुम्बिनी र कर्णाली प्रदेशका केहि स्थानमा, सुदुरपश्चिम प्रदेशको थोरै स्थानमा मध्यमसम्मको वर्षा भैरहेको छ ।
आज दिउँसो देशभर साधारणतया बादल लाग्नेछ। देशका हिमाली भू-भागका केही स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ। देशको पहाडी भू-भागका धेरै स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। कोशी, बागमती, गण्डकी, लुम्बिनी र सुदूरपश्चिम प्रदेशका तराईका धेरै स्थानहरुमा तथा मधेश प्रदेशका केही स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ । कोशी र सुदूरपश्चिम प्रदेशका पहाडी र तराई भू-भागका थोरै स्थानहरुमा तथा बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी भू-भागको एक-दुई स्थानमा भारी वर्षाको सम्भावना रहेको छ ।
त्यस्तै आज राति देशभर साधारणतया बादल लाग्नेछ। देशका हिमाली भू-भागका केही स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ। मधेश प्रदेश साथै कोशी, बागमती, गण्डकी, लुम्बिनी र सुदूरपश्चिम प्रदेशका पहाडी र तराई भू-भागका धेरै स्थानमा तथा कर्णाली प्रदेशका पहाडी भू-भागका केही स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। कोशी, बागमती, गण्डकी र लुम्बिनी प्रदेशका पहाडी र तराई भू-भागका एक-दुई स्थानमा भारी वर्षाको सम्भावना रहेको छ ।एभरेष्ट न्यूज एजेन्सी
आजको राशिफल बिस २०८३ साउन ४ गते सोमबार ईस २०२६ जुलाई २० नेपाल सम्बत ११४६ दिल्लाथ्व सप्तमी, रौद्र नाम संवत्सर सूर्य दक्षिणायन, वर्षा ऋतु, असार शुक्ल सप्तमी, चन्द्रमा कन्या राशिमा, हस्त नक्षत्र, शिव योग, गर करण । आज नेपालमा सुर्योदय बिहान ५ बजेर २० मिनेटमा र सूर्यास्त साँझ ७ बजेर १ मिनेटमा हुनेछ । आज जन्म लिने बच्चा कन्या राशीको हुनेछ ।
मेष (चु, चे, चो, ला, लि, लु, ले, लो, अ) –
आजको दिन जोश, जाँगर र आत्मविश्वासका साथ सुरु हुनेछ। विगतदेखि रोकिएका केही कामले गति लिन सक्छन्। कार्यक्षेत्रमा तपाईंको निर्णय क्षमता, नेतृत्व शैली र मेहनतको राम्रो मूल्यांकन हुनेछ। नयाँ जिम्मेवारी आउन सक्छ, जसलाई सफलतापूर्वक पूरा गर्न सक्नुहुनेछ। व्यापार–व्यवसायमा लाभ बढ्ने संकेत देखिएको छ। आर्थिक पक्ष सन्तुलित रहनेछ र आम्दानीका नयाँ सम्भावना पनि देखिनेछन्। परिवारमा खुसीको वातावरण रहनेछ। प्रियजनसँगको संवादले सम्बन्ध अझ आत्मीय बन्नेछ। सामाजिक क्षेत्रमा पनि सक्रियता बढ्नेछ र नयाँ परिचय भविष्यमा उपयोगी बन्न सक्छ। स्वास्थ्य राम्रो रहनेछ, तर अत्यधिक कामका कारण थकान महसुस हुन सक्ने भएकाले पर्याप्त विश्राम गर्न नबिर्सनुहोस्।
वृष (इ, उ, ए, ओ, वा, वि, वु, वे, वो) –
आज धैर्य र विवेकका साथ अघि बढ्दा धेरै काम सहज रूपमा सम्पन्न हुनेछन्। कार्यक्षेत्रमा सहकर्मी र वरिष्ठ व्यक्तिको सहयोग प्राप्त हुनेछ। पुराना प्रयासले सकारात्मक परिणाम दिन थाल्नेछन्। व्यापार–व्यवसायमा नियमित आम्दानी कायम रहनेछ र नयाँ योजना बनाउने अवसर पनि मिल्नेछ। आर्थिक रूपमा खर्च र आम्दानीबीच सन्तुलन कायम रहनेछ। परिवारका सदस्यहरूसँग आत्मीय सम्बन्ध कायम रहनेछ। घरमा सुखद वातावरण रहने भएकाले मन प्रसन्न हुनेछ। स्वास्थ्य राम्रो रहनेछ र मानसिक रूपमा पनि शान्ति महसुस हुनेछ।
मिथुन (का, कि, कु, घ, ङ, छ, के, को, ह) –
आज सिर्जनशील सोच, स्पष्ट अभिव्यक्ति र मिलनसार व्यवहारले धेरैको ध्यान आकर्षित गर्नेछ। अध्ययन, लेखन, सञ्चार तथा सिर्जनात्मक क्षेत्रमा लागेकाहरूका लागि दिन विशेष उपलब्धिमूलक रहनेछ। कार्यक्षेत्रमा नयाँ अवसर प्राप्त हुन सक्छ र जिम्मेवारी सफलतापूर्वक पूरा गर्न सक्नुहुनेछ। आर्थिक रूपमा सुधार आउने सम्भावना छ। साथीभाइ तथा सहकर्मीको सहयोगले कठिन काम सहज बन्नेछ। परिवारसँग रमाइलो समय बित्नेछ। नयाँ सम्बन्धले भविष्यमा राम्रो अवसर सिर्जना गर्न सक्छ। स्वास्थ्य राम्रो रहनेछ र दिनभर ऊर्जा कायम रहनेछ।
कर्कट (हि, हु, हे, हो, डा, डि, डु, डे, डो) –
आज परिवारको साथ र सहयोगले मन प्रसन्न रहनेछ। घरमा खुसीको वातावरण बन्नेछ र कुनै शुभ समाचार सुन्न पाइने सम्भावना पनि छ। कार्यक्षेत्रमा तपाईंको मेहनत र इमानदारीको उचित मूल्यांकन हुनेछ। रोकिएका काम पूरा हुने सम्भावना बलियो छ। आर्थिक अवस्थामा सुधार आउने संकेत देखिन्छ। नयाँ योजना बनाउन वा दीर्घकालीन निर्णय लिन दिन अनुकूल रहनेछ। प्रियजनसँगको सम्बन्ध अझ सुदृढ बन्नेछ। स्वास्थ्य राम्रो रहनेछ र मानसिक रूपमा पनि सन्तुलित महसुस हुनेछ।
सिंह (मा, मि, मु, मे, मो, टा, टि, टु, टे) –
आज तपाईंको आत्मविश्वास, साहस र नेतृत्व क्षमताले सफलता दिलाउनेछ। कार्यक्षेत्रमा वरिष्ठ व्यक्तिको विश्वास जित्न सफल हुनुहुनेछ। नयाँ जिम्मेवारी वा अवसर प्राप्त हुन सक्छ। व्यापार–व्यवसायमा राम्रो लाभ हुने सम्भावना देखिन्छ। आर्थिक पक्ष मजबुत बन्ने संकेत छ। सामाजिक क्षेत्रमा प्रतिष्ठा र सम्मान बढ्नेछ। परिवारको साथले मनोबल उच्च रहनेछ। साथीभाइसँगको भेटघाटले नयाँ योजना बनाउन प्रेरणा दिनेछ। स्वास्थ्य राम्रो रहनेछ र शरीरमा स्फूर्ति कायम रहनेछ।
कन्या (टो, प, पि, पु, ष, ण, ठ, पे, पो) –
आज अध्ययन, अनुसन्धान, तालिम तथा नयाँ सीप सिक्ने कार्यमा सफलता प्राप्त हुनेछ। कार्यक्षेत्रमा अनुशासन र लगनशीलताका कारण राम्रो अवसर प्राप्त गर्न सक्नुहुनेछ। आर्थिक अवस्था सन्तुलित रहनेछ, तर अनावश्यक खर्च नियन्त्रण गर्नु आवश्यक हुनेछ। परिवारसँग समय बिताउने अवसर मिल्नेछ। छोटो दूरीको यात्रा लाभदायक बन्न सक्छ। नयाँ ज्ञानले भविष्यमा प्रगतिको ढोका खोल्नेछ। स्वास्थ्य राम्रो रहनेछ र नियमित दिनचर्याले शरीरमा थप स्फूर्ति ल्याउनेछ।
तुला (रा, रि, रु, रे, रो, ता, ति, तु, ते) –
आज आर्थिक क्षेत्रमा सकारात्मक परिवर्तन देखिने सम्भावना छ। रोकिएको रकम प्राप्त हुन सक्छ वा आम्दानीको नयाँ स्रोत फेला पर्न सक्छ। व्यापार–व्यवसायमा लाभ बढ्नेछ। कार्यक्षेत्रमा सहकार्य र समन्वय राम्रो रहनेछ। परिवारमा खुसीको वातावरण कायम हुनेछ। सामाजिक सम्बन्ध विस्तार हुने सम्भावना छ। नयाँ चिनजान भविष्यमा लाभदायक बन्न सक्छ। आत्मविश्वास बढ्ने भएकाले महत्त्वपूर्ण निर्णय लिन पनि सहज हुनेछ। स्वास्थ्य राम्रो रहनेछ र मानसिक सन्तुलन कायम रहनेछ।
वृश्चिक (तो, ना, नि, नु, ने, नो, या, यि, यु) –
आज मेहनत, धैर्य र अनुभवले तपाईंलाई राम्रो उपलब्धि दिलाउनेछ। प्रतिस्पर्धात्मक क्षेत्रमा उत्कृष्ट प्रदर्शन गर्ने अवसर प्राप्त हुनेछ। कार्यक्षेत्रमा तपाईंको कामको प्रशंसा हुनेछ र नयाँ जिम्मेवारी पनि आउन सक्छ। आर्थिक रूपमा लाभका संकेत देखिए पनि ठूलो लगानी वा निर्णय गर्दा सावधानी अपनाउनु उचित हुनेछ। परिवारमा खुसी र आत्मीयताको वातावरण रहनेछ। प्रियजनसँगको सम्बन्ध अझ प्रगाढ बन्नेछ। स्वास्थ्य राम्रो रहनेछ र मानसिक रूपमा पनि उत्साह कायम रहनेछ।
धनु (ये, यो, भ, भि, भु, ध, फा, ढ, भे) –
आज सकारात्मक सोच र आत्मविश्वासले दिनलाई सफल बनाउनेछ। व्यापार, अध्ययन, वैदेशिक काम वा यात्रासँग सम्बन्धित क्षेत्रमा शुभ संकेत देखिन्छ। कार्यक्षेत्रमा तपाईंको मेहनतको उचित मूल्यांकन हुनेछ। आर्थिक अवस्थामा सुधार आउने सम्भावना छ। परिवारका सदस्यहरूसँग सम्बन्ध अझ मधुर बन्नेछ। सामाजिक क्षेत्रमा मान–सम्मान बढ्नेछ। नयाँ योजना सुरु गर्न वा भविष्यका लक्ष्य निर्धारण गर्न दिन उपयुक्त रहनेछ। स्वास्थ्य राम्रो रहनेछ र मनमा नयाँ उत्साह जाग्नेछ।
मकर (भो, ज, जि, खि, खु, खे, खो, गा, गि) –
आज जिम्मेवारी बढे पनि योजनाबद्ध रूपमा काम गर्दा सबै कार्य सफलतापूर्वक सम्पन्न हुनेछन्। कार्यक्षेत्रमा वरिष्ठ व्यक्तिको सहयोग प्राप्त हुनेछ। आर्थिक रूपमा खर्चमा नियन्त्रण राख्न सके भविष्यका लागि राम्रो आधार तयार हुनेछ। परिवारका सदस्यहरूको सुझाव उपयोगी सावित हुनेछ। घरमा सुखद वातावरण कायम रहनेछ। स्वास्थ्यमा सामान्य थकान महसुस हुन सक्ने भएकाले आराममा ध्यान दिनु आवश्यक हुनेछ। दिनको अन्त्यमा प्राप्त उपलब्धिले आत्मसन्तुष्टि र आत्मविश्वास बढाउनेछ।
कुम्भ (गु, गे, गो, सा, सि, सु, से, सो, द) –
आज सिर्जनशील सोच, नयाँ योजना र सकारात्मक दृष्टिकोणले तपाईंलाई नयाँ सफलतातर्फ डोर्याउनेछ। कार्यक्षेत्रमा रोकिएका काम सम्पन्न हुनेछन्। साथीभाइ र सहकर्मीको सहयोगले महत्त्वपूर्ण काम सहज रूपमा पूरा हुनेछ। आर्थिक रूपमा सुधार आउने सम्भावना बलियो छ। परिवारमा मेलमिलाप र खुसीको वातावरण कायम रहनेछ। सामाजिक क्षेत्रमा नयाँ सम्बन्ध विस्तार हुनेछ। नयाँ अवसरलाई समयमै उपयोग गर्न सके भविष्यमा राम्रो प्रगति हुनेछ। स्वास्थ्य राम्रो रहनेछ र मन उत्साहित रहनेछ।
मीन (दि, दु, थ, झ, ञ, दे, दो, च, ची) –
आज धैर्य, संयम र सकारात्मक सोचले तपाईंलाई राम्रो उपलब्धितर्फ अघि बढाउनेछ। केही काममा ढिलाइ भए पनि अन्ततः परिणाम सन्तोषजनक रहनेछ। कार्यक्षेत्रमा आफ्नो अनुभव र सीपको राम्रो उपयोग गर्न सक्नुहुनेछ। आर्थिक रूपमा सोचविचार गरेर खर्च गर्नु उचित हुनेछ। परिवारको साथ र सहयोगले आत्मबल बढ्नेछ। पुराना अधुरा काम पूरा हुने सम्भावना बलियो छ। साँझतिर प्राप्त हुने शुभ समाचारले मनमा नयाँ आशा र उत्साह थप्नेछ। स्वास्थ्य राम्रो रहनेछ, मानसिक शान्ति कायम रहनेछ र भविष्यप्रति विश्वास अझ बलियो बन्नेछ ।एभरेष्ट न्यूज एजेन्सी
