संजय सहनी,रौतहट,मंसिर १६ गते ।
रौतहटको ईशनाथ नगरपालिका वडा नं. ४ लतमरी टोलमा रौतहट प्रहरीले ठूलो परिमाणमा नक्कली नेपाली नोटसहित तीन जनालाई पक्राउ गरेको छ।
इलाका प्रहरी कार्यालय मठिया महुलिया र सशस्त्र प्रहरी बल नेपाल बोर्डर आउट पोष्ट मठियाको संयुक्त टोलीले भारतबाट नेपालतर्फ आउँदै गरेको BR.05 AT 0983 नम्बरको मोटरसाइकललाई चेकजाँच गर्ने क्रममा मंगलबार लाखौं नक्कली नोट सहित ३ जनालाई पक्राउ गरेको हो।
पक्राउ पर्नेमा दुई जना नेपाली र एक जना भारतीय नागरिक रहेका रौतहट प्रहरीले जनाएको छ।
पक्राउ पर्नेमा जिल्ला रौतहट, देवाही गोनाही न.पा. वडा नं. ४ बस्ने सोनालाल राउतका छोरा २० बर्सिय अजय पटेल ,सोहि ठाउँको रामबाबु पटेलका छोरा २१ बर्सिय गेनालाल पटेल र भारत, बिहार, जिल्ला मोतिहारी, पुर्वी चम्पारण, वडा नं. २, कुडवा चैनपुर बस्ने बिरेन्द्र सिंहका छोरा २३ बर्सिय जयप्रकाश कुमार रहेको प्रहरीले जनाएको छ।
पक्राउ पर्नेहरुको साथबाट नेपाली खोटा (जाली) रू. १,०००/- दरका ११८ थान कुल रकम: रू. १,१८,०००/- (एक लाख अठार हजार रुपैयाँ) साथै BR.05 AT 0983 नम्बरको मोटरसाइकल बरामद गरेको जिल्ला प्रहरी कार्यालय रौतहटले जनाएको छ।
प्रहरीले उनीहरूलाई नियन्त्रणमा लिई नक्कली नोट (जाली नोट) सम्बन्धी कसुरमा थप अनुसन्धान प्रक्रिया अगाडि बढाएको जनाएको छ। खुल्ला सीमा क्षेत्रमा भएको यो ठूलो परिमाणको नक्कली नोट बरामदले सुरक्षा निकायको सतर्कता बढाएको छ।
