आरके श्रीवास्तव,राैतहट,११ गते फाल्गुन ।
साेनु कुशवाहाले जनमत पार्टी परित्यागको घोषणा गरेका छन् । रौतहट–२ बाट प्रतिनिधि सभा सदस्यका उम्मेदवार बनेका उनले चुनावको मुखमै पार्टी छाड्ने निर्णय सार्वजनिक गरेपछि पार्टीभित्रको आन्तरिक असन्तुष्टि बाहिरिएको छ ।
उनले पार्टीभित्र व्यक्तिवाद र परिवारवाद हाबी भएको आरोप लगाएका छन् । परिवर्तन र वैकल्पिक राजनीतिको नारासहित अघि बढेको पार्टी व्यवहारमा भने सीमित नेतृत्वको स्वार्थमा केन्द्रित भएको उनको दाबी छ । युवामाथि दमन हुँदा नेतृत्व मौन बसेको भन्दै उनले असन्तुष्टि व्यक्त गरेका छन् ।
पार्टी अध्यक्षको नेतृत्वप्रति संकेत गर्दै उनले निर्णय प्रक्रिया एकलौटी रहेको, उम्मेदवारहरूसँग समन्वय नगरेको तथा स्थानीय जनभावनालाई बेवास्ता गरिएको आरोप लगाएका छन् । “जनताको आवाज सुन्ने वातावरण नभएको संरचनामा बसिरहनु राजनीतिक आत्मसमर्पण बराबर हुन्छ,” उनले जारी गरेको विज्ञप्तिमा उल्लेख गरिएको छ ।
उनका अनुसार पार्टी नेतृत्व आफ्नै क्षेत्र र आफन्तको क्षेत्रमा सीमित हुँदा अन्य क्षेत्रका उम्मेदवारहरू उपेक्षामा परेका छन् । कुशवाहासँगै सो क्षेत्रमा १४ जना नेताले पनि साधारण सदस्यबाट राजीनामा दिएको जनाइएको छ ।
