आरके श्रीवास्तव,मधेस,२६ गते पुस ।
जनकपुरधाम । जनकपुर वडा नम्बर २४ बसहियास्थित श्री गोगल प्रसाद नमुना माध्यमिक विद्यालयमा शिक्षा तथा संस्कृति मन्त्रालय, मधेश प्रदेशद्वारा आर्थिक वर्ष २०८१/०८२ अन्तर्गत निर्माण गरिएको २ कोठे पक्की भवनको उद्घाटन गरिएको छ ।
आज सम्पन्न उद्घाटन कार्यक्रममा प्रमुख अतिथिका रूपमा शिक्षा तथा संस्कृति मन्त्री रानी शर्मा तिवारीको सहभागिता रहेको थियो ।
उद्घाटन कार्यक्रममा बोल्दै प्रमुख अतिथि मन्त्री तिवारीले शिक्षा क्षेत्रमा पूर्वाधारको सुदृढीकरणले सिकाइ वातावरणलाई अझ सहज, सुरक्षित र प्रभावकारी बनाउने विश्वास व्यक्त गर्नुभयो । उहाँले विद्यालय भौतिक पूर्वाधारको विकाससँगै गुणस्तरीय शिक्षामा समेत ध्यान दिन आवश्यक रहेको उल्लेख गर्नुभयो ।
कार्यक्रममा विद्यालय व्यवस्थापन समिति, शिक्षक, विद्यार्थी, अभिभावक तथा स्थानीय जनप्रतिनिधिहरूको उपस्थिति रहेको थियो । नयाँ भवन निर्माणपछि विद्यार्थीहरूलाई अध्ययन–अध्यापनमा थप सहजता हुने अपेक्षा गरिएको छ ।
