आरके श्रीवास्तव,रौतहट,२१ गते माघ ।
रौतहट निर्वाचन क्षेत्र नम्बर ३ बाट जनता समाजवादी पार्टी (जसपा) नेपालका तर्फबाट प्रतिनिधि सभा सदस्य पदका उम्मेदवार गोविन्द चौधरी (चुनाव चिन्ह: छाता छाप) ले आज फतुवा विजयपुर नगरपालिका वडा नम्बर ४ टेंग्राहा क्षेत्रमा मतदाताहरूसँग भेटघाट गरेका छन् ।
स्थानीय तहमा आयोजित उक्त भेटघाट कार्यक्रममा उम्मेदवार चौधरीसँगै जसपाका पूर्व प्रदेश सांसद रामकिशोर यादव लगायत पार्टीका अन्य नेताहरूको पनि सहभागिता रहेको थियो । भेटघाटका क्रममा स्थानीय मतदाताहरूले आफ्ना गुनासा, समस्या तथा अपेक्षाहरू राखेका थिए भने उम्मेदवार पक्षले ती विषयमा ध्यानाकर्षण भएको प्रतिक्रिया व्यक्त गरेको जनाइएको छ ।
उम्मेदवार चौधरीले स्थानीय तहमा पुगेर नागरिकसँग प्रत्यक्ष संवाद गर्नु लोकतान्त्रिक अभ्यासको हिस्सा भएको बताउँदै आगामी दिनमा पनि विभिन्न स्थानमा यस्ता भेटघाटलाई निरन्तरता दिने जानकारी दिएका छन् ।
