प्रेमचन्द्र झा,राैतहट,माघ २८ गते ।
रौतहट । जय मातृभूमि पार्टीका केन्द्रीय सहअध्यक्ष राम शरण पाण्डेले पार्टीका उम्मेदवार रञ्जित पटेललाई विजयको माला लगाउँदै आशीर्वाद दिएका छन्। यमुनामाई गाउँपालिका–जेठरहियामा आयोजित भेटघाट तथा अन्तरक्रिया कार्यक्रममा उनले फागुन २१ गते हुने निर्वाचनमा पार्टीका उम्मेदवारलाई मतदान गर्न आग्रह गरे।
कार्यक्रममा महासचिव गोविन्द गिरी, पूर्व एसएसपी तथा केन्द्रीय सदस्य महावीर प्रसाद मल्ल, सबिता झा, गौरव जोशी लगायतका नेताहरूको उपस्थिति रहेको थियो। यस्तै माधवनारायण नगरपालिका–मिठुअवा र दुर्गा भगवती गाउँपालिका–भलोहीयामा समेत चुनावी कार्यक्रम सम्पन्न भएको जनाइएको छ।
अन्तरक्रिया कार्यक्रममा स्थानीय बासिन्दाहरूले शिक्षा, स्वास्थ्य, कृषि, रोजगारी लगायतका क्षेत्रमा भोगिरहेका समस्याहरू उठाएका थिए। उनीहरूले स्थानीय तहमा कायम भ्रष्टाचार र कुशासनका कारण गरिबी तथा अशिक्षा मौलाएको गुनासो गरेका थिए।
कार्यक्रममा उठेका प्रश्नहरूको जवाफ दिँदै महासचिव गोविन्द गिरीले आफ्नो पार्टीको मूल सिद्धान्त ‘नेपालवाद’ रहेको उल्लेख गर्दै जनताको विश्वास पाएर उम्मेदवारलाई विजयी गराए सबै समस्या समाधान गरेर देखाउने दाबी गरे।
पार्टीले आगामी निर्वाचनलाई लक्षित गर्दै विभिन्न स्थानमा जनभेटघाट तथा अन्तरक्रिया कार्यक्रमलाई तीव्रता दिएको जनाएको छ।
