ओम प्रकाश यादव,असार २ गते, रौतहट।
रौतहटमा आज सयौंको संख्यामा नेता कार्यकर्ताहरु नेपाली कांग्रेसमा प्रवेश गरेका छन्।
जिल्लाको माधवनारायण नगरपालिका -५ मिठुअवा कटहरिया टोलमा आज आयोजित पार्टि प्रवेश एवं नेता कार्यकर्ता भेटघाट कार्यक्रममा विभिन्न पार्टी परित्याग गरी दुई सय भन्दा बढी व्यक्ति नेपाली कांग्रेसमा प्रवेश गरेका हुन्।
नेपाली कांग्रेस माधवनारायण नगरपालिका -५ को वडा कार्य समितिले आयोजना गरेको पार्टी प्रवेश कार्यक्रममा कटहरिया टोलका राजिनन्द सहनी, जय प्रकाश सहनी, गोपाल सहनी, रामएकवाल सहनी लगायतका नेता कार्यकर्ताहरु कांग्रेसमा प्रवेश गरेका हुन्।
उनीहरू नेकपा एकीकृत समाजवादी र नेकपा एमाले त्याग गरी कांग्रेसमा प्रवेश गरेको बताइएको छ।
नेपाली कांग्रेस मधेश प्रदेशका संसदीय दलका नेता, कांग्रेसका मधेश प्रदेश सभापति, पूर्व मन्त्री एवं रौतहट क्षेत्र नं १ (ख) का प्रदेश सांसद कृष्ण प्रसाद यादवले उनीहरुलाई टिका, माला लगाएर पार्टी प्रवेश गराएका हुन्।
कांग्रेसका मधेश प्रदेश सभापति यादवले नव प्रवेशीहरुलाइ पार्टीमा स्वागत गरेका छन्।
कांग्रेस मधेश प्रदेश सभापति यादवले पार्टीमा आएका नव प्रवेशीहरुलाई आगामी सफल कार्यकालको शुभकामना दिएका थिए।
नेता कृष्ण प्रसाद यादवले प्रमुख अतिथिको आसनबाट बोल्दै नेपाली कांग्रेस निकै पुरानो इतिहास बोकेको ठूलो दल रहेकोले चाहेर पनि कसैले परास्त गर्न नसक्ने बताएका थिए।
अरु दलको कुनै भविष्य नरहेको बताउँदै उनले कांग्रेस पार्टी मात्र देशको स्थायित्व दिन सक्ने भएको हुँदा सबैलाई कांग्रेसमा लाग्नुपर्ने धारणा राखेका थिए।
कांग्रेसका मधेश प्रदेश प्रचार प्रसार विभाग प्रमुख नितेश गुप्ताको विशेष पहलमा उनीहरू विभिन्न दल छाडेर कांग्रेसमा प्रवेश गरेको बुझिएको छ।
राजनीतिमा ठूलो पकड़ भएका र राजनीतिमा ठूलो प्रभाव राख्ने दिगज नेताहरु कांग्रेसमा प्रवेश गरेकाले आगामी दिनको लागि मिठुअवा र माधवनारायण नगरपालिकामा नेपाली कांग्रेस पार्टी अझै मजबूत भएको कांग्रेसका मधेश प्रदेश प्रचार प्रसार विभाग प्रमुख नितेश गुप्ताले बताएका छन्।
एउटै टोलको सयौं नेता कार्यकर्ताहरुले सामूहिक रूपमै कांग्रेसमा आएकाले आउँदो २०८४ को निर्वाचनमा माधवनारायण नगरपालिकामा कांग्रेसले राम्रो मत ल्याउने र बहुमत प्राप्त गर्ने नेता गुप्ताले विश्वास व्यक्त गरेका हुन् ।
कार्यक्रममा माधवनारायण नगरपालिकाका नगर प्रमुख बैजनाथ प्रसाद यादव, नेपाली कांग्रेसका रौतहट जिल्ला सचिव मिथलेश मिश्रा लगाएतका वक्ताहरुले देशमा एकमात्र पार्टी नेपाली कांग्रेसले मात्र विकास गर्न सक्ने भन्दै कांग्रेसमा लाग्न सबैलाई आग्रह गरेका थिए
कार्यक्रममा नेपाली कांग्रेसका नेता, कार्यकर्ताहरुको उल्लेखनीय सहभागिता रहेको थियो।
बज्जिकाञ्चल संवाददाता,रौतहट, २ गते असार ।
आम जनता पार्टी (आजपा) का अध्यक्ष एवं पूर्वमन्त्री प्रभु साहले किसानलाई मलखाद्य नदिएर सरकारले आपराध गरिरहेको बताएका छन् ।
रौतहटको कटहरियामा आज (सोमबार) बसेको आजपाको रौतहट जिल्ला कमिटीको विशेष बैठकलाई सम्बोधन गर्दै अध्यक्ष साहले अहिले धानबाली लगाउने समयमा मल नदिएर सरकारले किसानलाई जिउँदै मारिरहेको बताए ।
‘अहिले धानवाली लगाउँने महत्वपूर्ण समय छ । यो कुरा सरकारमा बस्नेहरुलाई पनि थाहा छ । किसान अहिले मलखाद्य, विउबिजनको जोहो गरिरहेका छन् । तर यो अन्धो सरकारले किसानको पिडा देखिरहेको छैन् । किसानमारा सरकारलाई किसानको आशुले पोल्छ,’ आजपा अध्यक्ष साहले भने, ‘किसानलाई मलखाद्य, बिउविजन उपलब्ध गराउँने जिम्मेवारी केन्द्रीय सरकारको हो, तर किसानको बारेमा गफ मात्रै दिईरहेको छ मलखाद्य उपलब्ध गराउँन सकेको छैन् ।’
किसानहरु अहिले मलखाद्य नपाएर छटपटाइरहेको बताउदै उनले प्रधानमन्त्री केपी शर्मा ओलीसंग किसानलाई मल किन उपलब्ध नगराएको भन्दै प्रश्न समेत गरे । उनले भने, ‘के किसानलाई जिउँदै मार्दा तपाई (ओली)लाई पोलिरहेको छैन् ? किसानको आशुले पोल्छ ।’
किसानलाई मलखाद्य उपलब्ध गराउने केन्द्रीय सरकारले मल उपलब्ध गराउन नसकेको तर किसानले एकदुई बोरा मल भारतबाट ल्याउदा सीमामा बस्ने प्रहरीले पक्राउँ गरेर बाहुदरी देखाईरहेको टिप्पणी साहले गरे । जनताको समस्या, जनताको चाहना नबुझेको वर्तमान सरकार पूर्णरुपमा असफल भईसकेको उनले बताए ।
बिचौलियाले बनाएको गठबन्धन र वर्तमान सरकारका कारण बिचौलियाहरु नै खुसी देखिएको बताउदै उनले किसान, सर्वसधारणहरु निराश भएको बताए । बिचौलियाका लागि काम गरिरहेको यो सरकारलाई किसानलाई मलखाद्य उपलब्ध गराउने बारेमा सोच्ने फुर्सत समेत नभएको टिप्पणी उनले गरे ।
यस्तै, उनले लुटकारी दलतन्त्रका बिरुद्धमा न्यायप्रेमी जनता एवं दलहरु एकजुट हुनुपर्ने अहिलेको आवश्यक्ता भएको बताए । बिचौलिया, भगौडावर्गको पक्षपोषण गरिरहेको यो सरकारले दलिय सिण्डीकेट लागु गरेर लुट मचाएको आरोप साहले लगाए । लुटकारी दलतन्त्रको बिरुद्धमा एकजुट भएर अगाडी नबढे मुलुक धरासायी बन्दै जाने उनले बताए ।
बैठकले संगठन निर्माण, बिस्तारका साथै किसानलाई मलखाद्य, बिउँबिजन उपलब्ध गराउँन संघर्ष गर्ने निष्कर्ष निकालेको छ । आजपा रौतहट ईन्चार्य धर्मेन्द्र पटेलको अध्यक्षतामा भएको कार्यक्रममा आजपा कार्यालय सदस्यहरू समिना हुसैन, त्रिभुवन साह, सियाराम कुशवाहा, उमेश कुशवाहा लगायतका नेताहरुको विशेष सहभागिता रहेको थियो ।
राजेन्द्र महतो,सिरहा,०१ गते असार ।
गुरु बसिष्ठको स्वरमा रहेको “ठिकै छ मेरी प्रिय ” गीत असार ६ गते शुक्रबार सार्वजनिक हुने भएको छ ।
कलाकार प्रेम परियार र श्रितिका श्रेष्ठको अभिनयमा रहेको गीत आगामी शुक्रबार सार्वजनिक गर्न लागिएको निर्माण टीमले जनाएको छ ।
गीतको रेकर्ड सुर सम्यक बिज स्टुडियो/साउन्ड मिल
स्टुडियोमा गरिएको हो । ड्र्यागन मोशन पिक्चरद्वारा प्रस्तुत गरिएको गीत क्लासिकल र राक ट्रागेडी रहेकोले हामीले बजारमा ल्याउन लागेको निर्माण टीमले जनाएको छ ।
निर्माता दीपेन श्रेष्ठ तथा अनुजा बराल द्वारा निर्देशित उक्त गीतमा व्यवस्थाका रूपमा दिवेश राई रहेका छन् ।
गीतको ,मिक्स/मास्टरिङ-महेश्वर राज भण्डारी र सम्पादन सन्देश शाहले गरेको छ।गीतमा गीत/संगीत-शेखर ठकुरीको रहेको छ ।
गीतको सिनेमेटोग्राफी-साजन ठाकुर , रंग- राजेन्द्र मोक्तान ,
भि एफ एक्स -सत्यम राणा,ग्राफर- नरेश अधिकारी , फोकस-निरञ्जन थापा तथा भिडियो कन्सेप्ट-ड्रागन मोशन पिक्चर रहेको छ।
गीत शुक्रबार ६ गते सार्वजनिक गर्न लागिएको निर्माण पक्षले जनाएको छ ।
गीत ड्रागन मोशन पिक्चर युट्युव च्यानल मार्फत सार्वजनिक गर्न लागिएको निर्माण टीमले जनाएको छ।
काठमाडौँ । नेपाल आयल निगमले पेट्रोलियम पदार्थको मूल्य वृद्धि गरेको छ। इन्डियन आयल कर्पोरेसन ९आईओसी० बाट महँगिएर आएपछि निगमले पेट्रोल र डिजेलको मूल्य वृद्धि गरेको हो।
नयाँ मूल्य आइतबार मध्यरातिबाट लागू हुने निगमले जनाएको छ।
निगमका अनुसार पेट्रोल प्रतिलिटरमा एक र डिजेल तथा मट्टितेलमा प्रतिलिटर दुई रुपैयाँका दरले मूल्य वृद्धि भएको हो।
नयाँ मूल्यअनुसार पहिलो वर्गअन्तर्गत चारआली, विराटनगर, जनकपुर, अमलेखगञ्ज, भलबारी, नेपालगञ्ज, धनगढी र बीरगन्जमा पेट्रोल प्रतिलिटर १५७।५० र डिजेल तथा मट्टितेल प्रतिलिटर १४२।५० रुपैयाँ कायम भएको छ।
त्यस्तै दोस्रो वर्गअन्तर्गत सुर्खेत र दाङमा पेट्रोल प्रतिलिटर १५९ र डिजेल तथा मट्टितेल प्रतिलिटर १४४ रुपैयाँ कायम भएको निगमले जनाएको छ।
तेस्रो वर्गअन्तर्गत काठमाडौँ, पोखरा र दिपायलमा पेट्रोलको मूल्य प्रतिलिटर १६० र डिजेल तथा मट्टितेल प्रतिलिटर १४५ रुपैयाँ कायम भएको निगमले जानकारी दिएको छ। हिमालप्रेस
जनकपुर । आगामी आर्थिक वर्ष २०८२र०८३ को लागि मधेश प्रदेश सरकारले ४६ अर्ब ५८ करोड २९ लाख ५१ हजारको बजेट ल्याएको छ । चालुमा १६ अर्ब ७२ करोड ५ लाख १७ हजार विनियोजन गरिएको छ भने पुँजीगततर्फ ३० अर्ब २६ करोडको बजेट विनियोजन गरिएको हो ।
सार्वजनिक गरेको बजेटमा शिक्षा, रोजगारी, कृषि र पर्यटन क्षेत्रलाई उच्च प्राथमिकता दिएको छ । आइतबार प्रदेश सभा बैठकमा बजेट प्रस्तुत गर्दै अर्थमन्त्री सुनिल कुमार यादवले समाजको आधारभूत आवश्यकता र दीर्घकालीन विकास लक्ष्यलाई मध्यनजर गर्दै विभिन्न मन्त्रालयका लागि उल्लेख्य बजेट विनियोजन गरिएको जानकारी दिए ।
शिक्षा, विज्ञान, युवा तथा खेलकुद मन्त्रालयतर्फ ३ अर्ब ५७ करोड ६६ लाख ५५ हजार रुपैयाँ बजेट विनियोजन गरिएको छ । प्रदेश सरकारले गुणस्तरीय शिक्षा, सांस्कृतिक संरक्षण, र युवालाई खेल र नवप्रवर्तनमा अभिप्रेरित गर्ने कार्यक्रमहरू सञ्चालन गर्ने योजना बनाएको छ ।
मधेशको इतिहास, संस्कृति र परम्परालाई जगेर्ना गर्ने उद्देश्यले महोत्तरीमा मधेश सांस्कृतिक ग्राम निर्माण गर्न बजेट विनियोजन गरिएको छ । यसले आन्तरिक पर्यटन प्रवद्र्धनमा योगदान पुर्याउने सरकारको विश्वास छ । कृषि मन्त्रालयतर्फ २ अर्ब ८३ करोड रुपैयाँ विनियोजन गरिएको छ । कृषिमा यान्त्रिकीकरण, व्यवसायीकरण र उत्पादन अभिवृद्धिमा बजेट केन्द्रित गरिएको छ । वन तथा वातावरण मन्त्रालयतर्फ २ अर्ब ३७ करोड ५६ लाख ३८ हजार रुपैयाँ विनियोजन गरिएको छ । वातावरणीय सन्तुलन र जैविक विविधताको संरक्षणमा बजेट लाग्नेछ ।
उद्योग, बाणिज्य तथा पर्यटन मन्त्रालयतर्फ ३ अर्ब ८ करोड ७१ हजार रुपैयाँ छुट्याइएको छ । यसले पर्यटन प्रवद्र्धन, स्थानीय उत्पादनलाई बजार विस्तार र रोजगारी सिर्जनामा टेवा पुर्याउने अपेक्षा गरिएको छ । श्रम तथा यातायात मन्त्रालयतर्फ ५७ करोड १४ लाख ५० हजार रुपैयाँ विनियोजन गरिएको छ । सरकारले स्वरोजगारलाई प्रोत्साहित गर्न ‘हात–हातमा सवारी, घर–घरमा रोजगारी’ भन्ने कार्यक्रम सञ्चालनमा ल्याउनेछ । विशेषगरी शिक्षा, कृषि र स्वरोजगारमुखी कार्यक्रमले मधेशको स्थानीय अर्थतन्त्रलाई सबल बनाउने सरकारको विश्वास छ । आर्थिक न्यूज
बज्जिकाञ्चल संवाददाता,राैतहट,०१ गते असार ।रौतहट जिल्लाको गरुडा नगरपालिका–१ जयनगरमा आइतवार बिहान परेको चट्याङले एक जनाको ज्यान लिएको छ । बिहानको वर्षासँगै परेको चट्याङले बाख्रा खोल्न बाहिर गएका ५६ वर्षीय सियाराम साह बनियालाई चपेटामा पार्दा घाइते भएका थिए ।
घाइते अवस्थामा तत्कालै प्रादेशिक अस्पताल गौर पुर्याइएका साहको उपचारको क्रममा बिहान १० बजेतिर मृत्यु भएको जिल्ला प्रहरी कार्यालय रौतहटका प्रवक्ता डीएसपी दीपक कुमार रायले जानकारी दिए ।
पछिल्ला केही दिनदेखि जारी भीषण गर्मीले जनजीवन प्रभावित भइरहेका बेला आइतवार परेको वर्षाले सर्वसाधारणलाई राहत दिएको भए पनि चट्याङका कारण एक परिवारमा भने शोक छाएको छ ।
प्राकृतिक विपत्तिबाट हुने यस्ता घटनाले सावधानी अपनाउन आवश्यक रहेको प्रहरीको भनाइ छ । प्रहरी र स्थानीय निकायले नागरिकहरूलाई मौसमको जोखिमपूर्ण अवस्थामा सतर्क रहन आग्रह गरेका छन्।
कामरेन्द्र वर्मा,काठमाडौं,०१ गते असार ।
नेपालका विभिन्न जिल्लामा स्वास्थ्य सेवाको पहुँच अभिवृद्धि गर्ने उद्देश्यले भारत सरकारले नेपाललाई ४० वटा एम्बुलेन्स उपहारस्वरूप प्रदान गरेको छ । एकैदिन काठमाडौं, वीरगंज, पोखरा र धरानमा आयोजित कार्यक्रममार्फत भारतले यी एम्बुलेन्सहरु नेपाल सरकार तथा विभिन्न स्वास्थ्य संस्थाहरुलाई हस्तान्तरण गरेको हो ।
काठमाडौंस्थित भारतीय राजदूतावास, वीरगंजको महावाणिज्य दूतावास तथा पोखरा र धरानस्थित पेन्सन भुक्तानी कार्यालयहरुमा एकसाथ आयोजना गरिएका समारोहहरुमा नेपालका सातवटै प्रदेशका ३३ जिल्लालाई समेटिएको थियो ।
काठमाडौंमा मात्र २२ वटा एम्बुलेन्स हस्तान्तरण गरिएका थिए भने वीरगंजमा ७, पोखरामा ७ र धरानमा ४ वटा एम्बुलेन्स प्रदान गरिएको हो ।
काठमाडौंमा आयोजित कार्यक्रममा भारतीय राजदूतावासका नियोग उप–प्रमुख प्रसन्न श्रीवास्तवले एम्बुलेन्सका चाबी सम्बन्धित प्रतिनिधिहरुलाई हस्तान्तरण गर्दै स्वास्थ्य पूर्वाधार सुदृढीकरणमा भारत सरकारको दीर्घकालीन सहयोगबारे प्रकाश पार्नुभयो । वहाँले नेपाल–भारत विकास साझेदारी अन्तर्गत गरिएको यो सहयोग दुवै देशबीचको मित्रवत सम्बन्धको बलियो प्रमाण भएको बताउनुभयो ।
कार्यक्रममा सहभागी भएका नगरपालिका तथा गाउँपालिकाका प्रमुख, राजनीतिक प्रतिनिधि, समाजसेवी र लाभार्थी संस्थाका प्रतिनिधिहरुले भारत सरकारप्रति आभार व्यक्त गर्दै, प्राप्त एम्बुलेन्सहरुले ग्रामीण तथा दुर्गम क्षेत्रका नागरिकलाई स्वास्थ्य सेवामा पहुँच बढाउने विश्वास व्यक्त गरेका छन् ।
भारत सरकारले सन् १९९४ देखि नेपालमा १०४९ वटा एम्बुलेन्स उपहारस्वरूप प्रदान गरिसकेको छ । यस्तै, नेपालका शैक्षिक संस्थाहरुलाई ३०० वटा स्कुल बस, निर्वाचन प्रयोजनका लागि २०० वटा सवारी साधन तथा हालसालै मे २०२५ मा सगरमाथा संवादका लागि १५ वटा विद्युतीय सवारी साधन पनि उपहार दिइएको थियो ।
भारत र नेपालबीचको बहुआयामिक विकास साझेदारी जनस्तरको सम्बन्धलाई अझ प्रगाढ बनाउँदै गएको उल्लेख गर्दै भारत सरकारले यस्ता सहयोग आगामी दिनमा पनि निरन्तर जारी रहने प्रतिबद्धता जनाएको छ ।
फाेटाे फिचर:
आरके श्रीवास्तव,राैतहट,०१ गते असार ।
रौतहटको गुजरा नगरपालिकाले नयाँ प्रमुख प्रशासकीय अधिकृत पाएको छ । उपसचिव डा. श्रवण कुमार साहले आइतबार एक औपचारिक समारोहबीच कार्यभार सम्हालेका हुन् । नगर प्रमुख सन्तलाल चौधरी र उपप्रमुख रत्न लामाले उनलाई खादा, माला र टीका अर्पण गर्दै शुभकामना सहित स्वागत गरेका थिए ।
समारोहमा बोल्दै नगर प्रमुख चौधरीले लामो समयदेखि प्रशासकीय अधिकृतको अभावका कारण पालिकाका विभिन्न कामहरू प्रभावित भएको जनाउँदै भने, “डा. साहको आगमनसँगै नगरपालिकाको प्रशासनिक गति फेरि सक्रिय हुनेछ भन्ने हाम्रो आशा छ।”
चौधरीले पालिकाका बाँकी विकास योजना सम्पन्न गर्न र जनसेवा प्रवाहलाई प्रभावकारी बनाउन डा. साहसँग सहकार्य गर्ने प्रतिबद्धता पनि जनाए । उनका अनुसार पालिकामा प्रशासनिक स्थायित्व र सुशासन स्थापना गर्न अहिले उपयुक्त घडी हो ।
यसअघि प्रमुख प्रशासकीय अधिकृत मित्रलाल ढकालको सरुवापछि गुजरा नगरपालिका केही समयदेखि नेतृत्वविहीन रहँदै आएको थियो । जसले आर्थिक र विकास गतिविधिमा असर पारेको थियो ।
पदभार ग्रहणपछि डा. साहले प्रतिक्रिया दिँदै भने, “मैले जिम्मेवारीको गम्भीरता बुझेको छु । सेवा प्रवाहमा ढिलाइ नहोस् भनेर म पूर्ण पारदर्शिता, समयपालना र उत्तरदायित्वमा काम गर्नेछु ।”
डा. साहको अनुभव र नेतृत्वले गुजरा नगरपालिकालाई सुशासन र समावेशी विकासतर्फ उन्मुख गराउने अपेक्षा गरिएको छ ।
आरके श्रीवास्तव,राैतहट,०१ गते असार ।
रौतहटकाे राजपुर नगरपालिकाले बजेट ल्याएको छ । आईतवार राजपुर नगरपालिकाले यस वर्ष जनमुखी योजना ल्याएकाे छ । राजपुर स्थित कृषि तथा पशुपंछि सेवा केन्द्रमा नगर प्रमुख डा.राजिक आलमकाे अध्यक्षतामा साे नगरसभा सम्पन्न भएको हाे ।
नगरसभाकाे ९ अाैं अधिवेशन बाट जनमुखी नीती र कार्यक्रम ल्याएकाे छ । नगरपालिका नगर कार्यपालिकाबाट पास गरेकाे निती तथा कार्यक्रम कार्यान्यवन गर्न ५७ करोड भन्दा बढी बजेट विनियोजन गरेकाे हाे ।
हरेक वर्ष असार १० गते बजेट ल्याउनु पर्ने प्रावधान रहेकाे छ । तर राजपुर नगरपालिकाले साे समयअवधी आगावै नगरसभा शान्तिपूर्ण रूपमा सम्पन्न गरेर बजेट ल्याउनेमा पहिलो पालिका बनेकाे छ । धेरै उत्साहका साथ सम्पन्न भएकाे नगरसभा बाट राजपुर नगरपालिकाकाे जनताकाे मन जितने किसिमकाे निती तथा कार्यक्रम पारित गरेको हाे ।
राजपुर नगरपालिकाले आर्थिक वर्ष २०८२/८३ का लागि ५७ करोड ५३ लाख ७८ हजार रुपैयाँको बजेट सार्वजनिक गरेको छ । जिल्लामै पहिलोपटक ९ औं नगरसभाबाट बजेट प्रस्तुत गर्दै नगर प्रमुख डा. आलमका अनुसार बजेट निर्माण सीमित स्रोत साधनबीच गरिए पनि शिक्षालाई सर्वाधिक प्राथमिकता दिइएको छ ।
“प्रत्येक वडामा एउटा स्मार्ट विद्यालय स्थापना, बिद्यार्थीसँग मेयर कार्यक्रमलाई निरन्तरता, नगरका निरक्षर नागरिकको तथ्यांक संकलन गरी साक्षरता कक्षा सञ्चालन, माध्यमिक विद्यालयमा पुस्तकालय स्थापनालगायतका योजना प्राथमिकतामा परेका छन्,” डा. आलमले भन्नुभयो ।
बजेट विवरण अनुसार संघीय सरकारबाट राजस्व बाँडफाँट ११ करोड ४७ लाख,वित्तीय समानीकरण अनुदान ११ करोड ३९ लाख,सशर्त अनुदान २६ करोड ४२ लाख,
,विशेष अनुदान १ करोड ६४ लाख,समपूरक अनुदान २ करोड ८९ लाख रहेको छ ।
त्यस्तै प्रदेश सरकारबाट राजस्व बाँडफाँट ८० लाख समानीकरण अनुदान ७७ लाख ७८ हजार,सशर्त अनुदान ८० लाख,विशेष अनुदान ३० लाख,समपूरक अनुदान २० लाख रहेको छ ।
त्यसैगरी आन्तरिक आम्दानी ८५ लाख रुपैयाँ रहेको छ । प्रमुख प्रशासकीय अधिकृत बैजु ठाकुरका अनुसार यो बजेटले नगरको समग्र विकासमा योगदान पुर्याउने विश्वास गरिएको छ । उहाँले भन्नुभयो, “नीति तथा कार्यक्रममा समावेश योजनाहरू सम्पादन गर्न कार्ययोजना निर्माण गरी समयमै कार्यान्वयन गरिनेछ ।”
राजपुर नगरपालिकाकाे प्राथमिकतामा परेका अन्य कार्यक्रमहरू प्रत्येक वडामा नागरिक आरोग्य सेवा केन्द्र स्थापना,मुख्य सडक कालोपत्रे, सहायक सडक पक्की ढलान,घरघरमा एउटा बिरुवा अनिवार्य रूपमा लगाउने अभियान,बेरोजगारलाई सीपमूलक तालिम र न्यून ब्याजदरमा ऋण उपलब्ध गराई स्वरोजगारको व्यवस्था
रंगशाला निर्माण तथा प्रत्येक वडामा सामुदायिक मेलमिलाप केन्द्र सञ्चालन रहेको छ ।
त्यस्तै हालको बर्थिङ्ग सेन्टरलाई व्यवस्थित गर्दै थप वडामा विस्तार,नगर सेवा मोबाइल एप समयानुकूल अद्यावधिक फोहोरमैला व्यवस्थापन केन्द्र निर्माण रहेको छ । नगर प्रमुख डा. राजिक आलमले राजपुर नगरपालिकालाई समावेशी, आत्मनिर्भर र जनमुखी बनाउने उद्देश्यले बजेट निर्माण गरिएको बताउनुभयो । उहाँले सबै योजनाहरू नागरिकसँग सहकार्यमा कार्यान्वयन गरिने प्रतिबद्धता समेत व्यक्त गर्नुभयो ।
साे अवसरमा वडा नम्बर १ देखि ९ नम्बर सम्मका वडा अध्यक्षहरू,जनप्रतिनिधिहरू,पत्रकार,सुरक्षाकर्मी,कर्मचारीहरू सहितका व्यक्तिहरूकाे उपस्थिति रहेकाे थियाे ।
काठमाडौं, ३० गते जेठ ।
मित्र राष्ट्र भारतको अहमदाबादमा भएको विमान दुर्घटनामा ज्यान गुमाएकाहरूप्रति लोकतान्त्रिक समाजवादी पार्टीका अध्यक्ष महन्थ ठाकुरले समवेदना व्यक्त गरेका छन् ।
अध्यक्ष ठाकुरको हस्ताक्षरसहित पार्टीले शुक्रबार जारी गरेको प्रेस–विज्ञप्तिमा अहमदावादबाट लण्डनका लागि उडेको बोइङ एआई १७१ जहाजमा सवार २४२ यात्रु सवार एयर इन्डियाको विमानमा दुर्घटनामापरी २४१ जनाले ज्यान गुमाएको खबरले स्तब्ध बनाएको उल्लेख छ ।
विज्ञप्तिमा भनिएको छ, उक्त दुर्घटनाप्रति लोसपा नेपाल गहिरो दुःख व्यक्त गर्दछ साथै दुर्घटनामापरी घाइते भएकाको शिघ्र स्वास्थ्यलाभको कामनासहित शोकाकुल परिवारजनप्रति पार्टी र म आफ्नो तर्फबाट हार्दिक समवेदना प्रकट गर्दछु ।
विमान दुर्घटनामा गुजरातका पूर्वमुख्यमन्त्री विजय रुपाणी समेत सवार रहेको भारतीय समाचार संस्था दैनिक भास्करले जनाएको छ । अहमदावादबाट लण्डनका लागि उडेको बोइङ एआई १७१ जहाज केही मिनेटमै भुइमा खसेको थियो ।
