चन्द्रपुर १४ बैसाख । रौतहटमा पुराना दल छाडेर नयाँ दल रोज्नेहरुको संख्या दिनप्रतिदिन बढदै गएको छ ।
गत निर्वाचनमा छोटो समयमा सफलता हासिल गरेको रबि लामिछानेले नेतृत्व गरेको राष्ट्रिय स्वतन्त्र पार्टी (रास्पा) प्रति युवाहरु आशावादी हुँदै प्रबेश गरिरहेका छन् ।
हालसम्म रौतहट क्षेत्र नम्बर ४ मा २६ सय भन्दा बढी जनाले रास्वपाको सदस्यता लिएको रास्वपा केन्द्रिय कार्यालयले जानकारी दिएको छ । यो संख्या दिनानुदिन बढ्दै गएको रास्वापाका सदस्य उदय नारायण सापकोटाले बताए ।
पुराना दलहरु कांग्रेस,एमाले र माओवादीका कार्यकर्ता पार्टीपंक्तिको काम देखेर दिक्क मान्दै विकल्प खोज्न बाध्य भएको रास्वपा प्रवेश गरेका व्यक्तिहरु बताउछन ।
रास्वपा नेपाली जनतामा निहीत राष्ट्रिय सार्वभौमिकतालाई आत्मसात् गर्दै, नेपालको राष्ट्रिय हितलाई सर्वोपरि मानी जनउत्तरदायी, जनसहभागितामूलक लोकतान्त्रिक राज्य शासन व्यवस्था प्रवर्द्धन गर्दै नेपालको संविधानले परिकल्पना गरेअनुसार दिगो शान्ति, सुशासन, विकास र समृद्धिको आकांक्षा पूरा गरी नेपाली जनताले महसुस गर्ने गरी जीवनस्तरमा सुधार ल्याउने प्रतिबद्धतासहित राष्ट्रिय स्वतन्त्र पार्टीको गठन गरी, असार ७, २०७९ मा सार्वजनिक घोषणा गरेसँगै, असार १७, २०७९ मा राष्ट्रिय स्वतन्त्र पार्टी निर्वाचन आयोगमा दर्ता भएको नेपाली राजनीतिक दल हो ।
रौतहट १४ बैसाख ।
देश क्रमशः भ्रष्टाचार, बेथिति, कुशासन, आर्थिक, सामाजिक र राजनीतिक रुपमा संकटग्रस्त बन्दै गएको भन्दै आम जनता पार्टीले जागरण यात्रा गर्ने भएको छ ।
विषम परिस्थितिलाई आत्मसात गर्दै “देशलाई संकटबाट जोगाउन जागरण यात्रा” जेठ १८ गतेदेखि पश्चिम नेपालको महेन्द्रनगरबाट शुभारम्भ गर्ने आजपाले जनाएको छ ।
आम जनता पार्टीको काठमाडौं स्थित केन्द्रीय कार्यालयमा पार्टी अध्यक्ष प्रभु साहको अध्यक्षतामा बसेको केन्द्रीय पदाधिकारीहरुको बैठकले विभिन्न निर्णय समेत गरेको छ ।
उपनिर्वाचनमा घोषित अघोषित गठबंन्धन एवं राष्ट्रिय तथा अन्तर्राष्ट्रीय सत्ता र शक्तिको प्रत्यक्ष टकरावको बाबजूद पनि बिना कुनै गठबन्धन एक्लै निर्भिकता पूर्वक चुनाव लडेर सहाशिक प्रदर्शन गरी संगठनको विजारोपन गर्न सफल हुनु सराहनीय विषय रहेको ठहर गर्दै यस्तो विषमरसंवेदनशील परिस्थितिमा आजपाप्रति विश्वास गरी मतदान गर्नुहुने सम्पूर्ण मतदाताहरुप्रति आभार व्यक्त गरेको छ ।
१८ मे मा अन्तर्राष्ट्रीय मजदूर दिवसलाई पार्टीको केन्द्रीय कार्यालयमा एक औपचारिक कार्यक्रम गरि मनाउने निर्णय गरेको छ । पार्टी र जनसंगठनका कार्यहरुलाई व्यवस्थित गर्ने, निर्णय भएको आजपा केन्द्रीय कार्यालयले जनाएको छ ।
रविन्द्र प्रजापती,वैशाख १३ गते
रौतहटमा करेन्ट लागेर एक जनाको मृत्यु भएको छ । जिल्लाको कटहरिया नगरपालिका वडा नम्बर ९ डुमरियामा बुधबार करेन्ट लाग्दा एक यूवकको ज्यान गएको प्रहरीले जनाको छ ।
डुमरीया बस्ने राम विश्वास पासवानको छोरा अ. वर्ष १५ को चन्दन कुमार पासवानको करेन्ट लागेर मृत्यु भएको ईलाका प्रहरी कार्यालय कटहरियाले जनाएको छ ।
दुईसो आफ्नो खेतमा मोटरबाट पानी पटाउने क्रममा अचानक उनलाई दाहिने हातमा करेन्ट लागेको र उपचारको लागी प्राथमिक स्वास्थ्य केन्द्र कटहरियामा लगिएकोमा चिकित्सकले मृत घोषणा गरेको ईलाका प्रहरी कार्यालय कटहरियाका सई अशोक कुमार महतोले जानकारी दिए ।
आरके श्रीवास्तव,गरूडा,वैशाख १३ गते
रौतहट फतुवा बिजयपुर नगरपालिकाको वडा नम्बर २ भित्र रहेका सार्वजनिक तथा ऐलानी जग्गा खाली गराउने निर्णय गरिएको छ । सार्वजनिक तथा ऐलानी जग्गा अतिक्रण गरी निजी प्रयोजनमा प्रयोग गर्दै आएको जग्गा खाली गराउन सूचनाजारी गरेको छ ।
मिति २०८० वैशाख १३ गते बुधबार जारी भएको सूचनामा १५ दिन भित्र वडा अन्तर्गत ऐलानी जग्गामा रहेको घर टहरा हटाउन भनिएको छ ।
आज बुधबार वडा कार्यालयमा सो वडामा वडा अध्यक्ष अनिरूद्व प्रसाद यादव उर्फ संजयको अध्यक्षतामा बसेको बैठकले वडाभित्रको ऐलानी जग्गा खाली गराउने निर्णय गरेको हो ।
स्थानीयहरुले नै कब्जा गरेको सार्वजनिक जग्गा छुट्याउन वडाले अभियानको रूपमा थालनी गर्ने भएको हो । स्थानियहरुले अतिक्रमण गरेर भोगचलन गर्दै आएको ऐलानी वडा क्षेत्र भित्र रहेका सार्वजनिक जग्गा पहिचान गरी वडा मातहतमा ल्याउन सो निर्णय भएको हो । अहिले वडासँग आफ्नो क्षेत्रमा रहेका सार्वजनिक जग्गा कति छ भन्ने कुनै पनि तथ्यांक छैन् ।
तथ्यांक नहुँदा काम गर्न कठिनाई भएकाले वडाले आफ्नो सीमा भित्र रहेका सार्वजनिक सम्पत्ति संरक्षण गर्न जग्गा खोजि अभियान अघि बढाइएको वडा अध्यक्ष यादवले बताउनुभयो ।
वडामा रहेका सार्वजनिक जग्गा तथा सम्पत्तिको अभिलेखिकरण गरेर राख्न र आवश्यकता अनुसार प्रयोग गर्न वडाले खोजी अभियान अघि बढाएको पनि वडा अध्यक्ष यादवले बताउनुभयो । नेपाल सरकारको स्वामित्वमा रहेको एलानी जग्गाहरु दिनप्रतिदिन अतिक्रमण हुँदै व्यक्ती व्यक्तीगत रुपमा निजिकरण गरिदै गइरहेकोले सो जग्गाहरुको संरक्षण सम्बन्धी छलफल गर्न वडा समितिको प्रतिनिधी,गाउँका भद्रभलादमी,राजनितीक दलका प्रतिनिधी,कर्मचारी पत्रकार लगायतको व्यक्तीहरुको बैठकमा एलानी जग्गा खाली गर्ने गराउने,सम्बन्धीत निकायमा बोधार्थ गर्ने,छठ घाट निरको पोखरि तथा अन्य सार्वजनिक ठाउँमा रहेको पोखरि खाली गराउने र व्यवस्थापन गर्ने सहितका विषयमा छलफल गरिएको थियो । सो अवसरमा वडा सदस्य प्यारेलाल यादव,शेरबहादुर पटेल,राजकुमारी देवी,नैनपती देवी,वडा सचिव अजय राय यादव,अच्छेलाल राय यादव,रविन्द्र कुमार निधी,कन्हैया यादव सहित गाउँभरीका स्थानिय भद्रभलादमीहरुको उपस्थिती रहेको थियो ।
आरके श्रीवास्तव,गरुडा,वैशाख १३ गते
रौतहटको फतुवा बिजयपुर नगरपालिकाको टेंग्राहामा बर्थिङ्ग सेन्टर भवनको शिलान्यास भएको छ ।
बुधबार एक कार्यक्रमका बीच वडा अध्यक्ष सतिश कुमार यादव उर्फ गौरवले वडा नम्बर ४ को लागि बर्थिङ्ग सेन्टरको शिलान्यास गर्नुभएको हो ।
केन्द्र सरकारको बजेट अन्तर्गत श्री माध्यमिक विद्यालय टेंग्राहाको उतरपट्टी ७ कोठे भवनको बुधबार वडा अध्यक्ष यादवले शिलान्यास गर्नुभएको हो ।
बर्थिङ्ग सेन्टर निर्माणको लागि केन्द्र सरकार बाट ३० लाख बजेट बिनियोजन भएको वडा अध्यक्ष यादवले बताउनुभयो । बर्थिङ्ग सेन्टर नहुँदा यहाँका स्थानीयहरूलाई बाहिर जानुपर्ने बाध्यता रहेको थियो । भवन निर्माण भएपछि उक्त समस्या समाधान हुने भएको छ । वडावासी लगायत आसपासका बासिन्दाहरू लाभान्वित हुने भएका छन् ।
बर्थिङ्ग सेन्टर शिलान्यास कार्यक्रममा भवन निर्माणको उपभोक्ता समिति अध्यक्ष नागेन्द्र राय यादव,श्री माबि टेंग्राहाको प्रधानाध्यापक अनिल यादव,अशोक यादव,शिव राय यादव,दिनेश यादव,किशोरीलाल यादव, सुबाश यादव, लगायत स्थानीय भद्रभलादमीहरूको सहभागिता रहेकोे थियो ।
आरके श्रीवास्तव,गरूडा,वैशाख १३ गते
रौतहट । नयाँ शैक्षिक सत्र सुरू भएसँगै विद्यार्थीहरूलाई पाठ्यपुस्तक वितरण कार्य चलिरहेको छ । नयाँ शैक्षिक सत्र गत वैशाख २ गतेबाट सुरु भएको छ ।
यस पटक भर्नासँगै विद्यार्थीको हातमा पनि पुस्तक पु¥याउने लक्ष्य केन्द्रले लिएको छ । सोही अनुरूप आज फतुवा बिजयपुर नगरपालिका वडा नम्बर ३ मेवामा रहेको श्री आधारभूत बिधालय मेवामा अध्ययनरत छात्रछात्राहरू पुस्तक वितरण गरिएको छ ।
एक कार्यक्रमका बिच सो वडाका वडा अध्यक्ष रामईश्वर राय यादवले विद्यार्थीहरूको हातहातमा पाठ्यपुस्तक वितरण गर्नु भएको हो । वितरण गर्ने क्रममा वडा अध्यक्ष यादवले कोही पनि बिद्यार्थीहरू लाई नछुुट्टाउने गरि वितरण गर्न आग्रह गर्नु भयो ।
श्री आधारभूत बिधालय मेवामा पढ्ने कक्षा १ का ३२ जना,कक्षा २ का ४४ जना,कक्षा ३ का ३५ जना,कक्षा ४ का ६५ जना,कक्षा ५ का ६१ जना,कक्षा ६ का ५० जना र कक्षा ७ का ४२ जना बिद्यार्थीहरूलाई पुस्तक वितरण गरिएको प्रधानाध्यापक प्रमोद कुमार साहले जानकारी गराउनु भयो । कक्षा ८ मा अध्ययन गर्ने २८ जना बिद्यार्थीहरू भोली पुस्तक वितरण गरिने उनले बताए ।
सो अवसरमा वडा अध्यक्ष यादवसँगै,प्रअ प्रमोद कुमार साह,कार्यपालिका सदस्य कामेश्वर पंडित,शिक्षक रामप्रवेश साह,शिक्षिका माधुरी कुमारी कुशवाहा,संगिता कुमारी पंडित,बालविकास सहयोगी रिता कुमारी साह,विन्दु कुमारी पंडित, कार्यालय सहयोगी राजेश कुमार साह सहित बिद्यार्थी ,स्थानीय भद्रभलादमीहरूको उपस्थिति रहेको थियो ।
बज्जिकाञ्चल,गरुडा,वैशाख १३ गते
आर्थिक रुपमा बिपन्न बर्गको लागी सरकारले जनता अवास योजना लागु गरेको छ । तर सरकारी अदुरदर्शिताको कारण जनता आवास योजना उद्देश्य प्राप्तिभन्दा पनि बजेट खपाउने योजना साबित भइरहेको छ । मध्य तराईमा विगत ५ वर्ष आगाडिदेखि निर्धारण गरिएको बजेट रकमबाट भवन निर्माण गर्दा कमसल सामाग्रीले निर्माण भएका भवनबाट रौतहटका दलितहरु खुशीभन्दा पनि बढी दुःखी हुने गरेका छन् ।
यो कार्यक्रम लागु भएको मध्ये एउटा हो– रौतहटको देवाही गोनाही नगरपालिकाको कर्कच कर्मैया गाउँमा रहेको दलित वस्ती, यहाँका दलितहरुको गृहसुखको लागी जनता आवास योजना लागु गरिएको थियो । तर एक बर्ष अगाडि लागु भएको यो योजनाबाट दलीतहरुलाई गृहसुख भन्दा पनि घरमै च्यापिएर मर्ने डरले सताउने थालेको छ ।
तराईमा आउने हुरी बतासले छाना उडाउने र घरमै च्यापिने डरले दलितहरुलाई चिन्तीत बनाएको छ । यो बस्तीमा निर्माण भएका घरहरुमा प्रयोग गरिएको कमसल सामग्रीका कारण निर्माण भएको घरहरुको अवस्था जर्जर देखिन्छ । जनता अवास कार्यक्रमले विपन्न बर्गको जिवन उकास्नु भन्दा पनि कार्यालयको लागी बजेट खपाउने र नेताको लागी भोट कमाउने माध्यम मात्रै साबित भएको छ । शौचालय बिनाको आवास त्यसमा पनि कमसल सामाग्रीबाट भवनहरु निर्माण गरिएको कर्कच कर्मैया दलितहरुको गुनासो छ ।
मधेश प्रदेश सरकारको लगानी बालुवामा पानी ,जनता आवास कार्यक्रम भएको छ । प्रदेस सरकारको कर्मचारी र नेताका ठेक्दारले कर्कच कर्मैयामा निर्माण गराई रहेको ४७ वटा जनता अवास घरमा कमसल र दुई नम्बर ईटा बाट घर निर्माण गराई रहेकोले पिडित हरुले पत्रकार संग आफ्नो दुखेसो पोखेका छन् ।
मधेश प्रदेशका कर्मचारी र नेताका ठेकदारहरुले बल जबरजस्ती कमसल र दुई नम्बर ईटा प्रयोग गरिरहेकोले पिडित दलितहरुले बिरोध गर्दा उल्टै ठेकदारहरुले धम्काउने काम गरिरहेका छन् । कर्कच कर्मैयाका सरगुन हजराले भने तल जब मजबुती हुदैन भने माथी के मजबुती हुन्छ । ठेकदारले बल जबरजस्ती कमसल र दुई नम्बर ईटा धमाधम प्रयोग गराईरहेको गुनासो गरे । प्रदेश सरकारले जनता आवास कार्यक्रममा प्रति घर ३ लाख ३६ हजार रकम पठाएमा मधेश प्रदेश सरकारका कर्मचारी र नेताका ठेकदारहरु कमिशन खानको लागि कमसल समाग्री र दुई नम्बर ईटा प्रयोग गरिरहेकोले घर समेत कमजोर हुने छ । यता सो वडाका पूर्व वार्ड अध्यक्ष अनिल झाले काम कुनै किसिमको कमी कमजोरी नभएको प्रतिक्रिया दिएका छन् ।
वैशाख १३ सुनसरी
सुनसरी प्रहरीले बुधबार एकै दिन २२ जना फरार प्रतिवादीहरु पक्राउ गरेको छ । जिल्ला प्रहरी कार्यलय सुनसरीबाट विशेष टोली गठन गरी फरार प्रतिवादीहरु पक्राउ अभियानअन्तर्गत बुधबार एकै दिन २२ जना फरार प्रतिवादीहरु पक्राउ गर्न सफल भएको प्रहरी नायब उपरीक्षक राजकुमार राईले जानकारी दिए ।
पक्राउ परेकाहरु अदालतबाट विभिन्न मुद्दामा कैद तथा जरिवाना तोकिएका प्रतिवादीहरु रहेको प्रहरी उपरीक्षक ढकालले बताए । पक्राउ परेका सबैलाई बुधबार नै अदालतसमक्ष बुझाइएको छ । चालु आर्थिक वर्ष २०७९–८० मा अदालतबाट कैद तथा जरिवाना तोकेका ३ सय ३७ जना विभिन्न मुद्दाका फरार प्रतिवादीहरूलाई पक्राउ गर्न सफल भएको सुनसरी प्रहरी प्रमुख प्रहरी उपरीक्षक प्रभुप्रसाद ढकालले जानकारी दिए ।
सुनसरी प्रहरीले र फरार प्रतिवादीहरू पक्राउ गर्न विशेष टोली बनाएर अभियान नै चलाइरुहेको ढकालले बताए ।
काठमाडौं, १३ बैशाख । जनमत पार्टीका अध्यक्ष सिके राउतले बारा–२ वाट बिजयी उपेन्द्र यादवलाई शुभकामना तथा बधाई दिएका छन ।
गत बैशाख १० गते सम्पन्न प्रतिनिधिसभा निर्वाचनमा बारा–२ वाट बिजयी जनता समाजवादी पार्टीका अध्यक्षसमेत रहेका यादवलाई राउतले बधाई दिएका हुन ।
‘जसपाका अध्यक्ष श्री उपेन्द्र यादवज्यूलाई बारा प्रतिनिधि सभा निर्वाचन क्षेत्र नं- २ को उपनिर्वाचनमा विजयी हुनु भएकोमा उहाँलगायत जसपाका सम्पूर्ण नेता, कार्यकर्ता र शुभचिन्तकहरूलाई हार्दिक बधाई,’ राउतले सामाजिक सञ्जालवाट बधाई दिदै भनेका छन, ‘जनमत पार्टीलाई मतदान गर्नुहुने र अगाध माया दिनु हुने सम्पूर्णमा कोटिकोटि प्रणाम ।’
बारा–२ मा जसपा नेपाल र जनमत पार्टी मुख्य प्रतिस्पर्धीका रुपमा देखिएका थिए । जसपाका यादव २८ हजार ४१५ मतले बिजयी भए भने जनमत पार्टीका शिवचन्द्र प्रसाद कुशवाहा २३ हजार ३३४ मतसहित दोस्रो स्थानमा रहन पुगे ।
काठमाडौं, १३ बैशाख । भारी मतले बिजयी राष्ट्रिय स्वतन्त्र पार्टीका सभापति रवि लामिछानेले चौतर्फी प्रहार र लाञ्छानाको जवाफ चितवन–२ ले दिएको बताएका छन ।
फराकिलो मतअन्तरले बिजयी भए पछि लामिछानेले जिम्मेवारी थपिएको जनाउँदै सत्कर्मले विश्वासको गुन तिर्ने प्रतिबद्धतासमेत उनले बताएका छन् ।
‘चितवन– २ सहित देशैभर गर्नुपर्ने काम धेरै छन्। तपाईंहरुकै भर र समर्थनमा विशेषतः राजनीतिलाई भूइँमान्छेसँग जोड्न र मुलुकलाई समृद्ध बनाउने अभियानका अबरोध तोड्न इमानका साथ लागिरहेने छु,’ मतदातालाई धन्यवाद दिदै लामिछानेले भनेका छन, ‘चौतर्फी प्रहार र लान्छनाको जवाफ चितवन–२ का मतदाताले दिनुभएको छ।’
उप निर्वाचनवाट राष्ट्रिय स्वतन्त्र पार्टीप्रति व्यक्त भएको जनमतले थप गम्भीर, जिम्मेवार र नागरिक मैत्री बन्न उत्प्रेरित गरेको उनको भनाई छ ।
व्यक्तिगत प्रतिशोधका लागि मतदाताको विवेक र जनमतको धज्जी उडाउने खालका टिप्पणी नगरिदिन प्रतिस्पर्धी दलका उम्मेदवार र तिनका कार्यकर्ता समक्ष लामिछानेले आग्रह गरेका छन्।
