काठमाडौँ । नेपाली कांग्रेसको १५औँ महाधिवेशनबाट खुलातर्फ महामन्त्री पदमा विजयी उदयशमशेर राणाले आफूलाई मत दिएर निर्वाचित गराउने महाधिवेशन प्रतिनिधिप्रति आभार व्यक्त गरेका छन् ।

राणाले आफूलाई विश्वास गरेर सुम्पिएको जिम्मेवारी पार्टी रूपान्तरण, सङ्गठन सुदृढीकरण र देशको समृद्धिका लागि इमानदारीपूर्वक निर्वाह गर्ने प्रतिबद्धता जनाएका छन् । उनले आफ्नो विजयलाई व्यक्तिगत उपलब्धिभन्दा पनि नेपाली कांग्रेसलाई समयानुकूल, जनउत्तरदायी र सुदृढ बनाउने साझा सङ्कल्पका रूपमा व्याख्या गरेका छन् । लोकतान्त्रिक प्रतिस्पर्धामा सहभागी सबै साथीप्रति सम्मान व्यक्त गर्दै उनले उनीहरूको विचार, योगदान र अनुभवलाई पार्टीको साझा यात्राको महत्त्वपूर्ण पुँजीका रूपमा लिएको बताएका छन् ।

‘नेपाली कांग्रेसको सुन्दरता नै यही हो, प्रतिस्पर्धामा अनेक विचार भए पनि पार्टी र राष्ट्रको भविष्य निर्माणमा साझा प्रतिबद्धता हुन्छ,’ राणाले भनेका छन् । उनले सबै मिलेर कांग्रेसलाई अझ सुदृढ बनाउँदै समुन्नत नेपाल निर्माणको यात्रामा अघि बढ्ने प्रतिबद्धतासमेत व्यक्त गरेका छन् । एभरेष्ट न्यूज एजेन्सी,

काठमाडौँ  । नेपाली कांग्रेसको खुलातर्फको उपसभापतिमा चन्द्र भण्डारी र मधु आचार्य विजयी भएका छन् ।

शुरुदेखि नै अग्रता हासिल गरेका भण्डारीले ३७३५ मत प्राप्त गर्दै विजयी भएका हुन् भने आचार्यले २३४२ मत प्राप्त गरेका थिए ।

त्यस्तै गोविन्द भट्टराईले १७५२, सुरेन्द्रराज पाण्डेले १६७३, धनराज गुरुङले १५९६, दीपक गिरीले ९२३, डा. चन्द्रमोहन यादवले ७६० मत प्राप्त गरेका छन् ।

त्यसैगरी समावेशी उपसभापतिमा विनोद चौधरी विजयी भएका छन् । चौधरीले १७४५ मत प्राप्त गर्दै विजयी भएका हुन् । उनका प्रतिष्पर्धी जीवन परियारले १६५८, फरमुल्लाह मंसुरले ११४४, सीता गुरुङले १११२ र रंजीत कर्णले ५६२ मत प्राप्त गरेका थिए ।

एभरेष्ट न्यूज एजेन्सी,

काठमाडौं । नेपाल सरकारको मन्त्रिपरिषद् बैठकले विश्व बैंकसँग भूकम्पसम्बन्धी जोखिम व्यवस्थापनका लागि सम्झौता गर्ने, बिटौरी जग्गा दर्तासम्बन्धी समिति गठन आदेश स्वीकृत गर्ने र एसियाली खेलकुदमा पदक विजेता खेलाडीलाई नगद पुरस्कार प्रदान गर्ने निर्णय गरेको छ ।

सरकारका प्रवक्ता सस्मित पोखरेलका अनुसार बैठकले विश्व बैंकसँग ‘नेपाल भूकम्प विपद् बन्ड’ सम्बन्धी अधिकारपत्र सम्झौतामा हस्ताक्षर गर्न स्वीकृति दिने निर्णय गरेको छ ।

बैठकले बिटौरी जग्गामा बसोबास गर्दै आएका व्यक्तिका नाममा जग्गा दर्ता गर्ने सम्बन्धी समिति गठन आदेश, २०८३ स्वीकृत गरेको छ ।

त्यस्तै, जापानको आइची–नागोयामा सम्पन्न २०औँ एसियाली खेलकुदमा पदक प्राप्त गर्ने महिला कबड्डी र करातेका खेलाडी, प्रशिक्षक तथा व्यवस्थापकलाई नगद पुरस्कार प्रदान गर्ने निर्णय गरेको छ ।

बैठकले नेपाल न्याय सेवा, सरकारी वकिल समूहका सहन्यायाधिवक्ता अच्युतमणि नेउपानेलाई राजपत्राङ्कित विशिष्ट श्रेणीमा बढुवा गरी बेपत्ता पारिएका व्यक्तिको छानबिन आयोगको सचिव पदमा पदस्थापन गर्ने निर्णयसमेत गरेको प्रवक्ता पोखरेलले जानकारी दिएका छन् । एभरेष्ट न्यूज एजेन्सी,

काठमाडौं । महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षा मन्त्री सिता बादी र नेपालका लागि अमेरिकी कार्यवाहक राजदूत मेघन बोल्डिनबीच भेटवार्ता भएको छ।

भेटमा रसुवालगायत बाढी प्रभावित क्षेत्रको पुनर्स्थापना तथा पुनर्निर्माण, मानव बेचबिखन तथा ओसारपसार नियन्त्रण र सामाजिक विकासका क्षेत्रमा नेपाल–अमेरिका सहकार्य थप सुदृढ गर्ने विषयमा छलफल भएको थियो।

कार्यवाहक राजदूत बोल्डिनले बाढीमा ज्यान गुमाएकाहरूप्रति श्रद्धाञ्जली व्यक्त गर्दै प्रभावित समुदायको पुनर्स्थापनामा सहकार्य गर्ने प्रतिबद्धता जनाएकी थिइन् ।

मन्त्री बादीले बाढीबाट महिला, किशोरी तथा बालबालिकाको सुरक्षा र शिक्षामा थप चुनौती सिर्जना भएको भन्दै पुनर्स्थापना तथा पुनर्निर्माणमा अमेरिकी सहयोगको अपेक्षा व्यक्त गरेकी थिइन्।

भेटमा मानव बेचबिखन नियन्त्रण, पीडितको संरक्षण, अनुसन्धान तथा पुनर्स्थापनाका क्षेत्रमा समेत सहकार्य बढाउने विषयमा छलफल भएको थियो। अमेरिकी पक्षले मानव बेचबिखन नियन्त्रण तथा पीडित संरक्षणमा नेपालसँग मिलेर काम गर्ने प्रतिबद्धता जनाएको थियो। एभरेष्ट न्यूज एजेन्सी

 काठमाडौं । नेपाली कांग्रेसको १५औँ महाधिवेशन अन्तर्गत नयाँ केन्द्रीय कार्यसमिति निर्वाचन आज बिहान १० बजेदेखि हुने भएको छ ।

केन्द्रीय निर्वाचन समितिका संयोजक एवं वरिष्ठ अधिवक्ता प्रेमबहादुर खड्काले यसअघि आज बिहान ७ बजेदेखि मतदान सुरु गर्ने कार्यक्रम तय गरिएको भए पनि वर्षा र केही प्राविधिक कारणले १० बजेदेखि शुरू गर्न लागिएको जानकारी दिएका छन् ।

उनका अनुसार मतदानका लागि काठमाडौंका तीन स्थानमा सात मतदान केन्द्र तोकिएका छन् । प्रतिनिधिहरूको सहजताका लागि प्रदेश र प्रतिनिधित्वको आधारमा छुट्टाछुट्टै मतदान केन्द्रको व्यवस्था गरिएको खड्काले बताए ।

निर्वाचन समितिले राष्ट्रिय सभागृह, खुलामञ्च र प्रज्ञा भवनमा मतदान केन्द्र तोकेको छ । जसअनुसार राष्ट्रिय सभागृहमा बागमती प्रदेशका प्रतिनिधिहरूले मतदान गर्ने व्यवस्था गरिएको छ । त्यसैगरी खुलामञ्चमा कोशी, मधेस, कर्णाली र सुदूरपश्चिम प्रदेशका प्रतिनिधिहरूले मतदान गर्नेछन् । भ्रातृ तथा शुभेच्छुक संस्था र जनसम्पर्क समितिबाट महाधिवेशन प्रतिनिधि बनेकाहरूका लागि पनि खुलामञ्चमै मतदान गर्ने व्यवस्था गरिएको निर्वाचन समितिले जनाएको छ । त्यस्तै, प्रज्ञा भवनमा गण्डकी र लुम्बिनी प्रदेशका प्रतिनिधिहरूका लागि मतदान केन्द्र तोकिएको छ ।

सम्बन्धित प्रदेश तथा समूहका प्रतिनिधिले तोकिएको मतदान केन्द्रमा पुगेर मतदान गर्नुपर्नेछ । मतदानका क्रममा प्रतिनिधिको परिचय तथा मतदाता नामावली रुजु गरेपछि मात्र मतदान गर्न पाउने व्यवस्था गरिएको छ ।

महाधिवेशनमा सहभागी ७ हजार २५५ प्रतिनिधिले कांग्रेसको आगामी नेतृत्व चयनका लागि मतदान गर्ने भएका छन्  एभरेष्ट न्यूज एजेन्सी,

काठमाडौं । नेपाली कांग्रेसको १५औँ महाधिवेशनअन्तर्गत केन्द्रीय कार्यसमितिको निर्वाचनमा उम्मेदवारी फिर्ता लिन, उम्मेदवारीको सच्चाउन तथा प्रकाशित नामावलीमा नाम छुटेको भए त्यससम्बन्धी दाबी गर्न आज दिउँसो २ बजेसम्मको समय तोकिएको छ ।

नेपाली कांग्रेस केन्द्रीय निर्वाचन समितिले सूचना जारी गर्दै उम्मेदवारको मनोनयन फिर्ता, उम्मेदवारीको सच्चाइ पाउने निवेदन तथा प्रकाशित नामावलीमा नाम छुटेको भए त्यसको दाबीसम्बन्धी प्रक्रिया अघि बढाएको हो ।

समितिका अनुसार निर्धारित समयभित्र सम्बन्धित उम्मेदवार वा प्रतिनिधि सदस्यले आवश्यक प्रक्रिया पूरा गरी दाबी वा निवेदन पेश गर्न सक्नेछन् ।

कांग्रेसको १५औँ महाधिवेशनअन्तर्गत केन्द्रीय कार्यसमितिको निर्वाचनका लागि यसअघि उम्मेदवारहरूको पहिलो नामावली प्रकाशित भइसकेको छ । उक्त नामावलीमाथि प्राप्त दाबी तथा निवेदनका आधारमा निर्वाचन प्रक्रिया अघि बढाइनेछ ।

आजै उम्मेदवारको अन्तिम नामावली प्रकाशित गरेर विहिबार बिहान देखि नै मतदान गर्ने तयारी निर्वाचन समितिले गरेको छ । एभरेष्ट न्यूज एजेन्सी