बीरगंजलाई आर्थिक राजधानी घोषणाका साथै भ्रष्टाचार बिरुद्ध आजपाले खबरदारी सभा गर्दै

आम जनता पार्टी (आजपा)ले भ्रष्टाचारको बिरुद्धमा बिरगंजमा प्रदर्शनका साथै खबरदारी सभा गर्दैछ । साथै बिरगंजलाई मुलुकको आर्थिक राजधानी घोषणा गर्नुपर्ने माग समेत आजपाले गरेको छ । हालै भ्रष्टाचार बिरुद्ध मधेसमा जागरण अभियान गरेको आजपाले बिरगंजमा भ्रष्टाचार बिरुद्ध खबरदारी सभा गर्न लागेको हो ।

आजपा पर्सा जिल्ला कमिटीले आज (बिहिबार) बिरगंजमा गरेको पत्रकार सम्मेलनमा नेताहरु यस्तो जानकारी गराएका हुन् । आजपा वरिष्ठ उपाध्यक्ष उपेन्द्र साहले भ्रष्टाचार बिरुद्ध खबरदारी सभा गर्न लागेको जानकारी दिए ।

बिरगंजलाई देशको आर्थिक राजधानी घोषणा गराउँन र भ्रष्टाचार बिरुद्ध जागरण गर्ने उदेश्यले पुस २७ गते बिरगंजमा हुने खबरदारी सभालाई आजपा अध्यक्ष एवं पूर्वमन्त्री प्रभु साहले विशेष सम्बोधन गर्ने कार्यक्रम रहेको उनले जनाएका छन् । ‘मुलुकमा भ्रष्टाचार बढदै गईरहेको छ तर सरकार मुकर्दशक बनेको छ ।

सरकारकै संरक्षणमा भ्रष्टाचार बढदै गईरहेको छ । हरेक काण्डमा सरकारका मान्छेहरु संलग्न रहेका छन् । मुलुक लुटिरहेको सरकारले भ्रष्टाचारीलाई संरक्षण गरिरहेको छ,’ आजपा वरिष्ठ उपाध्यक्ष साहले भने, ‘भ्रष्टाचार नियन्त्रण गर्ने सरकारी निकायहरुकै संलग्नतामा हरेक क्षेत्रमा भ्रष्टाचार बढदै गईरहेको छ । भ्रष्टाचार बिरुद्ध आवाज उठाउँने उदेश्यले हामीले खबरदारी सभा गर्न लागेका छौं ।’ आजपा महासचिव त्रिभुवन साह अमरले संघिय संरचना आउँनुभन्दा अघि बिरगंजलाई राजधानी बनाउँने भनिए पनि बिरगंजसंग धोका भएको बताए ।

प्रदेशको राजधानी बिरगंजलाई बनाउँन भनिए पनि षडयन्त्र गरिएको बताउदै उनले बिरगंजलाई आर्थिक राजधानी घोषणा गर्नमा पनि षडयन्त्र भईरहेको आरोप लगाए । ‘काठमाडौं प्रशासनिक राजधानी हुने, पोखरा पर्यटकीय राजधानी हुने तर बिरगंज आर्थिक राजधानी किन नहुने ? हामीले बिरगंजलाई जसरी पनि आर्थिक राजधानी घोषणा गराएरै छाड्ने छौं,’ महासचिव साहले भने, ‘यदी बिरगंजलाई आर्थिक राजधानी घोषणा गरिएन भने हामी चुप लागेर बस्दैनौं ।

अहिले खबरदारी सभा गरिरहेका छ, सरकारले हाम्रो माग सम्बोधनमा ढिलाई गरे यो भन्दा कडा आन्दोलन गर्न हामी बाध्य हुन्छौं ।’ आजपा मधेस प्रदेशका अध्यक्ष उमेश कुशवाहाले सरकारले हरेक बस्तु र क्षेत्रमा मनोमानी कर लगाएर मुलुकलाई धरासायी बनाउदै गरिरहेको आरोप लगाए । भ्रष्टाचार बिरुद्ध जागरण गर्ने, सरकारको मनोमानी कर आतंकको अन्त्य र बिरगंजलाई आर्थिक राजधानी घोषणा गराउँन दबाब दिने उदेश्यले बिरगंजमा खबरदारी सभा गर्न लागेको उनले बताए ।

‘सरकारले हरेक क्षेत्र र बस्तुमा मनोमानी कर असुल्ने काम गरिरहेको छ । सर्वसधारणदेखी उधोगी, व्यापारीसंग मनोमानी कर लिन पाईदैन् । हामी त्यसको विरोधमा छौं । सरकारको मनोमानी कर आतंकले उधोग, व्यापार सबै धरासायी बन्दै गईरहेको छ,’ कुशवाहाले भने, ‘भ्रष्टाचार बढदै गईरहेको छ, मुलुकको आर्थिक अवस्था बिग्रदै गईरहेको छ ।

यस्तो अवस्थामा सरकारले मनोमानी कर असुल्ने धन्दा बन्द गर्नुपर्ने हाम्रो जोडदार माग हो । त्यसैका लागि हामीले बिरगंजमा खबरदारी सभा गर्न लागेका छौं ।’ आजपाले भ्रष्टाचार, सरकारको मनोमानी कर आतंक, बैदेशिक रोजगारमा भईरहेको ठगी, भन्सार कानूनमा रहेको लुटकारी व्यवस्था, एवं दलाल दलतन्त्र बिरुद्ध आवाज उठाउदै आएको छ ।

आजपा पर्सा जिल्ला कमिटीका इन्चार्ज लखिन्द्र साहको अध्यक्षतामा भएको पत्रकार सम्मेलनमा पार्टीका नेताकार्यकर्ताका साथै बिभिन्न मिडियाका सञ्चारकर्मीहरुको सहभागिता रहेको थियो ।