काठमाडौँ । स्पेनले फिफा विश्वकप फुटबलको सेमिफाइनलमा बलियो दाबेदार मानिएको फ्रान्सलाई २-० गोल अन्तरले पराजित गर्दै फाइनलमा स्थान बनाएको छ ।
डलास रङ्गशालामा भएको खेलमा स्पेनले सुरुदेखि नै उत्कृष्ट प्रदर्शन गर्दै फ्रान्सका आक्रमणलाई प्रभावहीन बनाएको थियो । अवसर कम सिर्जना भएको खेलमा स्पेनले बलमाथिको नियन्त्रण कायम राख्दै जित दर्ता गरेको हो ।
स्पेनका लागि पहिलो गोल मिकेल ओयारजाबालले पहिलो हाफको मध्यतिर पेनाल्टीमार्फत गरेका थिए । फ्रान्सका बायाँ रक्षक लुकास डिन्येले लामिन यामालमाथि फउल गरेपछि स्पेनले पेनाल्टीको अवसर पाएको थियो। ओयारजाबालले त्यसलाई सहज रूपमा गोलमा परिणत गर्दै टोलीलाई अग्रता दिलाएका थिए ।
दोस्रो हाफमा पनि स्पेनले आफ्नो लय कायम राख्यो । खेलको नियन्त्रण आफ्नो पक्षमा राखेको स्पेनका लागि पेड्रो पोरोले डानी ओल्मोसँग उत्कृष्ट पास आदानप्रदानपछि नजिकको कुनाबाट गोल गर्दै अग्रता दोब्बर बनाए ।
त्यसपछि फ्रान्सले खेलमा फर्कने प्रयास गरे पनि स्पेनको अनुशासित र संगठित रक्षापङ्क्ति तोड्न सकेन । प्रतियोगिताभर एक गोल मात्र बेहोरेको स्पेनले अन्तिमसम्म संयमित प्रदर्शन गर्दै सहज जित सुरक्षित गर्यो ।
यस हारसँगै लगातार तेस्रो पटक विश्वकपको फाइनल पुग्ने फ्रान्सको सपना समाप्त भएको छ । अब फ्रान्सले तेस्रो स्थानका लागि हुने खेल खेल्नेछ । साथै, १४ वर्षदेखि टोली सम्हालिरहेका मुख्य प्रशिक्षक डिडियर डेसचाम्पको कार्यकाल पनि यही प्रतियोगितापछि समाप्त हुनेछ ।
अब स्पेन उपाधि भिडन्तका लागि न्यु जर्सी पुग्नेछ। फाइनलमा स्पेनले इङ्ग्ल्यान्ड र अर्जेन्टिनाबीच हुने दोस्रो सेमिफाइनलको विजेतासँग प्रतिस्पर्धा गर्नेछ । स्पेन दोस्रो पटक विश्वकपको उपाधि जित्ने लक्ष्यमा रहेको छ । स्पेनले यसअघि २०१० मा विश्वकप उपाधि जितेको थियो ।एभरेष्ट न्यूज एजेन्सी
काठमाडौँ । भारतले पहिलो एकदिवसीय क्रिकेट खेलमा इङल्याण्डलाई ६ विकेटले पराजित गर्दै तीन खेलको सिरिजमा १-० को अग्रता बनाएको छ ।
पहिले ब्याटिङ गरेको इङल्याण्ड ४७.५ ओभरमा २५८ रनमा समेटियो । जवाफमा भारतले ४५.२ ओभरमा ४ विकेट गुमाउँदै २६२ रन बनाएर लक्ष्य पूरा गरेको थियो ।
भारतको जितमा कप्तान शुभमन गिल, अक्षर पटेल र वासिङ्टन सुन्दरले अर्धशतकीय इनिङ्स खेलेका थिए । शुभमन गिलले ८० रन बनाएका बेला खुट्टामा समस्या देखिएपछि मैदान छाड्दै उपचारका लागि बाहिरिएका थिए । भारतको सुरुआत भने राम्रो हुन सकेन । रोहित शर्मा र विराट कोहली सस्तैमा आउट भएपछि शुभमन गिल र श्रेयस अय्यरले तेस्रो विकेटका लागि १०१ रनको महत्वपूर्ण साझेदारी गरेका थिए ।
गिल मैदानबाट बाहिरिएपछि श्रेयस अय्यर रनआउट भए भने केएल राहुल पनि धेरै समय टिक्न सकेनन् । त्यसपछि अक्षर पटेल र वासिङ्टन सुन्दरले जिम्मेवारी सम्हाल्दै पाँचौँ विकेटका लागि अविजित १०२ रनको साझेदारी गरेका थिए ।
अक्षरले ३९ बलमा अर्धशतक पूरा गर्दै अविजित ५७ रन बनाए भने वासिङ्टनले विजयी छक्का प्रहार गर्दै आफ्नो अर्धशतक पूरा गरेका थिए । उनी ५२ रनमा अविजित रहे । इङल्याण्डका लागि जोफ्रा आर्चर, जोस टङ र साम करनले समान एक-एक विकेट लिए ।
त्यस्तै इङल्याण्डका लागि जो रुटले ७६, लियाम डावसनले ६८ र बेन डकेटले ४३ रन बनाएका थिए भने भारतीय बलर अक्सर पटेलले ४ विकेट लिएका थिए भने गुरनूर ब्रार र प्रसिद्ध कृष्णले २-२ विकेट लिएका थिए ।
यो जितपछि भारतले सिरिजमा १-० को बढ्त बनाएको छ भने अब सिरिजको दोस्रो खेल विहिबार हुने छ ।एभरेष्ट न्यूज एजेन्सी
काठमाडौँ । आज राष्ट्रिय सभाको बैठक बस्दैछ । संघीय संसद सचिवालयका अनुसार राष्ट्रिय सभाको बैठक आज दिउसो १: १५ बजेदेखि बस्दैछ ।
आजको बैठकमा प्रधानमन्त्री बालेन्द्र शाहले महान्यायाधिवक्ताको कार्यलयको आर्थिक बर्ष २०८१/८२ को बार्षिक प्रतिवेदन सभा समक्ष पेश गर्ने कार्यसुची रहेको छ ।एभरेष्ट न्यूज एजेन्सी
काठमाडौँ । आज प्रतिनिधिसभा अन्तर्गतका तीन समितिको बैठक बस्दैछ । आज अर्थ समिति, शिक्षा, स्वास्थ्य तथा सूचना प्रविधि समिति र उद्योग तथा वाणिज्य र श्रम तथा उपभोक्ता हित समितिको बैठक बस्दैछ ।
आज बिहान साढे ८ बजे हुने अर्थ समितिको बैठकमा नेपाल धितोपत्र बोर्डसँग आव २०८२/८३ मा भए गरेका मुख्य-मुख्य कामकारबाही, धितोपत्र बजारको नियमन एवं विकासका लागि भएका प्रयासहरू र उपलब्धिहरू लगानीकर्ताहरूको हित संरक्षणका लागि भएका प्रयास एवं उपलब्धिहरू बारेमा जानकारी लिने कार्यसूची रहेको छ ।
त्यस्तै आज बिहान साढे ८ बजे बोलाइएको शिक्षा, स्वास्थ्य तथा सूचना प्रविधि समितिको बैठकमा राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१ सम्बन्धमा छलफल हुने कार्यसूची रहेको छ । साथै छलफलमा विज्ञान, प्रविधि तथा नवप्रवर्तन मन्त्री र सचिव तथा कानून, न्याय तथा संसदीय मामिला मन्त्रालयका सचिव र राष्ट्रिय विधि विज्ञान प्रयोगशाला कार्यकारी निर्देशकसँग छलफलको कार्यसूची रहेको छ ।
त्यसैगरी आज बिहान ८ बजेका लागि बोलाइएको उद्योग तथा वाणिज्य र श्रम तथा उपभोक्ता हित समितिको बैठकमा उद्योग, वाणिज्य तथा आपूर्तिमन्त्री र सचिवसँग पकाउने ग्यासको आपूर्तिमा देखिएका समस्या र उपभोक्तामा परेको प्रभावका सम्बन्धमा छलफलको कार्यसूची रहेको समितिले जानकारी दिएको छ ।एभरेष्ट न्यूज एजेन्सी
काठमाडौँ । आज विश्व युवा सीप दिवस विभिन्न कार्यक्रम गरी मनाइँदै छ । युवालाई रोजगारी, स्वरोजगार र उद्यमशीलताका लागि आवश्यक सीप विकासको महत्व उजागर गर्ने उद्देश्यले संयुक्त राष्ट्रसंघको महासभाले सन् २०१४ मा हरेक वर्ष जुलाई १५ लाई विश्व युवा सीप दिवसका रूपमा मनाउने घोषणा गरेको थियो ।
यस वर्ष ‘साझा भविष्यका लागि सीप’ भन्ने नाराका साथ दिवस मनाइँदै छ । कृत्रिम बुद्धिमत्ता, हरित अर्थतन्त्र, डिजिटल प्रविधि र बदलिँदो श्रम बजारका कारण रोजगारीको स्वरूप तीव्र रूपमा परिवर्तन भइरहेका बेला युवालाई प्राविधिक सीपसँगै डिजिटल, सामाजिक, नेतृत्व, वातावरणीय तथा समस्या समाधान गर्ने क्षमताले पनि सशक्त बनाउनुपर्नेमा जोड दिइएको छ ।
संयुक्त राष्ट्रसंघका अनुसार सन् २०२३ मा विश्व युवा बेरोजगारी दर १३ प्रतिशतमा झरेर पछिल्लो १५ वर्षयताकै न्यून स्तरमा पुगेको छ । तर, विश्वभर अझै ठूलो संख्यामा युवा रोजगारी, शिक्षा वा तालिममध्ये कुनै पनि क्षेत्रमा आबद्ध छैनन्। विशेषगरी युवतीहरू यस्तो अवस्थाबाट बढी प्रभावित छन् ।
संयुक्त राष्ट्रसंघले गुणस्तरीय प्राविधिक तथा व्यावसायिक शिक्षा, सीपमूलक तालिम र नयाँ प्रविधिअनुकूल शिक्षामा लगानी बढाउनुपर्ने आवश्यकता औँल्याएको छ । यसबाट युवाले रोजगारीका अवसर मात्र होइन, स्वरोजगार र उद्यमशीलतामार्फत दिगो आर्थिक विकासमा समेत योगदान पुर्याउन सक्ने विश्वास गरिएको छ ।
विश्व युवा सीप दिवसका अवसरमा विश्वभर विभिन्न देशमा सीप विकास, रोजगारी प्रवर्द्धन, उद्यमशीलता तथा युवा सशक्तीकरणसँग सम्बन्धित कार्यक्रम आयोजना गरिएका छन् ।एभरेष्ट न्यूज एजेन्सी
काठमाडौँ । जल तथा मौसम विज्ञान विभाग अन्तर्गतको मौसम पूर्वानुमान महाशाखाले हाल देशभर मनसुनी वायूको प्रभाव रहेको र हाल मनसुनको न्यून चापीय रेखा सरदर स्थानभन्दा केही माथि नेपालको तराई भू-भाग नजिक रहेको जानकारी दिएको छ ।
हाल देशभर साधारणतया बादल लागेको छ । कोशी, बागमती, गण्डकी र लुम्बिनी प्रदेशको केही स्थानमा तथा कर्णाली प्रदेशको एक-दुई स्थानमा मध्यम वर्षा भैरहेको छ ।
आज दिउँसो देशभर साधारणतया बादल लाग्नेछ। कोशी, बागमती र गण्डकी प्रदेशका हिमाली भू-भागका केही स्थान र लुम्बिनी, कर्णाली र सुदूरपश्चिम प्रदेशका हिमाली भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ। देशको पहाडी र तराई भू-भागका केही स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। कोशी, बागमती, गण्डकी र लुम्बिनी प्रदेशको पहाडी भू-भाग र मधेश प्रदेश तथा बागमती, गण्डकी र लुम्बिनी प्रदेशको तराई भू-भागको एक-दुई स्थानमा भारी वर्षाको सम्भावना रहेको छ।
त्यस्तै आज राति देशभर साधारणतया बादल लाग्नेछ। कोशी, बागमती र गण्डकी प्रदेशका हिमाली भू-भागका थोरै स्थानमा र लुम्बिनी, कर्णाली र सुदूरपश्चिम प्रदेशका हिमाली भू-भागका एक-दुई स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ। देशका पहाडी र तराई भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। कोशी प्रदेशको पहाडी भू-भाग तथा कोशी र लुम्बिनी प्रदेशको तराई भू-भागको एक-दुई स्थानमा भारी वर्षाको सम्भावना रहेको छ ।एभरेष्ट न्यूज एजेन्सी
आजको राशिफल बिस २०८३ असार ३१ गते बुधबार ईस २०२६ जुलाई १५ नेपाल सम्बत ११४६ दिल्लाथ्व पारु, रौद्र नाम संवत्सर सूर्य उत्तरायण, गृष्म ऋतु, असार शुक्ल पक्ष प्रतिवदा, चन्द्रमा कर्कट राशिमा, तिष्य नक्षत्र, हर्शण योग, बव करण । आज नेपालमा सुर्योदय बिहान ५ बजेर १८ मिनेटमा र सूर्यास्त साँझ ७ बजेर ३ मिनेटमा हुनेछ ।
आज जन्म लिने बच्चा कर्कट राशीको हुनेछ । आज विश्व युवा सीप दिवस परेको छ ।
मेष (चु, चे, चो, ला, लि, लु, ले, लो, अ) –
आजको दिन नयाँ उत्साह, सकारात्मक ऊर्जा र आत्मविश्वासका साथ सुरु हुनेछ। लामो समयदेखि रोकिएका कामले गति लिने सम्भावना देखिन्छ। कार्यक्षेत्रमा तपाईंको मेहनत, नेतृत्व क्षमता र स्पष्ट निर्णयको प्रशंसा हुनेछ। वरिष्ठ व्यक्तिको विश्वास प्राप्त हुँदा नयाँ जिम्मेवारी पनि थपिन सक्छ। व्यापार–व्यवसायमा विस्तारका अवसर देखा पर्न सक्छन्। आर्थिक रूपमा आम्दानी सन्तोषजनक रहनेछ, तर भविष्यलाई ध्यानमा राखेर बचत गर्ने बानी लाभदायक हुनेछ। परिवारमा खुसी, मेलमिलाप र आपसी सहयोगको वातावरण रहनेछ। साथीभाइसँगको भेटघाटले मन प्रफुल्लित बनाउनेछ। स्वास्थ्य राम्रो रहनेछ, तर नियमित विश्राम र सन्तुलित खानपानलाई प्राथमिकता दिनु उपयुक्त हुनेछ।
वृष (इ, उ, ए, ओ, वा, वि, वु, वे, वो) –
आज धैर्य, संयम र व्यवहारिक सोचले तपाईंलाई सफलता दिलाउनेछ। कार्यक्षेत्रमा विगतको मेहनतको प्रतिफल प्राप्त हुने सम्भावना बलियो छ। नयाँ अवसरलाई सही रूपमा उपयोग गर्न सक्नुभयो भने भविष्यका लागि राम्रो आधार तयार हुनेछ। आर्थिक अवस्था स्थिर रहनेछ र आम्दानी–खर्चबीच सन्तुलन कायम रहनेछ। व्यापार गर्ने व्यक्तिहरूलाई नियमित लाभ मिल्ने संकेत छ। परिवारका सदस्यहरूसँग आत्मीयता बढ्नेछ। आफन्तसँगको कुराकानी वा भेटघाटले मन हल्का बनाउनेछ। स्वास्थ्य सामान्य रहनेछ र मानसिक शान्ति पनि कायम रहनेछ।
मिथुन (का, कि, कु, घ, ङ, छ, के, को, ह) –
आज सिर्जनशील सोच, प्रभावकारी अभिव्यक्ति र चाँडो निर्णय गर्ने क्षमताले तपाईंलाई विशेष सफलता दिलाउनेछ। कार्यक्षेत्रमा नयाँ जिम्मेवारी वा अवसर प्राप्त हुन सक्छ। अध्ययन, लेखन, सञ्चार, शिक्षा तथा सिर्जनात्मक क्षेत्रमा लागेकाहरूका लागि दिन निकै फलदायी रहनेछ। सहकर्मी तथा साथीभाइको सहयोगले कठिन काम सहज रूपमा सम्पन्न हुनेछ। आर्थिक रूपमा सुधार आउने सम्भावना छ। परिवारसँग खुसीका क्षण बित्नेछन्। स्वास्थ्य राम्रो रहनेछ र दिनभर उत्साह कायम रहनेछ।
कर्कट (हि, हु, हे, हो, डा, डि, डु, डे, डो) –
आज घरपरिवारमा सुखद वातावरण कायम रहनेछ। परिवारका सदस्यहरूसँगको सम्बन्ध अझ आत्मीय बन्नेछ। कार्यक्षेत्रमा तपाईंको इमानदारी, जिम्मेवारी र मेहनतको उचित मूल्यांकन हुनेछ। रोकिएका कामहरू पूरा हुने सम्भावना बलियो देखिन्छ। आर्थिक पक्षमा सामान्य सुधार आउनेछ। भविष्यका योजना बनाउन वा नयाँ काम सुरु गर्न दिन अनुकूल रहनेछ। कुनै शुभ समाचारले मनमा नयाँ आशा र उत्साह थप्न सक्छ। स्वास्थ्य राम्रो रहनेछ र मानसिक रूपमा पनि सन्तुलित महसुस हुनेछ।
सिंह (मा, मि, मु, मे, मो, टा, टि, टु, टे) –
आज नेतृत्व क्षमता, आत्मविश्वास र साहसका कारण उल्लेखनीय सफलता प्राप्त गर्न सक्नुहुनेछ। कार्यक्षेत्रमा वरिष्ठ व्यक्तिको विश्वास जित्नुका साथै नयाँ जिम्मेवारी पनि प्राप्त हुन सक्छ। व्यापार–व्यवसायमा विस्तारको सम्भावना देखिन्छ। आर्थिक रूपमा लाभका अवसर देखिए पनि सोचविचार गरेर मात्र लगानी गर्नु राम्रो हुनेछ। सामाजिक क्षेत्रमा सम्मान र प्रतिष्ठा बढ्नेछ। परिवारको साथ र प्रोत्साहनले मनोबल अझ बलियो बन्नेछ। स्वास्थ्य राम्रो रहनेछ र शरीरमा ऊर्जा भरिपूर्ण रहनेछ।
कन्या (टो, प, पि, पु, ष, ण, ठ, पे, पो) –
आज अध्ययन, अनुसन्धान, तालिम तथा नयाँ सीप सिक्ने कार्यमा उल्लेखनीय उपलब्धि प्राप्त हुनेछ। कार्यक्षेत्रमा अनुशासन, धैर्य र निरन्तर प्रयासले राम्रो प्रतिफल दिलाउनेछ। आर्थिक अवस्था सन्तुलित रहनेछ, तर खर्च गर्दा योजनाबद्ध रूपमा अघि बढ्नु उचित हुनेछ। परिवारमा सुखद वातावरण कायम रहनेछ। छोटो दूरीको यात्रा वा आवश्यक भेटघाट लाभदायक बन्न सक्छ। नयाँ ज्ञान र अनुभवले भविष्यमा राम्रो अवसर सिर्जना गर्नेछ। स्वास्थ्य राम्रो रहनेछ।
तुला (रा, रि, रु, रे, रो, ता, ति, तु, ते) –
आज आर्थिक क्षेत्रमा सकारात्मक परिवर्तन आउने सम्भावना बलियो देखिन्छ। रोकिएको रकम प्राप्त हुन सक्छ वा नयाँ आम्दानीको स्रोत खुल्न सक्छ। व्यापार–व्यवसायमा लाभ बढ्ने संकेत देखिन्छ। कार्यक्षेत्रमा सहकार्य र समन्वय उत्कृष्ट रहनेछ। परिवारसँग रमाइलो समय बित्नेछ र घरमा खुसीको वातावरण कायम रहनेछ। सामाजिक क्षेत्रमा नयाँ सम्बन्ध स्थापित हुनेछ, जसले भविष्यमा फाइदा पुर्याउन सक्छ। स्वास्थ्य राम्रो रहनेछ र आत्मविश्वास पनि बढ्नेछ।
वृश्चिक (तो, ना, नि, नु, ने, नो, या, यि, यु) –
आज मेहनत, धैर्य र अनुभवले उल्लेखनीय सफलता दिलाउने दिन रहनेछ। प्रतिस्पर्धात्मक क्षेत्रमा आफूलाई अब्बल सावित गर्ने अवसर प्राप्त हुनेछ। कार्यक्षेत्रमा तपाईंको कार्यदक्षताको प्रशंसा हुनेछ र नयाँ अवसर पनि प्राप्त हुन सक्छ। आर्थिक रूपमा लाभका संकेत देखिए पनि ठूलो निर्णय गर्दा पर्याप्त सोचविचार गर्नु आवश्यक हुनेछ। परिवारमा खुसी, विश्वास र आत्मीयताको वातावरण कायम रहनेछ। सम्बन्ध थप सुदृढ बन्नेछ। स्वास्थ्य राम्रो रहनेछ र मानसिक रूपमा पनि ऊर्जावान महसुस हुनेछ।
धनु (ये, यो, भ, भि, भु, ध, फा, ढ, भे) –
आज सकारात्मक सोच, उत्साह र आत्मविश्वासले नयाँ उपलब्धि हासिल गर्ने अवसर प्रदान गर्नेछ। व्यापार, अध्ययन, यात्रा वा वैदेशिक क्षेत्रसँग सम्बन्धित काममा शुभ संकेत देखिन्छ। कार्यक्षेत्रमा तपाईंको मेहनतको उचित मूल्यांकन हुनेछ। आर्थिक अवस्थामा सुधार आउने सम्भावना बलियो छ। परिवारका सदस्यहरूसँगको सम्बन्ध थप सुमधुर बन्नेछ। सामाजिक क्षेत्रमा मान–सम्मान र प्रतिष्ठा बढ्नेछ। भविष्यका योजना बनाउन तथा नयाँ लक्ष्य निर्धारण गर्न दिन निकै अनुकूल रहनेछ। स्वास्थ्य राम्रो रहनेछ।
मकर (भो, ज, जि, खि, खु, खे, खो, गा, गि) –
आज जिम्मेवारी बढे पनि योजनाबद्ध रूपमा अघि बढ्दा सबै काम सफलतापूर्वक सम्पन्न हुनेछन्। कार्यक्षेत्रमा वरिष्ठ व्यक्तिको सहयोग र विश्वास प्राप्त हुनेछ। आर्थिक रूपमा खर्च नियन्त्रण गर्नु आवश्यक हुनेछ र बचत गर्ने योजनाले राम्रो परिणाम दिनेछ। परिवारका सदस्यहरूको सुझावले महत्त्वपूर्ण निर्णय लिन सहयोग पुर्याउनेछ। स्वास्थ्यमा सामान्य थकान महसुस हुन सक्ने भएकाले पर्याप्त आराम गर्न आवश्यक हुनेछ। दिनको अन्त्यमा प्राप्त उपलब्धिले आत्मसन्तुष्टि र आत्मविश्वास बढाउनेछ।
कुम्भ (गु, गे, गो, सा, सि, सु, से, सो, द) –
आज सिर्जनशील सोच, नवीन योजना र सकारात्मक दृष्टिकोणले तपाईंलाई नयाँ सफलतातर्फ अघि बढाउनेछ। कार्यक्षेत्रमा रोकिएका काम सम्पन्न हुनेछन् र नयाँ अवसर प्राप्त हुनेछ। साथीभाइ तथा सहकर्मीको सहयोगले महत्त्वपूर्ण काम सहज रूपमा पूरा हुनेछ। आर्थिक पक्षमा सुधार आउने सम्भावना बलियो छ। परिवारमा खुसी, मेलमिलाप र समझदारी कायम रहनेछ। सामाजिक सम्बन्ध विस्तार हुनेछ र नयाँ परिचय भविष्यका लागि लाभदायक बन्न सक्छ। स्वास्थ्य राम्रो रहनेछ र मानसिक रूपमा पनि स्फूर्ति कायम रहनेछ।
मीन (दि, दु, थ, झ, ञ, दे, दो, च, ची) –
आज धैर्य, संयम र सकारात्मक सोचले दिनलाई उपलब्धिमूलक बनाउनेछ। केही काममा ढिलाइ भए पनि अन्ततः परिणाम तपाईंको पक्षमा आउने सम्भावना छ। कार्यक्षेत्रमा आफ्नो अनुभव र सीपको प्रभावकारी उपयोग गर्न सक्नुहुनेछ। आर्थिक रूपमा सोचविचार गरेर खर्च गर्नु आवश्यक हुनेछ, साथै बचत गर्ने अवसर पनि प्राप्त हुनेछ। परिवारको साथ र सहयोगले मानसिक शान्ति तथा आत्मबल बढाउनेछ। पुराना अधुरा काम पूरा हुने सम्भावना बलियो छ। साँझतिर कुनै सुखद समाचार प्राप्त हुन सक्छ, जसले मनमा नयाँ आशा र उत्साह थप्नेछ। स्वास्थ्य राम्रो रहनेछ र आत्मविश्वास पनि निरन्तर वृद्धि हुँदै जानेछ ।एभरेष्ट न्यूज एजेन्सी
