आरके श्रीवास्तव,मधेस,२४ गते चैत ।
जनकपुरधाम । महोत्तरी जिल्लाको एकडारा गाउँपालिका वडा नं. ५ अन्तर्गत जलेश्वर–बर्दिवास हुलाकी सडक खण्डमा भएको मोटरसाइकल दुर्घटनामा परी ३ जना युवा विद्यार्थीको ज्यान गएको दुःखद घटना सार्वजनिक भएको छ। एसईई परीक्षा दिएर घर फर्किंदै गरेका ती विद्यार्थीहरूको असामयिक निधनले स्थानीय समुदाय मात्र होइन, समग्र समाजलाई नै स्तब्ध बनाएको छ ।
उक्त दुर्घटनामा अन्य ३ जना विद्यार्थी गम्भीर घाइते भएको बताइएको छ। घाइतेहरूको उपचार भइरहेको छ र उनीहरूको शीघ्र स्वास्थ्यलाभको कामना गरिएको छ ।
यस घटनाप्रति मधेश प्रदेश सरकारकी शिक्षा तथा संस्कृति मन्त्री तिवारीले गहिरो दुःख व्यक्त गर्दै दिवंगत आत्माहरूको चिरशान्तिको कामना गरेकी छन् । साथै उनले शोकसन्तप्त परिवारजनप्रति हार्दिक समवेदना प्रकट गर्दै यस पीडादायी क्षण सहन सक्ने शक्ति प्रदान गरियोस् भनी ईश्वरसँग प्रार्थना गरेकी छन् ।
मन्त्री तिवारीले सवारी साधन चलाउँदा अत्यधिक सावधानी अपनाउन, ट्राफिक नियमहरूको पूर्ण पालना गर्न तथा तीव्र गति नियन्त्रणमा राख्न सबै नागरिकलाई आग्रह गरेकी छन् । यस्ता दुर्घटना न्यूनीकरणका लागि सबै पक्ष जिम्मेवार र सचेत हुनुपर्नेमा उनले जोड दिएकी छन् ।
