काठमाण्डौ,०७ गते आसोज ।
जेन–जी आन्दोलनको क्रममा अराजक समूहले गरेको आगजनी र तोडफोडले क्षतिग्रस्त अवस्थामा रहेको भवनबाटै मधेशको प्रदेशसभा बैठक सुरु भएको छ । जेन–जीको आन्दोलनपछि पहिलोपटक मंगलबार प्रदेशसभाको बैठक बसेको हो ।
बैठकमा मधेश प्रदेश सरकारको नेतृत्व गरिरहेको जनमत पार्टीका सांसदहरू दुई कित्तामा बसेका छन् ।
पार्टीले मुख्यमन्त्री सतिशकुमार सिंहलाई फिर्ता बोलाए पनि उनले राजीनामा नदिने अडान लिएपछि केही सांसद सत्तापक्षमा बसेका छन् भने केही सांसद प्रतिपक्षमा बसेका छन् ।
जनमत संसदीय दलका नेता महेशप्रसाद यादवले प्रदेश सरकारलाई दिएको समर्थन फिर्ता लिँदै आफ्नो दलका मुख्यमन्त्री र मन्त्रीलाई फिर्ता बोलाउने पत्र प्रदेश प्रमुखको कार्यालय तथा प्रदेशसभा सचिवालयमा दिएका थिए । तर मुख्यमन्त्री सिंहले राजीनामा दिन नमानेपछि जनमतका बाँकी प्रदेशसभा सदस्य प्रतिपक्षमा बसेका हुन् ।
बैठकमा मुख्यमन्त्री सिंहले वर्तमान अवस्थामा संविधान र संघीयताको रक्षाका लागि आफूले राजीनामा नदिएको बताए । पार्टीले राजीनामा मागे पनि आफूले प्रदेशसभाबाट विश्वासको मतको सामना गर्ने उनले बताए ।
सभार शिलापत्र
