काठमाडौँ । काठमाडौँ महानगरपालिकाका ४ वटा वडा (३१, २५, २७ र ३), महिला जनप्रतिनिधि र महिला कर्मचारी गरी ९२२ जनाको स्तन क्यान्सर र पाठेघरको मुखको क्यान्सरसँगै प्रजनन स्वास्थ्यको जाँच भएको छ ।
उनीहरुमध्ये (जनप्रतिनिधि, कर्मचारी, वडा नं. ३१, २५ र २७ गरी) ७७९ जनाको रिपोर्ट आइसकेको छ । रिपोर्ट आएकामध्ये २६ जनामा पोजेटिभ (क्यान्सरको सम्भावना) देखिएको जनस्वास्थ्य निरीक्षक रञ्जनाकुमारी शाहले जानकारी दिनुभएको छ । ७४७ (वडा नं. ३ को १२ गतेको प्राप्त हुन बाँकीबाहेक) जनामध्ये १७५ जनामा प्रजनन स्वास्थ्य सम्बन्धी समस्या देखिएको छ ।
रामघाट प्राथमिक स्वास्थ्य केन्द्रका स्त्री तथा प्रसुति रोग विषेशज्ञ डा. सुनिता लम्सालकाअनुसार पोजेटिभ देखिएकामध्ये ९ जनाको कल्पस्कोपी (विशेष क्यामराबाट पाठेघरको मुखको अवस्था हेर्ने) र बायोप्सी (परीक्षणका लागि मासुको नमूना निकाल्ने) गरिएको छ । बायोस्पीको रिपोर्ट आउन ७ दिन लाग्छ । आज रामघाटमा कल्पस्कोपी र वायोप्सीका लागि १२ जनालाई बोलाइएको छ ।
महानगरपालिकाको स्वास्थ्य विभागले निःशुल्क जाँचका लागि वैशाख ४ गतेदेखि निःशुल्क शिविर सुरु भएको हो । शिविरमा आउने सबै महिलाको स्तनको क्लिनिकल जाँच हुन्छ । प्रारम्भिक जाँचका क्रममा शंका लागेमा अल्ट्रासाउन्ड गरिन्छ । यसपछि मेमोग्राफीका लागि पठाइन्छ ।
पाठेघरको मुखको क्यान्सरका लागि ३० वर्षदेखि ६० बर्ष उमेर समूहका सबै महिलाको एचपीभी डीएनए पीसीआर (ह्युमन प्यापोलिमा भाइरस) परीक्षण हुन्छ । सुरुको जाँचका क्रममा अवस्था हेरेर अल्ट्रासाउन्ड गरिन्छ । यसबाट पोजेटिभ रिपोर्ट आयो भने कल्पोस्कोपी र बायोप्सी गरिन्छ ।
बायोप्सीको रिपोर्टमा केही देखिएन भने १ वर्षसम्म फलोअप गर्न सुझाव दिइन्छ । रिपोर्टबाट सेकाउँदा (थर्मोक्वागुलेसन) उपचार हुन सक्ने देखियो भने रामघाट प्राथमिक स्वास्थ्य केन्द्रमै उपचार गराउन थालिन्छ । सेकाएर नहुने देखियो भने यस्तो अवस्थाको उपचारका लागि अस्पतालहरुमा शिफारिस गरिन्छ ।
शिविरको पहिलो दिन राष्ट्रिय सभा गृहमा जनप्रतिनिधि र महिला कर्मचारीको जाँच गरिएको थियो । त्यस दिन ७२ जनाले जाँच गराउनुभएको थियो । उहाँहरुमध्ये एचपीभी डीएनए पीसीआरमा ५ जनामा पोजेटिभ देखिएको छ । प्रारम्भिक जाँचबाट शंका लागेपछि ८ जनाको स्तनको, १५ जनाको पाठेघरको अल्ट्रासाउन्ड र १ जनाको मेमोग्राफी गरिएको थियो । १३ जनामा प्रजनन स्वास्थ्य सम्बन्धी समस्या देखिएको छ ।
वैशाख ५ र ६ गते वडा नं. ३१ भीमसेनगोलामा रहेको सहरी स्वास्थ्य प्रवर्धन केन्द्रमा शिविर सञ्चालन गरिएको थियो । २ दिनमा २१३ ले स्वास्थ्य जाँच गराए । उनीहरुमध्ये १७७ जनाको एचपीभी डीएनए पीसीआर परीक्षण गरिएकोमा १० जनाको रिपोर्ट पोजेटिभ देखिएको छ । परीक्षणका क्रममा ५ जनाको स्तनको, ३४ जनाको पाठेघरको अल्ट्रासाउन्ड र ४ जनाको मेमोग्राफी गरियो । उहाँहरुमध्ये ५९ जनामा प्रजनन स्वास्थ्य सम्बन्धी समस्या देखिएको छ ।
वडा नं. २५ र २७ लाई लक्षित गरेर बैशाख ७, ९ र १० गते ३ दिन इनबहालमा शिविर गरिएको थियो । यस शिविरमा ३३९ जनाले परीक्षण गराउनुभयो । उहाँहरुमध्ये २७३ जनाको एचपीभी डीएनए पीसीआर परीक्षण गर्दा ५ जनाको रिपोर्ट पोजेटिभ देखिएको छ । ११ जनाको स्तनको, ४४ जनाको पाठेघरको अल्ट्रासाउन्ड गरिएको छ । ६९ जनामा प्रजनन स्वास्थ्य सम्बन्धी समस्या देखिएको छ ।
वैशाख ११ र १२ गते वडा नं. ३ महाराजगञ्जमा शिविर सञ्चालन भयो । पहिलो दिन १२३ जनाको परीक्षण भयो । जसमध्ये ३ जनाको स्तनको, २३ जनाको पाठेघरको मुखको अल्ट्रासाउन्ड गरियो । उहाँहरुमध्ये ६ जनाको रिपोर्ट पोजेटिभ देखिएको छ । ३४ जनामा प्रजनन स्वास्थ्य सम्बन्धी समस्या देखिएको छ ।
दोस्रो दिन १७५ जनाले स्वास्थ्य जाँच गराउनुभयो । उहाँहरुमध्ये १४३ जनाको एचपीभी डीएनए पीसीआर परीक्षण भयो । २३ जनाको पाठेघरको र ४ जनाको स्तनको अल्ट्रासाउन्ड गरिएको छ । उहाँहरुको रिपोर्ट आउन बाँकी छ ।
प्रजनन स्वास्थ्य समस्यामा पाठेघरमा मासु पलाएको, सेतो गनाउने पानी बग्ने, पाठेघरको मुखको संक्रमण, पाठेघरको मुखमा मासु पलाएको तथा यौनजन्य रोगहरु देखिएका छन् । न्युज कारखाना
मुम्बई, १३ बैशाख । वरिष्ठ भारतीय सिने गायिका लता मंगेशकरलाई भारतको गौरव भनिन्छ। आज पनि मानिसहरूले उनलाई विभिन्न तरिकाले सम्झाउँछन्।
सोही क्रममा मुम्बईमा लता दीनानाथ मंगेशकर अवार्ड समारोहको आयोजना गरिएको थियो र यस क्रममा त्यहाँ उपस्थित सबैले सम्मानित गायिका लता मंगेशकरलाई सम्झेका थिए। लता दीनानाथ मंगेशकर पुरस्कार मास्टर दीनानाथ मंगेशकर स्मृति प्रतिष्ठानद्वारा स्थापित गरिएको थियो।
राष्ट्र र समाजका लागि केही राम्रो काम गर्ने व्यक्तिलाई यो पुरस्कार प्रदान गरिन्छ । जनताको हितमा अतुलनीय योगदान पु¥याउने व्यक्तिहरुलाई यस पुरस्कारबाट सम्मानित गरिएको हो । यो सम्मान प्राप्त गर्ने पहिलो व्यक्ति प्रधानमन्त्री नरेन्द्र मोदी थिए । यो पटक भने सो पुरस्कार अभिताभ बच्चनले पाएका छन् । यस समारोहमा धेरै सेलिब्रेटीहरू सहभागी भएका थिए।
अभिनेता अमिताभ बच्चनलाई २४ अप्रिलमा ‘लता दीनानाथ मंगेशकर अवार्ड’ प्रदान गरिएको थियो । उनले थिएटर संगीत दिग्गज र मंगेशकर दाजुभाइ दिनानाथ मंगेशकरका पिताको स्मृति दिवसमा यो पुरस्कार प्राप्त गरेका हुन । अमिताभ बच्चनले जंजीर, दीवार, शोले, चुपके चुपके, मोहब्बते, पिकू जस्ता फिल्महरूमा आफ्नो उत्कृष्ट अभिनयले ती पात्रहरूलाई जीवन दिए। मेगास्टारले यो अवार्ड पाउँदा आफूलाई गौरवान्वित महसुस भएको बताए ।
अवार्ड ग्रहण गर्ने क्रममा उनले भने, ‘मैले आफूलाई यस्तो अवार्डको योग्य ठान्दिनँ, तर हृदयनाथजीले मलाई यहाँसम्म पु¥याउन निकै प्रयास गर्नुभयो । गत वर्ष पनि उनले मलाई यो कार्यक्रममा निम्तो दिएका थिए । उनले थप भने, ‘हृदयनाथ जी, म तपाईंसँग अन्तिम पटक माफी माग्छु। तब मैले तपाईलाई भनेँ कि म अस्वस्थ छु। म स्वस्थ थिएँ तर यहाँ आउन मन लागेन । यो वर्ष मसँग कुनै बहाना थिएन, त्यसैले म यहाँ आउनु पर्यो।’
सन् २०२२ मा मृत्यु भएका मंगेशकर दाजु बहिनी मध्ये लता जेठी दिदी हुन । उनको मृत्युपछि परिवार र ट्रस्टले सुर सामरागिनीको सम्झनामा यो पुरस्कार स्थापना गरेको हो । मंगेशकर दाजुभाइ मध्ये तेस्रो गायिका उषा मंगेशकरले बच्चनलाई अवार्ड प्रदान गरेकी थिइन्। यसअघि मंगेशकरकी अर्की बहिनी तथा चर्चित गायिका आशा भोस्लेले अवार्ड दिने भए पनि स्वास्थ्यमा समस्या आएका कारण उनी कार्यक्रममा उपस्थित हुन सकेकी थिइनन् ।
मंगेशकरका कान्छो भाइ र संगीतकार हृदयनाथ मंगेशकरले प्रत्येक वर्ष समारोहको अध्यक्षता गर्छन्। यस कार्यक्रममा पद्मिनी कोल्हापुरी, रणदीप हुड्डा, एआर रहमान र अभिषेक बच्चन जस्ता स्टारहरू पनि सहभागी थिए।न्युज कारखाना
मुम्बइ, १३ बैशाख । आमिर खानले प्रायः क्रिसमसको अवसरमा आफ्ना फिल्म रिलिज गर्ने गर्छन् ।
यसैक्रममा अभिनेताको फिल्म २०२४ को क्रिसमसमा पनि रिलिज गर्ने तयारी भइरहेको छ । वास्तवमा आमिर खानले यही वर्षको क्रिसमसमा आफ्नो कमब्याक फिल्म ‘सितारा जमीं पर’ रिलिज गर्दैछन् ।
अभिनेताले अर्को महिनादेखि दिल्लीमा फिल्मको छायांकन सुरु गर्ने तयारी गरेको चर्चा छ । यो फिल्म प्याराओलम्पिक खेलमा आधारित हुने बताइएको छ । हिन्दुस्तान टाइम्सका अनुसार आमिर खान अर्को महिना ‘सितारे जमीं पर’ को सुटिङका लागि दिल्ली जानेछन्, उनी आफ्नो फिल्मको सुटिङका लागि करिब ११ बालबालिकालाई लिएर राजधानी जान लागेका हुन ।
सो फिल्ममा अन्य स्टार कलाकार पनि हुनेछन्, जसको विवरण भने खुल्न सकेको छैन, यो मे र जुन बीचमा एक महिनाको कार्यक्रम हुने र बच्चाहरूलाई सुटिङका लागि धेरै प्याराओलम्पिक खेलहरूमा संलग्न गराउने बताइएको छ ।
रिपोर्टका अनुसार, सुटिङ लोकेशनको बारेमा स्रोतले भन्यो, “फिल्मको सुटिङ दिल्लीका धेरै ठाउँमा हुनेछ, जसमा रेड फोर्ट, लोधी गार्डेन, पुरानो दिल्ली र त्यागराज स्टेडियम समावेश रहेका छन । यो दिल्लीका विभिन्न भागहरूमा छायांकन भइरहेको छ किनभने तिनीहरू सबै बच्चाहरू एनसीआर क्षेत्रमा यात्रा गर्न चाहँदैनन्।
तपाईलाई बताउन दिनुहोस् कि आठ वर्षपछि आमिर खानको पहिलो क्रिसमस रिलिज ‘सितारे जमीं पर’ हुनेछ। उनले पछिल्लो पटक २०१६ को क्रिसमसमा आफ्नो ब्लकबस्टर फिल्म ‘दंगल’ रिलिज गरेका थिए । यो फिल्म आमिर खानको कमब्याक फिल्म हो ।
यसअघि टिभी नाइनसँग कुरा गर्दै आमिरले ‘सितारे जमीं पर’ क्रिसमसमा रिलिज हुने कुरा पुष्टि गरेका थिए, आमिरले भने, ‘मुख्य कलाकारको रूपमा मेरो अर्को फिल्म, जसको सुटिङ भर्खरै सुरु भएको छ । क्रिसमसको अवसरमा यो वर्षको अन्त्यसम्ममा रिलिज गर्ने प्रयासमा छौँ । यो एक मनोरञ्जनात्मक फिल्म हो र मलाई यसको कथा मन परेको छ ।’
उनका अनुसार फिल्मको सुटिङ सुरु भइरहेको छ, ‘सितारे जमीं पर’मा जेनेलिया देशमुख पनि मुख्य भूमिकामा छिन् । जेनेलिया र आमिरको यो पहिलो फिल्म हो ।न्युज कारखाना
म्याड्रिड, १३ बैशाख । स्पेनका प्रधानमन्त्री पेड्रो सान्चेजले आफ्नी श्रीमतीमाथि लागेको भ्रष्टाचारको आरोप अस्वीकार गरेका छन् ।
सान्चेजले आफ्नी श्रीमतीलाई दक्षिणपन्थी कानुनी प्लेटफर्मले झूटो आरोप लगाएको बताउँदै भ्रष्टचारको आरोपलाइ अस्विकार गरेका हुन । यद्दपी, उनले कानुनी लडाइमा भने सहयोग गर्ने जनाएका छन ।
बुधवारबाट यस मुद्दाको न्यायिक अनुसन्धान सुरु भएपछि उनले राजीनामा दिनसक्ने बताइरहेको बेला उनको यस्तो प्रतिक्रिया आएको हो । प्रधानमन्त्रीकी श्रीमतीले आफ्नो पदको दुरूपयोग गरी व्यापार सम्झौतालाई प्रभावित गरेको आरोप लागेको छ।
सान्चेजले आफ्नो एक्स अकाउन्टमा यस विषयमा एउटा पत्र पोष्ट गरेका छन्, जसमा उनले आफ्नी पत्नी बेगोना गोमेज विरुद्ध लगाइएको आरोपलाई झुटो घोषित गरेका छन्। उनले सोमबारसम्मको सार्वजनिक एजेण्डा खारेज गर्दै अब पदबाट राजीनामा दिने वा निरन्तरता दिने भन्ने विषयमा चाँडै घोषणा गर्ने बताए ।
‘मैले रोक्न र सोच्न आवश्यक छ,’ सान्चेजले लेखेका छन, ‘दक्षिणपन्थी र अतिदक्षिणपन्थीले हाम्रो राजनीतिमा ल्याएको फोहोरलाई ध्यानमा राख्दै सरकारको नेतृत्वमा बस्ने वा त्यो सर्वोच्च सम्मान त्याग्ने भन्ने कुरालाई निरन्तरता दिन लायक छ कि छैन भन्ने प्रश्नको जवाफ दिनैपर्छ।’ ५२ वर्षीय सान्चेज सन् २०१८ देखि स्पेनका प्रधानमन्त्री छन् । अर्को चार वर्षे कार्यकाल सुरु गर्न नोभेम्बरमा नयाँ वामपन्थी गठबन्धन सरकार गठन गर्न उनी सफल भएका थिए । उनी युरोपमा सबैभन्दा लामो समय सेवा गर्ने समाजवादी नेताहरू मध्ये एक हुन्।
बुधवार एक स्पेनी न्यायाधीश सान्चेजकी श्रीमती विरुद्ध एक निजी समूह द्वारा भ्रष्टाचार आरोप छानबिन गर्न सहमत भएका थिए । यो मुद्दा म्याड्रिडको एक अदालतमा दायर गरिएको छ। सान्चेजले भने कि उनकी श्रीमती बेगोनाले न्यायिक अनुसन्धानमा पूर्ण सहयोग गर्नेछिन्।
अदालतले ४९ वर्षीया बेगोना गोमेज कुनै सरकारी पदमा नरहेको र राजनीतिमा पनि नरहेको बताएको छ । मानोस लिम्पियासले गोमेजलाई कथित रूपमा आफ्नो पदको प्रयोग गरी व्यापार सम्झौतालाई प्रभाव पार्ने आरोप लगाएका छन्। अदालतले थप जानकारी नदिएर अनुसन्धान थालिएको बताएको छ ।
मुद्दा दर्ता गर्ने मानोस लिम्पियासले आफूलाई एक संघको रूपमा वर्णन गर्दछ । तर यसको मुख्य गतिविधि कानुनी मुद्दाहरू पछ्याउने फोरम हो। यसबाहेक न्यायमन्त्री फेलिक्स बोलानोसले पनि यी आरोपहरूलाई ‘झूटा’ भनेका छन्।
प्रधानमन्त्री सान्चेजले अगाडी भनेका छन, ‘छोटकरीमा, यो मेरी श्रीमतीलाई व्यक्तिगत रूपमा आक्रमण गरेर राजनीति छोड्नको लागि भूमि, समुद्र र वायुमा मेरी श्रीमतीलाई उत्पीडन गर्ने अपरेशन हो।’
न्युज कारखाना
काठमाडौँ । रुसी सुरक्षा बलको सामना गर्न युक्रेनले गोप्य रूपमा अमेरिकाले दिएको लामो दुरीको ब्यालेस्टिक मिसाइल प्रयोग गर्न थालेको छ ।
यी हतियारहरू गत मार्चमा अमेरिकी राष्ट्रपति जो बाइडेनले युक्रेनलाई दिएको ३० करोड डलरको सहायताको हिस्सा हुन् र यसै महिना युक्रेनमा पुग्न थालेका छन् ।
अमेरिकी सञ्चारमाध्यमका अनुसार क्रिमियामा रुसी लक्ष्यमा हमला गर्न एक पटक उनीहरुको प्रयोग गरिएको छ । बाइडेनले अब युक्रेनलाई ६१ बिलियन डलरको सहायता प्याकेज पनि स्वीकृत गरिसकेका छन् ।
अमेरिकाले यसअघि युक्रेनलाई आर्मी ट्याक्टिकल मिसाइल सिस्टम (एटीएसीएमएस) मध्यम दूरीका हतियार उपलब्ध गराएको भए पनि अहिलेसम्म युक्रेनलाई कुनै पनि ठूलो र शक्तिशाली हतियार दिन अस्वीकार गरेको थियो ।
तर, अहिले बाइडेनले युक्रेनलाई लामो दूरीका क्षेप्यास्त्र उपलब्ध गराउने प्रस्तावलाई गत फेब्रुअरीमा गोप्य रूपमा हरियो संकेत दिएको बताइएको छ । यी क्षेप्यास्त्रले ३०० किलोमिटरको दूरीमा प्रहार गर्न सक्छन् ।
कति हतियार पठाइयो भन्ने अझै स्पष्ट भइसकेको छैन, तर अमेरिकी राष्ट्रिय सुरक्षा सल्लाहकार जेक सुलिभानले युक्रेनलाई थप हतियार पठाउने वाशिङ्टनको योजना रहेको बताएका छन्।न्युज कारखाना
रौतहट १३ बैशाख। रौतहट स्थित सवारी दुर्घटनामा परेर १ बर्षको अवधिमा ४१ जनाको ज्यान गएको छ।
ट्राफिक प्रहरीले गत आर्थिक वर्ष २०८०÷०८१ को १ बर्षमा नियम बिपरित चलेका झण्डै १७ हजार सवारी साधन लाई कारवाहीको दायरामा ल्याएर डेढ करोड रुपैयाँ भन्दा बढी राजश्व संकलन गरेको छ।
अघिल्लो आर्थीक बर्षको तुलनामा जिल्लामा सवारी दुर्घटना संगै मृत्यु हुनेको सङ्ख्या कमी आएको ट्राफिक प्रहरीले जनाएको छ। गत साउन देखि यही बैशाख १० गतेसम्म नियम बिपरित चलेका १६ हजार ९९१ सवारी साधन लाई गरिएको कार्वाही बाट कुल १ करोड ५६ लाख,६३ हजार रुपैयाँ राजश्व संकलन गरिएको जिल्ला ट्राफिक प्रमुख इन्स्पेक्टर सुशील आचार्यले बताएका छन्।
सोही अवधिमा जिल्लाको बिभिन्न स्थानमा भएको ४९६ सवारी दुर्घटनामा परेर महिला, पुरुष, बालबालिका गरी ४१ जनाको मृत्यु हुनुका साथै ७८५ जना घाईते भएको इन्स्पेक्टर आचार्यले जानकारी दिएका छन।
अघिल्लो आर्थिक वर्षको तुलनामा सवारी दुर्घटना र मृतकको संख्यामा समेत कमी आएको छ।
अघिल्लो आर्थिक वर्षमा रौतहटमा १ बर्षको अवधीमा भएको ६४५ सवारी दुर्घटनामा परेर ५० जनाको ज्यान गएको जिल्ला प्रहरी प्रवक्ता डिएस्पी एलिजा गिरी द्वारा हस्ताक्षरित सूचनामा उल्लेख गरिएको छ। न्युज कारखाना
रौतहट १३ बैशाख। बिगतमा ग्रामीण भेगका युवाहरु माझ खेल प्रति खासै रुचि नरहेपनि पछिल्लो समय नेपालमा क्रिकेटसँगै युवाहरुको अन्य खेल प्रति पनि आकर्षण बढ्दै गएको छ। तर साधन स्रोतको अभावमा केही राम्रो गर्ने चाहना हुँदा हुँदै पनि खेललाई निरन्तरता दिन युवाहरुको लागी ठूलो चुनौतीको सामना गर्नु परिरहेको छ।
रौतहट कटहरिया नगरपालिका-१ का १७ वर्षीय आदेश कुमार यादव गत हप्ता काठमाडौंमा भएको १४औं राष्ट्रपति रनिङ शिल्डमा स्प्रिन्ट विधाको १०० र २०० मिटर दुवै इभेन्टमा स्वर्ण जितेका थिए।
एक दिन नेपालकै फास्टेस्ट स्प्रिन्टर बन्ने उनको लक्ष्य रहेको छ। तर स्रोत साधनाको अभावमा उनलाई ठूलो कठिनाइको सामना गर्नु परिरहेको छ। मध्यम बर्गिय परिवारका आदेश भन्छन्, ‘अहिलेसम्म म सँग कुनै प्रायोजक छैन, खेल सामग्री र पर्याप्त पौष्टिक आहार खान सक्ने अवस्था पनि छैन । भने जस्तो साधन स्रोत र सुविधा पाए अझ राम्रो प्रशिक्षण गरेर प्रदर्शन सुधार्न सकिन्छ ।’
राम्रो सुविधा पाएमा नेपाली खेलाडीले पनि अन्तर्राष्ट्रिय मेडल ल्याउन सक्ने उनकाे भनाइ छ । यस्ता उदीयमान खेलाडी आदेशको कटहरिया नगरपालिकाले प्रोतसाहनका लागि सम्मान सहित प्रयोजक भई सहयोग गर्नुपर्ने स्थानीयहरुको भनाई रहेको छ। आदेशको सफलताबाट सम्पुर्ण कटहरिया नगरवासीसँगै सिङ्गो रौतहटवासी नेपाली जनता गौरवान्वित हुनेछ कटहरिया ४ का वडा युवा अध्यक्ष चन्दन कुशवाहाले आफ्नो विचार राखेका छन्।
आदेश संयुक्त अरब इमिरेट्स (युएई) मा अप्रिल २४ देखि हुने एसियन यू-२० एथ्लेटिक्स च्याम्पियनसिपमा प्रतिस्पर्धा गर्न गएका छन्। त्यहाँ उनले १०० र २०० मिटर दौडमा भाग लिँदैछन् । ‘यो मेरो पहिलो अन्तर्राष्ट्रिय प्रतियोगिता हो । दुवै इभेन्टमा राम्रो गर्ने र जुनियरमा राष्ट्रिय कीर्तिमान बनाउने लक्ष्य छ’, उनले बताएका छन।
१४ औं राष्ट्रपति रनिङ शिल्डमा दौडन काठमाडौं आउनुअघि आदेशले भरतपुरमा भएको प्रथम अन्तरप्रदेश राष्ट्रिय खेलकुदमा पनि दुवै विधामा स्वर्ण जित्दै एथ्लेटिक्सतर्फ उत्कृष्ट खेलाडी बनेका थिए ।
कटहरिया नगरपालिका-१ का १७ वर्षीय आदेश कुमार यादव वीरगञ्जमा बसेर पढाईका साथै एथ्लेटिक्सको प्रशिक्षण पनि लिइरहेका छन्। बिरगंजमा उनी श्री नारायणसँग प्रशिक्षण लिइरहेका छन् । आदेशले खेललाई आफ्नो करिअर भन्दा पनि रुचीका रुपमा मात्र हेरेका छन् । खेल संगै भविष्यमा प्रहरी इन्सपेक्टर बन्ने सपना रहेको आदेशले बताएका छन।न्युज कारखाना
रौतहट १३ बैशाख। बाराको सिमावर्ती सिम्रौनगढ नगरपालिका अन्तर्गत चैते धान र मकै बालीमा पानी पटाउने क्रममा मोटर बाट करेन्ट लागेर एकजना युवकको मृत्यु भएको छ।
मृत्यु हुनेमा सिम्रौनगढ नगरपालिका १० देवापुर टेटा गाउँका २५ वर्षीय काशीराज यादव रहेको बारा प्रहरी प्रवक्ता डिएस्पी दधिराम न्यौपानेले बताएका छन।
बुधवार राती खेतमा मोटर बाट पानी पटाउने क्रममा करेन्ट लागेर गम्भीर घाईते भएका यादव लाई उपचारको लागि कलैया तर्फ लैजाने क्रममा बाटोमै मृत्यु भएको प्रवक्ता न्यौपानेले जानकारी दिएका छन।
मृतकको शव पोष्टमार्टमका लागि प्रादेशिक अस्पताल कलैयामा राखिएको तथा घटना बारे अनुसन्धान भईरहेको जिल्ला प्रहरी कार्यालय बाराले जनाएको छ।न्युज कारखाना
मुगु १२ बैशाख । हिमाली जिल्ला मुगुका दुई वटा स्थानीय तहका १८ बर्ष मुनिका शारीरिक समस्या भएका बालवालिकाहरुको अवस्था पहिचान तथा लेखाजोखा शिविर सम्पन्न भएको छ ।
युएम एन मुगु कलष्टरको आर्थिक सहयोग र ग्रामिण सामुदायिक संस्था, मुगुको साझेदारिमा संचालित समुदायमा आधारित एकीकृत बाल्यकाल अपाङ्गता व्यवस्थापन परियोजना बाट खत्याड गाउँपालिका र छायानाथ रारा नगरपालिकाका १८ वर्षमुनिका शारीरिक समस्या भएका बालबालिकाहरूको अवस्था पहिचान तथा लेखाजोखा शिबिर सम्पन्न भएको हो ।
शिबिरमा बिशेष गरेर शारिरिक अपाङ्गता भएका बालबालिकाको अवस्था पहिचान तथा लेखाजोखा गराई उनीहरुको स्वास्थ्य उपचारमा केही फड्को रहोस भन्ने हेतुले यो कार्यक्रमको आयोजना गरिएको युएमएन मुगुले जनाएको छ । यो शिविर सञ्चालन गरे पश्चात मुगुका आर्थिक अवस्था कमजोर भएका ब्यक्तिहरु लाई सहज भएको बताईएको छ । उक्त शिविरमा ८२ जना बालबालिकाको सहभागिता रहेको थियो । शिविरमा उनीहरूको समस्याहरूलाई पहिचान गर्ने, उपचार सम्भव भएका बालबालिकाहरुलाई उपचारको लागि छनौट गरी सुविधा सम्पन्न अस्पतालमा उपचारको लागि सिफारीस पनि गरेको बताएका छन् ।
शिबिरबाट केही जटिल खालका बिरामी परेका १५ जना बालवालिकाहरु लाई थप उपचारका लागि छनौट गरि काठमाण्डौका विभिन्न अस्पतालहरुमा पठाई निःशुल्क उपचार भई रहेको यु.एम.एन अपाङ्गता पुर्नस्थापना थापथलिका कार्यक्रम प्रबन्धक प्रेम देवेकोटाले बताए । जिल्लामा विभिन्न कारणले शारिरिक अपाङ्गता भई असहज जीवन विताई राखेका १८ बर्ष मुनिका बालबालिकाहरुलाई प्रति बर्ष ५० जनालाई यो स्वास्थ्य सेवा प्रदान गर्दे हाल सम्म चार सय जना भन्दा बढिको उपचार गरिसकेको युएमएन मुगु कलष्टरका टिम लिडर नेत्र बहादुर शाहीले जानकारी दिए ।
उक्त कार्यक्रममा अपाङ्ता परियोजना अधिकृत तुलाराम धमला, र ग्रामिण सामुदायिक संस्थाका परियोजना सुपरभाइजर कुसुम बूढाले विभिन्न क्रियाकलापमा सहजिकरण गर्नु भएको थियो ।
न्युज कारखाना
काठमाडौँ, १३ वैशाख । प्रमुख सत्ता घटक एमाले उपाध्यक्ष एवं पूर्वअर्थमन्त्री विष्णु पौडेलले वर्तमान पुष्पकमल दाहाल प्रचण्ड नेतृवको सरकारको स्थायित्वबारे राजनीतिक बजारमा चलाइएका हल्लाका पछि नलाग्न आग्रह गरेका छन् ।
अर्थमन्त्री वर्षमान पुनले बुधबार साँझ आगामी आर्थिक वर्ष ०८१र०८२ को बजेट निर्माणबारे पूर्वअर्थमन्त्रीहरुसँग सुझाव लिन पौडेलसँगै ७ पूर्वअर्थमन्त्रीलाई बानेश्वरस्थित एक होटलमा भेला गराएका थिए । अर्थमन्त्री पुनलाई कार्यान्वयन हुने खालको सानो आकारको बजेट ल्याउन भनेका पौडेलले राजनीतिक अस्थिरता चाहनेहरुले फैलाएको हल्ला निराधार रहेको बताए ।
उनले हल्लाहरुको बेवास्ता गर्दै बजेट निर्माणमा लाग्न अर्थमन्त्रीलाई सुझाव दिए । पौडेलले संसदमा कुनै दलको एकल बहुमत नहरेको भन्दै कसैले चाहँदैमा सरकार नढल्ने बताए । बजेट निर्माण गर्दै गरेको अर्थमन्त्रीलाई अस्थिरताको त्रास देखाएर तर्साउन खोज्ने विगतदेखिकै प्रवृत्ति भएको पौडेलले स्मरण गरे ।
‘सरकार अस्थिर छ भन्ने हल्ला चलाएर बजेट बनाउँदै गरेको अर्थमन्त्रीको मनोविज्ञानमा ‘देखा जाएगा’ भन्ने सोच उत्पन्न गराउन केही मानिसहरुले हल्ला चलाएर दबाब सिर्जना गर्ने प्रवृत्ति विगत देखि कै हो’, पौडेलले भने, ‘संसदमा कसैको पनि एकल बहुमत छैन । यो सरकार अस्थिर छ भन्ने खालको जसरी प्रचार भइरहेको छ । त्यो प्रचारबाट प्रभावित हुनुपर्ने कुनै कारण म देख्दिन । ढुक्क भएर बजेट निर्माणको काममा लाग्न अर्थमन्त्रीज्यूलाई मेरो आग्रह छ ।’
न्युज कारखाना
