प्रिमेश सिवाकोटी,चन्द्रपुर ,२९ गते असार ।
रौतहटको चन्द्रपुर नगरपालिका–२ स्थित जुडिबेलाका स्थानीय बासिन्दा जङ्गली हात्तीको बढ्दो आतङ्कका कारण त्रसित बनेका छन् । शनिबार राति पाँचवटा हात्तीको समूह गाउँमा पसेर चार वटा घर भत्काएपछि आक्रोशित स्थानीयले आइतबार डिभिजन वन कार्यालय रौतहटमा धर्ना दिँदै हात्ती नियन्त्रण गर्न माग गरेका छन् ।
पीडित गाउँलेले वन कार्यालयले हात्ती नियन्त्रणका लागि कुनै ठोस पहल नगरेको आरोप लगाउँदै कार्यालयको घेराउ गरेका हुन्। उनीहरूले हात्तीलाई नियन्त्रणमा लिई सुरक्षित स्थानमा सार्न र पीडित परिवारलाई तत्काल राहत उपलब्ध गराउन माग गरेका छन् ।
शनिबार रातिको घटनामा स्थानीय दिपा बल, दिलबहादुर राई, लाल बाबू मुक्तान र किरण बम्जनको घरमा हात्तीले क्षति पुर्याएको स्थानीय शंकर चौधरीले जानकारी दिए । उनका अनुसार हात्तीको समूह हरेक रात गाउँमा प्रवेश गरी घर र सम्पत्तिमा क्षति पुर्याउने गरेको छ ।
स्थानीय धनबहादुर पुलामीले भने, “रातभरि जाग्राम नगरेको भए मानवीय क्षति हुन सक्थ्यो। घर र बालबच्चा जोगाउन रातभर जाग्राम बस्न बाध्य छौं।”
अर्का स्थानीय राजु पाण्डेले वन कार्यालयको भूमिकालाई लक्षित गर्दै, “हात्ती नियन्त्रण गर्न नसक्नु वन प्रशासनको गैरजिम्मेवारीपनको पराकाष्ठा हो,” भन्दै आक्रोश व्यक्त गरे ।
डिभिजन वन कार्यालय रौतहटका प्रमुख हेमन्त प्रसाद साहले भने, हात्ती नियन्त्रणका लागि निकुञ्ज तथा सम्बन्धित निकायहरूसँग समन्वय भइरहेको जानकारी दिए ।
तर स्थानीयको माग अझ स्पष्ट छ— हात्ती नियन्त्रणका लागि तत्काल कदम चालियोस्, पीडितलाई राहत दिइयोस्, र दीर्घकालीन समाधानका लागि प्रभावकारी रणनीति निर्माण गरियोस् ।
जंगलसँग टाँसिएको जुडिबेलामा वर्षौंदेखि जङ्गली हात्तीको जोखिम रहँदै आए पनि पछिल्ला दिनहरूमा हात्तीको गतिविधि र आक्रमण बढ्दो क्रममा छ। यसले गाउँमा भयावह अवस्था सिर्जना गरेको छ ।
सुरक्षा चुनौती, वन प्रशासनको निष्क्रियता र प्रभावकारी समाधानको अभावबीच जुडिबेलावासीको आक्रोश र पीडा दिन प्रतिदिन चुलिँदै गएको छ ।
बज्जिकाञ्चल संवाददाता,रौतहट,२९ गते असार ।
रौतहट जिल्लाको गरुडा नगरपालिका–९ स्थित श्री माध्यमिक विद्यालय, श्रीपुर नयाँ गम्हरियामा अध्ययनरत कक्षा १० की एक छात्रालाई आपत्तिजनक सन्देश पठाएको आरोपमा सोही विद्यालयका शिक्षक रवीन्द्र प्रसाद साहलाई स्थानीय अभिभावक र विद्यार्थीहरूले कुटपिट गरेका छन् ।
आरोपअनुसार शिक्षक साहले १७ वर्षीया छात्रालाई फेसबुक म्यासेन्जरमार्फत “हैपी बर्थ डे, आई लभ यु मेरी जान” भन्ने सन्देश पठाएका थिए। सन्देशको विषयमा जानकारी पाउनेबित्तिकै आक्रोशित अभिभावक र विद्यार्थीहरूको भीड आइतबार बिहान विद्यालय परिसरमै पुगेर शिक्षक साहलाई कुटपिटमा उत्रिएको थियो ।
घटनाको क्रममा भीडले विद्यालय परिसरमा तोडफोड गर्दै पार्किङमा राखिएका केही मोटरसाइकलमा समेत क्षति पुर्याएको इलाका प्रहरी कार्यालय गरुडाका प्रहरी नायब उपरीक्षक (डीएसपी) राजन कार्कीले जानकारी दिए ।
घटनापछि स्थिति तनावग्रस्त बनेको थियो । अवस्था नियन्त्रणमा लिन प्रहरी निरीक्षक ओमप्रकाश यादवको नेतृत्वमा खटिएको टोलीले एक राउन्ड अश्रुग्यास प्रयोग गरी भीड तितरबितर पारेको थियो ।
डीएसपी कार्कीका अनुसार शिक्षक साह हाल प्रहरी नियन्त्रणमा छन् र घटनाबारे अनुसन्धान भइरहेको छ। “यदि पीडित पक्षबाट जाहेरी दिइयो भने कानुनी प्रक्रिया अघि बढाइनेछ,” उनले भने ।
यता, केही स्थानीय व्यक्तिहरू घटनालाई आपसी छलफलमार्फत मिलाउने प्रयासमा लागेका छन्। तर प्रहरीले भने कानुनी प्रक्रियाअनुसार जाहेरीकै आधारमा मुद्दा अघि बढाउने स्पष्ट पारेको छ ।
यस घटनाले विद्यालय जस्तो संवेदनशील शिक्षण संस्थामा नैतिकता र विद्यार्थी-सुरक्षाको विषयमा गम्भीर प्रश्न उठाएको छ। अभिभावकहरूले यस्ता गतिविधि दोहोरिन नदिन दोषीमाथि कडा कारबाहीको माग गरेका छन् ।
आरके श्रीवास्तव,राैतहट,२८ गते असार ।
रौतहटकाे कटहरियामा आजदेखि टि–१० क्रिकेट प्रतियोगिता सुरु भएको छ । बाैधीमाई क्रिकेट क्लब कटहरियाकाे आयाेजना र कटहरिया वडा नम्बर ४ काे सहयोगमा प्रतियोगिताकाे दाेस्राे सिजन सुरू भएको छ । पाँच दिनसम्म चल्ने प्रतियोगितामा कटहरिया नगरका टिमहरूसँगै अन्य पालिकाका १८ वटा टिमहरूको सहभागिता रहेको छ ।
प्रतियोगिताको उद्घाटन खेल बलुवा र बहादुरपुरबीच सम्पन्न भयो, जसमा टस जित्दै बहादुरपुरले ब्याटिङ रोजेको थियो । प्रतियोगिताको उद्घाटन सत्रलाई ईप्रका कटहरियाका ईन्चार्ज विनोद राना मगर तथा स्थानीय जनप्रतिनिधिहरूले सम्बोधन गरेका थिए ।
कटहरिया–४ का वडा अध्यक्ष चन्दन कुशवाहाले उद्घाटन समारोहमा बोल्दै कटहरियामा पछिल्लो ५० वर्षदेखि क्रिकेटको इतिहास रहेको बताउँदै त्यसको परिणामस्वरूप रोहित सोनल जस्ता प्रतिभाशाली खेलाडीहरू जन्मिएको बताए । उनले ‘मिसन ८४’ अन्तर्गत टोल ग्राउन्डको स्थापना गर्ने लक्ष्य रहेको जानकारी दिँदै, सीमित बजेट (२० लाख) मै शिक्षा, खेलकुद र प्रतिभा विकासमा काम गरिएको बताए ।
“एसईईमा ए प्लस ल्याउने विद्यार्थीलाई सम्मान गरेका छौं, वादविवाद तथा वक्तृत्वकला प्रतियोगिता आयोजना गरेका छौं,” कुशवाहाले भने, “खेलकुद सामग्री वितरणदेखि लिएर क्रिकेट प्रतियोगिता हुँदै आएको छ।”
त्यस्तै, वडा नं. ३ का अध्यक्ष श्यामाकान्त यादवले युवाका लागि खेलकुद अपरिहार्य भएकोले आफू सधैं सहयोग गर्न तयार रहेको बताए । वडा सदस्य रामईश्वर यादवले खेलाडीहरूलाई खेलकुद सम्बन्धी समस्या नडराई साझा गर्न सुझाव दिएका थिए । वडा सदस्य दिलीप साहले वडा अध्यक्ष कुशवाहा स्वयं खेलाडी भएकाले कटहरियामा क्रिकेटको विकासका लागि अहोरात्र लागिपरेको बताए ।
कार्यक्रममा गायक सोनु कुशवाहाले “हमर चन्दन भईया कटहरियाके शान हबे, जनताके जान हबे” बोलको गीत गाएर माहोल उत्साही बनाएका थिए । उनले अध्यक्ष कुशवाहाको सोचमा सबै कटहरियावासीको साथ रहने विश्वास व्यक्त गरेका थिए ।
ईप्रका कटहरियाका ईन्चार्ज विनोद राना मगरले पनि खेलकुद स्वास्थ्य र अनुशासनका लागि अत्यावश्यक भएको बताउँदै युवालाई खेलमा लाग्न प्रेरित गरेका थिए ।
प्रतियोगिता आगामी पाँच दिनसम्म कटहरियाको विभिन्न टोल–टोलमा सम्पन्न हुने आयोजकले जनाएको छ ।
आरके श्रीवास्तव,राैतहट,२३ गते असार ।
रौतहटकाे गरुडा नगरपालिकाले स्वास्थ्य सेवा सुदृढीकरणको अभियानलाई तिव्रता दिँदै महम्मदपुर स्वास्थ्य चौकीमा १० वेडको अस्पताल निर्माणका लागि आवश्यक १ कठ्ठा जग्गा खरिद गरेको छ ।
यस प्रयोजनका लागि नगरपालिकाले आज रु. २२,५६,२५० (बाइस लाख छपन्न हजार दुई सय पचास) को चेक हस्तान्तरण गरेको छ । स्वास्थ्य पूर्वाधार विस्तारका लागि गरिएको यो लगानी गरुडा नगरपालिकाको जनस्वास्थ्यप्रति बढ्दो प्रतिबद्धताको प्रतिविम्ब हो ।
नगर प्रमुख कन्थमनी जयसवालले भने, “जनताको स्वास्थ्य सुरक्षामा नगरपालिकाको प्रतिबद्धता अझ मजबुत बनाउँदैछौं । आधारभूत सेवा–सुविधाबाट कसैलाई वञ्चित हुन दिन्नौं।”
महम्मदपुरमा अस्पतालको निर्माण भएपछि आसपासका बासिन्दाहरूले प्राथमिक स्वास्थ्य उपचार सहजै प्राप्त गर्न सक्ने अपेक्षा गरिएको छ । नगरपालिकाले भविष्यमा थप स्वास्थ्य सेवा विस्तारका योजनाहरू पनि अघि बढाइरहेको जनाएको छ ।
सागर संगम ठाकुर, रौतहट, असार २३ गते
रौतहट जिल्लाको देवाही गोनाही नगरपालिका–९ धरहरीमा वडा अध्यक्ष वीरबहादुर साहले धार्मिक गतिविधि तथा युवाहरूको खेलकुदप्रतिको उत्साहलाई सम्मान गर्दै विविध सामग्रीहरू वितरण गरेका छन् ।
सोमबार आफ्नो निजी निवासमा आयोजित एक कार्यक्रमका बीच वडा अध्यक्ष साहले ब्रह्मबाबा राम जानकी मठका पुजारी उपेन्द्र साहलाई धार्मिक कार्यक्रम सञ्चालनमा सहजता ल्याउने उद्देश्यले साउण्ड सिस्टम हस्तान्तरण गरेका हुन् । साथै, स्थानीय युवाहरुलाई क्रिकेट खेलका लागि आवश्यक खेलकुद सामग्रीसमेत प्रदान गरिएको छ ।
कार्यक्रममा बोल्दै अध्यक्ष साहले समाजको समुचित विकासका लागि धार्मिक र सांस्कृतिक सम्पदाको संरक्षण तथा युवाको शारीरिक र मानसिक विकास दुवै महत्वपूर्ण रहेको बताए । “सबैको भावना र आवश्यकतालाई ध्यानमा राख्दै यो सामग्री वितरण गरिएको हो,” अध्यक्ष साहले बताए ।
वडा अध्यक्ष साहको यो पहललाई स्थानीयवासीहरूले सकारात्मक रुपमा लिँदै प्रशंसा गरेका छन् । धार्मिक सद्भाव र युवाको मार्गदर्शनमा उनले देखाएको सक्रियतालाई स्थानीयले अनुकरणीय भनेका छन्। साह वडा अध्यक्षमा निर्वाचित भएयता जनमुखी कार्यहरूमा निरन्तर सक्रिय रहँदै आएका छन् ।
अर्थिक वर्ष २०८१/८२ मा वडा स्तरीय योजनाअन्तर्गत करिब ३२ लाख रुपैयाँको लागतमा टोलटोलमा नाला निर्माण, सडक ढलान र ग्राभेलको काम सम्पन्न गरिएको वडा कार्यालयले जनाएको छ ।
विभिन्न समयमा वडाबासीलाई प्रदान गरिएका सेवा तथा सहयोगले समाजमा मेलमिलाप र धार्मिक सहिष्णुता प्रवर्द्धन हुने अपेक्षा गरिएको छ। साथै, खेलकुदमार्फत युवालाई गलत मार्गतर्फ जानबाट रोक्न र उनीहरूलाई सकारात्मक दिशामा अघि बढाउन मद्दत पुग्ने विश्वास व्यक्त गरिएको छ ।
आरके श्रीवास्तव,राैतहट,२२ गते असार ।
लोकतान्त्रिक पत्रकार संघको संशोधित विधानअनुसार सनोज कुमार यादवलाई मधेश प्रदेश अन्तर्गत धनुषा जिल्ला संयोजक पदमा मनोनयन गरिएको छ ।
संघका अध्यक्ष कामरेन्द्र वर्माले एक मनाेनयन पत्र जारी गर्दै यादवलाई मनोनयन गरिएको जानकारी गराएका हुन् । सन्देशमा उनले देश, मधेश, पत्रकारिता क्षेत्र र पार्टीको हितमा यादवको कार्यकाल उल्लेखनीय रहने विश्वास व्यक्त गर्दै हार्दिक बधाई तथा शुभकामना दिएका छन् ।
नवनियुक्त संयोजक यादव विगत ५ वर्ष देखि नै पत्रकारिता क्षेत्रमा सक्रिय रहँदै आएका छन् । उनको मनोनयनसँगै धनुषा जिल्लामा लोकतान्त्रिक पत्रकार संघको संगठनात्मक सुदृढीकरणमा थप गति मिल्ने अपेक्षा गरिएको छ ।
हाल वहाँ एवन न्यूजमा कार्यरत हुनु हुन्छ । याे सँगै मधेस प्रदेशकाे आठ वटै जिल्लामा जिल्ला संयाेजक मनाेनय गर्ने काम सकिएको छ । अब जिल्ला कमिटी विस्तार गर्न अध्यक्ष वर्माले जिल्ला अध्यक्षहरूलाई निर्देशन दिनु भएको छ ।
आरके श्रीवास्तव,रौतहट,१९ गते असार ।
गरुडा – सुनौलो हजार दिनका विपन्न महिलाहरूको पोषण अवस्था सुधार्न आय आर्जनसम्बन्धी जनचेतनामूलक तालिमको उद्घाटन सत्र आज गरुडामा सम्पन्न भएको छ। श्री राम सोगारथ शर्मा, अध्यक्ष, सृजनात्मक समाज कल्याण केन्द्र नेपालको अध्यक्षतामा भएको यस कार्यक्रमले महिलाहरूलाई आत्मनिर्भर बनाउँदै पोषणमा सुधार ल्याउने लक्ष्य राखेको छ।
उक्त तालिमको उद्घाटन गरुडा नगरपालिकाका नगर प्रमुख श्री कन्थमनि प्रसाद कलवारले गर्नुभयो। प्रमुख अतिथि कलवारले ब्यानर पढेर विधिवत् रूपमा तालिमको सुरुवात गर्नुभयो। यस तालिममा १५० जना महिला सहभागी छन्।
कार्यक्रममा विशिष्ट अतिथिका रूपमा श्री माध्यमिक विद्यालय गेडही गुठीका प्रधानाध्यापक श्री मौजेलाल साह, स्वास्थ्य चौकी गेडही गुठीका प्रमुख रामपुकार यादव, गरुडा नगरपालिकाको पञ्जीकरण शाखा प्रमुख श्री मुकेश कुमार साह र गरुडा नगरपालिका वडा नं. २ का वडा सचिव श्री रुपनारायण महतोको उपस्थिति थियो।
यो तालिमले विपन्न महिलाहरूको जीवनस्तर उकास्न र पोषणमा सुधार ल्याउन महत्वपूर्ण भूमिका खेल्ने अपेक्षा गरिएको छ।
आरके श्रीवास्तव,रौतहट,१९ गते असार ।
राैतहटकाे फतुवा बिजयपुर नगरपालिका–२ सितलपुरका कृषकहरूले अब सहज रूपमा सिंचाइ सुविधा पाउने भएका छन् । वडास्तरीय बजेट अन्तर्गत कृषकहरूको सुविधाका लागि कृषि पोल गाडिएको हो ।
वडा अध्यक्ष अनिरुद्ध प्रसाद यादव (उर्फ संजय) ले आफ्नो वडास्तरीय रु १० लाखको बजेटबाट सो कार्य सम्पन्न गराएको जानकारी दिएका छन् । प्रमुख प्रशासकीय अधिकृत भरत यादवमार्फत सो बजेटको जानकारी प्राप्त भएको तीन दिनभित्र नै काम सम्पन्न गरिएको अध्यक्ष यादवले बताए ।
“कृषकहरूलाई खेतमा सिंचाइका लागि वर्षौंदेखि समस्या थियो । हामीले तत्काल प्राथमिकता दिएर पोल गाड्ने काम सम्पन्न गरेका छौं,” अध्यक्ष यादवले भने ।
स्थानीय कृषकहरूले सिंचाइका लागि अब सहज हुने विश्वास व्यक्त गर्दै अध्यक्ष यादव र नगरपालिकालाई धन्यवाद ज्ञापन गरेका छन् । उनीहरू यो कार्यबाट निकै उत्साहित छन् । किसान गिरिजा पटेलले भने, “हामी वर्षौंदेखि सिंचाइको समस्याले हैरान थियौँ। अहिले पोल गाडिएपछि मोटर जडान गर्न सहज हुने देखिन्छ।”
त्यस्तै अर्का किसान देवनाथ यादवले भने, “सिँचाइ सजिलो भएपछि खेती प्रणालीमा परिवर्तन आउने छ, उत्पादन पनि बढ्नेछ। यो सानो लगानीले ठूलो राहत दिने काम भएको छ।”
शंकर यादवले पनि वडा कार्यालय र अध्यक्षप्रति आभार प्रकट गर्दै भने, “हामी किसानका आवाज सुनेर तत्कालै काम गरिदिनु भएकोमा धन्यवाद दिन चाहन्छौँ। यसले हाम्रो हौसला बढाएको छ।”
कृषि उत्पादन वृद्धि गर्नका लागि सिँचाइ पूर्वाधार मजबुत बनाउनु आवश्यक रहेको भन्दै स्थानीयवासीहरूले यस्ता कार्यक्रमलाई निरन्तरता दिनुपर्ने माग गरेका छन् ।
आरके श्रीवास्तव,राैतहट,१८ गते असार ।
राैतहटकाे देवाही गोनाही नगरपालिका र मानव कल्याण केन्द्र, देवाही गोनाही–८ को संयुक्त आयोजनामा दलित सशक्तीकरण सम्बन्धी जनचेतनामूलक कार्यक्रम भएको छ । कार्यक्रम देवाही गोनाहीस्थित मधेस संग्रहालयमा बुधबारदेखि सुरू गरिएको हो ।
उक्त कार्यक्रमको उद्घाटन देवाही गोनाही–९ का वडा अध्यक्ष बिरबहादुर साहले गर्नुभएको थियो । कार्यक्रमका प्रमुख प्रशिक्षक उषा साहि र रामबिर यादवले सहभागीहरूलाई दलित सशक्तीकरण, अधिकारबारे सचेतना र सामाजिक समावेशीताका विषयमा प्रशिक्षण दिनुभएको थियो ।
कार्यक्रममा दर्जनौँ महिला सहभागिहरूको उत्साहजनक उपस्थिति रहेको आयोजक संस्था मानव कल्याण केन्द्रका प्रतिनिधि कामेश्वर बैठाले जानकारी दिनुभयो ।
कार्यक्रममा बोल्दै सुरेन्द्र पासवानले दलित समुदायको सशक्तीकरणका लागि निरन्तर प्रयास आवश्यक रहेको धारणा राख्नुभएको थियो ।
सो अवसरमा मो. मनिरूदिन फहमी, राकेश साह तेली, रामनारायण पण्डित,पत्रकार लगायत विभिन्न सामाजिक अभियन्ताहरूको पनि उपस्थिति रहेको थियो ।
दलित समुदायको सशक्तीकरण र समान अधिकारको सुनिश्चितताका लागि यस्ता कार्यक्रमहरू प्रभावकारी हुने विश्वास व्यक्त गरिएको छ ।
आरके श्रीवास्तव,राैतहट,१५ गते असार ।
राैतहटकाे बौधीमाई नगरपालिकाले समाजिक उत्तरदायित्व अन्तर्गत अगाडि सारेको ‘२० वर्षपारी विवाह वारी’ कार्यक्रम आज नगरसभाहलमा विशेष समारोहका साथ सम्पन्न भएको छ । कार्यक्रममा नगर भित्रका ७७ जना लाभग्राहीहरूलाई आर्थिक सहायता स्वरूप चेक वितरण गरिएको हो ।
नगर प्रमुख प्रदीप कुमार यादवको अध्यक्षतामा सम्पन्न कार्यक्रममा प्रत्येक लाभग्राहीलाई २० हजार रुपैयाँका दरले चेक हस्तान्तरण गरिएको थियो। यस योजनाअन्तर्गत कुल १५ लाख ४० हजार रुपैयाँ वितरण गरिएको वडा नम्बर ४ का अध्यक्ष तुरन्त नारायण यादवले जानकारी दिए ।
उक्त समारोहमा नगर प्रमुख यादव प्रमुख अतिथिका रूपमा सहभागी थिए भने उपप्रमुख प्रमिला देवी जयसवाल विशिष्ट अतिथिको रूपमा उपस्थित थिइन्। प्रमुख प्रशासकीय अधिकृत उदय शंकर चौधरीसहित अन्य वडाध्यक्षहरूको पनि उल्लेखनीय उपस्थिति रहेको कार्यक्रममा वडा नम्बर ९ का अध्यक्ष मुक्ति नारायण मिश्रा, वडा नम्बर ५ का अध्यक्ष लक्ष्मीनारायण राय यादव लगायत जनप्रतिनिधिहरूको सक्रिय सहभागिता देखिएको थियो।
नगरपालिकाका कर्मचारीहरूको उल्लेखनीय उपस्थितिसँगै कार्यक्रमले समावेशी विकास, महिलाको सशक्तिकरण तथा सामाजिक स्थायित्वमा सकारात्मक सन्देश दिएको छ। नगरपालिकाले महिला अधिकार, ढिलो विवाहको प्रोत्साहन र समाजिक सशक्तिकरणका लागि यस्ता कार्यक्रमलाई निरन्तरता दिने प्रतिबद्धता जनाएको छ।
स्थानीय तहबाट सञ्चालित यस्ता योजनाहरूले दीर्घकालीन सामाजिक परिवर्तनमा टेवा पुर्याउने विश्वास नगर प्रमुख यादवले व्यक्त गरेका छन् ।
