आरके श्रीवास्तव,राैतहट,०९ गते साउन ।
रौतहटकाे गरुडा नगरपालिकाले आर्थिक वर्ष २०८१/८२ अन्तर्गत सञ्चालन गरेको कृषि, पशु तथा डेरी यान्त्रीकरण कार्यक्रम सफलतापूर्वक सम्पन्न गरेको छ । कार्यक्रममार्फत वडा नं. १ देखि ९ सम्मका किसानहरूलाई ५० प्रतिशत अनुदानमा १४० वटा भैँसी, विद्युत मोटर, पम्पसेट, मिल्क्यान, चिलिङ भ्याट, डिफ्रिज, मिल्क पम्प, मिल सेपरेटर लगायतका सामग्री वितरण गरिएको हो ।
साथै, कुखुराको खोर, पोखरी, कोल्ड स्टोर, एग्रोमार्ट र बजार सेड निर्माण कार्य पनि अगाडि बढाइएको नगरप्रमुख कन्थमनी जयसवालले जानकारी दिए । कार्यक्रमले कृषकहरूको आय वृद्धि, आत्मनिर्भरता र व्यावसायिकता अभिवृद्धिमा टेवा पुग्ने अपेक्षा गरिएको छ ।
सागर संगम ठाकुर, रौतहट,०८ गते साउन ।
रौतहटकाे देवाही गोनाही नगरपालिकामा बालविवाह अन्त्य गर्नका लागि २१ सदस्यीय युवा संजाल समिति गठन गरिएको छ।
राष्ट्रिय तथा अन्तर्राष्ट्रिय स्तरमा महिला र पुरुषहरूको नेतृत्वमा रहेका संस्था संग अावद्व किशोर किशोरी तथा युवाहरुकाे संजाललाई हानिकारक लैङ्गिक समाजिक मान्यताहरुकाे चुनौती दिन युवा संजाल गठन तथा परिचालन गर्ने उदेश्यका साथ आशमान नेपालको आयोजना र संयुक्त राष्ट्र जनसंख्या कोष (UNFPA) को आर्थिक सहयोगमा गठन गरिएको सो समिति बिहीबार नगरपालिकाको सभा हलमा आयोजित कार्यक्रममा घोषणा गरिएको हो।
कार्यक्रममा पालिकाका निमित्त प्रमुख प्रशासकीय अधिकृत बिरेन्द्र प्रसाद चन्द्रवंशीको अध्यक्षतामा युवाहरूको सक्रिय सहभागितासहित प्रत्येक वडामा युवा संजाल गठन गर्ने निर्णय पनि गरिएको छ। कार्यक्रमका प्रमुख प्रशिक्षकका रूपमा आशमान नेपाल रौतहटका प्रोग्राम म्यानेजर उर्वशी साहले बालविवाहको प्रभाव, रोकथामका उपाय र युवाहरूको भूमिका विषयमा प्रशिक्षण दिइन्। महिला तथा बालबालिका शाखाका प्रमुख रामनारायण पण्डितले कार्यक्रमको सहजीकरण गरेका थिए। कार्यक्रममा नगरपालिकाका सबै वडाबाट महिला र पुरुष युवाहरूको सहभागिता रहेको थियो। आयोजक संस्थाका अनुसार, संजालले समुदायस्तरमै सचेतना अभिवृद्धि गर्ने, बालविवाहको जोखिम रहेका केसहरू पहिचान गर्ने र पालिकासँग समन्वयमा समस्या समाधान गर्ने कार्यमा सहयोग पुर्याउनेछ। साे प्रशिक्षणबाट गौतम पासवानकाे अध्यक्षतामा २१ सदस्य प्रगतिशील युवा संजाल समिति गठन गरिएको प्रशिक्षक साहले जानकारी दिईन । समितिका उपाध्यक्ष शनि कुमारी यादव काेषाअध्यक्ष मनिषा राम सचिव महम्द नजिम र सदस्यहरुमा सिमा यादव,धिरज पासवान,शान्ताेष साह,प्रिति पटेल, सुरज पटेल,उषा कुमारी लगाएत अन्य महिला तथा पुरुष सदस्यहरु रहेकाे छ।
बज्जिकाञ्चल संवाददाता,राैतहट,०८ गते साउन ।
रौतहटकाे गरुडा नगरपालिकामा आज “बाल श्रम मुक्त स्थानीय तह घोषणा तथा कार्यान्वयन कार्यविधि २०८२” को प्रमाणिकरण कार्यक्रम सफलतापूर्वक सम्पन्न भएको छ । नगर प्रमुख कन्थमनी जयसवालले कार्यक्रमको अध्यक्षता गर्दै बाल अधिकारको संरक्षण तथा प्रवर्द्धनमा नगरपालिकाको प्रतिबद्धता दोहोर्याउनुभयो ।
कार्यक्रमको मूल उद्देश्य बालबालिकालाई कुनै पनि खालको श्रमबाट मुक्त राखी उनीहरूलाई शिक्षा, स्वास्थ्य, सुरक्षा र सम्मान सहितको जीवन सुनिश्चित गर्नु रहेको बताइएको छ ।
नगर प्रमुख जयसवालले भन्नुभयो, “यस कार्यविधिले बाल अधिकार संरक्षणमा सहजीकरण गर्नेछ र बालमैत्री समाज निर्माणमा टेवा पुर्याउनेछ। यस्ता पहलहरूले हाम्रो नगरलाई न्यायपूर्ण, समावेशी र समृद्ध भविष्यतर्फ अघि बढाउने आधार तयार पार्नेछन् ।”
कार्यक्रममा स्थानीय जनप्रतिनिधिहरू, सामाजिक संघसंस्था, बाल क्लबका प्रतिनिधिहरू, विद्यालयका शिक्षक, अभिभावकहरूको उपस्थिति रहेको थियो।
गरुडा नगरपालिका विगतदेखि नै बाल अधिकारका पक्षमा सक्रिय रहँदै आएको छ र भविष्यमा पनि बालमैत्री नीतिहरू कार्यान्वयन गर्दै लैजाने प्रतिबद्धता जनाएको छ ।
बज्जिकाञ्चल संवाददाता,राैतहट,०८ गते साउन ।
खानेपानी अभावका कारण जीवन संकटमा परेको रौतहट जिल्लाका विभिन्न बस्तीमा समाधानको पहल सांसद किरण साहले सुरु गरेका छन् । जनप्रतिनिधिको हैसियतले पानीलाई पहिलो प्राथमिकता बनाउँदै सांसद साहले खानेपानी मन्त्री प्रदीप यादवसँग विशेष भेटवार्ता गरी ६ करोड रुपैयाँ बराबरको खानेपानी योजना अघि बढाएका छन् ।
मन्त्री यादवले सो योजना प्रभावित वडाहरूमा समानुपातिक रूपमा वितरण गर्ने सहमति जनाउनुका साथै २–४ दिनभित्र स्थलगत अवलोकन गर्ने र तत्काल कार्यान्वयन सुरु गर्ने प्रतिबद्धता जनाएका छन् ।
प्रमुख प्रभावित क्षेत्रहरूमा मौलापुर–६, ७,देवाही गोनाही–१, २, ३, ४,बौधिमाईका सबै वडाहरू; परोहाका अधिकांश बस्तीहरू; राजपुर र इशनाथ नगरपालिकाका पानी अभावग्रस्त वडाहरू पर्छन् ।
सांसद साहले समरसिबल बोरिङमार्फत शीघ्र र दीगो समाधानका लागि प्राविधिक अध्ययनको तयारी गरिरहेको र स्थान छनोट तथा प्राथमिकता सूची संकलनमा स्थानीयको सक्रिय सहभागिता आह्वान गरेका छन् ।
“पानी अब सपना होइन, हक हो” भन्ने नाराका साथ यो अभियानलाई सबै तहका सरकार र जनप्रतिनिधिसँग समन्वय गर्दै जन–जनको घरदैलोमा पुर्याइने जनाइएको छ ।
श्रीकान्त यादव,रौतहट, ८ गते साउन ।
गौर पिपरा सडक खण्डको बडहर्वा चौक नजिकै आज एक सवारी दुर्घटना हुँदा एक जना मोटरसाइकल चालक घाइते भएका छन् ।
बिहान करिब १० बजे बिएई ५२९३ नम्बरको स्कार्पियोले बिआर ३० क्यू ५१८३ नम्बरको मोटरसाइकललाई ठक्कर दिँदा दुर्गा भगवती गाउँपालिका–३ निवासी रणधीर झा घाइते भएका हुन् ।
घाइते झालाई तत्काल उद्धार गरी गौर अस्पतालमा उपचारका लागि लगिएको प्रहरीले जनाएको छ । उनको अवस्था मध्यम रहेको र आवश्यक उपचार भइरहेको अस्पताल स्रोतले जनाएको छ।
दुर्घटनामा संलग्न स्कार्पियो गाडी र चालकलाई प्रहरीले नियन्त्रणमा लिएको छ । घटनाबारे थप अनुसन्धान भइरहेको प्रहरीले जानकारी दिएको छ ।
काठमाडौं,०८ गते साउन ।
रौतहट जिल्लाको गुजरा नगरपालिका–४, कनकपुरका २१ वर्षीय युवा सामाजिक अभियन्ता अब्दुल सलाम राष्ट्रिय युवा संसद २०८२ मा रौतहट क्षेत्र नं. ३ बाट विजयी भएका छन् । समाज रूपान्तरणका लागि समर्पित उनको निरन्तर संघर्षले राष्ट्रिय स्तरमा नयाँ सफलता हासिल गरेको छ ।
राजधानी काठमाडौंस्थित राष्ट्रिय सभागृहमा बिहीबार आयोजित एक भव्य समारोहमा उनले राष्ट्रिय युवा सांसदको रूपमा सपथ ग्रहण गरे । सयौं प्रतिस्पर्धीलाई पछि पार्दै राष्ट्रिय प्रतिनिधित्व गर्न सफल भएका सलामले बालअधिकार, शिक्षा, स्वास्थ्य, लैंगिक समानता, महिला सशक्तीकरण, युवा नेतृत्व सशक्तीकरण तथा रोजगारका क्षेत्रमा सक्रिय रहँदै आएका छन् ।
विसं २०७५ देखि सामाजिक अभियानमार्फत युवाहरूलाई शिक्षित, सशक्त र जागरूक बनाउने कार्यमा समर्पित सलामले नेतृत्व गरेका विविध कार्यक्रम र अभियानले दर्जनौं युवामा सकारात्मक सोच र परिवर्तनको भावना जगाएको छ ।
उनको काम केवल स्थानीय सीमामा सीमित नभई राष्ट्रिय तथा अन्तर्राष्ट्रिय युवा सम्मेलन, मंच र प्रशिक्षणहरूमा सहभागी हुँदै उनले आफूलाई एक प्रेरक युवा नेतृत्वको रूपमा स्थापित गरिसकेका छन् ।
सपथपछि सञ्चारकर्मीसँग कुरा गर्दै सलामले भने,
“यो जित मेरो मात्र होइन, रौतहटका सम्पूर्ण युवाको जित हो । युवा संसद कार्यक्रममार्फत म भावी नेतृत्व विकास र नीति निर्माण प्रक्रियामा युवाहरूको सक्रिय सहभागिता सुनिश्चित गर्नेछु। साथै युवाको आवाज राज्यसम्म पुर्याउने छु।”
उनले समावेशी नीति निर्माण, गुणस्तरीय शिक्षा, तथा रोजगारीको अवसर सृजनामा विशेष पहल गर्ने प्रतिबद्धता पनि व्यक्त गरे ।
सलामको यस उपलब्धिलाई लिएर रौतहटको गुजरा नगरपालिका, विभिन्न युवा संघसंस्था, सामाजिक अभियन्ता तथा स्थानीयवासीहरूले सामाजिक सञ्जालमार्फत शुभकामना व्यक्त गरेका छन्।
अब्दुल सलामको यो सफलता न केवल उनको व्यक्तिगत क्षमताको प्रमाण हो, यो सम्पूर्ण युवा पुस्ताको प्रतिबद्धता, ऊर्जा र परिवर्तनको सम्भावनाको विजय हो ।
उनको यो यात्रा आजको युवापुस्ताका लागि प्रेरणाको स्रोत बनेको छ ।
बज्जिकाञ्चल संवाददाता,राैतहट,०८ गते साउन ।
राैतहटकाे मौलापुर नगरपालिकाका कार्यपालिका सदस्य तथा प्रवक्ता चन्देश्वर बैठाको आज करेन्ट लागेर निधन भएको छ । बैठाको निधनले स्थानीय तहका जनप्रतिनिधि, शुभचिन्तक र नगरवासीहरू शोकमा डुबेका छन् ।
आम जनता पार्टी (आजपा) का अध्यक्ष तथा रौतहट क्षेत्र नं. ३ का सांसद प्रभु साहले सामाजिक सञ्जालमार्फत शोक व्यक्त गर्दै विद्युत प्राधिकरणको लापरवाहीका कारण यो दुर्घटना भएको बताएका छन् । उनले दोषीमाथि कानुनी कारबाही हुनु पर्ने र पीडित परिवारलाई उचित क्षतिपूर्ति दिनुपर्ने माग समेत गरेका छन् ।
“मौलापुर नगरपालिकाको प्रवक्ता एवं मेरो प्रिय मित्र चन्देश्वर बैठाको आज करेण्ट लागेर भएको दुःखद निधनको खबरले मर्माहत भएको छु,” सांसद साहले लेखेका छन्।
“विद्युत प्राधिकरणको लापरवाहीले भएको यस दुःखद घटनाको दोषीलाई कानुन बमोजिम कारबाही सहित पीड़ित परिवारलाई उचित क्षतिपूर्तिको माग गर्दछु । साथै मृतकप्रति भावपुर्ण श्रद्धांजलि एवं शोकाकुल परिवारजनमा गहिरो संवेदना व्यक्त गर्दछु।”
यस्तै, मृतकप्रति श्रद्धाञ्जली अर्पण गर्दै नगरपालिकामा शोकको वातावरण छ ।
चन्देश्वर बैठा मौलापुर नगरपालिकामा जनप्रतिनिधिको भूमिकामा सक्रिय थिए र जनसमस्या समाधानमा अग्रसर व्यक्तित्वका रूपमा चिनिन्थे ।
बज्जिकाञ्चल संवाददाता,राैतहट,०८ गते साउन ।
नेपाल पत्रकार महासंघ एसोसिएट प्रदेश समितिले रौतहट न्यूजका पत्रकार राजकुमार यादवमाथि साउन ५ गते भएको सशस्त्र आक्रमणप्रति गम्भीर ध्यानाकर्षण जनाउँदै कडा निन्दा गरेको छ । पूर्वमन्त्री प्रभु साहका छोरा विवेक साह संलग्न रहेको आरोप लगाइएको विज्ञप्तिमा घटनाले स्वतन्त्र पत्रकारितामाथि प्रहार भएको भन्दै दोषीलाई कडा कारबाहीको माग गरिएको छ ।
यस्तै पत्रकार यादवमाथिको कुटपिट घटनाप्रति श्रमजीवी पत्रकार संघ, रौतहटले गम्भीर आपत्ति जनाउँदै घटनालाई पत्रकारिता माथिको आक्रमण भनेको छ । संघले विवेक साहसहित चारजनामाथि आक्रमणको आरोप लगाउँदै पत्रकारको स्वास्थ्य उपचार र दोषीउपर कडा कारबाहीको माग गरेको छ ।
यसैगरी पत्रकार महासंघको विज्ञप्तिमा लगाइएको आरोपलाई अस्वीकार गर्दै विवेक साहले उक्त दाबीलाई “पूर्वनियोजित चरित्र हत्या” को संज्ञा दिएका छन् । उनले घटनास्थल सुरक्षाकर्मीको निगरानीमा रहेको भन्दै पत्रकार यादवले निषेधित क्षेत्रमा प्रवेश गरी झुटो प्रचार गरेको आरोप लगाए । साथै, सत्यतथ्य छानबिनको माग गर्दै प्रेस काउन्सिल नेपाललाई संलग्न गरिनुपर्ने बताएका छन् ।
यस विषयमा भने नेपाल पत्रकार महासंघ राैतहट शाखाकाे भने अहिलेसम्म आधिकारिक धारणा आउन सकेको छैन् ।
काठमाडौं, ८ साउन ।
आम जनता पार्टी (आजपा)का अध्यक्ष एवं पूर्वमन्त्री प्रभु साहले प्रधानमन्त्री केपी शर्मा ओलीले पटक पटक श्रीरामको जन्म नेपालमै भएको भन्दै झुठको खेती गरी जनतामा भ्रम फैलाइरहेको बताएका छन् ।
प्रतिनिधिसभाको आज (बिहीबार) बसेको बैठकमा बोल्दै आजपा अध्यक्ष साहले नेपालका आदीवासी जनजातीको इतिहास मेटाउने गरी झुठ र भ्रमको खेती गरिरहेको बताए ।
‘प्रधानमन्त्री केपी शर्मा ओलीले श्रीरामजी नेपालमै जन्मेको कुरा पटक पटक भन्दैहुनुहुन्छ । उहाँ (ओली)ले भन्नुहुन्छ राम चितवनमा जन्मेका हुन । चतरा विश्वामित्रको आश्रमस्थल हो । म सोध्न चाहन्छु, नेपालको भूभागको असली वारिस आदीबासी जनजाती हो की क्षेत्री बाहुन हो ?,’ आजपा अध्यक्ष साहले प्रश्न गर्दै भने, ‘रामायण भनेको क्षेत्रीबाहुनको पौराणिक कथा हो । यदी क्षेत्रीबाहुन यस भूभागका वारिस हो भने यहाँको थारुहरु के हुन भन्ने प्रश्न गर्न चाहन्छु । के चितवनका आदीबासी थारु होईनन ? के चतराका आदीबासी किराँती होइनन ?’
यदी किराँती, थारुहरु नै आदीबासी जनजाती हुन भने प्रधानमन्त्री ओलीले यहाँ बाहुन क्षेत्रीलाई घुसाएर के प्रमाणित गर्न खोजेका हुन भन्ने संसदलाई जानकारी गराउन उनले माग गरे । राजनीतिक स्टण्डका लागि जे पनि गर्ने, प्रधानमन्त्रीले नै झुठको खेती गर्न मिल्छ कि मिल्दै भन्दै उनले प्रश्न गरे । प्रधानमन्त्रीले देशको नेतृत्व गर्ने, देशलाई सही दिशा निर्देशन गर्नुको साटो जनतामा भ्रम फैलाउँने, विभाजन गर्ने र झुठको खेती गर्ने काम बन्द गर्नुपर्ने उनले बताए ।
‘सबैलाई थाहा छ, सत्यको बाटो हिड्यो भने समाजले सही दिशा लिन्छ । झुठले समाजलाई अन्धाकारमा धकेल्छ, द्धन्द्धमा धकेल्छ र बिनाश तिर लान्छ । क्यान्सरको रोगलाई तपाईले टिवि लेख्दिनुहुन्छ भने त्यो विरामीले कहिल्यै पनि उपचार प्राप्त गर्न सक्दैन,’ आजपा अध्यक्ष साहले भने, ‘हाम्रो समाजको वास्तविकता देखाउनुपर्ने हो । नेपाल कहिल्यै पनि गुलाम भएन । त्यो सबैको एउटै कारण हो यहाँको जनजाती आदीबासी । यहाँको मुलबासिन्दा कै कारणले हो जसको कारण हामी कहिल्यै पनि गुलाम भएनौँ ।’
नेपालको एकीकरण भन्दा पहिला पनि स–साना राज्यहरु भए पनि कहिल्यै पनि कसैको गुलाम नभएको बताउदै उनले जनजाती, आदीबासीले त्यसको अस्तित जोगाएको बताए । प्रधानमन्त्रीले ति इतिहासको खोतलेर स्थापित गर्नुको साटो गुमराह बनाइदिने, तोडमतोड गर्ने कार्य गर्नु ठिक नभएको साहले बताए ।
‘आदीबासी जनजातीको राज्य खोसियो, अधिकार खोसियो, पहिचान अस्वीकार गरियो र आज उनीहरुको इतिहासमाथि छेडछाड गर्ने काम भईरहेको छ । इतिहास मेटाउने काम भइरहेको छ । नेपाललाई कता लान खोजिएको छ भन्ने प्रश्न उठछ । प्रधानमन्त्री जस्तो व्यक्तिले किराँतीको इतिहास खोतल्नुपथ्र्यो । किराँतीहरु कस्ता राजा थिए कि कसैको गुलाम भएन् । त्यस्ता कुरा उजागर गर्नुको साटो राजीतिक स्टण्ड गर्ने, भ्रमको खेती गर्ने, गुमराह बनाउँने काम बन्द गर्न म विशेष आग्रह गर्न चाहन्छु,’ आजपा अध्यक्ष साहले भने ।
प्रधानमन्त्री ओली भारत भ्रमणमा जान लागेको कुरा मिडियाबाट थाहा भएको बताउदै उनले भारत जाँदा भारतीय सरकारसंग यस बारेमा सत्य, तथ्य कुरा गर्न र पुरातात्विक विभागको प्रमाणको आधारमा वार्ता गर्न आग्रह गरे । र आफैले बोल्दै आएको कुरा स्थापित गर्न प्रधानमन्त्री ओलीलाई आजपा अध्यक्ष साहले चुनौति समेत दिए ।
‘नेपालको राष्ट्रिय विभुति सीता । दुनियाले स्वीकारेको यो कुरा त प्रधानमन्त्रीले स्वीकार गर्नुहुन्न । म उहाँको क्याबिनेटको एउटा मन्त्रि थिए । सीता जयन्ती क्यालेन्डरमा राख्न भन्दै गर्दा, अडान लिदैगर्दा उहाँ मान्नु भएन । घण्टौ अडान लिदा समेत क्यालेन्डरमा सीता जयन्ती राख्न नमान्ने प्रधानमन्त्रीले राम नेपालमै जन्मेको विवादस्पद अभिव्यक्ति दिएर के सन्देश दिन खोज्नुभएको हो ? नेपाललाई गुमराह बनाउने अधिकार कसैलाई छैन् । प्रधानमन्त्री जस्तो गरिमामा बसेर आमलाई इमिलि भन्ने र झुठको खेती गर्ने काम बन्द गर्नुपर्छ,’ आजपा अध्यक्ष साहले भने ।
नेपाललाई अन्धाकारमा धकेल्ने अधिकार कोहीकसैसंग नभएको भन्दै उनले सत्य, तथ्यको आधारमा अभिव्यक्ति दिनुपर्ने बताए । यदी उहाँले सत्य, तथ्य नै बोलेको हो भने त्यसबारेमा संसदमा बहस गराउनुपर्ने उनले बताए । तर झुठको खेती गर्ने, भ्रम फैलाउने काम नगर्न प्रधानमन्त्री ओलीलाई उनले ध्यानाकर्षण गराए । यसबारेमा सभामुखले समेत रुलिङ गर्नुपर्ने माग गरे ।
राजेश निर्माणी,वृन्दावन, साउन ८ गते — पानी नपरेका कारण किसानहरू चिन्तित भइरहेका बेला वृन्दावन नगरपालिकाका नगर प्रमुख विनोद प्रसाद कुर्मीले किसानहरूको समस्यालाई मध्यनजर गर्दै तत्काल समाधानको पहल गरेका छन् । नगर प्रमुख कुर्मीले वडा नम्बर ६, कमलपटीमा नयाँ कुलो निर्माण गराएर नहरमार्फत सिंचाइको व्यवस्था मिलाएका छन् ।
धेरै किसानले समयमा धान रोप्न नपाएको र लगातारको खडेरीका कारण उत्पादनमा भारी असर पर्ने चिन्ताले सताइरहेका बेला नगर प्रमुखको यो कदमले किसानहरूमा केही आशा जगाएको छ। उनले किसानहरूका समस्यालाई प्राथमिकतामा राख्दै अन्य वडाहरूमा पनि पानीको व्यवस्था मिलाउने कार्य अघि बढाएका छन्।
नगर प्रमुख कुर्मीले मधेस प्रदेशभरि नै पानीको अभाव भएको भन्दै प्रदेश सरकारले मधेसलाई सुक्खाग्रस्त क्षेत्र घोषणा गरेपछि, आफूले पनि पालिकाभित्रका सबै वडाहरूमा पानीको अवस्थाको अनुगमन थालेको बताएका छन्। उनले हरेक वडामा पुगेर समस्या बुझ्ने र समाधान गर्ने कार्यलाई निरन्तरता दिने प्रतिबद्धता जनाएका छन्।
कृषि मुख्य पेशा रहेको वृन्दावन नगरपालिकाका किसानहरूका लागि यो पहलले ठूलो राहत दिएको छ। अब नगरपालिकाको अन्य वडाहरूमा पनि यस्तो किसिमको कार्य अघि बढाइने नगर प्रमुखको भनाइ छ।
स्थानीय किसानहरूले नगर प्रमुखको यो कदमको प्रशंसा गर्दै अन्य स्थानमा पनि यस्ता तत्कालीन समाधान ल्याउन आग्रह गरेका छन्।
