काठमाडौं : अन्ततः जनमत पार्टी र नागरिक उन्मुक्ति पार्टी (नाउपा)बीच एकीकरण हुने पक्का भएको छ। जनमतका अध्यक्ष सीके राउत र नागरिक उन्मुक्ति पार्टीका संरक्षक रेशम चौधरीले शनिबार दुई पार्टीलाई एकीकरण गरेर राष्ट्रिय शक्ति बनाउने उद्घोष गरेका हुन्।
पार्टी एकीकरणलाई मुख्य एजेन्डा बनाएर बोलाइएको नाउपाको केन्द्रीय कार्यसमिति बैठकमा राउतले विशेष सम्बोधन गरेका थिए। विगतामा नाउपासँग एकीकरण नगरेर ठूलो गल्ती भएको उनले स्वीकारे। चुनावकै बेला एकीकरण भएको भए हामीसँग अहिले २०–२१ सिट हुन्थ्यो। त्यतिबेला कसैले राष्ट्रिय पार्टी बन्छ कि बन्दैन भनेर हामीलाई भोट दिएका थिएनन्। उनीहरूले विश्वासको मत दिएका थिए। त्यही बेला एकता हुन सकेको भए ठूलो संख्यामा सिट पनि ल्याउँथ्यौं,’ अध्यक्ष राउतले भने।
त्यही गल्तीलाई सच्याउन आफूहरू तयार भएको उनको भनाइ छ। उनले मधेसी र थारू पार्टी एकीकरण हुँदै गर्दा कसैलाई पनि चित्त नदुखाउन आग्रह गरे। उनले थारुको पहिचानसमेत रहेको ढकियालाई गर्व गर्न लायक बनाउने उद्घोष गरे। ‘तपाईंहरूको सहमति बिना यो एकता सम्भव छैन। सबैको सहमति र सम्मानले मात्रै हामी अन्तरमनदेखि एक हुन सक्छौं। तपाईंहरूलाई म वाचा गर्छु, ढकियामै गर्व गर्न सक्ने पार्टी बनाउँछौं,’ उनले भने । ढकिया नाउपाको चुनाव चिह्न पनि हो।अध्यक्ष राउतले जनमत र नाउपालाई एकीकरण हुन नदिन षड्यन्त्र पनि भइरहेको बताए। तर, त्यसलाई वास्तै नगरी आफूहरू एकढिक्का हुन लागेको उनले बताए। बैठकपछि अन्नपूर्णसँग कुरा गर्दै अध्यक्ष राउतले नाउपा बैठकमा माहोल राम्रो देखिएको र पार्टी एकता निश्चित भएको दाबी गरे।
‘बैठकमा निकै राम्रो माहोल देखेँ । दुई पार्टीबीच एकता हुने सम्भवतः निश्चित भएको छ,’ उनले भने। उनले आफू र रेशम चौधरीमा कुनै स्वार्थ नहेकाले पार्टी संरचनामा पनि कुनै विवाद नआउने दाबी गरे। ‘म र रेशमजीमा कुनै स्वार्थ छैन। हामी दुवै जना पदबाट धेरै टाढा छौं। जनताबाट उठेका पार्टी भएकाले हामीबीच कुनै विवाद हुँदैन,’ उनले भने। नाउपाका संरक्षक चौधरीले हातमात्र होइन, मनबाट मिल्न जरुरी रहेको बताए। उनले अध्यक्ष राउतलाई विपक्षी सिटमा बस्न तयार हुन आग्रह पनि गरे। ‘न्याय पाएनौं भने डाक्टर साप संसद्भवनको विपक्षीको सिटमा पनि बस्नुपर्ने हुनसक्छ । मन्त्री पद छोडेर सडकमा पनि आउनुपर्ने हुनसक्छ,’ चौधरीले भने।
नाउपाको दुई दिन चलेको बैठकले जनमतसँग पार्टीसँग एकीकरण गर्न कार्यदल गठन गरेको छ। प्रतिनिधिसभा सदस्यसमेत रहेका गंगाराम चौधरीको संयोजकत्वमा तीन सदस्यीय कार्यदल गठन गरिएको छ। सदस्यमा सुनिता चौधरी र रामलाल डंगौरा छन्। यसअघि फागुन अन्तिम साता बसेको जनमतको केन्द्रीय समितिको बैठकले नाउपासँग पार्टी एकीकरणका लागि कार्यदल बनाएको थियो। कार्यदलमा प्रतिनिधिसभा सदस्य अब्दुल खान संयोजक र डा. शरदसिंह यादव र बालगोविन्द चौधरी सदस्य छन्।
रेशमले पत्नी रञ्जितालाई भने– अब मिलौं
नाउपा संरक्षक चौधरीले अध्यक्षसमेत रहेकी पत्नी रञ्जिता श्रेष्ठलाई सँगै मिलेर जान आह्वान गरे। केन्द्रीय कार्यसमितिको बैठकलाई सम्बोधन गर्दै उनले आफूहरूकै कारण सबै बर्बाद भइसकेको बताए। ‘तिम्रो र मेरो कारण सबै प्रदेश सरकार बर्बाद भयो। आजदेखि तिमी र म हात मिलाउँ। सबैको साझेदारीमा जाउँ। भोलिदेखि ती सब ठेगानमा आउँछन्,’ उनले भने।
संरक्षण चौधरीले पत्नी श्रेष्ठलाई नाउपाको प्रदेश र संघमा रहेका १६ सांसदकै कारण बालुवाटार प्रवेशमा सहज भएको सुनाए। भोलि त्यो सांसद नरहे बुढाबाहेक केही बाँकी नरहने उनले सुझाए। ‘१६ सांसद नभएको भए रञ्जितालाई बालुवाटारको ढोका खुला हुन्नँ। १६ सांसदले नै हो ‘आउ आउ कान्छी, आउ आउ छोरी, आउ आउ बहिनी भन्छन्। सांसद नभए कसले सोध्छ ? उही बुढोले त हो,’ उनले भने।
बज्जिकाञ्चल संवाददाता,राैतहट,०८ गते चैत । रौतहटको इशनाथ नगरपालिकाका प्रमुख प्रशासकिय अधिकृत नन्दकिशोर गुप्ताले नगर क्षेत्रका बिद्यालय, स्वास्थ्य संस्थाको अनुगमन तथा निरीक्षणलाई तिब्रता दिएका छन ।
बिद्यालयमा शिक्षकको उपस्थिति रहेको / नरहेको , विद्यार्थीलाई दिवा खाजा खुवाउने गरे / नगरेको लगायतका कार्यको प्रभावकारी रुपमा अनुगमन गर्ने कार्यलाइ निरन्तरता दिनु भएको छ ।
बिद्यालय सङै स्वास्थ्य संस्थामा स्वास्थ्यकर्मी समयमा आउने गरे / नगरेको , निशुल्क औषधि उपलब्ध रहे / नरहेको लगायतको सुक्ष्म रुपमा अनुगमन गरि रहेको प्रमुख प्रशासकिय अधिकृत गुप्ताले बताएका छन ।
अनुगमनका क्रममा कहि कतै कमजोरि देखिएमा कारबाही समेत गर्ने गरिएको प्रमुख प्रशासकिय अधिकृत गुप्ताको दावी छ । राैतहट अनलाइन
बज्जिकाञ्चल संवाददाता,जनकपुर,०८ गते चैत ।
जनकपुर । मधेस प्रदेशअन्तर्गतका स्वास्थ्य संस्थामा कार्यरत स्वास्थ्यकर्मीहरूले स्तरवृद्धिको माग गर्दै आज जनकपुरधामस्थित प्रदेश भवन अगाडि प्रदर्शन गरेका छन् ।
स्वास्थ्यकर्मीहरूले स्तरवृद्धिको मागसहित ब्यानर तथा प्लेकार्डमार्फत प्रदर्शन गरेका हुन् ।
सिनियर अहेव र सिनियर अनमी (पाँचौँ तह)का कर्मचारी संघर्ष समिति मधेस प्रदेशको आयोजनामा प्रदर्शन गरिएको हो ।
प्रदेशका आठ जिल्लामा करिब एक हजार आठ सय स्वास्थ्य क्षेत्रका कर्मचारीको बढुवामा मधेस सरकारले रोका गरेकाले नियमित बढुवाको माग गर्दै प्रदर्शन गरिएको संघर्ष समितिका कोषाध्यक्ष रुपेश साहले बताए ।
पटक पटक नियमित बढुवाको माग गरे पनि प्रदेश सरकारले सुनुवाइ नगरेपछि आज मुख्यमन्त्री कार्यालय, जिल्ला प्रशासन कार्यालय धनुषा हुँदै मुरलीचोकमा प्रदर्शन गरी प्रदेश सभा भवन अघि पुगेर कोणसभा गरिएको उनले जानकारी दिए । उनका अनुसार प्रदेशसभाका सभामुख रामचन्द्र मण्डललाई माग सुनुवाइ गर्नेसम्बन्धी तीन बुँदे ज्ञापन पत्रसमेत बुझाइएको छ ।
उक्त ज्ञापन पत्रमा नेपाल स्वास्थ्य सेवा ऐन, २०५३ बमोजिम विगतदेखि पाउँदै आएको दुई तह स्तर वृद्धि गर्नुपर्ने, स्वास्थ्य सेवामा प्रथम प्रवेश बिन्दु चौथो तह भएकाले खुलाबाट पदपूर्ति शतप्रतिशत हुनुपर्नेलगायत माग राखिएका छन् । यसैबीच, आज प्रदेशसभा बैठक भएकाले प्रदेशसभा भवन वरपरको सुरक्षा व्यवस्था कडा पारिएको थियो । प्रशासन
आरके श्रीवास्तव,रौतहट,०८ गते चैत ।
रौतहट । काठ दाउरा समयमा आपूर्ति गर्ने शर्तमा डिभिजन वन कार्यालयमा लगाइएको तालाबन्दी खोलीएको छ । सेवाग्राहीलाइ कठिनाइ असहजता र काठ दाउरा समयमा पूर्ति गर्न नसकेको भन्दै आज दिउँसो जिल्ला वन पैदावार आपूर्ती समिति र सेवाग्राही द्धारा तालाबन्दी गरिएको थियो ।
समितिको तर्फबाट विकास कुमार यादवको नेतृत्वमा गएको समूहले वन कार्यालयमा तालाबन्दी गरेका थिए । चालु आर्थिक वर्षमा डिभिजन वन कार्यालयले हालसम्म उपभोक्ता काठ दाउरा उपलब्ध गराउन आपूर्ती खोलेकै थिएन् । जसकारण उपभोक्ताहरु काठ पाउन बाट बञ्चित छन् ।
डिभिजनल वन अधिकृत हेमन्त प्रसाद साहले आपूर्ती नखुलाएर दिनहुँ काठ गायब गर्न थालेको आरोपहरु लाग्दै आएको छ । कमिसन पाउने लोभमा निलामी प्रक्रियाबाट काठहरु विक्री गर्ने गरेको चुरे तथा वन जंगल संरक्षण अभियान नेपालका अभियन्ता नन्दकिशोर राम आरोप लगाएका छन् ।
शुक्रवार तालाबन्दी गर्ने पक्षले निलामी लगायतका कार्यहरुमा आपूर्ती समितिलाइ वेवास्ता गरेको,कटान,मुछान काठ दाउरा निलामी लागयतको कार्यहरुमा आपूर्ती समिति सँग समन्वय नगरी काठ दाउरा विक्री वितरण गरेको,सेवाग्राहीलाइ काठ दाउरा समयमा उपलब्ध नगराएको आरोप लगाएका थिए ।
त्यस्तै आपूर्ती समितिले पाउनुपर्ने नियमानुसारको काठ दाउरा समयमा उपलब्ध नगराएको,राम्राराम्रा काठदाउराहरु सबै निलामी गरेको र आपूर्ती द्धारा सेवाग्राहीलाइ दिनुपर्ने काठहरु कमसल र नराम्रा काठहरु छोडेको, आपूर्तीको वार्षिक कार्ययोजना अनुसार गर्नुपर्ने योजनाहरुको कार्यान्वयनमा वेवास्ता गरेको उनीहरुको आरोप थियो ।
त्यसैगरी वन कार्यालय अन्तर्गतका योजनाहरु कार्यान्वयनको प्रक्रियामा डिभिजनल अधिकृत साहले ढिलाइ गरेको भन्दै समितिका मान्छेहरु र उपभोक्ताहरु आक्रोशित बनेका थिए । समितिका नेतृत्वकर्ता यादवले दिएको जानकारी अनुसार डिभिजन वन कार्यालयले आफूहरुको माग सम्बोधन गर्ने भएपछि तालाबन्दी खोलिएको बताएका छन् ।
आरके श्रीवास्तव,राैतहट,०८ गते चैत ।
लाेकतान्त्रिक समाजवादी पार्टी नेपालले पर्सामा आफ्नो जिल्ला संयाेेजक ताेकेकाे छ । लाेसपा नेपालकाे अन्तरिम विधान प्रथम संशोधन अनुसार पुरानाे अध्यक्षलाई विस्थापित गरि रामचन्द्र पण्डितलाई पर्सा जिल्ला संयाेजक पदमा चयन गरेको हाे ।
लाेसपाका अध्यक्ष महन्थ ठाकुर द्वारा हस्ताक्षरित मनाेनयन पत्रमा पुरानाे अध्यक्षलाई विस्थापित गरि पण्डितलाई जिम्मेवारी दिइएको उल्लेख रहेको छ ।
पछिल्लो समय लाेसपाले केन्द्रदेखि जिल्ला सम्मकाे महत्त्वपूर्ण जिम्मेवारीमा पार्टीका जिम्मेवार नेताहरूलाई मनाेनयन गर्दै आएको छ ।
यसअघि लाेसपाले राैतहट जिल्ला संयाेजक पदमा भरत साहलाई मनाेनय गरेकाे थियोे ।
बज्जिकाञ्चल संवाददाता,रौतहट ०८,चैत ।
राैतहट– गरुडा नगरपालिका वडा नं. ६, पोठियाहीस्थित सामुदायिक पोखरी क्षेत्रको धार्मिक तथा पर्यटकीय विकासका लागि १ करोड ३८ लाख रुपैयाँ लागतमा सूर्य भगवानको मन्दिर, छठ घाट, पार्क तथा पर्खाल निर्माण गरिने भएको छ ।
संघीय तथा नगरपालिकाको बजेटबाट टेन्डर प्रक्रियामार्फत सञ्चालन गरिने यस योजनाको शुक्रबार नगर प्रमुख कन्थमनी प्रसाद जयसवालले शिलान्यास गरे सँगै निर्माण कार्य अगाडि बढ्ने भएको हो । मेयर जयसवालका अनुसार पोखरीको बीचभागमा सूर्य मन्दिर, पूर्वतर्फ छठ पर्व मनाउन विशेष घाट, साथै पोखरी वरपर पर्खाल तथा हरियाली पार्क निर्माण गरिने छ ।
स्थानीयवासीहरूको लामो समयदेखिको मागलाई सम्बोधन गर्दै कार्य अघि बढाइएको मेयर जयसवालले बताए ।
“गरुडा नगरपालिकाले धार्मिक तथा सांस्कृतिक सम्पदाको जगेर्ना गर्ने नीति लिएको छ। यो योजनाका लागि १ करोड ३८ लाख रुपैयाँ विनियोजन गरिएको छ, जसले छठ पर्व मनाउने श्रद्धालुहरूका साथै धार्मिक पर्यटन प्रवर्द्धनमा टेवा पुर्याउनेछ,” नगर प्रमुख जयसवालले भने ।”
उनका अनुसार निर्माण कार्य पूरा भएपछि यो क्षेत्र गरुडा नगरपालिकाको एक प्रमुख धार्मिक तथा पर्यटकीय गन्तव्य बन्नेछ । स्थानीय बासिन्दाले छठ पूजा लगायत अन्य धार्मिक गतिविधिहरू थप सुव्यवस्थित रूपमा गर्न सक्ने उनको बिश्वास छ ।
शिलान्यास कार्यक्रममा नगरपालिकाका जनप्रतिनिधि, स्थानीय समाजसेवी, धार्मिक अगुवाहरू तथा नगरवासीहरूको उपस्थिति रहेको थियो।
बज्जिकाञ्चल संवाददाता,राैतहट,०८ गते चैत ।
राैतहटकाे गरूडा नगरपालिका वडा नम्बर ५ मा जनता समाजवादी पार्टी नेपालकाे वडा अधिवेशन सम्पन्न भएको छ । जसपा, नेपाल रौतहटको जिल्ला अधिवेशन हुने भएकाले गरुडा नगरपालिका वडा नम्बर १ देखि ९ सम्मका वडा अधिवेशनहरू १२ गतेसम्म सम्पन्न गर्नुपर्नेछ भएकोले आज साे वडाकाे अधिवेशन सम्पन्न भएको गरूडा नगरपालिकाका मेयर प्रत्यासी अनिल यादवले जानकारी गराएका हुन् ।
त्यस्तै, नगर अधिवेशन १३ गतेदेखि २२ गतेभित्र सम्पन्न गर्नुपर्ने भएकाले पार्टीको सर्कुलरअनुसार कार्ययोजना अगाडि बढाइएको उनले बताएका हुन् ।
साे वडामा सियाबर यादवको अध्यक्षतामा ७१ सदस्यीय वडा अधिवेशन सफलतापूर्वक सम्पन्न भएको छ ।
छनौट भएका सम्पूर्ण पदाधिकारीहरूलाई मेयर प्रत्यासी यादवले हार्दिक बधाई तथा सफल कार्यकालको शुभकामना दिएका छन् ।
आरएन पटेल,रौतहट, चैत्र ०८ गते ।
रौतहटको बौधिमाई नगरपालिकाको प्रमुख प्रशासकीय अधिकृतको रुपमा उदय शंकर चौधरी हाजिर भएकाे छ । शुक्रवार एक कार्यक्रमकाे बिच बौधिमाई नगरपालिकाका नगर प्रमुख प्रदीप कुमार यादव र नगर उप प्रमुख प्रमिला देवी जयसवालले कार्यालय प्रमुखको रुपमा उदय शंकर चौधरीलाई टीका माला लगाई कार्यालयमा स्वागत गर्नु भएकाे हाे ।
कार्यभार सम्भालदै प्राशासकीय अधिकृत चौधरीले पालिकामा अवरुद्ध भएका सम्पूर्ण कामकाजहरु चाँडै अगाडि बढाउने बताउनु भएको छ। यस भन्दा पहिले समान्य प्रशासन मन्त्रालयले कार्यालय प्रमुखको रुपमा प्रमुख प्रशासकीय अधिकृत संदेश यादवलाई खटाएका थिए । केही समय पहिला यादव अन्यत्र सरुवा भएपछि बौधिमाई नगरपालिका हाकिम बिहीन भएको थियो।
पालिकामा प्रमुख प्रशासकीय अधिकृत नहुँदा पालिकाको आर्थिक लगायत विभिन्न कार्य गर्न अपठ्यारो भइरहेको बेला नगर प्रमुख यादवले पालिकामा नयाँ हाकिमको रुपमा उहाँलाई हाजिर गराई कार्यभार सुम्पेका छन।
स्वागत कार्यक्रममा विभिन्न वड़ाका वडा अध्यक्ष, पालिकाको लेखा शाखा प्रमुख अरविन्द कुमार यादव, स्वास्थ्य संयोजक तारकेश्वर पटेल, विभिन्न शाखाका शाख प्रमुख, राष्ट्रसेवक कर्मचारी लगायत जनप्रतिनिधिहरूको उपस्थिति रहेको थियो।
चन्दन यादव,कटहरिया, ०८ गते चैत ।
रौतहट जिल्लाको कटहरियामा एसइइ पास गराइदिन्छु भनेर ट्युसन पढाउने केही शिक्षकले विधार्थीसंग रकम असुली गरेको पाइएको हो । ट्युसनको नाममा विधार्थीहरु संग एक वर्ष देखी सेटिंग मिलाउदै आइरहेको तथा अहिले एस.ई.ई.को बेलामा १ हजारको दरले रुपैंया असुली गरेको एक जना विधार्थीहरुले नाम नबताउने सर्तमा हामीलाइ जानकारी दिएका छन् । ती बिधार्थीले शिक्षकको नाम पनि सार्वजनिक गर्न चाहेका छैन्न् ।
ट्युसन पढाउने शिक्षकले सम्बन्धित परिक्षा केन्द्रको कार्यालय सहयोगीलाइ रुपैंया दिएर सेटिंग गरेको पाइएको छ । कार्यालय सहयोगीले ट्युसन पढाउने शिक्षकले बताइएको विधार्थीको अनुहार हेरी सिधै गेट प्रवेश गराइरहेको समेत प्रत्यक्षदर्शीले बताएका छन् । सेटिंगमा संलगन नरहेको विधार्थीहरुको चिट तथा परिक्षाको नियम भंग गर्ने उदेश्यले मोबाइल फोन तथा त्यस्ता उपकरणहरु नजाओस भनेर चेकिंगको क्रममा ती विधार्थीहरुलाइ खोदयाइ खोदयाइ चेक गर्ने तथा सेटिंगमा संलग्न रहेको विधार्थीहरुलाइ नाम बराबर मात्र चेक गर्ने गरेको पाइएको हो ।
चिट चोरी गराउनेमा ट्युसन पढाउने शिक्षक र कार्यालय सहयोगी प्रमुख भुमिका रहेको तथा त्यसमा केही सम्बन्धित केन्द्रको शिक्षकहरु पनि संलगन रहेको पाइएको हो । ट्युसनमा पढने सम्पुर्ण विधार्थीसंग १ हजार रुपैयाँको दरले हरेक वर्ष असुली गर्दै आइरहेको समेत ट्युसन माफियाहरुको राज बाहिरिएको हो । आफुलाइ शिक्षक बताउने ती शिक्षकहरु विधार्थीको जिवनसंग खुलेआम खेलवाड गरिरहेको कुरा सम्बन्धित निकायलाइ यस समाचारको माध्यम बाट जाहेर गरिएको छ ।
मधेशको शिक्षा यिनीहरु जस्ता शिक्षकले गर्दा बिग्रीएको हो भन्दा पनि गलत हुदैन् । जब सम्म यस्ता शिक्षकहरुको गोप्य सेटिंग बाहिर नियन्त्रण्मा आउँदैन तब सम्म रौतहटको शिक्षामा सुधार नआउने निश्चित छ । निष्पक्ष तरिकाले एस.इ.इ. परिक्षा जब सम्म मधेशमा हुदैन तब् सम्म तराई मधेशको शिक्षामा सुधार आउँदैन, त्यस्ता शिक्षकहरुलाइ पहिचान गरी कार्यवाहिको दायरामा ल्याइ सेटिंगहरु बन्द होस भने माग गरिएको छ ।
मुना मिश्रा,०७ गते चैत ।
महिला लघुवित्त वित्तीय संस्था लिमिटेड ले ग्लोबल मनि विक २०२५ एक दिवसीय फुटबल प्रतियोगिता कार्यक्रम गरी मनाएको छ ।
महिला लघुवित्त वित्तीय संस्था लिमिटेड लुम्बिनी प्रदेश प्रमुख तिलक दत पंत तथा सु नि का कार्यालय नेपालगन्जका प्रमुख अमर बहादुर सिंह को आयोजनामा फुटबल प्रतियोगिता कार्यक्रम गरी ग्लोबल मनि विक २०२५ मनाइएको छ।
नेपाल राष्ट्र बैंकले चैत ४ गतेदेखि १० गतेसम्म ग्लोबल मनी विक मनाउने आह्वान गरे अनुसार बालबालिका र युवाहरूमा वित्तीय साक्षरता अभिवृद्धि गर्दै वित्तीय ज्ञान, सिप, मनोवृत्ति र व्यवहारको विकास गर्ने उद्देश्यका साथ माहिला लघुवित्त वित्तीय संस्था लिमिटेड लुम्बिनी प्रदेश कार्यालय ले पशुपति युवा कल्व खेलकुद मैदान मा आयोजना गरेको फुटबल प्रतियोगिता कार्यक्रममा प्रमुख अतिथि नेपालगन्ज उ म न पा वडा नं २० का वडा सदस्य चक्र बहादुर बि सी , बिशिष्ट अतिथि पशुपति युवा कल्वका अध्यक्ष कृष्ण परियार , प्रहरी बिट राझाका भुपाल सिंह ठकुरी लगायत विभिन्न संघ संस्थाका प्रतिनिधि तथा कर्मचारीहरुको उपस्थिति रहेको थियो। उक्त प्रतियोगितामा ४ टिम सहभागी रहेको मध्ये पहिलो खेल भेलेज हब क्लब र एन वाइ सि क्लब बिच तथा दोस्रो खेल सिटी स्पोर्टस क्लब र साझा एफ सि बिच भएको खेलमा जित हात पारेको एन वाइ सि क्लब र साझा एफ सि ले फाइनल खेल खेले।
फाइनल खेलमा एन वाइ सि क्लब र साझा एफ सि ले गोलरहित बराबरीमा रोकेको थियो साझा एफ सि टिमले पेनाल्टी गोलबाट जीत हासिल गरेको थिए । बिजेता टोलि लाइ नगद पुरस्कार रु ५१५५ र सिल्ड मेडल प्रदान गिरएको तथा उप बिजेता टोलि लाइ नगद रु २५२५ र मेडल प्रदान गरिएको आयोजक संस्थाका सु नि का प्रमुख संजय चौधरी ले जानकारि दिनु भयो।
‘थिंक बिफोर यु फलो वाइज मनी टुमारो’ भन्ने नाराका साथ संचालन गरिएको कार्यक्रममा सहभागि प्रमुख अतिथि, बिशिष्ट अतिथि, अतिथि तथा उक्त कार्यक्रम सञ्चालन गर्न सहयोग गरेका सम्पुर्णलाई उक्त संस्थाको लुम्बिनी प्रदेश प्रमुख तिलक दत पंत ले धन्यवाद ज्ञापन गर्दै प्रमाण पत्र र मायाको चिनो प्रदान गर्नु भएको आयोजक संस्थाका कर्मचारी बिनोद कुमार शाही ले जानकारि दिनुभयो।
