बज्जिकाञ्चल संवाददाता,राैतहट,०८ गते वैशाख ।
नेकपा एमालेको मधेस प्रदेशकी सांसद जैनव खातुनले रौतहटको फतुवा विजयपुर नगरपालिका वडा नम्बर ५ सन्तपुर दोस्तियामा मोक्तमको शिलान्यास गरेकी छन् । आज सोमबार एक कार्यक्रम समारोहका बीच शिलान्यास गरेकी हुन्।
मुस्लिम सामुदायिककाे धर्म अनुसार मोक्तम विश्राम गर्ने स्थल हाे । प्रदेश सांसद जैनव खातुनको विशेष पहल र मधेश प्रदेश सरकारका युवा खेलकूद समाज कल्याण मन्त्रालयले करिब ४० लाखकाे लागतमा दुई तल्ले भवन बन्ने भएको छ ।
उक्त कार्य उपभोक्ता समिति मार्फत काम हुनेछ । जसको अध्यक्षमा तबरेज खा ,कोषाध्यक्षमा लालमुन खातुन,सचिवमा शेख सदाम रहेको प्रदेश सांसद खातुनले बताईन् ।
उक्त शिलान्यास कार्यक्रममा नेकपा एमालेका प्रदेश सदस्य सहबान खा, पूर्व गा.वि.स. अध्यक्ष बुधाई खा,नेता शेख मोबिन, सुरेन्द्र यादव , शिउपुजन यादव ,शेख नथुनी, शेख मज्रुल,राजा बाबु खा,शेख अफताब लगायतकाे सहभागीता रहेको थियोे ।
आरके श्रीवास्तव,गरुडा, ०८ गते वैशाख ।
रौतहटको राजपुर नगरपालिकाले विकास निर्माणका साथै आवश्यकता अनुसार जमिन खरिदमा पनि निकै ध्यान दिएको छ । राजपुरले जमिनको अभाव पूरा गर्न र सार्वजनिक सेवा प्रवाहका लागि भविष्यमा पनि जमिनको अभाव हुन नदिने नीति लिएको छ ।
नगरपालिकाको प्रशासकीय भवन र कृषि भवन निर्माणको लागि ४२ लाख रुपैयाको लागतमा ९ कट्ठा जमिन खरिद गरेको छ । नगरपालिकाको आफ्नै संरचना निर्माणको लागि जमिन किन्न गरिएको यो निकै महत्त्वपूर्ण निर्णय भएको स्थानीयहरुको भनाइ छ ।
नगरपालिकाले विद्यालय, स्वास्थ्य चौकी तथा खानेपानी जस्ता आधारभूत सेवा र सुविधाको लागि आवश्यक जमिन खरिद गरेको निमित्त प्रमुख प्रशासकीय अधिकृत बैजु ठाकुरले बताएका छन् । धेरैलाई पायक पर्ने तथा सडक पुगेको ठाउँमा जमिन खरिद गर्नुपर्ने भएको हुँदा नगरपालिकाले सबै विचार गरेर पर्याप्त मात्रामा जमिन किनेको ठाकुरको भनाइ छ ।
नगरपालिकाको नेतृत्वमा डा.मो. राजिक आलाम निर्वाचित भएपछि सार्वजनिक सेवा प्रवाहका लागि जमिन खरिद गर्ने अभियान नै संचालन भएको स्थानीयको भनाइ छ । नगर प्रमुख डा. आलमले शेख इद्रिश आधारभूत विद्यालयको लागि २२ लाखमा १० कट्ठा, मावि बैरिया भवन निर्माणको लागि ४८ लाखमा ९ कट्ठा, आफताब आधारभूत विद्यालयका लागि २२ लाखमा ३ कट्ठा जमिन खरिद गरिएको छ । धेरै हदसम्म विद्यालयहरुका लागि जमिनको तत्कालीन आवश्यकता पूरा गरिएको र अन्य केही विद्यालयको हकमा पनि विचार भइरहेको नगर प्रमुख डा. आलमको भनाइ छ ।
नगर प्रमुख डा.आलम भन्छन् – नगरपालिकामा स्वास्थ्य सेवाको लागि विभिन्न ठाउँमा आवश्यक मात्रामा जमिन खरिद गरिएको छ । राजपुर ५ मा स्वास्थ्य चौकी भवनका लागि १४ लाखमा ३ कट्ठा, वडा नम्बर ४ मा वडा कार्यालय र स्वास्थ्य चौकी भवन निर्माणका लागि ३२ लाखमा १ कट्ठा १० धुर, १५ शैय्याको नगर अस्पताल भवन निर्माणको लागि अपुग ४ कट्ठा जमिन ५८ लाखमा खरिद गरिएको छ । बलुवा स्वास्थ्य चौकी भवनको लागि १ कट्ठा जमिन निशुल्क उपलब्ध भएको छ । स्वास्थ्यको क्षेत्रमा सबै संरचना निर्माण भइसकेपछि निकै सहज हुने नगर प्रमुख डा. आलमको भनाइ छ ।
नगरपालिकाले वडा नम्बर ३ मा खानेपानीको लागि पनि १२ लाखमा ४ कट्ठा जमिन खरिद गरिसकेको छ ।
हालसम्म राजपुर नगरपालिकाले २ करोड ५० लाख रुपैयाको लागतमा प्रशासकीय भवन, कृषि भवन, विभिन्न विद्यालय, स्वास्थ्य चौकी र खानेपानी आदि संरचना निर्माणको लागि २ बिगाहा ३ कट्ठा १० धुर जमिन खरिद गरिसकेको निमित्त प्रमुख प्रशासकीय अधिकृत ठाकुरको भनाइ छ ।
राजपुर नगरपालिका सार्वजनिक सेवा प्रवाहको लागि सबै किसिमको अवरोध र बाधा व्यवधानलाई छिचोल्दै अगाडि बढिरहेको छ । युवा नेतृत्व भएको कारण सेवा प्रवाहमा सर्वसाधारणलाई निकै सजिलो भएको छ भने जग्गा जमिनको अभाव भएका संस्थालाई पनि सहज हुने गरी काम भइरहेको छ ।
काठमाडौँ।
राष्ट्रिय परीक्षाबोर्डले यो वर्षको कक्षा १२ को परीक्षा स्थगित हुने भएको छ । भोली मंगलबार बिहान ८ बजे बोर्डको बैठक बस्ने तयारी भइरहेको छ । उच्चस्रोतका अनुसार केही दिनको लागि सर्ने सम्भावना रहेको छ । कति दिन सर्ने भन्ने विषयमा बोर्ड बैठकले निर्क्योल गर्नेछ ।
यदी भोलीबाट आन्दोलन रोकियो भनेपनि टाढाबाट आन्दोलनमा आएका शिक्षक दुर्गम जिल्लामा पुग्ने अवस्था रहदैन । उत्तरपुस्तिका पुगिसके पनि केन्द्राध्यक्ष विद्यालयमा पुग्नैपर्छ । अनलाईनबाट प्रश्नपत्र पु¥याएपनि प्राविधिक कारणले केहीदिन सर्न सक्छ । शिक्षक आन्दोलनको कारण परीक्षा स्थगित भएको पहिलोपटक हुनसक्छ ।
परीक्षा स्थगित गर्ने हल्लाले विद्यार्थी त्रासमा छन् । बोर्ड बैठकले आन्दोलनको अवस्था विश्लेषण गरी कति दिन स्थगित गर्ने ? भन्ने विषयमा निर्णय गर्नेछ । सायद शुरुको परीक्षा स्थगित गरेर बाकी परीक्षा यथावत् गर्ने की ? सबै सार्ने भन्ने विषयको निर्णय बोर्ड बैठकले गर्नेछ ।
परीक्षा स्थगित हुँदा तयारीमा रहेको झन्डै ५ लाख ५३ हजार विद्यार्थी अन्योलमा पर्नेछन् । उता शिक्षा, विज्ञान तथा प्रबिधमन्त्रीले राजीनामा दिएको कारण बोर्डलाई परीक्षाको विषयमा कसले सल्लाह दिने भन्ने विषय समेत अन्योलमा परेको छ । सभार न्यूज अफ नेपाल
काठमाडौं : शिक्षामन्त्री विद्या भट्टराईले सोमबार प्रधानमन्त्री केपी शर्मा ओली समक्ष राजीनामा बुझाएकी छन्। शिक्षक महासंघसँग भइरहेको लामो संवाद निष्कर्षहिन भएपछि दबाबमा रहेकी मन्त्री भट्टराईले बालुवाटार पुगेर राजीनामा बुझाएकी हुन्।
शिक्षकहरू आन्दोलनरत अवस्थामा रहेको समयमा उनको राजीनामाले राजनीतिक तथा शैक्षिक वृत्तमा तरंग ल्याएको छ। आन्दोलन चर्किँदै गएको र समाधानको कुनै ठोस आधार नजुटेपछि उनी आलोचनाको केन्द्रमा परेकी थिइन्।
आजै केहीबेरमा बस्ने मन्त्रिपरिषद् बैठकले उनको राजीनामाबारे छलफल हुनेछ। सभार उकेरा
बज्जिकाञ्चल संवाददाता, बारा ०८ गते बैशाख ।
मधेश प्रदेश सरकारको अर्थ मन्त्रालयले प्रदेशअन्तर्गतका पालिकाहरुलाई दिनुपर्ने समपुरक र विशेष बजेट नदिँदा भौतिक संरचनाका योजना र सीमान्तकृत समुदायका योजना कार्यान्वयनमा समस्या भएको छ ।
यी दुवै शीर्षकमध्ये समपुरक बजेटमा पालिकाले आफ्नो बजेट मिलान गरी कम्तीमा ५० लाखको योजना सञ्चालन गर्नुपर्ने संवैधानिक व्यवस्था छ । तर लगातार दुई आर्थिक वर्षदेखि मन्त्रालयले बजेट नै उपलब्ध गराएको छैन् । जसकारण वीरगन्ज महानगरसहित जनकपुर, कलैया, जितपुर सिमरा गरी ३ उपमहानगर, नगर र गाउँपालिकाको योजना कार्यान्वयन नै हुन नसकेको हो ।
प्रदेश अर्थ मन्त्रालयका सचिव रामकुमार महतोकाअनुसार समपुरक बजेट प्रत्येक पालिकाका लागि २० लाख हो । यसमा पालिकाले ३० लाख मिलाएर कम्तीमा ५० लाखको योजना बनाउनुपर्ने हुन्छ । प्रदेश सरकारले बनाएको कार्यविधिअनुसार पालिकाहरुले आफ्नो क्रियाकलाप प्रस्ताव गर्न नसक्दा स्वीकृत नभएर बजेट विनियोजन भए पनि नपठाइएको उनको भनाइ छ । उनकाअनुसार विशेष बजेट प्रत्येक पालिकालाई ३० लाख हो ।
समपुरक बजेटमा साना–साना सडक, पुलपुलेसा, खानेपानी, शिक्षण संस्थालगायतका भौतिक संरचनाहरु निर्माण गर्नुपर्ने कार्यविधिले व्यवस्था गरेको छ । तर मन्त्रालयले बजेट नदिँदा पालिकाहरुले आफ्ना नगरसभाबाट पारित गरेका योजनाहरु कार्यान्वयन गर्न सकेका छैनन् । यसैगरी विशेष बजेट शीर्षक (अनुदान) अन्तर्गतका बजेट दिन नसक्दा गरिब, दलित, विपन्न वर्ग लाभान्वित हुने सीमान्तकृत समुदायको स्वास्थ्य, शिक्षा, सामाजिक कार्यक्रमहरु पालिकाहरुले सञ्चालन गर्न सकेका छैनन् ।
चालु आर्थिक वर्ष सकिन अब केही महिना मात्र बाँकी रहँदा मन्त्रालयले बजेट दिन नसक्दा प्रदेशभरीकै पालिकाहरुको सभाबाट पारित योजनाहरु कार्यान्वयन हुन नसकेको बाराका एक नगरपालिकाका प्रमुख प्रशासकीय अधिकृतले बताए । ‘अर्थ मन्त्रालयले पालिकालाई दिनुपर्ने बजेट रकमान्तर गरी अन्य ठाउँमा दिने गरेको छ,’ उनले भने, ‘संघीय सरकारले दिने गरेको भए पनि प्रदेश सरकारले उक्त बजेट दिएको छैन ।’
प्रदेश सरकारले प्रदेश कोलेनिका मार्फत यो बजेट दिने व्यवस्था छ । अर्थ मन्त्रालयका सचिव महतोले भने, ‘आवश्यक्ताअनुसार उक्त बजेट रकमान्तर हुन सक्छ । निर्णयअनुसार रकमान्तर गर्नु कानुनी प्रक्रिया हो ।’
बज्जिकाञ्चल संवाददाता, काठमाडौं ०८ गते बैशाख ।
नेपाल निजामती कर्मचारी संगठनको ३५ औं स्थापना दिवसको अवसरमा संगठनको भौतिक पूर्वाधार तथा यातायात मन्त्रालय विभागीय कार्यसमितिको आयोजनामा निःशुल्क दन्त शिविर सम्पन्न भएको छ ।
संगठनको स्थापना दिवसको अवसरमा सडक विभाग परिसरमा नेपाल निजामती कर्मचारी संगठन भौतिक पूर्वाधार तथा यातायात मन्त्रालय विभागीय कार्यसमितिको आयोजनामा उक्त शिविर संचालन गरिएको हो । ओम समाज डेन्टल हस्पिटलको सहकार्य रहेको उक्त एक दिने निःशुल्क दन्त शिविरमा लगभग १ सय २० जनाले दन्त स्वास्थ्य जाँच गराएका थिए ।
उक्त शिविरमा ओम समाज डेन्टल हस्पिटलका दन्त विशेषज्ञका साथै प्राबिधिक टोलीको सहभागी रहेको थियो । दन्त शिविर कार्यक्रम नेपाल निजामती कर्मचारी संगठन भौतिक पूर्वाधार तथा यातायात मन्त्रालय विभागीय कार्यसमितिका अध्यक्ष इ. प्रमोद खतिवडाको अध्यक्षतामा सम्पन्न भएको थियो ।
मुकेश कुमार साह,चपुर,०७ गते वैशाख ।
नेपाली कांग्रेस जिल्ला कार्य समिति रौतहटले विद्यार्थी विभागको नेतृत्व श्यामहरी चौलागाईंलाई सुम्पिएको छ। पार्टी सभापती तथा मधेस प्रदेश सरकारका अर्थमन्त्री सुनिल कुमार यादवले औपचारिक पत्र जारी गर्दै चौलागाईंलाई विभाग प्रमुखमा मनोनयन गरेका हुन् ।
चौलागाईंलाई कांग्रेसको विधान २०७६ को दफा ४८ (७) अनुसार जिल्ला कार्यसमितिको विद्यार्थी विभाग संयोजक पदमा मनोनयन गरिएको बताईएको छ ।
सभापती यादवले आइतवार पत्र दिदै चौलागाईंको संगठनप्रतिको योगदान, विद्यार्थी आन्दोलनमा सक्रियता र नेतृत्वदायी क्षमताको प्रशंसा गर्दै भनेका छन्, “पार्टीले तपाईंको ऊर्जाशील र जुझारु भूमिकालाई मूल्याङ्कन गर्दै विद्यार्थी विभागको प्रमुख जिम्मेवारी सुम्पिएको छ। यो विभाग तपाईंको नेतृत्वमा सशक्त र परिणाममुखी बन्नेमा पूर्ण विश्वास छ। नेपाली कांग्रेसको विधान एवं नियमावलीको परिधिभित्र रही जिम्मेवारी पालन गर्नुहुनेछ भन्ने विश्वास लिएको छु।”
मनोनयनप्रति प्रतिक्रिया दिंदै चौलागाईंले उक्त जिम्मेवारीलाई अवसर होइन, चुनौती र कर्तव्यको रूपमा लिएको बताए। “पार्टीको विश्वासलाई म कर्म र नतिजाबाट प्रमाणित गर्नेछु,” उनले भने, “विद्यार्थीको हक–हितका सवालमा म संगठित रूपमा अगाडि बढ्नेछु।”
उनको मनोनयनप्रति जिल्लाभरका युवा विद्यार्थी तथा शुभेच्छुकहरूले बधाई ज्ञापन गर्दै सफल कार्यकालको शुभकामना व्यक्त गरेका छन् ।
आरके श्रीवास्तव,गरुडा,०७ गते वैशाख ।
रौतहटको कटहरिया नगरपालिकामा रहेको बाबा बैजुनाथ सुगर एण्ड केमिकल इण्डष्ट्रीजले नयाँ कृषि यन्त्र ल्याएको छ । किसानको सहजताको लागि नयाँ कृषि यन्त्रको रुपमा ‘पावर विडर’ भित्र्याएको हो । उँखु खनजोत गर्न सहजहोस् भन्ने उदेश्यले तत्काल परिक्षणको रुपमा सो कृषि यन्त्र ल्याएको उँखु महाप्रबन्धक सियाराम साहले जानकारी गराएका हुन् ।
उनले भने—यो खासगरी उँखु किसानले लगाएको मुरहन र खुट्टी गोडमेल गर्न सहज हुने आधुनिक कृषि यन्त्र हो । जसले काम पनि चाँडो हुने तथा श्रम पनि कम खर्च हुने भएकाले किसानहरूको लागि यो अति उपयोगी हो । हातले जोत्ने भएकोले यसबाट उँखु जोत्न छिटो तथा सजिलो हुन्छ ।
यसबाट ३ देखि ४ फिट सम्मको दूरीमा काम गर्न सकिन्छ । उँखु जोत्न अन्य ठूला यन्त्र प्रयोग पनि गर्न सकीदैन् । यसमा कामदारकै आवश्यकता हुन्छ । तर यसको प्रयोगले हात बाट जोतेर घासपात निकाल्नुको साथै उँखुमा माटो चढाउन पनि सहज हुने उनी बताउँछन् ।
साह भन्छन्—अहिले यो परिक्षणको रुपमा ल्याएका छौं । यदी किसानले माग गरेमा मिलले सहुलियत दरमा उपलब्ध गराउने बताए । किसानको आधुनिक कृषि यन्त्रप्रति दिन प्रतिदिन आकर्षण बढ्दै गएको मध्य नजर गर्दै ‘पावर विडर’ नामक यो कृषि यन्त्र ल्याएको मिल सञ्चालक बैजु बाबराले बताएका छन् ।
गाउँघरमा खेतमा काम गर्ने कामदारहरुको सङ्ख्या कमी हुन थालेको छ । यस अवस्थामा यो किसानको लागि धेरै फाइदाजनक हुने देखिन्छ । चिनी मिलले परिक्षणकाे लागि मिलकै नजिकमा लगाएकाे उखु बालिमा जाेतेर जाँच गर्न लगाएको थियो ।
किसानलाई आधुनिक खेतीतर्फ आकर्षित गर्न बाबा बैजुनाथ सुगर एण्ड केमिकल इण्डष्ट्रीजले बेलाबेलामा यस्ता खालका विभिन्न आधुनिक कृषि उपकरणहरू उपलब्ध गराउँदै आएको छ । यस्ता औजारको प्रयोगले समय र श्रम दुवै कम हुने भएकाले किसानहरु आकर्षित हुने अपेक्षा राखिएको छ ।
बज्जिकाञ्चल संवाददाता, रौतहट ०७ गते बैशाख ।
रौतहटमा बेमौषमी वर्षाका कारण पोल्नको लागि तयार पारिएको काँचो ईंट्टा गलेर पाँच करोड भन्दा बढीको क्षति भएको छ ।
वर्षभरी बेच्नका लागि तयार भइरहेको र्इंट्टा वैशाख १ को हावाहुरी र असिना पानीले नष्ट गरेपछि र्इंट्टा व्यवसायीहरु आर्थिक समस्यामा परेका हुन् ।
हावाहुरी र असिना सहितको पानीले गर्दा आफनो ईंट्टा भट्टामा मात्रै पोल्नका लागि तयार पारिएको ईंट्टा भिजेर नष्ट भएको बृन्दावन नगरपालिका ३ स्थित कृष्णा ईंट्टा उद्योगका सञ्चालक प्रेम शंकर यादवले बताए । उनले मजदुरहरुले बनाएर राखेको ईंट्टाहरु बेमौसमी परेको पानीले भिजेर पूर्ण रुपमा नष्ट भएको बताए । अहिले ईंट्टा नष्ट भएसँगै कोइला पनि पाउन मुस्किल भएको उनको गुनासो छ ।
प्रत्येक वर्ष हिउँदे बर्षाका कारण ईंट्टामा क्षति पुग्ने गरेको व्यवसायीहरु बताउँछन् ।
रौतहट ईंट्टा उद्योग ब्यावसायी संघका सचिव मोहन साहले बेमौसमी पानीले गर्दा ईंट्टा नष्ट भएपछि व्यवसायी मर्कामा परेको बताए । उनका अनुसार विविध कारण ईंट्टा उद्योग बन्द भएको अवस्थामा बर्षले थप क्षति गरेपछि निकै समस्या भएको हो ।
ईंट्टा व्यवसायीको समस्या वा मर्कामा बारेमा तिनै तहका सरकारले ध्यान दिनुपर्ने उनको भनाइ छ । रौतहट जिल्लाभरीमा यस आर्थिक बर्षमा घरेलु तथा साना उद्योग कार्यालयमा दर्ता रहेका लगभग ४२ वटा ईंट्टा भट्टाहरु सञ्चालनमा रहेका संघले जनाएको छ ।
