आरके श्रीवास्तव,राैतहट,२४ गते ।
कटहरिया । सशस्त्र प्रहरी बल नेपालको एक घुमुवाको कारण तीनओटा मोटरसाइकल एकापसमा जुध्दा तीन जना घाइते भएका छन् । घाइतेमध्ये एक जनाको अवस्था गम्भीर रहेको बुझिएको छ ।
भारतबाट तस्करी गरेर सामान ल्याएको भन्दै सशस्त्र प्रहरी बल बेस क्याम्प दुधियाभारका सशस्त्र प्रहरी सहायक हवलदार सुबास सिंहले लखेट्दै जाँदा भारतीय नम्बर प्लेटको मोटरसाइकलमा ठोक्किनासाथ घुमुवा सिंहको मोटरसाइकल पनि त्यहीँ ठोक्किन पुगेको थियो ।
घटना कटहरिया नगरपालिका ४ लालबकैया नजिक पुलको हो । बुधवार दिउँसो सशस्त्र प्रहरी दुधियाभारका घुमुवा सिंहले मोटरसाइकलमा सामान ल्याउनेहरुसित रकम असुल गर्न कटहरिया पुगेको बेला घटना भएको हो । घुमुवा सिंहले एक जना कारोबारीलाई रोक्न खोज्दा नरोकेपछि लखेटेका थिए ।
सशस्त्र प्रहरीको घुमुवाले चलाई रहेको बा ८४ प ७३८३ नम्बरको मोटरसाइकलले कारोबारी चढेको ग ४ प ४०७३ नम्बरको मोटरसाइकल र बिआर ३० पी ७९३६ को मोटरसाईकल एक आपसमा ठोक्किएको थियो । दुर्घटना भएपछि कारोबारीले चढेको मोटरसाइकल र सामान छोडेर कारोबारी फरार भएको इलाका प्रहरी कार्यालय गरुडाले जनाएको छ । फरार कारोबारीको खोजी भइरहेको इलाका प्रहरी कार्यालय गरुडाका प्रमुख डिएसपि राजन कार्कीले जानकारी गराएका छन् ।
दुर्घटनामा भारतीय नम्बर प्लेटको मोटरसाइकलमा सबार फतुवा बिजयपुर नगरपालिका वडा नम्बर ४ टेंग्राहाका करिब ३५ वर्षका दिलिप कुमार साह र ४८ वर्षका अनुठा यादव घाइते भएका छन् । घाइते दुवै जनाको उपचार वीरगंजस्थित गण्डक अस्पतालमा भइरहेको इलाका प्रहरी कार्यालय गरुडाको भनाइ छ । घाइतेमध्ये दिलिप कुमार साहको अवस्था गम्भीर रहेको बुझिएको छ ।
यसै गरी कारोबारीलाई लखेट्ने सशस्त्र प्रहरी सहायक हवलदार सिंह पनि दुर्घटनामा घाइते भएका छन् ।
घटनापछि स्थानीयवासी र प्रहरीबिच केहीबेर झडप पनि भएको छ । स्थानीयवासीले सशस्त्र प्रहरीमाथि आक्रमण गरेको खबर छ । स्थानीहरुले गरेको कुटपिटबाट सशस्त्र प्रहरीका एक जना प्रहरी घाइते भएको पनि बुझिएको छ ।
घटनापछि स्थानीयवासीले इलाका प्रहरी कार्यालय कटहरियालाई पनि घेराउ गरेको थियो । सयौँको संख्यामा आक्रोशित भीडले सशस्त्र प्रहरीमाथि कारबाहीको माग गर्दै इप्रका घेराउ गर्न पुगेका थिए । केही बेर अवस्था तनावग्रस्त बनेको भए पनि स्थिति सामान्य भएको इलाका प्रहरी कार्यालय गरुडाले जनाएको छ ।
आरके श्रीवास्तव,गरूडा,२४ गते वैशाख ।
रौतहटको चन्द्रपुर–८ बेतौनास्थित कोटिहोम क्रिकेट मैदानमा जारी ‘जय नेपाल कप’ अन्तरकलेज टी–२० क्रिकेट प्रतियोगितामा कटहरिया बहुमुखी क्याम्पसकाे टिम विजयी भएको छ ।
आज भएको खेलमा कटहरियाको टिमले केवल रामसुरत बहुमुखी क्याम्पसलाई ४ विकेटले पराजित गरेको हो । टस जितेर बलिङ गर्ने निर्णय लिएको कटहरियाले १९.१ ओभरमै प्रतिद्वन्द्वी टिमलाई ११५ रनमा अलआउट गरेको थियो । जवाफी ब्याटिङमा कटहरियाले १७ ओभरमा ६ विकेटको क्षतिमा लक्ष्य पछ्याउँदै जित दर्ता गर्याे ।
कटहरियाका मुस्ताक आलमले ३० बलमा ४२ रनको आक्रामक पारी खेल्दै टिमलाई जित दिलाउन महत्त्वपूर्ण भूमिका खेलेका थिए । उत्कृष्ट प्रदर्शनका लागि आलमलाई ‘म्यान अफ द म्याच’ घोषित गरिएकाे थियोे ।
कटहरियाका कप्तान संजीव अधिकारीले टिमलाई उत्कृष्ट रणनीति र समन्वयमा अगाडि बढाएका थिए । कप्तान ठाकुरको शान्त स्वभाव र निर्णय क्षमताले टिमको प्रदर्शनमा महत्त्वपूर्ण योगदान दिएको हो । उनले क्षेत्ररक्षण र बलिङ परिवर्तनमा चातुर्य देखाउँदै विपक्षी टिमलाई दवावमा राखेका थिए ।
जितपछि क्याम्पस प्रमुख गजेन्द्र प्रसाद यादवले टिमका सम्पूर्ण खेलाडीहरूलाई बधाई दिँदै आगामी खेलहरूका लागि शुभकामना व्यक्त गरेका छन् । लेखाप्रमुख रामनिवास यादवले पनि खेलाडीहरूको हौसला अभिवृद्धि गरेका छन् ।
प्रतियोगितामा जिल्लाका ६ वटा क्याम्पस टिमहरूको सहभागिता रहेको छ । कटहरियाको आगामी खेल गाैरीशंकर यादव रौतहट क्याम्पससँग बिहीबार हुने कार्यक्रम छ।
आरके श्रीवास्तव,राैतहट,२४ गते वैशाख ।
कटहरिया । राैतहट जिल्लाको गुजरा नगरपालिका–८ मा अवस्थित मुस्लिम समुदायका लागि महत्वपूर्ण मानिने कब्रगाह/कब्रस्थान (धेरा बेरा) निर्माण कार्यकाे शिलान्यास कार्यक्रम बुधबार सभ्य तथा भव्य रूपमा सम्पन्न भएको छ ।
उक्त निर्माण कार्यका लागि युवा, खेलकुद तथा समाज कल्याण मन्त्रालय,मधेश प्रदेश सरकार मार्फत करिब २५ लाख रुपैयाँको बजेट विनियोजन गरिएको छ ।
शिलान्यास कार्यक्रमका प्रमुख अतिथि राैतहट निर्वाचन क्षेत्र नम्बर ३ क बाट निर्वाचित प्रदेश सांसद एवम् पूर्व राज्यमन्त्री केशव राय चौधरीको विशेष पहलमा साे घेराबेरा हुन लागेको हाे ।
शिलान्यास कार्यक्रममा स्थानीय नेता, विभिन्न राजनीतिक दलका प्रतिनिधिहरू, उपभोक्ता समिति सदस्यहरू, समाजसेवीहरू तथा स्थानिय जनसमुदायको उल्लेख्य उपस्थिति रहेको थियो ।
कब्रगाह निर्माणले मुस्लिम समुदायमा धार्मिक कार्य सम्पन्न गर्न सहज हुने भन्दै स्थानीयवासीहरूले पूर्व राज्यमन्त्री रायकाे यस पहलप्रति कृतज्ञता व्यक्त गरेका छन् ।
शिलान्यास कार्यक्रममा बोल्दै पूर्व राज्यमन्त्री चौधरीले धार्मिक सहिष्णुता र सामाजिक समरसता कायम राख्दै विकासका कार्यहरूलाई प्राथमिकता दिने प्रतिबद्धता व्यक्त गरेका छन् ।
स्थानीय तह,प्रदेश सरकार तथा समाजसेवीहरूको सक्रियताले धार्मिक तथा सामाजिक पूर्वाधार विकासमा टेवा पुर्याउने विश्वास स्थानीय बासिन्दाहरूले व्यक्त गरेका छन् ।
आरके श्रीवास्तव,राैतहट,२४ गते वैशाख ।
नेपाली कांग्रेस विद्यार्थी विभाग रौतहटको आयोजनामा चन्द्रपुर–८ बेतौनास्थित कोटिहोम क्रिकेट मैदानमा ‘जय नेपाल कप’ अन्तरकलेज टी–२० क्रिकेट प्रतियोगिता सुरु भएको छ । जिल्लाका विभिन्न ६ क्याम्पस सहभागी प्रतियोगितामा कटहरिया बहुमुखी क्याम्पसले पनि आफ्नो सहभागिता जनाएको छ ।
आज दिउँसो १ बजे कटहरिया बहुमुखी क्याम्पस र केवल रामसुरत क्याम्पस सिमराभवानीपुरबीच प्रतिस्पर्धा हुनेछ । आज कटहरिया बहुमुखी क्याम्पसकाे प्रांगणमा खेल प्रारम्भअघि एक सानो कार्यक्रमका बीच क्याम्पस प्रमुख गजेन्द्र प्रसाद यादवले खेलाडीहरूलाई पोशाक वितरण गर्दै शुभकामना व्यक्त गरेका छन् ।
“खेलकुद शारीरिक विकास मात्र होइन, अनुशासन, आत्मविश्वास र नेतृत्व क्षमता विकासको मूल आधार हो,” प्रमुख यादवले मन्तव्य दिँदै भने, “हामी हाम्रो क्याम्पसका खेलाडीहरूलाई पूर्ण समर्थन र हौसला दिन्छौं। यस्ता प्रतियोगिताले विद्यार्थीहरूलाई एकता र सहकार्य सिकाउने अवसर दिन्छ।”
उक्त कार्यक्रममा लेखा प्रमुख रामनिवास प्रसाद यादव र प्रअ जगरनाथ प्रसाद पटेलको पनि उपस्थिति रहेको थियो । प्रतियोगिता भरि विभिन्न क्याम्पसका टिमहरूबीच मैत्रीपूर्ण तर प्रतिस्पर्धात्मक खेल देखिने अपेक्षा गरिएको छ ।
क्याम्प प्रमुख यादवले खेलाडीहरूलाई अनुशासन र खेल भावना कायम राखी उत्कृष्ट प्रदर्शन गर्न शुभकामना पनि व्यक्त गरेका छन् ।
आरके श्रीवास्तव,राैतहट,२३ गते वैशाख ।
लोकतान्त्रिक समाजवादी पार्टी (लोसपा) नेपाल निकट लोकतान्त्रिक महिला संघको बैठक वैशाख २२ गते काठमाडौंको बबरमहलस्थित पार्टीको केन्द्रीय कार्यालयमा सम्पन्न भएको छ । बैठकमा महिला संघको आगामी कार्ययोजना,जिल्ला संगठन विस्तार लगायत विविध विषयमा गहन छलफल गरिएको छ ।
बैठकले लोकतान्त्रिक महिला संघको संशोधित विधानअनुसार धनुषाकी अन्नु महासेठलाई सह-सचिव,धनुषाकै मिना ठाकुर र पर्साकी ज्याेती पटेललाई केन्द्रीय सदस्यमा मनोनयन गरेको छ ।
संघकी अध्यक्ष मिनु कुमारी ठाकुरले मनोनयनप्रति बधाई ज्ञापन गर्दै देश,मधेश, महिला तथा पार्टीको हितमा नवनियुक्त पदाधिकारीहरूको भूमिकालाई प्रभावकारी बनाउने विश्वास व्यक्त गरेकी छन् ।
संघले आगामी दिनमा देशव्यापी रूपमा संगठन विस्तारलाई तीव्रता दिने तथा महिला सहभागिता सशक्त बनाउने योजना अघि सारेको छ ।
आरके श्रीवास्तव,राैतहट,२३ गते वैशाख २०८२ ।
लोकतान्त्रिक समाजवादी पार्टी (लोसपा) नेपाल, बागमती प्रदेशले आसन्न महाधिवेशनलाई लक्षित गर्दै जिल्लास्तरीय अधिवेशनहरू सम्पन्न गर्न आह्वान गरेको छ।
प्रदेश अध्यक्ष करण श्रेष्ठद्वारा जारी परिपत्रअनुसार, लोसपा नेपालको निर्वाचन निर्देशिका २०८१ को धारा (१) (३) अनुसार बागमती प्रदेश अन्तर्गतका सम्पूर्ण जिल्ला अध्यक्षहरूलाई वैशाख मसान्तभित्र जिल्ला, निर्वाचन क्षेत्र तथा प्रदेशसभा तहको अधिवेशन सम्पन्न गर्न निर्देशन दिइएको छ।
परिपत्रमा पार्टीका सम्पूर्ण नेता, कार्यकर्ता र शुभचिन्तकहरूको सक्रिय सहभागिता सुनिश्चित गर्दै नयाँ कार्यसमिति गठन गरी सम्बन्धित विवरण प्रदेश कार्यसमितिमा पठाउन अनुरोध गरिएको छ।
पार्टीको सांगठानिक सुदृढीकरण र आगामी महाधिवेशनको तयारीलाई व्यवस्थित बनाउने उद्देश्यले यस्तो निर्देशन जारी गरिएको लोसपा स्रोतले जनाएको छ।
अधिवेशनको सफलताका लागि पार्टीले सबै तहका नेतृत्वलाई एकताबद्ध भएर काम गर्न आग्रह गरेको छ।
मुकेश कुमार साह,चन्द्रपुर, २३ वैशाख।
मधेस प्रदेशका अर्थमन्त्री सुनिल कुमार यादवले शिक्षा र खेलकुद दुवै क्षेत्रमा सशक्त विद्यार्थीहरू तयार पार्न सके देशले सक्षम नेतृत्व पाउने विश्वास व्यक्त गर्नुभएको छ ।
रौतहटको चन्द्रपुर–८, बेतौनास्थित कोटिहोम क्रिकेट मैदानमा सुरु भएको ‘जय नेपाल कप’ अन्तरकलेज टी–२० क्रिकेट प्रतियोगिताको उद्घाटन गर्दै मन्त्री यादवले भन्नुभयो, “विद्यार्थीहरूलाई पढाइसँगै खेलकुदमा पनि सशक्त बनाउन सकियो भने, देशले नेतृत्वका असल अनुहारहरू पाउँछ।”
नेपाली कांग्रेस विद्यार्थी विभाग, रौतहटको आयोजनामा सुरु भएको उक्त प्रतियोगिताको उद्घाटन समारोहमा विद्यार्थी विभाग प्रमुख श्यामहरि चौलागाईंको अध्यक्षता रहेको थियो ।
कार्यक्रममा पूर्व प्रदेशसभा सदस्य धनलाल ठोकर, कांग्रेस जिल्ला सचिव मिथिलेश कुमार मिश्र, प्रदेश प्रवक्ता सूर्यबहादुर थापा, सञ्चार विभाग प्रमुख नितेश कुमार गुप्ता, चन्द्रपुर नगरप्रमुख सञ्जय कुमार काफ्ले, माधवनारायण नगरप्रमुख बैजनाथ यादव सहित विभिन्न वडाध्यक्ष र नेताहरूको उपस्थिति रहेको थियो ।
उद्घाटन खेलमा लक्ष्मी श्री बहुमुखी क्याम्पस समनपुर र सिधुरेघारी बहुमुखी क्याम्पस चन्द्रपुरबीच प्रतिस्पर्धा भएको थियो। लक्ष्मी श्री क्याम्पसले टस जितेर पहिले ब्याटिङ गर्दै २० ओभरमा ९३ रन बनायो । जवाफमा सिधुरेघारी क्याम्पसले १९.१ ओभरमा लक्ष्य पूरा गर्दै ५ विकेटको जीत हात पार्यो । कप्तान राजेश यादव म्यान अफ द म्याच घोषित भएका थिए ।
आयोजकका अनुसार प्रतियोगिताले विद्यार्थीहरूबीचको मित्रता, अनुशासन र खेल प्रतिभा विकासमा सकारात्मक प्रभाव पार्ने अपेक्षा गरिएको छ ।
आरके श्रीवास्तव,राैतहट, २३ गते वैशाख २०८२ ।लोकतान्त्रिक समाजवादी पार्टी नेपाल (लोसपा) ले आफ्नो केन्द्रीय महाधिवेशन साउन मसान्तभित्र सम्पन्न गर्ने निर्णय गरेको छ । यसअघि भाद्र १९ र २० गते सम्पन्न केन्द्रीय पदाधिकारी समितिको बैठकले महाधिवेशन आगामी बैशाख २६ गते गर्ने निर्णय गरेको थियो ।
तर, केही जिल्लामा पालिकास्तरका अधिवेशन सम्पन्न नहुँदा महाधिवेशनको तयारी प्रभावित भएको जनाइएको छ। सोही कारण २०८२ वैशाख २१ गते बसेको शीर्ष नेतृत्व तथा केन्द्रीय सचिवालयको बैठकले नयाँ मिति तय गरेको हो ।
पार्टी अध्यक्ष महन्थ ठाकुरद्वारा जारी प्रेस-विज्ञप्तिमा महाधिवेशन अघि सदस्यता नविकरण र वडा–पालिका अधिवेशनसहित अन्य आवश्यक तयारी कार्यहरू यथासिघ्र सम्पन्न गरिने उल्लेख छ ।
पार्टीका नेताहरूले महाधिवेशनलाई सफल बनाउन सबै तहका संरचनाहरूलाई सक्रिय बनाउन निर्देशन दिएकाे महासचिव मनिष मिश्रले जानकारी गराउनु भएको हाे ।
राजन श्रीवास्तव,गाैर,२२ गते वैशाख ।
गाैर । रौतहटको एक सुधार केन्द्र यातना दिने केन्द्र बनेको छ । सदरमुकाम गौर स्थित एक सुधार केन्द्रमा एक जनालाई यातना दिइरहेको भिडियो सार्वजनिक भएको छ । रौतहट को गौर नगरपालिका वडा नं ४ स्थित रहेको राइजिङ नेपाल सुधार केन्द्र मा एक जनालाई चरम यातना दिइरहेको भिडियो बाहिरिएको छ।
भिडियो बाहिरिए सँगै हल्ला खल्ला नै मच्चेकाे छ । कतिपयले पुरानै भिडियो भनिरहेका छन् । पुरानै भिडियो भए पनि सुधारकाे नाउँमा यसरी यातना दिनु अपराध रहेको सर्वसाधारणकाे भनाइ छ ।
गौर २ महादेबपट्टीका २२ वर्षीय रितेश कुमार यादवलाई राइजिङ नेपाल सुधार केन्द्रमा पाइपले निर्घात कुटपिट गरिएको भिडियो सार्वजनिक भएको हो ।
सुधार केन्द्रका सञ्चालक वीरगंजका सुरज साह कानु रहेका छन्। कबिर चौकदेखि पश्चिमपट्टि रहेको सुधार केन्द्रमा अमानवीय तरिकाले शारीरिक यातना दिएको दृश्य सार्वजनिक भएको हो। सामाजिक सञ्जालमार्फत सार्वजनिक भएको दृश्यमा एक युवकलाई पाइपले दुवै खुट्टाकोे पैतालामा पिटिरहेको र अन्य ३ जना मिलेर समातेको देखिन्छ।
सुधार केन्द्रमा भएको अमानविय घटनामा संग्लग्न लाई कारवाहीको दायरामा ल्याउन स्थानिय ले माग समेत गरेका छन्।जिल्ला प्रहरी प्रमुख नेत्रमणि गिरीले भने घटनाबारे अनुसन्धान भइरहेको जानकारी दिएका छन्।
बज्जिकाञ्चल संवाददाता,राैतहट,२२ गते वैशाख ।
वृन्दावन नगरपालिका वडा नम्बर ६ स्थित हर्षाहा उत्तर चौकमा निर्माण हुन लागेको सभागृह भवनको शिलान्यास एक कार्यक्रमका बीच सम्पन्न भएको छ । सोमबार आयोजित कार्यक्रममा प्रतिनिधिसभाका पूर्व सदस्य तथा नेकपा (एस) का स्थायी कमिटी सदस्य कल्याणी खड्का र वृन्दावन नगरपालिकाका नगर प्रमुख विनोद प्रसाद कुर्मीले संयुक्त रूपमा भवन निर्माणको शिलान्यास गर्नुभएको हो ।
करीब १ करोड रुपैयाँको लागतमा संघीय सहरी तथा बस्ती विकास कार्यक्रम अन्तर्गत निर्माण हुन लागेको सभागृह नगरको सामाजिक, सांस्कृतिक तथा धार्मिक गतिविधिका लागि उपयोगी हुने अपेक्षा गरिएको छ ।
साे अवसरमा मधेश प्रदेश सभा सदस्य कनिस पटेल,वृन्दावन नगरपालिकाको वडा नम्बर ५ का वडाअध्यक्ष फेकु दास , ८ का वडाअध्यक्ष रबिन्द्र साह, ९ का वडाअध्यक्ष प्रवेज आलम, स्थानीय जनप्रतिनिधिहरू,नगर कर्मचारी, बुद्धिजीवी, समाजसेवी ,संचारकर्मी तथा सर्वसाधारणको उल्लेख्य उपस्थिति रहेको थियो ।
