काठमाडौं –

“राजनीतिक सहभागिता हाम्रो अधिकार” भन्ने नारासहित आइतबार दिउँसो १२ः३० बजे काठमाडौँको सञ्चयकोष भवन, ठमेलबाट इन्द्रेणी गाईजात्रा र्‍याली सुरु हुँदैछ। र्‍यालीमा सहभागी हुन आयोजकहरूले लैङ्गिक तथा यौनिक अल्पसङ्ख्यक सबैलाई आह्वान गरेका छन्।

यस वर्षको इन्द्रेणी गाईजात्रा उत्सव एसियाकै पहिलो समलिङ्गी सांसद सुनिल बाबु पन्तको नेतृत्वमा, दक्षिण एसियामा पहिलो पटक कानुनी रूपमा विवाह दर्ता गरेका समलिङ्गी जोडीको उपस्थिति र यौनिक तथा लैङ्गिक अल्पसङ्ख्यक समुदायका अधिकारका लागि सक्रिय विभिन्न संस्थाहरूको सामूहिक सहभागितामा आयोजना हुन लागेको हो।

ब्लु डायमन्ड सोसाइटीका संस्थापक अध्यक्ष पन्तको नेतृत्वमा २०५९ सालदेखि गाईजात्रा उत्सवलाई लैङ्गिक तथा यौनिक अल्पसङ्ख्यक समुदायले स्वतःस्फूर्त रूपमा मनाउँदै आएका छन्।

काठमाडौँको ठमेलस्थित सञ्चयकोष अगाडिबाट हरेक वर्ष सुरु हुने यो परम्पराको थालनी पनि पन्तकै नेतृत्वमा भएको हो। उनले यसअघि चितवन र पोखरामा पनि समुदायसहित गाईजात्रा उत्सव आयोजना गरेका थिए।

यस वर्ष भने समुदायका सदस्यहरूले सरकारी वा संस्थागत सहयोगबिनै, व्यक्तिगत तथा सामूहिक योगदानमा आधारित स्वतःस्फूर्त सहभागितासहित पर्व मनाउने भएका छन्। र्‍याली काठमाडौँको सञ्चयकोष भवनबाट सुरु भई वसन्तपुर दरबार स्क्वायरमा समापन हुनेछ।

कार्यक्रममा सांस्कृतिक तथा कलात्मक प्रस्तुतिहरू समावेश हुनेछन्। वसन्तपुरमा पुगेर दिवङ्गत लैङ्गिक तथा यौनिक अल्पसङ्ख्यक सदस्यहरूको सम्झनामा दियो बालेर समापन गरिनेछ।

पन्तका अनुसार, गाईजात्रा केवल शोक वा मृत स्मृतिको दिन मात्र नभई अस्तित्व र स्वतन्त्रताको उत्सव हो। आयोजकहरूको भनाइमा, आफ्नै परिवारले नसम्झे पनि जीवित समुदायले भने दिवङ्गत सदस्यहरूलाई सधैँ सम्झिरहन्छ। गाईजात्रा उनीहरूका लागि स्वतन्त्रतापूर्वक आफ्नो पहिचान प्रकट गर्ने अवसर हो, जसमा नाचगान, हाँसो, व्यङ्ग्य र रङ्गिनता समेटिएको हुन्छ।

मायाको पहिचान नेपाल, लिड नेपाल, इन्क्लुसिभ फोरम, इन्क्लुसिभ ग्यालेक्सी रेस्टुरेन्ट, समर्पण सभ्य समाजलगायतका सङ्घसंस्थाले यस वर्षको कार्यक्रम विदेशी सहायता वा कुनै अनुदानबिनै, समुदायकै आर्थिक तथा श्रम योगदानमा सम्पन्न गर्न लागिएको जनाएका छन्।

समुदायका अगुवा तथा आयोजकहरूका अनुसार, राज्यका सबै तहमा राजनीतिक प्रतिनिधित्व र समावेशिताको सुनिश्चितताको माग अब मुखर रूपमा अघि सार्ने समय आएको छ।

काठमाडौं, २५ साउन ।

‘मेरो भ्वाइस युनिभर्स सिजन २’ को उत्कृष्ट ७ भित्र जुनु प्रसाईं पुगेकी छिन् । ताप्लेजुङको आठराई हाम्पाङमा जन्मिएकी गायिका जुनुले तेह्रथुमको आठराई ह्वाकूबाट आफ्नो शिक्षा र सांगीतिक यात्रा सुरु गरेकी हुन्।
बाल्यकालदेखि नै गायनमा रुचि राख्ने जुनुको स्वरमा नेपालीपन मात्र होइन, परिश्रम र प्रतिभाको मिठास पनि झल्किन्छ।
हाल झापालाई स्थायी ठेगाना बनाएकी उनी रोजगारीको कारणले कतारबाट आफ्नो सांगीतिक यात्रा जारी राख्दै अन्तर्राष्ट्रिय नेपाली गायन रियालिटी शो ‘मेरो भ्वाइस युनिभर्स सिजन २’ मा सहभागिता जनाएकी छिन्।
विद्यालयदेखि सुरु भएको यात्रा
गायिका जुनु विद्यालयका विभिन्न कार्यक्रमहरूमा गीत गाउने गर्थिन् र स्थानीय गायन प्रतियोगिताहरूमा सक्रिय रूपमा सहभागी हुन्थिन्। त्यही अनुभव र लगावले आज उनी अन्तर्राष्ट्रिय स्तरमा नेपाली संगीतको पहिचान बनाउँदै ‘मेरो भ्वाइस युनिभर्स सिजन २’ को उत्कृष्ट ७ भित्र आइपुगेकी छिन्
विश्वभरका नेपाली प्रतिभालाई एकै मंचमा जोड्ने अभियान नेपाल टेलिभिजनबाट प्रसारित ‘मेरो भ्वाइस युनिभर्स’ इन्ट्रा नेसनल वेलफेयर एन्ड सपोर्ट फाउन्डेसनले प्रतियोगिता आयोजना गरेको हो ।
प्रतियोगितामा २३ देशका नेपाली मूलका प्रतिभाशाली गायक–गायिकाहरूले सहभागिता जनाएका छन्। अडिसन राउण्ड विश्वका १३ मुलुकमा सम्पन्न भएको थियो। कतार अडिसनमार्फत गायिका जुनु छनोट भई अहिले फाइनल राउण्डसम्म आइपुगेकी छन्।
जुनु प्रसाईको अपिल
नमस्कार, सेवा/ सेवारो,
म हजुरहरुकै छोरी/चेली जुनु प्रसाई !
तपाईंहरूको माया, साथ, सहयोग र हौसलाले “मेरो भ्वाईस युनिभर्स सिजन-२” को टप ७ मा परेको छु । यहाँसम्मको यात्रमा सहयोग गर्नुहुने सबैजना प्रति हार्दिक आभार सहित धन्यवाद व्यक्त गर्दछु । प्रतिस्पर्धाको सिढीहरू अझै बाँकी नै छन् । मिहिनेत र संघर्ष पछि बल्ल मेरा सपना हरुले उडान भर्न लाग्दैछन । फाइनलसम्मको यात्रामा हजुरहरुको अझै धेरै साथ, सहयोग, माया र हौसलाको आशा राखेकी छु ।”
भोट गर्ने तरिका
गायिका जुनु प्रसाईलाई भोट गर्नका लागि:
मोबाइलको म्यासेज बक्समा गएर MVU 06 टाइप गरी 37000 मा पठाउनुहोस्, वा
My Intra एप डाउनलोड गरी उनीको प्रोफाइलमा क्लिक गरेर भोट गर्न सकिन्छ।

बज्जिकाञ्चल संवाददाता,सर्लाही,२५ गते साउन । 

नेपाली कांग्रेस मधेश प्रदेशका उपसभापति एवं पूर्वमन्त्री प्रदेश सांसद वीरेन्द्र प्रसाद सिंहको विशेष पहलमा

सर्लाही जिल्लाको वसवरीया गाउँपालिका वार्ड वार्ड नं ४ र ५ मा जसपा नेपाल  परित्याग गरी वार्ड नं.४ का पुर्व वार्ड अध्यक्ष कमल चौधरी तथा वर्तमान वार्ड अध्यक्ष युवानेता सुरेश साहको  नेतृत्वमा १०० जना सम्मानित व्यक्तित्व नेपाली कांग्रेसमा प्रवेश गरेका छन्।

एक विशेष कार्यक्रममा पूर्वमन्त्री सिंहले नवप्रवेशीहरूलाई माला र टीका लगाएर पार्टीमा स्वागत गरेका हुन्। कार्यक्रममा स्थानीय नेता कार्यकर्ताको उल्लेखनीय उपस्थिति रहेको थियो।

नेपाली कांग्रेस सर्लाही जिल्लामा सशक्त रुपमा स्थापित हुँदै गएको प्रदेश सांसद सिंहले बताए। उनले कांग्रेसले सर्लाहीमा १२ स्थानीय तहमा जित दर्ता गराइसकेको र आगामी निर्वाचनहरूमा प्रदेशसभा तथा प्रतिनिधिसभामा पनि विजयी हुनेगरी संगठन बलियो बनिरहेको दाबी गरे।

“जनताको दुःखसुखमा निरन्तर साथ दिइरहेका छौं, विकास–निर्माण र जनसेवामा कांग्रेसको उपस्थिति बढ्दो छ,” सिंहले कार्यक्रममा बताएका थिए।

पूर्वमन्त्री सिंहका स्वकीय सचिव निकेश त्रिपाठीका अनुसार केही दिन अगाडि मात्र हरकठवामा पार्टी प्रवेश भएका थिए।

पछिल्लो समय कांग्रेसप्रति आकर्षण बढिरहेको र विभिन्न पार्टी परित्याग गरेर नेता–कार्यकर्ताहरू प्रवेश गरिरहेको क्रम जारी छ।

बज्जिकाञ्चल संवाददाता,राैतहट,२५ गते साउन । 

गोरखा — शनिबार पालुङ्गटार नगरपालिका-५ ठाँटीपोखरीमा आयोजित कार्यक्रममा पूर्व उपप्रधानमन्त्री तथा नेकपा (माओवादी केन्द्र) का वरिष्ठ उपाध्यक्ष नारायणकाजी श्रेष्ठले नेपालको संघीय लोकतान्त्रिक गणतन्त्र र समावेशी लोकतन्त्रको रक्षा सबैको प्राथमिक दायित्व भएको बताएका छन्।

नेपाल आदिवासी जनजाति महासंघ पालुङटार नगर समन्वय परिषद् द्वारा आयोजित ३१औं विश्व आदिवासी जनजाति दिवसका अवसरमा बोल्दै उनले प्राप्त लोकतान्त्रिक व्यवस्थामाथि प्रतिगमनको खतरा रहेको भन्दै सचेत रहन आग्रह गरे। “यो व्यवस्था हजारौंको बलिदान र त्यागबाट आएको हो। यसलाई कमजोर पार्ने, अधिकार खोस्ने र आन्दोलनका सहिद, बेपत्ता तथा घाइते योद्धाहरूलाई अपमानित गर्ने षड्यन्त्रहरू भइरहेका छन्,” उनले भने।

श्रेष्ठले समावेशीकरणका उपलब्धिहरू कायम राख्दै संविधानमा उल्लिखित समानुपातिक समावेशीकरणलाई पूर्ण रूपमा कार्यान्वयन गर्नुपर्नेमा जोड दिए। स्थानीय, प्रदेश र संघीय तहमा महिला, आदिवासी जनजाति, दलित, मधेसी, थारू, मुस्लिमलगायत समुदायको प्रतिनिधित्व र आरक्षण कायम राख्ने मात्र नभई अझ विस्तार गर्नुपर्ने उनले बताए।

उनले स्वायत्त, संरक्षित र विशेष क्षेत्रको संवैधानिक व्यवस्थालाई व्यवहारमा लागू गरी सिमान्तकृत समुदायको पहिचान, अधिकार र विकासमा योगदान पुर्‍ याउन । साथै भाषा–संस्कृतिको संरक्षणका लागि राज्य र समुदाय दुवै सक्रिय हुनुपर्नेमा उनले जोड दिए।

राजनीतिक अस्थिरता अन्त्य गर्न शासन प्रणालीमा सुधार आवश्यक रहेको उल्लेख गर्दै श्रेष्ठले प्रत्यक्ष निर्वाचित कार्यकारी प्रमुखको व्यवस्था, भ्रष्टाचार नियन्त्रण र पारदर्शी शासनको आवश्यकता औंल्याए।

“राजनीति सही दिशामा भए मात्र सामाजिक–आर्थिक रुपान्तरण सम्भव छ। त्यसका लागि लोकतन्त्रको रक्षा, समावेशीकरणको कार्यान्वयन, भाषा–संस्कृतिको संरक्षण, राजनीतिक स्थिरता र सुशासन अनिवार्य छन्,” श्रेष्ठले भने। उनले बाँकी अधिकारका लागि आदिवासी जनजाति र सिमान्तकृत समुदायलाई एकताबद्ध भएर संघर्ष गर्न पनि अपिल गरे।

आरके श्रीवास्तव,राैतहट,२३ गते साउन ।
आज मधेस प्रदेशभरि दिदीबहिनी र दाजुभाइबीचको अटुट प्रेम र विश्वासको प्रतिकको रूपमा रक्षा बन्धन पर्व हर्षोल्लासका साथ मनाइँदैछ । विशेष गरी हिन्दू धर्मावलम्बीहरूको मुख्य चाडमध्ये पर्ने यो पर्व आज बिहानैदेखि भाइलाई रक्षासूत्र बाँधेर मनाइँदै आएको छ ।
राैतहट जिल्लाको गौर, चन्द्रनिगाहपुर, गरुडा, कटहरिया, इशनाथ लगायतका शहर र गाउँहरूमा दिदीबहिनीहरू भाइहरूको हातमा रक्षाबन्धन बाँधेर दीर्घायु, स्वास्थ्य र समृद्धिको कामना गरिरहेका छन् । यस अवसरमा भाइहरूले पनि दिदीबहिनीलाई उपहारस्वरूप लुगा, मिठाइ तथा नगद रकम दिइ आफ्नो प्रेम प्रकट गरिरहेका छन् ।
यस पर्वका अवसरमा विभिन्न मन्दिरहरूमा पूजा-अर्चना गर्न पुग्ने भक्तजनको भीड लागेको देखिएको छ। गौरको प्रसिद्ध दुर्गा मन्दिर, महादेवस्थान र लक्ष्मी नारायण मन्दिरमा विशेष पूजा कार्यक्रमको आयोजना गरिएको छ।
सामाजिक सद्भाव र पारिवारिक सम्बन्ध प्रगाढ बनाउने सन्देश दिने यो पर्व मधेसमा विशेष रूपमा मनाइन्छ । घर-परिवारमा उमंग र उत्साहको वातावरण देखिएको छ ।
रक्षा बन्धनसँगै आज जनैपूर्णिमा पर्व पनि मनाइँदैछ । यसै अवसरमा ब्राह्मण तथा क्षेत्री समुदायले जनै फेर्ने परम्परा निर्वाह गरिरहेका छन् ।
पर्वका कारण बजारमा पनि चहलपहल बढेको छ।

आरके श्रीवास्तव,राैतहट,२३ गते साउन ।
राैतहटकाे फतुवा बिजयपुर नगरपालिकामा आउँदो साउन ३० गते नगरसभा हुने भएको छ । नगरपालिकाको कार्यपालिका बैठकले उक्त मिति तय गरेको कार्यवाहक नगरप्रमुख अम्बेया खातुनले जानकारी दिनुभयो ।

उहाँले भन्नुभयो, ” विभिन्न कारणले संविधानले तोकेको समयसीमाभित्र बजेट पारित गर्न सकेनाै । ढिलै भएपनि यस विषयमा हामी गम्भीर छौं । त्यसैले हामी नगरसभालाई प्रभावकारी बनाउने दिशामा जुटेका छौं।”

नगरसभा तयारीका सन्दर्भमा संघीय मामिला तथा सामान्य प्रशासन मन्त्रालयको टोली बिहीबार नगरपालिकामा पुगेको थियो । मन्त्रालयका सहसचिव कालीप्रसाद पराजुलीको नेतृत्वमा आएको उक्त टोलीले साउन मसान्तभित्र बजेट पेश गरी पारित गर्न सहजीकरण गर्ने उद्देश्यले भ्रमण गरेको प्रमुख प्रशासकीय अधिकृत भरतप्रसाद यादवले जानकारी दिनुभयो ।
नगरसभा सफल बनाउन आन्तरिक तयारी तीव्र पारिएको फतुवा बिजयपुर वडा नम्बर ९ का वडा अध्यक्ष राकेश यादव (पप्पु) ले बताउनुभयो । उहाँका अनुसार नगरसभा तयारीका विषयमा वडास्तरमा समेत छलफल सुरु गरिएको छ ।

नगरसभा हुने खबरले नगरवासीहरूमा उत्साह थपिएको प्रदेश सांसद प्रत्याशी शेख सेराजले बताउनुभयो । उहाँले नगरसभा लोकतान्त्रिक अभ्यासको महत्वपूर्ण प्रक्रिया भएको भन्दै यसले पारदर्शिता र स्थानीय विकासमा सकारात्मक प्रभाव पार्ने विश्वास व्यक्त गर्नुभयो ।

नगरपालिकाले अबको केही दिनभित्रै बजेट प्रस्तावसहितको कार्यक्रम सार्वजनिक गर्ने तयारी गरिरहेको बताइएको छ ।

बज्जिकाञ्चल संवाददाता,राैतहट,२३ गते साउन ।
रौतहटकाे गरुडा नगरपालिका वडा नं. ९ गमहरियामा आम जनता पार्टीको २६ सदस्यीय नयाँ वार्ड कमिटी गठन गरिएको छ । स्थानीय जनताको हितमा काम गर्ने उद्देश्यका साथ गठित यस कमिटीले विशेष गरी बिजुली र खानेपानी निशुल्क उपलब्ध गराउने तथा किसानहरूलाई समयमा खाद–मल उपलब्ध गराउने प्रतिवद्धता जनाएको छ ।

कार्यक्रमको प्रमुख अतिथि पार्टीका नेता रविन्द्र यादव रहेका थिए भने विशिष्ट अतिथिमा केन्द्रीय सदस्य अमीनद्र यादव, मञ्जु महतो, अफ्रोज आलम, रिता शाह तथा जयलाल महतो रहेका थिए । कार्यक्रमको अध्यक्षता जयलाल महतोले गरेका थिए ।

गठित कमिटीमा प्रमशिला देवी अध्यक्ष, निकलेश महतो उपाध्यक्ष, मनौहरी देवी साह सचिव, श्रीनारायण महतो सह–सचिव र ओर्मिला देवी कोषाध्यक्षमा चयन भएका छन् ।

त्यसैगरी, सदस्यहरूमा विन्दु देवी महतो र सोविता राम लगायत अन्य स्थानीय कार्यकर्ताहरू समावेश गरिएका छन् ।

कार्यक्रममा बोल्दै अतिथिहरूले आम जनता पार्टीले स्थानीय जनताको जीवनस्तर उकास्नका लागि निरन्तर रुपमा काम गर्ने बताउँदै नवगठित कमिटीलाई बधाई तथा सफल कार्यकालको शुभकामना दिएका थिए ।

बज्जिकाञ्चल संवाददाता,बारा,२३ गते साउन । 

कलैया । आम जनता पार्टी (आजपा)का अध्यक्ष एवं पूर्वमन्त्री प्रभु साहले सिचाई सम्झौता अनुसार भारतसंग पानी नमाग्नु प्रधानमन्त्री केपी शर्मा ओलीको राष्ट्रघाती कार्य भएको टिप्पणी गरेका छन् ।

बाराको कलैयामा आज आयोजित कार्यक्रमलाई सम्बोधन गर्दै आजपा अध्यक्ष साहले नेपाल–भारत बीचको सम्झौता अनुसार नेपालले पानी नपाउदा समेत प्रधानमन्त्री ओली मौन बस्नु राष्ट्रघाती काम भएको बताए ।

मधेसमा पानीको हाहाकार हुँदा किसानले समयमै धानखेती गर्न नपाउदा मर्कामा परिरहेका बेला नारायणी सिचाई आयोजना, कोशी सिचाई आयोजनामा आउनुपर्ने पानी नआउदा समेत प्रधानमन्त्री ओलीले चुपी साध्नु राष्ट्रवादी नभई राष्ट्रघाती काम भएको उनले बताए ।

‘यही नारायणी नहर बारा जिल्लाको बीच भएर जान्छ, तर पानी छैन् । नेपाल र भारतको सम्झौता अनुसार जति दिनुपर्ने हो त्यसको १० प्रतिशत पनि पानी नेपालले पाएको छैन् । आफ्नो हक अनुसार भारतसंग पानी माग्ने काम प्रधानमन्त्री केपी शर्मा ओलीको हो कि होइन ? यो सरकार किन बनेको हो ? खाली सम्झौता गर्न, बेच्नका लागि बनेको हो ? कि आफ्नो हक खोज्नका लागि पनि बनेको हो ?,’ आजपा अध्यक्ष साहले भने, ‘केपी ओलीजी तपाई राष्ट्रवादी हो भने किन आफ्नो हक खोज्नुभएन ? किसानले किन नारायणी सिचाईबाट आफ्नो भागको पानी पाएन ? किन गण्डक नहरमा पानी आएन ? यसको जवाफ हामीलाई चाहिएको छ । केपी ओलीजी तपाई राष्ट्रघात गर्ने । हाम्रो सिचाई बेचेर अनि मालपानी जोड्ने ?’

नेपाल–भारतको सम्झौता अनुसार गण्डक नहरमा पानी नआउँदा समेत प्रधानमन्त्री ओली भारतसंग पानी नमागेर राष्ट्रघाती काम गरेको बताउदै उनले आक्रोश पोखका छन् । भारतले दिनुपर्ने पानी किन नदिएको प्रश्न गर्दै उनले यसबारेमा भारतसंग किन सम्बाद नगरेको भन्दै आलोचना समेत गरे ।

‘सम्झौता अनुसार पानी पाउनु किसानको हकअधिकार हो । तर तपाईले किन पानी नपाउदा कुरा गर्नुभएन ? आफ्नो हकअधिकार पनि छोडने सरकारलाई राष्ट्रवादी भन्ने कि राष्ट्रघाती भन्ने ? हामी त्यसलाई देशभक्त भन्ने कि दलाल भन्ने ? केपी ओलीजी यो राष्ट्रघाती काम चल्दैन । तपाई (ओली)को राष्ट्रघाती कार्य हामीलाई स्वीकार्य छैन् । तपाईको शरिरमा थोरै पनि नेपालको दानापानी छ भने नेपालको हकको बारेमा बोल्नुस् । नेपालीको भाग खोज्नुस्,’ आजपा अध्यक्ष साहले भने ।

अहिले एमाले–कांग्रेस सहितको दुई तिहाईको शक्तिशाली सरकार छ । तर दुई तिहाई शक्तिशाली सरकारको काम ‘एक पैसा’को पनि नभएको टिप्पणी साहले गरेका छन् । सर्वसधारण जनता, किसान, मजदुरको पक्षमा वर्तमान सरकार काम नगरेर ‘मृत्यु शैया’मा पुगे जस्तै अनुभुती भईरहेको उनले बताए ।

‘मधेसमा पानीको हाहाकार छ । पानी नपाएर सर्वसधारणदेखी किसानहरु पीडामा छन् । अहिले नारायणी सिचाई आयोजना, कोशी सिचाई आयोजनामा आउनुपर्ने पानी एक चौथाई समेत आएको छैन,’ आजपा अध्यक्ष साहले भने, ‘आफ्नो हक अनुसारको पानी दावी गर्नु र ल्याउनुको साटो प्रधानमन्त्री केपी ओलीजी चुपकी साधेर बस्नुभएको छ, मौन बस्नुभएको छ । चुपकी साधेर भारतको गुलामी गरेर सम्झौता अनुसार पानी आउदै । म सोध्न चाहन्छु यस्तो अवस्थामा प्रधानमन्त्रीजी चुपकी किन साधेको ? सम्झौता अनुसार पानी किन ल्याएको ?’

सरकारले मधेसलाई विपद संकटग्रस्त क्षेत्र घोषणा गर्ने तर राहत प्याकेजको कुनै योजना नल्याउनु सरकारको नालायकीपन भएको समेत उनले बताए । आजपा अध्यक्ष साहले राहत प्याकेज बिना सुख्खाक्षेत्र घोषणाले पीडितलाई झन पीडित बनाएको बताए । मधेसमा जलसंकट देखिएपछि सरकारले मधेसका आठ जिल्लालाई विपद् संकटग्रस्त क्षेत्र घोषणा गरेको थियो । तर सरकारले अहिलेसम्म राहतको कुनै प्याकेज ल्याउन सकेको छैन् ।

काठमाडौं, २३ गते साउन ।
लोकतान्त्रिक पत्रकार संघको केन्द्रीय बैठक पार्टी कार्यालय बबरमहलमा सम्पन्न भएको छ । संघका अध्यक्ष कामरेन्द्र वर्माका अनुसार बैठकमा संघको प्रथम भेला तथा प्रशिक्षण कार्यक्रम, तयारी विधान बारे छलफल ,पार्टीको मुखपत्र ‘स्मारिका’ प्रकाशन लगायतका विषयमा गम्भीर छलफल भएको छ ।

अध्यक्ष वर्माले बैठकमा संघको भावी रणनीति र सांगठनिक संरचना थप प्रभावकारी बनाउने निर्णयसमेत गरिएको जानकारी दिए । उनका अनुसार, यी प्रस्तावहरू पार्टी अध्यक्षसँग छलफल गरी अघि बढाइने छ । उनले भने, “संघको भूमिका केवल पत्रकार हितका लागि होइन, लोकतान्त्रिक मूल्यको सशक्त पक्षधरका रूपमा प्रस्तुत गर्ने तयारी छ ।”

बैठकमा संघका केन्द्रीय सदस्यहरू विजेता चौधरी, सुस्मिता लाल, संजिव कुमार झा, चन्द्रमोहन चौधरी, शिवम् मिश्रा, रानी पाल, मुकेश कुमार झा, सुरेन्द्र कुमार सिंह ,सलाहकार अभिषेख अर्याल लगायतको उपस्थिति थियो ।

बैठकपश्चात संघको टोलीले लोकतान्त्रिक समाजवादी पार्टी (लोसपा) नेपालका महासचिव मनिष मिश्रसँग भेटघाट गरी संघका क्रियाकलापबारे जानकारी गराएको थियो ।

संघले निकट भविष्यमा राष्ट्रियस्तरको प्रशिक्षण कार्यक्रम आयोजना गर्ने तयारी समेत बैठकमा गरेको जनाएको छ ।