धादिङ । धादिङको सिद्धलेकमा जिप दुर्घटना हुँदा एक जनाको मृत्यु भएको छ।

सिद्धलेक गाउँपालिका–२ नलाङ स्थित खिर्रेमा ज १ ज ४४४ नम्बरको जिप दुर्घटना हुँदा नलाङ पोखरी गाउँका ५२ वर्षीय लोक बहादुर गुरुङ मृत्यु भएको प्रहरीले जनाएको छ।

जिप सडकबाट करिब ३ सय मिटर तल खसेर दुर्घटना भएको प्रहरीको भनाइ छ। दुर्घटनामा एक जना घाइते भएका छन्। उनको स्थानीय अस्पतालमा उपचार भइरहेको प्रहरीले जनाएको छ।न्युज कारखाना

काठमाडौँ । ईङल्याण्डले जारी टी-२० विश्वकपको सुपर आठमा वेस्ट इन्डिजलाई पराजित गरेको छ । विहिबार बिहान सम्पन्न खेलमा ईङल्याण्डले वेस्ट इन्डिजलाई ८ विकेटले पराजित गरेको हो ।

वेस्ट इन्डिजले दिएको १८१ रनको लक्ष्य पछाएको ईङल्याण्डले १७.३ ओभरमा २ विकेट गुमाउदै लक्ष्य पुरा गरेको थियो ।

ईङल्याण्डका लागि फिल साल्टले सर्बाधिक ८७ रन बनाए भने जोनी बैरस्ट्रोवले अविजित ४८ रन बनाएका थिए । त्यस्तै कप्तान जोस बटलरले २५ र मोइन अलीले १३ रन बनाएका थिए ।

यस अघि टस हारेर पहिला ब्याटिंग गरेको वेस्ट इन्डिजले २० ओभरमा ४ विकेट गुमाउदै १८० रन बनाएको थियो । वेस्ट इन्डिजका जोन्सन चार्लेजले सर्बाधिक ३८ रन बनाएका थिए भने निकोलस पुरन र कप्तान रोभमन पावेलले ३६-३६ रन बनाएका थिए । त्यस्तै शेरफान रुदरफोर्डले २८ र ब्रान्डन किंगले २३ रन बनाएका थिए ।

यो जितपछि ईङल्याण्डले सुपर आठको समुह एकमा महत्वपूर्ण २ अंक हासिल गरेको छ र शिर्ष स्थानमा रहेको छ । अब ईङल्याण्डले अर्को खेल शुक्रबार राती दक्षिण अफ्रिकासँग खेल्ने तालिका रहेको छ । त्यस्तै वेस्ट इन्डिजले भने शनिबार बिहान अमेरिकासँग खेल्दै छ ।न्युज कारखाना

काठमाडौँ । साउदी अरेबियाको मक्कामा जुन १२ देखि जुन १९ सम्म गर्मीका कारण ५७७ हज यात्रीको मृत्यु भएको छ । गत वर्ष यो संख्या २४० थियो । जुन १७ मा मक्काको ग्रान्ड मस्जिदमा ५१.८ डिग्री सेल्सियस तापक्रम रेकर्ड गरिएको थियो।

द गार्डियनको रिपोर्टका अनुसार मारिनेमा ३२३ इजिप्टका र ६० जना जोर्डनका नागरिक थिए । यसबाहेक इरान, इन्डोनेसिया र सेनेगलका हज यात्रीको पनि मृत्यु भएको छ । साउदी कूटनीतिज्ञले बताए  अनुसार अधिकांश मृत्यु गर्मीका कारण बिरामी परेका कारण भएको हो ।

इजिप्टका विदेशमन्त्रीले मङ्गलबार साउदी अधिकारीहरूसँगको सहकार्यमा बेपत्ताको खोजी अभियान चलाएको बताए । गर्मीका कारण बिरामी परेका करिब २ हजार हजयात्रीको उपचार भइरहेको साउदी अरेबियाले जनाएको छ ।

जुन १७ मा मक्काको ग्रान्ड मस्जिदमा ५१.८ डिग्री सेल्सियस तापक्रम रेकर्ड गरिएको थियो । साउदी अरेबियाका अधिकारीहरुका अनुसार मक्कामा जलवायु परिवर्तनको गहिरो असर परिरहेको छ । यहाँको औसत तापक्रम हरेक १० वर्षमा ०.४ डिग्री सेल्सियसले बढिरहेको छ ।

अघिल्लो वर्ष २४० हज यात्रीको मृत्यु भएको थियो । तीमध्ये अधिकांश इन्डोनेसियाका थिए । साउदीले सबै यात्रुलाई छाता प्रयोग गर्न सल्लाह दिएको छ । यस बाहेक उनीहरुलाई लगातार पानी पिउन र घामबाट बच्न भनिएको छ ।

यद्यपि, माउन्ट अराफातमा पूजासहित अधिकांश हज अनुष्ठानहरू दिनको समयमा गरिन्छ । यसका लागि हजयात्रीहरूले लामो समय बाहिर घाममा बस्नुपर्ने हुन्छ । हजका क्रममा सडक छेउमा विरामी यात्री देख्ने गरेको हज यात्रीहरुले बताएका छन् । धेरैको ज्यान गएको छ । हज रुटमा एम्बुलेन्सको भीड लाग्ने गरेको छ ।

यस वर्ष करिब १८ लाख हज यात्री हजका लागि पुगेका छन् । जसमध्ये १६ लाख अन्य देशका छन् । हरेक वर्ष हजारौं तीर्थयात्री हज गर्न जाने गर्छन् जससँग भिसा छैन। पैसाको अभावमा यस्ता यात्री गलत बाटो भएर मक्का पुग्छन् ।

साउदी कूटनीतिज्ञहरूले मृत्यु हुनेहरूमा इजिप्टका तीर्थयात्रीहरूको संख्या धेरै छ किनभने तिनीहरूमध्ये धेरैले हजका लागि दर्ता गरेका थिएनन । यस महिनाको सुरुमा साउदी अरेबियाले हजारौं दर्ता नगरिएका हज यात्रीहरूलाई मक्काबाट हटाएको थियो ।

हजको आयोजना गर्नु साउदी अरेबियाको शाही परिवारका लागि सम्मान हो । साउदी राजालाई २ पवित्र मस्जिदको संरक्षक पनि भनिन्छ ।

इस्लाम धर्ममा हज पाँच कर्तव्य मध्ये एक हो । मान्यता अनुसार हरेक मुस्लिम व्यक्तिले आफ्नो जीवनमा कम्तिमा एक पटक यो कर्तव्य पूरा गर्नुपर्छ । सन् ६२८ मा पैगम्बर मोहम्मदले आफ्ना १४०० चेलाहरूसँग यात्रा सुरु गरेका थिए । यो इस्लामको पहिलो तीर्थयात्रा भयो र यस यात्रामा पैगम्बर इब्राहिमको धार्मिक परम्पराको पुनर्स्थापना भयो । यसलाई हज भनिन्छ । हरेक वर्ष विश्वभरका मुस्लिमहरू हज गर्न साउदी अरबको मक्का पुग्छन् । हज पाँच दिन लाग्छ र ईद अल-अधा वा बक्रिदमा समाप्त हुन्छ ।

साउदी अरेबियाले प्रत्येक देश अनुसार हज कोटा तयार गर्दछ । जसमध्ये इन्डोनेसियामा सबैभन्दा बढी कोटा छ । त्यसपछि पाकिस्तान, भारत, बंगलादेश र नाइजेरिया छन् । यसबाहेक इरान, टर्की, इजिप्ट, इथियोपिया लगायतका देशबाट हजयात्री आउने गर्दछन् । हज यात्रीहरू पहिले साउदी अरेबियाको जेद्दा सहर पुग्छन् । त्यहाँबाट बस चढेर मक्का सहर जान्छन् ।न्युज कारखाना

बारा। बारा जिल्लाको महागढीमाई नगरपालिकाको ८औं नगर सभा सफलतापूर्वक सम्पन्न भएको छ। यस नगर सभामा आगामी आर्थिक वर्षका लागि नीति तथा कार्यक्रम प्रस्तुत गरिएको छ। कुल ७७ करोड ५४ लाख ९८ हजार ५०० रुपैयाँको बजेट प्रस्ताव गरिएको छ ।

नगर सभाको उद्घाटन नगर प्रमुख उपेन्द्र प्रसाद यादवले गरेका थिए, जसमा नगरपालिकाका प्रमुख प्रशासकीय अधिकृत विजय प्रसाद कुसवाहा , उप प्रमुख तारा देवी कानु ,  नगर सभाका सदस्यहरू, विभिन्न विभागका प्रमुख तथा आम नागरिकको उपस्थिति रहेको थियो। नगर प्रमुखले विगतका उपलब्धिहरू, चुनौतीहरू र आगामी वर्षका योजना तथा प्राथमिकताहरू बारेमा सम्बोधन गरे। उनले नगरपालिकाले शिक्षा, स्वास्थ्य, पूर्वाधार, कृषि, पर्यटन र समाज कल्याण जस्ता विभिन्न क्षेत्रहरूलाई विशेष प्राथमिकता दिएको जानकारी दिए।

प्रस्तुत बजेटमा शिक्षाका लागि विद्यालय भवनहरूको निर्माण तथा पुनर्निर्माण, शैक्षिक सामग्रीको व्यवस्था र डिजिटल शिक्षा प्रवर्द्धनका लागि विशेष बजेट विनियोजन गरिएको छ। स्वास्थ्य क्षेत्रका लागि नयाँ स्वास्थ्य चौकीहरूको स्थापना, मौजुदा स्वास्थ्य संस्थाहरूको स्तरोन्नति तथा निःशुल्क औषधि वितरण कार्यक्रमलाई निरन्तरता दिने योजना समावेश गरिएको छ।

पूर्वाधार विकासका लागि सडक, पुल तथा खानेपानी आयोजनामा विशेष ध्यान दिइएको छ। नगरपालिकाले दुरदराजका क्षेत्रहरूमा आवागमन सहज बनाउन नयाँ सडक निर्माण तथा पुराना सडकहरूको मर्मत सम्भार गर्ने योजना प्रस्तुत गरेको छ। साथै, खानेपानी र सरसफाइका कार्यक्रमहरूलाई प्रभावकारी बनाउन विभिन्न योजनाहरू अघि सारिएको छ।

कृषि क्षेत्रको प्रवर्द्धनका लागि सिँचाइ सुविधा, कृषि उपकरणहरू, तथा कृषकहरूलाई तालिम प्रदान गर्ने कार्यक्रमहरूमा बजेट छुट्याइएको छ। पर्यटन प्रवर्द्धनका लागि नगरपालिकाका ऐतिहासिक, धार्मिक तथा प्राकृतिक स्थलहरूको संरक्षण र प्रवर्द्धन गर्न विशेष कार्यक्रमहरू प्रस्तुत गरिएको छ। समाज कल्याणका क्षेत्रमा वृद्धवृद्धा, महिला, बालबालिका तथा अपाङ्गता भएका व्यक्तिहरूको हितका लागि विभिन्न योजना समावेश गरिएको छ।

नगर प्रमुखले बजेटको सदुपयोग र पारदर्शिता सुनिश्चित गर्न नागरिक सहभागितालाई प्रोत्साहित गर्ने प्रतिबद्धता व्यक्त गरे। उनले नगरपालिकाका सम्पूर्ण नागरिकहरूलाई सहकार्य गर्न आह्वान गर्दै नगरको समग्र विकासका लागि सबैको साथ र सहयोग आवश्यक रहेको बताए।

नगर सभाका सदस्यहरूले आ-आफ्ना विचार तथा सुझाव प्रस्तुत गरे। अधिकांश सदस्यहरूले प्रस्तुत बजेट तथा कार्यक्रमलाई सराहना गर्दै यसलाई सफल बनाउन सहकार्य गर्ने प्रतिबद्धता जनाए। केही सदस्यहरूले भने केही क्षेत्रमा थप ध्यान दिनुपर्ने आवश्यकता औंल्याए।

समग्रमा, महागढीमाई नगरपालिकाको ८औं नगर सभा सफलतापूर्वक सम्पन्न भएको छ र प्रस्तुत गरिएको बजेट तथा कार्यक्रमहरू नगरको समग्र विकासका लागि सकारात्मक कदम भएको धारणा प्रकट गरिएको छ। नगर सभाको समापनमा नगर प्रमुखले आगामी वर्षको लागि निर्धारित लक्ष्यहरू प्राप्त गर्न सबैको सहभागिता र समर्पण आवश्यक रहेकोमा जोड दिए। सभाको समापन गर्दै, नगर प्रमुखले उपस्थित सबैलाई धन्यवाद ज्ञापन गरे र नगरको समृद्धिका लागि सबैले आफ्नो भूमिका निभाउन आग्रह गरे।न्युज कारखाना

काठमाडौँ । २१औँ शताब्दीलाई विकासको शताब्दीमा एसियाको शताब्दी भनिन्छ भने समस्याको शताब्दी पनि भन्नु गलत हुनेछैन । विशेष गरी जब यो वातावरण, प्रदूषण र प्राकृतिक प्रकोपको कुरा आउछ । आज विकासोन्मुख देश प्रदूषणको समस्यासँग लडिरहेका छन् । सन् २०२१ मा विश्वभर वायु प्रदूषणका कारण ८१ लाख मानिसको ज्यान गएको तथ्यबाट यसको गम्भीरता अनुमान लगाउन सकिन्छ ।

युनिसेफसँगको साझेदारीमा अमेरिकास्थित स्वतन्त्र अनुसन्धान संस्था हेल्थ इफेक्ट इन्स्टिच्युट (एचईआई)ले बुधबार प्रतिवेदन सार्वजनिक गरेको छ । जसमा तीन वर्षअघि वायु प्रदूषणका कारण चीनमा २१ लाख र भारतमा २३ लाख मानिसको मृत्यु भएको उल्लेख छ । यससँगै वायु प्रदूषणले बालबालिकामा पनि ठूलो असर पारेको छ । भारतमा पाँच वर्ष मुनिका एक लाख ६९ हजार चार सय बालबालिकाको मृत्यु भएको छ । यसपछि नाइजेरियामा १ लाख १४ हजार एक सय, पाकिस्तानमा ६८ हजार एक सय, इथियोपियामा ३१ हजार एक सय र बंगलादेशमा १९ हजार एक सय बालबालिकाको मृत्यु भएको रिपोर्टमा उल्लेख छ ।

प्रतिवेदनले दक्षिण एसियामा ज्यान गुमाउनुको प्रमुख कारण वायु प्रदूषण रहेको पनि उल्लेख गरेको छ । यसपछि उच्च रक्तचाप, खानपान र सुर्तीजन्य पदार्थ मृत्युको कारण बन्न थालेका छन् । सन् २०२१ मा वायु प्रदूषणका कारण गत वर्षको अनुमानभन्दा बढी मृत्यु भएको देखियो । एक अर्बभन्दा बढी जनसङ्ख्या भएका भारत र चीनले कुल विश्वव्यापी रोगको भारको ५४ प्रतिशत ओगटेका छन्।

पीएम २.५ र ओजोनका कारण हुने वायु प्रदूषणले २०२१ मा ८.१ मिलियनको मृत्यु भएको प्रक्षेपण गरिएको छ जुन कुल विश्वव्यापी मृत्युको लगभग १२ प्रतिशत हो । विश्वव्यापी वायु प्रदूषण मृत्युमध्ये ९० प्रतिशतभन्दा बढी, वा ७८ लाख मृत्यु पीएम २.५ वायु प्रदूषणका कारण हुन्छन्, जसमा एम्बियन्ट पीएम २.५ र भित्री वायु प्रदूषण पनि समावेश छ ।

यी माइक्रोस्कोपिक कणहरू, २.५ माइक्रोमिटर भन्दा कम व्यास भएका कणफोक्सोमा बस्छन् र रक्तप्रवाहमा प्रवेश गर्न सक्छन्, जसले धेरै अंग प्रणालीहरूलाई असर गर्छ र वयस्कहरूमा हृदय रोग, स्ट्रोक, मधुमेह, फोक्सोको क्यान्सरको जोखिम हुन्छ क्यान्सर र क्रोनिक अब्सट्रक्टिभ पल्मोनरी डिजिज (सीओपीडी) जस्ता रोगहरू बढ्छन् ।

अनुसन्धान संस्था एहईआईकी अध्यक्ष एलेना क्राफ्टले स्टेट अफ ग्लोबल एयर रिपोर्टले परिवर्तनको लागि जानकारी र प्रेरणा प्रदान गर्ने बताइन ।

यो नयाँ प्रतिवेदनले मानव स्वास्थ्यमा वायु प्रदूषणको महत्त्वपूर्ण प्रभावहरूको सम्झना गराएको छ, जसको असमान बोझ साना बालबालिका, वृद्ध जनसंख्या र न्यून र मध्यम आय भएका देशहरूमा परेको छ ।न्युज कारखाना

काठमाडौं । नेपाल तरुण दलका केन्द्रीय सदस्य भीम कुमार गौतमले पार्टीका गतिविधिप्रति असन्तुष्टि जनाएका छन्। आज तरुण दलका नेताहरूसँगको छलफलमा कांग्रेस पदाधिकारीहरूले भ्रातृ संस्थाको गठन र पुनर्गठन बाहेक अरू काम गर्न नसकेको भन्दै असन्तुष्टि जनाए।

पार्टीका गतिविधिहरूलाई गतिशीलता दिनुपर्नेमा भ्रातृ संस्था गठन र पुनर्गठनमै कांग्रेस अल्झिएको उनको धारणा थियो। ‘अब पनि हामी सानातिना कुरामा अल्झिनु हुँदैन। गतिशील कांग्रेस र समृद्ध देश निर्माणमा जुट्नुपर्छ। सरकारका गलत क्रियाकलापको जनतामा गएर भण्डाफोर गर्नुपर्छ। राम्रा काममा साथ दिनुपर्छ,’ उनले भने।

केही नेताहरूको स्वार्थगत राजनीतिका कारण भ्रातृ संस्थाहरू पनि गतिशील हुन नसकेको उनको गुनासो छ। पार्टीभित्रको गुटलाई अन्त्य गरेर अगाडि बढेमात्र कांग्रेस आफ्नो लक्ष्यमा पुग्न सक्ने उनको धारणा थियो।न्युज कारखाना

काठमाडौँ । बलिवुड अभिनेत्री श्रद्धा कपुर आफ्नो निजी जीवनलाई लिएर धेरै जसो चर्चामा रहने गर्दछिन । उनको नाम लामो समयदेखि लेखक राहुल मोदीसँग जोडिएको थियो । दुवैले आफ्नो सम्बन्धको बारेमा खुलेर कुरा गरेका छैनन् । तर अभिनेत्रीको हालैको सामाजिक सञ्जाल पोस्टपछि दुवै प्रेम सम्बन्धमा रहेको चर्चा भारतीय मिडियाहरुले गरेका छन् ।

श्रद्धा कपुरले इन्स्टाग्राममा राहुल मोदीसँगको सेल्फी पोस्ट गर्दै क्याप्सन लेखेकी छिन्- ‘मुटु राख… तर निन्द्रा फिर्ता देउ ।’  श्रद्धाले राहुल मोदीको बारेमा आधिकारिक पोस्ट साझा गरेको यो पहिलो पटक हो ।

उनीहरुको अफेयरको खबरले लामो समयसम्म हेडलाइन बनेको थियो । दुवै धेरै अवसरमा सँगै देखिने गरेका छन् । अनन्त अम्बानी र राधिका मर्चेन्टको प्रि-वेडिङ सेलिब्रेशनका लागि जामनगर जाँदै गर्दा मुम्बई एयरपोर्टमा दुवैलाई सँगै देखिएक ओथियो । मिडिया रिपोर्टमा उनीहरुको परिवार पनि उनीहरुको सम्बन्धमा खुसी रहेको दाबी गरिएको छ ।

मिडिया रिपोर्टका अनुसार श्रद्धा र राहुलको भेट फिल्म ‘तू झुठी मै मक्कर’ को समयमा भएको थियो । राहुल यस फिल्मसँग सह लेखकको रूपमा जोडिएका थिए । फिल्मको सुटिङपछि उनीहरुबीचको सम्बन्ध बलियो भएको बताइएको छ । फिल्मको छायांकन सकिएपछि दुवैजना एकअर्कासँग सहज भइसकेको बताइएको छ । उमेरका हिसाबले भने श्रद्धाभन्दा राहुल ३ बर्षले कान्छा छन् । श्रद्धा अहिले ३७ बर्षकी भएकी छन् भने राहुल ३४ बर्षका छन् ।

लव रञ्जन निर्देशित फिल्म ‘तू झुठी मै मक्कर’ मा श्रद्धा कपुरले रणवीर कपुरसँग स्क्रिन सेयर गरेकी थिइन् । राहुलले यस अघि  ‘प्यार का पंचनामा २’ र ‘सोनु के टिटु की स्वीटी’ मा लेखकको रूपमा पनि काम गरिसकेका छन् । सन् २०२२ मा फोटोग्राफर रोहन श्रेष्ठसँग श्रद्धाको ब्रेकअप भएपछि अभिनेता आदित्य रोय कपुरसँग पनि उनको अफ्येर्स रहेको चर्चा चलेको थियो ।
न्युज कारखाना

काठमाडौं । संघीय संसद अन्तर्गत प्रतिनिधिसभाको बैठक आज पनि बस्दैछ । बैठक बिहान ११ बजे संसद भवन नयाँबानेश्वरमा बस्नेछ । आजको बैठकमा प्रधानमन्त्री र सांसदहरुबीच प्रश्नोत्तर कार्यक्रमको कार्यसूची रहेको छ ।

प्रधानमन्त्री पुष्पकमल दाहाल प्रचण्डले प्रतिनिधिसभा नियमावली, २०७९ को परिच्छेद–९ बमोजिम सांसदहरुले उठाएको प्रश्नको जवाफ दिन लागेका हुन् । यसैगरी, आजको बैठकमा विनियोजन विधेयक, २०८१ अन्तर्गत विभिन्न मन्त्रालयका शीर्षकमाथिको छलफलका क्रममा उठेका प्रश्नहरुको सम्बन्धित मन्त्रीले जवाफ दिने कार्यक्रम रहेको छ ।

त्यस्तै आज उद्योग, वाणिज्य तथा आपूर्ति, भूमि व्यवस्था सहकारी तथा गरिबी निवारण, कृषि तथा पशुपंक्ष विकास, कानून, न्याय तथा संसदीय मामिला मन्त्रालय अन्तर्गत मन्त्रीहरुले जवाफ दिनेछन् । यस्तै, सञ्चार तथा सूचना प्रविधि, संस्कृति, पर्यटन तथा नागरिक उड्डयन र संघीय मामिला तथा सामान्य प्रशासन मन्त्रालय अन्तर्गत बजेटमा उठेका विषयमा सम्बन्धित मन्त्रीले जवाफ दिने कार्यसूची रहेको छ ।न्युज कारखाना

राैतहट,०५ गते असार ।

रौतहटको देवाही गोनाही नगरपालिका ७ स्थित उचिडिहस्थित आधारभूत विद्यालयका प्रधानाध्यापक मुक्तिप्रसाद कुशवाहालाई समुदायले नै सम्मान गरेको छ । सम्मान ग्रहण गर्दा कुशवाहा अत्यन्त भावुक भए । भावुक भएर कुशवाहाले संक्षिप्त मन्तव्य राख्दै भने – विद्यालयलाई अझ बढी दिएर जान पाऊँ । आफू विद्यालयमा शिक्षकको रुपमा हाजिर हुन आउँदा विद्यालयको कार्यालयमा हाजिरी रजिस्टरसमेत राख्ने अवस्था नरहेको सम्झँदै प्रअ कुशवाहाले भने – म तत्कालीन हेड सरको घरमा गएर नै विद्यालयको हाजिरी रजिस्टरमा हाजिरी गरेको हुँ । विद्यालयलाई एक कट्टा सात धुर घडेरीको जमिन उपलब्ध गराएको कारण समुदायले प्रअ कुशवाहालाई सम्मानित गरेको हो । प्रअ कुशवाहाले आफ्नो निजी लगानीमा गाउँको बिचमा रहेको विद्यालयमा एक कट्टा सात धुर जमिन किनिदिएर विद्यालयको नाममा पास गरिदिएका छन् । अहिले विद्यालय भवन बनिरहेको छ । प्रअ कुशवाहा भन्छन् – विद्यालयको प्रांगणमा म आफ्नै लगानीमा सरस्वती मन्दिरको निर्माण गराउँछ । आगामी केही दिनमै मन्दिरको शिलान्यास गरिने प्रअ कुशवाहाले सार्वजनिक प्रतिबद्धता व्यक्त गरेका छन् । यसै गरी विद्यालयलाई कक्षोन्नति गर्दै माध्यमिक तहसम्म पु¥याउने आफ्नो चाहना रहेको प्रअ कुशवाहाको भनाइ छ । विद्यालयमा भवन पूरा गरिदिने तथा अन्य सुविधाहरुले पनि विद्यालयलाई सम्पन्न गरेर माध्यमिक तहसम्म विद्यालय संचालन गरेपछि समाजले भनेजस्तै आफूले गर्न तयार रहेको प्रअ कुशवाहाको भनाइ छ । प्रअ कुशवाहालाई देवाही गोनाही नगरपालिकाका नगर प्रमुख प्रेमलाल साहले सम्मानित गर्दै प्रशंसा गरेका छन् । विद्यालयमा विभिन्न किसिमको राजनीति हुने गरेको र सकारात्मक कामलाई पनि केही मानिसले प्रभावित गर्न खोजेको बताउँदै नगर प्रमुख साहले सबै किसिमको नकारात्मक विचारलाई चिर्दै विद्यालय सही किसिमले संचालन भएको र विद्यालयले जग्गा प्राप्त गरेको बताएका छन् । नगर प्रमुख साहले विद्यालयलाई जमिन दिने कुराको पनि विरोध भएकोतर्फ संकेत गरेका छन् । विद्यालयलाई निजी लगानीमा जमिन किनिदिएकोमा नगरपालिकाको तर्फबाट नगर प्रमुख साहले पहिले नै सम्मानित गरिसकेका छन् । प्रअ कुशवाहालाई भवन निर्माण समिति, पूर्व विद्यालय व्यवस्थापन समिति तथा स्थानीय रुपमा सक्रिय आम जनता पार्टी लगायत समुदायले सम्मानित गरेको हो । प्रअ कुशवाहालाई सम्मानित गर्दै स्थानीयबासीले निकै प्रशंसा गरेका छन् । विद्यालयमा जमिन दिन तथा विद्यालयको निर्माणमा आफूहरुले दिएको भन्दा धेरै बढी योगदान प्रअ कुशवाहाको रहेको भन्दै खुलेरै प्रशंसा गरेका छन् ।

काठमाडौँ । जर्मनीले जारी युरोकपमा लगातार दोस्रो जित हासिल गरेको छ ।

गएराती सम्पन्न समुह ए अन्तर्गतको खेलमा जर्मनीलके हंगेरीलाई २-० गोल अन्तरले पराजित गर्दै प्रतियोगितामा लगातार दोस्रो जित हासिल गरेको हो ।

जर्मनीको जितमा जामल मुसियाला र इक्के गुनडोगानले एक एक गोल गरेका थिए ।

यो जितपछि जर्मनीको समुह ए मा २ खेलमा ६ अंक भएको छ र शिर्ष स्थानमा रहेको छ । यो जितपछि जर्मनी यस युरोकपको नकआउट चरणमा पुग्ने पहिलो देश बनेको छ ।

त्यसैगरी हंगेरीले भने प्रतियोगितामा लगातार दोस्रो हार बेहोरेको छ ।

अब जर्मनीले अर्को खेल जुन २४ मा स्वीजरल्याण्डसँग खेल्ने छ भने हंगेरीले स्कटल्याण्डसँग खेल्ने छ । न्युज कारखाना