राकेश यादव,राैतहट, १ गते साउन ।
रौतहट जिल्लाको सदरमुकाम गौर बाट प्रहरीले ठुलो मात्रामा लागु औषध सहित २ जनालाइ पक्राउ गरेको छ।
लागु औषध नियन्त्रण ब्युरो शाखा कार्यालय बिरगंज पर्सा र जिल्ला प्रहरी कार्यालय रौतहटका प्रहरी निरिक्षक राम कुमार महतोको नेतृत्वमा खटेको संयुक्त टोलीले प्रतिबन्धित औषधि ३ हजार ट्याब्लेट र ९ सय एम्पुल सहित २ जना लाइ पक्राउ गरेको हो।
भारत बैरगंनियाबाट बी आर ०५ यु ५८६० नम्बरको मोटर साइकललाइ गौर नगर पालिका वडा नम्बर १ स्थित शुभम होटेल अगाडी रोकेर चेकजाच गर्दा उक्त परिणाम बरावारको लागु औषध बरामद भएको जिल्ला प्रहरी कार्यालय रौतहटले जनाएको छ।
लागु औषध साथ स्थानीय राजदेवी नगर पालिका वडा नम्बर ८ मा बस्ने बिश्वनाथ पंडितको २२ बर्षीय छोरा नितेश कुमार पंडित र शिब राय यादवको ३२ बर्षीय छोरा पिन्टू कुमार यादवलाइ नियन्त्रणमा लिइएको प्रहरी नायव उपरिक्षक दिपक कुमार रायले जानकारी दिएका छन्।
प्लास्टिकको कालो रंगको झोलामा लुकाई राखेको अवस्थामा नाइट्रोभेट १० लेखिएको १२० पत्तामा १८ सय ट्याब्लेट,नेटजेकेयर १० लेखिएको ९० पत्तामा ९०० ट्याब्लेट,नेटज़ेकेयर १० लेखिएको ३० पत्ता ३०० सानो ट्याब्लेट, डाईजेपाम ३०० एम्पुल, फेनेरगन ३०० एम्पुल, बुप्रेनोरफिने इन्जेक्शन ३०० एम्पुल गरी ९०० एम्पुल र २ थान मोबाइल बरामद गरिएको प्रबक्ता राय ले जनाएको छ।
पक्राउ परेका दुवै जनालाई रौतहट जिल्ला अदालत बाट म्याद थप गराई अनुसन्धानको कार्य अगाडी बढाइएको छ।
बज्जिकाञ्चल संवाददाता,राैतहट,०१ गते साउन ।
नेपाल प्रेस युनियनले आफ्नो विधान २०४८ को छैटौं संशोधन (२०७९) अनुसार धारा २१ को (झ) बमोजिम पत्रकारिता क्षेत्रमा योगदान पुर्याउँदै आएका ६ जना पत्रकारहरुलाई केन्द्रीय समितिमा सदस्य पदमा मनोनीत गरेको छ ।
संस्थाका अध्यक्ष शिव लम्सालले एक विज्ञप्ति मार्फत मनोनीत सदस्यहरुलाई बधाई दिँदै युनियनको मूल्य, मान्यता, आदर्श र प्रेस स्वतन्त्रता संरक्षण तथा पत्रकारिता क्षेत्रको विकासमा उनीहरुले महत्वपूर्ण भूमिका निर्वाह गर्ने विश्वास व्यक्त गरेका छन् ।
युनियनले मनोनीत गरेका केन्द्रीय सदस्यहरूमा शिव पुरी ( रौतहट),पोषनाथ अधिकारी(धादिङ),बिनोद कुमार मल्ल (मुगु),रविन्द्र सिंह(वारा),जित बहादुर भण्डारी(पाँचथर) र दिपेन्द्र बस्नेत(कञ्चनपुर) रहेका छन् ।
युनियनको विधान अनुसार मनोनीत सदस्यहरूले पूर्ण कार्यकारिणी अधिकारसहित केन्द्रीय समितिमा जिम्मेवारी सम्हाल्नेछन् ।
ओम प्रकाश यादव,साउन १ गते, रौतहट।
नेपाली कांग्रेसका मधेश प्रदेश सभापति कृष्ण प्रसाद यादवको नेतृत्वदायी भूमिका र विशेष सक्रियताका कारण मधेश प्रदेशमा विकास निर्माण कार्य गति लिएको छ।
कांग्रेस मधेश प्रदेश सरकारमा सहभागी रहेको अवस्थामा कांग्रेस मधेश प्रदेश सभापति यादवले प्रदेश सरकारमा सहभागी आफ्ना मन्त्रीहरुलाई विकासको कामलाई द्रुत गतिमा अगाडी बढाउन दिएको निर्देशन अनुसार नै ती मन्त्रीहरुले काम गरेकोले विकास निर्माण कार्य तीब्र गतिमा अगाडी बढेको हो ।
मधेश प्रदेश सरकारका पूर्व भौतिक पूर्वाधार विकास मन्त्री एवं रौतहट क्षेत्र नम्बर १ ख का प्रदेशसभा सदस्य समेत रहेका कांग्रेस नेता कृष्ण प्रसाद यादवको निर्देशनमा पार्टीका मन्त्रीहरुले जनताको इच्छा र चाहना अनुसार काम गर्दा मधेश प्रदेश शिक्षा, स्वास्थ्य, कृषि खानेपानी, भौतिक पूर्वाधार निर्माण लगाएत कार्यमा पछिल्लो समय फड्को मार्न थालेको छ।
भ्रष्टाचारलाई निर्मूल पार्न र सुशासन कायम गर्ने गरी नेता कृष्ण प्रसाद यादवले आफ्ना पार्टीका मन्त्रीहरुलाई काम गर्न दिएको निर्देशनको पूर्ण पालना हुँदा प्रदेशमा सयौं महत्वकाँक्षी योजनाहरू धमाधम अगाडि बढेको हो।
कृष्ण प्रसाद यादवले नेपाली कांग्रेसको मधेश प्रदेशको नेतृत्वको जिम्मेवारी सम्हाल्ले देखि नै कांग्रेसको सफल नेतृत्वका कारण मधेश प्रदेशमा विकास निर्माणका कार्य तीब्र गतिमा अगाडी बढेको छ।
कांग्रेसका मधेश प्रदेश सभापति कृष्ण प्रसाद यादव प्रदेशकाे राजनीतिमा ठूलो पकड़ भएका दिगज नेता हुन् । मधेशको राजनीतिमा कृष्ण यादव ठूलो प्रभाव राख्ने एक क्रांतिकारी , विकास र समृद्धिको सम्बाहक नेता हुन ।
नेता यादव प्रदेशको राजनीतिमा ठूलो प्रभाव राख्ने एक प्रभावशाली एवं शक्तिशाली नेता मानिन्छ । त्यसैले उनको नेतृत्व प्रदेशका नेपाली कांग्रेसका सबै नेताले सहज स्वीकार गर्छन र उनीहरूले सभापति यादवको निर्देशनको पूर्ण पालना गर्ने गर्दछन् ।
नेता यादवको अग्रगामी एवं दूरदर्शी सोच, भिजन, योजनाका कारण मधेश प्रदेशमा यतिखेर ठुल ठूला विकासका योजनाहरू अगाडि बढेको पाइएको छ भने मधेश प्रदेश विकास र समृद्धिको दिशामा अगाडि बढ्दै गएको छ।
कांग्रेस सभापति कृष्ण प्रसाद यादवलाई मधेश प्रदेशका जनता एकपटक मुख्यमन्त्रीको रूपमा हेर्न धेरै दिनदेखि आतुर रहेको पाइएको छ।
कृष्ण प्रसाद यादव मुख्यमन्त्री बनेपछि मात्र मधेश प्रदेश विकसित र समृद्ध हुने भन्दै त्यहाँका जनता उनलाई नै मुख्यमन्त्रीको रूपमा हेर्न चाहेको छ।
कृष्ण प्रसाद यादव मधेश प्रदेश सरकारको नेतृत्व गर्ने अवसर पाएपछि मात्र मधेश र मधेशी जनताको अवस्था परिवर्तन हुने र विकासको काम झन् तिब्रता पाउने उनीहरूको बुझाइ छ।
कृष्ण प्रसाद यादव मुख्यमन्त्री बनेपछि नेपाली कांग्रेस मधेश प्रदेशमा अझै बलियो र मजबूत हुने र आगामी निर्वाचनमा कांग्रेसको सीट बढ्ने भएको हुनाले पार्टीले कृष्ण प्रसाद यादवलाई मधेश प्रदेशको मुख्यमन्त्री बनाउनका लागि विशेष पहलकदमी लिनु आवश्यक रहेको मधेश प्रदेशका कांग्रेसका नेता कार्यकर्ताहरु बताउँछन् ।
आरके श्रीवास्तव, रौतहट,०१ गते साउन ।
रौतहटको गरुडा नगरपालिका–९ स्थित श्री माध्यमिक विद्यालय नयाँ गम्हरियामा कार्यरत शिक्षक रवीन्द्र प्रसाद साहलाई विद्यालयबाट खारिज सहित निष्कासन गरिएको छ । उनले कक्षा १० मा अध्ययनरत एक १६ वर्षीया छात्रालाई मोबाइलमार्फत ‘ह्यापी बर्थडे मेरी जान’ भन्ने आपत्तिजनक सन्देश पठाएको आरोपमा विद्यालयले उनलाई हटाउने निर्णय गरेको हो ।
विद्यालयका निवर्तमान व्यवस्थापन समिति अध्यक्ष राजकुमार दासका अनुसार असार २९ गते वडाध्यक्ष राजेश कुमार सहनीको संयोजकत्वमा बसेको वडा समिति, स्थानीय अभिभावक, विभिन्न राजनीतिक दलका प्रतिनिधि र समाजसेवीहरूको बैठकले उक्त निर्णय गरेको हो ।
पीडित छात्राका अभिभावकले दिएको उजुरीका आधारमा विगत एक वर्षदेखि शिक्षक साहले यौनजन्य मनसाय राखी डिजिटल सन्देश पठाउँदै आएको खुलासा भएको बैठकले जनाएको छ ।
४९ वर्षीय साहले कक्षा ७ सम्म अंग्रेजी र कक्षा ९ लाई सामाजिक विषय अध्यापन गर्दै आएका थिए । सन्देश सार्वजनिक भएपछि विद्यार्थीहरू आक्रोशित बनेका थिए र विद्यालय परिसरमै प्रदर्शन समेत गरेका थिए ।
ईलाका प्रहरी कार्यालय गरुडाका प्रहरी नायब उपरीक्षक (डीएसपी) राजन कार्कीका अनुसार साहविरुद्ध अभद्र व्यवहार सम्बन्धी मुद्दा दर्ता गरी सात दिनको म्याद लिइएको छ । उनलाई गत आइतवार पक्राउ गर्न खोज्दा विद्यार्थीहरूले विरोधस्वरूप ढुङ्गामुढा गरेपछि प्रहरीले एक राउण्ड अश्रुग्यास प्रहार गर्नुपरेको थियो । त्यस क्रममा चार जना प्रहरी सामान्य घाइते भएका थिए ।
एक स्थानीय बासिन्दाका अनुसार साह यसअघि २०६२/६३ सालतिर पनि यस्तै किसिमको दुर्व्यवहारमा संलग्न भएका थिए र सामाजिक दण्ड भोगेका थिए । तर कानुनी कारबाही नभएकाले यस्ता व्यवहार दोहोरिएको आरोप लागेको छ ।
स्थानीय सर्फलाल पासवानले भने गरुडा नगरपालिकाले शिक्षक साहलाई जोगाउन प्रयास गरिरहेको आरोप समेत लगाएका छन् ।
राहत शिक्षक साह राहत निमावि दरबन्दीका करार शिक्षक हुन् । निज शिक्षकको नियुक्ति प्रक्रिया कानुन संवत् नभएर दिएको उजुरी आधारमा २०७२ मा अख्तियारले समेत बर्खास्त गरेका थिए तर पनि पुनः विद्यालयले सोही पदमा विज्ञापन निकाली तत्कालीन विव्यास अध्यक्ष राजकुमार दास तत्माले रवीन्द्र प्रसाद साह लाई नियुक्ति गरेका थिए ।
यता स्थानीय अभिभावक, समाजसेवी र विद्यार्थीहरू शिक्षक साहलाई कडा कानुनी कारबाहीको माग गर्दै पीडित छात्राको मनोवैज्ञानिक सुरक्षाका लागि तत्काल कदम चाल्न आग्रह गरिरहेका छन् ।
विद्यालयले शिक्षकको आचरणविरुद्ध कडा निर्णय लिएपछि स्थानीयले स्वागत गरे पनि अब कानुनी प्रक्रिया पनि निष्पक्ष हुनुपर्ने उनीहरूको माग छ ।
आरके श्रीवास्तव,राैतहट,०१ गते साउन ।
लोकतान्त्रिक पत्रकार संघ पर्साको कार्यालय आज एक समारोहबीच उद्घाटन गरिएको छ । संघका जिल्ला संयोजक समसुदिन मियाँको अध्यक्षतामा सम्पन्न कार्यक्रममा मधेस प्रदेशका पूर्व वनमन्त्री रमेश कुर्मी प्रमुख अतिथिका रूपमा सहभागी हुनु भयो भने उद्योगपति डा. सुबोध प्रसाद गुप्ता विशिष्ट अतिथि रहनु भएकाे थियोे ।
कार्यक्रमलाई सम्बोधन गर्दै प्रमुख अतिथि कुर्मीले लोकतान्त्रिक पत्रकार संघलाई आवश्यक परेको जुनसुकै समयमा सहयोग गर्न आफू तयार रहेको प्रतिबद्धता जनाउनु भयो । उहाँले पत्रकारहरूलाई समाजमा सत्य र निष्पक्ष सूचनाको प्रवाहमार्फत आफ्नो भूमिका मजबुत रूपमा निर्वाह गर्न आग्रह गर्नु भयो । हालै पत्रकारहरूमाथि भएका घटनाहरूको निन्दा गर्दै उहाँले
पत्रकार सुरक्षाको ग्यारेन्टी लिन राज्य जिम्मेवार हुनुपर्नेमा जोड दिनुभयो ।
उद्घाटन सत्रमा लोकतान्त्रिक मुस्लिम संघका केन्द्रीय अध्यक्ष डा. कमरुल्ला अन्सारी, उद्योगपति डा. सुबोध प्रसाद गुप्ता, लोसपा नेपालका केन्द्रीय उपाध्यक्ष श्याम प्रसाद गुप्ता लगायतका विशिष्ट व्यक्तिहरूले मन्तव्य राख्दै पत्रकारिता लोकतन्त्रको मेरुदण्ड भएको र जनसरोकारका मुद्दामा कलम चलाउन पत्रकारहरूले अझ सशक्त भूमिका खेल्नुपर्नेमा जोड दिएका थिए ।
कार्यक्रममा पर्सा जिल्लाका विभिन्न सञ्चारमाध्यममा आबद्ध पत्रकारहरूको उल्लेख्य उपस्थिति रहेको थियो। उनीहरूले संघमार्फत् अझ व्यवस्थित र जनउत्तरदायी पत्रकारिता गर्ने प्रतिबद्धता जनाएका छन् ।
लोकतान्त्रिक पत्रकार संघ पर्सा शाखाले पहिलोपटक आफ्नै कार्यालय उद्घाटन गरेको छ । पर्सामा पहिलोपटक औपचारिक रुपमा कार्यालय स्थापना गर्दै संघले पत्रकारिता क्षेत्रमै संस्थागत उपस्थिति विस्तार गरेको हो ।
संघका अन्य जिल्लामा हालसम्म कार्यालय सञ्चालनमा नरहे पनि पर्साबाट यस कार्यको थालनी गरिएको छ । पछिल्लो समय लोकतान्त्रिक पत्रकार संघ संगठनका रुपमा स्थापित बन्दै गएको छ ।
संघले मधेस प्रदेशका ८ वटै जिल्लामा संयोजक तोकेको छ भने अन्य जिल्लाहरूमा पनि संयोजक नियुक्त गर्ने काम जारी रहेको जनाएको छ ।
लोकतान्त्रिक पत्रकार संघको नेतृत्व हाल केन्द्रीय अध्यक्ष कामरेन्द्र वर्माले गरिरहेका छन् । उनको नेतृत्वमा संघले संगठन विस्तारसँगै लोकतान्त्रिक मूल्य र स्वतन्त्र पत्रकारिताको पक्षमा सक्रिय भूमिका निर्वाह गर्दै आएको छ ।
संघले निकट भविष्यमा अन्य जिल्लाहरूमा पनि कार्यालय विस्तार गर्ने लक्ष्य लिएको छ ।
कामरेन्द्र वर्मा,काठमाडौं,३२ गते असार ।
भोजपुर जिल्लाको अरुण गाउँपालिकामा आज एक विशेष कार्यक्रमबीच ‘अरुण बहुउद्देश्यीय प्रतिष्ठान भवन’ को शिलान्यास गरिएको छ। सो भवनको निर्माण भारत सरकारको आर्थिक सहयोगमा हुन लागेको हो । शिलान्यास कार्यक्रम भारतीय राजदूतावास, काठमाडौंका काउन्सलर अविनाश कुमार सिंह र अरुण गाउँपालिकाका अध्यक्ष शालिकराम खत्रीले संयुक्तरूपमा सम्पन्न गर्नुभयो । कार्यक्रममा राजनीतिक प्रतिनिधि, सरकारी अधिकारीहरू तथा स्थानीय समाजसेवीहरूको पनि उपस्थिति रहेको थियो ।
भारत-नेपाल विकास सहकार्य अन्तर्गत नेरु. ३.१८८ करोड लागतमा निर्माण हुन लागेको यो परियोजना उच्च प्रभाव सामुदायिक विकास परियोजनाको रूपमा अघि बढाइएको छ। तीन तल्ले भवनमा कक्षा कोठाहरू, शिक्षक कक्ष, बैठक कोठा, कार्यक्रम हल, छात्र तथा छात्राका लागि छुट्टाछुट्टै शौचालय लगायतका सहयोगी संरचनाहरू समावेश हुनेछन् । परियोजनाको कार्यान्वयन अरुण गाउँपालिकामार्फत गरिनेछ ।
शिलान्यास समारोहमा बोल्दै अध्यक्ष खत्रीले भारत सरकारबाट नेपालका ग्रामीण क्षेत्रहरूमा भइरहेको निरन्तर सहयोगप्रति आभार व्यक्त गर्दै यो परियोजनाले स्थानिय शिक्षा तथा सांस्कृतिक गतिविधिमा महत्वपूर्ण टेवा पुर्याउने विश्वास व्यक्त गर्नुभयो ।
सन् २००३ यता भारत सरकारले नेपालभर ५७० भन्दा बढी उच्च प्रभाव सामुदायिक विकास परियोजनाहरू कार्यान्वयन गरिसकेको छ, जसमा ९३ वटा कोशी प्रदेशमा रहेका छन् । यस्तै, भारत सरकारले नेपालका स्वास्थ्य तथा शैक्षिक संस्थाहरूलाई १०४९ वटा एम्बुलेन्स र ३०० वटा स्कुल बस उपहारस्वरूप प्रदान गरेकोमा भोजपुर जिल्लालाई ७ वटा एम्बुलेन्स र १ वटा स्कुल बस प्राप्त भइसकेको छ ।
भारत र नेपालबीचको मित्रतापूर्ण सम्बन्धलाई अझ सुदृढ बनाउँदै जान उच्च प्रभाव विकास परियोजनाहरूले दुवै देशबीचको सहयोग र सहकार्यलाई थप प्रभावकारी बनाएको जनाइएको छ । भारत सरकारले नेपाल सरकारका प्राथमिकतामा रहेका क्षेत्रमा साथ दिन सदा तत्पर रहेको पनि प्रेस विज्ञप्तिमा उल्लेख गरिएको छ ।
बज्जिकाञ्चल संवाददाता,राैतहट,३२ गते असार ।
राैतहटकाे बौधीमाई नगरपालिका वडा नं. ४ निवासी रामअज्ञा यादव क्यान्सर रोगबाट पीडित भई हाल भरतपुरस्थित क्यान्सर अस्पतालमा उपचाररत हुनुहुन्छ ।
निजको स्वास्थ्य अवस्थाबारे जानकारी लिन आज वडा नं. ४ का वडाध्यक्ष तुरन्तनारायण यादव अस्पताल पुग्नु भएको छ । उहाँले यादवसँग भेट गरी सम्पूर्ण अवस्थाको बारेमा जानकारी लिँदै शीघ्र स्वास्थ्य लाभको कामना गर्नुभएको छ ।
वडाध्यक्ष यादवले भन्नुभयो, “रामअज्ञा यादवको उपचार सफल होस् भन्ने हाम्रो शुभेच्छा छ। उहाँ चाँडै निको भएर घर फर्कुन् भन्ने कामना गर्दै हामी सबैले पशुपतिनाथ भगवानसँग प्रार्थना गरौं।”
उनले भने,”आफनाे तर्फबाट हुने सक्दाे सहयोगका लागि नगरपालिकामा पहल गर्ने प्रतिबद्धता जनाए । ” सम्पूर्ण सहयोगका लागि आफू प्रतिबद्ध रहेको उनकाे भनाइ छ ।
समाजका पाको व्यक्तित्व समेत रहनुभएका रामअज्ञा यादवको स्वास्थ्यमा सुधार आओस् भन्ने शुभेच्छा स्थानीयवासी र शुभचिन्तकहरूले पनि व्यक्त गरेका छन् ।
काठमाडौं, ३२ गते असार ।
आम जनता पार्टी (आजपा) का अध्यक्ष एवं पूर्वमन्त्री प्रभु साहले प्रधानमन्त्री केपी शर्मा ओलीले प्रकृतिले दिएको हावापानीको वितरणमा पनि विभेद गरेको बताएका छन् ।
काठमाडौंको सिंहदरबार स्थित आजपाको संसदीय दलको कार्यालयमा सञ्चारकर्मीसंग कुराकानी गर्दै साहले आफै विदेशबाट मिनिरल वाटर मगाएर पिउँने गरेका प्रधानमन्त्री ओलीले नेपाली जनतालाई खानेपानी रोकेर मानवता विरोधी आपराध गरेको टिप्पणी गरे ।
‘प्रकृतिले हामी सबैलाई हावापानी बराबर दिएको छ । त्यसमा सबैको बराबर हक लाग्छ । तर आफै विदेशबाट मिनिर वाटर मगाएर पिउँने प्रधानमन्त्रीजीले नेपाली जनतालाई खानेपानी रोकेर मानवता विरोधी आपराध गर्दैहुनुहुन्छ,’ आजपा अध्यक्ष साहले भने, ‘प्रधानमन्त्रीजीले आफु जनताले तिरेको करबाट बिदेसी पानी पिउँनुहुन्छ । तर सर्वसधारणलाई नर्मल पानी पनि नदिएर के गर्न खोज्नुभएको हो ? के जनतालाई खानेपानी दिन न सक्ने प्रधानमन्त्री ओलीलाई कुर्सीमा बस्ने हक छ ?’
अहिले तराई मधेसमा पानीको हाहाकार छ । इनार सुकेको, चापाकलबाट पानी आउँन छोडेको बताउदै उनले यथासिघ्र खानेपानीको व्यवस्था गर्नुपर्ने बताए । साथै काठमाडौंको सुकुम्बासी बस्तीमा खानेपानी सरकारले नदिएपछि आन्दोलन गरिरहेका आम सुकुम्बासी तथा अव्यवस्थित बसोबास संघको माग यथासिघ्र सम्बोधन गर्नुपर्ने उनले बताए ।
सुकुम्बासी संघले खानेपानीको माग गर्दै काठमाडौंको त्रिपुरेश्वर स्थित काठमाडौं उपत्यका खानेपानी लिमिटेड (केयूकेएल) को कार्यालय अगाडी दिनहुँ धर्ना दिदै आएका छन् । सुुकुम्बासी बस्तीमा खानेपानीको व्यवस्था गर्नुपर्ने उनीहरुको जायज माग समेत सम्बोधन नगरेर प्रधानमन्त्री आफू नागै रहेको प्रमाण दिएको टिप्पणी उनले गरे ।
‘काठमाडौंको बिभिन्न सुकुम्बासी बस्तीमा खानेपानी सरकारले रोकेको छ । २१औँ शताब्दीमा खानेपानी रोकेर सरकारले मानवता विरोध आपराध गरिरहेको छ । सरकार नागै रहेको प्रमाण दिइरहेको छ,’ आजपा अध्यक्ष साहले भने, ‘उता तराई मधेसमा पानीको हाहाकार छ तर सरकार यहाँ छ भन्ने अनुभुति सर्वसधारणले गर्न पाएनन् । खानेपानी मन्त्रीलाई मतदान गर्ने पर्साका मतदाताले पानी मागिरहेका छन् । तर प्रधानमन्त्रीदेखी लिएर खानेपानी मन्त्रीलाई समेत कुनै चासो र चिन्ता छैन् ।’
यस्तै, आजपा अध्यक्ष साहले एउटै घटनामा जोडिएका निवर्तमान सामान्य प्रशासन मन्त्री राजकुमार गुप्ताको राजीनामा गराए । तर सोही मुद्धामा संलग्न रहेका सहकारी मन्त्री बलराम अधिकारीलाई संरक्षण गरिरहेको उनले बताए । ‘प्रधानमन्त्रीले एउटै घटनामा जोडिएक एक मन्त्रीलाई राजीनामा गराउँनुभयो, तर अर्को मन्त्रीलाई संरक्षण गर्नुभइरहेको छ । कारवाहीमा पनि विभेदन किन ?’ उनले प्रश्न गरे ।
अभिमनु कुमार पटेल,रौतहट, ३२ गते असार ।
नेपालमा लोकतान्त्रिक संविधान आएको वर्षौं बितिसक्दा पनि दलित महिला, गरिब, असहाय र अल्पसंख्यक समुदायमाथि भइरहेको अत्याचार, बलात्कार र दमनका घटनाले मुलुकको न्यायिक र सामाजिक संरचनामाथि गम्भीर प्रश्न उठाइरहेका छन्।
पछिल्लो उदाहरण रौतहटको राजपुर नगरपालिका ३ बलुवा गाउँकी ३० वर्षीया दलित महिला (उपनाम) शरना देवी राम चमारमाथि भएको बलात्कारको घटना हो, जसमा आरोपी खुलेआम समाजमा घुमिरहेछन्, तर पीडित न्यायको खोजीमा दरबारदेखि चौकीसम्म धाइरहेकी छन्।
पीडित शरना देवी रामले पारिवारिक सम्पत्तिको विवादमा गाउँका भलाद्मीहरूसँग मिलेर आपसी छलफलको पहल गरेकी थिइन्। त्यही सिलसिलामा गाउँकै ६० वर्षीय खुर्सैद खाँ पैठानले आफ्नो हैसियत, धन र प्रभावको दुरुपयोग गर्दै महिलाको नम्बर लिएर निरन्तर यौन प्रस्ताव, धम्की र प्रलोभन दिन थाले। अन्ततः २०८१ जेठ २५ गते उनले घर नजिकैको बाँसघारीमा महिलामाथि जबर्जस्ती बलात्कार गरे। हातमुख बाँधेर गरिएको सो जघन्य अपराधपछि पीडितले आफन्तको सहयोगमा खोजिन् तर सबै ठाउँबाट निराशा बेहोर्न पुगिन्।
शुरुआती प्रयासमा इलाका प्रहरी कार्यालय राजपुर फरहदवाले चासो नदेखाएपछि पीडित जिल्ला प्रहरी कार्यालय गौर पुगिन्। त्यहाँ तत्कालीन प्रहरी उपरीक्षक दिलीप घिमिरेको निर्देशनमा मुद्दा दर्ता त भयो, तर आरोपी खुर्सैद खाँ पैठान एक वर्षसम्म फरार रहे। त्यो अवधिमा पीडितको घरमा आरोपीका मान्छेहरू ६ देखि ८ लाख रुपैयाँ लिएर पुगेर दबाब दिने काम गर्दै आएका थिए। तर पीडित र उनका परिवारले “पैसा होइन, न्याय चाहिन्छ” भन्ने अडानमा कायम रहे।
यस्तो अवस्थामा पनि आरोपी खुला समाजमा घुम्दै, सरकारी निकायको संरक्षणमा प्रहरी कार्यालयमै पुगेको समाचारले पीडित परिवार झनै त्रसित भएको छ। पीडित महिला भन्छिन्, “उसको पैसा र पहुँचका अगाडि मेरो इज्जत, पीडा र प्रमाण केही पनि भएन। अब अदालतबाट न्याय नपाए मैले विष खाएर आत्महत्या गर्छु।”
स्रोतका अनुसार आरोपी खुर्सैद खाँ पहिले नेकपा माओवादी केन्द्रमा आबद्ध थिए, तर यो घटना सार्वजनिक भएपछि उनी नेपाली काँग्रेसको शरणमा पुगेका छन्। काँग्रेसका केही स्थानीय नेताहरूले उनीमाथि लागेको बलात्कार मुद्दालाई राजनीतिक दबाब र सत्ताको पहुँचमार्फत कमजोर पार्न खोजिरहेको गम्भीर आरोप पीडित पक्षले लगाएका छन्। “यदि उनले यो घटनाबाट पनि सजायबाट उन्मुक्ति पाए भने यो देशको कानुन दलित, गरीब र महिलाका लागि होइन, धनी र पहुँचवालाका लागि मात्रै हो भन्ने पुष्टि हुन्छ,” पीडितका श्रीमानको भनाइ छ।
शरना देवी रामको घटनामात्र होइन, गाउँका अन्य महिलाहरूले पनि खुर्सैद खाँबाट यस्तै उत्पीडन भोगेको आरोप छ। तर डर र असहायताका कारण कोही अघि आउन सकेका छैनन्। यसले देखाउँछ कि नेपालमा अझै पनि दलित महिला दुई तहको उत्पीडनको शिकार छन् जातीय भेदभाव र लैंगिक हिंसा।
मुद्दा दर्ता भएर वर्षौं बित्दा पनि पीडकको गिरफ्तारी नहुनु, प्रहरी प्रशासनको निष्क्रियता, राजनीतिक संरक्षणको आरोप, र आर्थिक प्रलोभनको प्रयास यी सबैले नेपालको न्याय प्रणालीप्रति गहिरो प्रश्न उठाउँछ। यो घटना कुनै एक व्यक्तिको पीडासँग मात्र सम्बन्धित छैन, यो समग्र समाजमा गरिब, दलित र महिलामाथि भइरहेको अन्यायको प्रतिनिधि कथा हो।
यदि न्याय प्रणाली मौन रहन्छ भने यो घटनाले सन्देश दिन्छ “शक्ति र पैसावालाहरूका लागि अपराध छुट छ, पीडित भने अदालतको ढोकामा कराउँदै आत्महत्याको धम्की दिन बाध्य हुन्छ।”
आरके श्रीवास्तव,राैतहट,३२ गते असार ।
लोकतान्त्रिक पत्रकार संघको केन्द्रीय समितिको बैठक काठमाडौंस्थित पार्टी कार्यालय बबरमहलमा सम्पन्न भएको छ । संघका अध्यक्ष कामरेन्द्र वर्माको अध्यक्षतामा बसेको उक्त बैठकमा संघको संगठनात्मक सुदृढीकरण र आगामी कार्यक्रमबारे महत्वपूर्ण निर्णयहरू गरिएका छन् ।
बैठकले संघको विधान पुनरावलोकन तथा सशक्तीकरणका लागि विधान अध्ययन समिति गठन गरेको छ । उक्त समितिमा केन्द्रीय सदस्य विजेता चौधरी, रानी पाल, र काठमाडौं जिल्ला अध्यक्ष प्रिन्सचन्द्र पाल रहेका छन् ।
बैठकमा आगामी साउन महिनामा आयोजना गरिने संघको पहिलो कार्यक्रमबारे पनि गम्भीर छलफल गरिएको बताइएको छ ।
बैठकपछि संघका पदाधिकारीहरूले लोकतान्त्रिक समाजवादी पार्टी (लोसपा) का अध्यक्ष महन्थ ठाकुरसँग भेटघाट गरेका थिए । भेटका क्रममा अध्यक्ष ठाकुरले संघलाई अगाडि बढाउन आफूहरूबाट सक्दो सहयोग गरिने प्रतिबद्धता जनाएका थिए । उनले भने, “संघलाई अघि बढाउनुहोस्, हामीबाट हुने सहयोग अवश्य हुनेछ।”
त्यस अवसरमा लोसपाका महासचिव तथा प्रवक्ता मनिष मिश्रले संघको कामलाई सकारात्मक रूपमा अगाडि बढाउन आग्रह गर्दै भने, “संघ राम्रोसँग अगाडि बढाउनुहोस्, हामी सधैं साथमा छौं।”
साथै लाेसपा केन्द्रीय सचिव अजय झाले पनि संघका पदाधिकारीकाे हाैसला बढाएका थिए ।
भेटमा संघका केन्द्रीय सदस्यहरू सुशमिता लाल, इन्जिनियर सतीश कुमार र सुरेन्द्र कुमार सिंहको समेत उपस्थिति थियो ।
