काठमाडौँ, १ साउन :
खानेपानी मन्त्रालय मातहतको खानेपानी तथा ढल व्यवस्थापन विभागले चालु आर्थिक वर्षमा ९० प्रतिशत वित्तीय प्रगति हासिल गर्दै ऐतिहासिक सफलता हात पारेको छ ।
विगतका वर्षहरूमा सुस्त प्रगति देखिँदै आएको विभागले यसपटक उल्लेखनीय सुधार गर्दै सबैको ध्यान खिच्न सफल भएको छ । खानेपानीमन्त्री प्रदीप यादवको स्पष्ट निर्देशन, नीतिगत मार्गदर्शन र विभागीय टोलीको समर्पित प्रयासले यो सफलता सम्भव भएको विभागले जनाएको छ ।
अघिल्लो आर्थिक वर्षमा विभागको वित्तिय प्रगति ६३ प्रतिशत मात्र रहेकोमा चालु आर्थिक वर्षमा विभागले कुल ९० दशमलब १० प्रतिशत वित्तीय प्रगति गर्न सफल भएको जनाइएको छ ।
विभागको अद्यावधिक विवरणअनुसार संघीय खानेपानी तथा ढल व्यवस्थापन आयोजना बाँकेले ९७ दशमलब ८३, रामेछापले ९६ दशमलब ९१ प्रतिशत, रपन्देहीले ९५ दशमलब ९४, म्याग्दीले ९५ दशमलब ६२ तथा कास्कीलेले ९५ दशमलब ४२ प्रतिशत प्रगति हासिल गरी उत्कृष्ट परेका छन् ।
समयमै योजना कार्यान्वयन, अनुगमन तथा अन्तरसंस्थागत समन्वयले गर्दा विभागले उल्लेख्य सफलता हात पार्न सफल भएको विभागका महानिर्देशक इन्जिनियर रामकुमार श्रेष्ठले जानकारी दिनुभयो ।
उहाँले भन्नुभयो, “विभागको वित्तीय प्रगती ९० प्रतिशत पुगेको छ । यो विभाग सहित मन्त्रालयका लागि नै ठूलो उपलब्धि हो । रकमान्तरमा सहयोग गर्ने खानेपानी मन्त्रालय, अर्थ मन्त्रालय लगायत सबैमा विभाग अनुग्रहित छ ।”
उहाँले आगामी दिनमा अझ प्रभावकारी कार्यान्वयनका लागि विभाग प्रतिवद्ध रहेको समेत स्पष्ट पार्नुभयो । उहाँले आम उपभोक्ता समिति, निर्माण व्यवसायीलाई समेत धन्यवाद व्यक्त गर्नुभयो ।
विभागले मुलुकभरका खानेपानी तथा ढल व्यवस्थापन परियोजनाहरूमा देखाएको तीव्रता र परिणाममुखी कार्यप्रगति यो उपलब्धिको मुख्य कारण भएको मन्त्री प्रदीप यादवले जानकारी दिनुभयो ।
उहाँले भन्नुभयो, “जनताको आधारभूत आवश्यकता पूरा गर्नु हाम्रो दायित्व हो । हामी परिणाम देखिने गरी काम गर्छौं, प्रगति अङ्कमा मात्र होइन, जनताको जीवनस्तरमा देखिनुपर्छ । आज जुन कुरा विभागले दोखाएको छ ।”
खानेपानीका क्षेत्रमा विशेषगरी ग्रामीण भेगमा पहुँच नपुगेका क्षेत्रहरूमा सेवा विस्तारमा गरिएको प्रयास र काम पनि प्रशङसनीय रहेका उहाँको भनाई छ । यो उपलब्धिले अबको आर्थिक वर्षमा अझ बढी प्रतिबद्धता र पारदर्शिताका साथ विकास निर्माण कार्य अघि बढाउने उहाँले विश्वास व्यक्त गर्नुभयो ।
विगतका वर्षहरूमा तुलनात्मक रूपमा कम प्रगति हुँदै आएकोमा यस वर्ष विभागको वित्तिय प्रगतीमा उल्लेखनीय सुधार देखिएपछि सिङ्गो मन्त्रालय नै खुशी भएको खानेपानी मन्त्रालयका सचिव ई प्रमिलादेबी शाक्य बज्रचार्यले बताउनुभयो ।
उहाँले भन्नुभयो, “मन्त्रीज्यूको स्पष्ट निर्देशन, मार्गदर्शन तथा विभागको सक्रियता र प्रतिबद्धताका कारण यो आर्थिक प्रगति सम्भव भएको हो । जुन सबैका लागि सकारात्मक र खुशीको कुरो हो ।”
खानेपानी तथा ढल व्यवस्थापन विभागले अघिल्ला वर्षहरुको तुलनामा चालु आर्थिक वर्ष खानेपानी तथा सरसफाइ क्षेत्रले आशातित सफलता एवं उत्कृष्ट कार्य हासिल गर्न सकेको मन्त्रालयमा प्रवक्ता ई मीना श्रेष्ठले बताउनुभयो ।
उहाँले भन्नुभयो, “विगतमा जस्तो रकमान्तर, भेरिएसन, म्याद थप जस्ता कामको लागि असार महिनामा अर्थमन्त्रालय धाइरहन नपरेकाले विभागले आशातित सफलता हासिल गर्न सकेको छ ।”
देशको सार्वजनिक सेवा क्षेत्रमै एक उल्लेखनीय सफलता हासिल गर्दै खानेपानी तथा ढल व्यवस्थापन विभाग हालसम्मकै उच्चतम तथा ऐतिहासिक मानिएको विभागका प्रवक्ता राजेन्द्र सापकटाले जानकारी दिनुभयो ।
उहाँले भन्नुभयो, “यस वर्षको तीव्र सुधारले विभागको कार्यदक्षता प्रमाणित सहित सार्वजनिक सेवा प्रणालीमै परिवर्तन सम्भव रहेको सङ्केत पनि दिएको छ ।”
यसै वर्ष विभाग अन्तर्गतका १५ वटा कार्यालयहरु स्थायी भएको र रु ११ अर्ब ६३ करोड बराबरको ८१ वटा योजनाहरुको स्रोत सहमति प्राप्त भएको विभागका महानिर्देशक श्रेष्ठले बताउनुभयो ।
उहाँका अनुसार विश्व बैंकको सहयोगमा भेरी पम्पिङ योजनाको सम्झौता यही आर्थिक वर्षमा सम्पन्न भएको, एसियाली विकास बैंकको एकीकृत परियोजनाको मिसन चलिरहेको र आउँदो दुई महिनाभित्र योजनाहरुको ठेक्का आह्वान हुने तयारीमा रहेको छ ।
काठमाडौं ।
नेपाल मेडिकल कलेजले स्वास्थ्यकर्मी माग गरेको छ । कलेजले एक सूचना प्रकाशित गरी प्रोफेसर, एशोसिएट प्रोफेसर, असिस्टेन्ट प्रोफेसर, लेक्चर, स्टाफ नर्सहरु माग गरेको हो । प्रकाशित सूचना अनुसार कलेजले इलेक्ट्रिकल इन्जिनियर, क्यास काउन्टर टेलर, असिस्टेन्ट रेडियोग्राफर, हेल्थ असिस्टेन्ट समेत माग गरेको छ ।
इटहरी (सुनसरी), ३ साउन
: संघीय खानेपानीमन्त्री प्रदीप यादवले नेपालमा रहेका कुनै पनि समुदाय विकासको मूलधारबाट पछाडि नपरोस् भन्ने सरकारको स्पष्ट एवं प्रमुख उद्देश्य रहेको बताउनु भएको छ ।
आज यहाँ स्थित “झुम्का सहरी खानेपानी तथा सरसफाइ आयोजना” को उद्घाटन समारोहलाई सम्बोधन गर्नु हुँदै मन्त्री यादवले सरकारको प्रयास, खानेपानी क्षेत्रलाई सामाजिक न्याय र समावेशी विकाससँग जोड्दै सबै समुदायलाई समान रूपमा सेवा पुर्याउने दिशामा केन्द्रित रहेको बताउनुभयो ।
उहाँले भन्नुभयो, “कुनै पनि समुदाय विकासको मूलधारबाट पछाडि नपरोस् भन्ने सरकारको स्पष्ट उद्देश्य छ । देशका हरेक नागरिकको आधारभूत अधिकार सुरक्षित खानेपानी र सरसफाइ पहुँच सुनिश्चित गर्नु हाम्रो प्रमुख लक्ष हो ।”
यसैगरी मन्त्री यादवले खानेपानी क्षेत्रलाई सामाजिक न्याय र समावेशी विकाससँग जोडेर नागरिकको जीवनस्तर सुधार गर्ने सरकारको प्रयास निरन्तर जारी रहेको बताउनु हुँदै झुम्का सहरी खानेपानी तथा सरसफाइ आयोजनाले विकासको सम्भावना र नागरिकको चाहनालाई मूर्तरूप दिने विश्वास व्यक्त गर्नुभयो ।
मन्त्री यादवले देशका सबै समुदायलाई समान रूपमा सेवा पुर्याउने र कसैलाई पनि पछाडि नपार्ने नीति प्रधानमन्त्री केपी शर्मा ओली नेतृत्वको वर्तमान सरकारको दीर्घकालीन दृष्टिकोण भएकाले विकासमा समावेशी दृष्टिकोणलाई संस्थागत गरिने बताउनुभयो ।
खानेपानी मन्त्रालय जनताको आधारभूत आवश्यकता पूरा गर्ने सेवा–उन्मुख सामाजिक मन्त्रालय रहेकाले आफुैले आफ्नो जिम्मेवारी सम्हालेदेखि नै हरेक नागरिकलाई शुद्ध र स्वच्छ खानेपानीको पहुँच पुर्याउने योजना अनुसार काम गर्न क्रियाशिल रहेको जानकारी गराउनुभयो ।
उहाँले भन्नुभयो, “हाम्रो सक्रियता र स्पष्ट परिकल्पना अनुरूप खानेपानी विभागको वित्तीय प्रगतिले ९० प्रतिसत उपलब्धि हासिल गरेको छ । जुन हाम्रो कार्यसम्पादन क्षमताको दिगो सुधारको स्पष्ट प्रमाण हो ।”
आज उद्घाटन गरिएको उक्त खानेपानी आयोजनाबाट रामधुनी नगरपालिका झुम्का क्षेत्रका वडा नं. १, २, ३, र ५ का करिब २२ हजार ७८७ नागरिक र ४ हजार ३१ घरधुरीहरू प्रत्यक्ष रूपमा लाभान्वित हुने क्षेत्रीय खानेपानी तथा ढल व्यवस्थापन आयोजना कार्यालय इटहरी सुनसरीका प्रमुख महेसी महतोले जानकारी दिनुभयो ।
उहाँका अनुसार यो खानेपानी आयोजनाले स्वच्छ खानेपानी र सरसफाइको सुनिश्चिततामार्फत नागरिकहरूको स्वास्थ्य र जीवनस्तरमा गुणात्मक सुधार ल्याउने अपेक्षा गरिएको छ ।
कार्यक्रममा पुर्व सघीय सांसद नवदिता चौधरी, नगर प्रमुख शंकर लाल चौधरी, झुम्का खानेपानी मुल उपभोक्ता समितिका अध्यक्ष केसीलाल चौधरी, नगर उप–प्रमुख तारा थापा, प्रमुख जिल्ला अधिकारी धर्मेन्द्रकुमार मिश्र, खानेपानी तथा ढल व्यवस्थान विभागका उप महानिर्देशक राजेन्द्र सापकोटा, एकिकृत खानेपानी तथा ढल व्यवस्थापन आयोजनाका आयोजना निर्देशक सुरत बम, उप–निर्देशक महेश न्यौपाने, खानोनी तथा ढल निकास विराटनगर प्रमुख सुरतलाल चौधरी लगायतको सहभागीता रहेको थियो ।
बज्जिकाञ्चल संवाददाता,महाेत्तरी,०३ गते साउन ।
महोत्तरी जिल्लाको बलवा नगरपालिका–८ मा निर्माण हुन लागेको व्यावसायिक प्रशिक्षण केन्द्र भवनको भूमि पूजन कार्यक्रम आज एक विशेष समारोहबीच सम्पन्न भएको छ ।
उक्त भूमि पूजन कार्यक्रम लोकतान्त्रिक समाजवादी पार्टी (लोसपा) नेपालका राष्ट्रिय अध्यक्ष तथा सम्माननीय नेता महन्थ ठाकुर र श्रम, रोजगार तथा सामाजिक सुरक्षा मन्त्री तथा लोसपा नेपालका वरिष्ठ नेता माननीय शरदसिंह भण्डारीको संयुक्त उपस्थितिमा सम्पन्न भएको हो ।
समारोहमा स्थानीय जनप्रतिनिधि, समाजसेवी, विभिन्न राजनीतिक दलका प्रतिनिधि, युवा तथा महिलाहरूको उल्लेखनीय सहभागिता रहेको थियो । कार्यक्रममा बोल्दै लाेसपा नेताहरूले युवालाई दक्ष जनशक्ति बनाउने लक्ष्यसहित स्थापना हुन लागेको व्यावसायिक प्रशिक्षण केन्द्रले रोजगारीको अवसर सिर्जना गर्ने र स्थानीय विकासमा योगदान पुर्याउने विश्वास व्यक्त गरे ।
उक्त भवन निर्माणपछि सिलाइ, बुनाइ, इलेक्ट्रिसियन, प्लम्बिङ, कम्प्युटर तथा अन्य सीपमूलक तालिम सञ्चालन गरिने योजना रहेको जनाइएको छ ।
कार्यक्रमको सफल आयोजनाका लागि सहयोग गर्ने सबैलाई आयोजक समितिले आभार व्यक्त गरेको छ । साथै, भवन निर्माण कार्य छिट्टै प्रारम्भ भई गुणस्तरीय ढंगले सम्पन्न गरिने प्रतिबद्धता पनि व्यक्त गरिएको छ ।
बज्जिकाञ्चल संवाददाता,महाेत्तरी,०२ गते साउन ।
मटिहानी नगरपालिकाको आयोजना तथा प्राविधिक शिक्षा प्रवर्द्धनको उद्देश्यले श्री राम माध्यमिक विद्यालय, मटिहानीका कक्षा ११ मा प्राविधिक धारमा अध्ययनरत विद्यार्थीहरूलाई ल्यापटप वितरण गरिएको छ ।
कार्यक्रमका प्रमुख अतिथि लोकतान्त्रिक समाजवादी पार्टीका अध्यक्ष एवं सम्मानित नेता महन्त ठाकुर तथा विशिष्ट अतिथि श्रम, रोजगार तथा सामाजिक सुरक्षा मन्त्री शरतसिंह भण्डारीको हातबाट ल्यापटप वितरण सम्पन्न भएको हो ।
उक्त अवसरमा मधेस प्रदेश सरकारका शिक्षा तथा संस्कृति मन्त्री रानी शर्मा तिवारी, लाेसपा नेपाल मधेस प्रदेश संसदीय दलका नेता जयनुल राइन,नगरप्रमुख हरिप्रसाद मण्डल, नगर उपप्रमुख, नगर शिक्षा शाखा प्रमुख, विद्यालयका प्राचार्य, शिक्षकगण, अभिभावक तथा स्थानीय बुद्धिजीवीहरू पनि उपस्थिति रहेका थिए ।
कार्यक्रममा मन्तव्य दिंदै नेता ठाकुरले आधुनिक शिक्षामा प्रविधिको प्रयोग अपरिहार्य भएको उल्लेख गर्दै यस्तो पहलले विद्यार्थीको सिकाइ क्षमतामा ठुलो योगदान पुर्याउने विश्वास व्यक्त गर्नुभयो । मन्त्री भण्डारीले भने सरकारले प्राविधिक शिक्षामा विशेष ध्यान दिइरहेको उल्लेख गर्दै यस्ता कार्यक्रमहरू ग्रामीण तथा अर्धशहरी क्षेत्रमा समेत विस्तार गर्नुपर्नेमा जोड दिनुभयो ।
नगरप्रमुख मण्डलले मटिहानी नगरपालिकाले प्रविधि र शिक्षाको संयोजनमार्फत समावेशी तथा व्यवहारिक शिक्षालाई प्राथमिकतामा राखेको बताउँदै आगामी दिनहरूमा थप शिक्षामैत्री कार्यक्रमहरू ल्याइने जानकारी दिनुभयो ।
कार्यक्रमको समापनमा विद्यालयका प्राचार्यले नगरपालिकाप्रति आभार व्यक्त गर्दै, ल्यापटप वितरणले विद्यार्थीहरूको डिजिटल दक्षता अभिवृद्धिमा सहयोग पुर्याउने विश्वास व्यक्त गरे ।
बज्जिकाञ्चल संवाददाता,महोत्तरी,०२ गते साउन ।
नेपाल सरकारको आगामी आर्थिक वर्ष २०८२/०८३ को बजेटमा जलेश्वर नगरपालिका वडा नं. २ मा निर्माण गरिने क्रीकेट एकेडेमीका लागि ३ करोड रुपैयाँ विनियोजन गरिएको छ । सो एकेडेमी निर्माणको सन्दर्भमा शुक्रबार विशेष निरीक्षण कार्यक्रम सम्पन्न भएको छ ।
लोसपा नेपालका केन्द्रीय अध्यक्ष महन्थ ठाकुर, श्रम, रोजगार तथा सामाजिक सुरक्षा मन्त्री शरत सिंह भण्डारी, मधेश प्रदेशका शिक्षा तथा संस्कृति मन्त्री माननीय रानी कुमारी तिवारी, मधेश प्रदेशका सांसद एवम् संसदीय दलका नेता जैनुल राईन, नेपाल–भारत मैत्री समाजका मधेश प्रदेश अध्यक्ष लव राजा सिंह, तथा जलेश्वर नगरपालिकाका नगर प्रमुख सुरेश साह सोनारको गरिमामय उपस्थिति रहेको कार्यक्रमका क्रममा एकेडेमी निर्माणको लागि तोकिएको जग्गा स्थलगत निरीक्षण गरिएको हो ।
कार्यक्रममा जिल्ला क्रीकेट संघ महोत्तरीका अध्यक्ष तथा नेपाल क्रीकेट संघ (क्यान) का उपाध्यक्ष रोशन कुमार सिंहले जग्गाको अवस्थाबारे जानकारी गराउँदै एकेडेमी निर्माणको आवश्यकता र सम्भावनाबारे प्रष्ट पार्नुभएको थियो । उहाँले एकेडेमीले जिल्लाका युवाहरूको प्रतिभा उजागर गर्ने प्लेटफर्म बन्ने विश्वास व्यक्त गर्नुभयो ।
निरीक्षणपछि उपस्थित माननीयहरूले निर्माण कार्य यथाशीघ्र सुरु गर्न सकरात्मक पहल गर्ने प्रतिबद्धता व्यक्त गर्नुभएको छ । उहाँहरूले एकेडेमी निर्माणले राष्ट्रिय तथा अन्तर्राष्ट्रिय स्तरका खेलाडी उत्पादन गर्न सहयोग पुर्याउने उल्लेख गर्दै स्थानीय युवा तथा खेलकुद क्षेत्रको विकासका लागि यो एक महत्वपूर्ण परियोजना हुने बताउनुभयो ।
एकेडेमी निर्माण कार्य स्थानीय सरोकारवालाको समन्वय, पारदर्शिता र गुणस्तरीय निर्माणका आधारमा अघि बढाइने जानकारी आयोजक समितिले दिएको छ ।
बज्जिकाञ्चल संवाददाता,महोत्तरी,०२ गते साउन ।
लोकतान्त्रिक समाजवादी पार्टी (लोसपा) का अध्यक्ष तथा वरिष्ठ नेता महन्थ ठाकुरले नेपाल–भारतबीचको जनस्तरको सम्बन्ध अत्यन्त बलियो र प्रगाढ रहेको बताएका छन् ।
शुक्रबार महोत्तरीको जलेश्वरमा नेपाल–भारत मैत्री संघद्वारा आयोजित सम्मान तथा पुरस्कार वितरण समारोहमा प्रमुख अतिथि रहेका अध्यक्ष ठाकुरले दुई देशबीचको सम्बन्धलाई केवल राजनीतिक वा कूटनीतिक तहमा सीमित नगरि जन–जनको आत्मीयता र ऐतिहासिक सम्बन्धको जगमा आधारित रहेको बताए ।
“अधिकारको लागि संघर्षको मैदान कहिल्यै छोड्नु हुँदैन,” उनले जोड दिँदै भने, “तर सम्बन्ध सधैं जनताको तहमा गहिरो र स्थायी हुन्छ । त्यसलाई अझ सुदृढ गर्न हामी सबैको भूमिका हुनुपर्छ।”
कार्यक्रममा विशिष्ट अतिथि श्रम, रोजगार तथा सामाजिक सुरक्षामन्त्री शरतसिंह भण्डारीले बदलिंदो भूराजनीतिक परिस्थितिमा नेपाल–भारत खुला सिमानाको सुरक्षा दुवै देशको साझा दायित्व भएको उल्लेख गर्दै, नेपाली भूमि भारतविरुद्ध प्रयोग हुन नदिन सबै पक्ष सचेत रहनुपर्नेमा जोड दिए ।
समारोहमा धनुषाका २४ र महोत्तरीका १८ विद्यार्थीलाई साइकल र प्रमाणपत्र प्रदान गरिएको थियो । कार्यक्रम नेपाल–भारतबीचको मित्रता प्रगाढ बनाउन आयोजित गरिएको आयोजक संस्थाले जनाएको छ ।
आरके श्रीवास्तव,राैतहट,०२ गते साउन ।
रौतहटकाे माैलापुर नगरपालिका वडा नम्बर ६ पथराबुधराममा रहेको श्री मावि पथराबुधराममा आर्थिक वर्ष २०८१/८२ का लागि कक्षा १ देखि ५ सम्म अध्ययनरत विद्यार्थीहरूलाई छात्रवृत्ति वितरण कार्यक्रम आजदेखि सुरु भएको छ । बिद्यालय व्यवस्थापन समितिका जेष्ठ सदस्य सर्युग राय यादवको अध्यक्षता तथा वडा अध्यक्ष ईश्वर दयाल प्रसाद यादव, सदस्यहरू मनोज ठाकुर, बालदेव प्रसाद यादव र समाजसेवी शैलेन्द्र रामको विशेष आतिथ्यतामा उदघाटन कार्यक्रम सम्पन्न भएको बिधालयका शिक्षक लखिन्द्र यादवले जानकारी गराएका हुन् ।
बिद्यालय व्यवस्थापन समिति (बि.ब्य.स.) का अध्यक्ष विवेक यादवका अनुसार सबै छात्रा र दलित समुदायका छात्रहरूलाई प्राथमिकतामा राखी छात्रवृत्ति वितरण थालिएको हो । प्रत्येक विद्यार्थीलाई ४ सय रुपैयाँको दरले छात्रवृत्ति दिइएको लेखापाल भगत साहले बताएका छन् ।
विद्यालयका प्रधानाध्यापक राजेश सिंहले प्रत्येक आर्थिक वर्षमा नियमितरूपमा छात्रवृत्ति वितरण हुँदै आएको जानकारी दिएका छन् ।
छात्रवृत्तिबाट विद्यार्थीहरूलाई पठनपाठनमा थप प्रोत्साहन मिल्ने र आर्थिक रूपमा कमजोर वर्गका बालबालिकालाई शिक्षामा पहुँच सहज हुने अपेक्षा गरिएको छ ।
आरके श्रीवास्तव,राैतहट,०१ गते साउन ।
राैतहटकाे गरुडा नगरपालिका वडा नं. ९ श्रीपुर टोलमा उल्लेखनीय राजनीतिक घटनाक्रम देखिएको छ । नेकपा एमाले परित्याग गर्दै पूर्व गाविस उप–प्रधान सर्फलाल पासवानसहित दर्जनौं नेताहरू नेपाली कांग्रेसमा औपचारिक रूपमा प्रवेश गरेका छन् ।
यस अवसरमा नेपाली कांग्रेसका मधेश प्रदेश सभापति तथा पूर्व भौतिक पूर्वाधार मन्त्री कृष्ण प्रसाद यादव र गरुडा नगरपालिकाका नगर प्रमुख प्रत्यासी सुनिल यादवले नवप्रवेशीहरूलाई माल्यार्पण गरी स्वागत गरेका थिए । कार्यक्रमले कांग्रेस पार्टीप्रति बढ्दो विश्वास र जनसमर्थनलाई झल्काउने काम गरेको छ ।
नगर प्रमुख प्रत्यासी श्री सुनिल यादवले आफ्नो सम्बोधनमा जनताको भरोसा जित्न सकिने शुद्ध, पारदर्शी र जनमुखी स्थानीय शासन व्यवस्था निर्माण गर्ने प्रतिबद्धता दोहोर्याएका थिए । “श्रीपुर टोलमा आज देखिएको यो परिवर्तन कांग्रेसको नीति, विचार र हाम्रो स्थानीय विकासको दृष्टिकोणप्रति जनताको समर्थन हो,” यादवले बताए ।
सर्वसाधारण, युवा र स्थानीय अग्रजहरूबीच बढ्दो उत्साहसँगै कांग्रेसप्रतिको भरोसा जनस्तरमा बलियो बन्दै गएको संकेत गरिरहेको छ ।
नवप्रवेशी सर्फलाल पासवानले पनि आफ्नो सम्बोधनमा अबको स्थानीय विकास, समावेशी सहभागिता र सामाजिक न्यायका लागि कांग्रेस नै उचित विकल्प भएको स्पष्ट पारेका छन् ।
कार्यक्रममा स्थानीय नेता, समाजसेवी तथा पार्टी कार्यकर्ताहरूको उल्लेखनीय उपस्थिति थियो । नेपाली कांग्रेसको तर्फबाट स्वागत गरिएको यो प्रवेश अभियानले गरुडा नगरपालिका निर्वाचनमा निर्णायक प्रभाव पार्ने विश्वास गरिएको छ ।
साे अवसरमा वृन्दावन नगरपालिकाका पूर्व नगरप्रमुख रामस्नेही यादव लगायत नेपाली काँग्रेसका नेता कार्यकर्ताहरूकाे उपस्थिति रहेको गरूडा नगरपालिका वडा नम्बर ५ का वडा प्रत्यासी रमेश यादवले जानकारी गराएका हुन् ।
काठमाडौं, १ गते साउन ।
आम जनता पार्टी (आजपा) का अध्यक्ष एवं पूर्वमन्त्री प्रभु साहले दुई तिहाईको शक्तिशाली सरकारले काठमाडौंमै व्यवसायीहरुको सुरक्षा गर्न नसकेको बताएका छन् ।
आज (बिहीबार) काठमाडौंको कोटेश्वरमा बसेको कबाड व्यवसायीको बैठकलाई सम्बोधन गर्दै उनले प्रधानमन्त्री केपी शर्मा ओली र गृहमन्त्री रमेश लेखकले काठमाडौंका व्यवसायीलाई सुरक्षा दिन नसकेको बताए ।
‘काठमाडौंमा व्यवसायीहरु असुरक्षित हुदैगईरहेका छन् । यो दुई तिहाईको शक्तिशाली सरकारले सुरक्षा दिन सकेको छैन् । अदालतको आदेश विपरित काठमाडौं महानगरले कबाड व्यवसायीको कबाडमा डोजर आतंक मचाएको छ । तर सरकारले ति व्यवसायीलाई सुरक्षा दिन असफल भईसकेको छ,’ आजपा अध्यक्ष साहले भने, ‘सरकार त दुई तिहाई बहुमतको शक्तिशाली छ । तर काम बिचौलिया र दलालको मात्रै गरिरहेको छ । यहाँका व्यवसायीलाई सुरक्षा दिनुपर्ने सरकार टुलटुलु बसेर हेर्न मिल्छ ?’
अदालतको आदेश विपरित काठमाडौं महानगरपालिकाका मेयर बालेन शाहको निर्देशनमा काठमाडौंमा कबाड व्यवसायीको कबाडमा डोजर आतंक चलिरहेको बताउदै उनले यसको प्रतिकारमा उत्रिन निर्देशन दिए । दुई तिहाईको शक्तिशाली भनिए पनि वर्तमान सरकार झोले सरकार भएको टिप्पणी गर्दै आफ्नो परिवार, व्यवसायको सुरक्षाका लागि अब महानगरको गुण्डागर्दी बिरुद्ध प्रतिकारमा उत्रिनुको बिकल्प नभएको उनले बताए ।
‘अदालतको आदेश छ कबाड व्यवसायलाई नहटाउ तर यहाँ अदालतको आदेश पालना हुदैन् । सरकारले सुरक्षा दिदैन । महानगरले डोजर आतंक मचाएको छ । यस्तो अवस्थामा तपाईहरु आफ्नो परिवार, पेश व्यवसायको सुरक्षाका लागि अब प्रतिकारमा उत्रिनै पर्छ । महानगरको गुण्डागर्दी सहेर बस्न सकिदैन्,’ आजपा अध्यक्ष साहले भने ।
‘काठमाण्डौ महानगरपालिकाले बिना सुचना दिउसो १२ बजे टुनाल्देवीमा रहेको राजाराम साहको कबाडमा डोजर लगाएर तोड़फोर गरेकोछ । सम्मानित अदालतको आदेश विपरीत गरिएको मेयर बालेन साहले गरेको कायरतापूर्ण हमलाको भत्र्सना गर्दछु । साथै यस गैरकानूनी हमलामा संलग्न अपराधीहरूलाई कारबाही गर्न बिशेष आग्रह गर्दछु,’ उनले भने ।
भेलालाई सम्बोधन गर्दै कबाड व्यवसायीका नेता रामकेशव गुप्ताले काठमाडौं महानगरपालिकाका मेयर बालेन शाहको गुण्डागर्दी बिरुद्ध आफूहरु प्रतिकारमा उत्रिन तयार रहेको चेतावनी दिए । उनले बालेनलाई महानगरको कार्यालयमै घेराउन कबाड व्यवसायीको गरिएको क्षतिपुर्ति लिने बताए ।
‘अदालतको आदेश पाल्ना नगर्ने र पेशव्यवसायको तहसनहस गर्ने बालेन शाहको गुण्डागर्दीको जवाफ दिनुको बिकल्प छैन् । बालेनको डोजर आतंक बिरुद्ध एकजुट भएर शसक्त आन्दोलनमा उत्रिनुपर्ने समय आईसकेको छ,’ गुप्ताले भने ।
