राजेश पासवान/३१ असोज।
रौतहट। रौतहटको वृन्दावन नगरपालिका–८ बहुअरीस्थित दलित बस्तीमा रहेको दलित धर्मशालामा शैक्षिक सामग्री वितरण, सचेतनामूलक कार्यक्रम तथा शुभकामना आदानप्रदान सम्पन्न भएको छ।
जय श्री सलहेश युवा समाज, मलेसिया शाखाको आयोजना तथा बाबा सलहेश मिडिया प्रा.लि., वृन्दावन–८, रौतहटको सहकार्यमा आयोजित कार्यक्रममा दलित बालबालिकालाई शैक्षिक सामग्री वितरण गरिएको हो।
‘शिक्षा, सामाजिक उत्थान, आर्थिक विकास, छुवाछूतमुक्त समाज निर्माण तथा हकअधिकारको समानताका लागि संगठित प्रयास’ भन्ने मूल नाराका साथ सम्पन्न कार्यक्रममा ‘एकता हाम्रो शक्ति, सेवा हाम्रो भक्ति, समृद्ध समाज हाम्रो अभियान’ भन्ने सन्देशसमेत प्रवाह गरिएको थियो। कार्यक्रममा शुभकामना आदानप्रदानसमेत गरिएको थियो।
बाबा सलहेश मिडिया प्रा.लि.का सञ्चालक राजेश पासवान (निर्माणी) को अध्यक्षतामा सम्पन्न कार्यक्रममा जय श्री सलहेस युवा समाज सेवा नेपालका संयोजक सोभितकुमार पासवान प्रमुख अतिथि तथा धनुषाको शहीदनगर नगरपालिका–४ का इन्चार्ज रामकिशोर पासवान विशिष्ट अतिथिका रूपमा सहभागी थिए। कार्यक्रममा कलाकार मुकेश पासवानलगायतको उपस्थिति रहेको थियो।
कार्यक्रममा करिब १२० जना बालबालिका तथा उनीहरूका अभिभावकहरूको सहभागिता रहेको थियो। साथै, ठूला अभिभावकहरूको पनि उपस्थिति रहेको थियो। सहभागीमध्ये ५१ जना बालबालिकालाई जनही सातवटा कापी, कलम र पेन्सिल वितरण गरिएको आयोजकले जनाएको छ। बालबालिकालाई शिक्षाप्रति आकर्षित गराउने, नियमित अध्ययनका लागि प्रेरित गर्ने, उनीहरूको शैक्षिक भविष्य निर्माणमा सहयोग पुर्याउने तथा उनीहरूको विद्यालय टिकाउ बनाउने उद्देश्यले सामग्री वितरण गरिएको हो।
कार्यक्रममा बोल्दै अध्यक्ष राजेश पासवान (निर्माणी) ले समुदायमा विद्यमान सामाजिक विकृति तथा विसङ्गतिबारे प्रोजेक्टरमार्फत उदाहरणसहित जानकारी गराउँदै बालबालिका र अभिभावकलाई सचेत गराएका थिए। उनले बालबालिकालाई शिक्षाप्रति रुचि बढाउन, नियमित अध्ययन गर्न र आफ्नो भविष्य निर्माणमा विशेष ध्यान दिन आग्रह गरे।
उनले बालबालिका पढ्ने समयमा अनावश्यक खेलकुद, तास तथा गलत सङ्गतमा अल्झिने र कुलत तथा लागुऔषध सेवनको जोखिममा पर्न सक्ने उल्लेख गर्दै अभिभावकलाई आफ्ना छोराछोरीको गतिविधिमा निगरानी राख्न आग्रह गरे। बालबालिकालाई समयमै सम्झाउने, पढाइप्रति रुचि जगाउने र असल संस्कार सिकाउने जिम्मेवारी परिवार तथा समाज दुवैको भएको उनको भनाइ थियो।
‘आजका बालबालिका भोलिका हाम्रा कर्णधार हुन्। उनीहरूको भविष्य उज्ज्वल बनाउन शिक्षा पहिलो प्राथमिकतामा पर्नुपर्छ। त्यसैले अभिभावक, समाज र सरोकारवाला सबैले बालबालिकाको शिक्षामा ध्यान दिन आवश्यक छ,’ उनले भने।
अध्यक्ष पासवानले वैदेशिक रोजगारीमा रहेर पसिना बगाउँदै आर्जन गरेको रकमबाट केही हिस्सा समाजसेवामा खर्च गर्दै बालबालिकाका लागि कापी, कलम र पेन्सिल उपलब्ध गराउने जय श्री सलहेस युवा समाज, मलेसिया शाखाप्रति आभार व्यक्त गरे। विदेशमा रहेर पनि आफ्नो समुदायको शैक्षिक विकास र सामाजिक उत्थानमा योगदान पुर्याउनु सराहनीय कार्य भएको उनले बताए।
त्यसैगरी, कार्यक्रममा बोल्दै जय श्री सलहेस युवा समाज सेवा नेपालका संयोजक सोभितकुमार पासवानले नेपालका विभिन्न स्थानमा छरिएर रहेका पासवान समुदायका व्यक्तिलाई एकताबद्ध गर्ने, आपसी सहयोग र सहकार्य बढाउने तथा समुदायमा आइपर्ने आपत्–विपत्का बेला आर्थिक सहयोग, शैक्षिक सामग्री र राहत सामग्री उपलब्ध गराउँदै आएको जानकारी दिए।
उनले शिक्षा, सामाजिक उत्थान, आर्थिक विकास, छुवाछूतमुक्त समाज निर्माण र समान हकअधिकारका लागि संगठित प्रयास गर्नुका साथै दलित तथा पासवान समुदायको राजनीतिक प्रतिनिधित्व बढाउनु पनि संस्थाको उद्देश्य रहेको बताए। समुदायका सदस्यलाई हकअधिकारबारे सचेत बनाउने, नेतृत्व विकासमा प्रोत्साहित गर्ने तथा सामाजिक र राजनीतिक क्षेत्रमा सहभागिता बढाउन आवश्यक रहेको उनको भनाइ थियो।
संयोजक पासवानले कार्यक्रममा सहभागी हुन नसकेका अन्य बालबालिकालाई आगामी दिनमा शैक्षिक सामग्री वितरण गर्ने प्रतिबद्धता व्यक्त गरे। उनले बालबालिकाका लागि ब्याग वितरण गर्नुका साथै वृन्दावन नगरपालिका–८ स्थित बहुअरीको दलित बस्तीमा निःशुल्क ट्युसन कक्षा सञ्चालन गर्ने प्रतिबद्धता व्यक्त गरे।
कार्यक्रममार्फत बालबालिकालाई शैक्षिक सामग्री वितरण गर्नुका साथै शिक्षाको महत्त्व, सामाजिक विकृति न्यूनीकरण, अभिभावकको जिम्मेवारी, सामुदायिक एकता र समुदायको समग्र विकासबारे सचेतनामूलक सन्देश प्रवाह गरिएको थियो। साथै, शुभकामना आदानप्रदान गर्दै सहभागीहरूले आपसी सद्भाव, एकता र सामाजिक सहकार्यलाई निरन्तरता दिने प्रतिबद्धता व्यक्त गरेका थिए।
रामअधार यादव, रौतहट, असोज, ३० गते
रौतहटको गुजरा नगरपालिका वडा नम्बर ४, जङ्गलसहियामा विजया दशमीको अवसरमा शुभकामना आदानप्रदान कार्यक्रम सम्पन्न भएको छ।
रौतहट निर्वाचन क्षेत्र नम्बर ३ का सांसद रविन्द्र पटेल ‘धिरज’ को प्रमुख आतिथ्यमा आयोजित कार्यक्रममा आपसी सद्भाव, एकता, भाइचारा र सामाजिक मेलमिलापलाई थप मजबुत बनाउने विषयमा जोड दिइएको थियो।
कार्यक्रममा विजया दशमीको शुभकामना व्यक्त गर्दै सबैको सुख, शान्ति, समृद्धि र उत्तरोत्तर प्रगतिको कामना गरिएको थियो।
साथै, समाजमा आपसी सद्भाव र भाइचारा कायम राख्न यस्ता शुभकामना आदानप्रदान कार्यक्रमलाई निरन्तरता दिने प्रतिबद्धतासमेत व्यक्त गरिएको छ।
बज्जिकाञ्चल संवाददाता,रौतहट, असोज ३० गते ।
रौतहटको कटहरिया नगरपालिकामा मन्त्रालयबाट नयाँ प्रमुख प्रशासकीय अधिकृतका रूपमा खटाइएका उपसचिव कमल ज्ञवालीको कार्यशैलीलाई लिएर विवाद उत्पन्न भएको छ। नगरपालिकामा हाजिर नै नभई कोष तथा लेखा नियन्त्रक कार्यालय रौतहटका प्रमुख मानदेव ठाकुरसँगको समन्वयमा पालिकाको खाता सञ्चालन गरी उनी फर्किएको आरोप लागेको छ।
नगरपालिकामा यसअघि देखि नै विभिन्न समस्या रहँदै आएका बेला नयाँ प्रमुख प्रशासकीय अधिकृतको जिम्मेवारीमा आएका ज्ञवालीले समस्याको समाधान गर्न पहल नगरेको भन्दै नगरप्रमुख अजयप्रकाश जयसवालले असन्तुष्टि व्यक्त गरेका छन्।
बडादशैँको समयमा तलबभत्ता नपाएको भन्दै नगरपालिकामा कार्यरत करारका कर्मचारीहरूले ज्ञवाली आउनुअघि नै कार्यालयमा तालाबन्दी गरेका थिए। कर्मचारीको तलबभत्ता भुक्तानी, सेवाग्राहीको सामाजिक सुरक्षा भत्ता वितरण तथा अत्यावश्यक सेवाको सञ्चालनजस्ता विषयमा समस्या कायम रहेकै अवस्थामा नयाँ प्रमुख प्रशासकीय अधिकृतको कार्यशैलीले थप अन्योल सिर्जना गरेको नगरप्रमुख जयसवालको भनाइ छ।
त्यस्तै, कटहरिया नगरपालिका–५ मा सञ्चालित खानेपानी आयोजनाको विद्युत् महसुल भुक्तानी हुन नसक्दा नेपाल विद्युत् प्राधिकरणको मौलापुर वितरण केन्द्रले विद्युत् लाइन काटेको छ। यसका साथै केही लाभग्राहीले अझै सामाजिक सुरक्षा भत्ता पाउन नसकेको बताइएको छ।
चाडपर्वको समयमा कर्मचारीले तलबभत्ता नपाउनु, सामाजिक सुरक्षा भत्ता वितरणमा ढिलाइ हुनु र खानेपानीजस्तो अत्यावश्यक सेवा प्रभावित हुनु गम्भीर विषय भएको नगरप्रमुख जयसवालले बताएका छन्। उनका अनुसार, यस्ता समस्या समाधान गर्नुको सट्टा पालिकालाई थप अस्तव्यस्त बनाइएको छ।
नगरपालिकामा हाजिरसमेत नभई खाता सञ्चालन गरिएको र कार्यालयको जिम्मेवारी सम्हालेर समस्याको समाधान गर्नुपर्ने अवस्थामा सम्बन्धित अधिकारी फर्किएको विषयलाई लिएर कर्मचारी तथा जनप्रतिनिधिहरूले असन्तुष्टि व्यक्त गरेका छन्।
खाता सञ्चालनबारे कोष तथा लेखा नियन्त्रक कार्यालयको स्पष्टीकरण
यस विषयमा कोष तथा लेखा नियन्त्रक कार्यालय रौतहटका प्रमुख मानदेव ठाकुरसँग प्रतिक्रिया लिँदा उनले प्रमुख प्रशासकीय अधिकृत हाजिर भए वा नभएको जानकारी आफूलाई नभएको बताएका छन्। मन्त्रालयको सरुवा पत्रका आधारमा नगरपालिकाको खाता सञ्चालन गरिएको उनको भनाइ छ।
यद्यपि, प्रमुख प्रशासकीय अधिकृतको हाजिरीको अवस्था, खाता सञ्चालनका लागि अपनाइएको प्रक्रिया तथा यसमा सम्बन्धित निकायहरूको भूमिकाबारे थप स्पष्टता आवश्यक देखिएको छ।
यस विषयमा प्रतिक्रिया लिन खोज्दा प्रमुख प्रशासकीय अधिकृत कमल ज्ञवालीको मोबाइल फोन स्विच अफ रहेकाले उनको भनाइ प्राप्त हुन सकेन। उनको प्रतिक्रिया प्राप्त भएमा समाचारमा समेटिनेछ।
नगरपालिकामा देखिएका समस्या समाधान गर्नुपर्ने जिम्मेवारी बोकेका अधिकारीहरूबीच समन्वयको अभाव हुँदा त्यसको प्रत्यक्ष असर कर्मचारी, जनप्रतिनिधि र सर्वसाधारण सेवाग्राहीमा परेको नगरप्रमुख जयसवालको भनाइ छ। अब सम्बन्धित निकायले खाता सञ्चालनको प्रक्रिया, कर्मचारीको तलबभत्ता, सामाजिक सुरक्षा भत्ता तथा खानेपानी सेवासम्बन्धी समस्याबारे स्पष्ट पार्दै आवश्यक कदम चाल्नुपर्ने देखिन्छ।
बज्जिकाञ्चल संवाददाता,रौतहट, असोज ३० गते ।
दशैंजस्तो महान् चाडपर्वका बेला कटहरिया नगरपालिकाका वडा नं. ४ र ५ का सर्वसाधारणलाई खानेपानीको समस्या हुन नदिन नगरप्रमुख अजय प्रकाश जयसवालको पहलमा विद्युत् लाइन सुचारु गराउन आवश्यक प्रक्रिया अघि बढाइएको छ ।
कटहरिया नगरपालिका अन्तर्गतका वडा नं. ४ र ५ मा खानेपानी सञ्चालनका लागि प्रयोग हुँदै आएको विद्युत् लाइन काटिएपछि स्थानीय बासिन्दालाई चाडपर्वको समयमा खानेपानीको समस्या भएको अवस्थालाई मध्यनजर गर्दै नगरप्रमुखले यसको समाधानका लागि पहल गरेका हुन् ।
नगरपालिकाको नगर कार्यपालिकाको कार्यालयले असोज २९ गते नेपाल विद्युत् प्राधिकरण, मौलापुर वितरण केन्द्रलाई पत्राचार गर्दै खानेपानीको विद्युत् लाइन तत्काल सुचारु गरिदिन आग्रह गरेको थियो । साथै, विद्युतको बाँकी बक्यौता रकमको यकिन विवरण उपलब्ध गराउनसमेत अनुरोध गरिएको छ ।
नगरपालिकाको अनुरोधपछि जिल्ला प्रशासन कार्यालय, रौतहटले पनि खानेपानीको विद्युत् लाइन दशैं अवधिभर सुचारु गराउन नेपाल विद्युत् प्राधिकरणलाई पत्र पठाएको छ ।
प्रमुख जिल्ला अधिकारी लक्ष्मीप्रसाद पौडेलद्वारा जारी पत्रमा नगरपालिकाले बाँकी बक्यौता रकम भुक्तानी गर्न प्रतिबद्धता जनाएको उल्लेख गर्दै दशैं अवधिभरका लागि विद्युत् सेवा सुचारु गराउन आवश्यक सहयोग गर्न आग्रह गरिएको छ ।
चाडपर्वको समयमा सर्वसाधारणलाई स्वच्छ खानेपानीको पहुँचबाट वञ्चित हुन नदिन नगरप्रमुखले देखाएको सक्रियताले स्थानीयको आधारभूत आवश्यकतालाई प्राथमिकता दिएको सन्देश दिएको छ । विद्युत् लाइन काटिँदा खानेपानी आपूर्तिमा पर्न सक्ने असरलाई समयमै सम्बोधन गर्न नगरपालिका र जिल्ला प्रशासनबीच समन्वयसमेत भएको छ ।
नगरपालिकाले विद्युत् प्राधिकरणसँग बक्यौताको विवरण माग गर्दै भुक्तानीको प्रतिबद्धता जनाएको र जिल्ला प्रशासन कार्यालयले समेत सहजीकरणका लागि पहल गरेपछि खानेपानी सेवा पुनः सञ्चालन हुने अपेक्षा गरिएको छ ।
नगरप्रमुखको पहलमा अघि बढाइएको यस प्रयासले दशैंको समयमा वडा नं. ४ र ५ का बासिन्दालाई खानेपानीको समस्या हुन नदिन स्थानीय सरकारको जिम्मेवारीबोध र जनताप्रतिको संवेदनशीलता झल्काएको छ।
बज्जिकाञ्चल संवाददाता,रौतहट,३० गते असाेज ।
रौतहटको कटहरियामा बडादसैँ तथा दुर्गा पूजा मेलाको अवसरमा आयोजित बेलन्यौतन कार्यक्रममा हजारौँ श्रद्धालु भक्तजनहरूलाई निःशुल्क निम्बु पानी वितरण गरिएको छ ।
कटहरिया स्थित निराला जेनरल स्टोरका सञ्चालक महाशक्ति निराला र सिंगापुर बेभरेज नेपालको संयुक्त सहकार्यमा सो सेवा उपलब्ध गराइएको हो । दुर्गा पूजा मेलाको अवसरमा बेलन्यौतन पूजाका लागि उपस्थित भएका ठूलो संख्याका श्रद्धालु भक्तजनहरूलाई शीतलता प्रदान गर्ने उद्देश्यले सिंगापुर बेभरेज नेपालबाट उत्पादित निम्बु पानी वितरण गरिएको सञ्चालक निरालाले जानकारी दिनुभयो ।
मेलामा सहभागी हजारौँ भक्तजनहरूले निम्बु पानी ग्रहण गर्दै आयोजक तथा सहयोगी संस्थाप्रति आभार व्यक्त गरेका छन् । धार्मिक तथा सांस्कृतिक परम्पराको संरक्षणसँगै सामाजिक सेवाको भावले यस्ता कार्यक्रमहरू आयोजना गरिएको सञ्चालक निरालाले बताउनुभयो ।
महोत्तरी । महोत्तरीको एकडारा गाउँपालिका १ (साविक एकडारा गा.वि.स वडा नं १,२,३,४ र ६) का २५० परिवारले नापजाँच सम्पन्न भएको करिब १४ वर्षपछि जग्गाधनी प्रमाण पुर्जा (लालपुर्जा) प्राप्त गरेका छन् ।
लामो समयदेखि स्ववासीका रूपमा बसोबास गर्दै आएका स्थानीय २५० परिवारले अब आफ्नो जग्गामाथिको कानुनी स्वामित्व औपचारिक रूपमा प्राप्त गरेका हुन् । नापी कार्यालय महोत्तरीले आवश्यक प्रक्रिया पूरा गरी उनीहरूलाई जग्गाधनी प्रमाण पुर्जा वितरण गरेको हो ।
उक्त क्षेत्रको नापजाँच कार्य २०६९-७० सालमै सम्पन्न भएको थियो । तर नापनक्सा सम्पन्न भए पनि आवश्यक कानुनी तथा प्रशासनिक प्रक्रिया पूरा हुन नसक्दा लामो समयसम्म जग्गाधनी प्रमाण पुर्जा वितरण हुन सकेको थिएन । अहिले प्रक्रिया अघि बढाउँदै अहिले २५० थान जग्गाधनी प्रमाण पुर्जा वितरण गरिएको हो ।
जग्गाधनी प्रमाण पुर्जा प्राप्त भएसँगै स्ववासीका रूपमा बसोबास गर्दै आएका परिवारको जग्गामाथिको स्वामित्व स्थापित भएको छ । स्ववासी जग्गा दर्ता गरी जग्गाधनी प्रमाण पुर्जा वितरण भएपछि स्थानीय बासिन्दाले कानुनी तथा आर्थिक लाभ प्राप्त गर्न सक्नेछन् ।
लालपुर्जा प्राप्त भएपछि जग्गा बैंक तथा वित्तीय संस्थामा धितो राखेर ऋण लिन सहज हुनेछ । त्यस्तै, जग्गाको स्वामित्व स्पष्ट भएपछि भूमिसम्बन्धी विवाद निरुपण गर्नसमेत सहज हुनेछ । एभरेष्ट न्यूज एजेन्सी,
असोज २० गते
रौतहट । रौतहटका अतिरिक्त हुलाक कर्मचारीले लामो समयदेखि न्यून पारिश्रमिकमा काम गर्नुपरेको भन्दै श्रमअनुसारको सुविधा उपलब्ध गराउन सरकारसँग माग गरेका छन्।
उनीहरूका अनुसार अहिले बिहान ९ देखि साँझ ५ बजेसम्म कार्यालयमा काम गर्नुपर्ने भए पनि मासिक ७ हजारदेखि ८ हजार रुपैयाँ हाराहारी मात्रै पारिश्रमिक पाउने गरेका छन्। यसले दैनिक खर्च चलाउनसमेत कठिन भएको कर्मचारीहरूको गुनासो छ।
फतुवा विजयपुर नगरपालिका–२ दुधियास्थित इलाका हुलाक कार्यालयका अतिरिक्त हुलाक कर्मचारी तथा पत्रवितरक आनन्द पौडेलले आफू २० वर्षदेखि सेवामा रहे पनि पारिश्रमिक र सेवा–सुविधामा अपेक्षित सुधार नभएको बताए।
मिठुअबा अतिरिक्त हुलाककी पत्रवितरक बिमला देवीले १२ वर्षदेखि काम गरे पनि ७ हजार २ सय रुपैयाँको पारिश्रमिकले परिवार धान्न मुस्किल भएको बताइन्।
कर्मचारीहरूले पोसाक तथा आवश्यक सामग्री जुटाउनसमेत समस्या रहेको जनाएका छन्। आफूहरूलाई बेवास्ता गर्दै विभिन्न स्थानीय तहमा करार कर्मचारी राख्दा राज्यको खर्च बढेको उनीहरूको भनाइ छ।
काम गर्ने समय बढे पनि पारिश्रमिकमा सुधार नभएको भन्दै अतिरिक्त हुलाक कर्मचारीले उचित पारिश्रमिक र सेवा–सुविधाको व्यवस्था गर्न सरकारसँग आग्रह गरेका छन्। रामआधार यादव
रौतहट,असोज,१६ गते
काठमाडौं । करदाता प्रोत्साहन उपहार कार्यक्रमअन्तर्गत असोज १ देखि १५ गतेसम्मको बम्पर उपहार पर्साका लालबाबु साह कानुलाई परेको छ । उनलाई १० लाख रुपैयाँको बम्पर पुरस्कार परेको हो ।
अर्थ मन्त्रालयमा आयोजित कार्यक्रममा प्रतिनिधिसभाको अन्तर्राष्ट्रिय सम्बन्ध तथा पर्यटन समितिका सभापति सुम्निमा उदास तथा प्रतिनिधिसभा सदस्य गणेश कार्की र सन्तोष राजवंशीले संयुक्त रूपमा असोज महिनाको पहिलो १५ दिनको उपहार घोषणा गरेका हुन् ।
साह कानुले २१ हजार रुपैयाँ बराबरको ल्युब आयल खरिद गर्दा गरेको कारोबार बम्पर उपहारका लागि छनोट भएको हो । पुरस्कारबारे जानकारी दिन आन्तरिक राजस्व विभागका महानिर्देशक डा. भीष्मकुमार भूसालले उनलाई तत्काल फोन गरेर बधाई दिँदै पुरस्कार प्राप्त गर्न नजिकैको कर कार्यालयमा सम्पर्क गर्न आग्रह गरेका थिए ।
आन्तरिक राजस्व विभागका अनुसार असोज १ देखि १५ गतेसम्म अनलाइन तथा नगद खरिदमा बिल लिएका ३ करोड १८ लाख १८ हजार २८६ कारोबार उपहार कार्यक्रमका लागि योग्य भएका थिए । त्यसमध्ये नगद कारोबारबाट बिल लिएका २ लाख ४७ हजार ९७९ र अनलाइन तथा कार्डबाट भुक्तानी गरी खरिद गरिएका ३ करोड १५ लाख ७० हजार ३०७ कारोबार थिए ।
कार्यक्रमअन्तर्गत असोज १ देखि १५ गतेसम्म दैनिक एक लाख रुपैयाँका दरले प्रदान गरिने उपहारका विजेता पनि छनोट गरिएको विभागले जनाएको छ । ती विजेताको कुपनसम्बन्धी विवरण सार्वजनिक गरिएको छ । एभरेष्ट न्यूज एजेन्सी
रामअधार यादव, राैतहट,१५ गते असाेज ।
रौतहटको कटहरिया नगरपालिका–९ डुमरियामा अवस्थित श्री बाबा बैजुनाथ सुगर मिलले आर्थिक वर्ष २०८२/०८३ मा उखु क्रसिङ तथा सञ्चालन गरे पनि उखु बिक्री गरेका किसानहरूले हालसम्म आफ्नो रकम तथा नेपाल सरकारबाट प्राप्त हुने अनुदानसमेत नपाएको विषय प्रतिनिधिसभाको बैठकमा उठाइएको छ।प्रतिनिधिसभाको बैठकमा बोल्दै सांसद धिरज पटेल (रविन्द्र) ले डुमरियास्थित श्री बाबा बैजुनाथ सुगर मिलमा उखु बिक्री गरेका किसानहरूले लामो समयदेखि भुक्तानी नपाएको भन्दै सरकारको ध्यानाकर्षण गराउनुभएको हो।
उखु किसानहरूले उखु चलान गरेको करिब ९–१० महिना बितिसक्दा पनि आफ्नो उत्पादनको रकम नपाएको गुनासो गरेका छन्। उखु नगदे बालीका रूपमा खेती गरिने भए पनि उत्पादन बिक्री गरेपछि समयमै भुक्तानी नपाउँदा किसानहरू आर्थिक समस्यामा परेको उनीहरूको भनाइ छ।किसानहरूका अनुसार उखु चलान गर्ने समयमा सामान्यतः ७ देखि १५ दिनभित्र भुक्तानी गर्ने प्रक्रिया तथा प्रतिबद्धता रहने गरे पनि मिल सञ्चालन पक्षले सोअनुसार नियमित रूपमा रकम भुक्तानी नगरेको गुनासो छ। मिल सञ्चालन पक्षले आफूखुसी ढंगले भुक्तानी गर्दै आएको भन्दै किसानहरूले आपत्ति जनाएका छन्।
विशेषगरी हिन्दू धर्मावलम्बीहरूको महान् चाड दसैँ, तिहार तथा छठ पर्व नजिकिँदै गर्दा समेत उखुको रकम भुक्तानी नहुँदा किसानहरू थप समस्यामा परेको बताएका छन्। चाडपर्वको समयमा घरायसी खर्च, बालबालिकाको शिक्षा, स्वास्थ्य उपचार तथा अन्य आवश्यक खर्च जुटाउनुपर्ने अवस्थामा आफ्नो उत्पादनको रकम नपाउँदा आर्थिक भार बढेको किसानहरूको गुनासो छ।सांसद पटेलले किसानहरूले आफ्नो उत्पादनको रकमसँगै नेपाल सरकारबाट प्राप्त हुने अनुदानसमेत पाउन बाँकी रहेको उल्लेख गर्दै सम्बन्धित उद्योग तथा सरकारी निकायबीच आवश्यक समन्वय गरी किसानले पाउनुपर्ने सम्पूर्ण रकम तत्काल उपलब्ध गराउन सरकारसँग आग्रह गर्नुभएको छ।
उखु किसानहरूले आफूहरूले मेहनत गरेर उत्पादन गरेको उखुको रकम लामो समयसम्म रोकिँदा खेतीपाती तथा दैनिक जीवन सञ्चालनमा समेत कठिनाइ भइरहेको बताएका छन्। उनीहरूले चाडपर्वलाई समेत ध्यानमा राख्दै बाँकी रहेको उखुको रकम र सरकारले उपलब्ध गराउने अनुदान रकम यथाशीघ्र भुक्तानी गर्न सम्बन्धित निकायसँग माग गरेका छन्।डुमरियास्थित बाबा बैजुनाथ सुगर मिलका उखु किसानको भुक्तानीको विषय प्रतिनिधिसभामै उठेपछि लामो समयदेखि रकमको प्रतीक्षामा रहेका किसानहरूले अब आफ्नो समस्या समाधान हुने अपेक्षा गरेका छन्।
बज्जिकाञ्चल संवाददाता,राैतहट,१५ गते असाेज ।
गौर नगरपालिका–अन्तर्गत बी.पी. चोकमा सञ्चालित फुलतारा डेरीमा जिल्ला प्रशासन कार्यालय, जिल्ला प्रहरी कार्यालय, घरेलु तथा साना उद्योग कार्यालय तथा गुणस्तर तथा नापतौल सम्बन्धी निकायको संयुक्त टोलीले छापा मारेको छ।
अनुगमनका क्रममा डेरीले सञ्चालन गर्दै आएको भान्सा तथा होटलमा बिक्रीका लागि राखिएका मिठाईलगायत विभिन्न खाद्य सामग्री गुणस्तरहीन अवस्थामा भेटिएको टोलीले जनाएको छ। त्यस्तै, मिठाई तथा खाद्य सामग्री तयार गर्ने भान्सा अत्यधिक फोहोर तथा दुर्गन्धित अवस्थामा रहेको पाइएको बताइएको छ।
खाद्य सामग्रीको गुणस्तर तथा सरसफाइमा गम्भीर लापरबाही भेटिएपछि सम्बन्धित निकायले फुलतारा डेरीलाई २ लाख रुपैयाँ जरिवाना गरेको जनाइएको छ।टोलीले जरिवानाबापतको रकम एक साताभित्र बुझाउन निर्देशन दिएको छ। तोकिएको समयभित्र जरिवाना रकम नबुझाए डेरीमा सिलबन्दी गर्ने चेतावनी समेत दिइएको बताइएको छ।
अनुगमन टोलीले खाद्य सामग्रीको गुणस्तर, भान्साको सरसफाइ तथा उपभोक्ताको स्वास्थ्यसँग प्रत्यक्ष सम्बन्धित विषयमा व्यवसायीहरूलाई आवश्यक मापदण्ड पालना गर्न निर्देशन दिएको छ।
