काठमाडौँ । जल तथा मौसम विज्ञान विभागले अन्तर्गत मौसम पूर्वानुमान महाशाखाले हाल देशमा पश्चिमी न्यून चापीय प्रणालीका साथै मनसुनी वायुको प्रभाव समेत रहेको जानकारी दिएको छ ।

हाल देशका पहाडी र हिमाली भू-भाग, मधेश प्रदेश तथा कोशी, बागमती र गण्डकी प्रदेशको तराई भू-भागमा साधारणतया बादल लागेको छ भने बाँकी भू-भागमा आंशिक बादल लागेको छ । बागमती, गण्डकी र लुम्बिनी प्रदेशका एक-दुई ठाँउमा मेघगर्जन/चट्याङ्ग सहित मध्यमसम्मको वर्षा भईरहेको छ ।

आज दिउँसो देशको हिमाली र पहाडी भू-भागमा साधारणतया बादल लाग्नेछ। मधेश प्रदेश तथा कोशी र सुदूरपश्चिम प्रदेशको तराई भू-भागमा साधारणतया बादल तथा बाँकी तराई भू-भागमा आंशिक बादल लाग्नेछ। देशको हिमाली र पहाडी भू-भागका केही स्थानमा मेघगर्जन/चट्याङ्ग, हावाहुरी र असिना सहित मध्यम वर्षा/हिमपातको सम्भावना छ । मधेश लगायत कोशी र सुदूरपश्चिम प्रदेशको तराई भू-भागको केही स्थानमा तथा बागमती, गण्डकी र लुम्बिनी प्रदेशको तराई भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। कोशी, बागमती र सुदूरपश्चिम प्रदेशको पहाडी भू-भाग तथा कोशी प्रदेशको तराई भू-भागका एक-दुई स्थानमा भारी वर्षाको सम्भावना छ ।

त्यस्तै आज राति देशको हिमाली र पहाडी भू-भाग साधारणतया बादल लाग्नेछ । मधेश प्रदेश तथा कोशी प्रदेशको तराई भू-भागमा साधारणतया बादल तथा बाँकी तराई भू-भागमा आंशिक बादल लाग्नेछ। कोशी प्रदेशको हिमाली र पहाडी भू-भागका केही स्थान, बागमती र गण्डकी प्रदेशको हिमाली र पहाडी भू-भागका थोरै स्थान तथा लुम्बिनी, कर्णाली र सुदूरपश्चिम प्रदेशका हिमाली र पहाडी भू-भागका एक-दुई स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ । कोश प्रदेशको तराई भू-भागका केही , मधेश प्रदेशको थोरै स्थानमा तथा बागमती र गण्डकी प्रदेशको तराई भू-भागका एक-दुई स्थानमा  मेघगर्जन/चट्याङ्ग सहित मध्यमसम्मको  वर्षाको सम्भावना छ। कोशी प्रदेशको पहाडी र तराई भू-भागका एक-दुई स्थानमा भारी वर्षाको सम्भावना  एभरेष्ट न्यूज एजेन्सी,

आजको राशिफल बिस २०८३ असोज २३ गते शुक्रबार ईस २०२६ अक्टोबर ९ नेपाल सम्बत ११४६ ञलागा चतुर्दशी, रौद्र नाम संवत्सर सूर्य दक्षिणायन, शरद ऋतु, असोज कृष्ण पक्ष चतुर्दशी, चन्द्रमा कन्या राशिमा, उत्तरफाल्गुनी नक्षत्र, ब्रह्मा योग, विष्टि करण । आज नेपालमा सुर्योदय बिहान ६ बजेर ०१ मिनेटमा र सूर्यास्त साँझ ५ बजेर ४३ बजे हुनेछ । आज जन्म लिने बच्चा कन्या राशीको हुनेछ ।

मेष (चु, चे, चो, ला, लि, लु, ले, लो, अ)

आज काममा आफ्नो सक्रियता देखाउनेभन्दा सम्बन्धित व्यक्तिसँग तालमेल मिलाउनु बढी उपयोगी हुनेछ। कार्यक्षेत्रमा नयाँ जिम्मेवारी वा फरक प्रकृतिको काम सम्हाल्ने अवसर आउन सक्छ। व्यापारमा ग्राहकको व्यवहार बुझेर सेवा सुधार्दा राम्रो प्रतिक्रिया पाइनेछ। आर्थिक रूपमा आम्दानीको अवस्था सामान्य रहे पनि मनोरञ्जन वा व्यक्तिगत चाहनामा खर्च बढ्न सक्छ। परिवारमा तपाईंको व्यस्तताका कारण समय कम दिनुपरे पनि साँझतिर आत्मीय कुराकानीको अवसर मिल्नेछ। प्रेममा आकर्षण बढ्नेछ र मन मिल्ने व्यक्तिसँग नजिकिने वातावरण बन्न सक्छ। शारीरिक थकान भए कामको बीचमा पर्याप्त विश्राम लिनुहोस् ।

वृष (इ, उ, ए, ओ, वा, वि, वु, वे, वो)

शुक्रको प्रभाव तपाईंका लागि विशेष अनुकूल रहनेछ। आज व्यक्तित्वमा आत्मविश्वास र आकर्षण बढ्ने भएकाले सामाजिक वा व्यावसायिक भेटघाटबाट फाइदा लिन सकिनेछ। काममा लामो समयदेखि प्रतीक्षा गरिएको सहमति बन्न सक्छ। व्यापारमा नयाँ ग्राहकसँग सम्बन्ध विस्तार गर्ने राम्रो अवसर छ। आर्थिक रूपमा विलासिताका वस्तु खरिद गर्ने चाहना बढे पनि बजेट नबिगार्नुहोस्। परिवारमा खुसीको वातावरण रहनेछ र घरसँग सम्बन्धित कुनै योजना अघि बढ्न सक्छ। प्रेम सम्बन्धमा सँगै समय बिताउने अवसरले आत्मीयता बढाउनेछ। खानपानमा स्वादभन्दा सन्तुलनलाई प्राथमिकता दिनुहोस् ।

मिथुन (का, कि, कु, घ, ङ, छ, के, को, ह)

बुध र शुक्रको प्रभावले आज संवाद र सामाजिक सम्पर्कबाट अवसर सिर्जना गर्न सकिनेछ। कार्यक्षेत्रमा आफ्नो विचार आकर्षक ढंगले प्रस्तुत गर्न सक्दा अरूको समर्थन प्राप्त हुनेछ। लेखन, सञ्चार, व्यापार वा सिर्जनात्मक काममा राम्रो प्रगति हुन सक्छ। कारोबारमा नयाँ सम्पर्क बने पनि आर्थिक सम्झौता गर्दा कागजी प्रक्रिया स्पष्ट राख्नुहोस्। सानो रकमको धेरै खर्च हुन सक्ने भएकाले हिसाब राख्नु राम्रो हुनेछ। साथीभाइसँगको भेटले मन प्रसन्न बनाउनेछ। प्रेममा रमाइलो संवादसँगै भविष्यका विषयमा गम्भीर कुराकानी पनि हुन सक्छ। अत्यधिक सामाजिक व्यस्तताले थकान ल्याउन सक्ने भएकाले केही समय आफ्नै लागि छुट्याउनुहोस् ।

कर्कट (हि, हु, हे, हो, डा, डि, डु, डे, डो)

आज घर र व्यक्तिगत सम्बन्धका विषयले बढी ध्यान खिच्नेछन्। चन्द्रमाको प्रभावले संवेदनशीलता बढाउने भएकाले अरूको सामान्य व्यवहारलाई पनि गम्भीर रूपमा लिन सक्ने अवस्था रहन सक्छ। कार्यक्षेत्रमा भने भावनालाई अलग राखेर तथ्यका आधारमा निर्णय लिनु राम्रो हुनेछ। व्यापारमा नियमित ग्राहकबाट सकारात्मक प्रतिक्रिया पाउन सकिनेछ। आर्थिक रूपमा घरायसी सामान वा परिवारका आवश्यकतामा खर्च हुने देखिन्छ। परिवारमा आत्मीयता बढ्नेछ। प्रेम सम्बन्धमा मनमा रहेको कुरा नरम ढंगले व्यक्त गर्दा गलत बुझाइ हट्नेछ। पर्याप्त आराम र शान्त वातावरणले मानसिक सन्तुलन कायम राख्न सहयोग गर्नेछ ।

सिंह (मा, मि, मु, मे, मो, टा, टि, टु, टे)

सूर्यको आत्मविश्वाससँग शुक्रको प्रभाव जोडिँदा आज व्यक्तित्व प्रभावशाली बन्न सक्छ। काममा आफ्नो प्रस्तुति, व्यवहार वा नेतृत्व शैलीबाट अरूलाई प्रभावित गर्ने अवसर मिल्नेछ। नयाँ जिम्मेवारी वा सार्वजनिक रूपमा देखिने काममा सफलता प्राप्त गर्न सकिनेछ। व्यापारमा ब्रान्ड, प्रचार वा ग्राहक सम्बन्ध सुधार्ने विषयमा काम गर्न उपयुक्त दिन हो। आर्थिक रूपमा प्रतिष्ठा कायम राख्ने नाममा अनावश्यक खर्च नगर्नुहोस्। परिवारमा खुसीको अवसर सिर्जना गर्न सकिनेछ। प्रेममा प्रशंसा र सानो ध्यानले सम्बन्धमा ठूलो सकारात्मक प्रभाव पार्नेछ। शरीरमा ऊर्जा राम्रो भए पनि निद्राको समय घटाउन उचित हुँदैन ।

कन्या (टो, प, पि, पु, ष, ण, ठ, पे, पो)

आज व्यवस्थित काम गर्ने तपाईंको क्षमता अझ उपयोगी बन्नेछ। कार्यक्षेत्रमा अधुरा विवरण मिलाउने, कागजात तयार गर्ने वा आगामी योजनाको खाका बनाउने काम पूरा गर्न सकिनेछ। सहकर्मीको गल्ती सुधार्दा आलोचना गर्ने शैलीभन्दा सहयोगी व्यवहार अपनाउनु राम्रो हुनेछ। व्यापारमा खर्च र आम्दानीको अनुपात पुनरावलोकन गर्नुपर्नेछ। आर्थिक रूपमा सानो बचतलाई निरन्तरता दिन सके भविष्यमा राम्रो आधार बन्नेछ। परिवारमा तपाईंको व्यावहारिक सल्लाहको आवश्यकता पर्न सक्छ। प्रेममा अत्यधिक विश्लेषण नगरी भावनालाई सहज रूपमा स्वीकार गर्नुहोस्। पाचन प्रणालीमा असहजता भए खानपानको समय नियमित राख्नु राम्रो हुनेछ ।

तुला (रा, रि, रु, रे, रो, ता, ति, तु, ते)

शुक्रको प्रभावका कारण आज तपाईंका लागि सम्बन्ध र सामाजिक सम्पर्क विशेष महत्वपूर्ण रहनेछन्। नयाँ व्यक्तिसँगको भेट भविष्यमा उपयोगी बन्न सक्छ। कार्यक्षेत्रमा सहकार्यबाट कठिन काम पनि सहज रूपमा पूरा हुनेछ। व्यापारमा साझेदार वा ग्राहकसँग राम्रो समझदारी बन्नेछ। आर्थिक रूपमा आम्दानी बढाउने अवसर देखिए पनि आकर्षक प्रस्तावको वास्तविकता जाँचेर मात्र अघि बढ्नुहोस्। परिवारमा तपाईंले मिलाउने भूमिका निर्वाह गर्नुपर्ने अवस्था आउन सक्छ। प्रेम सम्बन्धमा नजिकपन बढ्नेछ र मनका कुरा साझा गर्ने अवसर मिल्नेछ। मानसिक रूपमा खुसी रहने दिन भए पनि अरूलाई खुसी पार्ने क्रममा आफ्नै आवश्यकतालाई बेवास्ता नगर्नुहोस् ।

वृश्चिक (तो, ना, नि, नु, ने, नो, या, यि, यु)

मंगलको दृढता र शुक्रको सम्बन्धमुखी प्रभावबीच सन्तुलन कायम गर्नुपर्ने दिन हो। काममा कसैले चुनौती दिए पनि तत्काल प्रतिक्रिया नदिई आफ्नो परिणामबाट जवाफ दिनु राम्रो हुनेछ। व्यापारमा प्रतिस्पर्धा रहे पनि ग्राहकसँगको विश्वास कायम राख्न सके आफ्नो पक्ष बलियो हुनेछ। आर्थिक रूपमा ठूलो जोखिम लिनुभन्दा हालको आम्दानी सुरक्षित राख्नु उपयुक्त हुन्छ। परिवारमा आफ्नो बोली नरम राख्दा अनावश्यक तनाव टार्न सकिनेछ। प्रेममा अधिकार जमाउने प्रवृत्तिले समस्या ल्याउन सक्छ, त्यसैले विश्वासलाई प्राथमिकता दिनुहोस्। शरीरमा चोटपटक लाग्ने सम्भावनाबाट बच्न खेलकुद वा शारीरिक काम गर्दा सावधानी अपनाउनुहोस् ।

धनु (ये, यो, भ, भि, भु, ध, फा, ढ, भे)

बृहस्पतिको प्रभावले आज तपाईंलाई दीर्घकालीन सोच राखेर निर्णय गर्न प्रेरित गर्नेछ। काममा नयाँ जिम्मेवारीभन्दा आफ्नो क्षमता विस्तार गर्ने अवसरलाई प्राथमिकता दिनु लाभदायक हुनेछ। अध्ययन, प्रशिक्षण वा नयाँ सीप सिक्ने योजना अघि बढाउन सकिनेछ। व्यापारमा टाढाका ग्राहक वा बाहिरी क्षेत्रसँग जोडिएको सम्भावना देखिन्छ। आर्थिक रूपमा भविष्यका लागि बचत वा लगानीको योजना बनाउन राम्रो समय हो। परिवारसँग रमाइलो भेटघाट हुन सक्छ। प्रेम सम्बन्धमा सकारात्मक सोच र सम्मानले सम्बन्धलाई अझ बलियो बनाउनेछ। लामो समय यात्रा वा दौडधुप गर्नुपर्ने भए शरीरलाई आवश्यक विश्राम दिनुहोस् ।

मकर (भो, ज, जि, खि, खु, खे, खो, गा, गि)

शनिको अनुशासन र शुक्रको सहज प्रभावले आज जिम्मेवारी तथा व्यक्तिगत जीवनबीच सन्तुलन मिलाउन सहयोग गर्नेछ। कार्यक्षेत्रमा धैर्यपूर्वक गरेको प्रयासको परिणाम देखिन थाल्नेछ। व्यापारमा नियमित कारोबार कायम रहनेछ, तर नयाँ लगानीको निर्णय विस्तारै गर्नु राम्रो हुन्छ। आर्थिक रूपमा अनावश्यक दायित्व थप्नुभन्दा पुराना दायित्व व्यवस्थित गर्नु लाभदायक हुनेछ। परिवारमा तपाईंको जिम्मेवारी बढे पनि सहयोग प्राप्त हुनेछ। प्रेममा भावना व्यक्त गर्न समय निकाल्दा सम्बन्धमा न्यानोपन बढ्नेछ। लामो समय काम गर्दा कम्मर वा मांसपेशीमा थकान हुनसक्ने भएकाले शरीरलाई आराम दिनुहोस् ।

कुम्भ (गु, गे, गो, सा, सि, सु, से, सो, द)

आज नयाँ विचारलाई आकर्षक ढंगले प्रस्तुत गर्ने क्षमता रहनेछ। कार्यक्षेत्रमा तपाईंको फरक सोचले ध्यान खिच्न सक्छ। नयाँ परियोजना वा सहकार्यको प्रस्ताव आएमा उत्साहित हुनुभन्दा पहिले त्यसको व्यावहारिक पक्ष हेर्नुहोस्। व्यापारमा सामाजिक सम्पर्क र प्रचारबाट फाइदा लिन सकिनेछ। आर्थिक रूपमा व्यक्तिगत चाहनामा खर्च बढ्न सक्छ, त्यसैले प्राथमिकता छुट्याउनु राम्रो हुन्छ। साथी वा परिवारसँग रमाइलो समय बिताउने अवसर मिल्नेछ। प्रेममा अप्रत्याशित भेट वा सन्देशले खुसी बढाउन सक्छ। मानसिक रूपमा स्वतन्त्र समयको आवश्यकता महसुस हुन सक्छ, त्यसलाई सम्मान गर्नुहोस् ।

मीन (दि, दु, थ, झ, ञ, दे, दो, च, ची)

आज चन्द्रमा र बृहस्पतिको प्रभावले भावनात्मक समझ र अन्तर्ज्ञानलाई बल दिनेछ। अरूको मनस्थिति बुझेर काम गर्न सक्दा कार्यक्षेत्रमा राम्रो सम्बन्ध बनाउन सकिनेछ। सिर्जनात्मक काम, कला वा लेखनमा नयाँ प्रेरणा मिल्न सक्छ। व्यापारमा विश्वासिलो व्यक्तिबाट आएको सुझाव उपयोगी बन्न सक्छ, तर आर्थिक निर्णय आफैंले जाँचेर मात्र लिनुहोस्। घरपरिवारसँग सम्बन्धित कुनै आवश्यक खर्च आउन सक्छ। परिवारमा आत्मीय वातावरण रहनेछ। प्रेम सम्बन्धमा मनका कुरा खुलेर राख्दा भावनात्मक दूरी कम हुनेछ। मनलाई शान्त राख्न ध्यान, संगीत वा प्रकृतिमा केही समय बिताउनु उपयोगी हुनेछ  एभरेष्ट न्यूज एजेन्सी,

काठमाडौं । अमेरिकाको न्युयोर्क सहरको नगर प्रमुखमा जोहरान ममदानीको जितपछि उनको चुनावी अभियानमा उठाइएका महँगी, महँगो भाडा र दैनिक जीवनयापनको खर्चका मुद्दा युरोपेली राजनीतिमा समेत चर्चामा आउन थालेका छन् ।

गत वर्ष नोभेम्बरमा न्युयोर्कको नगर प्रमुखमा निर्वाचित ममदानीले सहरलाई आम नागरिकका लागि सस्तो बनाउने विषयलाई आफ्नो चुनावी अभियानको मुख्य आधार बनाएका थिए । अहिले जर्मनी, बेलायत, स्पेन, फ्रान्स र नेदरल्यान्ड्सका वामपन्थी नेताहरूले पनि आवासको बढ्दो मूल्य, भाडा र जीवनयापनको खर्चलाई राजनीतिक मुद्दाका रूपमा अघि सारेका छन् ।

जर्मनीमा सस्तो घरको मुद्दाले दिलायो सफलता

युरोपमा ममदानीको राजनीतिक शैलीसँग सबैभन्दा बढी तुलना जर्मनीकी एलिफ एराल्पसँग भइरहेको छ । ४५ वर्षीया एराल्प वकिल हुन् । उनका अभिभावक सन् १९८० को टर्कीको सैनिक सत्ता परिवर्तनपछि जर्मनी आएका थिए । उनी सन् २०१७ मा वामपन्थी दल ‘द लिंक’मा आबद्ध भएकी थिइन् । गत महिना भएको निर्वाचनमा एराल्पको दलले महँगो सहर र बढ्दो घरभाडालाई मुख्य मुद्दा बनाएको थियो । एराल्पले बर्लिनमा निजी कम्पनीको स्वामित्वमा रहेका करिब २ लाख २० हजार घरलाई सार्वजनिक नियन्त्रणमा ल्याउनुपर्ने माग गरेकी थिइन् । निर्वाचनमा उनको दलले करिब २५ दशमलव ७ प्रतिशत मत प्राप्त गर्दै सबैभन्दा ठूलो दल बनेको छ । यद्यपि सरकार गठनका लागि उसले अन्य दलसँग गठबन्धन गर्नुपर्नेछ ।

बेलायतमा वातावरणसँग जोडियो महँगो घरको मुद्दा

बेलायतमा ममदानीसँग सबैभन्दा बढी तुलना हरित दलका नेता ज्याक पोलान्स्कीसँग हुने गरेको छ । वातावरण र जलवायु परिवर्तनका विषयमा केन्द्रित रहँदै आएको उक्त दलको राजनीतिक मुद्दालाई पोलान्स्कीले थप विस्तार गरेका छन् । उनले महँगी, महँगो घर, बढ्दो भाडा, दैनिक खर्च र धनी वर्गमाथि बढी कर लगाउने विषयलाई वातावरणीय राजनीतिसँग जोड्दै आएका छन् । उनले यसलाई वातावरण केन्द्रित जनमुखी राजनीति भन्दै आएका छन् । पोलान्स्कीले ममदानीको जस्तै सामाजिक सञ्जाललाई चुनावी अभियानको महत्वपूर्ण माध्यम बनाएका छन् । उनका अनुसार उनको प्रचार टोलीले ममदानीको प्रचार सामग्री बनाउने टोलीबाट समेत सुझाव लिइरहेको छ । पोलान्स्की अहिले लन्डनको होलबोर्न क्षेत्रबाट निर्वाचनमा प्रतिस्पर्धा गरिरहेका छन् । पूर्वप्रधानमन्त्री कियर स्टार्मरले सांसद पद छाडेपछि अक्टोबर ८ मा त्यहाँ उपनिर्वाचन हुँदैछ । दुई वर्षअघि भएको निर्वाचनमा हरित दलले उक्त क्षेत्रमा १० प्रतिशत मत मात्र पाएको थियो । तर केही सर्वेक्षणले यसपटक उक्त दलले ४० प्रतिशतसम्म मत पाउन सक्ने देखाएका छन् ।

स्पेनमा आवास संकटले बढायो राजनीतिक दबाब

स्पेनमा महँगो घर र बढ्दो भाडा अहिले प्रमुख राजनीतिक मुद्दा बनेको छ । गत महिना म्याड्रिडमा ८७ वर्षीया मारिकर्मेन अबास्कललाई ७० वर्षदेखि बस्दै आएको घरबाट निकालिएपछि देशभर विरोध प्रदर्शन भएका थिए । यो घटना स्पेनमा देखिएको आवास संकटको प्रतीक बनेको थियो । आवास समस्यालाई सम्बोधन गर्न सरकारमाथि दबाब बढ्दै गएपछि संसदमा सरकारको आवाससम्बन्धी प्रस्ताव अस्वीकृत भएको थियो ।

त्यसपछि प्रधानमन्त्री पेद्रो सान्चेजले नोभेम्बर २९ मा समयअगावै आमनिर्वाचन गर्ने घोषणा गरेका थिए । यससँगै स्पेनमा घर र भाडाको विषय सामाजिक समस्याबाट अघि बढेर प्रत्यक्ष चुनावी मुद्दा बनेको छ ।

फ्रान्समा ६० हजार सस्ता घर बनाउने योजना

फ्रान्सको राजधानी पेरिसका समाजवादी दलसँग आबद्ध नगर प्रमुख इमानुएल ग्रेगोयरले पनि सस्तो आवास र बढ्दो भाडालाई प्राथमिकतामा राखेका छन् । ग्रेगोयरले पेरिसमा थप सस्ता घर निर्माण गर्ने, खाली रहेका घरलाई आवासका रूपमा प्रयोग गर्ने र भाडा नियन्त्रणलाई थप प्रभावकारी बनाउने विषय अघि सारेका छन् ।

उनको नेतृत्वमा पेरिसमा ६० हजार नयाँ सस्ता घर निर्माण गर्ने योजना अघि बढाइएको छ । ममदानीको जितअघि नै फ्रान्सका केही वामपन्थी नेताले उनको चुनावी अभियानबाट सिक्नुपर्ने बताएका थिए । ममदानीले आम नागरिकलाई बुझिने गरी सिधा रूपमा उठाएका मुद्दा र प्रचार शैलीप्रति पनि युरोपेली वामपन्थी नेताहरूको चासो बढेको छ ।

नेदरल्यान्ड्समा आवास अभाव प्रमुख चुनावी मुद्दा

नेदरल्यान्ड्समा भने ममदानीको जितअघि नै घर र भाडाको समस्या चुनावी राजनीतिमा प्रमुख विषय बनिसकेको थियो । सन् २०२५ को राष्ट्रिय निर्वाचनमा डि६६ दलका नेता रोब येतनले आवास संकटलाई प्रमुख चुनावी मुद्दा बनाएका थिए । त्यतिबेला नेदरल्यान्ड्समा करिब ४ लाख घरको अभाव रहेको थियो। घर खरिद महँगो हुँदै गएको र भाडासमेत लगातार बढिरहेका कारण ठूलो संख्यामा नागरिक आवासको समस्यासँग जुधिरहेका थिए । येतनको दलले हरेक वर्ष १ लाख नयाँ घर निर्माण गर्ने र १० वटा नयाँ बस्ती विकास गर्ने प्रस्ताव अघि सारेको थियो। निर्वाचनमा उक्त दलले उल्लेख्य सफलता हासिल गर्दै सन् २०२३ मा रहेको ९ सिटबाट बढेर सन् २०२५ मा २६ सिट पुर्‍याएको थियो र सबैभन्दा ठूला दलमध्ये एक बनेको थियो । यसरी नेदरल्यान्ड्समा सस्तो घर र कम भाडाको विषय ममदानीको जितअघि नै प्रमुख राजनीतिक मुद्दा बनिसकेको थियो ।

ममदानीको सफलताले भने युरोपभरि महँगी, आवास र दैनिक जीवनयापनको खर्चलाई केन्द्रमा राखेर चुनावी राजनीति गर्ने बहसलाई थप बल दिएको देखिएको छ। एभरेष्ट न्यूज एजेन्सी,

काठमाडौं । नेपाल प्रहरीले बडादशैँ, तिहार, नेपाल संवत् र छठलगायत चाडपर्वलाई लक्षित गर्दै विशेष सुरक्षा योजना लागू गरेको छ ।

चाडपर्वका समयमा हुन सक्ने चोरी, ठगी, लुटपाट, जुवातास, अनलाइन ठगी, सट्टेबाजी, नक्कली नोटको कारोबार तथा अवैध ओसारपसार नियन्त्रणका लागि देशभर ५० हजार ४५८ प्रहरी परिचालन गरिने प्रहरीले जनाएको छ ।

सुरक्षा योजनाअन्तर्गत काठमाडौं उपत्यकासहित सातै प्रदेशमा ४०८ वटा यात्रु सहायता कक्ष स्थापना गरिएको छ। यस्तै, अन्तर्राष्ट्रिय सीमा नाकाका १०८ स्थानमा सहायता कक्ष स्थापना गरी थप ७०५ प्रहरी परिचालन गरिएको छ । लामो दूरीका सवारीसाधनमा यात्रुको सुरक्षा तथा सडक सुरक्षालाई प्राथमिकता दिँदै चालकको अनुमतिपत्र, मादक तथा लागूपदार्थ सेवन, यात्रु क्षमता, दुई चालक भए–नभएको र सवारीको यान्त्रिक परीक्षणसमेत जाँच गरिने प्रहरीले जनाएको छ ।

प्रहरीले सुरक्षा निगरानीका लागि सिसीटिभी, शरीरमा लगाउने क्यामेरा, ड्रोन, तालिमप्राप्त कुकुर तथा सञ्चार प्रणालीको प्रयोग गर्ने जनाएको छ। मुख्य बजार, बैंक तथा वित्तीय संस्था, बसपार्क, विमानस्थल, धार्मिक तथा पर्यटकीय स्थल र सीमा नाकामा विशेष निगरानी गरिनेछ ।

प्रहरीले अनलाइन ठगीबाट जोगिन गोप्य संकेत, व्यक्तिगत परिचय संकेत तथा पासवर्ड कसैलाई नदिन, शंकास्पद विद्युतीय सम्पर्क तथा संकेतमा विश्वास नगर्न र अपरिचित व्यक्तिका सन्देश तथा मागप्रति सचेत रहन आग्रह गरेको छ ।

त्यस्तै, चाडपर्वमा घर छाडेर जाँदा झ्यालढोका, ग्यास र विद्युत् जाँच गर्न तथा घर खाली रहेको जानकारी सामाजिक सञ्जालमा सार्वजनिक नगर्न प्रहरीले अनुरोध गरेको छ । मादक पदार्थ सेवन गरी सवारी नचलाउन, ट्राफिक नियम पालना गर्न र कुनै शंकास्पद गतिविधि देखिए तत्काल प्रहरीलाई खबर गर्नसमेत आग्रह गरिएको छ । एभरेष्ट न्यूज एजेन्सी

काठमाडौं । प्यारामाउन्ट स्काइडान्सले ११० अर्ब अमेरिकी डलरमा वार्नर ब्रदर्स डिस्कभरीलाई आफ्नो स्वामित्वमा लिएको छ । दुई ठूला हलिउड स्टुडियोबीचको यो एकीकरणले विश्वको चलचित्र, टेलिभिजन र प्रवाहमा आधारित मनोरञ्जन उद्योगको स्वरूपमा ठूलो परिवर्तन ल्याउने अपेक्षा गरिएको छ ।

यो सम्झौतासँगै एचबीओ, सीबीएस, निकेलोडियन, शोटाइम, कमेडी सेन्ट्रल, डीसी स्टुडियो र फुड नेटवर्क एउटै कम्पनीअन्तर्गत आएका छन् । प्यारामाउन्टले ‘ह्यारी पोटर’, ‘गेम अफ थ्रोन्स’ र ‘द लर्ड अफ द रिङ्स’ जस्ता चर्चित श्रृंखलाको स्वामित्व पनि पाउनेछ । कम्पनीसँग यसअघि नै ‘इन्डियाना जोन्स’, ‘मिसन इम्पोसिबल’ र ‘श्रेक’ जस्ता लोकप्रिय श्रृंखला छन् ।

एकीकरणपछि नयाँ कम्पनीको नाम स्काइडान्स कर्पोरेसन राखिएको छ । स्काइडान्सका अध्यक्ष तथा प्रमुख कार्यकारी अधिकृत डेभिड एलिसनले सम्झौतालाई चलचित्र उद्योगका लागि ‘ऐतिहासिक’ क्षण बताएका छन् । अमेरिकी राष्ट्रपति डोनाल्ड ट्रम्पले पनि सम्झौतालाई ‘उत्कृष्ट’ भन्दै नयाँ कम्पनी सफल हुने विश्वास व्यक्त गरेका छन् । यद्यपि, यो सम्झौता सहज रूपमा सम्पन्न भएको भने होइन । प्रतिस्पर्धा कमजोर हुने, उपभोक्तामाथि मूल्यको भार बढ्ने तथा चलचित्र हल र केबल वितरण क्षेत्रमा असर पर्ने भन्दै अमेरिकाका करिब एक दर्जन राज्यले सम्झौता रोक्न कानुनी प्रक्रिया अघि बढाएका थिए । पछि प्यारामाउन्ट र राज्य सरकारबीच सहमति भएपछि एकीकरणको बाटो खुलेको हो ।

सम्झौतापछि सीएनएन र सीबीएसको सम्पादकीय स्वतन्त्रताबारे पनि चासो बढेको छ । सहमतिअनुसार सीएनएन र सीबीएसमा स्वतन्त्र, निष्पक्ष र तथ्यमा आधारित समाचार सुनिश्चित गर्न ‘समाचार सम्पादकीय स्वतन्त्रता बोर्ड’ गठन गरिनेछ । सीएनएनका अध्यक्ष तथा प्रधान सम्पादक मार्क थम्पसन र सीबीएस न्युजकी प्रधान सम्पादक बारी वाइसले आ–आफ्नो जिम्मेवारी कायम राख्नेछन् ।

नयाँ कम्पनीले ठूलो ऋणको सामना गर्नुपर्ने भएकाले खर्च कटौती र नाफा बढाउने दबाब रहने विश्लेषण गरिएको छ । साथै सम्झौताअनुसार प्यारामाउन्टले प्रत्येक वर्ष कम्तीमा ३० चलचित्र निर्माण गर्नुपर्नेछ र पहिलो दुई वर्षमा चलचित्र उत्पादनको कम्तीमा २० प्रतिशत अमेरिकामै गर्नुपर्नेछ । कृत्रिम बुद्धिमत्ताबाट तयार गरिएका कम बजेटका सामग्रीमार्फत उत्पादन लक्ष्य पूरा गर्न नपाउने गरी समेत नियम राखिएको छ ।

एभरेष्ट न्यूज एजेन्सी