इटहरी । युवालाई व्यावहारिक सीप प्रदान गरी रोजगारका अवसरसँग जोड्ने उद्देश्यले सुनसरीको इटहरीमा आजदेखि ‘सीप तथा रोजगार मेला, २०८३’ आयोजना हुँदैछ ।
युवा, श्रम तथा रोजगार मन्त्रालयको आयोजनामा हुने मेला असोज २० गतेसम्म सञ्चालन हुनेछ । मेलाको उद्घाटन प्रतिनिधिसभाका सभामुख डोलप्रसाद अर्यालले गर्ने कार्यक्रम छ ।
युवा, श्रम तथा रोजगारमन्त्री रामजी यादवको अध्यक्षतामा हुने उद्घाटन समारोहमा सांस्कृतिक झाँकीअन्तर्गत थारू नृत्य तथा नौमती बाजाको प्रस्तुति रहनेछ । उद्घाटनपछि युवालाई उद्यमशीलतातर्फ आकर्षित गर्ने उद्देश्यले ‘आजको युवा, भोलिको उद्यमी : सार्क संवाद’ शीर्षकमा विशेष छलफल आयोजना गरिनेछ । मेलाको मुख्य उद्देश्य युवाको सीप पहिचान गरी रोजगारदाता तथा तालिम प्रदायक संस्थासँग प्रत्यक्ष सम्पर्क स्थापित गराउनु रहेको मन्त्रालयले जनाएको छ ।
आज दिउँसो १२ बजेदेखि साँझ ५ बजेसम्म तालिमका सहभागी छनोट, प्रशिक्षार्थीको समूह विभाजन, रोजगार मिलानका लागि सीप परिचय तयार गर्ने, रोजगारदाता तथा तालिम प्रदायक संस्थाको परिचय र सूचना तथा परामर्श सेवा सञ्चालन गरिनेछ ।
भोलिदेखि असोज १९ गतेसम्म १० वटा विभिन्न विषयगत क्षेत्रमा पाँचदिने व्यावहारिक तालिम सञ्चालन हुनेछन् ।
मेला अवधिभर प्रदर्शनी कक्ष, सूचना तथा परामर्श सेवा, सम्बन्धित निकायमा सिफारिस, रोजगार मिलान तथा उद्यमशीलतासम्बन्धी छलफललगायत कार्यक्रम निरन्तर सञ्चालन हुनेछन् । एभरेष्ट न्यूज एजेन्सी,
रौतहट । उपेन्द्र यादव नेतृत्वको जनता समाजवादी पार्टी (जसपा) नेपालका पूर्व रौतहट जिल्ला अध्यक्ष श्याम बिहारी यादवले पार्टी परित्याग गरेका छन्।
मंगलबार यादवले साधारण सदस्यसहित पार्टीमा आफूले सम्हाल्दै आएका सम्पूर्ण जिम्मेवारीबाट अलग भएको घोषणा गरेका हुन्।
यादवले पार्टी परित्याग गरेपनि अब कसरी अघि बढ्ने भन्नेबारे भने केही खुलाएका छैनन् । पार्टी नेतृत्वको कार्यशैलीप्रति असन्तुष्टि जनाउँदै उनले पछिल्लो समय पार्टीमा कार्यकर्तालाई ‘दास र नोकर’को जस्तो व्यवहार गर्ने प्रवृत्ति बढ्दै गएको आरोप लगाएका छन्।
पार्टीको नीति, नियम, विधान र सिद्धान्तविपरीत गतिविधि हुँदै गएको भन्दै आफू बाध्य भएर पार्टीबाट अलग हुने निर्णयमा पुगेको यादवले बताएका छन्।
बारा, जीतपुरसिमरा उपमहानगरपालिका उपप्रमुख भोला प्रसाद अधिकारीको नेतृत्वमा अमलेखगञ्ज पुगेको टोलीले सडक र वन क्षेत्र अतिक्रमण गरे बनाइएका घर, टहरा हटाउन अवरोध गरेको हो ।
वन अधिकृत ललन राउत कुर्मीको नेतृत्वमा सोमबार एस्काभेटरसहित फिल्डमा पुगेको वनरक्षक र कर्मचारीको टोली जनप्रतिनिधिको अवरोधपछि खाली फर्केको थियो ।अमलेखगञ्ज ३ नम्बर पुल क्षेत्रमा ४ महिनाअघि (जेठ १ गते) डिभिजन वन कार्यालय, पर्सा राष्ट्रिय निकुञ्ज र सडक डिभिजन कार्यालय हेटौँडाले सडक र वनक्षेत्र अतिक्रमण गरी बनेका ७२ वटा घर, टहरा तथा होटल हटाएको थियो ।
तर, पछिल्लो समय स्थानीय जनप्रतिनिधिहरूकै बलमा सो क्षेत्रमा फेरि ६ वटा होटल तथा घर टहरा बनेका छन् । अतिक्रमण हटाउँदैछ भन्ने सूचना पाएर बिहानै अमलेखगञ्ज पुगेका जनप्रतिनिधिहरूले संघीय सरकारको निर्देशन नमान्ने अडान लिएपछि वन कार्यालय पछि हट्न बाध्य भएको थियो ।
उपप्रमुख भोलाप्रसाद अधिकारीले स्थानीय तहको अनुमती बिना संघीय सरकारले केही गर्न नसक्ने दाबी गरे । ‘संघीय सरकारको नेतृत्वमा रहेको जुनसुकै निकाय भए पनि स्थानीय निकायसँग सरोकार नराखी गरिने कुनै पनि काम वैध हुँदैन,’ उपप्रमुख अधिकारीले भने, ‘पहिला वन कार्यालयले आफ्नो अधिकार सुनिश्चित गरेर आउनुस् ।’
करिब ३ घन्टा लामो छलफलपछि चाडपर्वसम्म अतिक्रमण हटाउन कदम नचाल्ने सहमति भएको छ । जनप्रतिनिधि र वन कर्मचारीबिच चाडपर्वपछि जिल्ला प्रशासन कार्यालयमा सर्वपक्षीय छलफल गरेर निर्णय लिने सहमति भएको छ ।
वन अधिकृत ललन राउत कुर्मीले जनप्रतिनिधिको आग्रहपछि तत्काललाई स्थगित गरिए पनि स्थानीय तह आफैँले अतिक्रमित संरचना नहटाएको खण्डमा पछि वन कार्यालयले भत्काउने बताए ।
‘यो नकारात्मक सूचीमा परेको अतिक्रमित क्षेत्र हो । यहाँ घरटहरा बनाएर बसोबास वा व्यापार गर्न पाइँदैन । आज नभए भोलि हट्छ,’ उनले भने, ‘स्थानीय आफैँले समयमै खाली गर्दा उपयुक्त हुन्छ ।’
बाराका प्रमुख जिल्ला अधिकारी खडानन्द अधिकारीले जनप्रतिनिधिहरू आफैँ पुगेर अनुरोध गरेका कारण मुठभेडको स्थिति सिर्जना नहोस् भनेर केही दिनको लागि स्थगित गरिएको बताए ।
‘जनप्रतिनिधि आफैँ उभिएपछि मुठभेड नहोस् भन्नका लागि हामीले स्थानीयलाई खाली गर्न समय दिएर फर्किएका छौँ । यसको मतलब घरटहरा नहटाउने भन्ने होइन,’ प्रजिअ अधिकारीले भने, ‘केही दिनलाई समय दिएका छौँ । त्यस अवधिमा पनि खाली नभए डोजर लगेर हटाइनेछ । यसको अरु विकल्प छैन ।’
डिभिजन वन कार्यालय बाराका प्रमुख सुजितकुमार झाले अमलेखगञ्ज क्षेत्रमा यसअघि हटाइएका ३६ घरधुरी तथा ७२ वटा संरचनामध्ये २ वटा परिवारमात्रै वास्तविक सुकुमबासी भएको बताए । उनले दुधौरा पुलमुनिको बस्तीको हकमा करिब ५० घरधुरीमध्ये ६ देखि ८ घरधुरी सुकुमबासी रहेको र तिनीहरूले राज्यले व्यवस्थापनमा सहयोग गर्ने बताए ।
प्रमुख झाले जनप्रतिनिधिहरूले संगठित रूपमै गएर वनको काम हस्तक्षेत्र गर्नु गलत भएको टिप्पणी गरे । घरटहरा भत्काउन पुगेको वन कार्यालयको टोलीलाई रोक्न उपमहानगरका वडाध्यक्षहरू हिराबहादुर गुरुङ, धनबहादुर श्रेष्ठ, भोजबहादुर खत्री, दीपेन्द्र चौधरी, श्यामबाबु खाँ, हेमनारायण चौधरी, हरिदेव खरेल, सुभाष श्रेष्ठ, शेखरकाजी रुम्बा लगायत उपस्थित थिए ।
घरटहरा भत्काउन भने वन अधिकृत कुर्मी, वन अधिकृत मधुकान्त सिंहसहित डिभिजन वन कार्यालयका वन रक्षक र कर्मचारी पुगेका थिए भने इलाका प्रहरी कार्यालय सिमराका प्रहरी नायब उपरीक्षक (डीएसपी) दयाकृष्ण भट्टको नेतृत्वमा ७० जनाभन्दा बढी प्रहरी तैनाथ थिए ।
जनप्रतिनिधि र स्थानीयले समय माग गरेपछि सशस्त्र प्रहरीको टोलीलाई भने प्रमुख जिल्ला अधिकारीले पथलैयाबाटै फर्कन आदेश दिएका थिए । रातोपाटी
बज्जिकाञ्चल संवाददाता असोज १३ गते
रौतहट । रौतहटको गौर नगरपालिका–९ सिरसियामा मोटरसाइकलको ठक्करबाट ७२ वर्षीय नारायण बैठाको मृत्यु भएको छ ।
मंगलबार साँझ करिब ७ः४५ बजे गौरबाट हजमिनियातर्फ जाँदै गरेको भारतीय नम्बर प्लेट बीआर २२ एच ६१५९ नम्बरको मोटरसाइकलले सडकमा उभिरहेका बैठालाई ठक्कर दिएको थियो ।दुर्घटनापछि चालक फरार भएका छन् । प्रहरीले चालकको पहिचान पर्साको वीरगन्ज घर भई हाल राजदेवी नगरपालिका–२ हजमिनियामा बस्दै आएका करिब २२ वर्षीय अमित भगतका रूपमा गरेको छ । फरार चालकको खोजी भइरहेको प्रहरीले जनाएको छ ।प्रहरीले दुर्घटनामा संलग्न मोटरसाइकल नियन्त्रणमा लिएर घटनाबारे थप अनुसन्धान गरिरहेको छ । रातोपाटी
बज्जिकाञ्चल संवाददाता असोज ११ गते
नकपुरधाम । धनुषाको मिथिला नगरपालिकामा पहिरोले घर पुरिँदा एक महिलाको मृत्यु भएको छ भने परिवारका अन्य चार जनाको सकुशल उद्धार गरिएको छ।
आइतबार बिहान सवा ९ बजे मिथिला नगरपालिका–११ आँपगाछीमा राजन श्रेष्ठको एकतले टालीको छानो भएको घर पहिरोले पुरिएको जिल्ला प्रहरी कार्यालय धनुषाले जनाएको छ।
घर पुरिएको सूचना पाएलगत्तै इलाका प्रहरी कार्यालय ढल्केवर र इलाका प्रहरी कार्यालय भिमान, सिन्धुलीको संयुक्त टोली घटनास्थलमा पुगेको थियो। घरमा रहेका पाँच जनामध्ये चार जनालाई सकुशल उद्धार गरिएको प्रहरी प्रवक्ता ओमप्रकाश खनालले जानकारी दिए।
खोज तथा उद्धारका क्रममा बिहान ११ बजे राजनकी श्रीमती ३५ वर्षीया कमला श्रेष्ठलाई मृत अवस्थामा फेला पारिएको थियो। उनको शव सरकारी अस्पताल बर्दिबास, महोत्तरी पठाइएको प्रहरीले जनाएको छ।
मधेश प्रदेशमा पछिल्लो दुई दिनदेखि लगातार वर्षा भइरहेको भए पनि आइतबार दिउँसो १२ बजेपछि मौसम सामान्य भएको प्रहरीले जनाएको छ।सभार रातोपाटी
बज्जिकाञ्चल संवाददाता असोज ११ गते
गौर । रौतहटमा प्रहरीले शनिबार छुट्टाछुट्टै स्थानबाट लागुऔषध गाँजा, भन्सार छली भारततर्फ लैजाँदै गरेको सोफी रक्सी तथा भारतबाट अवैध रूपमा भित्र्याइएका बोइलर कुखुरा बरामद गरेको छ ।
यमुनामाई गाउँपालिका–४ स्थित सरुअठादेखि झुलुङ्गे पुल जाने बाटोमा जाँच गर्ने क्रममा प्रहरीले ५ किलो २५० ग्राम गाँजासहित दुर्गाभगवती गाउँपालिका–१ का २६ वर्षीय पुजन साहलाई मोटरसाइकलसहित नियन्त्रणमा लिएको छ। साहको गुम्ती पसलमा खानतलासी गर्दा थप २५० ग्राम गाँजा बरामद भएको प्रहरीले जनाएको छ ।
त्यस्तै, राजदेवी नगरपालिका–९ ब्रह्मपुरीमा नेपालबाट भारततर्फ भन्सार छली लैजाँदै गरिएको ६४ कार्टुन सोफी रक्सी बरामद भएको छ । प्रहरीले रक्सी ओसार्न प्रयोग गरिएको इलेक्ट्रोनिक लोडरसहित चालक सोही स्थानका ४५ वर्षीय सुरेन्द्र गोसाईलाई पक्राउ गरी आवश्यक कारबाहीका लागि गौर भन्सार कार्यालयमा बुझाएको छ । बरामद रक्सीको मूल्य करिब ६७ हजार २०० रुपैयाँ रहेको छ ।
यसैगरी, परोहा नगरपालिका–८ नरकटिया आँप बगैँचाबाट भारतबाट अवैध रूपमा ल्याइँदै गरेको १३७ वटा बोइलर कुखुरा प्रहरीले बरामद गरेको छ । पाँच वटा साइकलमा ल्याइँदै गरेको ४११ किलो कुखुरा, अन्दाजी १ लाख २३ हजार ३०० रुपैयाँ मूल्य बराबरको रहेको प्रहरीले जनाएको छ । बरामद कुखुरा स्थानीय जनप्रतिनिधि तथा सर्वसाधारणको रोहबरमा नष्ट गरिएको प्रहरीले जनाएको छ । सभार रातोपाटी
बज्जिकाञ्चल संवाददाता असोज १० गते
काठमाडौँ । नेपालको पश्चिमी भूभागमा भारी वर्षा भइरहेकाले बाढी र पहिरोको उच्च जोखिम बढेको छ। जल तथा मौसम विज्ञान विभाग अन्तर्गतको मौसम पूर्वानुमान महाशाखाले पश्चिमी प्रदेशहरूमा भारीदेखि धेरै भारी वर्षा भइरहेको जनाउँदै सतर्कता अपनाउन आग्रह गरेको छ। पूर्वी भूभागमा भने मौसम क्रमिक रूपमा सुधार हुँदै गएको छ।
मौसमविद् रोजन लामिछानेका अनुसार पछिल्लो २४ घण्टामा गण्डकी, लुम्बिनी, कर्णाली र सुदूरपश्चिम प्रदेशका पहाडी तथा तराईका धेरैजसो स्थानमा भारीदेखि धेरै भारी वर्षा भएको छ। यस अवधिमा सबैभन्दा धेरै पाल्पाको अर्चले मौसम मापन केन्द्रमा २०८ मिलिमिटरभन्दा बढी वर्षा मापन गरिएको छ। महाशाखाका अनुसार १५० मिलिमिटरभन्दा बढी पानी पर्नुलाई अति भारी वर्षा मानिन्छ। यसैगरी कोशी प्रदेशको सोलुखुम्बु आसपास र बागमती प्रदेशको काभ्रे, सिन्धुपाल्चोक तथा रसुवा आसपासका क्षेत्रमा पनि भारी वर्षा भएको छ। अन्य भूभागमा भने हल्कादेखि मध्यम वर्षा मात्र भएको छ।पछिल्लो समय लुम्बिनी, कर्णाली, सुदूरपश्चिम र गण्डकी प्रदेशका केही स्थानमा हल्का वर्षा भइरहेको छ। पूर्वी भूभागअन्तर्गत कोशी र मधेस प्रदेशका तराई क्षेत्रमा भने अहिले पानी परेको छैन। ती क्षेत्रमा घाम र बादल लाग्ने क्रम जारी छ।
नेपालमा अहिले भारतको मध्य प्रदेश र उत्तर प्रदेश आसपास बनेको न्यून चापीय प्रणालीको प्रभाव परेको छ। बङ्गालको खाडीबाट आएको जलवाष्प युक्त हावा सोही प्रणालीमार्फत पश्चिमी क्षेत्रमा केन्द्रित हुँदा नेपालको पश्चिममा बढी पानी परेको मौसमविद् लामिछानेले जानकारी दिए। यो प्रणाली बिस्तारै पश्चिमतिर सर्दै कमजोर हुने अवस्थामा रहे पनि आज र भोलिसम्म नेपालको पश्चिमी क्षेत्रमा यसको गहिरो प्रभाव रहनेछ।
आज (शनिबार) दिउँसो र राति गण्डकी, लुम्बिनी, कर्णाली र सुदूरपश्चिम प्रदेशका अधिकांश भूभागमा हल्कादेखि मध्यम तथा ५० देखि ८० प्रतिशत भूभागमा भारी वर्षा हुने सम्भावना छ। भोलिसम्म यी प्रदेशका केही क्षेत्रमा वर्षा कायम रहनेछ। तर पूर्वी भूभागहरू कोशी, मधेस, बागमती र गण्डकी प्रदेशका तराई क्षेत्रमा भने मौसम क्रमिक रूपमा सुधार हुँदै जानेछ।
भोलि राति र पर्सिबाट भने देशभरिकै मौसममा सुधार आउने र पहाडी भूभागका थोरै स्थानमा मात्र हल्कादेखि मध्यम वर्षा हुने पूर्वानुमान महाशाखाको छ। आउँदो सोमबारबाट भने देशभरको मौसम सफा रहने र कतै पानी परिहाले पनि त्यसले ठुलो प्रभाव नपार्ने बताइएको छ।
पश्चिमी क्षेत्रमा लगातार भारी वर्षा हुने सम्भावना रहेकाले महाशाखाले ती क्षेत्रका लागि जोखिमको स्तर हेरी ‘सुन्तला’ र ‘रातो’ रङको चेतावनी (अलर्ट) जारी गरेको छ। रातो रङ लगाइएका क्षेत्रमा बाढी र पहिरोको जोखिम अति उच्च हुन्छ। पूर्वी क्षेत्रमा वर्षा कम हुँदै गएकाले सम्भावित जोखिम कम हुने जनाउँदै ‘पहेँलो’ रङको सतर्कता दिइएको छ।
भोलि ११ गतेसम्म पश्चिमी क्षेत्रमा मध्यमदेखि भारी वर्षाको सम्भावना रहेकाले बाढी र पहिरोको जोखिम उच्च छ। यसै विषयलाई मध्यनजर गर्दै मौसमविद् लामिछाने भन्छन्, ‘पहिरो जाने, डुबान हुने र कटान गर्ने क्षेत्रका सर्वसाधारण तथा सरोकारवाला निकायले आवश्यक पूर्वतयारी र सतर्कता अपनाउनुहोला।’ सभार रातोपाटी
बज्जिकाञ्चल संवाददाता असोज १० गते
जितपुरसिमरा उपमहानगरपालिका –२२, तीन नम्बर पुलस्थित ट्रकको ठक्करबाट स्कुटर चालकको मृत्यु भएको छ ।
गएराति २३:०० बजेको समयमा हेटौँडाबाट पथलैयातर्फ जाँदै गरेको ना ६ ख ३६४४ नम्बरको ट्रकले सोही दिशातर्फ जाँदै गरेको बा.प्र.०२–०६५ प ७५७५ नम्बरको स्कुटरलाई पछाडिबाट ठक्कर दिँदा स्कुटर चालक गम्भीर घाइते भएका थिए ।दुर्घटनामा टाउकोमा चोट लागेका स्कुटर चालक मोरङ, लाङटाङ नगरपालिका –०१ बस्ने अन्दाजी ३५ वर्षीय योगेन्द्र मगरलाई उपचारका लागि नारायणी अस्पताल, वीरगञ्ज पठाइएको थियो । उपचारकै क्रममा राति २३:५० बजे चिकित्सकले उनलाई मृत घोषणा गरेका थिए ।दुर्घटनापछि इलाका प्रहरी कार्यालय अमलेखगञ्जबाट प्र.ब.ना.नि. प्रकाशकुमार खत्री तथा इलाका प्रहरी कार्यालय सिमराबाट प्रहरी नायव उपरीक्षक दयाकृष्ण भट्टको कमाण्डमा खटिएको प्रहरी टोली उद्धार कार्यमा खटिएका थिए भने ट्रक र चालक बारा, जितपुरसिमरा उपमहानगरपालिका –२१ बस्ने अन्दाजी ३३ वर्षीय राजन खड्कालाई नियन्त्रणमा लिई उक्त दुर्घटनाको सम्बन्धमा थप अनुसन्धान समेत भइरहेको छ । सभार रातोपाटी
ढल्केबर, असोज ८ गते । मधेश प्रदेश सरकारले सवारी चालक अनुमतिपत्र (लाइसेन्स) आफैँ छापेर वितरण सुरु गरेको छ। पहिलो चरणमा श्रम तथा यातायात मन्त्रालयले तीन हजार ८१ वटा चालक अनुमतिपत्र छापेर प्रदेश सरकारअन्तर्गतका यातायात व्यवस्था कार्यालयलाई वितरणका लागि हस्तान्तरण गरेको हो।
श्रम तथा यातायातमन्त्री शारदादेवी थापाले पहिलो चरणमा छापिएका चालक अनुमतिपत्र यातायात व्यवस्था कार्यालय, जनकपुरका प्रमुख वासुदेव मल्ललाई हस्तान्तरण गर्नुभयो। उहाँले छापिएका चालक अनुमतिपत्र सेवाग्राहीलाई यथाशीघ्र वितरण गर्न निर्देशन दिनुभयो।
मन्त्री थापाले प्रदेश सरकारले अब आफैँ चालक अनुमतिपत्र छापेर वितरण गर्ने व्यवस्था सुरु गरेकाले सेवाग्राहीले लामो समयसम्म लाइसेन्सका लागि प्रतीक्षा गर्नुपर्ने अवस्था अन्त्य हुने बताउनुभयो। प्रदेशमै चालक अनुमतिपत्र छपाइको व्यवस्था भएपछि सेवा प्रवाह थप सहज र प्रभावकारी हुने उहाँको भनाइ छ।
मधेश प्रदेशमा आठ वटा यातायात व्यवस्था कार्यालय छन्। पहिलो चरणमा वीरगञ्ज यातायात व्यवस्था कार्यालयका लागि एक हजार १७२, जनकपुरका लागि ९३२, लहानका लागि ४६०, बर्दिबासका लागि ३०३, गौरका लागि ११९, राजविराजका लागि ५२, मलङ्गवाका लागि ३२ र कलैयाका लागि ११ वटा चालक अनुमतिपत्र छापिएको यातायात मन्त्रालयले जनाएको छ। गोरखा पत्र
सागर संगम ठाकुर, रौतहट — असोज ५
रौतहटको कटहरियाबाट प्रसारण हुँदै आएको बज्जिकाञ्चल एफएम ८९.२ मेगाहर्जप्रति श्रोताको आकर्षण पछिल्लो समय बढ्दै गएको पाइएको छ।
स्थानीय भाषा, समाचार, गीत–संगीत, मनोरञ्जन तथा स्थानीय सरोकारका विषयलाई प्राथमिकता दिँदै विभिन्न कार्यक्रम सञ्चालन गरेपछि एफएमप्रति श्रोताको रुचि बढेको हो।
सोमबार बज्जिकाञ्चल एफएमले सञ्चालन गरेको ‘बज्जिकाञ्चल बहस’ कार्यक्रममा सहभागी श्रोता गन्धिर यादवले प्रविधिको विकाससँगै रेडियो सुन्ने माध्यम परिवर्तन भए पनि एफएमले स्थानीय विषयवस्तुलाई प्राथमिकता दिएकाले आफ्नो प्रभाव कायम राख्न सफल भएको बताउनुभयो।
उहाँका अनुसार विगतमा फ्रिक्वेन्सीमार्फत नियमित रेडियो सुन्ने गरे पनि अहिले सामाजिक सञ्जाल तथा डिजिटल माध्यमबाट एफएमका कार्यक्रम सुन्ने क्रम बढेको छ। दैनिक तथा साप्ताहिक रूपमा प्रसारण हुने विविध कार्यक्रमका कारण बज्जिकाञ्चल एफएमप्रति श्रोताको आकर्षण बढ्दै गएको उहाँले बताउनुभयो। एफएमका सञ्चालक तथा प्रस्तोता आरके श्रीवास्तवका अनुसार एफएमले दैनिक समाचार बुलेटिनसँगै ‘शुभप्रभात भोजपुरिया धमाका’, ‘संगीत सफर’, विद्यार्थी केन्द्रित ‘ब्रेन चेक’, ‘पुरस्कार पाँच सय’, ‘उत्कृष्ट विचार’ र ‘सुनाइ अपन प्रतिभा’ लगायतका कार्यक्रम सञ्चालन गर्दै आएको छ।
श्रोता यादवले प्रत्येक शुक्रबार सञ्चालन हुने ‘क्युरी स्वाद संवाद’ कार्यक्रमले पुराना तथा नियमित श्रोतासँगको सम्बन्ध थप मजबुत बनाउन सहयोग पुगेको बताउनुभयो। स्थानीय भाषा, समाचार, गीत–संगीत, मनोरञ्जन तथा स्थानीय सरोकारका विषयलाई प्राथमिकता दिएकाले एफएमप्रति आफ्नो रुचि बढेको उहाँको भनाइ छ। कार्यक्रममा सहभागी अन्य श्रोताले पनि पछिल्लो समय एफएमको फ्रिक्वेन्सीमार्फत नियमित रूपमा कार्यक्रम सुन्न थालेको बताएका थिए।
स्थानीय समुदायका समस्या, आवाज, सुझाव तथा प्रतिभालाई सञ्चारमाध्यममार्फत बाहिर ल्याउन एफएमले महत्वपूर्ण भूमिका निर्वाह गरेको उनीहरूको भनाइ थियो। एफएमले श्रोतासँग प्रत्यक्ष संवाद गर्ने ‘क्युरी संवाद’ कार्यक्रममार्फत गाउँ तथा टोलमै पुगेर कार्यक्रम सञ्चालन गर्दै आएको जनाएको छ। उक्त कार्यक्रमअन्तर्गत पहिलोपटक फतुवा विजयपुर नगरपालिका–१ स्थित गमहरिया चोकबाट कार्यक्रम सुरु गरिएको थियो।
त्यसपछि कटहरिया नगरपालिकाको छेदी चोक र फतुवा विजयपुर नगरपालिका–४ स्थित टेंग्राहामा कार्यक्रम सञ्चालन गरिएको एफएमले जनाएको छ। स्थानीयस्तरमै रेडियो कार्यक्रम सञ्चालन हुँदा आफ्ना समस्या, विचार तथा सुझाव प्रत्यक्ष रूपमा राख्ने अवसर प्राप्त भएको भन्दै स्थानीयले कार्यक्रमप्रति उत्साहजनक सहभागिता जनाएका थिए। श्रोता तथा स्थानीय समुदायसम्म पुग्ने ‘क्युरी स्वाद संवाद’ कार्यक्रमको बिजनेस पार्टनर कटहरियास्थित निराला जनरल स्टोरप्रति श्रोता यादवले आभार व्यक्त गर्नुभयो। कार्यक्रममा सहभागी श्रोताले क्युरी मसालाको उत्पादन तथा स्थानीय बजारमा यसको उपलब्धताबारे समेत चर्चा गरेका थिए।
कार्यक्रममा सहभागी श्रोताले महिलाको सहभागिता बढाउन महिलाकेन्द्रित रेसिपी कार्यक्रम सञ्चालन गर्न सुझाव दिएका छन्। एफएम व्यवस्थापनले क्युरी मसालाको प्रायोजनमा महिला सहभागितालाई केन्द्रमा राखेर रेसिपी कार्यक्रम सञ्चालन गर्ने तयारी भइरहेको जनाएको छ। त्यसैगरी किसानका समस्या, कृषि उत्पादन, आधुनिक कृषि प्रविधि तथा कृषिसम्बन्धी आवश्यक जानकारी समेटिएको छुट्टै कार्यक्रम सञ्चालन गर्न पनि श्रोताले माग गरेका छन्। एफएम व्यवस्थापनले कृषिलगायत विभिन्न विषय केन्द्रित नयाँ कार्यक्रमको तयारी भइरहेको र ती कार्यक्रम छिट्टै प्रसारणमा ल्याइने जनाएको छ।
नेपाल हिन्द रेडियो श्रोता संघका सदस्य जफरुल्लाह अन्सारीसहित विभिन्न श्रोताले एफएमका कार्यक्रमलाई निरन्तरता दिनुपर्नेमा जोड दिएका थिए। उनीहरूले कुनै पनि कार्यक्रम छोटो समयमै बन्द नगरी निरन्तर सञ्चालन गर्न तथा श्रोता र रेडियोबीचको सम्बन्ध अझ मजबुत बनाउन सुझाव दिएका छन्।
त्यस्तै, बिछोडिएका साथीभाइ तथा आफन्तसँग पुनः सम्पर्क स्थापित गर्न सहयोग पुग्ने गरी ‘आफ्नो सन्देश’ जस्ता कार्यक्रम सञ्चालन गर्न पनि श्रोताले एफएमका सञ्चालक श्रीवास्तवलाई सुझाव दिएका थिए।
श्रोताले बज्जिकाञ्चल एफएमले स्थानीय समुदायका समस्या तथा आवाजलाई प्राथमिकताका साथ उठाउँदै आएको भन्दै आगामी दिनमा शिक्षा, स्वास्थ्य, कृषि, महिला, युवा तथा स्थानीय सरोकारका विषयलाई थप प्राथमिकता दिन आग्रह गरेका छन्।
कार्यक्रममा यादवले एफएमका प्राविधिक तथा सहकर्मीलाई धन्यवाद दिँदै एफएमप्रति निरन्तर माया, साथ र सहयोग गर्ने सम्पूर्ण श्रोताप्रति आभार व्यक्त गर्नुभयो। एफएम परिवारले पनि आगामी दिनमा थप नयाँ तथा श्रोतामैत्री कार्यक्रम सञ्चालन गर्दै गाउँ–गाउँसम्म पुग्ने प्रतिबद्धता जनाएको छ।
