काठमाडौँ । प्रत्येक वर्ष जुलाई २३ मा विश्वभर विश्व ह्वेल तथा डल्फिन दिवस मनाइन्छ । समुद्री पारिस्थितिक प्रणालीमा ह्वेल र डल्फिनको महत्वपूर्ण भूमिकाबारे जनचेतना फैलाउने तथा तिनलाई बन्दीकरण, जलवायु परिवर्तन, समुद्री प्रदूषण र अवैध सिकारजस्ता खतराबाट जोगाउने उद्देश्यले यो दिवस मनाउने गरिन्छ ।
यो दिवस सन् १९८२ मा अन्तर्राष्ट्रिय ह्वेल आयोगले व्यावसायिक रूपमा ह्वेलको सिकारमा पूर्ण प्रतिबन्ध लगाउने ऐतिहासिक निर्णय गरेको सम्झनामा मनाइन्छ । त्यस निर्णयको कार्यान्वयनसँगै सन् १९८६ देखि यो दिवसलाई औपचारिक रूपमा मनाउन थालिएको हो ।
व्यावसायिक सिकारमा प्रतिबन्ध लागे पनि ह्वेल र डल्फिन अझै पनि विभिन्न चुनौतीसँग जुधिरहेका छन् । समुद्रमा बढ्दो प्लास्टिकजन्य फोहोर, जहाजसँग हुने ठक्कर, समुद्री ध्वनि प्रदूषण, जलवायु परिवर्तनका असर तथा केही क्षेत्रमा हुने अवैध सिकारले यी समुद्री स्तनधारी जीवको अस्तित्वमा गम्भीर खतरा सिर्जना गरेको छ ।
विज्ञहरूका अनुसार ह्वेल समुद्री जैविक विविधता जोगाउन मात्र होइन, जलवायु सन्तुलन कायम गर्न पनि महत्वपूर्ण मानिन्छ। ह्वेलबाट निस्कने मलले समुद्रमा सूक्ष्म वनस्पतिको वृद्धि गर्न सहयोग पुर्याउँछ, जसले वायुमण्डलको कार्बन डाइअक्साइड अवशोषण गरेर जलवायु परिवर्तनको प्रभाव कम गर्न योगदान दिने विश्वास गरिएको छ ।
यस दिवसका अवसरमा समुद्री जीव संरक्षणका अभियानमा सहयोग गर्न, संरक्षणमा सक्रिय संस्थालाई समर्थन गर्न तथा समुद्री क्षेत्रमा भ्रमण गर्दा वातावरणमैत्री र जिम्मेवार पर्यटन अपनाउन आग्रह गरिन्छ । संरक्षणकर्मीहरूका अनुसार ह्वेल र डल्फिनको सुरक्षा समुद्री पारिस्थितिक प्रणालीको दीर्घकालीन संरक्षणसँग प्रत्यक्ष रूपमा जोडिएको विषय हो ।एभरेष्ट न्यूज एजेन्सी
काठमाडौँ । नेकपा एमाले र नेपाली कम्युनिष्ट पार्टी (नेकपा) ले प्रदेशमा सरकार निर्माण गर्न सहकार्य गर्ने भएका छन् । नेपाली काँग्रेसले प्रमुख तीन दलले प्रदेशमा एक साथ सरकार बनाउन नहुने अडान लिएपछि एमाले र नेकपा नजिकिएका हुन् ।
प्रदेशमा सहकार्य गर्ने विषयमा एमाले अध्यक्ष केपी शर्मा ओली र नेकपा संयोजक प्रचण्डबीच छलफल भएको छ ।
नेकपा सचिव महेश बस्नेतले दुवै नेताको छलफलपछि प्रचण्डले नेकपा एमालेसँग सहकार्यको प्रक्रिया औपचारिक रूपमा अघि बढेको बताएको जानकारी दिएका छन् । बस्नेतले यो सहकार्य प्रदेश सरकार निर्माणमा मात्र सीमित नभई मुलुकको हित, राजनीतिक स्थायित्व र कम्युनिस्ट शक्तिहरूबीचको सहकार्यका लागि सकारात्मक पाइला बन्ने बताउदै वाम शक्तिहरूबीचको सहकार्यले देशलाई स्थायित्व र समृद्धिको दिशामा अघि बढाउने अपेक्षा गरेका छन् ।
सातै प्रदेशमा सहकार्यको मोडल बारे अब छलफल टुंगिने नेताहरुले बताएका छन् ।एभरेष्ट न्यूज एजेन्सी,
काठमाडौं । बझाङ केन्द्र विन्दु भएर भूकम्प गएको छ ।
राष्ट्रिय भूकम्प मापन तथा अनुसन्धान केन्द्रका अनुसार बुधबार बिहान ४ बजेर ४० मिनेट जादा बझाङको कोतदेवाल आसपास केन्द्रविन्दु भएर ४.२ रेक्टर स्केलको भूकम्प गएको हो ।
भूकम्पबाट कुनै क्षतिको विवरण भने प्राप्त भएको छैन । एभरेष्ट न्यूज एजेन्सी
काठमाडौं । आज जुलाई २२ अर्थात् विश्व मस्तिष्क दिवस विश्वभर विभिन्न जनचेतनामूलक कार्यक्रम गरी मनाइँदैछ । मस्तिष्कसम्बन्धी रोगबारे जनचेतना फैलाउने, सामाजिक विभेद अन्त्य गर्ने र सबै नागरिकको उपचारमा समान पहुँच सुनिश्चित गर्ने उद्देश्यका साथ यो दिवस सन् २०१४ देखि विश्व स्नायु विज्ञान महासङ्घको पहलमा मनाउन थालिएको हो ।
यस वर्षको विश्व मस्तिष्क दिवसको नारा ‘सबैका लागि मस्तिष्क स्वास्थ्य’ रहेको छ । विश्वभर ३ अर्ब ४० करोडभन्दा बढी मानिस विभिन्न स्नायु तथा मस्तिष्कसम्बन्धी रोगबाट प्रभावित रहेको अवस्थामा उपचार सेवामा रहेको असमानता हटाउँदै सबैलाई समान अवसर उपलब्ध गराउने सन्देश यस वर्षको अभियानले दिएको छ ।
अभियानले समयमै रोग पहिचान, प्रारम्भिक उपचार, रोगको रोकथाम, स्थानीय स्वास्थ्य सेवाको सुदृढीकरण तथा मस्तिष्क स्वास्थ्यलाई प्राथमिकतामा राख्ने नीतिगत सुधारमा जोड दिएको छ। विशेषगरी दुर्गम तथा स्रोतसाधनको अभाव भएका क्षेत्रमा पनि गुणस्तरीय उपचार सेवा विस्तार गर्नुपर्ने आवश्यकता औँल्याइएको छ ।
विश्व स्नायु विज्ञान महासङ्घका अनुसार मस्तिष्कसम्बन्धी रोग विश्वमा अशक्तताको प्रमुख कारणमध्ये एक बनेको छ। त्यसैले उच्च रक्तचाप, मधुमेह र मुटुसम्बन्धी समस्याको नियन्त्रण, नियमित शारीरिक व्यायाम, स्वस्थ खानपान तथा स्वस्थ जीवनशैली अपनाउन सके दीर्घकालीन रूपमा मस्तिष्क स्वास्थ्य जोगाउन महत्वपूर्ण योगदान पुग्ने विज्ञहरूले बताएका छन्।एभरेष्ट न्यूज एजेन्सी
काठमाडौं । नेपाली कांग्रेसका सभापति गगन थापाले निजी शिक्षा र स्वास्थ्य क्षेत्रमा लगाइएको ३ प्रतिशत समता कर लागू नगर्ने सरकारको निर्णयको स्वागत गरेका छन् । उनले उक्त व्यवस्था सुरुदेखि नै अनुपयुक्त रहेको भन्दै आफूहरूले त्यसको विरोध गर्दै आएको बताएका छन् ।
थापाले निजी विद्यालय र अस्पताल रोज्ने सबै नागरिक सम्पन्न नहुने उल्लेख गर्दै धेरैका लागि निजी सेवा विलासिता नभई बाध्यता भएको बताएका छन् । निजी क्षेत्र देशको शिक्षा र स्वास्थ्य प्रणालीको महत्वपूर्ण साझेदार भएकाले सेवा प्रवाहमै अतिरिक्त करको भार थप्नु समाधान नभएको उनको भनाइ छ ।
उनले समता कर समानताको नीति नभई असमानतालाई थप बढावा दिने व्यवस्था भएको दाबी गर्दै सरकारले आर्थिक र सामाजिक यथार्थलाई स्वीकार गर्दै उक्त व्यवस्था खारेज गरेको बताएका छन् । साथै निर्णयलाई प्रभावकारी रूपमा कार्यान्वयन गर्न आवश्यक कानुनी र प्रशासनिक प्रक्रिया समयमै पूरा गर्न सरकारसँग आग्रह गरेका छन् ।
सभापति थापाले बिजुलीमा लगाइएको मूल्य अभिवृद्धि कर (भ्याट) लगायत अन्य अव्यावहारिक कर तथा नीतिगत त्रुटिहरू पनि सच्याउँदै आमनागरिकको भावना अनुरूप निर्णय गर्न सरकारलाई सुझाव दिएका छन् ।एभरेष्ट न्यूज एजेन्सी
काठमाडौं । अख्तियार दुरुपयोग अनुसन्धान आयोगले नेपाल नागरिक उड्डयन प्राधिकरणका तत्कालीन महानिर्देशक प्रदीप अधिकारीविरुद्ध एक करोड ७१ लाख रुपैयाँ घुस लिएको तथा सम्पत्ति शुद्धीकरण गरेको आरोपमा विशेष अदालत काठमाडौंमा मुद्दा दायर गरेको छ ।
आयोगका अनुसार प्राधिकरणका विभिन्न ठेक्काको स्वीकृति, अनुगमन र भुक्तानी प्रक्रियामा आफ्नो पदको दुरुपयोग गर्दै अधिकारीले ठेक्का दिलाइदिने तथा सहजीकरण गरिदिने नाममा गायत्री निर्माण सेवाका प्रमुख प्रेम प्रकाश ढकाललगायतबाट एक करोड ७१ लाख रुपैयाँ घुस लिएको अनुसन्धानबाट पुष्टि भएको छ ।
घुसबाट प्राप्त रकमको स्रोत लुकाउन अधिकारीले श्रीमतीको नाममा ललितपुरमा जग्गा खरिद गरेको आयोगको आरोप छ । वास्तविक कारोबार एक करोड ७१ लाख रुपैयाँ भए पनि राजीनामा लिखतमा ९१ लाख रुपैयाँ मात्र देखाएर बाँकी रकमको स्रोत लुकाउने प्रयास गरिएको तथा बैंक खातामार्फत रकमको कारोबार वैधानिक देखाउने प्रयास गरिएको आयोगले जनाएको छ ।
आयोगले घुस लिने–दिने कार्य भ्रष्टाचार निवारण ऐन, २०५९ तथा त्यसबाट आर्जित रकम लुकाउने र रूपान्तरण गर्ने कार्य सम्पत्ति शुद्धीकरण निवारण ऐन, २०६४ अन्तर्गतको कसुर भएको निष्कर्ष निकाल्दै प्रदीप अधिकारीसहित संलग्न राष्ट्रसेवक र अन्य व्यक्तिविरुद्ध दुवै ऐनअनुसार कारबाही र सजायको माग गर्दै विशेष अदालतमा आरोपपत्र दायर गरेको छ।एभरेष्ट न्यूज एजेन्सी
काठमाडौं । नेपाली कांग्रेसका पूर्व सभापति शेरबहादुर देउवाले स्वदेश फर्कन लागेको जानकारी गराएका छन् ।
हाल हङकङमा रहेका देउवाले मंगलबार एक विज्ञप्ति जारी गर्दै आफू स्वदेश फर्कन लागेको जानकारी गराएका हुन् ।
देउवाले विज्ञप्तिमा सरकारले प्रतिपक्षप्रति प्रतिशोधको राजनीति अघि बढाउदै स्वतन्त्र न्यायपालिका, संबैधानिक संस्थाहरु तथा लोकतान्त्रिक प्रणालीमाथि नै दबाब सिर्जना गर्ने संकेत देखिन थालेको उल्लेख गरेका छन् ।
साथै उनले भनेका छन्- ‘प्रतिशोध होइन, सहकार्य चाहिएको छ । त्यसैले इतिहासबाट प्राप्त अनुभव, परिवर्तनको ऊर्जा र प्रविधि तथा ज्ञानले सम्पन्न नयाँ पुस्ताको सिर्जनशील क्षमताबीच मनको एकता, राष्ट्रिय संवाद र साझा सहकार्यको आवश्यकता आज पहिलेभन्दा अझ बढी सान्दर्भिक बनेको छ ।’
गत फागुनमा उपचारका लागि भन्दै सिंगापुर गएका देउवा दम्पति गत चैत्रमा हङकङ पुगेका थिए । विज्ञप्तिमा देउवाले स्वदेश फर्किने मिति भने उल्लेख गरेका छैनन् ।एभरेष्ट न्यूज एजेन्सी
काठमाडौँ । बाजुराको हिमाली गाउँपालिका–५ स्थित क्युडीको कुवाडी-क्युडी भित्री कच्ची सडकखण्डमा यात्रुवाहक जिप दुर्घटना हुँदा दुई जनाको मृत्यु भएको छ भने चालकसहित सात जना घाइते भएका छन् ।
धुलाचौरबाट दुधिला खोला तर्फ जाँदै गरेको सुदूरपश्चिम प्रदेश ०१–००१ ज १४७८ नम्बरको जिप सडकको माथिल्लो मोडबाट करिब १० मिटर तल खसेपछि दुर्घटना भएको प्रहरीले जनाएको छ । जिप हिमाली गाउँपालिका–२ नातीखोलाका करिब २५ वर्षीय जनवीर बुढाले चलाएका थिए ।
दुर्घटनामा हिमाली गाउँपालिका–२ का ४० वर्षीय धर्मलाल बुढा र हुम्लाको ताजाकोट गाउँपालिका–५ का करिब ४० वर्षीय अम्मर सिंह बुढाको उपचारका क्रममा मृत्यु भएको हो ।
घाइते चालक जनवीर बुढासहित मिजरा बुढा, अस्मिता थापा, जंग सिंह बुढा, गोरख रोकाया, लोकेन्द्र बुढा र नौ वर्षीया सुस्मा बुढाको कोल्टी आधारभूत अस्पतालमा उपचार भइरहेको छ। प्रहरीका अनुसार अधिकांश घाइतेको अवस्था सामान्यदेखि मध्यम रहेको छ ।
घटनाबारे प्रहरीले थप अनुसन्धान गरिरहेको जनाएको छ ।एभरेष्ट न्यूज एजेन्सी
काठमाडौँ । आज संसदीय सुनुवाइ समितिको बैठक बस्दैछ । बिहान ११ बजे बस्ने बैठकमा निर्वाचन आयोगको प्रमुख आयुक्त र आयुक्तहरविरुद्ध आएका उजुरी वितरण गर्ने कार्यसूची रहेको समितिले जनाएको छ ।
समितिले यसअघि असार २५ गते प्रस्तावित प्रमुख निर्वाचन आयुक्त मानबहादुर कार्की र आयुक्त डा. राजीव सुब्बा साथै गुरु वाग्लेविरुद्ध उजुरी १० दिनको समय दिएर उजुरी आव्हान गरेको थियो ।
असार १९ गते बसेको संबैधानिक परिषदको बैठकले प्रमुख निर्वाचन आयुक्तमा मानबहादुर कार्कीको नाम सिफारिस गरेको थियो भने आयुक्तमा डा. राजीव सुब्बा र गुरु वाग्लेलाई सिफारिस गरेको थियो । एभरेष्ट न्यूज एजेन्सी
म्याग्दी । म्याग्दीमा १४ वर्षीया बालिकालाई जबरजस्ती करणी गरेको अभियोगमा मालिका गाउँपालिका-५ देविस्थान पन्थुक बस्ने २२ वर्षीय बिकल विकलाई प्रहरीले पक्राउ गरेको छ ।
बिकलले ती बालिकालाई जबरजस्ती करणी गरेको भन्ने उजुरीको आधारमा प्रहरी चौकी मुनाताकमबाट खटिएको प्रहरीले उनलाई पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको जनाएको छ । एभरेष्ट न्यूज एजेन्सी
