काठमाडौँ । स्पेनिस ला लिगाअन्तर्गत गए राति भएको खेलमा बार्सिलोनाले रियल बेटिसलाई ५–२ गोलले पराजित गरेको छ । बेटिसको घरेलु मैदानमा भएको खेलमा बार्सिलोनाले उत्कृष्ट प्रदर्शन गर्दै लिगमा लगातार नवौँ जित निकालेको हो ।

बार्सिलोनाका लागि लामिन यामलले १०औँ मिनेटमा गोल गर्दै टोलीलाई अग्रता दिलाएका थिए । रियल बेटिसका भालेन्टिन गोमेजले २७औँ मिनेटमा बराबरी गोल गरे पनि रोड्रीले ४१औँ मिनेटमा गोल गर्दै बार्सिलोनालाई पहिलो हाफमा २–१ को अग्रता दिलाए ।

दोस्रो हाफमा गाब्रिएल जेससले ५१औँ मिनेटमा गोल गर्दै बार्सिलोनाको अग्रता बढाए । त्यसको दुई मिनेटपछि एज अब्देले गोल गर्दै बेटिसलाई खेलमा फर्काउने प्रयास गरे ।

खेलको ६२औँ मिनेटमा एरिक गार्सियाले गोल गरेपछि बार्सिलोनाले ४–२ को अग्रता बनायो । डानी ओल्मोले ८१औँ मिनेटमा अर्को गोल थपेपछि बार्सिलोनाले ५–२ को प्रभावशाली जित सुनिश्चित गर्‍यो ।

दोस्रो हाफको ५४औँ मिनेटमा बार्सिलोनाका यामलमाथि टाउकोले प्रहार गरेको घटनामा रियल बेटिसका फाकुन्डो बर्नालले रातो कार्ड पाएपछि घरेलु टोली १० खेलाडीमा सीमित भएको थियो ।

यस जितसँगै बार्सिलोनाले लिगका अपराजित रहदै ९ खेलमा २७ अङ्क जोडेको छ । रियल बेटिस भने १९ अङ्कसहित तालिकाको तेस्रो स्थानमा रहेको छ । एभरेष्ट न्यूज एजेन्सी,

काठमाडौ‌ । बडादसैँको सातौँ दिन हरेक वर्षजस्तै यस वर्ष पनि गोरखा दरबारको दसैँघरबाट परम्परागत विधिअनुसार पूजाआजा गरी फूलपातीको डोली काठमाडौँस्थित हनुमानढोका दरबार पठाइएको छ ।

शनिबार शुभसाइतमा पूजाअर्चना सम्पन्न गरी फूलपातीको डोली बा २ झ २१२८ नम्बरको गाडीमा राखेर काठमाडौँ पठाइएको हो। फूलपाती बिदाइका लागि गोरखा दरबारको दसैँघरबाट बाजागाजासहित र्‍याली निकालिएको थियो ।

बडादसैँको सप्तमी अर्थात् फूलपातीका दिन गोरखाको कालिका मन्दिरमा विशेष पूजाआजा गरिन्छ। पूजापश्चात् कालिका मन्दिरको जमरा र विभिन्न किसिमका पात तथा वनस्पतिहरू (केरा, दाडिम, धान, हलेदो, माने, अशोक, बेल र जयन्ती) लाई शास्त्रीय विधिअनुसार फूलपातीका रूपमा तयार पारिन्छ। यसरी तयार पारिएको फूलपातीलाई विशेष बाजागाजा, सलामी र मङ्गलपाठसहित गोरखाबाट काठमाडौँतर्फ पठाउने गरिन्छ।

गोरखाबाट पठाइएको फूलपाती हनुमानढोका दरबारमा पुर्‍याएपछि हर्षबढाइँका साथ भित्र्याउने परम्परा रहेको छ । एभरेष्ट न्यूज एजेन्सी,

इलाम । इलामको रोङ गाउँपालिका–३ पात्लेडाँडामा धारिलो हतियार प्रहारबाट एक पुरुषको मृत्यु भएको छ ।

रोङ गाउँपालिका–३ पात्लेडाँडा निवासी ५५ वर्षीय कमल परियार आफ्नै घरको बरण्डामा मृत फेला परेका हुन् । उनको दाहिने खुट्टा, बायाँ हात र टाउकोमा धारिलो हतियार प्रहार गरिएको अवस्थामा शव फेला परेको प्रहरीले जनाएको छ ।

शनिबार बिहान स्थानीयले घटनाबारे जानकारी गराएपछि प्रहरी टोली घटनास्थलमा पुगेको थियो । प्रहरीले घटनास्थल सुरक्षित राखेर अनुसन्धान अघि बढाएको छ । घटनास्थलबाट एउटा हतियारसमेत बरामद गरिएको छ ।

प्रारम्भिक अनुसन्धानका क्रममा परियार विगत चार वर्षदेखि घरमा एक्लै बस्दै आएको खुलेको छ । हत्यामा संलग्न व्यक्ति फरार रहेकाले प्रहरीले उनको खोजी तीव्र बनाएको छ ।

घटनाबारे थप अनुसन्धान भइरहेको प्रहरीले जनाएको छ । एभरेष्ट न्यूज एजेन्सी

आजको राशिफल बिस २०८३ असोज ३१ गते शनिबार ईस २०२६ अक्टोबर १७ नेपाल सम्बत ११४६ कौलाथ्व सप्तमी, रौद्र नाम संवत्सर सूर्य दक्षिणायन, शरद ऋतु, असोज कृष्ण पक्ष सप्तमी, चन्द्रमा धनु राशिमा, मूल नक्षत्र, अतिगण्ड योग, तैतिल करण । आज नेपालमा सुर्योदय बिहान ६ बजेर ०५ मिनेटमा र सूर्यास्त साँझ ५ बजेर ३५ बजे हुनेछ । आज जन्म लिने बच्चा धनु राशीको हुनेछ ।

मेष (चु, चे, चो, ला, लि, लु, ले, लो, अ)

आज कामको चाप बढ्न सक्ने भए पनि योजनाबद्ध रूपमा अघि बढ्दा जिम्मेवारी पूरा गर्न सकिनेछ। व्यापारमा ग्राहकसँगको सम्बन्ध मजबुत बनाउने अवसर मिल्नेछ। आर्थिक रूपमा आकस्मिक खर्च आउन सक्ने भएकाले बजेटमा ध्यान दिनुहोस्। परिवारमा तपाईंको सहयोग आवश्यक पर्न सक्छ। प्रेम सम्बन्धमा आवेगभन्दा समझदारीलाई प्राथमिकता दिनु राम्रो हुनेछ। थकान महसुस भए आरामका लागि समय छुट्याउनुहोस् ।

वृष (इ, उ, ए, ओ, वा, वि, वु, वे, वो)

आज धैर्य र व्यवहारिक सोचले लाभ दिलाउन सक्छ। कार्यक्षेत्रमा लामो समयदेखि प्रयास गरिरहेको काममा प्रगतिको संकेत देखिन सक्छ। व्यापारमा नियमित कारोबार कायम रहनेछ। आर्थिक रूपमा बचत बढाउने र अनावश्यक खर्च घटाउने योजना बनाउन सकिनेछ। परिवारमा घरायसी विषयमा सहमति जुट्न सक्छ। प्रेम सम्बन्धमा आत्मीयता बढ्नेछ। खानपान र आराममा नियमितता कायम राख्नु राम्रो हुनेछ ।

मिथुन (का, कि, कु, घ, ङ, छ, के, को, ह)

आज नयाँ विचार र पुराना अनुभवलाई जोडेर काम गर्दा फाइदा मिल्नेछ। कार्यक्षेत्रमा सञ्चार, लेखन वा छलफलसँग सम्बन्धित काम अघि बढ्न सक्छ। व्यापारमा नयाँ सम्पर्क उपयोगी बन्न सक्छ, तर सहमति गर्नुअघि सबै सर्त बुझ्नुहोस्। आर्थिक हिसाबकिताब व्यवस्थित गर्नु लाभदायक हुनेछ। साथीभाइसँगको भेटले नयाँ सम्भावना देखाउन सक्छ। प्रेममा खुलेर संवाद गर्दा अन्योल हट्नेछ। मानसिक थकान कम गर्न कामको बीचमा विश्राम लिनुहोस् ।

कर्कट (हि, हु, हे, हो, डा, डि, डु, डे, डो)

चन्द्रमाको प्रभावले आज पारिवारिक र भावनात्मक विषयले बढी महत्व पाउन सक्छ। घरसँग सम्बन्धित कुनै निर्णयमा सबैको आवश्यकता बुझेर अघि बढ्नु राम्रो हुनेछ। कार्यक्षेत्रमा व्यक्तिगत भावनाभन्दा जिम्मेवारीलाई प्राथमिकता दिनुहोस्। व्यापारमा ग्राहकको सुझावबाट सुधारको अवसर मिल्न सक्छ। आर्थिक रूपमा घरायसी खर्च बढ्न सक्ने भएकाले प्राथमिकता निर्धारण गर्नुहोस्। प्रेम सम्बन्धमा मनका कुरा स्पष्ट राख्दा निकटता बढ्नेछ। पर्याप्त आरामले मानसिक सन्तुलन कायम राख्न सहयोग गर्नेछ ।

सिंह (मा, मि, मु, मे, मो, टा, टि, टु, टे)

आज आत्मविश्वास र नेतृत्व क्षमताको उपयोग गर्ने अवसर मिल्न सक्छ। कार्यक्षेत्रमा महत्वपूर्ण जिम्मेवारी सम्हाल्दा सहकर्मीको सुझावलाई पनि महत्व दिनुहोस्। व्यापारमा नयाँ योजना अघि बढाउन सकिनेछ, तर लगानीको जोखिम बुझ्नु आवश्यक छ। आर्थिक रूपमा प्रतिष्ठा देखाउने नाममा अनावश्यक खर्च नगर्नुहोस्। परिवारमा तपाईंको निर्णयले प्रभाव पार्न सक्छ। प्रेममा आफ्नो भावना व्यक्त गर्दा अर्को पक्षको चाहनालाई पनि सम्मान गर्नुहोस्। व्यस्तताका बीच पर्याप्त आराम गर्नु राम्रो हुनेछ ।

कन्या (टो, प, पि, पु, ष, ण, ठ, पे, पो)

आज अधुरा काम, कागजात र हिसाबकिताब व्यवस्थित गर्न अनुकूल समय छ। कार्यक्षेत्रमा सानो त्रुटि पहिचान गरेर समस्या समाधान गर्न सकिनेछ। व्यापारमा खर्च र आम्दानीको समीक्षा गर्दा सुधार गर्नुपर्ने पक्ष देखिन सक्छ। आर्थिक रूपमा नियमित बचतलाई निरन्तरता दिनुहोस्। परिवारमा तपाईंको व्यावहारिक सहयोग आवश्यक पर्न सक्छ। प्रेममा अनावश्यक आलोचनाभन्दा सकारात्मक संवादले सम्बन्ध सहज बनाउनेछ। लामो समय काम गर्दा आँखामा थकान हुन सक्ने भएकाले विश्राम लिनुहोस् ।

तुला (रा, रि, रु, रे, रो, ता, ति, तु, ते)

आज सामाजिक सम्बन्ध र सहकार्यबाट लाभ लिन सकिनेछ। कार्यक्षेत्रमा सहकर्मी वा साझेदारसँगको समन्वयले काम सहज बन्न सक्छ। व्यापारमा ग्राहकसँगको सम्बन्ध विस्तार गर्ने अवसर मिल्नेछ। आर्थिक रूपमा आकर्षक प्रस्ताव आए पनि त्यसको वास्तविकता जाँचेर मात्र निर्णय लिनुहोस्। परिवारमा मतभेद भए संवादबाट समाधान खोज्न सकिनेछ। प्रेम सम्बन्धमा भविष्यका योजनाबारे कुराकानी हुन सक्छ। अरूको आवश्यकतासँगै आफ्ना चाहनालाई पनि महत्व दिनुहोस् ।

वृश्चिक (तो, ना, नि, नु, ने, नो, या, यि, यु)

आज दृढता र धैर्यले कठिन जिम्मेवारी पूरा गर्न सहयोग गर्नेछ। कार्यक्षेत्रमा प्रतिस्पर्धा भए पनि आफ्नो कामको गुणस्तरमा ध्यान दिनुहोस्। व्यापारमा नयाँ जोखिम लिनुअघि बजारको अवस्था र आर्थिक क्षमताको मूल्याङ्कन गर्नु उचित हुनेछ। आर्थिक कारोबारमा स्पष्ट प्रमाण र कागजातलाई प्राथमिकता दिनुहोस्। परिवारमा बोलीमा संयम राख्दा विवाद टार्न सकिनेछ। प्रेममा शंका गर्नुभन्दा खुलेर संवाद गर्नु राम्रो हुनेछ। सवारी चलाउँदा र शारीरिक श्रम गर्दा सावधानी अपनाउनुहोस् ।

धनु (ये, यो, भ, भि, भु, ध, फा, ढ, भे)

आज ज्ञान, अनुभव र दीर्घकालीन योजनामा ध्यान केन्द्रित हुनेछ। अध्ययन, सीप विकास वा भविष्यको योजना बनाउन समय उपयोगी रहनेछ। कार्यक्षेत्रमा अनुभवी व्यक्तिको सुझावले निर्णय लिन सहयोग पुर्‍याउन सक्छ। व्यापारमा नयाँ क्षेत्र विस्तार गर्ने सोच बन्न सक्छ, तर पर्याप्त तयारी आवश्यक हुनेछ। आर्थिक रूपमा बचत र भविष्यका खर्च व्यवस्थापनमा ध्यान दिनुहोस्। परिवारसँगको संवादले मन प्रसन्न बनाउनेछ। प्रेम सम्बन्धमा विश्वास र सम्मान बढ्नेछ। धेरै जिम्मेवारी एकैपटक नलिनु राम्रो हुनेछ ।

मकर (भो, ज, जि, खि, खु, खे, खो, गा, गि)

शनिको प्रभावले आज अनुशासन र जिम्मेवारीलाई प्राथमिकता दिनुपर्नेछ। कार्यक्षेत्रमा ढिलाइ भए पनि निरन्तर प्रयासले काम अघि बढ्नेछ। व्यापारमा पुरानो हिसाब मिलाउने र भुक्तानी व्यवस्थित गर्ने अवसर मिल्न सक्छ। आर्थिक रूपमा नयाँ दायित्व थप्नुभन्दा नियमित खर्च नियन्त्रण गर्नु राम्रो हुनेछ। परिवारमा तपाईंको सहयोग आवश्यक पर्न सक्छ। प्रेममा भावना व्यक्त गर्न समय निकाल्दा सम्बन्धमा न्यानोपन बढ्नेछ। लामो समय काम गर्दा हुने थकानलाई बेवास्ता नगर्नुहोस् ।

कुम्भ (गु, गे, गो, सा, सि, सु, से, सो, द)

आज नयाँ विचारलाई व्यवहारिक योजनामा बदल्ने अवसर मिल्न सक्छ। कार्यक्षेत्रमा फरक समाधान प्रस्तुत गर्दा त्यसको कार्यान्वयन पक्ष पनि स्पष्ट पार्नुहोस्। व्यापारमा नयाँ सम्पर्क वा सहकार्यको सम्भावना देखिन सक्छ। आर्थिक रूपमा नयाँ योजनामा रकम लगाउनुअघि विश्वसनीयता जाँच्नुहोस्। साथीभाइसँगको छलफलले नयाँ दृष्टिकोण दिन सक्छ। परिवारमा आफ्ना योजना साझा गर्दा सहयोग प्राप्त हुन सक्छ। प्रेममा स्वतन्त्रता र आत्मीयताबीच सन्तुलन कायम राख्नुहोस्। मानसिक थकान घटाउन केही समय शान्त वातावरणमा बिताउनु उपयोगी हुनेछ ।

मीन (दि, दु, थ, झ, ञ, दे, दो, च, ची)

आज भावनात्मक समझ र सिर्जनात्मक सोचले काममा सहयोग पुर्‍याउन सक्छ। लेखन, कला वा अध्ययनसँग सम्बन्धित काममा नयाँ प्रेरणा मिल्न सक्छ। कार्यक्षेत्रमा अरूको समस्या बुझेर सहयोग गर्दा सम्बन्ध राम्रो बन्नेछ, तर आफ्नो जिम्मेवारीको सीमा कायम राख्नुहोस्। व्यापारमा विश्वासिलो व्यक्तिको सुझाव उपयोगी हुन सक्छ। आर्थिक रूपमा घरपरिवारसँग सम्बन्धित खर्चको योजना बनाउनुहोस्। परिवारमा आत्मीय संवादले मन हलुका बनाउनेछ। प्रेममा मनका कुरा स्पष्ट राख्दा नजिकपन बढ्नेछ। तनाव कम गर्न आराम र मनपर्ने गतिविधिका लागि समय निकाल्नुहोस् । एभरेष्ट न्यूज एजेन्सी,

काठमाडौँ । नेपाल दूरसञ्चार प्राधिकरणले स्वीकृत मापदण्डविपरीत इन्टरनेट सेवा बिक्री गर्ने १४ वटा सेवा प्रदायक कम्पनीलाई जनही ५० हजार रुपैयाँ जरिवाना गरेको छ ।

प्राधिकरणले अनुमतिपत्रका सर्तविपरीत काम गरेको पुष्टि भएपछि दूरसञ्चार ऐन, २०५३ को दफा ४७ (१) बमोजिम कारबाही गरिएको जनाएको हो ।

प्राधिकरणका अनुसार स्वीकृत प्याकेजअनुसार सेवा उपलब्ध नगराएको, तोकिएको भन्दा बढी शुल्क लिएको, स्वीकृतिभन्दा फरक प्याकेज बिक्री गरेको र नयाँ प्याकेजबारे सेवाग्राहीलाई समयमै जानकारी नदिएको पाइएपछि जरिवाना गरिएको हो ।

जरिवानामा पर्ने कम्पनीहरूमा ब्रोडलिङ्क नेटवर्क एन्ड कम्युनिकेसन, क्लासिक टेक, वेब सर्फर नेपाल, फाइबरवर्ल्ड, भायानेट, एरोनेट, डिश मिडिया नेटवर्क, वाइफाइ नेपाल, सिजी कम्युनिकेसन, वर्ल्डलिङ्क, फर्स्ट लिङ्क कम्युनिकेसन, पोखरा इन्टरनेट, टेकमाइन्ड्स नेटवर्क र सुबिसु रहेका छन् ।

प्राधिकरणले स्वीकृति नलिई सञ्चालन गरिएका इन्टरनेट प्याकेज तथा शुल्क तत्काल बन्द गर्न सम्बन्धित कम्पनीलाई निर्देशन दिएको छ। त्यस्ता गतिविधिबाट ग्राहकलाई हानि पुगेको भए मागका आधारमा क्षतिपूर्ति भराउनसमेत भनिएको छ ।

प्राधिकरणका अनुसार सेवा प्रदायकले नयाँ शुल्क लागू गर्नुअघि प्रस्तावित दर र लागू हुने मितिसहित कम्तीमा तीन महिनाअघि स्वीकृतिका लागि पेस गर्नुपर्छ । स्वीकृतिबिना कुनै पनि सेवा प्याकेज वा शुल्क लागू नगर्न सबै सेवा प्रदायकलाई सचेत गराइएको छ ।

यसअघि असोज २४ गते प्राधिकरणले इन्टरनेट सेवाको शुल्क वृद्धि गर्न स्वीकृति नदिएको स्पष्ट पारेको थियो । स्वीकृत दरभन्दा बढी शुल्क लिने वा गैरकानुनी रूपमा सेवा सञ्चालन गर्ने कम्पनीमाथि कारबाही गर्ने चेतावनीसमेत दिएको थियो ।

प्राधिकरणले स्वीकृत दरभन्दा बढी शुल्क लिइएको वा उपभोक्ताको हितविपरीत सेवा सञ्चालन गरिएको पाइएमा उजुरी गर्न सेवाग्राहीलाई आग्रह गरेको छ । उपभोक्ताको हित संरक्षण र स्वच्छ प्रतिस्पर्धा कायम गर्न कानुनअनुसार सेवा सञ्चालन गर्नुपर्ने प्राधिकरणले जनाएको छ । एभरेष्ट न्यूज एजेन्सी,

धादिङ । पृथ्वी राजमार्गअन्तर्गत धादिङको गलौंदी क्षेत्रमा आज राति ११ बजेदेखि भोलि बिहान ५ बजेसम्म सवारी आवागमन पूर्ण रूपमा बन्द हुने भएको छ ।

जिल्ला प्रशासन कार्यालय धादिङका अनुसार गजुरी गाउँपालिका–५ स्थित गलौंदीमा त्रिशूली नदीको कटानका कारण सडक भासिएपछि मर्मतसम्भारका लागि सवारी आवागमन बन्द गर्न लागिएको हो ।

सोमबार राति ११ बजेदेखि मंगलबार बिहान ५ बजेसम्म उक्त सडकखण्डमा सबै प्रकारका सवारीसाधन सञ्चालनमा रोक लगाइने प्रमुख जिल्ला अधिकारी लक्ष्मीप्रसाद पौडेलले जारी गरेको सूचनामा उल्लेख छ ।

सडक मर्मतका क्रममा यात्रु तथा सवारी चालकलाई पर्न जाने असुविधाप्रति प्रशासनले क्षमायाचना गर्दै आवश्यक सहयोग र समन्वयका लागि आग्रह गरेको छ ।एभरेष्ट न्यूज एजेन्सी,

काठमाडौँ । जल तथा मौसम विज्ञान विभागले अन्तर्गत मौसम पूर्वानुमान महाशाखाले हाल देशमा पश्चिमी वायू र मनसुनी वायुको आंशिक प्रभाव रहेको जानकारी दिएको छ ।

हाल देशका हिमाली र पहाडी भू-भागमा आंशिक बादल लागेको छ । तराई भू-भागमा मौसम मुख्यतया सफा रहेको छ । बागमती, गण्डकी र लुम्बिनी प्रदेशको हिमाली भू-भागमा हल्का वर्षा भइरहेको छ ।

आज दिउँसो कर्णाली र सूदुरपश्चिम प्रदेशको हिमाली भू-भागमा साधारणतया बादल लाग्नेछ । बाँकी हिमाली भू-भाग तथा देशको पहाडी भू-भागमा आंशिक बादल लाग्नेछ । देशको तराई भू-भागमा मौसम मुख्यतया सफा रहनेछ। कर्णाली र सुदुरपश्चिम प्रदेशको हिमाली र पहाडी भू-भाग साथै लुम्बिनी प्रदेशको हिमाली भू-भागका थोरै स्थानमा मध्यमसम्मको वर्षा/हिमपातको सम्भावना छ । कोशी, बागमती र गण्डकी प्रदेशका हिमाली र पहाडी भू-भाग तथा लुम्बिनी प्रदेशको पहाडी भू-भागका एक-दुई स्थानमा हल्का वर्षा/हिमपातको सम्भावना छ ।

त्यस्तै, आज राति देशको हिमाली भू-भागमा आंशिक बादल लाग्ने तथा पहाडी र तराई भू-भागमा मौसम मुख्यतया सफा रहनेछ ।एभरेष्ट न्यूज एजेन्सी,

काठमाडौँ । प्रत्येक वर्ष आश्विन शुक्ल प्रतिपदादेखि सुरु हुने नेपालीको महान् पर्व बडादसैँ आजदेखि सुरु भएको छ । यो पर्व आश्विन शुक्ल पूर्णिमासम्म १५ दिन धुमधामका साथ मनाउने गरिन्छ ।

बडादसैँको पहिलो दिन आज घरघरमा विधिपूर्वक दियो, कलश र गणेश स्थापनासहित घटस्थापना गरिन्छ । पूजा कोठा वा दसैँ घरमा वैदिक विधिपूर्वक शक्तिकी अधिष्ठात्री देवी दुर्गाको आह्वान गरी पूजा आरम्भ हुन्छ ।

आज बिहानै नित्यकर्म समाप्त गरी नजिकको नदी वा चोखो स्थलबाट बालुवा वा माटो ल्याई गाईको गोबरले लिपपोत गरिएको पूजा कोठा अथवा दसैँ घरमा विधिपूर्पक राखेर त्यसमाथि यव अर्थात् जौ रोप्ने गरिन्छ । यस कार्यलाई जमरा राख्ने पनि भनिन्छ । यव अङ्कुर दुर्गा देवीको प्रिय वस्तु भएकाले आज यव रोपण गरी दुर्गालाई चढाएर विजयादशमीको दिन टीका प्रसादसितै समृद्धिको प्रतीक पहेँलो जमरा पनि ग्रहण गरिन्छ ।

जमरामा जौबाहेक अरु अन्न रोप्ने शास्त्रीय विधि नभएको धर्मशास्त्रविद्हरु बताउछन् । कूल परम्पराअनुसार कसैले अन्य अन्न पनि जौसितै रोप्ने गरेका छन् । जमरालाई आयुर्वेदिक औषधिका रूपमा समेत प्रयोग गरिन्छ ।

कति बेला छ घटस्थापनाको शुभ साइत ?

नेपाल पञ्चाङ्ग निर्णायक विकास समितिका अनुसार असोज २५ गते आइतबार नवरात्रारम्भ तथा घटस्थापना हुनेछ । घटस्थापनाका लागि बिहान ११: ४७ बजेको समय निर्धारण गरिएको छ । यस दिनबाट बडादसैँको मुख्य धार्मिक अनुष्ठान सुरु हुनेछ । त्यसैगरी असोज २६ गते सोमबार झण्डा फेर्ने कार्यक्रम रहेको छ । यसका लागि पश्चिम मोहडा निर्धारण गरिएको छ । असोज २९ गते बुधबार श्री पचलीभैरव यात्रा हुनेछ । असोज ३१ गते शनिबार फूलपाती भित्र्याउने तथा श्री तुलजाभवानी यात्रासहितका धार्मिक विधि हुनेछन् । सो दिन श्री तुलजाभवानी यात्राका लागि बिहान ७: ३० बजे र स्थिरासनका लागि बिहान १०: ३२ बजेको समय निर्धारण गरिएको छ । त्यसपछि कार्तिक १ गते आइतबार महाअष्टमी तथा कालरात्रि मनाइनेछ । त्यसपछि कार्तिक ३ गते मंगलबार महानवमी तथा विजयादशमीका प्रमुख धार्मिक विधि सम्पन्न हुनेछन् ।

दशमीको टिकाको शुभ साइत:

विजयादशमीका दिन देवी विसर्जन बिहान ८: ४८ बजे गर्ने साइत तोकिएको छ । त्यसपछि टीका लगाउने तथा टीका लगाइ माग्ने व्यक्ति पश्चिम फर्किने समय बिहान १०: २६ बजे निर्धारण गरिएको छ। सोही दिन श्री तुलजाभवानी यात्रा, स्थिरासन तथा खड्गयात्रासमेत हुने समितिको विवरणमा उल्लेख छ। श्री तुलजाभवानी यात्राका लागि बिहान १०: ४१ बजे र स्थिरासनका लागि दिउँसो ११: ५२ बजेको समय तोकिएको छ।

समितिले कार्तिक ८ गते आइतबार अखिलबलीपूर्ति तथा कोजाग्रतपूजा हुने जनाएको छ । यससँगै २०८३ सालको बडादसैँसँग सम्बन्धित मुख्य धार्मिक विधि तथा कार्यक्रमको क्रम पूरा हुनेछ । समितिले सार्वजनिक गरेको सूचनामा सामान्यतया देवीको प्रसाद लगाउन साइतको आवश्यकता नपर्ने उल्लेख गरिएको छ । बडादसैँका विभिन्न धार्मिक तथा सांस्कृतिक विधि परम्पराअनुसार सम्पन्न गर्न सहज होस् भन्ने उद्देश्यले समितिले सम्बन्धित साइत तथा समय सार्वजनिक गरेको समितिले जानकारी दिएको छ  एभरेष्ट न्यूज एजेन्सी,

काठमाडौँ । मृत्युदण्डविरुद्धको २४औँ विश्व दिवस आज मनाइँदैछ । मृत्युदण्डविरुद्धको विश्व गठबन्धनको समन्वयमा हरेक वर्ष यो दिवस मनाइन्छ ।

सन् २००३ मा सुरु भएको यो दिवसको यस वर्षको नारा ‘जीवनका कथाहरू’ रहेको छ । सन् २०२६ देखि २०२७ सम्म सञ्चालन हुने अभियानले मृत्युदण्डबाट प्रभावित मानिसहरूको जीवन, अनुभव र उनीहरूका कथालाई प्राथमिकतामा राख्ने उद्देश्य राखेको छ ।

यस दिवसका अवसरमा युरोपेली सङ्घ र युरोपेली परिषद्ले संयुक्त वक्तव्य जारी गर्दै मृत्युदण्ड कायम राखेका देशहरूलाई मृत्युदण्ड कार्यान्वयन तत्काल रोक्न र यसलाई पूर्ण रूपमा अन्त्य गर्ने दिशामा अघि बढ्न आग्रह गरेका छन् ।

मृत्युदण्डविरुद्धको विश्व दिवसले मृत्युदण्डको प्रयोगबारे जनचेतना बढाउने, मानव जीवनको महत्त्व उजागर गर्ने र मृत्युदण्ड उन्मूलनका लागि विश्वव्यापी प्रयासलाई प्रोत्साहन गर्ने लक्ष्य राखेको छ । एभरेष्ट न्यूज एजेन्सी,