राष्ट्रिय स्वतन्त्र पार्टी (रास्वपा) का सभापति रवि लामिछानेलाई प्रदर्शनकारीहरूले नख्खु कारागारबाट बाहिर निकालेका छन्।
मंगलबार दिउँसो प्रदर्शनकारीहरूले लामिछानेलाई जेलबाट बाहिर निकालेका हुन्।
रवि लामिछाने जेलबाट निस्केपछि भाषण गरिरहेको भिडिओ सामाजिक सञ्जालमा रास्वपा केन्द्रीय सदस्य क्रान्तिशिखा धितालले राखेकी छन्।
लामिछाने सहकारी बचत अपचलन मुद्दामा नख्खु कारागारमा थिए।
नख्खु जेलका प्रमुख सत्यराज जोशीका अनुसार प्रदर्शनकारीहरूले ढुंगा मुढा गरेका थिए।
‘कारागारमा रहेका अरू कैदीहरूको सुरक्षाका लागि उहाँलाई छाडिदिएका छौं,’ उनले भने।
आरके श्रीवास्तव,राैतहट,भदौ २४ गते ।
रौतहट जिल्लामा उत्पन्न असामान्य परिस्थितिलाई मध्यनजर गर्दै प्रमुख जिल्ला अधिकारी (प्रजिअ) विनोद कुमार खड्काको आदेशमा मिति २०८२ साल भदौ २४ गते दिउँसो ३:०० बजेदेखि अनिश्चितकालीन कर्फ्यू आदेश जारी गरिएको छ । स्थानीय प्रशासन ऐन, २०२८ को दफा ६(क) बमोजिम जारी गरिएको आदेशअनुसार अर्को सूचना जारी नभएसम्म जिल्लाभित्र सर्वसाधारणले कुनै किसिमको आवतजावत, भेला, जुलुस, प्रदर्शन, सभा, बैठक, घेराउ लगायतका क्रियाकलाप गर्न नपाउनेछ ।
प्रमुख जिल्ला अधिकारी खड्काले जारी गरेको विज्ञप्तिमा भनिएको छ, “जिल्लाको शान्ति सुरक्षा कायम राख्न कर्फ्यू आदेश आवश्यक भएको छ।” कर्फ्यू अवधिमा अत्यावश्यक सेवामा संलग्न सवारीसाधन तथा व्यक्तिहरूलाई भने सुरक्षाकर्मीको सहजीकरणमा आवागमन गर्न छुट दिइनेछ । ती सेवामा एम्बुलेन्स, दमकल, शववाहन, स्वास्थ्यकर्मीका सवारी, सञ्चारकर्मी, पर्यटक सवारीसाधन, मानव अधिकार र कूटनीतिक नियोगका सवारी तथा हवाई यात्रुहरू (हवाई टिकटको आधारमा) परेका छन् । स्थानीय प्रशासनले नागरिकहरूलाई आदेशको पालना गरी शान्ति र सुरक्षामा सहयोग पुर्याउन आग्रह गरेको छ ।
काठमाडौं । प्रधानमन्त्री केपी शर्मा ओलीले पदबाट राजीनामा दिएका छन् । उनको सचिवालयले राजीनामा दिएको जनाएको छ । जेन जीको आन्दोलनले संसद्, सिंहदरबार सैबतिर कब्जा गरेपछि ओलीको राजीनामा आएको हो ।
सोमबारको जेन जीको प्रदर्शनमा प्रहरीको गोली लागेर १९ जनाको मृत्यु भएको थियो । मंगलबार आन्दोलन झन् उग्र बनेको थियो । मंगलबार प्रदर्शनकारीले संसद् र सिंहदरबार कब्जामा लिएको केही मिनेटपछि प्रधानमन्त्रीको राजीनामा दिएको छ ।
ओलीले मुलुकमा असमान्य स्थिति आएको भन्दै राजीनामा दिएको बताएका छन् ।
काठमाडौं । काठमाडौंको हिलटन होटलमा प्रदर्शनकारीले आगो लगाएका छन् ।
उनीहरुले आज प्रदर्शनका क्रममा आगो लगाएका छन् ।
काठमाडौँ– जेन-जी आन्दोलनकारीका कारण देश अनिश्चिततातर्फ धकेलिइरहेका बेला प्रतिपक्षी राष्ट्रिय प्रजातन्त्र पार्टीका सबै सांसदले राजीनामा दिएका छन् ।
राप्रपाका प्रमुख सचेतक ज्ञानबहादुर शाहीले संघ र प्रदेशका समेत सबै ४२ जना सांसदहरूले राजीनामा घोषणा गरेको खबरहबलाई बताएका छन् ।
सडक आन्दोलनमा आएको जेन–जी पुस्ताले काठमाडौंको माछापोखरीमा रहेको गुणस्तर तथा नापतौल विभागमा आगजनी गरेका छन् । मंगलबार प्रदर्शनकारीले देशभरका सरकारी कार्यालय र नेताका निवासहरूलाई लक्षित गरेर आगजनी र तोडफोड गरिरहेका छन् ।
प्रदर्शनकारीहरू सङ्घीय संसद् भवनमा छिरेका छन्। सोमबार गरेको आन्दोलनमा प्रहरी दमन भएको विरोधमा उत्रिएका प्रदर्शनकारी संसद् भवन प्रवेश गरेका हुन्।
यस अघि सोमबार यहाँ भएको प्रदर्शनमा प्रहरीले गोली चलाउँदा १९ जनाको मृत्यु भएको थियो ।
काठमाडौं । रास्वपाका सबै सांसदहरुले सामूहिक राजीनामा दिएका छन् । यस्तो विज्ञप्ति जारी गर्दै उनीहरु सबैले सामूहिक राजीनामा दिएका हुन् ।
वि.सं. २०८२ भदौ २४
ने.सं.११४५ ञंलागा द्वितीया
आदरणीय आम नेपाली आमाबुबा, दाजुभाई तथा दिदीबहिनीहरु,
सामूहिक राजीनामा
देशमा व्याप्त भ्रष्टाचार, कानूनी शासनको अवहेलना, क्रुर राजनीतिक अभ्यास र सामाजिक सञ्जाल बन्द गरेर अभिव्यक्ति स्वतन्त्रता खोसिएको विरुद्धमा नेपालको पछिल्लो पुस्ता जेनजीद्वारा आयोजित आजको प्रदर्शनमा सरकारले गरेको बर्बर दमनको राष्ट्रिय स्वतन्त्र पार्टी संसदीय दल भर्त्सना गर्दछ।
निहत्था नवयुवाहरूले गरेको शान्तिपुर्ण लोकतान्त्रिक आन्दोलनको पहिलो प्रहरमै सरकारले गरेको आमहत्याको हामी घोर निन्दा गर्दै चेतावनी दिन्छौँ: आफ्नै सन्तानको रगतमा लत्पतिएर कुशासन लम्ब्याउने कुचेष्टा अब जनताले सहने छैनन् र यो आततायी शासनको जनप्रतिवाद हुनेछ ।
वर्तमान सरकारको औचित्य पूर्णत: समाप्त भइसकेको परिप्रेक्षमा देहाय बमोजिम प्रस्ताव गर्दछौः
१) प्रधानमन्त्रीको तत्काल राजीनामा
२) घटनाको निष्पक्ष छानविन गर्न उच्चस्तरीय न्यायिक छानविन आयोग गठन
३) सर्वपक्षीय नागरिक सरकार
४) प्रधानमन्त्री, गृहमन्त्री, सञ्चारमन्त्री साथै काठमाडौं जिल्लाका प्रमुख जिल्ला अधिकारीलाई बर्खास्तीका साथै हिरासतमा लिई सबै दोषीमाथि कडा कारबाही गर्न माग गर्दछौँ ।
५) संविधान संशोधनको प्रक्रिया आरम्भ
६) ठूला भ्रष्टाचारका काण्डहरुको छानबिनका लागि अधिकार सम्पन्न आयोग गठन
वर्तमान संघीय संसदले कुनै पनि राष्ट्रिय मुद्दाको हल निकाल्न असमर्थ भई वैधता गुमाएको निष्कर्षमा पुग्दै आगामी निकासका लागि शिघ्र अन्तरिम नागरिक सरकार गठनको प्रस्ताव गर्दै, सरकारबाट हत्या गरिएका जेनजी योद्धाहरूप्रति हार्दिक श्रद्धाञ्जली अर्पण गर्दै घाइते भएका सबैको शिघ्र एवं निःशुल्क उपचारको पक्षमा रहँदै, देशको मुख्य सम्पति जेन जीको माग र अपेक्षामा पूर्ण समर्थन र निरन्तर आन्दोलनमा रहने समर्पणकासाथ हामी राष्ट्रिय स्वतन्त्र पार्टीका सबै प्रतिनिधिसभा सदस्यहरु (साँसदहरु) ले सामूहिक राजीनामा दिने सचिवालयको प्रस्तावमा संसदीय दल एकमत रहेको जानकारी गराइन्छ।
१. रवि लामिछाने, संसदीय दलको नेता
२. डोल प्रसाद अर्याल, संसदीय दलको पूर्वनेता
३. डा. स्वर्णिम वाग्ले, सदस्य
४. विराजभक्त श्रेष्ठ, संसदीय दलको उपनेता
५. सन्तोष परियार, प्रमुख सचेतक
६. निशा डाँगी, सचेतक
७. मनिष झा, कोषाध्यक्ष
८. सुमना श्रेष्ठ, सदस्य
९. गणेश पराजुली, सदस्य
१०. सोबिता गौतम, सदस्य
११. डा.तोसिमा कार्की, सदस्य
१२. शिशिर खनाल, सदस्य
१३. हरि ढकाल, सदस्य
१४. प्रा.डा. चन्दा कार्की (भण्डारी), सदस्य
१५. असिम शाह, सदस्य
१६. लक्ष्मी तिवारी, सदस्य
१७. अशोक कुमार चौधरी, सदस्य
१८. शिव नेपाली, सदस्य
१९. बिनिता कठायत, सदस्य
२०. विन्दवासिनी कांसकार, सदस्य
डोल प्रसाद अर्याल, कार्यवाहक सभापति
संसदीय दलको पूर्वनेता
जनकपुरधाम । सर्लाहीको लालबन्दी नगरपालिका क्षेत्रमा कर्फ्यु लगाइएको छ ।
जेन जी आन्दोलनकारीहरुले नगरपालिका कार्यालयमा आगजनी गरेपछि जिल्ला प्रशासन कार्यालयले कर्फ्यु लगाएको हो ।
प्रदर्शनकारीहरुले नगरपालिका कार्यालयसहित कार्यालय परिसरमा रहेको स्काभेटर लगायतमा समेत आगो लगाएको स्थानीयले बताएका छन् । त्यस्तै, नवलपुर चोकस्थित पार्कलगायत स्थानमा समेत प्रदर्शनकारीहरुले तोडफोडसहित आगजनी गरेका छन् ।
भिड अनियन्त्रित भएका कारण लालबन्दी नगरपालिका क्षेत्रमा मंगलबार दिउँसो १ बजेदेखि अर्को सूचना नआउञ्जेल प्रमुख जिल्ला अधिकारीले कर्फ्यु आदेश जारी गरेको जिल्ला प्रहरी कार्यालय मलंगवाका निमित्त प्रमुख प्रहरी नायब उपरीक्षक (डीएसपी) सरोज राईले जानकारी दिए । कर्फ्यु आदेश जारी भएपछि लालबन्दी बजार क्षेत्रमा र्याली, जुलुस एवं दुई वा दुई भन्दाबढी समूहमा हिँड्डुलमा प्रतिबन्ध लगाइएको प्रमुख जिल्ला अधिकारी तुलसीबहादुर श्रेष्ठले जानकारी दिए ।
त्यसैगरी जेनजीको प्रदर्शनका क्रममा प्रदर्शनकारीले इलाका प्रहरी कार्यालय चन्द्रनिगाहपुरको गाडीमा आगजनी गरेका छन् ।
इलाका प्रहरी कार्यालय चन्द्रनिगाहपुर घेराउ गरेर जेनजीले प्रदर्शन गर्न थालेपछि प्रहरीले दर्जनौं राउण्ड हवाई फायर र अश्रुग्यास प्रहार गरेको छ । जेनजीको प्रदर्शन हिंसात्मक हुन नदिन प्रहरीले संयमता अपनाएको इलाका प्रहरी कार्यालय चन्द्रनिगाहपुरका प्रमुख प्रहरी नायब उपरीक्षक रुपा लाबुंगले बताए ।
चन्द्रनिगाहपुरको अवस्था तनावग्रस्त भएपछि जिल्ला प्रशासन कार्यालय रौतहटले साढे ११ बजेदेखि लागू हुने गरी अर्को सूचना जारी नभएसम्मका लागि चन्द्रपुर नगरपालिका भित्र कर्फ्यु जारी गरेको छ । उत्तरमा चन्द्रनिगाहपुर चोकदेखि गैडाटार जाने बाटोको पानी ट्याङ्कीसम्म, पूर्वमा चन्द्रनिगाहपुर चोकदेखि चाँदी खोलाको पूल पारीसम्म, दक्षिणमा चन्द्रनिगाहपुर चोकदेखि घोडदेवी मन्दिरसम्म र पश्चिममा चन्द्रनिगाहपुर चोकदेखि महेन्द्र राजमार्गको जिल्ला ट्राफिक प्रहरी कार्यालयको पोष्टसम्म कर्फ्यु लगाइएको रौतहटका प्रमुख जिल्ला अधिकारि बिनोद कुमार खडकाले जानकारी दिए। कर्फ्यु लागेको सिमाना भित्र आवतजावत गर्न, भेला, जुलुस प्रदर्शन, सभा, बैठक तथा घेराउ गर्न नपाउने जिल्ला प्रशासन कार्यालय रौतहटद्वारा जारी कर्फ्यु आदेशमा उल्लेख गरिएको छ ।
कर्फ्यु अवधिभर अत्यावश्यक सेवाका सवारी साधन, एम्बुलेन्स, दमकल, शव बाहन, स्वास्थ्यकर्मीको सवारी साधन, सञ्चारकर्मी, पर्यटक सवारी साधन, मानव अधिकार तथा कूटनीतिक नियोगका सवारी साधन र हवाई टिकटको आधारमा हवाई यात्रुको आवागमनमा सुरक्षाकर्मीबाट सहजीकरण हुने कर्फ्यु आदेशमा उल्लेख छ । कर्फ्यु जारि भए पनि जेनजीको प्रदर्शन रोकिएको छैन ।
यसअघि जेन जीले चन्द्रपुर नगरपालिका भवनमा आगजनी गरेका थिए । आगलागीले नगरपालिकाको एउट गाडी, दुई वटा स्कुटर र एउटा पानी ट्याङ्कर जलेर नष्ट भएको छ । आगो लागेर नगरपालिकाको नयाँ भवनको छेउमै रहेको पुरानो भवनमा क्षति पुगेको छ । आगलागीले नगरपालिकाको महत्त्वपूर्ण कागजात जलेर नष्ट भएको छ ।
काठमाडौँ — जेनजीको आन्दोलन बढ्दै गएपछि स्वास्थ्य तथा जनसंख्यामन्त्री प्रदीप पौडेलले राजीनामा दिएका छन् ।
पौडेलले मंगलबार पदबाट राजीनामा दिएका हुन् । उनी नेपाली कांग्रेसबाट राजीनामा दिने चौथो मन्त्री हुन् ।
यसअघि गृहमन्त्री रमेश लेखक, युवा तथा खेलकुदमन्त्री तेजुलाल चौधरी र कृषि तथा पशुपंक्षीमन्त्री रामनाथ अधिकारीले राजिनामा दिएका थिए ।
