बज्जिकाञ्चल संवाददाता,काठमाडौं,०५ गते माघ २०८१ । 

काठमाडौं । आम जनता पार्टी (आजपा)का अध्यक्ष एवं पूर्वमन्त्री प्रभु साहले प्रधानमन्त्री केपी शर्मा ओलोली नेतृत्वको वर्तमान सरकार पूर्णरुपमा असफल र असक्षम भएको टिप्पणी गरेका छन् । आफ्नो प्रतिबद्धता आफै कार्यान्वयन गर्न नसक्ने ओली नेतृत्वको सरकार बिघटन गर्नुपर्ने सुझाव उनले दिए ।

आजपा निकटको आम विद्यार्थी मोर्चाको आज काठमाडौंमा बसेको केन्द्रीय कमिटीको बैठकलाई सम्बोधन गर्दै आजपा अध्यक्ष साहले यस्तो असफल भईसकेको सरकारले मुलुक र नागरिकलाई आवश्यक नभएको बताए ।

‘यो (ओली नेतृत्वको सरकार) पूर्णरुपमा असफल र असक्षम भएको प्रमाणित भईसक्यो । आफ्नो प्रतिबद्धता आफै कार्यान्वयन गर्न नसक्ने सरकार मुलुक र नागरिकलाई आवशयक छैन्,’ आजपा अध्यक्ष साहले भने, ‘संविधान संशोधन गर्ने भनेकाहरुले अहिले आएर २०८७ मा संशोधन गर्ने भन्दैछन् । सुशासनमा शुन्य छ, बिकास निर्माण ठप्प छ । स्थिरता हुने भनेकाहरुले दिनदिनै सरकार ढल्दैन्, सरकार रहिरहन्छ भन्छ, आफैलाई आफ्नै सरकारमाथि विश्वास छैन् ।’

नेपाली कांग्रेस र नेपाल कम्युनिष्ट पार्टी (एमाले)का बीचमा सात बुँदे सहमती गरेर सरकार गठन भएको थियो । तर कांग्रेस र एमालेले गरेको सहमती नै ओली नेतृत्वको सरकार कार्यान्वयन गर्न असफल भएको साहको टिप्पणी छ । संविधान संशोधन गर्ने भनेर सहमती गर्ने तर प्रधानमन्त्री ओली २०८७ सालमा संविधान संशोधन गर्ने अभिव्यक्ति दिएपछि साहले यस्तो टिप्पणी गरेका हुन् ।

उनले नेपाली विद्यार्थीहरु कमजोर नभएको भन्दै बंगलादेश भन्दा सक्षम र विवेकशील भएको बताउदै असफल भएका सरकारको बिरुद्धमा विद्यार्थीहरु सडकमा आउँन खोजेको बताए । यो असफल र असक्षम सरकारलाई बंगलादेश जस्तै विद्यार्थीहरुले फाल्ने चेतावनी साहले दिए ।

आम विद्यार्थी मोर्चाका अध्यक्ष विवेक साहको अध्यक्षतामा बसेको बैठकमा आजपाका उपमहासचिव एवं प्रवक्ता चन्द्रभुषणा साह, सचिव उमेश कुशवाहा, आम महिला मोर्चाका कोषाध्यक्ष मिना देवी साह लगायतको सहभागिता रहेको विद्यार्थी मोर्चाका सचिव प्रिन्स साहले जनाएका छन् ।

बैठकले विद्यार्थी संख्याको अनुपातमा शिक्षक दरबन्दी कायम गराउन तथा शिक्षा क्षेत्रका सिण्डिकेट, विभेद र ब्रह्मलुट विरुद्ध जारी संघर्षलाई थप व्यवस्थित एवं निर्णायक बनाउने निर्णय भएको विद्यार्थी मोर्चाका अध्यक्ष विवेक साहले जनाएका छन् ।
विद्यार्थी मोर्चाले विद्यार्थीको अनुपातमा विषयगत र तहगत शिक्षकको माग गर्दै आन्दोलन गर्दै आएको छ । यस्तै ४५ प्रतिशत विद्यार्थीलाई यातायातमा छुट दिने व्यवस्था काठमाडौं उपत्यकामा मात्रै सिमित रहेकोमा त्यसलाई देशैभरी कार्यान्वयन गर्नुपर्ने, शिक्षा क्षेत्रमा देखिएको विभेद, सिण्डीकेट, लुटका बिरुद्धमा आम विधार्थी मोर्चाले संघर्ष गर्दै आएको विद्यार्थी मोर्चाका अध्यक्ष साहले जनाएका छन् ।

‘सरकारकै तथ्यांक अनुसार १२.२ लाख विद्यार्थी संख्या रहेको वागमती प्रदेशमा २५ हजार शिक्षकको आवश्यकता रहेको ठाउँमा ३० हजार ६८६ शिक्षक उपलब्ध छ । त्यसैगरी ११.५ लाख विद्यार्थी संख्या रहेको कोशी प्रदेशमा २३ हजार शिक्षकको आवश्यकता रहेको ठाउँमा ३० हजार ३२१ शिक्षक उपलब्ध रहेको छ,’ विद्यार्थी मोर्चाका अध्यक्ष साहले भने, ‘तर सबैभन्दा बढी १५ लाख विद्यार्थी संख्या रहेको मधेस प्रदेशमा जहाँ ३० हजार शिक्षकको आवश्यकता छ त्यहाँ १८ हजार ३०९ शिक्षक मात्रै रहेको छ ।’

उनले प्रश्न गर्दै भने, ‘सरकारी तथ्यांक अनुसार देशमा कुल ७८ लाख विद्यार्थी र १ लाख ६० हजार २८६ शिक्षक संख्या छ । विद्यार्थी संख्यालाई शिक्षक संख्याले भाग गर्दा अहिले पनि देशमा प्रत्येक ४८ विद्यार्थीमा एक शिक्षक रहेको अवस्थामा मधेस प्रदेशमा किन १०० विद्यार्थीमा एक शिक्षक छन् ? यसको जवाफ सरकारले दिनुपर्छ ।’

मधेसमा एउटा कक्षाकोठामा १०० जना बसेर पढेको कमजोर विद्यार्थी र पहाडमा २० जनाको कक्षाकोठामा पढेर होसियार विद्यार्थीलाई एउटै जाँच गरी जागिर दिने लोकसेवा आयोग कतिको जायज छ भन्दै साहले प्रश्न गरे । उनले यस्तै विभेदकारी र अनैतिक प्रावधानका बिरुद्धमा विद्यार्थी मोर्चाले निरन्तर संघर्ष जारी राख्ने निष्कर्षमा पुगेको बताए ।

यसैबीच आजै आजपा निकटको आम ट्रेड यूनियन फेडरेशनको बैठक सम्पन्न भएको छ । फेडरेशनका इन्चार्ज एवं आजपा उपमहासचिव धनकुमार मगरको अध्यक्षता एवं आजपा वरिष्ठ उपाध्यक्ष एवं संविधान सभाका सदस्य तिलक थापामगरको प्रमुख आतिथ्यमा बसेको बैठकले नेपालभित्रको उद्योगधन्दामा नेपाली कामदारलाई पहिलो प्राथमिकता दिलाउन तथा घरेलु कामदार सम्बन्धी ठोस कानुन ल्याउन एवं संगठन विस्तार तथा श्रमिकको पक्षमा संघर्ष अगाडि बढाउने निर्णय गरेको छ ।

आरके श्रीवास्तव,राैतहट,०५ गते माघ २०८१ । 

माघ ५ गते बलिदानी दिवस । मधेसभरी विभिन्न कार्यक्रम गरि मनाउने क्रममा राैतहटमा पनि आज बलिदानी दिवस मनाइएको छ । जिल्लाकाे फतुवा विजयपुर नगरपालिकाकाे वडा नम्बर ११ सहिद चाैक भैंसही बजारमा बलिदानी दिवसकाे अवसरमा श्रद्धाञ्जली अर्पण एवम् दिप प्रज्जवलन गरि मनाइएको हाे ।

बलिदानी  दिवसका अवसरमा जनता समाजवादी पार्टी नेपालकाे वडा कमिटीकाे आयाेजनामा मधेश आन्दोलनका सहिदहरूलाई सम्झना स्वरूप साँझ सहिद चाैक भैंसहीमा दीप प्रज्जवलन कार्यक्रम गरेको छ । सहादत प्राप्त गरेका सहिदहरूकाे सम्मानमा एक मिनट माैन धारण पनि गरिएको थियोे ।

दीप प्रज्जलन कार्यक्रमलाई सम्बाेधन गर्दै जसपा नेपालका मधेस प्रदेश कमिटी सदस्य एवम् यूवा नेता विजय चाैधरीले मधेश आन्दोलनको बलमा मुलुकले संघीयता पाएकोले मधेसमै मात्र मनाउँदै आएको बलिदानी दिवस देशैभरी मनाउनु पर्नेमा जाेड दिएका थिए ।

oplus_0

उनले बलिदानी दिवसकाे अवसरमा सरकारले सार्वजनिक विदा दिनुपर्ने माग समेत गरेका थिए । उनले भने- सहिदहरूकाे देन हाे कि हामीले सरकारकी हरेक संयन्त्रमा मधेसीले सहभागीता पाएका छन् । मधेसी काेटा बाट सरकारी जागिरमा प्रवेशकाे अवसर पाएका छन् । यसलाई हामीले बिर्सनु हुँदैन ।

मधेस आन्दोलनका प्रथम सहिद रमेश महताे लगायतका सहिदहरूकाे समझनामा आजकाे दिन हामीले बलिदान दिवस मनाउँदै आएकाे स्मरण गराएका थिए ।

देशमा बसेकाे हिमाल देखि लिएर पहाड सम्मका नागरिकहरूले बलिदानी दिवसकाे बारेमा थाहा पाउनुपर्ने जरुरी छ । याे मधेसमा मात्रै किन? सरकारले यसमा राष्ट्रिय विदा दिनु पर्छ कि पर्दैन भन्दै प्रश्न समेत गरे ?

सहिदहरूकै बलिदानीले नै आज हामीले अहिले अधिकार पाएका छाैं । र बाँकी अधिकार प्राप्तिका लागि हामीले लडिनै रहेका छाैं ।

जसपाका नेता सिताराम चाैधरीकाे अध्यक्षतामा साे कार्यक्रम सम्पन्न भएको थियोे । जसमा जसपा नेपालका नेता कार्यकर्ताहरू ब्रहमनारायण चाैधरी, प्रभुनारायण चाैधरी, भूपेन्द्र चाैधरी,पूर्व जिल्ला कमिटि सदस्य साेहन लामा, पूर्व संघिय  परिषद् सदस्य मिना रखाल लगायतका नेता कार्यकर्ताहरूकाे सहभागीता रहेको थियोे । साे अवसरमा स्थानीय भद्रभलादमी, सुरक्षाकर्मी,पत्रकार पनि सहभागीता रहेको थियो ।

आरके श्रीवास्तव,रौतहट,०४ गते माघ ।
रौतहट । रौतहट जिल्लाको फतुवा बिजयपुर नगरपालिकाको शितलपुरमा ग्रामीण कृषि सडक निर्माण गरिएको छ । सो नगरपालिकाको वडा नम्बर २ मा किसानहरुलाइ सहज हुने उदेश्यले वडा अध्यक्ष अनिरुद्ध प्रसाद यादव उर्फ संजयले वडा स्तरीय योजना बाट ५ लाखको लागतमा मौलापुर चिरचिरिया चौरी तर्फ ग्रामीण कृषि सडक विस्तार गराउनु भएको हो ।

सहज सिंचाई पुर्याउन तथा धान, गहुँ, मकै लगायत अन्य बालि किसानहरुलाइ ढुवानी गर्न सहजताको लागि वर्षोंदेखि बाटो विहिन रहेको ठाउँमा नयाँ कृषि सडक निकाल्न लगाउनु भएको हो ।

वडा अध्यक्ष यादवले ग्रामीण कृषि सडक निर्माणलाई प्राथमिकता दिएका छन् । उनले आफनो कार्यकालमा करिब ९ वटा ग्रामीण कृषि सडकको निर्माण गराइ सक्नुभएको छ । उक्त सडकलाइ मौलापुरको पिकनिक पार्क सम्म जोडने सडक रहेको वडा अध्यक्ष यादवले जानकारी गराएका हुन् ।

ग्रामीण कृषि सडक खेतखेतमा पुगेपछि कृषकले उत्पादन गरेको कृषिजन्य बस्तु ढुवानी गर्न सहज हुने भएको छ । वडाको कमै बजेट बाट किसानलाइ लाभान्वित गर्ने काम गर्नुभएको हो । सफल पक्ष भनेकै कृषकलाई प्रत्यक्ष फाइदा पुगेको स्थानीय बताउँछन् ।
स्थानिय कमाहीर गिरीले कृषि सडक निर्माण भएपछि किसानको कल्याण भएको बताए । उनले भने–‘यो सडक नहुँदा किसानहरुले उत्पादन गरेको बाली ढुवानी गर्न निकै गाह«ो हुने गरेको थियो । ’ अब सहज हुने भएको छ ।

अर्का स्थानिय राहुल निधीले भने–यसबाट धेरै किसान लाभान्वित भएका छन् । सडक अभावमा धेरैले खेती गर्न छोडिदिन्थ्यो । अधिकांश खेतहरु बाँझै रहन्थयो । अब उपरान्त यो समस्या हटेको छ ।

आरके श्रीवास्तव,रौतहट,०३ गते माघ २०८१ ।
रौतहट । जिल्ला प्रहरी कार्यालय रौतहटले आज आफनो प्रगती विवरण सार्वजनिक गरेको छ । प्रहरीले आर्थिक वर्ष २०८०/०८१ को र २०८१/०८२ को ६ महिनाको तुलनात्मक प्रगति विवरण सार्वजनिक गरेको हो । रौतहट प्रहरी प्रमुखको रुपमा प्रहरी उपरिक्षक दिलिप घिमिरे आएदेखि उल्लेखनिय प्रगती गरेको छ ।
बिहिवार गत साउन देखि पुस सम्मको सार्वजनिक गरिएको प्रगती विवरणमा कर्तव्य ज्यानका आ.व. २०८०।८१ मा ९ वटा मुद्धा दर्ता भएकोमा ५ वटा फर्छौट भएको थियो । जबकी आ.व.२०८१।०८२ मा ४ वटा मुुद्धा दर्ता भएकोमा २ वटा फर्छौट गरेको जानकारी दिइएको हो । गत आ.व. भन्दा चालुु आ.व.मा यो संख्या घटेको छ ।
जबरजस्ती करणीको आ.व. २०८०।८१ मा २१ वटा मुद्धा दर्ता भएकोमा १६ वटा फर्छौट भएको थियो । जबकी आ.व.२०८१।०८२ मा १३ वटा मुुद्धा दर्ता भएकोमा ६ वटा फर्छौट भएको छ ।
यस्तै लागूऔषधको आ.व. २०८०।८१ मा ११ वटा मुद्धा दर्ता भएकोमा १० वटा फर्छौट भएको थियो । भने आ.व.२०८१।०८२ मा १५ वटा मुुद्धा दर्ता भएकोमा १४ वटा फर्छौट भएको छ ।
यस्तै हात हतियार खरखजाना सम्बन्धि ६ वटा मुद्धा दर्ता भएकोमा ५ वटा फर्छौट भएको छ । त्यस्तै चोरी सम्बन्धि मुद्धामा आ.व. २०८०।८१ मा ३५ वटा मुद्धा दर्ता भएकोमा सबै फर्छौट भएको थियो । भने आ.व.२०८१।०८२ मा ३८ वटा मुुद्धा दर्ता भएकोमा ३८ वटै फर्छौट भएको छ ।
आर्थिक वर्ष २०८१÷०८२ को पुस सम्म मुद्रा सम्बन्धि ४ वटा मुद्धा दर्ता भएकोमा सबै फर्छौट भएको छ । प्रहरीले भन्सार चोरी निकासी तर्फ साइकिल १४,मोटरसाइकिल १ सय ८,पिकअप २,स्कार्पियो २,सिटि रिक्सा ४ लाइ कार्यवाही गरि २ करोड ४२ लाख ७७ हजार ४ सय ४३ रुपैयाँ राजस्व संकलन गरेको छ । जबकी ६६ जना मानिसलाइ पक्राउ समेत गरेको छ ।
त्यस्तै ट्राफिक राजस्व संकलन गत आ.व.२०८०।८१ मा ९३ लाख ९६ हजार गरेकोमा चालु आ.व.को पुस सम्म ६८ लाख २४ हजार ५ सय मात्र राजस्व संकलन गर्न सकेको छ । गत आ.व. भन्दा यसपाली राजस्व घटेको हो ।
त्यसैगरी श्रोत नखुलेको रकम १५ लाख सहित ३ जना मानिसलाइ नियन्त्रमा लिएको हो । प्रहरीले २१ वटा मोटरसाइकिल र २ वटा चोरीको स्कार्पियो सहित २४ जना मानिसलाइ पक्राउ गर्न सफल भएको छ ।
अदालतको फैसला कार्यान्वयन गर्ने क्रममा २ सय ६४ जना फरार प्रतिवादीहरुलाइ पक्राउ गरेको छ ।
यस्तै रौतहट प्रहरीले प्राकृतिक स्रोत सम्बन्धि १ सय १७ दशमलव ८७ क्यूफिट काठ बरामद गरेको छ भने मात्र ३ टेलर बालुवा नियन्त्रणमा लिन सकेको हो । यो अवधीमा २३ वटा सवारीसाधनलाइ पक्राउ समेत गरिएको हो । यस तर्फ राजस्व संकलन ८२ लाख ८ हजार ७ सय गरेको जिल्ला प्रहरी कार्यालय रौतहट गौरले सार्वजनिक गरेको विवरणमा उल्लेख छ ।

बज्जिकाञ्चल संवाददाता,०२ गते माघ २०८१ । 

काठमाडौं । नेपाल आयल निगमले पेट्रोलियम पदार्थको मूल्य बढाएको छ । बुधबार मध्यरातिदेखि लागु हुने गरी मूल्य बढाइएको हो ।

निगमका अनुसार पेट्रोलको मूल्य प्रतिलिटर दुई रुपैयाँ बढाइएको  छ । त्यस्तै, डिजेल र मट्टीतेलको मूल्य लिटरमा तीन रुपैयाँ बढाइएको  हो । -बाह्रखरी

नूर आलम बादशाह,बारा,माघ २ गते २०८१ । 
बारा । बाराको पचरौता नगरपालिका–३ रामनगर टोल स्थित रहेको श्री नेपाल राष्ट्रिय प्राथमिक विद्यालयमा थप चार कोठे भवन निर्माण हुने भएको छ ।

नगर प्रमुख जलन्धर सिंहको बिशेष पहल तथा पालिका स्तरीय बजेटबाट भवन निर्माण हुने भएको हो । बुधबार उक्त भवनको पचरौता नगरपालिका वडा नम्बर ३ का वडा अध्यक्ष धेनुक राउत कुर्मीले शिलान्यास गरेका हुन् ।

दुईतल्ले भवनमा २/२ कक्षाकोठा निर्माण गर्न लागिएको वडा अध्यक्ष धेनुक राउत कुर्मीले बताए ।

शिलान्यास कार्यक्रममा नगर प्रमुख जलन्धर सिंह, समाजसेवी भैयाराम सहनी, अवध किशोर प्रसाद यादव, बिनोद पटेल, विद्यालयका प्रधानाध्यापक, शिक्षक, अभिभावक तथा स्थानीयहरूको उपस्थिती रहेकाे थियो ।

बज्जिकाञ्चल संवाददाता,राैतहट,०२ गते माघ २०८१

रौतहट । आम जनता पार्टी (आजपा)का महासचिव त्रिभुवन साहले रौतहटका न्यायाधीशहरु झोले नेताको कार्यकर्ता जस्तो काम गरिरहेको आराप लगाएका छन् । प्रधानन्यायाधीश प्रकाशमान सिंह राउतसंग प्रश्न गर्दै उनले रौतहटका न्यायाधीशलाई छानबिन गर्नुपर्ने माग गरेका छन् ।

रौतहटको बौद्धिमाई नगरपालिका कार्यालय घेराउन गर्दै स्थानीयले बिरोध सभा आज गरेका थिए । सोही सभालाई सम्बोधन गर्दै आजपा महासचिव साहले रौतहटका न्यायाधीशलाई बौद्धिमाई नगरपालिकाका मेयरले सञ्चालन गरेको टिप्पणी गरेपछि उनले यस्तो प्रश्न उठाएका हुन् ।

आजपा महासचिव साहले प्रधानन्यायाधीसंग प्रश्न गर्दै भने, ‘मेयरले न्यायाधीश मेरो मुठीमा रहेका भन्दै हिडिरहेको अवस्थामा के न्यायाधीश मेयरको मुठीमा छन् की कानून अनुसार न्याय सम्पादन हुने हो त्यसको बारेमा प्रधानन्यायाधीशले स्पष्ट पार्दिनुपर्यो ।’

गाउँगाउँमा मेयरले न्यायाधीश, प्रहरी, प्रशासन मेरो मुठीमा भएको भन्दै सोझासाझ स्थानीयलाई धमक्याउदै हिडिरहेको बताउदै उनले यस्तालाई कानूनको दायरामा ल्याउँन आवश्यक भएको बताए ।

रौतहटको बौद्धिमाई नगरपालिकाका मेयर प्रदिप यादवका बिरुद्धमा स्थानीयले नाराजुलुश गरेका छन् । बौद्धिमाई नगरपालिकाको बंकुल बजार स्थित कार्यालय अगाडी स्थानीयले मेयरको बिरुद्धमा कडा नारा लगाउँदै घेराउ समेत गरेका छन् ।

भ्रष्टाचारी मेयर मुर्दाबाद, भ्रष्टाचारीलाई कारवाही गर, दोषीलाई कारवाही गर लगायतका नारा लगाउँदै उनीहरुले मेयरको कार्यशैलीको बिरोध गरेका छन् । मापदण्ड नबनाई मनोमानी रुपमा मेयर यादवले बिपक्षीको घर भत्काउने र सडक बिस्तारको नाममा दुख दिएपछि स्थानीय आक्रोशित भएका छन् ।

मेयर यादवले सरमुजवा गाउँमा मनोमानी रुपमा उपद्रो मचाएको आरोप आन्दोलनकारी स्थानीयले जनाएका छन् । स्थानीय अगुवा एवं पूर्व वडा अध्यक्ष श्रीभगवान पटेलले मापदण्ड बनाएर सडक बिस्तार गर्नुको साटो मेयरले मनोमानी रुपमा बिपक्षीको घर भत्काउने र दुख दिने गरेको आरोप लगाए ।

‘मेयर आफैले लठी लिएर स्थानीयलाई कुटपिट गरेको, घरमा तोडफोड गरेकाले मेयरलाई कारवाही हुनुपर्छ,’ पटेलले भने, ‘मेयरले प्रहरी, प्रशासन, न्यायाधीश मेरो मुठीमा रहेकोले तिमीहरुले केही पनि गर्न नसक्ने र मलाई जे मन लाग्छ त्यो गर्छु तिमीहरुको आन्दोलनले केही पनि नहुने बताउँछन् ।’

मेयर यादवको मनोमानी कार्यको बिरोध गरेकै कारण स्थानीय गंगाराम बैठकलाई रौतहट अदालतले पूर्वपक्षका लागि थुनामा पठाउँने निर्णय गरेपछि मेयरले मेरो मुठीमा न्यायाधीश, प्रहरी, प्रशासन रहेको भन्दै मान्छेलाई धमक्याउने गरेको स्थानीय पटेलले बताए ।

यस्तै स्थानीय आन्दोलनकारीले मेयर यादवले बिभिन्न आयोजनामा गरेको भ्रष्टाचारको छानबिन हुनुपर्ने, दोषीलाई कारवाही हुनुपर्ने लगायतका माग समेत गरेका छन् । नगरपालिका अगाडी भएको बिरोध सभालाई सम्बोधन गर्दै

राजेश निर्माणी,वृन्दावन,०१ गते माघ २०८१ । 

रौतहट : रौतहट जिल्लाको वृन्दावन नगरपालिका वडा नम्बर -६ स्थित रहेको श्री बतहु माध्यमिक विधालय हर्षाहामा निर्माण हुन थालेको नव निर्मित भवनको शिलान्यास गरिएको छ।

मंगलबार माघे संक्रान्तिको शुभ अवसर पारि,वैदिक विधिपूर्वक पूजाआजा गरी संविधान सभा सदस्य एवम् नेकपा एसका उप महासचिव रामकुमार भट्टराई र वृन्दावन नगरपालिकाका नगर प्रमुख विनोद प्रसाद कुर्मीले संयुक्त रुपले सो भवनको शिलान्यास गरेका हुन्। एक भव्य समारोहका बिच पंडित द्धारा पूजाआजा गरी निर्माण हुन थालेको सो भवनको शिलान्यास गरिएको हो।

भवनको शिलान्यास क्रममा सो पालिकाका प्रमुख प्रसाशकिय अधिकृत खिमबहादुर भुजेलले शिक्षाको क्षेत्रमा भौतिक पुर्बाधारहरु निर्माणमा नगरपालिका लागि परेको बताउदै,बिधार्थी समक्ष गुणस्तरीय शिक्षा पुर्याउन शिक्षक, अभिभावक र विद्यार्थी सबै लाग्नु पर्ने बताए।

संघिय समपुरक कोषबाट आर्थिक वर्ष २०७९/०८० मा पेस गरेर, २०८०/०८१ मा सुकृत भई हाल २०८१/०८२ मा बल्ल निर्माण कार्य भइरहेको बताउदै,मेघा प्रोजेक्टको रुपमा बतहु मा.वि. वृन्दावनको बुढा निलकण्ठको जस्तै अबको केही दिनमै शिक्षाको हब र नमुना विधालय बन्ने उनले बताउनु भयो।

पुर्व प्रधानमन्त्री तथा नेकपा एसका अध्यक्ष माधबकुमार नेपाल, संविधान सभा सदस्य एवम् नेकपा एसका उप महासचिव रामकुमार भट्टराई, नेकपा एसकि स्थायी कमिटी सदस्य नेतृ कल्याणी खड्का को सहयोग तथा वृन्दावन नगरपालिकाका नगरप्रमुख बिनोद प्रसाद कुर्मीको अथक प्रयासमा मेगा प्रोजेक्ट को रूपमा साढे ३ तलाको ,३३ वटा कोठा र शौचालय सहित निर्माण हुन लागेको सो भवन ५ करोड ३० लाख ५१ हजार ४ सय १६ रुपैयाँमा निर्माण हुन थालेको नगरपालिकाका प्रमुख प्रशासकीय अधिकृत भुजेलले जानकारी दिए। भवन निर्माणको जिम्मा जनआदर्श एस बि स्टार जेभी काभ्रेले पाएको छ ।

उक्त शिलान्यास कार्यक्रममा वृन्दावन नगरपालिका वडा नम्वर- ६ का वडा अध्यक्ष मजहर मन्सुर,७ कावडा अध्यक्ष जगरनाथ प्रसाद भेडिहर,८ का वडा अध्यक्ष रविन्द्र प्रसाद साह,९ का वडा अध्यक्ष प्रवेज आलम,वडा नम्बर-३ का वया अध्यक्ष हरिनारायण साह,कार्यपालिका सदस्य राजेश पासवान,रलगायत विभिन्न स्थानीय जनप्रतिनिधिहरु,विधालयका कर्मचारीहरु र स्थानीय नेता तथा कार्यकर्ताहरुको बाक्लो उपस्थिति रहेको थियोे ।

काठमाडौं,०१ गते माघ २०८१ । 

सम्माननीय उपराष्ट्रपति श्री रामसहाय प्रसाद यादवज्यूले सामुदायिक विद्यालयहरुको उद्देश्य विद्यार्थीहरुलाई शैक्षणिक गुणवत्ताको स्तर अभिवृद्धिसंगै नैतिक, सांस्कृतिक, व्यवहारिक, राष्ट्रभक्ति र सामाजिक मूल्य प्रदान गर्न अब्बल बन्नु पर्ने बताउनु भएको छ ।
उपराष्ट्रपति यादवले काठमाडौंको चन्द्रागिरि नगरपालिका–१२ स्थित श्री बलम्बु माध्यमिक विद्यालयको प्राविधिक शिक्षालय भवनको समुद्घाटन समारोहमा विद्यालयले विद्यार्थीहरुको सर्वाङ्गिन विकासमा जोड दिँदै समाज र देशको माटो, हावापानी र भूगोल आदि सुहाउँदो शिक्षामा थप केन्द्रित हुन उत्तिकै जरुरी रहेको बताउनु भएको हो ।
उहाँले पछिल्लो समय सामुदायिक विद्यालयहरुप्रति बढ्दो नकारात्मक भावनालाई चिर्न बलम्बु मावि एउटा उदाहरण हुन सक्ने उल्लेख गर्दै विद्यालयले आफ्नो स्थापनाकालदेखि राम्रो पठनपाठन गर्दै आएकोमा अब प्राविधिक धारतर्फ पनि एक कदम अगाडि बढ्नु सकारात्मक रहेको बताउनु भयो । ‘ यो कदम समय र आजको प्रविधि–सीपयुक्त सिकाइको माग अनुरुप छ ’ उपराष्ट्रपति यादवले भन्नुभयो, ‘यस सन्दर्भमा, विद्यालयले संचालन गर्न लागेको प्रविधि धारतर्फको कार्यक्रम बढी उपयोगी हुने विश्वास व्यक्त गर्दछु ।’
उहाँले सामुदायिक विद्यालयहरुले समाजमा महत्वपूर्ण भूमिका निर्वाह गर्दै आएको उल्लेख गर्दै यी विद्यालयहरुले शिक्षा मात्रै प्रदान गरिरहेको छैन, समाजका विभिन्न वर्गका बालबालिकाहरुलाई समान अवसर र स्रोतहरु पनि उपलब्ध गराउँदै आएकोमा प्रशंसा पनि गर्नुभयो । ‘‘उत्कृष्टता’ आफैमा महत्वपूर्ण उपलब्धि हो, यो एउटा असल ‘टीम वर्क’ बिना असम्भव छ’ उहाँले भन्नुभयो, ‘यस विद्यालयले निरन्तर रुपमा प्रदर्शन गर्दै आएको ‘उत्कृष्टता’, विद्यार्थी, अभिभावक र शिक्षकहरुको अथक प्रयास, लगन र परिश्रमबाटै सम्भव भएको हो, यसमा निरन्तरता आवश्यक र अपरिहार्य छ ।’
उपराष्ट्रपति यादवले यसका लागि शिक्षण सिकाई क्रियाकलापहरु परीक्षा केन्द्रित मात्रै नभई जीवनको कठिन घडीमा विद्यार्थीहरुले समस्याहरुबाट त्राण पाउन सक्ने खालका व्यवहारिक र अनुकूलित हुनु पर्नेमा जोड दिनु भयो । ‘विद्यालयले प्रयोगशाला, पुस्तकालय, खेलकूद, कम्प्यूटर ल्याब जस्ता सुविधाहरुलाई परिस्कृत र परिमार्जित गर्दै विद्यार्थीहरुको समग्र विकासमा सहायक बन्ने गरी अघि बढ्न सक्नु पर्दछ’ उहाँले भन्नुभयो, ‘समावेशी शिक्षालाई बढावा दिने सामुदायिक विद्यालयहरुमा समाजका प्रत्येक वर्गका बालबालिकाहरुले समान अवसर पाउँने वातावरण सक्रियताका साथ निर्माण गर्न आवश्यक छ ।’
उहाँले सामुदायिक विद्यालयहरु आर्थिक रुपमा कमजोर र पछाडि परेका समुदायका बालबालिकाहरुलाई उच्च गुणवत्ता सहितको शिक्षा प्रदान गर्नका लागि कटिबद्ध र प्रतिबद्ध भई विद्यालयलाई व्यवहारिक सिकाइ–एकाईका रुपमा अघि बढाउन जरुरी रहेको बताउनु भयो । ‘सामुदायिक विद्यालयहरु शैक्षणिक ज्ञानसंगै सांस्कृतिक शिक्षामा पनि जोड दिन आवश्यक छ ’ उहाँले भन्नुभयो, ‘यसले नेपालको मौलिक सांस्कृतिक र रैथाने परम्परा/रीतिरिवाजहरुको जगेर्ना गर्दै पुस्तान्तरण गर्नमा सहयोग पुुग्दछ । ’
उपराष्ट्रपति यादवले विद्यार्थीहरुलाई विद्यालयको शान, अभिभावकहरुलाई विद्यालयको सफलताको महत्वपूर्ण स्तम्भ र शिक्षकहरुलाई उत्प्रेरक भएको बताउनु भयो । ‘विद्यालयमा स्थापना भएको बहुप्राविधिक शिक्षालयमा ब्युटिसियन, इलेक्ट्रिसियन, मोबाइल मर्मत र मोटर बाइक (अटो मोबाइल) मर्मत कोर्ष र सोसंग सम्बन्धित सीप विकास गरी विद्यालयमै साधारण धारतर्फ कक्षा ९ देखि १२ का विद्यार्थीहरुलाई अतिरिक्त समय व्यवस्थापन गरी सम्बन्धित बिषयको प्राविधिक धारमा डिप्लोमा तहसम्म प्रशिक्षण दिई दक्ष बनाउन सकोस् ’ उहाँले भन्नुभयो, ‘ यस शिक्षालयमा आगामी समयमा सिकेको सीपको प्रयोग गरी आयआर्जनसँगै जीविकोपार्जन गर्न विद्यार्थीहरुलाई सहयोग र मुलुकलाई आवश्यक पर्ने दक्ष जनशक्ति उत्पादनमा टेवा पुग्ने विश्वास लिएको छु ।’
उपराष्ट्रपति यादवले समाज र देशको गर्वका रुपमा रहेको सामुदायिक विद्यालयलाई ज्ञान, सीप, नैतिकता, देशप्रेम र संस्कारले सुसज्जित गर्न एवम् थप उचाईमा पुर्याउन निरन्तर प्रयासरत रहन आग्रहसंगै विद्यालयको उत्तरोत्तर प्रगतिको कामना गर्नुभयो । उहाँले समारोहमा विद्यालयमा योगदान पुर्याउने संस्था र व्यक्तित्वहरुलाई प्रशंसापत्र समेत हस्तान्तरण गर्नुभएको थियो ।