काठमाडौं । आज नेपाली बजारमा सुनचाँदीको मूल्य बढेको छ । शुक्रबार सुन प्रतितोला १९ सयले बढेर १ लाख ४४ हजार ७ सय रुपैयाँमा कारोबार भएको छ ।
यस अघि विहिबार छापावाल सुन प्रतितोला एक लाख ४२ हजार ८ सयमा कारोबार भएको थियो ।
त्यस्तै, आज तेजावी सुन प्रतितोला १ लाख ४४ हजारमा खरिदबिक्री भइरहेको नेपाल सुनचाँदी व्यवसायी महासंघले जनाएको छ ।
त्यस्तै आज चाँदीको मूल्य तोलाको २५ रुपैयाँले बढेर प्रतितोला १८६५ रुपैयाँमा कारोबार भइरहेको महासंघले जनाएको छ ।न्युज कारखाना
काठमाडौँ । राष्ट्रिय स्वतन्त्र पार्टी (रास्वपा) ले आज आफ्नो दोस्रो स्थापना दिवस मनाउँदै छ । स्थापना दिवसको अवसरमा रास्वपाले बालाजुस्थित पार्टी कार्यालयमा चियापान कार्यक्रम गर्दैछ ।
पार्टी केन्द्रीय कार्यालय वनस्थलीमा दिउँसो १ देखि साँझ ५ बजेसम्म चियापान कार्यक्रम आयोजना गरिएको रास्वपाका महामन्त्री एवं प्रवक्ता मुकुल ढकालले जानकारी दिएका छन् ।
चियापान कार्यक्रममा सबै राजनीतिक दलका शिर्ष नेताहरुलाई निमन्त्रणा गरिएको छ ।
कार्यक्रममा रास्वपाले प्रधानमन्त्री पुष्पकमल दाहाल ‘प्रचण्ड’, एमाले अध्यक्ष केपी शर्मा ओली, कांग्रेस सभापति शेरबहादुर देउवासहित पूर्वप्रधानमन्त्री, कुटनीतिक नियोगका प्रतिनिधि लगायतलाई विशिष्ट व्यक्तिहरुलाई आमन्त्रण गरेको जनाएको छ ।न्युज कारखाना
काठमाडौँ । प्रधानमन्त्री पुष्पकमल दाहाल ‘प्रचण्ड’ले प्राकृतिक हिसाबले नेपाल संसारभरका मानिसका लागि योगाभ्यासको सुन्दर भूमि भएको बताएका छन् ।
विश्व योग दिवस २०२४ को अवसरमा आज यहाँ आयोजित कार्यक्रमलाई सम्बोधन गर्दै प्रधानमन्त्री प्रचण्डले योगसम्बन्धी ज्ञानविज्ञानको अध्ययन गरिरहेका विश्वभरकै अध्येताहरूका लागि नेपाल मूल गन्तव्य बन्न सक्ने विश्वास व्यक्त गरे ।
योग शारीरिक अभ्यास मात्र नभई निश्चित नियम, विधि र प्रक्रियामा रही अपनाउने वैज्ञानिक जीवनशैली एवं जीवनपद्धति भएको उल्लेख गर्दै प्रधानमन्त्री प्रचण्डले स्वस्थकर जीवनयापनका लागि व्यक्तिलाई शारीरिक, मानसिक र आध्यात्मिक रूपमा सबल बनाउन योगले सहयोग पुर्याने बताए ।
“शरीरलाई स्वस्थ र फूर्तिलो बनाउने तथा मनलाई स्वच्छ र शान्त बनाउने सर्वोत्तम उपाय योग हो,” प्रधानमन्त्री प्रचण्डले भने, “नियमित योगाभ्यासबाट व्यक्तिको स्वास्थ्य अवस्था सुदृढ हुनुका साथै व्यक्ति तनावमुक्त भइ कार्य क्षमतामा वृद्धि हुने, रोग प्रतिरोधात्मक क्षमतामा बृद्धि हुने, व्यक्तिमा सकारात्मक सोचको विकास हुने, व्यक्तिमा अनुशासन र आन्तरिक ऊर्जा प्राप्त हुनेजस्ता गुणको विकास हुन्छ ।”
तनावमुक्त शान्त मन र रोगमुक्त स्वस्थ शरीर विकासमा योगको महत्त्वपूर्ण भूमिका रहने बताउँदै प्रधानमन्त्रीले योग र ध्यानका अभ्यासहरूबाट व्यक्तिमा नसर्ने रोगहरूको रोकथाम, उपचार र पुनःस्थापनाका लागि महत्त्वपूर्ण योगदान पुग्ने बताए ।
“नेपाल योग पर्यटनका निम्ति अत्यन्त सम्भावनायुक्त देश हो,” प्रधानमन्त्री प्रचण्डले भने, “तसर्थ, हामीले योगको विश्वव्यापीकरणमा जोड दिनुपर्दछ । यस दिशामा योजनाबद्ध पहल लिन योगका अभियन्ताहरू र योग गुरूहरूमा म हार्दिक अपील गर्दछु ।”
योग नेपालको आम जीवनपद्धति एवं अमूल्य निधि भएको बताउँदै प्रधानमन्त्री प्रचण्डले नेपालले परिकल्पना गरेको योगमाया आयुर्वेद विश्वविद्यालयले भविष्यमा विश्वस्तरीय विश्वविद्यालयको रूपमा स्थापति हुने विश्वास व्यक्त गरे ।न्युज कारखाना
काठमाडौँ । अमेरिकी तल्लो सदन हाउस अफ रेप्रिजेनटेटिभको प्रतिनिधिमण्डलले बुधबार हिमाचल प्रदेशको धर्मशालामा तिब्बती धर्मगुरु दलाई लामासँग भेट गरेको छ । सो क्रममा प्रतिनिधिमण्डलले तिब्बतको स्वायत्तताको मुद्दा उठाउदै तिब्बतीप्रति अमेरिकाको समर्थन अटल रहेको बताएपछि यो विषय अन्तराष्ट्रिय रुपमा नै चर्चामा रहेको छ ।
विदेशी प्रतिनिधिमण्डलले भारतीय भूमिबाट तिब्बतको मुद्दा उठाएपची चीनले कडा प्रतिक्रिया दिएको छ । यसका बाबजुद भारतले तिब्बतलाई चीनको हिस्सा मान्छ र दलाई लामा र चीनबीच चलिरहेको तनावबारे टिप्पणी गर्नबाट बचिरहेको छ । यस विषयमा सामाजिक सञ्जालदेखि विदेश मामिलाका विज्ञहरूले प्रश्न उठाइरहेका छन् । उनीहरुले यसबाट भारतलाई के फाइदा हुन्छ ? भन्दै प्रश्न गरेका छन् भने उनीहरुले अमेरिकी प्रतिनिधिमण्डलले भारतीय भूमिबाट तिब्बतको मुद्दा उठाउनुको कारण के हो ? भन्दै प्रश्न उठाएका छन् । साथै उनीहरुले के यसमा भारतको मौन सहमति छ ? तिब्बतको सहयोगमा चीनलाई दबाब दिने रणनीति तयार भइरहेको हो ? भन्दै प्रश्न गरेका छन् ।
भारतले किन दियो अनुमति ?
अमेरिकी प्रतिनिधिमण्डलको यो भ्रमण आधिकारिक हो कि होइन ? हाल यसबारेमा आधिकारिक धारणा आएको छैन । द हिन्दु पत्रिकाले स्रोतलाई उद्धृत गर्दै अमेरिकी प्रतिनिधिमण्डल व्यक्तिगत भ्रमणमा भारत आएको जनाएको छ । भारतका विदेश मामिला विशेषज्ञ गोकुल साहनीले सामाजिक सञ्जालको प्लेटफर्म एकसमा अमेरिकाको भूमिकामा प्रश्न उठाए । उनले लेखेका छन्- ‘तिब्बतको मुद्दामा अमेरिकी कंग्रेसले २०२४ मा के हासिल गर्न खोजेको देखेर म छक्क परेको छु । यस विषयमा केही अन्तर्राष्ट्रिय हलचल भए पनि अमेरिकाले दशकौंसम्म यस विषयमा मौनता कायम राखेको छ । तिब्बत अमेरिकाले अब के गर्छ ? अमेरिकामा लोकतन्त्र ल्याएर हासिल गर्न चाहनुहुन्छ ?’
द हिन्दू अखबारका कूटनीतिक मामिला सम्पादक सुहासिनी हैदरले उक्त पोस्ट पुन: पोस्ट गर्दै लेखेकी छन्, ‘भारतीय भूमिमा सार्वजनिक भाषणमा अमेरिकी कांग्रेसका सदस्यहरूलाई तिब्बतको बारेमा राजनीतिक बयान दिन अनुमति दिएर भारत के हासिल गर्न चाहन्छ ? यदि यो भारतको नीति हो भने ? मञ्चमा भारतीय अधिकारी वा नेता किन छैनन् ?’
बीजेपी नेता सुब्रमण्यम स्वामीले पनि यो पोस्टमा टिप्पणी गरे । उनले लेखेका छन्, ‘हामीले चीनलाई भन्नु पर्छ कि लद्दाखमा हाम्रो भूमि २०२० अप्रिलदेखि कब्जा गरेको छ । त्यसैले हामी तिब्बत र ताइवानलाई स्वतन्त्र राष्ट्र घोषणा गर्न सक्छौं । ती देशहरू संयुक्त राष्ट्र संघको महासभाको सदस्यताको हकदार छन् ।’
केहीबेरमै सुहासिनीलाई जवाफ दिन भारतका पूर्व विदेश सचिव कंवल सिब्बल अगाडि आए । उनले एक्समा लेखेका छन्, ‘के पेलोसी र कंग्रेस प्रतिनिधिमण्डललाई भिसा दिन नपाउने भनिएको छ ? वा कसैले सार्वजनिक भनाइ नदिने शर्त राख्नुपर्ने हो ?
के यो राजनीतिक रूपमा सम्भव हुन्थ्यो ?’ सिब्बलले भने, ‘मोदी सरकारलाई देश भित्र र बाहिर अभिव्यक्ति स्वतन्त्रताको दबाबका लागि आक्रमण भइरहेको छ, त्यसैले यो निर्णयले तिब्बतमाथि अन्याय गरिरहेको चीनलाई सहयोग गरेको देखिन्छ । यसले हामीलाई क्षेत्रीय स्तरमा गम्भीर असर पारेको छ ।’ सिब्बलले भने, ‘ती देशहरूले युक्रेन युद्धमा पश्चिमको साथ नदेखेकोमा भारतीय भूमिमा भारतको आलोचना गर्छन् । यति हुँदाहुँदै पनि हाम्रो मिडियाले उनीहरूलाई भारतको अवस्थामाथि प्रश्न उठाउन निम्तो दिन्छ ।’
यसैको जवाफ दिँदै सुहासिनीले फेरि पोस्ट गरिन् । उनले लेखेका छन्, ‘यहाँ मुद्दा चीन वा अरू कसैको प्रतिक्रियाको होइन । यो भारतको सार्वभौमसत्ता र भारतीय भूमिबाट परराष्ट्र नीतिका मुद्दाहरूमा नियन्त्रणको कुरा हो ।’ सुहासिनीको पोष्टको जवाफ दिँदै सिब्बलले लेखेका छन्, रुससँगको भारतको सम्बन्धबारे पश्चिमा देशहरू राम्ररी जानकार छन्, तर पनि उनीहरूले हाम्रो माटोबाट रुसमाथि आक्रमण गर्छन् । यो थाहा हुँदाहुँदै पनि हाम्रो मिडियाले उनीहरूलाई ठाउँ दिन्छ ।’ उनले लेखेका छन्, ‘राइसिना संवादमा रुसमाथि हमला भयो । के हामीले हाम्रो माटोमा परराष्ट्र नीतिका मुद्दाहरूमा त्यो कथालाई नियन्त्रण गर्न सक्छौँ ?’ त्यसको जवाफ दिँदै सुहासिनीले तिब्बत मुद्दालाई रुस–युक्रेन द्वन्द्व र चीनसँग तुलना गर्न नहुने लेखेकी छन् ।
अमेरिकी प्रतिनिधिमण्डलले के भने ?
सात जनाको प्रतिनिधिमण्डलमा अमेरिकी कांग्रेसकी पूर्व सभामुख न्यान्सी पेलोसी पनि सामेल छन् । बुधबार उक्त प्रतिनिधिमण्डलले अमेरिकाले दलाई लामाको ‘उत्तराधिकार’ मा चीनलाई हस्तक्षेप गर्न नदिने बताएको थियो । दलाई लामाको जन्मदिन नजिकिँदै गर्दा अमेरिकी प्रतिनिधिमण्डलले लामासँग भेट गरेको हो । उनले जुलाई ६ मा आफ्नो ८९औं जन्मदिन मनाउने छन् । उनको उमेरलाई ध्यानमा राख्दै, दलाई लामाको संस्था र उनको उत्तराधिकारको बारेमा पनि अनुमान गरिएको छ । अमेरिकी संसदको विदेश मामिला समितिका अध्यक्ष रिपब्लिकन नेता माइकल म्याककलको नेतृत्वमा रहेको प्रतिनिधिमण्डलले तिब्बतलाई अमेरिकाको समर्थन अटल रहेको बताएको छ । उनले तिब्बतसँगको पुरानो सम्बन्धको चीनको दाबीलाई ‘हास्यास्पद’ भनेका छन् ।
द हिन्दूका अनुसार अमेरिकी प्रतिनिधिमण्डलमा रहेका ग्रेगरी मीक्सले भने, ‘तिब्बती जनतालाई हाम्रो समर्थन अटल छ । सुन्दर दिनको सपना बाँच्नेछ । चीनले विकासको नाममा समुदायहरूलाई आफ्नो ठाउँबाट विस्थापित गरिरहेको छ ।’ उनले भने, ‘हामीलाई थाहा छ कि उनीहरू तिब्बती बौद्ध धर्मलाई नियन्त्रण गर्न खोजिरहेका छन् । कार्यक्रमको प्रारम्भमा बोल्दै म्याककलले दलाई लामाको निर्वासनमा बिताएका दिनहरुको स्मरण गरे ।
सन् १९५९ मा दलाई लामा आफ्ना ८० हजार अनुयायीसहित हिमालय पार गरी तिब्बतको संस्कृति र जीवनशैली बचाउन भारत आएका थिए । म्याककलले भने, ‘दशकौंपछि चिनियाँ कम्युनिष्ट पार्टी (सिपिसी) ले तिब्बती जनताको स्वतन्त्रतालाई धम्की दिइरहेको छ । उनीहरूले दलाई लामाको उत्तराधिकारमा पनि संलग्न हुन खोजेका छन् । हामी त्यसो हुन दिने छैनौं ।’ उनले दलाई लामासँग करिब एक घण्टा कुराकानी गरेका थिए । म्याककलले तिब्बती जनताको हितको रक्षा गर्न आफ्नो अहिंसात्मक विधिहरूको पनि प्रशंसा गरे ।
चीनले के भन्यो ?
बैठकअघि चीनले अमेरिकाले तिब्बतलाई चीनको हिस्सा नमानेर आफ्नो प्रतिबद्धता पूरा नगरे चीनले यस विषयमा ‘कडा कदम’ चाल्ने चेतावनी दिएको थियो । चिनियाँ विदेश मन्त्रालयका प्रवक्ता लिन चिनले भने, ‘सबैलाई थाहा छ कि १४औं दलाई लामा विशुद्ध धार्मिक व्यक्ति होइनन, तर धर्मको आडमा चीन विरोधी पृथकतावादी गतिविधिमा संलग्न निर्वासित राजनीतिक व्यक्तित्व हुन् ।’ लिनले विशेष गरी अमेरिकी राष्ट्रपति जो बाइडेनलाई चीन-तिब्बत विवाद समाधान गर्ने वकालत गर्ने कंग्रेसमा पारित ऐनलाई समर्थन नगर्न अपील गरेका छन् । ‘संयुक्त राज्यले यस कार्यलाई कानूनमा हस्ताक्षर गर्नु हुँदैन,’ लिनले भने । ‘चीनले आफ्नो सार्वभौमसत्ता, सुरक्षा र विकास हितको दृढताका साथ रक्षा गर्न दृढ कदम चाल्नेछ,’ उनले भने ।
भारतमा रहेको चिनियाँ दूतावासले पनि यसबारे लामो विज्ञप्ति जारी गर्दै भनेको छ, ‘हामी अमेरिकी पक्षलाई दलाई लामा समूहको चीन विरोधी पृथकतावादी स्वभावलाई पूर्ण रूपमा मान्यता दिन अपील गर्दछौं, चीनले शिझाङ (तिब्बत) को लागि प्रयोग गरेको शब्दले अमेरिकाको प्रतिबद्धताको सम्मान गर्दछ । चीनसँग सम्बन्धित मुद्दाहरूमा चीनलाई र विश्वलाई गलत संकेतहरू पठाउन बन्द गर्नुहोस् ।
तिब्बत सम्बन्धी अमेरिकी संसदमा विधेयक
अमेरिकी तल्लो सदन हाउस अफ रेप्रीजेनटेटिभले हालै ‘तिब्बत–चीन विवादको समाधान प्रवर्द्धन गर्ने ऐन’ ३९१–२६ पारित गरेको थियो । यो पहिले नै अमेरिकी सिनेटबाट पारित भइसकेको थियो । उक्त विधेयक अनुसार तिब्बतको इतिहास, व्यक्ति र संस्थाहरूबारे चीनले फैलाएको ‘गलत सूचना’ लाई सम्बोधन गर्न अमेरिकाले रकम उपलब्ध गराउने व्यवस्था गरिएको छ । यस विधेयकमा तिब्बतलाई आफ्नो भएको दाबी गर्ने चीनको दाबीलाई प्रतिवाद गरिने उल्लेख छ । उक्त विधेयकमार्फत सन् २०१० देखि ठप्प रहेको तिब्बतका नेताहरूसँग वार्ता गर्न चीनलाई दबाब दिने प्रयास गरिएको छ, ताकि तिब्बतमा सम्झौता गर्न सकियोस् । यसका साथै चीनले तिब्बती जनताको ऐतिहासिक, सांस्कृतिक, धार्मिक र भाषिक पहिचानको चिन्तालाई सम्बोधन गर्नुपर्छ ।
दलाई लामामाथि भारतको अडान
सन् १९५९ मा दलाई लामा तिब्बतबाट भागेर भारतमा शरण लिन बाध्य भए । ३१ मार्च, १९५९ मा, तिब्बती धार्मिक नेता भारत प्रवेश गरे । मार्च १७ मा तिब्बतको राजधानी ल्हासाबाट पैदल हिडेर हिमालय पर्वत पार गरी १५ दिनपछि भारतीय सीमामा प्रवेश गरेका थिए ।
यात्राका क्रममा उनको र उनका सहकर्मीको कुनै खबर नआएपछि धेरैले मृत्यु भएको हुनसक्ने आशंका गर्न थाले । भारत पुगेपछि उनले निर्वासनमा सरकार गठन गरे । तिब्बतलाई लिएर भारतको अडानमा परिवर्तन आयो । जुन २००३ मा, भारतले आधिकारिक रूपमा तिब्बत चीनको एक हिस्सा हो भनेर स्वीकार गर्यो । तत्कालीन प्रधानमन्त्री अटल बिहारी वाजपेयीले तत्कालीन चिनियाँ राष्ट्रपति जियाङ जेमिनसँगको भेटपछि भारतले पहिलो पटक तिब्बतलाई चीनको हिस्साको रूपमा स्वीकार गरेको थियो । तर, त्यसपछि यो मान्यता अप्रत्यक्ष मात्र हो भनिएको थियो । त्यसबेला भारतीय अधिकारीहरूले भनेका थिए, भारतले पूरै तिब्बतलाई मान्यता दिएको छैन जुन चीनको ठूलो हिस्सा हो । बरु स्वायत्त तिब्बत क्षेत्र मानिने भागलाई मात्रै भारतले मान्यता दिएको छ । सन् १९८९ मा दलाई लामाले नोबेल शान्ति पुरस्कार पाएका थिए । दलाई लामाले आफू चीनबाट स्वतन्त्रता नभई स्वायत्तता चाहेको बताएका छन् । चीनले तिब्बतलाई आफ्नो क्षेत्र मान्दै आएको छ तर तिब्बतले आफूलाई चीनको अधीनमा नरहेको र आफ्नो स्वतन्त्रताको कुरा गर्दै आएको छ ।
-बीबीसी हिन्दीबाट
काठमाडौँ । बलिवुडकी चर्चित गायिका अल्का याग्निकले आफुले अचानक कान सुन्न छोडेको जानकारी दिएपछि अहिले यो विषय चर्चामा रहेको छ । सामाजिक सञ्जालमार्फत आफुले कान सुन्न छोडेको जानकारी दिदै गायीका याग्निकले भाइरस हमलाका कारण सुन्ने क्षमता गुमाएको बताएकी छन् ।
उनले लेखेकी छन्- ‘केही साताअघि विमानबाट ओर्लँदै गर्दा अचानक मैले केही सुन्न नसक्ने महसुस गरे । यो घटनापछि धेरैलाई धैर्यता गर्नुपर्यो । आखिर, म मेरो मौनता तोड्न चाहन्छु र मेरा सबै साथीहरू र शुभचिन्तकहरूलाई बताउन चाहन्छु किन म लामो समयदेखि नसुन्ने भएकी छु । परीक्षण पछि डाक्टरले मलाई ‘सेन्सरी न्यूरल’ अर्थात श्रवणशक्तिमा कमी भएको पत्ता लगाएका छन् । यो दुर्लभ लक्षण हो । यो भाइरल अट्याकका कारण भएको हो । म यो अप्रत्याशित झटकाका लागि तयार थिइनँ ।’
आफ्नो पोस्टमा उनले लेखेकी छिन्, ‘म मेरा फ्यान र युवा सहकर्मीहरूलाई धेरै चर्को संगीत र हेडफोनको खतराबारे सचेत गराउन चाहन्छु । कुनै दिन म तपाईंसँग मेरो व्यावसायिक जीवनमा हुने जोखिमहरूको बारेमा कुरा गर्न चाहन्छु ।’
सेन्सरी न्यूरल के हो?
अमेरिकन स्पीच ल्याङ्ग्वेज हियरिङ एसोसिएसन वेबसाइटका अनुसार, ‘यस प्रकारको कान नसुन्ने तब हुन्छ जब भित्री कानमा क्षति वा चोट हुन्छ । भित्री कानको स्नायुमा अवरोधका कारण मस्तिष्कसँग सञ्चारमा बाधा आउँछ । कतिपय मानिसहरूलाई सानो आवाज सुन्न गाह्रो हुन्छ । यस प्रकारको सुन्नता प्रायः स्थायी हुन्छ र यसले औषधि वा शल्यक्रियालाई प्रतिक्रियाबाट ठिक हुदैन ।
यस प्रकारको कान नसुन्ने अवस्थामा श्रवण यन्त्रहरू प्रयोग गर्न सकिन्छ । यस प्रकारको रोग, वंशाणु, बढ्दो उमेर, टाउकोमा चोटपटक, भित्री कानको संरचनामा गडबडी वा ठूलो आवाज वा विस्फोटको कारणले हुन सक्छ ।
यो रोग को कारण के हुन सक्छ?
सबैभन्दा पहिले कानको संरचना बुझौं । कानको तीन भाग हुन्छन् । बाहिरी कान, मध्य कान र भित्री कान मिलेर बनेको हुन्छ । मध्य कान तीन हड्डीहरूको श्रृंखला हो जुन टिम्पेनिक झिल्लीबाट सुरु हुन्छ । भित्री कानमा सेन्सरी कपाल कोशिकाहरू र श्रवण तंत्रिका हुन्छन्, जुन मस्तिष्कमा जान्छ । जब ध्वनि उत्पादन हुन्छ, ध्वनि तरंगहरू उत्पादन हुन्छन् र कानको पर्दा कम्पन हुन्छ । ती कम्पनहरू हड्डीहरूको शृङ्खलाबाट भित्री कानको यात्रा गर्छन् र मस्तिष्कमा पुग्ने विद्युतीय संकेतहरूमा परिणत हुन्छन् र हामी सुन्छौं । कानको भित्री भागका कोष वा स्नायुमा क्षति पुगेपछि बहिरोपनलाई सेन्सोरिनल श्रवणशक्ति भनिन्छ । संक्रमणले सेन्सोरिनल बहिरोपन निम्त्याउन सक्छ । विशेष गरी भाइरल संक्रमणले ।
यदि आमालाई गर्भावस्थाको समयमा उच्च रक्तचाप, केहि संक्रमणहरू वा सुत्केरीको समयमा जटिलताहरू छन् भने, नवजात शिशु कान नसुन्ने हुन सक्छ । धेरै कोलाहल भएको ठाउँमा काम गर्ने मानिसहरूलाई यस प्रकारको कान नसुन्ने हुन सक्छन । त्यस्तै उमेर बढ्दै जाँदा श्रवण तंत्रिका कमजोर भएर पनि यस्तो हुन सक्छ । यो संक्रमण वा दुर्घटनाको कारण पनि हुन सक्छ । थप रूपमा, यस प्रकारको कान नसुन्ने अवस्था मानव निर्मित कारकहरूको कारणले पनि वर्षौंमा हुन सक्छ, जस्तै:
ध्वनि प्रदुषण, ठूलो स्वरले कराउनु, लगातार इयरफोन लगाएर सुन्नु, जब तपाईं रेल, बस वा सडकमा हिंड्दा इयरफोन लगाउनुहुन्छ, त्यहाँ पहिले नै कोलाहल छ । यसमा तपाईले चीजहरू अझ चर्को सुन्नुहुन्छ । यसले सुन्ने क्षमतालाई असर गर्छ।
कस्ता कुराहरुमा ध्यान दिनुपर्छ ?
अर्को कान ठिक भएकाले हाम्रो एउटा कानमा श्रवणशक्ति घटेको कुरामा हामी प्रायः ध्यान दिँदैनौं, त्यसैले सबैभन्दा पहिले हाम्रो श्रवण क्षमतामा कुनै समस्या छ भने बेवास्ता नगरौं । तपाई तुरुन्तै डाक्टरकहाँ जानु पर्छ र श्रवणशक्तिको हदसम्म र के उपचार गर्न सकिन्छ भनेर निर्धारण गर्न केहि परीक्षणहरू छन् ।
उनले श्रवणशक्ति गुमाउनुको लक्षणलाई हामी आफैं र हाम्रो परिवारका सदस्यहरूले बेवास्ता गर्नु हुदैन । अर्थात् घरमा कोही लगातार उच्च भोल्युममा टिभी बजाइरहेको छ भने घरका सदस्यहरूले समस्या छ कि छैन भनेर सोच्नुपर्छ ।
सुन्न नसक्ने अर्को लक्षण भनेको यस्तो व्यक्तिले आवाज सुन्न सक्छ तर शब्दहरू बुझ्न सक्दैन । कोलाहलमा पनि स्पष्ट सुन्न सकिँदैन । यी सबै लक्षणलाई बेवास्ता नगरी निरन्तर सजग रहनुपर्ने चिकित्सकहरुले सुझाव दिएका छन् ।न्युज कारखाना
काठमाडौँ । अर्जेन्टिनाले कोपा अमेरिकामा विजयी शुरुवात गरेको छ । आजदेखि शुरु भएको ४८औं कोपा अमेरिकाको उद्घाटन खेलमा अर्जेन्टिनाले क्यानडालाई २-० गोल अन्तरले पराजित गर्दै प्रतियोगितामा विजयी शुरुवात गरेको हो ।
अर्जेन्टिनाको जितमा जुलियन अल्भारेज र लाउतारो मार्टिनेजले एक एक गोल गरेका थिए । पहिलो हाफ बिना कुनै गोल सकिएको खेलमा अर्जेन्टिनाले दुवै गोल दोस्रो हाफमा गरेको थियो । अल्भारेजले खेलको ४९औं मिनेटमा र मार्टिनेजले खेलको ८८औ मिनेटमा गोल गरेका थिए ।
कोपा अमेरिकाको डिफेन्डिङ च्याम्पियन समेत रहेको अर्जेन्टिनाले यो जितपछि समुह ए मा महत्वपूर्ण ३ अंक हासिल गरेको छ ।
अब अर्जेन्टिनाले अर्को खेल जुन २६ मा चिलीविरुद्ध खेल्ने तालिका रहेको छ । त्यस्तै क्यानडाले पनि जुन २६ मा पेरुविरुद्ध खेल्ने छ ।
न्युज कारखाना
राैतहट-स्रोत नखुलेको रकमसहित पक्राउ परेका एक भारतीय नागरिक फरार भएपछि दुई सरकारी निकायबिच दोषारोपण सुरु भएको छ । सशस्त्र प्रहरीले समातेर ल्याएको हुन्डी कारोबारीलाई भन्सार कार्यालयमा बुझाएको र भन्सारले नबुझेको भन्दै एक अर्को कार्यालयबिच दोषारोपणको शृंखला सुरु भएको हो । रौतहटको बौधीमाई नगरपालिका वडा नम्बर ७ बाट सशस्त्र प्रहरीको सरमुजवा बेस क्याम्पसले भारतीय नम्बर प्लेट बिआर ०५ बिबि ६२१२ को मोटरसाइकललाई रोकेर चेकजाँच गर्दा १४ लाख ८० हजार रुपैया मोटरसाइकलको सिटमुनि फेला परेको थियो । मोटरसाइकल चालक भारत बिहारको पूर्वी चम्पारण जिल्लाको झरोखर ७ जमुनियाका ३१ वर्षीय गजेन्द्र रायलाई सशस्त्र प्रहरीले नियन्त्रणमा लिएर गौर चलान गरेको थियो । रौतहट सदरमुकाम गौर भन्सार कार्यालयमा विहीवार दिउँसो सशस्त्र प्रहरीले हुन्डी कारोबारमा पक्राउ परेका भारतीय नागरिक गजेन्द्र रायलाई बुझाएको कागजपत्र बनाइसकेको थियो । सोही अवस्थामा शौचालय गएका भारतीय नागरिक राय कार्यालयको बाउन्ड्रीवाल हाम फालेर फरार हुन सफल भएको बताइएको छ । सशस्त्र प्रहरी बलको भनाइ छ – नगर र मोटरसाइकलसहित हुन्ड िकारोबारी गजेन्द्र रायलाई मुद्दा नम्बर ७७१ मा दर्ता गरी भन्सार कार्यालयलाई जिम्मा लगाइसकेका छौँ । गौर भन्सार कार्यालयले भने कारोबारी फरार हुनमा आफ्नो दोष नभएको जनाएको छ । सशस्त्र प्रहरीकै नियन्त्रणबाट कारोबारी फरार भएको दोषारोपण भन्सार कार्यालयको रहेको छ । गौर भन्सार कार्यालयका प्रमुख अमरेन्द्र सिंह भन्छन् – अर्थमन्त्रीज्यूको भर्चुअल मिटिङमा व्यस्त रहेको समयमा एक्कासि मानिस फरार भएको कुरा सुनेको हुँ, त्यस बेलासम्म भन्सारको नियन्त्रणमा आइसकेका थिएनन् । कारोबारीलाई समातेर ल्याएको अवस्थामा दुई सरकारी निकायका कर्मचारीको लापरवाहीको कारण पक्राउ परेको अभियुक्त फरार भएपछि जिल्लामा धेरै आलोचना भइरहेको छ ।
काठमाडौँ । उपप्रधान तथा गृहमन्त्री रवि लामिछानेलाई निलम्बन माग गर्दै दायर रिटको आज सुनुवाइका लागि पेशी तोकिँदै छ ।
सहकारी ठगी प्रकरणमा गृहमन्त्री लामिछानेको संलग्नता देखिने गरी जाहेरी समेत परेको दाबी गर्दै अधिवक्ता अनुपम भट्टराईले दायर गरेको रिट सुनुवाईकै क्रममा रहेको छ । यस अघि उक्त रिट यसअघि हेर्न नमिल्ने न्यायाधीशको पेशी पर्दै सरेको थियो ।
इजलासबाटै सुनुवाइको मिति तोकिएकाले आजका लागि पेशी तोकिएको थियो । आज दुई न्यायाधीशको इजलासले यो विवादमा सुनुवाइ गर्ने छ।
महान्यायाधीवक्ता कार्यालय गृहमन्त्री लामिछानेलाई क्लिनचिट देखिने गरी कुनै पनि जिल्लामा अनुसन्धान,अभियोगपत्र र जाहेरी नभएको भनी पत्र लेखेपछि अधिवक्ता भट्टराईले रिट दायर गरेका थिए । सुरुमा उक्त रिट दरपिठ भएको थियो । पछि न्यायाधीश टेकनारायण ढुङ्गानाको इजलासले दर्ता गर्न आदेश गरेपछि पुन दर्ता भएको थियो ।
रिटमाथि पहिलो सुनुवाई गर्दै सर्वोच्चले पोखरादेखि रुपन्देहीसम्म जाहेरी दर्ता तथा अभियोग पत्रसम्म मगाउने आदेश गरेको थियो । त्यस्तै सर्वोच्चमा पोखराको सूर्य दर्शन र बुटवलको सुप्रिम सहकारी ठगी बारे नेपाल प्रहरीको केन्द्रीय अनुसन्धान ब्युरो सिआइबीले गरेको अध्ययन प्रतिवेदन समेत पेस भइसकेको छ ।
न्युज कारखाना
काठमाडौँ । तिब्बती धर्मगुरु दलाई लामालाई भेट्न आएको अमेरिकी प्रतिनिधिमण्डलले भारतीय प्रधानमन्त्री नरेन्द्र मोदीसँग भेटवार्ता गरेको छ । यसै क्रममा प्रधानमन्त्री मोदीले अमेरिकी तल्लो सदनकी पूर्व सभामुख न्यान्सी पेलोसीलाई पनि भेटेका थिए ।
विहिबार भएको मोदी र अमेरिकी प्रतिनिधिमण्डलबीचको यो भेटलाई धेरै अर्थपूर्ण रुपमा हेरिएको छ ।
यसअघि बुधबार अमेरिकी प्रतिनिधिमण्डलले धर्मशालामा धर्मगुरु लगाइ लामासँग भेट गरेको थियो । यस प्रतिनिधिमण्डलमा न्यान्सी पेलोसी बाहेक सांसद माइकल म्याकलसहित ५ जना सांसद छन् । यी सांसदहरू रिपब्लिकन र डेमोक्रेटिक पार्टीका हुन् । यो प्रतिनिधिमण्डलको नेतृत्व रिपब्लिकन सांसद माइकल म्याककलले गरिरहेका छन् ।
बुधबार अमेरिकी प्रतिनिधिमण्डलले दलाई लामाको ‘उत्तराधिकार’ मामिलामा अमेरिकाले चीनलाई हस्तक्षेप गर्न नदिने बताएको थियो ।
विदेशी प्रतिनिधिमण्डलले भारतीय भूमिबाट तिब्बतको समर्थनमा आवाज उठाएको यो पहिलो पटक हो । यद्यपी न्यान्सी यसअघि मे २०१७ मा दलाई लामालाई भेट्न भारत आएकी थिइन् । तर, न्यान्सी पेलोसीले त्यतिबेला कुनै प्रतिनिधिमण्डलसँग भारत भ्रमण गरेकी थिइनन् ।
भारतले तिब्बतलाई चीनको हिस्सा मान्छ र यसबारे टिप्पणी गर्नबाट बच्दै आएपनि यो घटनालाई निकै अर्थपूर्ण रुपमा विश्लेषणगरिएको छ । अमेरिकी प्रतिनिधिमण्डलको यो भ्रमण औपचारिक हो वा होइन भन्नेबारे अहिलेसम्म कुनै जानकारी आएको छैन ।न्युज कारखाना
काठमाडौँ । काठमाडौँ महानगरपालिकाका प्रमुख बालेन्द्र शाह (बालेन) ले सन २०५० सम्ममा विश्वका ८० प्रतिशत मानिस सहर बस्ने अनुमानले सहरी व्यवस्थापनमा चुनौती थपिँदै गएको बताएका छन् ।
ब्राजिलको साओ पाउलोमा हिजोबाट सुरु भएको मेट्रोपोलिस निर्देशक समितिको बैठकमा भाग लिन गएका प्रमुख शाहले ‘मेयरल राउण्ड टेवल’ कार्यक्रमअन्तर्गत आवास र भूमि तथा महानगर कल्याण र जीवन स्तर सुधारसँग सम्बन्धित ‘मेट्रोपोलिस नीति वहस’ मा यस्तो धारणा राखेका हुन् ।
‘हामीले देखेका, भोगेका र अनुमान गरेका समस्या समाधानका उपाय हामीसँगै छन् ।’ शाहले भने, ‘ठूला सहर केन्द्रीत बसाइँसराइलाई निरुत्साहित गर्नुपर्छ । सेटलाइट सहरहरुमा ठूला सहरमा भएका स्वास्थ्य, शिक्षा, रोजगारीसहितको सुविधा र अवसर दिनुपर्छ । यसले जनसंख्याको एकत्रित चाप रोकिन्छ । फरक प्रकृतिको भौगोलिक अवस्थितिमा जनसंख्याको सन्तुलन कायम गराउन मद्दत हुन्छ । यसले सहरी विकास र सुविधा वितरण व्यवस्थापनमा योगदान हुन्छ । यसकारण सहरी नीतिमा महानगरहरुले ठूला सहर केन्द्रीत बसाइँसराइलाई निरुत्साहन गर्नुपर्छ ।’
‘बसाइँसराइले सहरी चाप बढ्ने मात्र होइन । गाउँठाउँका मौलिक संस्कृति पनि नासिन्छन् । भाषा पनि नासिन्छ । ग्रामीण जीवनसँग जोडिएका विविध आयाम जोगाउन पनि यस्ता नीतिको खाँचो छ ।’ उनको भनाइ छ ।
नीति बहस सहरी आवासका आयाम, अभाव र प्रभाव तथा जलवायु जोखिम घटाउन विश्वव्यापी साझा कार्यक्रम, पर्याप्त पूर्वाधार, कम कार्बन फुटप्रिन्ट र समुदायका प्रत्येक सदस्यको विविध आवश्यकताहरू पूरा गर्न समावेशी दृष्टिकोणका विषयमा केन्द्रीत थियो । वहसमा ठूला महानगरपालिकाका मेयर (प्रमुख) हरु सहभागी थिए ।
सहरी आवास र भवनहरुको विषय निर्देशक बोर्डमा छलफलका मुख्य विषय छन् । बैठकमा सहरी आवासका चुनौतीलाई सामना गर्न, सभ्य र सहज बसोबाससँग सम्बन्धित विषयमा छलफल भइरहेको छ ।
प्रमुख शाह मेट्रोपोलिस निर्देशक बोर्डको सदस्य हुन् । मेट्रोपोलिस विश्वका ठूला १५० भन्दा धेरै महानगरहरुको आवद्धता रहेको, आपसी र विश्वव्यापी सहयोग, संवाद, ज्ञान तथा समाधान आदानप्रदान गर्ने, सामुहिक आवाज वुलन्द गर्ने अन्तरराष्ट्रिय संस्था हो ।
बैठकमा भाग लिन प्रमुख शाह असार ३ गते व्राजिल प्रस्थान गरेका हुन् । बैठक सकेर उनी असार ८ गते शनिवार स्वदेश फर्किने छन् ।
न्युज कारखाना
