नुवाकोट । भोटेकोशी हुँदै त्रिशूली नदीमा आएको आकस्मिक बाढीबाट प्रभावित परिवारलाई विदुर नगरपालिकाले तत्काल घरभाडाका लागि प्रतिपरिवार १० हजार रुपैयाँ उपलब्ध गराउने भएको छ ।

विदुर नगर कार्यपालिकाको १३४औँ बैठकले बाढीका कारण बस्न योग्य घर नभएका नगरवासीलाई नगरपालिकाले घर भाडामा लिएर बस्ने व्यवस्था मिलाउने निर्णय गरेको हो । प्रभावित परिवारलाई खाद्यान्न, लत्ताकपडा, भान्साका सामग्री, सरसफाइ सामग्रीलगायत आवश्यक सामग्रीसमेत उपलब्ध गराइने नगरपालिकाले जनाएको छ ।

घर भाडामा लिँदा वा दिँदा प्रचलित भाडादरभन्दा बढी रकम लिएको पाइएमा प्रचलित कानुनअनुसार कारबाही गरिने निर्णयसमेत गरिएको छ ।

त्यस्तै, तीनै तहका सरकार, राष्ट्रिय तथा अन्तर्राष्ट्रिय संघसंस्था र दाताको सहकार्यमा अस्थायी आवास निर्माण गरी बाढी प्रभावितलाई पुनःस्थापना गरिने भएको छ ।

नगरपालिकाले अस्थायी आवास केन्द्र सञ्चालनमा नरहेका विद्यालयमा भदौ २४ गतेदेखि पठनपाठन सञ्चालन गर्ने निर्णय गरेको छ । अस्थायी आवास केन्द्रका रूपमा प्रयोग भइरहेका सामुदायिक तथा संस्थागत विद्यालयलाई केही दिनभित्र अन्यत्र व्यवस्थापन गरी पुनः सञ्चालनमा ल्याइने जनाइएको छ ।

विदुर नगरपालिकाभित्र सञ्चालित अस्थायी आवास केन्द्रमा अन्य जिल्ला तथा स्थानीय तहका भोटेकोशी बाढी प्रभावित नागरिकसमेत रहेकाले उनीहरूलाई सम्बन्धित जिल्ला तथा स्थानीय तहसँग समन्वय गरी व्यवस्थापन गर्न आग्रह गरिने नगरपालिकाले जनाएको छ।एभरेष्ट न्यूज एजेन्सी,

काठमाडौँ । देशका प्रमुख नदीहरूमा आगामी तीन दिन बहाव बढ्ने पूर्वानुमान गरिएको छ। बाढी पूर्वानुमान महाशाखाले जारी गरेको सूचनाअनुसार कोशी, नारायणी, कर्णाली र महाकालीका प्रमुख सहायक नदीमा बहाव उल्लेख्य बढ्ने देखिएको छ ।

महाशाखाका अनुसार आज कोशी नदीअन्तर्गत सप्तकोशी चतरा, तमोर त्रिवेणी, अरुण सिम्ले र दूधकोशी रुकुमबजार क्षेत्रमा बहाव उल्लेख्य बढ्ने अनुमान गरिएको छ। ती नदीमा भोलि र पर्सि पनि बहाव उल्लेख्य बढ्ने पूर्वानुमान छ ।

तामाकोशी र सुनकोशीमा पनि आजदेखि पर्सिसम्म बहाव बढ्ने भए पनि अन्य नदीको तुलनामा अवस्था सामान्य रहने देखिएको छ ।

नारायणी नदीअन्तर्गत नारायणी देवघाट, त्रिशूली बेत्रावती, बूढीगण्डकी आरुघाट, मर्स्याङ्दी विमलनगर, सेती दमौली र कालीगण्डकी कुश्मा क्षेत्रमा तीनै दिन बहाव उल्लेख्य बढ्ने पूर्वानुमान गरिएको छ ।

कर्णाली नदीअन्तर्गत कर्णाली चिसापानी र असरााघाट क्षेत्रमा बहाव बढ्ने तथा भेरी समजिघाट र पश्चिम सेती दिपायल क्षेत्रमा आज बहाव उल्लेख्य बढ्ने पूर्वानुमान छ। यी नदीमा भोलि र पर्सि पनि बहाव बढ्ने देखिएको छ । महाकाली नदीअन्तर्गत पारिगाउँ क्षेत्रमा आज बहाव उल्लेख्य बढ्ने र त्यसपछि पनि बहाव बढ्ने पूर्वानुमान गरिएको छ। कन्काई, कमला, बागमती, पूर्वी राप्ती तथा पश्चिम राप्तीमा भने तीनै दिन सामान्य रूपमा बहाव बढ्ने अनुमान छ ।

महाशाखाले आज विभिन्न जिल्लाका साना नदी तथा खोलामा बहाव उल्लेख्य बढ्नुका साथै आकस्मिक बाढी आउन सक्ने जोखिम औँल्याएको छ ।

पूर्वी क्षेत्रमा ताप्लेजुङ, सङ्खुवासभा, तेह्रथुम, पाँचथर, इलाम, धनकुटा, झापा, मोरङ, खोटाङ, उदयपुर, ओखलढुङ्गा र भोजपुरमा जोखिम रहेको जनाइएको छ । मध्य क्षेत्रमा दोलखा, काभ्रेपलाञ्चोक, ललितपुर, भक्तपुर, काठमाडौँ, सिन्धुपाल्चोक, रसुवा, नुवाकोट, धादिङ, गोरखा, तनहुँ, लमजुङ र कास्कीमा साना नदी तथा खोलामा बहाव बढ्न सक्ने बताइएको छ ।

त्यस्तै, पश्चिम तथा सुदूरपश्चिमका सुर्खेत, दैलेख, अछाम, कालिकोट, बाजुरा, बाजहाङ, बाँके, बर्दिया, दाङ, डोटी, डडेलधुरा, कैलाली र कञ्चनपुरलगायत जिल्लामा पनि साना नदीमा बहाव बढ्ने तथा आकस्मिक बाढीको जोखिम रहेको महाशाखाले जनाएको छ ।

महाशाखाले नदी तथा खोलानाला आसपासका बस्ती र सडक क्षेत्रमा सतर्कता अपनाउन तथा जोखिमयुक्त स्थानमा आवश्यक सावधानी अपनाउन आग्रह गरेको छ ।

रामअधार यादव, रौतहट, भादौ, २१ चैत गते

रौतहट । रसुवामा आएको विनाशकारी बाढीबाट प्रभावित परिवारलाई सहयोग गर्ने उद्देश्यले नेकपा दुर्गा भगवती गाउँपालिका कमिटीको संयुक्त अगुवा कार्यकर्ता बैठक सम्पन्न भएको छ। गाउँपालिका कमिटीका पूर्वसंयोजक हरिशंकर नाथ झाको अध्यक्षतामा बसेको बैठकले बाढीपीडितलाई आर्थिक तथा खाद्यान्न सहयोग गर्ने निर्णय गरेको हो।

बैठकमा नेकपाका केन्द्रीय सदस्य रेमान्त झा प्रमुख अतिथि, गाउँपालिका अध्यक्ष शम्भू सिंह लगायत नेता तथा कार्यकर्ताहरूको उपस्थिति रहेको थियो।

बैठकका क्रममा सहभागी नेता तथा कार्यकर्ताहरूले रसुवा बाढीमा ज्यान गुमाएका व्यक्तिहरूप्रति श्रद्धाञ्जली व्यक्त गर्दै शोकसन्तप्त परिवारप्रति समवेदना प्रकट गरेका थिए। साथै बाढीमा घाइते भएकाहरूको शीघ्र स्वास्थ्यलाभको कामना गर्दै पीडित परिवारलाई राहत सहयोग उपलब्ध गराउने निर्णय गरिएको थियो।

राहत संकलन अभियानअन्तर्गत रेमान्त झा लगायत २७ जना नेता तथा कार्यकर्ताले नगद तथा खाद्यान्न सामग्री सहयोग गरेका छन्। सहयोग गर्नेहरूमध्ये रेमनत झा ११ हजार, शम्भू सिंहले ११ बोरा चामल र ५ हजार ५ सय रुपैयाँ, शीला देवीले २ बोरा चामल र ५ हजार १ सय रुपैयाँ, डीके झाले ५ हजार १ सय रुपैयाँ, रामानन्द यादवले ५ हजार १ सय रुपैयाँ, शकुन्तला देवीले १ बोरा चामल र १ हजार रुपैयाँ तथा परमानन्द चौधरीले १ हजार १ सय रुपैयाँ सहयोग गरेका छन्।

बैठकमा सहभागी अन्य नेता तथा कार्यकर्ताहरूले पनि आफ्नो क्षमता अनुसार नगद तथा खाद्यान्न सामग्री सहयोग गरेका छन्। संकलित राहत सामग्री तथा रकम रसुवा बाढीपीडित परिवारसम्म पुर्‍याउने जनाइएको छ।

आरके श्रीवास्तव, रौतहट, २१ भदौ ।

रौतहटको कटहरिया नगरपालिका–३ मा पछिल्ला वर्षहरूमा विकास निर्माणका गतिविधिले गति लिएको छ। साविक बिर्ती प्रस्टोका गाविसअन्तर्गत पर्ने यस वडामा स्वास्थ्य, शिक्षा, सडक, खानेपानी, कृषि तथा धार्मिक–सामाजिक पूर्वाधारलाई प्राथमिकतामा राखेर विभिन्न योजनाहरू सञ्चालन गरिएको वडा कार्यालयले जनाएको छ ।

२०७९ सालको स्थानीय तह निर्वाचनबाट पुरै प्यानलसहित वडा अध्यक्षमा निर्वाचित श्यामाकान्त प्रसाद यादवले आफ्नो कार्यकालमा वडाको आवश्यकता र स्थानीयको मागअनुसार विकास योजनालाई अघि बढाइएको बताएका छन्। उनका अनुसार स्वास्थ्य क्षेत्रको पूर्वाधार विस्तारलाई विशेष प्राथमिकता दिइएको छ ।

नगरपालिकाको बजेटबाट २२ लाख रुपैयाँको लागतमा तीन कोठे स्वास्थ्य चौकी भवन निर्माण गरिएको छ । त्यस्तै, मधेश प्रदेश सरकारअन्तर्गत स्वास्थ्य मन्त्रालयबाट २० लाख र २५ लाख रुपैयाँको लागतमा दुई वटा दुई–दुई कोठे बर्थिङ सेन्टर भवन निर्माण गरिएको वडा अध्यक्ष यादवले जानकारी दिए। यसअघि छाया नेपालको सहयोग तथा नगरपालिकाको सहकार्यमा २५ लाख रुपैयाँको लागतमा तीन कोठे बर्थिङ सेन्टर भवनसमेत निर्माण भएको थियो ।

स्वास्थ्य संस्थाका भौतिक पूर्वाधार विस्तार भएपछि स्थानीय महिलालाई प्रसूति सेवाका लागि टाढा जानुपर्ने बाध्यता केही हदसम्म कम भएको वडा कार्यालयको भनाइ छ।

शिक्षामा पनि पूर्वाधार र जनशक्ति थप

वडाले शिक्षाको गुणस्तर सुधारका लागि श्री आधारभूत विद्यालयलाई समेत प्राथमिकतामा राखेको छ। वडा बजेटबाट तलब–भत्ता उपलब्ध हुने गरी एक जना शिक्षक नियुक्त गरिएको तथा विद्यालयको कम्पाउन्ड वाल निर्माणका लागि दुई चरणमा पाँच–पाँच लाख गरी १० लाख रुपैयाँ लगानी गरिएको वडा अध्यक्ष यादवले बताए।

विद्यालयको भौतिक संरचना सुधारसँगै पर्याप्त शिक्षक तथा शैक्षिक वातावरण निर्माणमा अझै थप लगानी आवश्यक रहेको स्थानीयको भनाइ छ।

९० प्रतिशत भित्री सडक ढलान भएको दाबी

वडा कार्यालयले सडक पूर्वाधारलाई आफ्नो कार्यकालको प्रमुख उपलब्धिका रूपमा प्रस्तुत गरेको छ। वडा अध्यक्ष यादवका अनुसार वडाभित्रका करिब ९० प्रतिशत भित्री सडक ढलान भइसकेका छन्।

प्रदेश सरकारबाट ५० लाख रुपैयाँ र वडा बजेटबाट ५० लाख रुपैयाँ गरी करिब एक करोड रुपैयाँ लगानीमा अधिकांश भित्री सडक पक्की गरिएको उनले बताए। संघीय सहरी विकास मन्त्रालयको सहयोगमा गाउँको मुख्य सडकमा करिब ६ सय मिटर सडक ढलान तथा ४२० मिटर नाला निर्माणसमेत सम्पन्न भएको छ।

स्थानीयका अनुसार सडक पक्की भएपछि वर्षायाममा हुने हिलो, पानी जम्ने र आवतजावतमा हुने कठिनाइमा कमी आएको छ।

स्थानीय जावेद आलमले नहर बाटो ढलान भएपछि वर्षौंदेखि हिलो–किचलोको समस्या भोग्दै आएका स्थानीयलाई ठूलो राहत मिलेको बताए।

कलभर्टले छोट्यायो खेतबारी जाने बाटो

कटहरिया–३ कृषि तथा नर्सरी व्यवसायका लागि पनि परिचित क्षेत्र हो। बिर्तीदेखि खतवहिया जाने बाटोमा १० लाख रुपैयाँको लागतमा कलभर्ट निर्माण भएपछि स्थानीय कृषक तथा नर्सरी व्यवसायीलाई आवतजावतमा सहज भएको छ।

स्थानीय नर्सरी व्यवसायी छोटेलाल यादवका अनुसार कलभर्ट निर्माण हुनुअघि खेतबारी तथा नर्सरीमा पुग्न करिब तीन किलोमिटर घुमाउरो बाटो प्रयोग गर्नुपर्ने बाध्यता थियो। कलभर्ट निर्माण भएपछि उक्त समस्या हटेको उनले बताए।

वडा अध्यक्ष यादवले बिर्ती प्रस्टोका देशमै चर्चित नर्सरी तथा बिरुवा उत्पादन क्षेत्र भएकाले स्थानीय व्यवसायीलाई आधुनिक प्रविधि, तालिम र आवश्यक पूर्वाधार उपलब्ध गराउन तीनै तहका सरकारसँग माग गरेका छन्।

खानेपानी र विद्युतीकरणमा पनि काम

खानेपानीको समस्या समाधानका लागि हरेक वर्ष बजेट विनियोजन गरी विभिन्न स्थानमा ह्यान्डपम्प जडान गरिएको वडा कार्यालयले जनाएको छ। कृषि सडक निर्माण, विद्युत् पोल तथा तार विस्तारलगायतका कामसमेत गरिएको छ।

वडालाई उज्यालो बनाउने अभियानअन्तर्गत पाँच वटा टावर लाइट जडान गरिएको वडा अध्यक्ष यादवले बताए।

धार्मिक तथा सामाजिक संरचना निर्माण

वडामा धार्मिक तथा सामाजिक पूर्वाधार निर्माणलाई पनि प्राथमिकता दिइएको छ। बडेरवा मठमा चौतारा निर्माण, दक्षिण टोल बडेरवामा तीन लाख रुपैयाँको लागतमा भुइँया बाबा मन्दिर निर्माण, बिर्ती टोलको ब्रह्मस्थान स्तरोन्नति तथा सौन्दर्यीकरणका काम गरिएको वडा कार्यालयले जनाएको छ।

मुस्लिम समुदायका लागि १७ लाख रुपैयाँको लागतमा मोकदम भवन तथा करिब २० लाख रुपैयाँको लागतमा कब्रिस्तानको घेराबार निर्माण गरिएको छ।

स्थानीय अब्दुल सकुरले मोकदम भवन र कब्रिस्तानको घेराबार निर्माण भएपछि मुस्लिम समुदायलाई सामाजिक तथा धार्मिक गतिविधि सञ्चालन गर्न सहज भएको बताए।

चालु आर्थिक वर्षमा थप योजना

वडा अध्यक्ष यादवका अनुसार चालु आर्थिक वर्षमा विद्यालयका लागि पाँच लाख, मोकदम भवनका लागि पाँच लाख तथा दक्षिण टोल बडेरवास्थित ब्रह्मबाबा मन्दिर निर्माणका लागि पाँच लाख रुपैयाँ विनियोजन गरिएको छ।

स्थानीय बिरेन्द्र साहले ब्रह्मस्थानमा कम्पाउन्ड वाल निर्माणसँगै अधुरो ब्रह्मबाबा मन्दिर निर्माण कार्यसमेत सम्पन्न गर्न वडा कार्यालयसँग आग्रह गरेका छन्।

विकाससँगै दिगोपनाको चुनौती

स्थानीय तहले सडक, भवन, खानेपानी तथा धार्मिक–सामाजिक संरचना निर्माणमा लगानी बढाए पनि निर्माण भएका संरचनाको संरक्षण, नियमित मर्मतसम्भार तथा सेवाको प्रभावकारिता कायम राख्नु अर्को चुनौती देखिएको छ।

विशेषगरी नर्सरी तथा कृषि उत्पादनमा पहिचान बनाएको बिर्ती प्रस्टोकामा उत्पादनलाई बजारसँग जोड्ने, आधुनिक प्रविधि भित्र्याउने, व्यवसायीलाई तालिम दिने तथा कृषि सडक र सिँचाइको पूर्वाधार थप विस्तार गर्ने आवश्यकता रहेको वडा अध्यक्ष यादव बताउँछन्।

यादवले जनप्रतिनिधिका रूपमा आफ्नो कार्यकालमा व्यक्तिगत पहल र लगानीबाट विपन्न तथा दुःखीलाई सहयोग गर्नुका साथै विभिन्न पर्व, धार्मिक तथा सामाजिक कार्यमा समेत सहयोग गर्दै आएको बताएका छन्।

“जनताको आवश्यकता र अपेक्षालाई केन्द्रमा राखेर वडा विकासलाई नमुना बनाउने प्रयास भइरहेको छ,” वडा अध्यक्ष यादवले भने।

कटहरिया नगरपालिका–३ मा हाल करिब दुई हजार पाँच सय मतदाता रहेका छन्। पछिल्ला वर्षमा सडक, स्वास्थ्य, शिक्षा र सामाजिक पूर्वाधारमा भएको लगानीले वडाको भौतिक स्वरूपमा परिवर्तन ल्याएको देखिए पनि विकासलाई दीगो बनाउँदै कृषि तथा नर्सरी क्षेत्रको व्यावसायिक विकासलाई थप गति दिनुपर्ने स्थानीयको अपेक्षा छ।

फोटो फिचरः

नुवाकोट । भोटेकोशी बाढीबाट नुवाकोटमा २६०८ जना सम्पर्कविहिन भएका छन् ।

जिल्ला प्रशासन कार्यालय नुवाकोटले दिएको अपडेट अनुसार नुवाकोटबाट १८७७ पुरुष, ४६५ महिला, १०४ विदेशी पुरुष, १०७ विदेशी महिला र ५५ जना नखुलेका मानिस सम्पर्कविहिन रहेका छन् ।

प्रशासनले अहिलेसम्म जिल्लाका ३४०३ जनाको उद्धार गरिएको जानकारी दिएको छ । त्यसैगरी नुवाकोटमा अहिलेसम्म १९३ जनाको शव निकालिएको छ । जसमा १२० जना लिंग पहिचान नभएका रहेका छन् .  । एभरेष्ट न्यूज एजेन्सी

गोरखा । चुमनुब्री गाउँपालिका–४ नामरुङस्थित थेराङ खोलामा बाढी आएर पुलहरू बगाएपछि जिल्ला प्रशासन कार्यालय गोरखाले मनास्लु र लार्केपास पदमार्गमा पदयात्रा नगर्न आग्रह गरेको छ ।

भदौ २१ गते बिहान करिब ३ः३० बजे आएको बाढीले चुमनुब्री गाउँपालिका–४ र २ जोड्ने फलामे पुल तथा गाउँपालिकाबाट नामरुङ जंगलतर्फ जाने बुढीगण्डकी नदीमाथिको झोलुङ्गे पुल बगाएको प्रशासनले जनाएको छ ।

प्रशासनले अर्को सूचना जारी नभएसम्म मनास्लु तथा लार्केपास पदमार्गमा यात्राको तयारीमा रहेका वा यात्रामा रहेका पदयात्रीलाई पदयात्रा नगर्न र नगराउन आग्रह गरेको छ ।

विपद्जन्य घटना वा असामान्य अवस्था सिर्जना भएमा तत्काल नजिकको सुरक्षा निकाय, प्रहरी चौकी वा स्थानीय तहलाई जानकारी गराउन प्रशासनले अनुरोध गरेको छ।एभरेष्ट न्यूज एजेन्सी

वीरगञ्ज । पर्साको सखुवाप्रसौनी गाउँपालिकाका अध्यक्ष जसवन्त यादव क्यासिनोमा भेटिएपछि प्रहरीले नियन्त्रणमा लिएको छ ।

शनिबार राति प्रहरीले वीरगञ्जस्थित गण्डकको क्लार्क रिसोर्टमा रहेको क्यासिनोमा विशेष अभियान सञ्चालन गर्दा अध्यक्ष यादवसहित आठ जनालाई नियन्त्रणमा लिएको हो । पक्राउ पर्नेमा इलाका प्रहरी कार्यालय पोखरीयाका इन्चार्ज समेत रहेका प्रहरी इन्स्पेक्टर प्रदिप पौडेल समेत रहेको बताइएको छ ।

प्रहरीले क्यासिनो परिसरबाट गाउँपालिकाको ना१झ १६८७ नम्बरको सरकारी स्कर्पियोसमेत नियन्त्रणमा लिएको जनाएको छ ।

जिल्ला प्रहरी कार्यालय पर्साले अध्यक्ष यादवसहित आठ जना नियन्त्रणमा परेको पुष्टि गर्दै आज सार्बजनिक गर्ने तयारी गरेको बताएको छ ।

काठमाडौँ । रसुवाको भोटेकोशी नदीमा आएको भीषण बाढीका कारण हालसम्म १३४१ जनाको शव फेला परेको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले दिएको पछिल्लो अपडेट अनुसार अहिलेसम्म १३४१ जनाको शव फेला परेको हो । जसमा रसुवामा १६३, नुवाकोटमा १९५, धादिङमा ६७, चितवनमा ३६२, गोरखामा ७४, तनहुँमा ३८, नवलपरासी पूर्वमा २२२ र नवलपरासी पश्चिममा २२० जनाको शव फेला परेको छ ।

अहिलेसम्म ९९ शव सनाखत भएर आफन्तले बुझेको प्राधिकरणले जानकारी दिएको छ ।

प्राधिकरणले दिएको पछिल्लो अपडेट अनुसार बाढी तथा विपद्का कारण ४ हजार ९९६ जना सम्पर्कविहीन भएका हुन् । सम्पर्कविहीन हुनेमा रसुवाका १९६७, नुवाकोटका २३४० र विदेशी नागरिक ५८९ रहेको विवरणमा उल्लेख छ । त्यस्तै करिब १०० जना सुरक्षाकर्मी र कर्मचारी अझै सम्पर्कविहिन रहेका छन् ।एभरेष्ट न्यूज एजेन्सी

काठमाडौँ । जाजरकोटका भूकम्प प्रभावित १८८ लाभग्राहीलाई निजी आवास पुनर्निर्माणका लागि अनुदानको पहिलो किस्ता पठाइएको छ ।

आवास पुनर्निर्माण सम्झौता गरेका लाभग्राहीलाई प्रतिघरधुरी ५० हजार रुपैयाँका दरले रकम उपलब्ध गराइएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जानकारी दिएको हो ।

विपद् प्रभावित निजी आवास प्रबलीकरण, पुनर्निर्माण तथा पुनर्स्थापना अनुदानसम्बन्धी दोस्रो संशोधित कार्यविधि, २०८३ अनुसार आवास पुनर्निर्माण सम्झौता भएपछि अनुदान रकम लाभग्राहीको बैंक खातामा भुक्तानी गर्ने व्यवस्था रहेको छ ।

पहिलो किस्ता प्राप्त गरेपछि लाभग्राहीले आवास निर्माण गरी जगको तहसम्मको काम सम्पन्न गर्नुपर्नेछ । त्यसपछि प्राविधिक जाँच तथा निर्माण सम्पन्न भएको प्रतिवेदनका आधारमा दोस्रो किस्ताको रकम उपलब्ध गराइने प्राधिकरणले जनाएको छ ।