काठमाडौँ,१६ गते मंसिर ।
अख्तियार दुरुपयोग अनुसन्धान आयोगले रौतहटको कटहरिया नगरपालिकाका तत्कालीन निमित्त प्रमुख प्रशासकीय अधिकृत रामप्रकाश साहसहित ७ जनाविरुद्ध विशेष अदालतमा भ्रष्टाचार मुद्दा दायर गरेको छ ।
आर्थिक वर्ष २०७७÷७८ मा नगरपालिकाको जनचेतनामूलक डकुमेन्ट्री निर्माण गर्ने बहानामा नक्कली काम देखाई सरकारी रकम करिब १० लाख रुपैयाँ हिनामिना गरेको आरोपमा अख्तियारले मंगलबार विशेष अदालतमा मुद्दा दायर गरेको हो ।
अख्तियारमा उजुरी परेपछि गरिएको अनुसन्धानका क्रममा कटहरिया नगरपालिकाले वार्षिक स्वीकृत कार्यक्रम र बजेट बिना नै बदनियतपूर्ण ढङ्गले ‘सरिता फाउन्डेसन’ नामक संस्थालाई डकुमेन्ट्री बनाउन दिएको खुलेको जनाएको छ । सम्झौता विपरीत जनचेतनामूलक डकुमेन्ट्रीमा मेयरको गुणगान मात्रै गाएको भिडियो बनाएको, उक्त भिडियो कतै प्रसारण समेत नभएको र नक्कली कागजात खडा गरी ९ लाख ९८ हजार ९ सय २१ रुपैयाँ भुक्तानी दिई भ्रष्टाचार गरेको अख्तियारको भनाइ छ ।
अख्तियारले विशेष अदालतमा मुद्दा दायर गरिएकाहरूमा तत्कालीन प्रशासकीय अधिकृत साह, लेखापाल विवेक कुमार सहनी, सहायकस्तरका कर्मचारीहरू राम नरेश प्रसाद यादव, उमेश कुमार दास तत्मा, खरिदारद्वय कौशल किशोर चौधरी र छोटेलाल मिश्र तथा सरिता फाउन्डेसनकी निर्देशक सरिता कुमारी साह रहेका छन् ।
उनीहरू सातै जनाविरुद्ध ९ लाख ९८ हजार ९ सय २१ रुपैयाँ बिगो कायम गर्दै बिगो बमोजिमको जरिवाना र कैद सजायको मागदाबी गरिएको अख्तियारले जारी गरेको विज्ञप्तिमा उल्लेख छ । सभार ः मधेश खबर
बज्जिकाञ्चल संवाददाता,राैतहट,मंसिर १४ गते ।
रौतहट । कटहरिया नगरपालिकामा नयाँ प्रमुख प्रशासकीय अधिकृतको रूपमा माधवेन्द्र चौधरीले जिम्मेवारी सम्हालेका छन्। आइतबार मेयर अजय प्रकाश जैसवाल र लेखा अधिकृत कामेश्वर सहनीले चौधरीलाई स्वागत गर्दै औपचारिक रूपमा हाजिर गराएका हुन्।
नव नियुक्त अधिकृत चौधरीसँग नगरवासीले विशेष अपेक्षा राखेका छन्। लामो समयदेखि तलबविहीन अवस्थामा रहेका करार कर्मचारीहरूको समस्याको समाधान गर्ने र सर्वसाधारणलाई पारदर्शी, छिटो–छरितो सेवा उपलब्ध गराउने विश्वास व्यक्त गरिएको छ।
यसअघि कटहरिया नगरपालिकामा कार्यरत तत्कालीन प्रमुख प्रशासकीय अधिकृत, उपसचिव गणेश नेपालीले सहज वातावरण नभएको कारण देखाउँदै करिब एक महिना अघि मन्त्रालय फिर्ता भएका थिए। त्यसपछिको रिक्ततामा अब चौधरीले नेतृत्व सम्हालेका हुन्।
नगरपालिका तथा स्थानीयबासीले नयाँ नेतृत्वले प्रशासनिक सक्रियता बढाई नगरको सेवा प्रवाहलाई थप प्रभावकारी बनाउने अपेक्षा राखेका छन्।
बज्जिकाञ्चल संवाददाता,राैतहट,मंसिर १४ गते ।
मिडिया काउन्सिल मधेस प्रदेशका कार्यवाहक अध्यक्ष सुरेश यादव, सदस्य रिंकु मिश्रा (गायत्री) तथा साथ आएका पदाधिकारीहरूको टोलीले आज बजिकान्चल मिडिया प्रा.लि.द्वारा सञ्चालित www.ebajjikanchaldainik.com को कार्यालयमा अनुगमन गरेको छ ।
अनुगमनका क्रममा अनलाइन मिडिया सञ्चालनको वर्तमान अवस्था, सुधारका सम्भावना तथा नीतिगत आवश्यकता सम्बन्धी विषयमा विस्तृत छलफल भएको बताइएको छ । मिडिया काउन्सिलका प्रतिनिधिहरूले अनुगमनपछि अनलाइन मिडियाहरूको वर्गीकरण प्रक्रिया शीघ्र सुरु गरिने जानकारी दिँदै पारदर्शी तथा जिम्मेवारीपूर्ण पत्रकारितालाई सघाउने प्रतिबद्धता व्यक्त गरेका छन् ।
बजिकान्चल मिडिया प्रा.लि.का सञ्चालक एवम् कार्यकारी सम्पादक राजु कुमार श्रीवास्तव(आरके श्रीवास्तव)ले अनुगमन टोलीप्रति आभार व्यक्त गर्दै व्यावसायिक, पारदर्शी र उत्तरदायी पत्रकारितामा निरन्तर प्रतिबद्ध रहने बताएका छन् ।
अनुगमन कार्यक्रममा बजिकान्चल मिडिया प्रा.लि.का प्रबन्ध निर्देशक सरिता कुमारी श्रीवास्तव,सम्पादक रामआधार प्रसाद यादव,स्थानीय न्यूज मिडिया प्रा.लि.का सञ्चालक आरएन पटेल, कटहरिया वडा नं. ४ का वडा अध्यक्ष चन्दन कुशवाहा, कटहरिया बहुमुखी क्याम्पसका लेखाप्रमुख रामनिवास प्रसाद यादव तथा अर्जुन यादवको सक्रिय उपस्थितिलाई सराहना गरिएको थियो ।
अर्जुन कुमार यादव,मंसिर,१३ गते ।
रौतहट जिल्लाको इशनाथ नगरपालिका क्षेत्रमा पछिल्ला केही दिनयता तस्करी गतिविधि असाधारण रूपमा बढिरहेको छ। जयनगरदेखि रामपुर खाप, लतमरी हुँदै महुलिया नाका बोडरसम्मको क्षेत्रमा प्रत्येक रोहबरमार्फत निरन्तर रूपमा अवैध सामानको आवत–जावत भइरहेको स्थानीयवासीहरूले बताए । सो सीमावर्ती क्षेत्रको कमजोर निगरानी र रातिराति हुने गतिविधिले तस्करी झन् सहज भइरहेको भन्दै नागरिकहरू चिन्तित छन्।
स्थानीय स्रोतका अनुसार, भारतसँग जोडिएका यी नाकाहरूबाट दैनिक रूपमा विभिन्न प्रकारका उपभोग्य तथा प्रतिबन्धित वस्तुहरू अवैध रूपमा भित्रिने र बाहिरिने क्रम बढ्दो छ। सीमावर्ती बस्तीमा बसोबास गर्ने बासिन्दाले तस्करहरू समूहमा आयोजना गरेर नियमित रूपमा रोहबर प्रयोग गर्ने गरेको उल्लेख गरेका छन्। यसको असर बजार व्यवस्थापन, राजस्व सङ्कलन र स्थानीय सुरक्षामा प्रत्यक्ष रूपमा परेको जनाइएको छ।
स्थानीयवासी तथा सरोकारवालाहरूले तस्करीले समग्र सामाजिक–आर्थिक संरचना प्रभावित बनाइरहेको भन्दै चाँडोभन्दा चाँडो कडा कदम चाल्न सरकारी निकायलाई आग्रह गरेका छन्। उनीहरूले सीमावर्ती नाकाहरूमा प्राविधिक निगरानी, नियमित गस्ती र स्पष्ट प्रशासनिक कडाइ लागू गरे मात्र समस्या नियन्त्रणमा आउन सक्ने धारणा व्यक्त गरेका छन्।
आरके श्रीवास्तव,राैतहट,मंसिर ११ गते ।
राजपुर — लैङ्गिक हिंसा विरुद्धको १६ दिने अभियानको अवसरमा राजपुर नगरपालिकामा आज विशेष जनचेतनामूलक कार्यक्रम सम्पन्न गरिएको छ । नगरपालिकाको आयोजनामा विभिन्न सरोकारवालाको सक्रिय सहभागितामा सचेतना कार्यक्रम, प्रतिबद्धता घोषणाहरू तथा किशोरी पदयात्रा गरिएकाे थियो ।
कार्यक्रमलाई सम्बोधन गर्दै नगर प्रमुख डा. मो. राजिक आलमले आफ्नो कार्यकालमा आरडिसी,ईस्लामिक रिलिफ लगायतका संस्थाहरूको सहकार्यमा निरन्तर रुपमा महिला सशक्तिकरणका कार्यक्रम सञ्चालन हुँदै आएको बताए । उनले बालविवाह न्यूनीकरणदेखि लिएर महिला–किशोरी लक्षित सीप तथा तालिम कार्यक्रमहरू ६ वटा वडामा विस्तार गरिएको जानकारी दिए ।
डा. आलमले सामाजिक सञ्जालमार्फत पनि महिलामाथि हुने दुर्ववहार बढ्दो अवस्थामा रहेको भन्दै मोबाइल तथा इन्टरनेटको सुरक्षित प्रयोगबारे सचेत हुन आग्रह गरे । महिलामाथि कुनै पनि प्रकारको हिंसा भएमा वडा अध्यक्षमार्फत वा सिधै उपप्रमुख तथा न्यायिक समितिमा उजुरी दिन सकिने स्पष्ट गर्दै, नगरपालिकाले कठोर रूपमा कारबाही प्रक्रिया अघि बढाउने प्रतिबद्धता जनाए ।
कार्यक्रममा प्रमुख जिल्ला अधिकारी दिनेश सागर भुसालले महिला भएकै कारण हुने भेदभाव समाजका लागि गम्भीर समस्या भएको बताउँदै “महिलामाथि कुनै पनि प्रकारको हिंसा सहिँदैन, सामूहिक रूपमा रोकथाममा उभिनु हाम्रो दायित्व हो” भने ।
त्यसैगरी राैतहट प्रहरी प्रमुख प्रहरी उपरीक्षक रबिन कार्की, सशस्त्र प्रहरी उपरीक्षक रामहरि अधिकारी लगायत सुरक्षाकर्मी, कर्मचारी तथा स्थानीय सरोकारवालाले अभियानमा सहयोग गर्ने प्रतिबद्धता व्यक्त गरे ।
कार्यक्रममा स्वागत मन्तव्य राख्दै राजपुर नगरपालिकाका प्रमुख प्रशासकीय अधिकृत बैजु ठाकुरले नगरपालिकाले लैङ्गिक हिंसा न्यूनीकरणलाई प्राथमिकतामा राखेर विभिन्न कार्यक्रम सञ्चालन गरिरहेको बताए ।
“किशोरी तथा युवतीहरूलाई आत्मविश्वासी, सक्षम र जागरूक बनाउनु हाम्रो पहिलो लक्ष्य हो । यसका लागि नगरपालिकाले सीप विकास, सूचना प्रविधि, आत्मरक्षा तथा जीवन कौशल तालिमहरू निरन्तर रूपमा विस्तार गर्दै आएको छ,” ठाकुरले भने ।
उनले लैङ्गिक हिंसा रोकथाममा सामुदायिक सहभागिता अत्यावश्यक रहेको भन्दै विद्यालय, अभिभावक, युवा समूह र स्थानीय निकायबीच समन्वय अझ मजबुत बनाउनुपर्ने आवश्यकता औँल्याए ।
कार्यक्रमअन्तर्गत आयोजित किशोरी पदयात्राले समाजमा महिला अधिकार र सुरक्षित वातावरण निर्माणकाे सन्देश प्रवाह गरेको आयोजकले बताएका छन् ।
अर्जुन कुमार यादव,रौतहट,मंसिर ०८ गते ।
भारतबाट भन्सार छली गुजरा नगरपालिकाको मैरा हुँदै चन्द्रपुरतर्फ ल्याइँदै गरिएको २२ बोरा रासायनिक मलसहित चार वटा मोटरसाइकल रौतहट प्रहरीले बरामद गरेको छ। अवैध रूपमा मल ओसारपसार भइरहेको सूचनाका आधारमा प्रहरीले विशेष निगरानी बढाइरहेको समयमा रंगपुर चौकीबाट खटिएको टोलीले सो सामान नियन्त्रणमा लिएको हो।
प्रहरी सहायक निरीक्षक जीवनराम धितालको कमाण्डमा गएको प्रहरी टोलीले ना.२४ प.६२३२, बिआर.300N,बिआर,33Y र बिआ.05 N 8983 नम्बर प्लेट भएका चार मोटरसाइकलसहित भारतीय रासायनिक मलका २२ बोरा बरामद गरेको इलाका प्रहरी कार्यालय चन्द्रनिगाहपुरले जनाएको छ। बरामद गरिएको मल नेपाल भित्र्याइने क्रममा सीमा क्षेत्र हुँदै गुजरा नगरपालिका पार गराई चन्द्रपुरतर्फ लैजाने तयारी भइरहेको प्रहरीको भनाइ छ।
उता, प्रहरीले रोकेर जाँच गर्न खोज्नेबित्तिकै मोटरसाइकलका चालकहरू फरार भएका छन्। उनीहरूलाई खोजी तथा घटनासम्बन्धी थप अनुसन्धान भइरहेको प्रहरीले जनाएको छ। अवैध मल तस्करी नियन्त्रणका लागि सीमा क्षेत्रमा कडाइ गरिएको प्रहरीले बताएको छ।
बज्जिकाञ्चल संवाददाता,राैतहट,मंसिर ०८ गते ।
राैतहटको फतुवा बिजयपुर नगरपालिकामा कार्यवाहक मेयर अम्बेया खातुनविरुद्ध वडाअध्यक्षहरूले सोमबार संयुक्तरूपमा व्यापक विरोध प्रदर्शन गरेका छन् । उनीहरूले बिजयपुर बजार परिक्रमा गर्दै नाराबाजीसहित र्याली निकालेका थिए । प्रदर्शनका क्रममा ‘कार्यवाहक मेयरको एकल निर्णय बन्द गर’, ‘नगरलाई बन्धक बनाउन पाइदैन ’, ‘करार कर्मचारी व्यवस्थापन गर’ जस्ता नारासहित कोणसभामा परिणत भएको थियो ।
कोणसभामा वडाअध्यक्षहरूले कार्यवाहक मेयर खातुन र उनका श्रीमान् माेहमद सेराजका कारण नगरपालिकामा प्रशासनिक काम ठप्प भएको आरोप लगाए ।
वडा नं २ का अध्यक्ष अनिरुद्ध प्रसाद यादव (सञ्जय) ले सबै वडाको कार्यालयमा तालाबन्दी हुनुपरेको र सेवाग्राही मारमा परेको बताए । उनका अनुसार पहिले नै कालोपत्रे भइसकेको सडकमा फेरि बजेट देखाएर माटो पुर्याई ग्राभेल गरिएको देखाइ नक्कली बिल तयार गरी भुक्तानीको दबाब दिइएको थियो । प्रमुख प्रशासकीय अधिकृत भरत यादवले अस्वीकार गरेपछि उनीहरूलाई सरुवा गरी नयाँ सीएओ मदन थापालाई ल्याइएपछि विवाद थप चर्किएको दाबी गरियो ।
वडा नं १ का अध्यक्ष विजय यादव ले कार्यवाहक मेयरले कार्यपालिकाको बैठक कहिल्यै नबोलाउने, बारम्बार आग्रह गर्दा पनि निर्णय प्रक्रियालाई पन्छाउने गरेको आरोप लगाए । निर्णयबिनै विभिन्न योजना अघि बढाइएको दाबीसमेत गरिएको छ ।
त्यस्तै, वडा नं ६ का अध्यक्ष रामएकवाल यादव ले कार्यवाहक मेयर कार्यालयमा उपस्थित नहुने र सेवाग्राहीलाई कार्यालयकाे साटो आफ्नै निवासमा बोलाउने गरेको बताएका छन् ।
वडा नं १० का अध्यक्ष मञ्जय कुमार चौधरी ले नगरपालिकामा कार्यरत ८७ करार कर्मचारीको तलब कार्यपालिका निर्णयअनुसार दिनुपर्ने भए पनि सेराजको दबाबमा तलब रोकेर कर्मचारीलाई आन्दोलनतर्फ धकेलिएको बताए । तलब रोकिँदा कर्मचारीहरूले कार्यालयमा तालाबन्दी गरेपछि सेवाप्रवाह पूर्ण रूपमा प्रभावित भएको उल्लेख गरियो ।
वडा नं ११ का अध्यक्ष ज्ञानेन्द्र चौधरी ले विद्युत् खर्च भुक्तानी गर्न नगर परिषद्ले निर्णय गरिसक्दा पनि सेराजको हस्तक्षेपका कारण प्रक्रिया अवरुद्ध भएको बताए।
विरोध प्रदर्शनमा सयौँ स्थानीयहरूको उपस्थिति रहेको प्रत्यक्षदर्शीले बताएका छन् । वडाअध्यक्षहरूले नगरपालिकामा “करोडौँको अनियमितता भएको” दाबी गर्दै कार्यवाहक मेयर अम्बेया खातुनको राजीनामा माग गरेका छन् ।
हनुमत कुमार यादव,राैतहट,मंसिर ०७ गते ।
जनता समाजवादी पार्टी (जसपा) नेपाल रौतहट जिल्ला समितिको आयोजनामा दुर्गाभगवती गाउँपालिका–४ पचरुखी पोखरीको तटमा सम्पन्न पार्टी प्रवेश तथा कार्यकर्ता भेला कार्यक्रममा झण्डै दुई सयभन्दा बढी नेता–कार्यकर्ताले विभिन्न दल परित्याग गरी सामूहिक रूपमा जसपामा प्रवेश गरेका छन् ।
कार्यक्रममा जसपा नेपालका राष्ट्रिय अध्यक्ष माननीय उपेन्द्र यादवले विशेष सम्बोधन गर्दै नवप्रवेशीहरूलाई स्वागत गरे । साथै उनले समावेशीता, समानता, मधेसको पहिचान र स्थानीय विकासका एजेन्डालाई थप सशक्त रूपमा अघि बढाउने प्रतिबद्धता व्यक्त गर्दै नवप्रवेशीहरूको आगमनले पार्टीलाई झनै सबल बनाएको बताए ।
त्यसैगरी, जिल्ला अध्यक्ष राजिव रंजन उर्फ राजु यादवले पनि कार्यक्रमलाई सम्बोधन गर्दै ‘जेन–जेड’ पुस्ताको हक–अधिकार, राजनीतिक सहभागिता, रोजगारीका अवसर र स्थानीय नेतृत्व विकासमा जसपा नेपाल प्रतिबद्ध रहेको जनाएका थिए । उनले युवा पुस्ताको सहभागिता बिनाको राजनीति सम्भव नहुने बताउँदै नवप्रवेशी युवालाई पार्टीमा सक्रिय भूमिका खेल्न आग्रह समेत गरे ।
कार्यक्रममा जनमत पार्टी परित्याग गर्दै बौधिमाई नगरपालिका–६ का वडा अध्यक्षका पूर्व–प्रत्याशी विजय यादव तथा आम जनता पार्टी छाडेर बौधिमाई नगरपालिका–४ का नेता स्माइल मियाले औपचारिक रूपमा जसपाको सदस्यता ग्रहण गरे ।
यस्तै, दुर्गाभगवती गाउँपालिका–१ निवासी तथा हालै सशस्त्र प्रहरी बलको रोजगारीबाट राजीनामा दिएका चन्दन ठाकुरले पनि आजै पार्टी प्रवेश गरेका छन् ।
जिल्ला समितिका अनुसार, विभिन्न दलका करिब दुई सय नेता तथा कार्यकर्ताहरूले सामूहिक रूपमा जसपा प्रवेश गरेका छन् । नेताहरूले नवप्रवेशी कार्यकर्ताहरूसँगै पार्टीलाई स्थानीयदेखि राष्ट्रिय स्तरसम्म मजबुत बनाउने लक्ष्य व्यक्त गरे ।
बज्जिकाञ्चल संवाददाता,राैतहट,मंसिर ०७ गते ।
रौतहट — नेपाल विश्वकर्मा लोहार संघ रौतहटले २०८२ असोज १ गते सम्पन्न भएको विश्वकर्मा पूजाको आय–व्यय औपचारिक रूपमा सार्वजनिक गरेको छ। आईतबार बसेको समितिको बैठकले आर्थिक विवरण प्रस्तुत गर्दै संघले पारदर्शिता नै संस्थाको विश्वासको मुख्य आधार भएको बताएकाे छ।
लोहार समुदायका कुलदेवता बाबा विश्वकर्मा जीको वार्षिक पूजा यस वर्ष पनि भव्य रूपमा सम्पन्न भएको थियो। रौतहटको गरुडा नगरपालिका–५ शिवनगरस्थित बाबा विश्वकर्मा जीको मन्दिरमा आयोजित पूजामा स्थानीय लोहार समुदायको उल्लेखनीय सहभागिता रहेको थियो। पूजाका विभिन्न तयारी, व्यवस्थापन तथा कार्यक्रमहरू समुदायकै सक्रियतामा सम्पन्न भएका थिए।
पूजाको लागि लोहार स्वजातीयहरूले चन्दा संकलन गरेका थिए। संकलित रकम तथा खर्चको विवरण सार्वजनिक गरिएको छ। संघका अनुसार:
कुल संकलित चन्दा (आय): रु. २,४५,४५६,कुल खर्च: रु. २,१८,७१५,जम्मा बचत: रु. २६,७१५
संघले आर्थिक विवरण सार्वजनिक गर्नु संस्थाको पारदर्शिता र विश्वसनीयता मजबुत बनाउन महत्वपूर्ण भएको सघका अध्यक्ष विवेक शर्माले बताएको छ। पूजासँगै मन्दिरको पेन्ट, गेट पेन्ट, रक्तदान कार्यक्रम, स्वास्थ्य शिविर, भजन–कीर्तन तथा स्वजातीय सम्मान कार्यक्रम पनि सम्पन्न गरिएको थियो।
यस वर्षको पूजा कार्यक्रम सफलतापूर्वक सम्पन्न गर्न योगदान पुर्याउने सम्पूर्ण स्वजातीय, सहयोगी हातहरू र सहभागीहरूलाई संघले हार्दिक धन्यवाद व्यक्त गरेको छ।
गुडु यादव,राैतहट,मंसिर ०७ गते ।
रौतहटको गरुडा नगरपालिका–१ जयनगरका निवासी तथा इलाका प्रशासन कार्यालय गरुडामा कार्यरत कर्मचारी अवधेश यादवले गरूडामा अवस्थित वंशीराम जयसवाल अनाथालयका बालबालिकालाई राहत सामग्री वितरण गरेका छन् ।
एक विशेष समारोहबीच गरिएको कार्यक्रममा यादवले लत्ता–कपडा, खाद्य सामग्रीसहितका राहत वस्तुहरू अनाथालयलाई हस्तान्तरण गरेका हुन् । उनले भगवान् पशुपतिनाथको कृपाले आफूलाई सबै आवश्यक वस्तु प्राप्त भइरहेको बताउँदै समाजका अभावग्रस्त बालबालिकालाई सहयोग गर्न पाउँदा खुशी लागेको बताए ।
यादवले अनाथालयमा बसोबास गर्दै आएका बालबालिकाको सहयोगका लागि आगामी दिनमा पनि निरन्तर रूपमा राहत सामग्री उपलब्ध गराइरहने प्रतिबद्धता जनाएका छन् ।
अनाथालय व्यवस्थापनले आवश्यकताका बेला उपलब्ध गराइएको सहयोगप्रति धन्यवाद व्यक्त गर्दै बालबालिकाको दैनिकी सहज बनाउन यस्ता सहयोग महत्वपूर्ण हुने धारणा राखेको छ ।
