आरके श्रीवास्तव,राैतहट,२९ गते मंसिर ।
रौतहट । सामुदायिक विद्यालयमा सञ्चालन हुने दिवा खाजा कार्यक्रमको गुणस्तरमाथि प्रश्न उठिरहेका बेला रौतहटको मौलापुर नगरपालिकाले शिक्षालाई पहिलो प्राथमिकतामा राख्दै उदाहरणीय अभ्यास प्रस्तुत गरिरहेको छ। नगरपालिकाको शिक्षा शाखाले तयार पारेको शेड्युलअनुसार नियमित र गुणस्तरीय दिवा खाजा सञ्चालन हुँदै आएको छ ।
आईतवार मौलापुर नगरपालिका वडा नम्बर ३ स्थित श्री माध्यमिक विद्यालयमा विद्यार्थीहरूलाई शुद्ध दुधबाट तयार गरिएको खिर खुवाइएको थियो । शेड्युलअनुसार कहिले खिर, कहिले चना–चिउरा, त कहिले मासु–चिउरा वा अण्डा खुवाइँदै आएको प्रधानाध्यापक चन्देश्वर साहले बताए । यसले विद्यार्थीको पोषण सुधारसँगै विद्यालयमा नियमित उपस्थिति बढाउन सहयोग पुगेको उनको भनाइ छ ।
नगरपालिकाका शिक्षा सह–संयोजक धर्मेन्द्र कुमार साहका अनुसार दिवा खाजा कार्यक्रम पारदर्शी र अनुशासित ढंगले सञ्चालन भइरहेको छ ।
“शिक्षा शाखाबाट जारी गरिएको तालिकाअनुसार नै दिवा खाजा सञ्चालन गरिरहेका छौं, गुणस्तरमा कुनै सम्झौता गरिएको छैन,” उनले भने।
दिवा खाजासँगै समग्र शिक्षामा गरिएको लगानी पनि उल्लेखनीय रहेको नगरप्रमुख रिना कुमारी साहले बताइन् । मौलापुर नगरपालिकाले कुल बजेटको करिब ४० प्रतिशत शिक्षा क्षेत्रमा खर्च गर्दै आएको उनले जानकारी दिइन् ।
“२०७४ सालमा निर्वाचित हुँदा नगरपालिकामा दुईवटा मात्र माध्यमिक विद्यालय थिए, अहिले ६ वटा माध्यमिक विद्यालय सञ्चालनमा छन्,” नगरप्रमुख साहले भनिन् ।
गुणस्तरीय शिक्षामा मौलापुर नगरपालिकाले मधेस प्रदेशमै उत्कृष्ट सम्मान प्राप्त गरिसकेको उनले उल्लेख गरिन् । शिक्षक अभावका विषयमा शिक्षा मन्त्रालयलाई पटक–पटक दरबन्दी अनुसार शिक्षक पठाइदिन आग्रह गरिए पनि पर्याप्त शिक्षक नआएपछि नगरपालिकाले आफ्नै स्रोतबाट एक सयभन्दा बढी नगर शिक्षक भर्ना गरी विद्यालय सञ्चालन गरिरहेको उनको भनाइ छ ।
भौतिक पूर्वाधारतर्फ मौलापुर नगरपालिकाले शिक्षा क्षेत्रमा उल्लेखनीय लगानी गरेको छ । हालसम्म १५० भन्दा बढी कक्षा कोठा निर्माण भइसकेका छन् । विद्यालयका लागि जग्गा खरिददेखि नमूना भवन निर्माणसम्मका काम सम्पन्न भई मौलापुरको शैक्षिक भौतिक पूर्वाधार देशमै नमूना बन्दै गएको नगरप्रमुखको दाबी छ ।
यसैबीच मौलापुर नगरपालिकाका प्रमुख प्रशासकीय अधिकृत रामबाबु साहले शिक्षामा पहुँच विस्तारका लागि प्राविधिक शिक्षालाई विशेष प्राथमिकता दिइएको बताए । उनका अनुसार सिभिल इन्जिनियरिङ र जियोमेट्रिक इन्जिनियरिङतर्फ डिप्लोमा तहको शिक्षा मौलापुर नगरपालिका अन्तर्गतका छोरी–बुहारीका लागि शतप्रतिशत निःशुल्क व्यवस्था गरिएको छ ।
“छात्रहरूका लागि भने २५ प्रतिशत छात्रवृत्ति प्रदान गरिरहेका छौं,” प्रमुख प्रशासकीय अधिकृत साहले बताए ।
उनले विगतमा माध्यमिक तहमा अध्ययनरत विद्यार्थीहरूका लागि ल्यापटप वितरण गरिएको जानकारी दिँदै डिजिटल शिक्षामा पनि नगरपालिकाले जोड दिएको स्पष्ट पारे ।
दिवा खाजा कार्यक्रमदेखि बजेट, छात्रवृत्ति, शिक्षक व्यवस्थापन र भौतिक पूर्वाधारसम्म शिक्षाको सबै पक्षमा गरिएको लगानीका कारण मौलापुर नगरपालिका सामुदायिक शिक्षाको क्षेत्रमा अन्य स्थानीय तहका लागि अनुकरणीय उदाहरण बन्दै गएको स्थानीयको भनाइ छ ।
आरके श्रीवास्तव,राैतहट,२९ गते मंसिर ।
रौतहट । रौतहटको राजपुर नगरपालिकाले सोमबारदेखि आफ्नै नवनिर्मित प्रशासकीय कार्यालय भवनबाट औपचारिक रूपमा सेवा प्रवाह सुरु गरेको छ । राजपुर नगरपालिका स्थित राजिक चोकमा निर्माण सम्पन्न भएको भवनको नगरप्रमुख डा. राजिक आलमले विशेष समारोहबीच विधिवत् उद्घाटन गरेपछि सेवा सञ्चालनमा आएको हो ।
उद्घाटन समारोहलाई सम्बोधन गर्दै नगरप्रमुख डा. आलमले नगरवासीको इच्छा, मेहनत र चाहनाअनुसार निर्धारित समयमै प्रशासकीय भवन निर्माण भई उद्घाटन गर्न पाउँदा खुशी व्यक्त गरेका छन् । विगतमा सानो र अस्थायी कोठाबाट जेनतेन सेवा दिनुपरेको अवस्थाको स्मरण गर्दै उनले अब आफ्नै भवनबाट सेवा सुरु हुनु राजपुर नगरपालिकाका लागि महत्वपूर्ण उपलब्धि भएको बताए ।
नगरको विकास क्रमशः अघि बढिरहेको उल्लेख गर्दै नगरप्रमुख आलमले शिक्षा, स्वास्थ्य, सडक तथा भौतिक पूर्वाधार क्षेत्रमा उल्लेखनीय सुधार हुँदै आएको जनाए । नगरवासीको निरन्तर साथ र सहयोग प्राप्त भएमा राजपुर नगरपालिकालाई नमूना नगरपालिकाका रूपमा विकास गर्ने प्रतिबद्धता पनि उनले व्यक्त गरे ।
कार्यक्रममा निमित्त प्रमुख प्रशासकीय अधिकृत बैजु ठाकुरले नयाँ भवनबाट सेवा सुचारु भएसँगै सेवा प्रवाहलाई थप व्यवस्थित, छिटो र पारदर्शी बनाइने बताए। प्रशासनिक कामकाजलाई एकीकृत संरचनाबाट सञ्चालन गर्दा सेवाग्राहीमैत्री वातावरण सिर्जना हुने र जनताको गुनासो तथा कामकारबाहीमा ढिलासुस्ती नहुने उनको भनाइ थियो ।
समारोहमा राैतहटका प्रमुख जिल्ला अधिकारी दिनेशसागर भुसालले नयाँ प्रशासकीय भवनबाट सेवा सुचारु भएकोमा राजपुरवासीलाई बधाई दिँदै जनताको कामकाजमा कुनै पनि ढिलासुस्ती नगर्न सुझाव दिए । पायक पर्ने स्थानमा भवन निर्माण भएकाले सेवाग्राहीका विगतका झन्झटहरू क्रमशः हट्दै जाने र सेवा प्रवाह थप प्रभावकारी हुने अपेक्षा उनले व्यक्त गरे ।
उद्घाटन समारोहमा नगर उपप्रमुख जमिला असगरी, नेपाल प्रहरीका एसपी रबिन कार्की, सशस्त्र प्रहरीका एसपी रामहरी अधिकारी, राष्ट्रिय अनुसन्धानका उपनिर्देशक कुमार बुढाथोकी, नेपाल पत्रकार महासंघका अध्यक्ष संजय कार्की, डा. कौशर आलम, वडा नं. १ देखि ९ सम्मका वडाध्यक्षहरू, जिल्ला समन्वय समितिका सदस्यहरू, नगर तथा वडा सदस्यहरू, विभिन्न क्षेत्रका व्यक्तित्वहरू र उल्लेख्य संख्यामा स्थानीय बासिन्दाहरूको उपस्थिति रहेको थियो ।
साथै, उद्घाटन अवसरमा नगरप्रमुख, उपप्रमुख, प्रमुख जिल्ला अधिकारी, प्रमुख प्रशासकीय अधिकृत, सुरक्षा निकायका प्रतिनिधि, वडाध्यक्षहरू, निर्माण व्यवसायी, सञ्चारकर्मी लगायत विभिन्न क्षेत्रका व्यक्तित्वहरूलाई सम्मान गरिएको नगरपालिकाले जनाएको छ ।
नगरपालिकाका लेखा अधिकृत मनोज कर्णका अनुसार करिब ५ करोड ७२ लाख रुपैयाँको लागतमा नयाँ प्रशासकीय भवन निर्माण सम्पन्न भएको हो ।
आरके श्रीवास्तव,राैतहट,मंसिर २८ गते ।
रौतहट । नेत्र ज्योती आँखा हस्पिटल प्रा. लि., गरुडा नगरपालिका–४, रौतहटको प्राविधिक सहयोगमा कटहरिया नगरपालिका–८ (पिप्रा पोखरीया) मा निःशुल्क आँखा शिविर सम्पन्न भएको छ । तिलगंगा आँखा हस्पिटल, काठमाडौंको आयोजनामा मिति २०८२।०८।२८ गते आइतवार बिहान ९ बजेदेखि दिउँसो ३ बजेसम्म शिविर सञ्चालन गरिएको थियो ।
शिविरमा आँखा परीक्षण गराउँदा ४२ जनामा मोतियाबिन्दु फेला परेको वडा कार्यालयका कर्मचारी मुकुन्द यादवले जानकारी दिएका छन् । उनका अनुसार अन्य दर्जनौँ सेवाग्राहीले सामान्य आँखा परीक्षण, औषधि तथा परामर्श सेवा लिएका थिए ।
स्थानीय आयोजक तथा कटहरिया नगरपालिका–८ का वडा अध्यक्ष समिश विक्रम शाहले ग्रामीण तथा विपन्न समुदायका नागरिकहरूका लागि आँखा शिविर अत्यन्त आवश्यक रहेको बताए । “आर्थिक अभाव र जानकारीको कमीका कारण धेरै नागरिक उपचारबाट वञ्चित हुने अवस्था छ,” उनले भने, “यस्ता शिविरले समयमै रोग पहिचान र उपचारमा सहयोग पुग्ने भएकाले आगामी दिनमा पनि निरन्तरता दिन पहल गरिनेछ।”
वडा अध्यक्ष शाहले शिविर सफल बनाउन सहयोग गर्ने तिलगंगा आँखा हस्पिटल, नेत्र ज्योती आँखा हस्पिटल, स्वास्थ्यकर्मी, स्वयंसेवक तथा स्थानीयवासीप्रति धन्यवाद व्यक्त गरे । उनले मोतियाबिन्दु पहिचान भएका बिरामीहरूको शल्यक्रियाका लागि आवश्यक समन्वय गरिने पनि जानकारी दिए ।
आरके श्रीवास्तव,राैतहट,२८ गते मंसिर ।
रौतहट । रौतहट जिल्लाको राजपुर नगरपालिकामा निर्माण सम्पन्न भएको प्रशासकीय कार्यालय भवनको औपचारिक समुद्घाटन कार्यक्रम मिति २०८२ साल मंसिर २९ गते बिहान ११ बजे नगर प्रमुख डा. मो. राजीक आलमको प्रमुख आतिथ्यतामा सम्पन्न हुने भएको छ ।
नगरपालिकाको सेवा प्रवाहलाई अझ प्रभावकारी, व्यवस्थित र जनमुखी बनाउने उद्देश्यले निर्माण गरिएको यस भवनले नगर प्रशासनलाई एउटै छानामुनि समेट्दै नागरिकलाई छिटोछरितो सेवा प्रदान गर्ने अपेक्षा गरिएको छ ।
नगर प्रमुख डा. मो. राजीक आलमले प्रशासकीय भवन नगरको दीर्घकालीन विकास यात्राको महत्वपूर्ण आधार भएको बताउँदै, “यो भवन केवल संरचना मात्र नभई सुशासन, पारदर्शिता र उत्तरदायित्व सुदृढ गर्ने माध्यम हो । अब नागरिकले एकै स्थानबाट गुणस्तरीय सेवा पाउने वातावरण बनेको छ,” भन्नुभयो ।
त्यस्तै, प्रमुख प्रशासकीय अधिकृत बैजु ठाकुरले भवन सञ्चालनसँगै प्रशासनिक कार्यसम्पादनमा उल्लेखनीय सुधार आउने विश्वास व्यक्त गर्दै, “नयाँ भवनले सेवा प्रवाहको समय घटाउने, कर्मचारीबीच समन्वय बढाउने र अभिलेख व्यवस्थापनलाई आधुनिक बनाउनेछ । यसले नागरिक सन्तुष्टि अभिवृद्धि गर्न महत्वपूर्ण भूमिका खेल्नेछ,” भन्नुभयो ।
नगरपालिकाले उक्त ऐतिहासिक तथा महत्वपूर्ण कार्यक्रममा आम जनसमुदाय, सञ्चारकर्मी तथा सरोकारवाला सबैलाई गरिमामय उपस्थितिका लागि हार्दिक अनुरोध गरेको छ । कार्यक्रमले राजपुर नगरपालिकाको प्रशासनिक सुदृढीकरण र विकास यात्रामा नयाँ आयाम थप्ने विश्वास लिइएको छ ।
बज्जिकाञ्चल संवाददाता,सर्लाही, २७ मंसिर ।
लोकतान्त्रिक समाजवादी पार्टी नेपाल (लोसपा) जिल्ला कार्यसमिति सर्लाहीले आसन्न प्रतिनिधिसभा सदस्य निर्वाचन २०८२ का लागि प्रत्यक्ष तथा समानुपातिक दुवै तर्फका उम्मेदवारहरूको नाम सर्वसम्मत रूपमा टुंगो लगाई पार्टी केन्द्रमा सिफारिस गरेको छ ।
पार्टी केन्द्रीय कार्यालय बबरमहलबाट जारी परिपत्रअनुसार शनिबार जिल्ला पार्टी कार्यालय मलंगवामा सम्पन्न जिल्ला कार्यसमितिको बैठकले उम्मेदवारहरूको छनोट गरेको हो । जिल्ला अध्यक्ष रामप्रसाद राय यादवको अध्यक्षतामा बसेको बैठकमा केन्द्रदेखि वडा तहसम्मका नेता तथा कार्यकर्ताहरूको सहभागिता रहेको थियो ।
प्रत्यक्षतर्फ सर्लाहीका चारवटै निर्वाचन क्षेत्रबाट केन्द्रीय पदाधिकारी तथा अनुभवी नेताहरूलाई उम्मेदवारका रूपमा सिफारिस गरिएको छ । निर्वाचन क्षेत्र नम्बर १ बाट केन्द्रीय उपाध्यक्ष रामप्रकाश चौधरी, क्षेत्र नम्बर २ बाट केन्द्रीय सदस्य भिनक लाल राय (सुजन) र रञ्जित कुमार ठाकुर (डा. बिरवंश बैठा), क्षेत्र नम्बर ३ बाट केन्द्रीय सचिव रामेश्वर राय तथा क्षेत्र नम्बर ४ बाट केन्द्रीय महासचिव मनिष कुमार मिश्रको नाम सिफारिस गरिएको छ ।
समानुपातिकतर्फ समावेशी सिद्धान्तलाई आधार मान्दै महिला, मधेसी, दलित तथा खुला समूहबाट उम्मेदवार छनोट गरिएको छ । सूचीमा अन्जु देवी बैठा, मिना देवी महतो कोइरी, सरिता देवी साह, सुनीता कुमारी देवी, कामरेन्द्र कुमार वर्मा र रेखा कुमारी साहलगायतका नेताहरूको नाम समावेश गरिएको छ ।
देश र मधेसको वर्तमान राजनीतिक परिवेशलाई ध्यानमा राख्दै यसपटक सर्लाहीका चारवटै निर्वाचन क्षेत्रमा युवा नेतृत्व अघि सार्ने उद्देश्यले उम्मेदवार छनोट गरिएको जिल्ला कार्यसमितिले जनाएको छ । साथै, पार्टीका केन्द्रीय अध्यक्ष महन्थ ठाकुरलाई समानुपातिकतर्फ उम्मेदवार बनाउने सुझावसहित सिफारिस गरिएको छ ।
पार्टीको नीति, सिद्धान्त र लोकतान्त्रिक समाजवादको मार्गदर्शनअनुसार योग्य, सक्षम तथा जनआधार भएका व्यक्तिहरूलाई उम्मेदवारका रूपमा छनोट गरिएको जिल्ला सचिव मिथलेश यादवले जानकारी दिनुभयो । सिफारिस गरिएका उम्मेदवारहरूको सूची पार्टी केन्द्रमा पठाइसकिएको छ ।
आरके श्रीवास्तव,राैतहट,२७ गते मंसिर ।
रौतहट जिल्लाको मध्य भाग सुकदेव चोकमा रहेको डा. मधुरेन्द्र यादवद्वारा सञ्चालित नेपाल तराई सिटी हस्पिटलले अत्याधुनिक सी–आर्म मेसिन जडान गरी औपचारिक रूपमा सेवा सुरु गरेको छ । यस प्रविधिबाट हड्डी–जोर्नी, शल्यक्रिया तथा ट्रमा केयरमा उपचार अझ सुरक्षित, छिटो र प्रभावकारी हुने अस्पतालले जनाएको छ ।
रियल–टाइम एक्स–रे सुविधायुक्त सी–आर्मले अपरेशनका क्रममा तुरुन्तै सही निर्णय लिन सहयोग पुर्याउने विश्वास व्यक्त गरिएको छ । आज सञ्चारकर्मीहरू सँग कुराकानी गर्दै अस्पतालका सञ्चालक डा. मधुरेन्द्र यादवले आधुनिक, विश्वसनीय र सुलभ उपचार समुदायसम्म पुर्याउनु हस्पिटलको प्राथमिकता रहेको बताए ।
यसैबीच, स्थानीय नागरिकको स्वास्थ्य सेवा सहज र किफायती बनाउने उद्देश्यले हस्पिटलले पुस १ गतेदेखि माघ १ गतेसम्म विशेष शल्यक्रिया सेवा सञ्चालनमा ल्याएको छ । यस अवधिमा बचेदानी, एपेन्डिक्स, हर्निया, हाइड्रोसिल, बावसीर/भगन्दर तथा सिजेरियन जस्ता अपरेसनहरू अत्यन्त न्यून शुल्कमा उपलब्ध गराइनेछन् ।
अनुभवी चिकित्सक टोली, आधुनिक अपरेसन थिएटर, डिजिटल तथा भिडियो एक्स–रे सुविधासहित नेपाल तराई सिटी हस्पिटलले आगामी दिनमा पनि नयाँ स्वास्थ्य प्रविधि र सेवा विस्तार गर्दै जाने प्रतिबद्धता जनाएको छ । सीमित समयका लागि लागू यो विशेष अफरको लाभ लिन इच्छुक बिरामीलाई समयमै सम्पर्क गर्न अस्पतालले अनुरोध गरेको छ ।
आरके श्रीवास्तव,राैतहट,२७ गते मंसिर ।
रौतहट । रौतहटको वृन्दावन नगरपालिका–८ मा सञ्चालित कुन्ती इट्टा उद्योगमा आजदेखि भट्टी बाल्ने काम सुरु गरिएको छ । प्रहरी प्रशासनले इट्टा पोल्ने कार्य तत्काल सुरु नगर्न निर्देशन दिएपछि त्यहाँ कार्यरत कामदारहरू प्रतिकारमा उत्रिएका छन् ।
इट्टा उद्योगसँग आफ्नो रोजीरोटी प्रत्यक्ष रूपमा जोडिएको बताउँदै कामदारहरूले उद्योग सञ्चालनमा अवरोध नलगाउन माग गरेका छन् । इट्टा व्यवसायी संघले प्रहरी प्रशासनसँग मिलेर इट्टा पोल्ने कार्यमा रोक लगाउन खोजेपछि आफूहरू आक्रोशित बनेको कामदारहरूको भनाइ छ ।
उद्योगमा कार्यरत सबिर अन्सारीले भने, “मेरो पूरा परिवार यही इट्टा उद्योगमा निर्भर छ । यहाँ काम गरेर आएको पैसाले घर चल्छ । उद्योग चलेन भने तलब कहाँबाट पाउने ? परिवार कसरी पाल्ने ? प्रहरी र संघ मिलेर हामीमाथि दमन गर्न खोजिरहेका छन् । यदि उद्योग चल्न दिइएन भने हामी जे पनि गर्न तयार छौं ।”
कामदारहरूका अनुसार हाल आर्थिक मन्दीका कारण रोजगारीको अभाव छ । इट्टा उद्योग सञ्चालन भए सयौँ श्रमिकले रोजगारी पाउने उनीहरूको दाबी छ । सरकारले इट्टा सञ्चालनका लागि निश्चित समयसीमा तोकेको भए पनि मौसम प्रतिकूल भई पानी परेमा उद्योगीहरूले लाखौँ रुपैयाँको क्षति बेहोर्नुपर्ने अवस्था रहेको उनीहरू बताउँछन् । यस्तो क्षतिमा न त कतैबाट क्षतिपूर्ति पाइने, न त सहयोग नै हुने गरेको गुनासो छ ।
इट्टा उद्योग सञ्चालकहरूले सहयोग गर्न नसक्ने अवस्था भए कम्तीमा काम गर्न दिने वातावरण बनाउन सरकार र सम्बन्धित निकायसँग आग्रह गरेका छन् । उनीहरूले उद्योग सञ्चालनमा अनावश्यक अवरोध नलगाई श्रमिकको जीविकोपार्जनलाई ध्यान दिनुपर्नेमा जोड दिएका छन् ।
आरके श्रीवास्तव,राैतहट,२६ गते मंसिर ।
गरुडा (रौतहट) । रौतहटको गरुडा नगरपालिकामा रहेको श्री नमूना माध्यमिक विद्यालय, गरुडा बैरियाले विद्यार्थीको सिर्जनात्मक र बौद्धिक विकासलाई लक्षित गर्दै ‘बुक फ्री फ्राइडे’ अवधारणाअनुसार नमूना काम गरिरहेको छ।
यसै अवधारणाअन्तर्गत हरेक शुक्रबार विद्यालयमा हैण्ड राइटिङ्ग तथा चित्रकला प्रतियोगिता आयोजना गरिएको छ । प्रतियोगितामा कक्षा १ देखि ५ सम्मका विद्यार्थीहरूबीच चित्रकला तथा कक्षा ६ देखि १० सम्मका विद्यार्थीहरूबीच हैण्ड राइटिङ्ग प्रतियोगिता सम्पन्न भएको थियो । प्रतियोगितामा उत्कृष्ट प्रदर्शन गर्ने विद्यार्थीहरूलाई पुरस्कारसमेत प्रदान गरिएको विद्यालयले जनाएको छ ।
विद्यालयका प्रधानाध्यापक प्रभु राउत पटेलका अनुसार विद्यालयको वार्षिक कार्ययोजनाअनुसार प्रत्येक शुक्रबार पुस्तकविहीन अतिरिक्त क्रियाकलाप सञ्चालन हुँदै आएको छ । उहाँले भन्नुभयो, “विद्यार्थीहरूको सर्वाङ्गीण विकासका लागि वादविवाद प्रतियोगिता, हाजिरी जवाफ, मिनिङ्ग कम्पिटिसन, चित्रकला, हैण्ड राइटिङ्गजस्ता विविध अतिरिक्त क्रियाकलापहरू नियमित रूपमा गर्दै आएका छौँ। यसले विद्यार्थीहरूको आत्मविश्वास, सिर्जनशीलता र सिकाइ क्षमतामा सकारात्मक प्रभाव पारेको छ।”
यस कार्यक्रमले सामुदायिक विद्यालयका विद्यार्थीहरूलाई उत्साहित बनाएको र कक्षाबाहिरको सिकाइमा रुचि बढाएको प्रधानाध्यापक पटेलले बताउनुभयो । प्रतियोगितामा शिक्षकहरूको पनि सक्रिय सहभागिता रहेको थियो ।
त्यसैगरी विद्यालय व्यवस्थापन समितिका अध्यक्ष सन्तोष साहले विद्यालयले सुरु गरेको ‘बुक फ्री फ्राइडे’ जस्ता कार्यक्रम प्रशंसनीय रहेको उल्लेख गर्दै यस्ता क्रियाकलापले सामुदायिक विद्यालयप्रति अभिभावक र विद्यार्थीको विश्वास बढ्ने बताउनुभयो ।
उहाँले भन्नुभयो, “पाठ्यक्रमसँगै अतिरिक्त क्रियाकलापमा जोड दिनु आजको आवश्यकता हो । विद्यालयले थालेको यो पहललाई निरन्तरता दिन व्यवस्थापन समिति पूर्ण रूपमा सहयोग गर्न तयार छ।”
विद्यालयको यस पहलले विद्यार्थीहरूको बौद्धिक, सिर्जनात्मक तथा व्यक्तित्व विकासमा महत्वपूर्ण योगदान पुर्याउने अपेक्षा गरिएको छ ।
आरके श्रीवास्तव,राैतहट,२६ गते मंसिर ।
रौतहटबाट नियमित रूपमा प्रकाशित हुँदै आएको स्थानीय पोष्ट साप्ताहिक पत्रिका पछिल्लो समय पाठक मात्र होइन, नवसर्जकहरूबीच पनि अत्यन्त लोकप्रिय बन्दै गएको छ । हरेक सोमबार प्रकाशन हुने यस पत्रिकाले नव प्रतिभालाई प्रोत्साहन गर्ने उद्देश्यले पृष्ठ ७ मा “नव सर्जक साहित्य चौतारी” शीर्षकअन्तर्गत कविता, लेख तथा साहित्यिक रचनाहरूलाई प्राथमिकताका साथ प्रकाशित गर्दै आएको छ ।
यस पहलपछि नव साहित्यकारहरूमा लेखनप्रतिको उत्साह बढ्दै गएको छ भने उनीहरूले आफ्ना रचना नियमित रूपमा पत्रिकामा पठाइरहेका छन् ।
शुक्रबार स्थानीय पोस्ट साप्ताहिक का प्रकाशक तथा सम्पादक आर.एन. पटेल रौतहटको गरुडा स्थित माध्यमिक विद्यालय गरुडामा पुगेर विद्यार्थीहरूको हातमै पत्रिका वितरण गर्नुभएको थियो । आफ्नै कविता र लेख पत्रिकामा प्रकाशित भएको देख्दा विद्यार्थीहरू अत्यन्तै खुशी देखिन्थे ।
विद्यालय व्यवस्थापन समिति अध्यक्ष सन्तोष साहले विद्यार्थीहरूलाई पत्रिका वितरण गर्दै लेखन क्षेत्रमा अगाडि बढ्न प्रेरणा दिनुभएको थियो । उनले स्थानीय पोष्ट साप्ताहिकले विद्यार्थी तथा नवसर्जकहरूको सिर्जनालाई निरन्तर स्थान दिँदै आएकोमा प्रशंसा गर्दै पत्रिकाप्रति धन्यवाद ज्ञापन गर्नुभयो ।
स्थानीय प्रतिभाको पहिचान र साहित्यिक विकासमा स्थानीय पोस्ट साप्ताहिकले खेलेको भूमिकाले आगामी दिनमा अझ धेरै नवसर्जक जन्मिने अपेक्षा गरिएको छ ।
बज्जिकाञ्चल संवाददाता,पर्सा,मंसिर २६ गते ।
वीरगंज । कमन जेनजी नेपाल र जेनजी नेपालले आज वीरगंजमा खबरदारी मोटरसाईकल र्याली निकालेको छ । जेनजी हत्यारा, भ्रष्टाचारीलाई कारबाही गर्नुपर्ने, जेनजीसंग गरिएका नक्कली सम्झौता खारेज गर्नुपर्ने लगायतका माग गर्दै खबरदारी मोटरसाईकल र्याली निकालिएको हो ।
वीरगंजको लालबंगलाबाट निष्केको सो मोटरसाईकल र्याली घण्टाघर, माइस्थान, नारायणी अस्पताल, रजतजयन्ती चौक, आदर्शनगर हुँदै घण्टाघरमा पुगेर समापन भएको थियो । सुशीला कार्की नेतृत्वको सरकारले जेनजी हत्यारा, भ्रष्टाचारीलाई कारबाही गर्न असफल भएको भन्दै उनीहरुले प्रधानमन्त्री सुशीलाको राजीनामा समेत माग गरेका छन् ।
जेनजी हत्यारा र भ्रष्टाचारीलाई कारवाही गर, जेनजी आन्दोलनलाई संस्थागत गर, निकास बिना निर्वाचनको औचित्य छैन, देखावटी सम्झौता हाम्रो माग हैन, जेनजीको माग सुनिश्चित गर, जेनजी माथिको दमन बन्द गर, हत्यारा र भ्रष्टाचारीलाई कारवाही गर, सुशीला तिम्रो पाराले दुख पाए साराले, सुशीला सरकार मुर्दाबाद, हत्यारालाई पक्राउ गर, भ्रष्टाचारीलाई कारबाही गर, पक्राउ परेका जेनजीलाई यथाशिघ्र रिहाइ गर लगायतका नारा लगाउदै र्याली निकालिएको हो ।
वीरगंजमा मोटरसाईकल र्याली निकाल्नुभन्दा अघि कमन जेनजी नेपालका अध्यक्ष विकेश साहले बिहीबार काठमाडौंमा पत्रकार सम्मेलन गर्दै हालै सरकार र जेनजीबीच भएको सम्झौता धोखा हो भन्दै च्यातेर विरोध गरेका छन् ।
जेनजी हत्यारा, भ्रष्टाचारीलाई कारबाही गर्नुपर्ने, जेनजी आन्दोलनकारीलाई धरपकड बन्द गर्नुपर्ने र पक्राउ परेकालाई रिहाई गर्नुपर्ने लगायतका माग आफूहरुको रहेको कमन जेनजी नेपालका अध्यक्ष साहले जनाएका छन् ।
‘जेनजी हत्यारा, भ्रष्टाचारीलाई पक्राउ गर्न नसक्ने सुशीला सरकारले जेनजी आन्दोलनकारीलाई पक्राउ गरेर बहादुरी देखाइरहेका छ । जेनजी हत्यारा केपी ओली, रमेश लेखक लगायतलाई यथाशिघ्र पक्राउ गरी कारबाही गर्न हामीले माग गर्दैआएका छौ,’ साहले भने, ‘तर यो बहिरा सरकारले हत्यारालाई पक्राउ गर्न सकेको छैन् । नाटक मात्रै गरिरहेको छ । फेक आइडीबाट बनेको सरकारले फेक जेनजीलाई राखेर सम्झौताको नाटक गरिरहेको छ ।’
सरकारद्वारा हालै प्रस्तुत गरिएको सम्झौतापत्रले जेनजी जनआन्दोलनको वास्तविक मर्म, मुद्दा र जनआवाजलाई पूर्ण रूपमा वेवास्ता गरेको जेनजी नेपालका संयोजक कृष्णमोहन सहनीले जनाएका छन् । सरकारले देशको राजनीतिक संकट समाधान गर्न आवश्यक मूल प्रश्नहरूलाई सम्बोधन गर्न असफल भएको सहनीले बताए ।
‘फेक आईडीबाट बनेको सुशीला सरकारले अझै पनि आफ्नै निर्देशनमा चल्ने फेक जेनजीहरूलाई राखी गरेको समझौता मान्य छैन । देशव्यापी रूपमा उभिएको परिवर्तनको चाहना, युवाहरूको बलिदान र जनताको भरोसालाई कमजोर बनाउने यस्तो समझौताप्रति कमन जेनजी नेपाल कडा विरोध गर्दछ,’ कमन जेनजी नेपालका अध्यक्ष साहले भने ।
र्यालीमा कमन जेनजी नेपालका अध्यक्ष विकेश साह, जेनजी नेपालका कृष्णमोहन सहनीका साथै निकोलस भुसाल हजारौंको विशेष सहभागिता रहेको थियो ।
